មេរៀនទី ១២៨
ថែស្សាឡូនីចទី១ ៣–៥
សេចក្តីផ្ដើម
សាវកប៉ុលមានបំណងចង់ពង្រឹងសេចក្ដីជំនឿរបស់សមាជិកសាសនាចក្រនៅថែស្សាឡូនីច ។ លោកបានបង្រៀនពួកគេអំពីការរស់ឡើងវិញរបស់មនុស្សស្លាប់នៅឯការយាងមកជាលើកទីពីររបស់ព្រះយេស៊ូវគ្រីស្ទ ហើយបានបង្រៀនពួកគេអំពីរបៀបរៀបចំខ្លួនសម្រាប់ការយាងមកជាលើកទីពីរ ។
យោបល់សម្រាប់ការបង្រៀន
ថែស្សាឡូនីចទី១ ៣–៤:១២
ប៉ុលមានបំណងចង់ពង្រឹងសេចក្ដីជំនឿរបស់សមាជិកសាសនាចក្រនៅថែស្សាឡូនីច
សូមចែក ក្រដាស លំហាត់ ពិត-មិនពិតខាងក្រោមនេះស្ដីពីការយាងមកជាលើកទីពីររបស់ព្រះយេស៊ូវគ្រីស្ទដល់សិស្ស ហើយសួរពួកគេឲ្យជ្រើសយកចម្លើយ ពិត ឬ មិនពិត នៅក្បែរសំណួរនីមួយៗ ៖
ព្រះគម្ពីរសញ្ញាថ្មី សៀវភៅសិក្សាសម្រាប់គ្រូបង្រៀនថ្នាក់សិក្ខាសាលា—មេរៀនទី ១២៨
-
ព / ម ១. ពួកបរិសុទ្ធស្មោះត្រង់ដែលស្លាប់ពីមុនការយាងមកជាលើកទីពីរ នឹងពុំបានរស់ឡើងវិញឡើយរហូតដល់ចុងបញ្ចប់នៃសហសវត្សរ៍ ។
-
ព / ម ២. ពួកបរិសុទ្ធស្មោះត្រង់ដែលមានជីវិតនៅឯការយាងមកជាលើកទីពីរនឹងបាននាំយកទៅជួបនឹងព្រះគ្រីស្ទ កាលទ្រង់យាងមក ។
-
ព / ម ៣. ការយាងមកជាលើកទីពីរនឹងធ្វើឲ្យមនុស្សគ្រប់គ្នាភ្ញាក់ផ្អើល ដូចជាចោរមកនៅពេលយប់ ។
© 2015 by Intellectual Reserve, Inc. All rights reserved.
សូមពន្យល់ថា អ្នកនឹងពុំផ្ដល់ចម្លើយសម្រាប់លំហាត់នាពេលនេះទេ ប៉ុន្តែសិស្សអាចរកចម្លើយត្រឹមត្រូវនៅក្នុងមេរៀននាថ្ងៃនេះ ។ សូមអញ្ជើញសិស្សឲ្យរកមើលសេចក្ដីពិតអំពីការយាងមកជាលើកទីពីររបស់ព្រះយេស៊ូវគ្រីស្ទ នៅពេលពួកគេសិក្សា ថែស្សាឡូនីចទី១ ៣–៥ ។
សូមរំឭកសិស្សថា បន្ទាប់ពីការប្រកាសដំណឹងល្អក្នុងរយៈពេលដ៏ខ្លីនៅថែស្សាឡូនីច ប៉ុល ស៊ីឡាស និងធីម៉ូថេត្រូវពួកអ្នកដឹកនាំសាសន៍យូដាបង្ខំឲ្យចេញពីក្រុងនោះ ( សូមមើល កិច្ចការ ១៧:៥–១៥ ) ។ ក្រោយមកទៀត ប៉ុលបានបញ្ជូនធីម៉ូថេឲ្យត្រឡប់ទៅថែស្សាឡូនីចវិញដើម្បីមើលពួកអ្នកប្រែចិត្តជឿថ្មី ហើយពង្រឹងដល់សេចក្ដីជំនឿរបស់ពួកគេ ។ នៅក្នុង ថែស្សាឡូនីចទី១ ៣:១–៧ យើងរៀនថា ធីម៉ូថេបានរាយការណ៍ទៅប៉ុលថា ពួកបរិសុទ្ធនៅទីនោះបានបន្តស្មោះត្រង់ ថ្វីបើមានការបៀតបៀនក៏ដោយ ។ ធីម៉ូថេក៏ទំនងជារាយការណ៍ផងដែរថា ពួកបរិសុទ្ធមានសំណួរជាច្រើនអំពីការយាងមកជាលើកទីពីររបស់ព្រះយេស៊ូវគ្រីស្ទ ។ ប៉ុលបានសរសេរសំបុត្ររបស់លោកដល់ពួកបរិសុទ្ធនៅថែស្សាឡូនីច ដើម្បីឆ្លើយសំណួររបស់ពួកគេ ។
សូមអញ្ជើញសិស្សម្នាក់អាន ថែស្សាឡូនីចទី ១ ៣:៩–១០ឲ្យឮៗ ។ ចូរសុំសិស្សក្នុងថ្នាក់ឲ្យផ្ទៀងតាមរកមើលថា ប៉ុលបាននិយាយថាលោកបានអធិស្ឋានសូមអ្វីខ្លះ កាលលោកបានអវត្តមានពីពួកបរិសុទ្ធនៅថែស្សាឡូនីច ។
-
តើប៉ុលបាននិយាយថាលោកបានអធិស្ឋានសូមអ្វីខ្លះ កាលលោកបានអវត្តមាននោះ ?
