មេរៀនសិក្សានៅផ្ទះ
យ៉ូហាន ១១-១៥ ( មេរៀនទី ១៥ )
សេចក្ដីផ្ដើម
មេរៀននេះអាចជួយសិស្សឲ្យយល់ពីអ្វី ដែលពួកគេត្រូវធ្វើដើម្បីត្រឡប់ទៅរកព្រះវរបិតាសួគ៌វិញ ។ លើសពីនេះទៀត នៅពេលសិស្សពិនិត្យឡើងវិញនូវការទូន្មានរបស់ព្រះអម្ចាស់ដូចដែលបានកត់ត្រាទុកនៅក្នុង យ៉ូហាន ១៤ពួកគេអាចពិចារណាពីរបៀប ដែលពួកគេអាចធ្វើតាមរបៀបរបស់ព្រះអង្គសង្គ្រោះឲ្យកាន់តែប្រសើរឡើង ។
យោបល់សម្រាប់ការបង្រៀន
យ៉ូហាន ១៤:១-១៤
ព្រះអង្គសង្គ្រោះបង្រៀនពួកសាវករបស់ទ្រង់ពីរបៀប ដើម្បីត្រឡប់ទៅរកព្រះវរបិតាសួគ៌វិញ ។
បើអាចធ្វើទៅបាន ចូរដាក់បង្ហាញផែនទីទីក្រុងរបស់អ្នក ហើយអញ្ជើញសិស្សឲ្យប្រាប់ពីទីតាំងបច្ចុប្បន្នរបស់ពួកគេនៅលើនោះ ។ នៅលើផែនទីនោះ ចូរបង្ហាញពីទីកន្លែងមួយទៀតដែលសិស្សស្គាល់ ។ ចូរសុំឲ្យពួកគេសរសេរនៅលើក្រដាសមួយសន្លឹកពីរបៀបដំណើរពីទីតាំងបច្ចុប្បន្នរបស់ពួកគេទៅកាន់កន្លែងនោះ ។ សូមអញ្ជើញឲ្យសិស្សម្នាក់ ឬពីរនាក់ប្រាប់ពីអ្វីដែលពួកគេបានសរសេរ ។
ចូរសរសេរ នគរសេឡេស្ទាល នៅលើក្ដារខៀន ។ ចូរសុំឲ្យសិស្សពិចារណាពីទិសដៅដែលពួកគេនឹងប្រាប់ដល់មនុស្សម្នាក់ ដែលចង់ដឹងពីរបៀបទៅដល់នគរសេឡេស្ទាល ។
ចូររំឭកសិស្សថា នៅពេលពួកគេសិក្សា យ៉ូហាន ១៤ នៅក្នុងមេរៀនប្រចាំថ្ងៃរបស់ពួកគេ នោះពួកគេបានរៀនពីសេចក្ដីពិតមួយដែលអាចជួយពួកគេឲ្យដឹងពីរបៀបត្រឡប់ទៅព្រះវរបិតាសួគ៌វិញ ហើយចូលទៅក្នុងនគរសេឡេស្ទាល ។ សូមពន្យល់ថា នៅក្នុងមេរៀននេះ ពួកគេនឹងរៀនបន្ថែមទៀតអំពីសេចក្ដីពិតនោះ ។
ដើម្បីជួយសិស្សឲ្យយល់ដឹងពីបរិបទនៃ យ៉ូហាន ១៤ចូររំឭកពួកគេថា ព្រះអង្គសង្គ្រោះបានប្រារព្ធបុណ្យរំលងជាមួយនឹងពួកសាវករបស់ទ្រង់នៅបន្ទប់ខាងលើនៅក្រុងយេរូសាឡិម ។ បន្ទាប់ពីសោយអាហារបុណ្យរំលងហើយ ព្រះយេស៊ូវបានមានបន្ទូលប្រាប់ទៅពួកសិស្សរបស់ទ្រង់ថា មិនយូរប៉ុន្មានទៀតទេ ទ្រង់នឹងចាកចេញពីពួកគេហើយ ( សូមមើល យ៉ូហាន ១៣:៣៣) ។
សូមឲ្យសិស្សបីបួននាក់ប្ដូរវេនគ្នាអានឮៗពី យ៉ូហាន ១៤:១-៥ ។ ចូរសុំឲ្យសិស្សក្នុងថ្នាក់ផ្ទៀងតាម រកមើលអ្វីដែលព្រះយេស៊ូវ បានបង្រៀនពួកសាវករបស់ទ្រង់ដើម្បីជួយលួងលោមពួកគេ ។
សូមពន្យល់ថា ការបកប្រែដោយ យ៉ូសែប ស៊្មីធ យ៉ូហាន ១៤:៣ បានសរសេរថា « ហើយនៅពេលខ្ញុំទៅ ខ្ញុំនឹងរៀបកន្លែងឲ្យអ្នករាល់គ្នា ហើយត្រឡប់មកវិញ ហើយទទួលអ្នករាល់គ្នាទៅឯខ្ញុំ ប្រយោជន៍ឲ្យអ្នករាល់គ្នាបាននៅកន្លែងដែលខ្ញុំនៅនោះដែរ » ។
-
តើព្រះយេស៊ូវបានបង្រៀនអ្វីខ្លះ ដល់ពួកសាវករបស់ទ្រង់ដើម្បីជួយលួងលោមពួកគេ ?
