មេរៀនទី ៦០
យ៉ូហាន ១
សេចក្តីផ្ដើម
យ៉ូហានសិស្សជាទីស្រឡាញ់ បានកត់ត្រាគោលលទ្ធិសំខាន់ៗដែលទាក់ទងនឹងតួនាទីរបស់ព្រះយេស៊ូវគ្រីស្ទនៅក្នុងជីវិតមុនផែនដីនេះ ។ យ៉ូហាន បាទីស្ទ ក៏បានថ្លែងទីបន្ទាល់ពីព្រះយេស៊ូវគ្រីស្ទ ហើយបានជ្រមុជទឹកឲ្យទ្រង់ ។ ព្រះយេស៊ូវគ្រីស្ទបានអញ្ជើញមនុស្សដទៃទៀតឲ្យរៀនអំពីទ្រង់ ។
យោបល់សម្រាប់ការបង្រៀន
យ៉ូហាន១:១–១៨, ការបកប្រែដោយ យ៉ូសែប ស្ម៊ីធ យ៉ូហាន១:១–១៩
យ៉ូហានថ្លែងទីបន្ទាល់ពីព្រះយេស៊ូវគ្រីស្ទថា ជាព្រះរាជបុត្រានៃព្រះ
សូមចែកសិស្សជាគូៗ ។ សូមដាក់តាំង រូបភាព ព្រះយេស៊ូវគ្រីស្ទនៅលើក្ដារខៀន ។ ចូរសុំឲ្យសិស្សនឹកស្រមៃថា ពួកគេកំពុងនិយាយនឹងមនុស្សម្នាក់ ដែលដឹងបន្តិចបន្តួចអំពីព្រះយេស៊ូវគ្រីស្ទ ។ ចូរអញ្ជើញឲ្យសិស្សម្នាក់ក្នុងចំណោមដៃគូនីមួយៗ ចំណាយពេលមួយនាទី បង្រៀនសិស្សផ្សេងទៀតអំពីព្រះយេស៊ូវ សម្តែងដូចជាសិស្សដទៃស្គាល់ពីទ្រង់បន្តិចបន្តួច ។ ក្រោយពីសកម្មភាពនេះ សូមអញ្ជើញសិស្សពីរបីនាក់ដែលត្រូវបានបង្រៀនពីព្រះគ្រីស្ទឲ្យចែកចាយជាមួយសិស្សដទៃទៀត អំពីអ្វីដែលពួកគេបានរៀនពីដៃគូរបស់ពួកគេ ។
សូមណែនាំខ្លីៗពីគម្ពីរយ៉ូហានដោយពន្យល់ថា សាវកយ៉ូហានបានកត់ត្រាអ្វីដែលគាត់ចង់ឲ្យពួកបរិសុទ្ធដឹងអំពីព្រះយេស៊ូវគ្រីស្ទ ។ យ៉ូហានគឺជាសាក្សីម្នាក់ចំពោះដំណើររឿងជាច្រើនដែលលោកបានសរសេរ ។ ឯកសារភាគច្រើននៅក្នុងដំណឹងល្អរបស់យ៉ូហានគ្មាននៅក្នុងដំណឹងល្អរបស់ម៉ាថាយ ម៉ាកុស និងលូកា ដែលសរសេរដើម្បីជួយពួកយូដា និងពួកសាសន៍ដទៃឲ្យជឿថា ព្រះយេស៊ូវគឺជាព្រះមែស៊ី និងព្រះអង្គសង្គ្រោះនៃមនុស្សលោកនោះទេ ។ ផ្ទុយទៅវិញ យ៉ូហានបានសរសេរយ៉ាងជាក់លាក់ទៅកាន់ជនដែលបានដឹងរួចហើយថា ព្រះយេស៊ូវគឺជាព្រះគ្រីស្ទ ។