-
តើឃ្លាថា « បំពេញសេចក្តីអ្វីដែលខ្វះ ខាងឯសេចក្តីជំនឿរបស់អ្នករាល់គ្នា » ក្នុង ខទី ១០ មានន័យដូចម្ដេច ? ( ប៉ុលមានបំណងចង់ពង្រឹងសេចក្ដីជំនឿរបស់សមាជិកសាសនាចក្រនៅថែស្សាឡូនីច ) ។
សូមពន្យល់ថា វិធីមួយដែលប៉ុលបានខិតខំពង្រឹងសេចក្ដីជំនឿរបស់សមាជិកសាសនាចក្រនៅថែស្សាឡូនីច គឺដើម្បីជួយពួកគេឲ្យយល់កាន់តែប្រសើរឡើងពីរបៀបរៀបចំខ្លួនសម្រាប់ការយាងមកជាលើកទីពីរ ។ សូមអញ្ជើញសិស្សម្នាក់អាន ថែស្សាឡូនីចទី ១ ៣:១១–១៣ ឲ្យឮៗ ។ ចូរសុំឲ្យសិស្សក្នុងថ្នាក់ផ្ទៀងតាម រកមើលថាប៉ុលបានសង្ឃឹមថាព្រះអម្ចាស់នឹងធ្វើអ្វីខ្លះ សម្រាប់ពួកបរិសុទ្ធដើម្បីរៀបចំខ្លួនពួកគេសម្រាប់ការយាងមកជាលើកទីពីររបស់ទ្រង់ ។
-
តើប៉ុលបានសង្ឃឹមថា ព្រះអម្ចាស់នឹងធ្វើអ្វីខ្លះសម្រាប់ពួកបរិសុទ្ធ ដើម្បីរៀបចំខ្លួនពួកគេសម្រាប់ការយាងមកជាលើកទីពីររបស់ទ្រង់ ?
សូមអញ្ជើញសិស្សម្នាក់អាន ថែស្សាឡូនីចទី ១ ៤:១ឲ្យឮៗ ។ ចូរសុំសិស្សក្នុងថ្នាក់ឲ្យផ្ទៀងតាមរកមើលថា ប៉ុលបានដាស់តឿនឲ្យពួកបរិសុទ្ធនៅថែស្សាឡូនីចឲ្យធ្វើអ្វីខ្លះដើម្បីរៀបចំខ្លួនសម្រាប់ការយាងមកជាលើកទីពីរ ។
-
តើប៉ុលបានដាស់តឿនឲ្យពួកបរិសុទ្ធនៅថែស្សាឡូនីចធ្វើអ្វីខ្លះ ដើម្បីរៀបចំខ្លួនសម្រាប់ការយាងមកជាលើកទីពីរ ?
សូមចាត់សិស្សម្នាក់ៗនៅក្នុងថ្នាក់នូវសេចក្ដីយោងមួយដូចខាងក្រោម ( ដោយផ្អែកលើទំហំថ្នាក់របស់អ្នក អាចចាត់សេចក្ដីយោងដូចគ្នាដល់សិស្សលើសពីម្នាក់ ) ៖ ថែស្សាឡូនីចទី១ ៤:២–៥, ៤:៦–៨, ៤:៩–១២ ។ ចូរសុំឲ្យសិស្សអានសេចក្ដីយោងរបស់ពួកគេ ហើយឆ្លើយសំណួរខាងក្រោម ( អ្នកគួរសរសេរសំណួរទាំងនេះលើក្ដារខៀន ) ៖
-
តើប៉ុលបានដាស់តឿនឲ្យពួកបរិសុទ្ធធ្វើអ្វីខ្លះ ដើម្បីធ្វើឲ្យព្រះអម្ចាស់សព្វព្រះទ័យ ?
-
តើអ្នកគិតថា ការរស់នៅតាមការបង្រៀននោះនឹងជួយពួកគេឲ្យត្រៀមខ្លួន សម្រាប់ការយាងមកជាលើកទីពីរយ៉ាងដូចម្ដេច ?