-
តើអ្នកគិតថាឃ្លា « នៅក្នុងដំណាក់នៃព្រះវរបិតាខ្ញុំ មានទីលំនៅជាច្រើន » (យ៉ូហាន ១៤:២) មានន័យដូចម្ដេច ?
ចូរអញ្ជើញសិស្សម្នាក់ឲ្យអានសេចក្ដីថ្លែងការណ៍ដូចខាងក្រោមដោយព្យាការី យ៉ូសែប ស៊្មីធ ។ ចូរសុំឲ្យសិស្សក្នុងថ្នាក់ស្ដាប់រកនូវអត្ថន័យនៃឃ្លាដែលទ្រង់បានមានបន្ទូល ។
« [ ឃ្លា ]ថា ‹ នៅក្នុងដំណាក់នៃព្រះវរបិតាខ្ញុំ មានទីលំនៅជាច្រើន › … គួរមានន័យថា—‹ នៅក្នុងនគរនៃព្រះវរបិតាខ្ញុំ មាននគរជាច្រើន › ដើម្បីឲ្យអ្នករាល់គ្នាអាចគ្រងមរតករបស់ព្រះ ហើយគ្រងមរតកជាមួយខ្ញុំ ។ … មានលំនៅសម្រាប់ជនដែលគោរពតាមក្រឹត្យវិន័យសេឡេស្ទាល ហើយមានលំនៅផ្សេងទៀតសម្រាប់ជនដែលមិនបានគោរពតាមក្រឹត្យវិន័យនោះ គឺមនុស្សគ្រប់រូបតាមលំដាប់របស់ខ្លួន » (Teachings of Presidents of the Church: Joseph Smith [ ឆ្នាំ ២០០៧ ] ទំព័រ ២១៩ ) ។
អ្នកគួរផ្ដល់ជាយោបល់ឲ្យសិស្សសរសេរពាក្យ នគរ និង នគរទាំងឡាយ នៅក្នុងព្រះគម្ពីររបស់ពួកគេនៅខាងលើពាក្យ ដំណាក់ និង លំនៅ នៅក្នុង យ៉ូហាន ១៤:២ ។
-
តើការបង្រៀនណាមួយនៅក្នុង យ៉ូហាន ១៤:១–៤ បានក្លាយជាការលួងចិត្តដល់ពួកសាវក ?
-
យោងតាម ខទី ៥តើថូម៉ាសបានឆ្លើយតបយ៉ាងដូចម្ដេចដែរ ចំពោះការបង្រៀនរបស់ព្រះអង្គសង្គ្រោះថា ពួកសាវករបស់ទ្រង់បានស្គាល់ផ្លូវទៅនគរព្រះវរបិតាសួគ៌ ?
សូមអញ្ជើញសិស្សម្នាក់អាន យ៉ូហាន ១៤:៦ ឲ្យឮៗ ។ ចូរសុំឲ្យសិស្សក្នុងថ្នាក់ផ្ទៀងតាម រកមើលចម្លើយរបស់ព្រះយេស៊ូវ ចំពោះសំណួររបស់ថូម៉ាស ។ សូមរំឭកពួកគេថា នេះគឺជាចំណេះចំណានបទគម្ពីរមួយ ។
-
តើព្រះយេស៊ូវបានឆ្លើយតបនឹងសំណួររបស់ថូម៉ាសយ៉ាងដូចម្ដេច ?