នៅពេលសិស្សសិក្សា យ៉ូហាន ១សូមអញ្ជើញពួកគេឲ្យរកមើលសេចក្ដីពិតអំពីព្រះអង្គសង្គ្រោះ ដែលអាចពង្រឹងសេចក្ដីជំនឿ និងទីបន្ទាល់របស់ពួកគេអំពីព្រះយេស៊ូវគ្រីស្ទ ។
សូមឲ្យសិស្សម្នាក់អានការបកប្រែដោយយ៉ូសែប ស្ម៊ីធ យ៉ូហាន ១:១-២( នៅក្នុងសេចក្ដីណែនាំដល់បទគម្ពីរទាំងឡាយ ) ។ សូមអញ្ជើញសិស្សក្នុងថ្នាក់ឲ្យផ្ទៀងតាម ។ ចូរសុំពួកគេឲ្យរកមើលសេចក្ដីពិត ដែលយ៉ូហានបានបង្រៀនអំពីព្រះយេស៊ូវគ្រីស្ទ ។
-
តើសេចក្ដីពិតអ្វីខ្លះ ដែលយើងរៀនអំពីព្រះយេស៊ូវគ្រីស្ទ នៅក្នុងខគម្ពីរទាំងនេះ ? ( សេចក្ដីពិតមួយដែលសិស្សគួររកឃើញគឺថា ព្រះយេស៊ូវគ្រីស្ទគង់នៅជាមួយនឹងព្រះតាំងពីដំបូង ។ សូមសរសេរសេចក្ដីពិតនេះនៅលើក្ដារខៀន ក្បែររូបភាពព្រះអង្គសង្គ្រោះ ) ។
-
តើ កាលដែលព្រះយេស៊ូវគ្រីស្ទបានគង់នៅជាមួយនឹងព្រះ តាំងពីដើមដំបូងមានន័យដូចម្ដេច ? ( សូមពន្យល់ថា ឃ្លា « តាំងពីដើមដំបូង » សំដៅទៅលើជីវិតមុនផែនដីនេះ ។ ព្រះយេស៊ូវគ្រីស្ទគឺជាបុត្រវិញ្ញាណច្បងរបស់ព្រះវរបិតា [ សូមមើល គ. និង ស. ៩៣:២១] ទ្រង់មើលទៅ « ដូចជាព្រះ » នៅក្នុងចំណោមវិញ្ញាណដែលជុំគ្នានៅទីនោះ « មុនកំណើតលោកិយមកម្ល៉េះ » [ សូមមើល អ័ប្រាហាំ ៣:២២–២៤] ហើយទ្រង់ត្រូវបានរើសតាំងដោយព្រះបិតាតាំងតែពីដំបូងមក [ សូមមើល ម៉ូសេ ៤:២] ។
សូមអញ្ជើញសិស្សម្នាក់អាន ការបកប្រែដោយ យ៉ូសែប ស្ម៊ីធ យ៉ូហាន ១:៣ឲ្យឮៗ ( នៅក្នុងសេចក្ដីណែនាំដល់បទគម្ពីរទាំងឡាយ ) ហើយសុំឲ្យសិស្សក្នុងថ្នាក់រកមើលសេចក្ដីពិតមួយបន្ថែមទៀត ដែលយ៉ូហានបានបង្រៀនអំពីព្រះយេស៊ូវគ្រីស្ទ ។
-
តើយ៉ូហានបានបង្រៀនអ្វីខ្លះទៀតអំពីព្រះយេស៊ូវគ្រីស្ទ ? ( សិស្សគួររកឃើញគោលលទ្ធិមួយដែលស្រដៀងគ្នានឹងគោលលទ្ធិខាងក្រោម ៖ វត្ថុសព្វសារពើត្រូវបានបង្កើតឡើងដោយព្រះយេស៊ូវគ្រីស្ទ ។ ចូរសរសេរសេចក្ដីពិតនេះនៅក្បែររូបភាពរបស់ព្រះអង្គសង្គ្រោះនៅលើក្ដារខៀន ) ។