ក្រោយពីមានពេលគ្រប់គ្រាន់ហើយ សូមអញ្ជើញសិស្សបីបួននាក់ឲ្យប្រាប់ចម្លើយរបស់គេជាមួយនឹងសិស្សក្នុងថ្នាក់ ។
ថែស្សាឡូនីចទី១ ៤:១៣–១៨
ប៉ុលបង្រៀនអំពីការរស់ឡើងវិញនៃមនុស្សស្លាប់ នៅឯការយាងមកជាលើកទីពីររបស់ព្រះយេស៊ូវគ្រីស្ទ
ចូរដាក់បង្ហាញរូបភាព ការយាងមកជាលើកទីពីរ ( Gospel Art Book [ ឆ្នាំ ២០០៩ ] ល.រ. ៦៦, សូមមើលផងដែរ LDS.org ) ។
សូមពន្យល់ថា ពួកបរិសុទ្ធនៅថែស្សាឡូនីចយល់ខុសទិដ្ឋភាពមួយចំនួននៃការយាងមកជាលើកទីពីរ ។ ពួកគេព្រួយបារម្ភថា សមាជិកសាសនាចក្រនៅថែស្សាឡូនីចដែលបានស្លាប់នឹងពុំអាចស្គាល់ពរជ័យនៃការយាងមកជាលើកទីពីរបានឡើយ ។
សូមអញ្ជើញសិស្សម្នាក់អាន ថែស្សាឡូនីចទី១ ៤:១៣–១៤, ១៦ ឲ្យឮៗ ។ ចូរសុំសិស្សក្នុងថ្នាក់ឲ្យផ្ទៀងតាម រកមើលថា ប៉ុលបានបង្រៀនអ្វីខ្លះអំពីពួកបរិសុទ្ធស្មោះត្រង់ ដែលស្លាប់ពីមុនការយាងមកជាលើកទីពីរ ។ សូមពន្យល់ថា ប៉ុលបានប្រើពាក្យ ដេកលក់ សំដៅទៅលើជនដែលស្លាប់ ។
-
តើប៉ុលបានបង្រៀនសេចក្ដីពិតអ្វីខ្លះអំពីពួកបរិសុទ្ធស្មោះត្រង់ ដែលស្លាប់ពីមុនការយាងមកជាលើកទីពីរ ? ( សិស្សគួរស្គាល់សេចក្ដីពិតដូចខាងក្រោមនេះ ៖ ពួកបរិសុទ្ធស្មោះត្រង់ ដែលស្លាប់មុនការយាងមកជាលើកទីពីរ នឹងបានរស់ឡើងវិញ នៅពេលព្រះគ្រីស្ទយាងមកម្ដងទៀត ) ។
-
តើឃ្លាថា « ព្រះទ្រង់នឹងនាំអស់អ្នក ដែលដេកលក់ទៅក្នុងព្រះយេស៊ូវ ឲ្យបានមកជាមួយនឹងទ្រង់ » នៅក្នុង ខទី ១៤ មានន័យដូចម្ដេច ? ( ពួកបរិសុទ្ធស្មោះត្រង់ដែលបានរស់ឡើងវិញ នៅឯការយាងមកជាលើកទីពីរ នឹងត្រូវបាននាំយកទៅជួបនឹងព្រះយេស៊ូវគ្រីស្ទ ហើយនឹងចុះមកជាមួយទ្រង់នៅក្នុងសិរីល្អ [ សូមមើល គ. និង ស. ៨៨:៩៧–៩៨ ] ) ។
សូមអញ្ជើញសិស្សម្នាក់អាន ថែស្សាឡូនីចទី ១ ៤:១៥, ១៧ ឲ្យឮៗ ។ ចូរសុំសិស្សក្នុងថ្នាក់ឲ្យផ្ទៀងតាម រកមើលថា ប៉ុលបានបង្រៀនអ្វីខ្លះ អំពីពួកបរិសុទ្ធស្មោះត្រង់ដែលនឹងមានជីវិតនៅពេលព្រះគ្រីស្ទយាងមកម្ដងទៀត ។ សូមពន្យល់ថា ការបកប្រែដោយ យ៉ូសែប ស្ម៊ីធ នៅក្នុង ខទី ១៥ បានផ្លាស់ប្ដូរឃ្លាចុងក្រោយ ដើម្បីឲ្យវាអានថា « ពួកគេដែលរស់នៅជាប់ដរាបដល់ព្រះអម្ចាស់យាងមក នោះមិនរារាំងពួកអ្នកដែលបាននៅសល់ចំពោះការយាងមករបស់ព្រះអម្ចាស់ ជាពួកអ្នកដែលបានដេកលក់ទៅហើយនោះទេ ។ សូមពន្យល់ថា ការបកប្រែដោយយ៉ូសែប