សូមគូរគន្លងផ្លូវមួយនៅលើក្ដារខៀន ។ នៅចុងម្ខាងនៃគន្លងផ្លូវនោះ សូមសរសេរថាយើងហើយម្ខាងទៀតសរសេរថានគរព្រះវរបិតាសួគ៌ ។ សូមសរសេរផ្លូវពីក្រោយគន្លងផ្លូវ ហើយចង្អុលបង្ហាញថា ឃ្លានេះសំដៅលើគន្លងផ្លូវដែលដឹកនាំពីកន្លែងមួយទៅកន្លែងមួយទៀត ។
-
តើព្រះអង្គសង្គ្រោះគឺជាផ្លូវយ៉ាងដូចម្តេច ? ( សិស្សអាចនឹងឆ្លើយថា ព្រះអង្គសង្គ្រោះបង្ហាញពីរបៀបរស់នៅ ដើម្បីប្រែក្លាយដូចជាព្រះ និងរបៀបមានភាពសក្ដិសម ដើម្បីរស់នៅក្នុងវត្តមានរបស់ព្រះវរបិតាសួគ៌ ) ។
សូមសរសេរ សេចក្តីពិត និង ជីវិត នៅលើក្ដារខៀនក្រោមពាក្យ « ផ្លូវ » ។
-
តើព្រះយេស៊ូវគ្រីស្ទជាសេចក្តីពិតតាមរបៀបណាខ្លះ ? ( ទ្រង់គឺជាប្រភពនៃរាល់សេចក្ដីពិត ហើយបានរស់នៅតាមរាល់សេក្ដីពិតយ៉ាងល្អឥតខ្ចោះ ) ។
-
តើព្រះយេស៊ូវគ្រីស្ទជាជីវិតតាមរបៀបណាខ្លះ ? ( ទ្រង់ធ្វើឲ្យយើងអាចយកឈ្នះលើសេចក្ដីស្លាប់ខាងរូបកាយ ហើយរស់ឡើងវិញជាមួយរូបកាយអមតៈ ហើយយកឈ្នះលើសេចក្ដីស្លាប់ខាងវិញ្ញាណ ដើម្បីទទួលបានជីវិតដ៏នៅអស់កល្បជានិច្ច ។ ទ្រង់គឺជា « ពន្លឺដែលនៅក្នុងគ្រប់ទាំងអស់ ដែលផ្ដល់ជីវិតដល់គ្រប់ទាំងអស់ » [គ. និង ស. ៨៨:១៣] ) ។
នៅក្រោមរូបគំនូរអំពីគន្លងផ្លូវនៅលើក្ដារខៀន សូមសរសេរ ព្រះយេស៊ូវគ្រីស្ទគឺ នៅក្បែរ « ផ្លូវ » ។
-
យោងតាមអ្វីដែលយើងបានពិភាក្សា និងអ្វីដែលអ្នកបានរៀននៅក្នុងមេរៀនប្រចាំថ្ងៃរបស់អ្នក តើអ្នកនឹងសង្ខេបអត្ថន័យនៃព្រះបន្ទូលរបស់ព្រះអង្គសង្គ្រោះថា « បើមិនមកតាមខ្ញុំ នោះគ្មានអ្នកណាទៅឯព្រះវរបិតាបានឡើយ » យ៉ាងដូចម្ដេចដែរ ? (យ៉ូហាន ១៤:៦) ។ ( សិស្សអាចនឹងប្រើពាក្យផ្សេង ប៉ុន្តែពួកគេគួរតែស្គាល់សេចក្ដីពិតមួយដែលស្រដៀងគ្នានេះ ៖ មានតែតាមរយៈដង្វាយធួននៃព្រះយេស៊ូវគ្រីស្ទ និង តាមរយៈការធ្វើតាមរបៀបរបស់ទ្រង់ប៉ុណ្ណោះ ទើបយើងអាចចូលទៅក្នុងនគររបស់ព្រះវរបិតាសួគ៌បាន) ។
-
តើនឹងមានអ្វីកើតឡើង ប្រសិនបើយើងព្យាយាមធ្វើតាមរបៀបមួយដែលពុំមែនជារបៀបរបស់ព្រះអម្ចាស់ ?