សូមពន្យល់ថា ព្រះយេស៊ូវគ្រីស្ទបានបង្កើតស្ថានសួគ៌ និងផែនដីក្រោមការដឹកនាំរបស់ព្រះវរបិតា ហើយថាព្រះយេស៊ូវគ្រីស្ទបានបង្កើតពិភពលោកជាច្រើនរាប់មិនអស់ ( សូមមើល ម៉ូសេ ១:៣៣) ។ ប៉ុន្តែ ព្រះវរបិតាសួគ៌បានទុក « ព្រឹត្តិការណ៍បង្កបង្កើតពីរ » សម្រាប់ទ្រង់ផ្ទាល់គឺ ៖ ការបង្កបង្កើតវិញ្ញាណទាំងអស់ ( រួមទាំងវិញ្ញាណរបស់ព្រះយេស៊ូវគ្រីស្ទផងដែរ ) និងការបង្កបង្កើតរូបកាយរបស់អ័ដាម និងអេវ៉ា ( Bruce R. McConkie A New Witness for the Articles of Faith [ ឆ្នាំ ១៩៨៥ ] ទំព័រ ៦៣ សូមមើលផងដែរ ម៉ូសេ ២:២៧ ) ។
សូមអញ្ជើញសិស្សម្នាក់អានការបកប្រែដោយយ៉ូសែប ស្ម៊ីធ យ៉ូហាន ១:៤-៥ ឲ្យឮៗ ( នៅក្នុងសេចក្ដីណែនាំដល់បទគម្ពីរទាំងឡាយ ) ។ ចូរសុំឲ្យសិស្សក្នុងថ្នាក់រកមើលរបៀបដែលយ៉ូហានបានពិពណ៌នាពីព្រះយេស៊ូវ និងដំណឹងល្អរបស់ទ្រង់ ។
-
តើយ៉ូហានបានពិពណ៌នាអំពីព្រះយេស៊ូវ និងដំណឹងល្អរបស់ទ្រង់របៀបណា ?
-
តើឃ្លាថា « នៅក្នុងទ្រង់មានដំណឹងល្អ » មានន័យដូចម្ដេច ? ( ព្រះយេស៊ូវគ្រីស្ទគឺជាដំណឹងល្អ ជាតំណាងនៃដំណឹងល្អ ) ។
-
តើអ្នកគិតថាការមានពន្លឺដែល « ភ្លឺមកក្នុងពិភពលោក ហើយពិភពលោកយល់មិនដល់ពន្លឺទេ » មានន័យដូចម្ដេច ? ( ការបកប្រែដោយយ៉ូសែប ស្ម៊ីធ យ៉ូហាន ១:៥ ) ។
សូមពន្យល់ថា ក្រោយមកសាវកយ៉ូហានបានបង្រៀនអំពី យ៉ូហាន បាទីស្ទ ។ សូមអញ្ជើញសិស្សម្នាក់អានការបកប្រែដោយយ៉ូសែប ស្ម៊ីធ យ៉ូហាន ១:៦-១០ ឲ្យឮៗ ( នៅក្នុងសេចក្ដីណែនាំដល់បទគម្ពីរទាំងឡាយ ) ។ ចូរសុំឲ្យសិស្សក្នុងថ្នាក់រកមើលនូវអ្វី ដែលយ៉ូហាន បាទីស្ទ បានប្រកាសអំពីព្រះយេស៊ូវគ្រីស្ទ ។ សូមអញ្ជើញសិស្សឲ្យរៀបរាប់ពីអ្វីដែលពួកគេរកឃើញ ។