ស្ម៊ីធ នៅក្នុង ខទី ១៧ បានផ្លាស់ប្ដូរខគម្ពីរនេះទៅជា « រួចពួកគេដែលកំពុងតែរស់នៅក៏នឹងបានលើកឡើងទៅក្នុងពពកជាមួយគ្នាទាំងអស់ជាមួយនឹងពួកអ្នកដែលនៅសល់ ដើម្បីឲ្យបានជួបជុំនឹងព្រះអម្ចាស់នៅនាអាកាស យ៉ាងនោះយើងនឹងនៅជាមួយនឹងព្រះអម្ចាស់ជាដរាបទៅ ។ អ្នកគួរចង្អុលបង្ហាញថា ការបកប្រែដោយយ៉ូសែប ស្ម៊ីធ ប្ដូរពាក្យ យើង នៅក្នុងខគម្ពីរទាំងនេះទៅជា ពួកគេ ដោយឆ្លុះបញ្ចាំងថា ការយាងមកជាលើកទីពីរនឹងពុំកើតឡើងនៅជំនាន់របស់ប៉ុលនោះទេ ។
-
តើប៉ុលបានបង្រៀនសេចក្ដីពិតអ្វីខ្លះអំពីពួកបរិសុទ្ធស្មោះត្រង់ ដែលមានជីវិតពីមុនការយាងមកជាលើកទីពីរ ? ( សិស្សគួរស្គាល់សេចក្ដីពិតដូចខាងក្រោម ៖ ពួកបរិសុទ្ធស្មោះត្រង់ ដែលមានជីវិតនៅឯការយាងមកជាលើកទីពីរនឹងត្រូវបាននាំយកទៅជួបនឹងព្រះយេស៊ូវគ្រីស្ទ កាលទ្រង់យាងមក ) ។
សូមអញ្ជើញសិស្សឲ្យអាន ថែស្សាឡូនីចទី ១ ៤:១៨ ដោយស្ងាត់ស្ងៀម ហើយរកមើលថាប៉ុលបានសង្ឃឹមថាពួកបរិសុទ្ធនឹងធ្វើអ្វីខ្លះ បន្ទាប់ពីស្ដាប់ឮសេចក្ដីពិតទាំងនេះអំពីការយាងមកជាលើកទីពីរ ។ សូមអញ្ជើញសិស្សឲ្យរៀបរាប់ពីអ្វីដែលពួកគេរកឃើញ ។
-
តើអ្នករកឃើញការលួងលោមអ្វីខ្លះ នៅក្នុងគោលលទ្ធិទាំងនេះអំពីការយាងមកជាលើកទីពីរ ?
ថែស្សាឡូនីចទី ១ ៥
ប៉ុលបង្រៀនសមាជិកសាសនាចក្រនៅថែស្សាឡូនីច អំពីរបៀបរៀបចំខ្លួនសម្រាប់ការយាងមកជាលើកទីពីរ
សូមអញ្ជើញសិស្សម្នាក់អាន ថែស្សាឡូនីចទី១ ៥:១–៣ឲ្យឮៗ ។ សូមឲ្យសិស្សក្នុងថ្នាក់ផ្ទៀងតាមរកមើលរឿងប្រៀបប្រដូចពីរ ដែលប៉ុលបានប្រើដើម្បីពិពណ៌នាពីកាលវេលានៃការយាងមកជាលើកទីពីរ ។
-
តើរឿងប្រៀបប្រដូចពីរដែលប៉ុលបានប្រើ ដើម្បីពិពណ៌នាពីកាលវេលានៃការយាងមកជាលើកទីពីរមានរឿងអ្វីខ្លះ ? ( « ចោរមកនៅពេលយប់ » [ ខទី ២ ] និង « ស្ត្រីមានគភ៌ឈឺនឹងសំរាល » [ ខទី ៣ ] ) ។
សូមពន្យល់ថា ចោរមកនៅពេលយប់ជាធម្មតាវាមក « ដោយពុំបានប្រាប់ទុកជាមុនឡើយ » ( Bruce R. McConkie Doctrinal New Testament Commentary វ៉ុលទី ៣ [ ឆ្នាំ ១៩៦៥–៧៣ ] ៣:៥៤ ) ។
-
តើរឿងប្រៀបប្រដូចរបស់ប៉ុលអំពីចោរមកនៅពេលយប់ បង្រៀនយើងអ្វីខ្លះទាក់ទងនឹងការយាងមកជាលើកទីពីរ ?
-
តើរឿងប្រៀបប្រដូចរបស់ប៉ុលអំពីស្ត្រីមានគភ៌ឈឺនឹងសំរាល បង្រៀនយើងអ្វីខ្លះទាក់ទងនឹងការយាងមកជាលើកទីពីរ ?