សូមអញ្ជើញសិស្សម្នាក់អានឮៗពីសេចក្ដីថ្លែងការណ៍របស់អែលឌើរ លូរែន អ៊ី ខូប៊្រីតហ្គ នៃពួកចិតសិបនាក់ដូចខាងក្រោមនេះ ៖ ចូរសុំឲ្យសិស្សក្នុងថ្នាក់ស្ដាប់រកមើលអ្វីដែលកើតឡើង ប្រសិនបើយើងព្យាយាមធ្វើតាមរបៀបមួយដែលពុំមែនជារបៀបរបស់ព្រះអម្ចាស់ ។
« ព្រះយេស៊ូវគ្រីស្ទ គឺជាផ្លូវ ។ ទ្រង់គឺជាពន្លឺ និងជីវិត ជានំប៉័ង និងទឹក ជាទីចាប់ផ្ដើម និងទីបញ្ចប់ ជាការរស់ឡើងវិញ និងជីវិត ជាព្រះអង្គសង្គ្រោះនៃលោកិយ ជាសេចក្ដីពិត និងជាផ្លូវ ។
« មានផ្លូវតែមួយគត់ដែលនាំទៅរកសុភមង្គល និងភាពពេញលេញ ។ ទ្រង់គឺជាផ្លូវនោះ ។ រាល់ផ្លូវផ្សេងទៀត ផ្លូវផ្សេងទៀតណាក្ដី ទោះជាផ្លូវណាក៏ដោយ គឺជាភាពឆ្កួតលីលា ។ …
« ផ្លូវរបស់ព្រះអម្ចាស់មិនលំបាកទេ ។ ជីវិតគឺពិបាក ប៉ុន្តែដំណឹងល្អមិនដូច្នោះទេ ។ ‹ មានការផ្ទុយចំពោះរឿងសព្វសារពើ › [នីហ្វៃទី ២ ២:១១] នៅគ្រប់ទីកន្លែងសម្រាប់មនុស្សគ្រប់គ្នា ។ ជីវិតធ្វើឲ្យយើងទាំងអស់គ្នាមានការលំបាក ប៉ុន្តែជីវិតក៏មានភាពសាមញ្ញផងដែរ ។ យើងមានការជ្រើសរើសតែពីរប៉ុណ្ណោះ ។ យើងអាចដើរតាមព្រះអម្ចាស់ ហើយទទួលបាននូវព្រះចេស្ដារបស់ទ្រង់ ហើយមានសេចក្ដីសុខសាន្ត ពន្លឺ កម្លាំង ចំណេះដឹង ភាពជឿជាក់ សេចក្ដីស្រឡាញ់ និងអំណរក៏បាន ឬក៏យើងអាចទៅផ្លូវមួយចំនួននានាទៀត ផ្លូវផ្សេងណាមួយ ផ្លូវផ្សេងណាក៏បានដែរ ហើយដើរលើផ្លូវនោះតែម្នាក់ឯង—ដោយគ្មានជំនួយរបស់ទ្រង់ គ្មានការគាំទ្ររបស់ទ្រង់ គ្មានព្រះចេស្ដារបស់ទ្រង់ គ្មានការដឹកនាំរបស់ទ្រង់ នៅក្នុងសេចក្ដីងងឹត ភាពចលាចល ការសង្ស័យ ទុក្ខសោក និងភាពអស់សង្ឃឹម ។ ហើយខ្ញុំសួរថា តើផ្លូវមួយណាងាយជាង ? …
« មានផ្លូវតែមួយគត់ដែលនាំទៅរកសុភមង្គល និងភាពពេញលេញ ។ ព្រះយេស៊ូវគ្រីស្ទគឺជាផ្លូវ » (« The Way » Ensign ឬ Liahona ខែ វិច្ឆិកា ឆ្នាំ ២០០៨ ទំព័រ ៣៤, ៣៦ ) ។
-
យោងតាមអែលឌើរ ខូប៊្រីតហ្គ តើនឹងមានអ្វីកើតឡើង ប្រសិនបើយើងមិនធ្វើតាមរបៀបរបស់ព្រះអង្គសង្គ្រោះ ?
-
តើនឹងមានអ្វីកើតឡើង ប្រសិនបើយើងធ្វើតាមរបៀបរបស់ព្រះអង្គសង្គ្រោះ ?