-
នៅក្នុង ខទី ៩–១០តើគោលលទ្ធិអ្វីខ្លះ ដែលសាវកយ៉ូហាន បានបង្រៀនអំពីព្រះយេស៊ូវ ? ( សិស្សគួររកឃើញគោលលទ្ធិមួយដែលស្រដៀងគ្នានឹងគោលលទ្ធិខាងក្រោម ៖ ព្រះយេស៊ូវគ្រីស្ទគឺជាពន្លឺនៃពិភពលោក ។ ចូរសរសេរសេចក្ដីពិតនេះនៅក្បែររូបភាពរបស់ព្រះអង្គសង្គ្រោះនៅលើក្ដារខៀន)។
-
តើព្រះយេស៊ូវគ្រីស្ទជាពន្លឺនៃពិភពលោករបៀបណា ? ( សូមមើល គ. និង ស. ៨៨:៥-១៣ ) ។
សូមសង្ខេបការបកប្រែដោយយ៉ូសែប ស្ម៊ីធ យ៉ូហាន ១:១១–១៨ ( នៅក្នុងសេចក្ដីណែនាំដល់បទគម្ពីរទាំងឡាយ ) ដោយពន្យល់ថា យ៉ូហាន បាទីស្ទ បានថ្លែងទីបន្ទាល់ថា ជនទាំងអស់ណាដែលជឿលើព្រះយេស៊ូវគ្រីស្ទនឹងទទួលបានអមតភាព និង ជីវិតដ៏នៅអស់កល្បជានិច្ច ។
ចូរចង្អុលបង្ហាញថានៅក្នុង ខទី ១៤និង១៦ យ៉ូហាន បានហៅព្រះយេស៊ូវគ្រីស្ទថាជា « ព្រះបន្ទូល » ។ សូមពន្យល់ថា នេះគឺជាងារមួយរបស់ព្រះយេស៊ូវគ្រីស្ទដែលមានច្រើនកន្លែងនៅក្នុងព្រះគម្ពីរ ( សូមមើល យ៉ូហាន ១:១, ១៤, យ៉ូហានទី ១ ១:១, វិវរណៈ ១៩:១៣, គ. និង ស. ៩៣:៨-១០, ម៉ូសេ ១:៣២) ។
ចូរចង្អុលបង្ហាញថា យើងប្រើពាក្យសម្ដីដើម្បីប្រាស្រ័យទាក់ទង ហើយបង្ហាញពីគំនិត អារម្មណ៍ និងយោបល់ដល់មនុស្សដទៃទៀត ។
-
តើពាក្យ « ព្រះបន្ទូល » ជាងារមួយដ៏សមរម្យរបស់ព្រះយេស៊ូវគ្រីស្ទយ៉ាងដូចម្ដេច ?
ក៏សូមពន្យល់ផងដែរថា ប្រសិនបើគ្មានការបកប្រែដោយយ៉ូសែប ស្ម៊ីធ ទេ យ៉ូហាន ១:១៨ អាចនឹងមានការយល់ខុស ដោយសារបានចែងថា គ្មានអ្នកណាដែលឃើញព្រះជាព្រះវរបិតាឡើយ ។ សូមអញ្ជើញសិស្សម្នាក់អានការបកប្រែដោយយ៉ូសែប ស្ម៊ីធ យ៉ូហាន ១:១៩ ( នៅក្នុងសេចក្ដីណែនាំដល់បទគម្ពីរទាំងឡាយ ) ។
-
តើ ការបកប្រែដោយយ៉ូសែប ស្ម៊ីធ យ៉ូហាន ១:១៩ បញ្ជាក់ពី យ៉ូហាន ១:១៨ដោយរបៀបណា ?