បន្ទាប់ពីសិស្សបានឆ្លើយនឹងសំណួរទាំងពីររួចមក អ្នកគួរចង្អុលបង្ហាញថា អែលឌើរ ប្រ៊ូស អ័រ ម៉ាក់ខន់ឃី ក្នុងកូរ៉ុមនៃពួកសាវកដប់ពីរនាក់បានបង្រៀនអំពីរឿងប្រៀបប្រដូចទាក់ទងនឹងស្ត្រីមានគភ៌ឈឺនឹងសំរាលដូចតទៅ ៖ « នាងពុំដឹងពីម៉ោង ឬនាទីដែលកូននាងនឹងកើតឡើយ ប៉ុន្តែនាងដឹងពីពេលប្រហាក់ប្រហែល » ( Doctrinal New Testament Commentary ៣:៥៤ ) ។ ដោយផ្អែកលើរឿងប្រៀបប្រដូចនេះ យើងក៏អាចគិតពិចារណាអំពីរបៀប ដែលការសាកល្បងពីមុនការយាងមកជាលើកទីពីរស្រដៀងគ្នានឹងការឈឺចាប់នៃការសំរាលកូនដែរ ។ ប៉ុន្តែខណៈពេលកូនកើតមក វាគឺជាពេលវេលាមួយដ៏អស្ចារ្យ ដូចគ្នានេះដែរ ការយាងមកជាលើកទីពីរនឹងកា្លយជាពេលវេលាដ៏អស្ចារ្យសម្រាប់មនុស្សសុចរិត ។
សូមអញ្ជើញសិស្សម្នាក់អាន ថែស្សាឡូនីចទី ១ ៥:៤–៦ឲ្យឮៗ ។ សូមឲ្យសិស្សក្នុងថ្នាក់ផ្ទៀងតាមរកមើលថា ហេតុអ្វីបានជាពួកបរិសុទ្ធនឹងពុំភ្ញាក់ផ្អើលចំពោះការយាងមកជាលើកទីពីរឡើយ ។
-
ហេតុអ្វីបានជាពួកបរិសុទ្ធនឹងពុំភ្ញាក់ផ្អើលចំពោះការយាងមកជាលើកទីពីរ ?
-
តើការក្លាយជា « ពួកនៃពន្លឺ » មានន័យដូចម្តេច ? ( ឃ្លាថា « ពួកនៃពន្លឺ » នៅក្នុង ខទី ៥ សំដៅទៅលើសមាជិកសាសនាចក្រស្មោះត្រង់ដែល « ដោះចោលអស់ទាំងការរបស់សេចក្ដីងងឹតចេញ » [ រ៉ូម ១៣:១២ ] មានភាពជាដៃគូមកពីព្រះវិញ្ញាណបរិសុទ្ធ ហេតុដូច្នេះហើយនឹងបានត្រៀមខ្លួនជាស្រេចសម្រាប់ការយាងមកជាលើកទីពីរ [ សូមមើល គ. និង ស. ១០៦:៤–៥ ] ) ។
-
តើឃ្លាថា « ត្រូវចាំយាម ហើយដឹងខ្លួន » មានន័យយ៉ាងណា ? ( ថែស្សាឡូនីចទី១ ៥:៦ ) ។
-
តើអ្នកនឹងសង្ខេបអ្វី ដែលប៉ុលបានបង្រៀនដល់ពួកបរិសុទ្ធនៅថែស្សាឡូនីចអំពីរបៀបរៀបចំខ្លួនសម្រាប់ការយាងមកជាលើកទីពីរយ៉ាងដូចម្ដេច ? ( សូមសរសេរសេចក្ដីពិតខាងក្រោមនេះនៅលើក្ដារខៀន ដោយប្រើពាក្យរបស់សិស្ស ៖ ប្រសិនបើយើងស្មោះត្រង់ ហើយរង់ចាំមើលទីសម្គាល់ពីមុនការយាងមកជាលើកទីពីររបស់ព្រះយេស៊ូវគ្រីស្ទ នោះយើងនឹងបានត្រៀមខ្លួនកាលទ្រង់យាងមកម្ដងទៀត ) ។
ចូរអញ្ជើញសិស្សម្នាក់ឲ្យអានឮៗនូវសេចក្ដីថ្លែងការណ៍ដូចខាងក្រោមដោយ ប្រធាន យ៉ូសែប ហ៉្វីលឌីង ស៊្មីធ ហើយសុំឲ្យសិស្សក្នុងថ្នាក់ស្ដាប់រកថា តើយើងអាចត្រៀមខ្លួនសម្រាប់ការយាងមកជាលើកទីពីរយ៉ាងដូចម្ដេច ។
រូបភាពប្រធាន យ៉ូសែប ហ្វីលឌីង ស្ម៊ីធ« ផែនដីពោរពេញដោយវិបត្តិភ័យ និងបញ្ហា ។ ដួងចិត្តមនុស្សកំពុងចុះខ្សោយដោយសាររឿងទាំងនេះ ។ យើងឃើញទីសម្គាល់នានា កាលយើងឃើញដើមល្វាមានផលផ្លែ ហើយដោយដឹងថាពេលវេលានេះជិតមកដល់ហើយ វាបង្ហាញដល់ខ្ញុំ និងអ្នក ព្រមទាំងមនុស្សទាំងអស់នៅលើផែនដីនេះឲ្យ ស្ដាប់តាមបន្ទូលរបស់ព្រះគ្រីស្ទ ដល់ពួកសាវករបស់ទ្រង់ ហើយចាំយាម ពីព្រោះយើងពុំដឹងអំពីថ្ងៃ ឬម៉ោងនៃពេលវេលានោះឡើយ » ( Doctrines of Salvation, និពន្ធដោយ Bruce R. McConkie វ៉ុលទី ៣ [ ឆ្នាំ ១៩៥៤–៥៦ ] ៣:៥២–៥៣ ) ។
-
យោងតាមប្រធាន ស្ម៊ីធ តើយើងអាចរៀបចំខ្លួនសម្រាប់ការយាងមកជាលើកទីពីរយ៉ាងដូចម្ដេច ?