-
តើអ្វីទៅជារបៀបរបស់ព្រះអង្គសង្គ្រោះ ? ( ប្រសិនបើចាំបាច់ ចូររំឭកសិស្សថា របៀបរបស់ព្រះអម្ចាស់រួមមាន ការបង្កើនសេចក្តីជំនឿលើទ្រង់ និង ព្រះវរបិតាសួគ៌ ប្រែចិត្ត ទទួលពិធីបរិសុទ្ធនៃសេចក្តីសង្គ្រោះ ដូចជាបុណ្យជ្រមុជទឹក និងពិធីបរិសុទ្ធនៃព្រះវិហារបរិសុទ្ធ ហើយស៊ូទ្រាំដរាបដល់ចុងបំផុត នៅក្នុងសេចក្តីជំនឿ និង ការគោរពប្រតិបត្តិ ) ។
ចូរសុំឲ្យសិស្សសញ្ជឹងគិតពីបទពិសោធន៍ដែលពួកគេធ្លាប់មាន ហើយដែលពួកគេត្រូវបានប្រទានឲ្យតាមរយៈការធ្វើតាមរបៀបរបស់ព្រះអង្គសង្គ្រោះ ។ សូមអញ្ជើញឲ្យសិស្សពីរបីនាក់ចែកចាយបទពិសោធន៍របស់ពួកគេ ។
សូមអញ្ជើញសិស្សឲ្យពិចារណាថា តើពួកគេកំពុងធ្វើតាមរបៀបរបស់ព្រះអង្គសង្គ្រោះបានល្អកម្រិតណាដែរ ។ ចូរសុំឲ្យពួកគេគិតពីរបៀបមួយ ដែលពួកគេអាចធ្វើតាមព្រះអង្គសង្គ្រោះកាន់តែប្រសើរឡើង ហើយដាក់គោលដៅមួយដើម្បីអនុវត្តសកម្មភាពនោះ ។
សូមសង្ខេប យ៉ូហាន ១៤:៧–១៤ ដោយពន្យល់ថា ព្រះអង្គសង្គ្រោះបានបង្រៀនពួកសាវករបស់ទ្រង់ថា ព្រះរាជបំណងមួយរបស់ទ្រង់ក្នុងការយាងមកផែនដីគឺ ដើម្បីបើកសម្ដែងតាមរយៈព្រះបន្ទូល និងទង្វើរបស់ទ្រង់នូវលក្ខណៈពិតរបស់ព្រះវរបិតាសួគ៌ ។ ទ្រង់ក៏បានសន្យាដល់ពួកសាវករបស់ទ្រង់ថា ពួកគេនឹងមានអំណាចដើម្បីធ្វើកិច្ចការដ៏អស្ចារ្យទាំងឡាយ ។
មេរៀនបន្ទាប់ (យ៉ូហាន ១៦-២១)
សូមអញ្ជើញសិស្សឲ្យរកមើលចម្លើយចំពោះសំណួរខាងក្រោមនេះ នៅពេលពួកគេបញ្ចប់ការសិក្សារបស់ពួកគេនៅក្នុងដំណឹងល្អរបស់យ៉ូហាន ៖ តើព្រះយេស៊ូវបានមានបន្ទូលដូចម្តេចទៅមាតារបស់ទ្រង់ កាលទ្រង់ត្រូវបានគេឆ្កាងនៅលើឈើឆ្កាងនោះ ? តើនរណាជាមនុស្សដំបូង ដែលព្រះយេស៊ូវគ្រីស្ទបានបង្ហាញអង្គទ្រង់ឲ្យឃើញ បន្ទាប់ពីទ្រង់បានមានព្រះជន្មរស់ឡើងវិញ ? តើនរណាទៅដែលបានបដិសេធមិនជឿទីបន្ទាល់របស់អ្នកឯទៀតថា ព្រះយេស៊ូវបានមានព្រះជន្មរស់ឡើងវិញហើយ ? សូមអញ្ជើញសិស្សឲ្យស្រមៃពីអ្វី ដែលព្រះអង្គសង្គ្រោះនឹងមានបន្ទូលទៅកាន់ពួកសិស្សរបស់ទ្រង់ដែលបានឃើញទ្រង់ និងការមានព្រះជន្មរស់ឡើងវិញរបស់ទ្រង់ ប៉ុន្តែក្រោយមកបានសម្រេចចិត្តត្រឡប់ទៅធ្វើការងារចាស់របស់ខ្លួនវិញ ជាជាងការប្រកាសដំណឹងល្អនោះ ។ ចូរសុំឲ្យពួកគេមើលនៅក្នុងមេរៀនបន្ទាប់សម្រាប់អ្វី ដែលព្រះអង្គសង្គ្រោះបានមានបន្ទូលទៅកាន់សិស្សទាំងនោះ ។