សូមបែងចែកសិស្សជាគូដដែល កាលពួកគេបានធ្វើសកម្មភាពនៅដើមមេរៀន ។ ចូរសុំឲ្យសិស្សម្នាក់ពីដៃគូនីមួយៗចំណាយពេលមួយនាទីបង្រៀនដៃគូខ្លួនអំពីព្រះយេស៊ូវគ្រីស្ទ ដោយប្រើគោលលទ្ធិដែលសិស្សក្នុងថ្នាក់បានរកឃើញនៅក្នុង ការបកប្រែដោយយ៉ូសែប ស្ម៊ីធ យ៉ូហាន ១:១–១៩ ( នៅក្នុងសេចក្ដីណែនាំដល់បទគម្ពីរទាំងឡាយ ) ។ ក្រោយពីមានពេលគ្រប់គ្រាន់ហើយ សូមសួរ ៖
-
ហេតុអ្វីវាជារឿងដ៏សំខាន់ សម្រាប់មនុស្សម្នាក់ដើម្បីដឹងគោលលទ្ធិទាំងនេះអំពីព្រះយេស៊ូវគ្រីស្ទ ?
យ៉ូហាន ១:១៩–៣៤, ការបកប្រែដោយយ៉ូសែប ស្ម៊ីធ យ៉ូហាន ១:២០–៣៤
យ៉ូហាន បាទីស្ទ បានថ្លែងទីបន្ទាល់អំពីព្រះយេស៊ូវគ្រីស្ទ និង បានជ្រមុជទឹកថ្វាយទ្រង់
សូមសង្ខេប ការបកប្រែដោយយ៉ូសែប ស៊្មីធ យ៉ូហាន ១:២០–២៨ ( នៅក្នុងសេចក្ដីណែនាំដល់បទគម្ពីរទាំងឡាយ ) ដោយពន្យល់ថា សាសន៍យូដាបានបញ្ជូនពួកសង្ឃទៅរកយ៉ូហាន បាទីស្ទ ដើម្បីសួរលោកថាតើលោកជាព្រះមែស៊ីឬ ។ យ៉ូហានបានពន្យល់ថា តួនាទីរបស់គាត់គឺដើម្បីថ្លែងទីបន្ទាល់អំពីព្រះមែស៊ី ដែលនឹងត្រូវជ្រមុជដោយភ្លើង និង ជាមួយព្រះវិញ្ញាណបរិសុទ្ធ ។ នៅថ្ងៃបន្ទាប់មក យ៉ូហាន បាទីស្ទ បានឃើញព្រះយេស៊ូវដែលលោកបានជ្រមុជទឹកកាលពីមុន ។
សូមអញ្ជើញសិស្សម្នាក់ឲ្យក្រោកឈរអានពាក្យសម្ដីរបស់យ៉ូហាន បាទីស្ទ នៅក្នុង ការបកប្រែដោយយ៉ូសែប ស្ម៊ីធ យ៉ូហាន ១:២៩–៣៣ ( នៅក្នុងសេចក្ដីណែនាំដល់បទគម្ពីរទាំងឡាយ ) ឲ្យឮៗ ហាក់ដូចជាសិស្សម្នាក់នោះជាយ៉ូហាន បាទីស្ទ ។ សូមអញ្ជើញសិស្សក្នុងថ្នាក់ឲ្យផ្ទៀងតាមរកមើលអ្វីដែលយ៉ូហាន បាទីស្ទ ចង់ឲ្យមនុស្សស្គាល់អំពីព្រះយេស៊ូវគ្រីស្ទ ។
ចូរចង្អុលបង្ហាញទៅរូបភាពរបស់ព្រះយេស៊ូវគ្រីស្ទ និងសេចក្ដីពិតដែលបានសរសេរនៅលើក្ដារខៀន ហើយសួរ៖
-
តើសេចក្តីពិត ឬ ការពិពណ៌នាអ្វីផ្សេងទៀតអំពីព្រះយេស៊ូវគ្រីស្ទដែលយើងអាចបន្ថែមមកពី ការបកប្រែដោយយ៉ូសែប ស៊្មីធ យ៉ូហាន ១:២៩–៣៣? ( សូមសរសេរចម្លើយរបស់សិស្សនៅលើក្ដារខៀន ) ។
-
ហេតុអ្វីអ្នកគិតថា យ៉ូហាន បាទីស្ទ ហៅព្រះយេស៊ូវថាជា « កូនចៀមរបស់ព្រះ » ?