សូមអញ្ជើញសិស្សឲ្យរំឭកឡើងវិញពីប្រយោគពិត–មិនពិត និងចម្លើយដែលពួកគេបានសរសេរនៅពេលចាប់ផ្ដើមមេរៀននេះ ។
-
ដោយផ្អែកលើសេចក្ដីពិតដែលអ្នកបានរៀននៅក្នុងមេរៀននេះ តើអ្នកនឹងផ្លាស់ប្ដូរចម្លើយណាមួយរបស់អ្នកដែរឬទេ ? ( ចម្លើយ ៖ [ ១ ] មិនពិត, [ ២ ] ពិត, [ ៣ ] មិនពិត ) ។
សូមសង្ខេប ថែស្សាឡូនីចទី១ ៥:៧–២២ ដោយពន្យល់ថា ប៉ុលបានទូន្មានបន្ថែមទៀតដល់ពួកបរិសុទ្ធ អំពីរបៀបរៀបចំខ្លួនសម្រាប់ការយាងមកជាលើកទីពីរ ។
សូមអញ្ជើញសិស្សអាន ថែស្សាឡូនីចទី១ ៥:១២–២២ ដោយស្ងាត់ស្ងៀម ហើយរកមើលថាប៉ុលបានបង្រៀនពួកបរិសុទ្ធឲ្យធ្វើអ្វីខ្លះ ដើម្បីរៀបចំខ្លួនឯង និងមនុស្សដទៃទៀតដើម្បីជួបនឹងព្រះអង្គសង្គ្រោះនៅឯការយាងមកជាលើកទីពីរ ។ សូមលើកទឹកចិត្តសិស្សឲ្យជ្រើសយកការទូន្មានមួយ ដែលធ្វើឲ្យពួកគេចាប់អារម្មណ៍ខ្លាំង ។ សូមឲ្យសិស្សឆ្លើយនឹងសំណួរខាងក្រោមនៅក្នុងសៀវភៅកំណត់ចំណាំក្នុងថ្នាក់ ឬសៀវភៅកំណត់ហេតុសិក្សាព្រះគម្ពីររបស់ពួកគេ ។ ( អ្នកអាចនឹងចង់សរសេរសំណួរទាំងនេះលើក្ដារខៀន ) ។
-
តើការទូន្មានណានៅក្នុង ថែស្សាឡូនីចទី១ ៥:១២–២២ ដែលធ្វើឲ្យអ្នកចាប់អារម្មណ៍ខ្លាំង ?
-
តើការរស់នៅតាមការទូន្មាននេះអាចជួយអ្នក និងមនុស្សដទៃទៀតឲ្យរៀបចំខ្លួនសម្រាប់ការយាងមកជាលើកទីពីរយ៉ាងដូចម្ដេច ?
-
តើអ្នកនឹងលើកទឹកចិត្តមនុស្សម្នាក់ឲ្យប្រើការទូន្មាននេះនៅក្នុងជីវិតប្រចាំថ្ងៃយ៉ាងដូចម្ដេច ?
ក្រោយពីមានពេលគ្រប់គ្រាន់ហើយ សូមអញ្ជើញសិស្សឲ្យប្រាប់ពីចម្លើយរបស់ពួកគេទៅមិត្តរួមថ្នាក់ម្នាក់ ។
សូមអញ្ជើញសិស្សម្នាក់អាន ថែស្សាឡូនីចទី ១ ៥:២៣–២៤ ឲ្យឮៗ ។ ចូរសុំសិស្សក្នុងថ្នាក់ឲ្យផ្ទៀងតាមរកមើលថា ប៉ុលបាននិយាយថាព្រះនឹងធ្វើអ្វីខ្លះសម្រាប់ពួកបរិសុទ្ធស្មោះត្រង់របស់ទ្រង់ កាលពួកគេរៀបចំខ្លួនសម្រាប់ការយាងមកជាលើកទីពីរ ។
-
តើព្រះនឹងធ្វើអ្វីខ្លះសម្រាប់ពួកបរិសុទ្ធស្មោះត្រង់របស់ទ្រង់ កាលពួកគេរៀបចំខ្លួនសម្រាប់ការយាងមកជាលើកទីពីរ ?
សូមបញ្ចប់ដោយថ្លែងទីបន្ទាល់ពីសេចក្ដីពិត ដែលបានបង្រៀននៅក្នុងមេរៀននេះ ហើយអញ្ជើញសិស្សឲ្យរៀបចំខ្លួនដោយស្មោះត្រង់សម្រាប់ការយាងមកជាលើកទីពីរ ។
សេចក្តីពន្យល់ និង ព័ត៌មានសាច់រឿង
ថែស្សាឡូនីចទី១ ៤:១៧ ។ « បានលើកឡើង ទៅជាមួយគ្នា »
« ការបកប្រែដោយយ៉ូសែប ស្ម៊ីធ សម្រាប់ ថែស្សាឡូនីចទី១ ៤:១៧ ចែងថា ‹ រួច ពួកគេដែល កំពុងតែរស់នៅក៏នឹងបានលើកឡើងទៅក្នុង ពពកជាមួយគ្នាទាំងអស់ ដើម្បីឲ្យបានជួបជុំនឹងព្រះអម្ចាស់នៅនាអាកាស យ៉ាងនោះយើងនឹងនៅជាមួយនឹងព្រះអម្ចាស់ដរាបទៅ › ) ។ មានពួកគ្រីស្ទានជាច្រើនប្រើពាក្យ ភាពរីករាយជាខ្លាំង ( មកពីពាក្យឡាតាំងមានន័យ ‹ លើកឡើងទៅ › ) នៅពេលលើកឡើងអំពីគ្រាដែលមនុស្សសុចរិតនឹងបានលើកឡើងទៅជួបនឹងព្រះអង្គសង្គ្រោះនៅឯការយាងមករបស់ទ្រង់ » ( New Testament Student Manual [ Church Educational System manual ឆ្នាំ ២០១៤ ] ទំព័រ ៤៥០ ) ។
ថែស្សាឡូនីចទី១ ៥:១៩ ។ « កុំឲ្យពន្លត់ព្រះវិញ្ញាណ »
« នៅជិតចុងបញ្ចប់នៃថែស្សាឡូនីចទី ១ ប៉ុលបានផ្ដល់ការទូន្មានសំខាន់ៗមួយចំនួន ស្ដីអំពីរបៀបរៀបចំខ្លួនសម្រាប់ការយាងមករបស់ព្រះអម្ចាស់ ( សូមមើល ថែស្សាឡូនីចទី១ ៥:៦–២៣ ) ។ ជាផ្នែកមួយនៃការទូន្មានរបស់លោក ប៉ុលបានសុំឲ្យពួកបិរសុទ្ធ ‹ កុំឲ្យពន្លត់ព្រះវិញ្ញាណ › ( ថែស្សាឡូនីចទី១ ៥:១៩ ) ។ ការពន្លត់ព្រះវិញ្ញាណមានន័យថា ការពន្លត់ ឬការបង្ក្រាបព្រះចេស្ដានៃព្រះវិញ្ញាណបរិសុទ្ធនៅក្នុងជីវិតរបស់មនុស្សម្នាក់ ( សូមមើលផងដែរ អេភេសូរ ៤:៣០–៣១ ) ។ អែលឌើរ ដេវីឌ អេ បែដណា [ ក្នុងកូរ៉ុមនៃពួកសាវកដប់ពីរនាក់ ] បានចង្អុលបង្ហាញថា ដើម្បីរីករាយពេញលេញនឹងគូកននៃព្រះវិញ្ញាណ យើងត្រូវចៀសវាងពីសកម្មភាពដែលបណ្ដេញព្រះវិញ្ញាណឲ្យចេញពីយើង ៖
« ‹ ប្រសិនបើអ្វីមួយដែលយើងគិតឃើញ ឮ ឬធ្វើឲ្យយើងឃ្លាតឆ្ងាយពីព្រះវិញ្ញាណ នោះយើងគួរតែបញ្ឈប់ការគិត ការឃើញ ការឮ ឬការធ្វើរឿងនោះទៅ ។ ឧទាហរណ៍ បើសិនការណ៍នោះធ្វើឲ្យអ្នកសប្បាយ ប៉ុន្ដែធ្វើឲ្យអ្នកឃ្លាតឆ្ងាយពីព្រះវិញ្ញាណបរិសុទ្ធវិញ បើអញ្ចឹង ការសប្បាយបែបនោះពិតជាមិនមែនសម្រាប់យើងនោះទេ ។ ដោយសារព្រះវិញ្ញាណមិនអាចគង់នៅជាមួយនឹងការសប្បាយបែបនោះ ដែលជាការថោកទាប ឈ្លើយ ឬមិនរាបសានោះឡើយ ប្រាកដណាស់ថា រឿងទាំងនេះគឺមិនមែនសម្រាប់យើងនោះទេ ។ ដោយសារយើងធ្វើឲ្យព្រះវិញ្ញាណនៃព្រះអម្ចាស់ឃ្លាតឆ្ងាយ នៅពេលយើងធ្វើសកម្មភាពដែលយើងដឹងថាយើងគួរចៀស នោះរឿងបែបនេះពុំមែនសម្រាប់យើងនោះទេ ។
« ‹ … នៅពេលយើងជ្រមុជខ្លួនកាន់តែជ្រៅនៅក្នុងព្រះវិញ្ញាណនៃព្រះអម្ចាស់ យើងគួរខិតខំស្គាល់ពីអារម្មណ៍ដែលវាកើតឡើង និងឥទ្ធិពល ឬព្រឹត្តិការណ៍ដែលធ្វើឲ្យយើងដកខ្លួនចេញពីព្រះវិញ្ញាណបរិសុទ្ធ › ( ‹ That We May Always Have His Spirit to Be with Us › Ensign ឬ Liahona ខែ ឧសភា ឆ្នាំ ២០០៦ ទំព័រ ៣០ ) » ( New Testament Student Manual [ Church Educational System manual ឆ្នាំ ២០១៤ ] ទំព័រ ៤៥១ ) ។