យ៉ូហាន ១:៣៥-៥១
ព្រះយេស៊ូវអញ្ជើញអ្នកដើរតាមទ្រង់ឲ្យរៀនបន្ថែមទៀតពីទ្រង់
ចូរសុំឲ្យសិស្សស្រមៃថា យុវវ័យម្នាក់ចូលរួមការប្រជុំតមអាហារ និង ថ្លែងទីបន្ទាល់ ស្តាប់ឮមិត្តភក្តិជាច្រើនថ្លែងទីបន្ទាល់ថា ពួកគេដឹងថាព្រះយេស៊ូវគ្រីស្ទគឺជាព្រះអង្គសង្គ្រោះរបស់ខ្លួន ។ យុវវ័យម្នាក់នេះឆ្ងល់ពីរបៀបដែលមិត្តភក្តិទាំងនោះ « ដឹង » រឿងទាំងនោះ ។
-
តើអ្នកនឹងឆ្លើយតបចំពោះសំណួរនេះយ៉ាងណាដែរ ?
នៅពេលសិស្សសិក្សា យ៉ូហាន ១:៣៥–៥១សូមអញ្ជើញសិស្ស ឲ្យរកមើលអ្វីដែលយើងអាចធ្វើដើម្បីទទួលបាន ( ឬពង្រឹង ) សាក្សីរបស់យើងពីព្រះយេស៊ូវគ្រីស្ទថាជាព្រះអង្គសង្គ្រោះ ។
សូមអញ្ជើញសិស្សម្នាក់អានយ៉ូហាន ១:៣៥-៣៧ឲ្យឮៗ ហើយសុំឲ្យសិស្សក្នុងថ្នាក់រកមើលអ្វីដែលយ៉ូហាន បាទីស្ទ បានធ្វើមួយថ្ងៃបន្ទាប់ពីគាត់បានជ្រមុជទឹកឲ្យព្រះយេស៊ូវ ។
-
តើយ៉ូហានបានធ្វើអ្វីខ្លះ នៅពេលគាត់បានឃើញព្រះយេស៊ូវ ?
ចូរសុំឲ្យសិស្សម្នាក់អាន យ៉ូហាន ១:៣៨-៣៩ ឲ្យឮៗ ។ ចូរសុំឲ្យសិស្សក្នុងថ្នាក់ផ្ទៀងតាមរកមើលអ្វីដែលព្រះយេស៊ូវគ្រីស្ទ បានមានបន្ទូលទៅកាន់ពួកសិស្សទាំងពីរនាក់នោះ ។
-
តើព្រះយេស៊ូវបានមានបន្ទូលសួរអ្វីខ្លះ ដល់សិស្សសិស្សទាំងពីរនាក់នោះ ?
-
តើពួកគេឆ្លើយយ៉ាងម៉េចដែរ ?
-
តើព្រះយេស៊ូវបានអញ្ជើញសិស្សទាំងពីរនាក់នោះឲ្យធ្វើអ្វីខ្លះ ?
សូមអញ្ជើញសិស្សម្នាក់អានយ៉ូហាន ១:៤០-៤២ឲ្យឮៗ ហើយសុំឲ្យសិស្សក្នុងថ្នាក់រកមើលអ្វីដែលអន់ឌ្រេបានរៀន បន្ទាប់ពីគាត់បានទទួលយកការអញ្ជើញរបស់ព្រះអង្គសង្គ្រោះថា « ចូរតាមខ្ញុំទៅមើល » ។
-
តើអន់ឌ្រេបានរៀនអ្វីខ្លះ ដោយទទួលយកការអញ្ជើញរបស់ព្រះអង្គសង្គ្រោះថា « ចូរតាមខ្ញុំទៅមើល » ? ( ថាព្រះយេស៊ូវគឺជាព្រះមែស៊ី ឬព្រះគ្រីស្ទ ។ អ្នកក៏គួរចង្អុលបង្ហាញថា យើងរៀនចេញពីការបកប្រែដោយយ៉ូសែប ស្ម៊ីធ សម្រាប់ យ៉ូហាន ១:៤២ ថា ពេត្រុសនឹងត្រូវបានហៅ « កេផាសគឺប្រែថា អ្នកមើលឆុត ឬថ្ម » ដោយបង្ហាញថា ពេត្រុសនឹងក្លាយជាអ្នកមើលឆុតនៅក្នុងសាសនាចក្រ ) ។
សូមអញ្ចើញសិស្សម្នាក់អាន យ៉ូហាន ១:៤៣-៤៦ ឲ្យឮៗ ហើយឲ្យសិស្សក្នុងថ្នាក់រកមើលអ្វី ដែលព្រះអង្គសង្គ្រោះបានអញ្ជើញភីលីពឲ្យធ្វើ ។ ចូរសុំឲ្យសិស្សចែកចាយអ្វីដែលពួកគេរកឃើញ ។
-
តើពាក្យណាមួយនៅក្នុង ខទី ៤៥ ដែលបង្ហាញថាភីលីពបានទទួលទីបន្ទាល់អំពីព្រះយេស៊ូវគ្រីស្ទ បន្ទាប់ពីលោកបានទទួលការអញ្ជើញរបស់ព្រះអង្គសង្គ្រោះឲ្យតាមទ្រង់ ?
-
តើការអញ្ជើញអ្វីខ្លះ ដែលភីលីពក្រោយមកបានផ្តល់ដល់ ណាថាណែល ?
សូមអញ្ជើញសិស្សបីនាក់អាន យ៉ូហាន ១:៤៧-៥១ ឲ្យឮៗ ។ ចូរចាត់ម្នាក់ធ្វើជាអ្នកពោល ម្នាក់ទៀតអានព្រះបន្ទូលរបស់ព្រះយេស៊ូវ ហើយម្នាក់ទៀតអានពាក្យសម្ដីរបស់ ណាថាណែល ។ សូមអញ្ជើញសិស្សក្នុងថ្នាក់ឲ្យស្ដាប់រកមើលអ្វីដែលបានកើតឡើង នៅពេលណាថាណែលបានទទួលយកការអញ្ជើញឲ្យរៀនអំពីព្រះយេស៊ូវ ។
-
តើមានអ្វីបានកើតឡើង បន្ទាប់ពីណាថាណែលបានទទួលយកការអញ្ជើញឲ្យរៀនអំពីព្រះយេស៊ូវ ?