ថែស្សាឡូនីចទី១ ៥:២០–២១ ។ « ចូរលមើលគ្រប់ទាំងអស់ ហើយកាន់ខ្ជាប់តាមសេចក្តីដែលត្រឹមត្រូវ »
ក្នុងនាមជាសមាជិកសាសនាចក្រ យើងបានទូន្មានឲ្យពិចារណាមើល ហើយបង្ហាញ ( ល្បង )ចំពោះរឿងដែលយើងអាន ស្ដាប់ ឬត្រូវបានគេបង្រៀន ។ ប្រធាន យ៉ូសែប ហ៉្វីលឌីង ស៊្មីធ បានបង្រៀនថា យើងអាចល្បងសេចក្ដីពិតចំពោះអ្វីដែលយើងអាន ស្ដាប់ ឬត្រូវបានគេបង្រៀន ដោយប្រៀបធៀបវាទៅនឹងការបង្រៀនអំពីបន្ទូលរបស់ព្រះនៅក្នុងបទដ្ឋានព្រះគម្ពីរ ( សូមមើល Doctrines of Salvation និពន្ធដោយ Bruce R. McConkie វ៉ុលទី ៣ [ ឆ្នាំ ១៩៥៤–៥៦ ] ៣:២០៣ ) ។ ចុះបើអ្វីដែលយើងអាន ស្ដាប់ ឬត្រូវបានគេបង្រៀនពុំត្រឹមត្រូវតាមបន្ទូលរបស់ព្រះ ដែលមាននៅក្នុងបទគម្ពីរ ឬប្រសាសន៍របស់ពួកព្យាការី និងពួកសាវករបស់ទ្រង់ដែលនៅរស់វិញនោះ « ដរាបណាវាស្របតាម … បទដ្ឋានព្រះគម្ពីរ » នោះយើងមាននូវការទទួលខុសត្រូវដើម្បីបដិសេធវាថាមិនពិត ( Joseph Fielding Smith, Doctrines of Salvation, ៣:២០៣ ) ។ ប្រសិនបើវាពិត នោះយើងមាននូវការទទួលខុសត្រូវដើម្បីរស់នៅតាមការបង្រៀនទាំងនោះ ។
ថែស្សាឡូនីចទី១ ៥:២២ ។ « ចូរចៀសចេញពីសេចក្តីអាក្រក់គ្រប់យ៉ាង »
« ប៉ុលបានបង្រៀនដល់ពួកបរិសុទ្ធឲ្យចៀសចេញពី ‹ សេចក្ដីអាក្រក់ › គ្រប់យ៉ាង ឬនិយាយម្យ៉ាងទៀតគឺចាកចេញពី ‹ អំពើអាក្រក់គ្រប់ប្រភេទ › ។ ពួកថ្នាក់ដឹកនាំសាសនាចក្រក៏បានប្រើ ថែស្សាឡូនីចទី១ ៥:២២ ដើម្បីបង្រៀនថា យើងគួរចៀសវាងពីការបង្ហាញថា ដូចជាយើងកំពុងធ្វើអ្វីមួយអាក្រក់ ។ ឧទាហរណ៍ ប្រធាន ជែមស៍ អ៊ី ហ្វោស្ត [ នៃគណៈប្រធានទីមួយ ] បានបង្រៀនថា ‹ ខ្ញុំសូមលើកទឹកចិត្តបងប្អូនយ៉ាងម៉ុតមាំថា ប្រសិនបើមានសំណួរណាមួយនៅក្នុងគំនិត ឬចិត្តរបស់បងប្អូនថា តើការប្រព្រឹត្តរបស់បងប្អូនវាជារឿងត្រឹមត្រូវ ឬជារឿងខុសនោះ សូមកុំធ្វើវាឡើយ ។ វាគឺជាការទទួលខុសត្រូវរបស់ពួកព្យាការីរបស់ព្រះដើម្បីបង្រៀនពីបន្ទូលរបស់ព្រះ ប៉ុន្តែពុំមែនប្រាប់លម្អិតអំពីទង្វើរបស់មនុស្សនោះទេ ។ ប្រសិនបើយើងព្យាយាមចៀសចេញពីអំពើអាក្រក់ និងគ្រប់សេចក្ដីនៃអំពើអាក្រក់ដោយចិត្តស្មោះ នោះយើងនឹងធ្វើវាដោយខ្លួនឯង ហើយពុំចាំបាច់មានគេបង្គាប់ឡើយ › ( ‹ The Devil’s Throat › Ensign ឬ Liahona ខែ ឧសភា ឆ្នាំ ២០០៣ ទំព័រ ៥១ ) ។ ប៉ុលបានផ្ដល់ការទូន្មានស្រដៀងគ្នានៅក្នុង កូរិនថូសទី១ ៨:៩–១៣ » ( New Testament Student Manual [ Church Educational System manual ឆ្នាំ ២០១៤ ] ទំព័រ ៤៥១ ) ។