-
តើគោលការណ៍អ្វីខ្លះដែលយើងអាចរៀនពីដំណើររឿងទាំងនេះ ? ( សិស្សគួររកឃើញគោលការណ៍មួយដែលស្រដៀងគ្នានឹងគោលការណ៍ខាងក្រោម ៖ នៅពេលយើងទទួលយកការអញ្ជើញឲ្យរៀន និង ធ្វើតាមព្រះយេស៊ូវគ្រីស្ទ នោះយើងនឹងទទួលបានសាក្សីផ្ទាល់ខ្លួនពីទ្រង់) ។
សូមអញ្ជើញឲ្យសិស្សម្នាក់អានសេចក្ដីថ្លែងការណ៍ខាងក្រោមនេះឮៗដោយអែលឌើរ ជែហ្វ្រី អ័រ ហូឡិន ក្នុងកូរ៉ុមនៃពួកសាវកដប់ពីរនាក់ ។
« វាទំនងថា អត្ថន័យដ៏សំខាន់បំផុតនៃដំណើរជីវិតរមែងស្លាប់របស់យើង និង ចម្លើយនានាចំពោះសំណួរសំខាន់ៗបំផុតនៅក្នុងជីវិត គឺត្រូវបានមើលឃើញនៅក្នុងកត្តាដ៏សង្ខេបក្តីទាំងពីរនេះ ក្នុងឆាកចាប់ផ្ដើមនៃការបម្រើក្នុងជីវិតលើផែនដីរបស់ព្រះអង្គសង្គ្រោះ ។ កត្តាទីមួយ គឺជាសំណួរមួយឃ្លាដែលមានចំពោះយើងនៅលើផែនដីនេះ ៖ ‹ តើអ្នកស្វែងរកអី ? តើអ្នកចង់បានអ្វី ? › ទីពីរ គឺជាចម្លើយរបស់ទ្រង់ឆ្លើយនឹងចម្លើយរបស់យើង ទោះបីជាចម្លើយនោះវាជាអ្វីក៏ដោយ ។ មិនថាយើងជានរណា ហើយយើងឆ្លើយតបដោយរបៀបណានោះទេ ចម្លើយរបស់ទ្រង់គឺ តែងតែ ដូចគ្នាដដែលជានិច្ច ៖ ‹ ចូរមកចុះ › ទ្រង់មានបន្ទូលដោយក្តីស្រឡាញ់ ។ ‹ ចូរមកតាមខ្ញុំ › ។ ទីណាក៏ដោយដែលអ្នកនឹងទៅ រឿងដំបូងនោះ សូមមក ហើយមើលអ្វីដែលយើងធ្វើ និង ពីរបៀបដែលយើងចំណាយពេលវេលារបស់យើង ។ ចូររៀនពីខ្ញុំ ចូរដើរជាមួយនឹងយើងចុះ ចូរនិយាយជាមួយយើងចុះ សូមជឿចុះ ។ សូមស្ដាប់ខ្ញុំអធិស្ឋាន ។ ជាផលតបស្នងមកវិញ អ្នកនឹងរកឃើញចម្លើយចំពោះការអធិស្ឋានរបស់អ្នក ។ ព្រះនឹងនាំមកនូវការសម្រាកដល់ព្រលឹងអ្នក » (« He Hath Filled the Hungry with Good Things » Ensign ខែ វិច្ឆិកា ឆ្នាំ ១៩៩៧ ទំព័រ ៦៥ ) ។
សូមអញ្ជើញសិស្សឲ្យពិចារណាពីកិច្ចខិតខំផ្ទាល់ខ្លួនរបស់ពួកគេ ដើម្បីរៀនពីព្រះយេស៊ូវគ្រីស្ទ ហើយធ្វើតាមទ្រង់ ។
-
តើទីបន្ទាល់របស់អ្នកអ្នកអំពីព្រះយេស៊ូវគ្រីស្ទបានកើនឡើងតាមរបៀបណាខ្លះ ខណៈដែលអ្នកបានរៀន និង បានធ្វើតាមទ្រង់នោះ ?
សូមអញ្ជើញសិស្សឲ្យសរសេរនៅក្នុងសៀវភៅកំណត់ចំណាំក្នុងថ្នាក់ ឬសៀវភៅកំណត់ត្រាការសិក្សាព្រះគម្ពីររបស់ពួកគេនូវពាក្យពីរបីប្រយោគអំពីអ្វី ដែលពួកគេនឹងធ្វើដើម្បីទទួលយកកាន់តែពេញលេញ នូវការអញ្ជើញរបស់ព្រះអង្គសង្គ្រោះថា « ចូរតាមខ្ញុំទៅមើល » ហើយរៀនពីទ្រង់ ហើយដើរតាមទ្រង់ ។
សូមបញ្ចប់ដោយការចែកចាយនូវទីបន្ទាល់របស់អ្នក អំពីគោលការណ៍ទាំងឡាយដែលបានរកឃើញនៅក្នុងថ្នាក់ថ្ងៃនេះ ។