មេរៀនទី ៦៧
យ៉ូហាន ៨:១-៣០
សេចក្ដីផ្ដើម
អំឡុងពេលព្រះអង្គសង្គ្រោះនៅក្នុងទីក្រុងយេរូសាឡិមសម្រាប់បុណ្យបារាំ ពួកអាចារ្យ និង ពួកផារិស៊ីមួយចំនួន បាននាំស្ត្រីម្នាក់មកឯទ្រង់ ដែលត្រូវបានចោទថាបានប្រព្រឹត្តសហាយស្មន់ ហើយពួកគេបានសួរទ្រង់ថា តើនាងគួរតែត្រូវចោលនឹងដុំថ្មដែរឬទេ ។ ទ្រង់បានធ្វើឲ្យអ្នកចោទប្រកាន់ទាំងនោះស្រឡាំងកាំង ហើយបានបង្ហាញក្តីមេត្តាដល់ស្ត្រីនោះ ។ ព្រះយេស៊ូវក៏បានបង្រៀនថា ព្រះវរបិតាថ្លែងទីបន្ទាល់អំពីទ្រង់ដែរ ។
យោបល់សម្រាប់ការបង្រៀន
យ៉ូហាន ៨:១-១១
ស្ត្រីម្នាក់ប្រព្រឹត្តសហាយស្មន់ ត្រូវបានគេនាំមកចំពោះមុខព្រះអង្គសង្គ្រោះ
សូមអញ្ជើញសិស្សឲ្យគិតពីគ្រាដែលពួកគេធ្លាប់ជួប ឬមានទំនាក់ទំនងជាមួយនឹងមនុស្សដែលមានអាការៈ ឬឥរិយាបថមិនសមស្របនឹងបទដ្ឋានរបស់ព្រះអម្ចាស់ ។
-
តើយើងអាចនឹងជួបឧបសគ្គអ្វីខ្លះ នៅពេលយើងនៅជាមួយនឹងមនុស្សដទៃទៀតដែលមានអាការៈ និងឥរិយាបថមិនសមស្របតាមបទដ្ឋានរបស់ព្រះអម្ចាស់នោះ ? ( សិស្សអាចនឹងឆ្លើយថា យើងប្រហែលជាត្រូវបានល្បួងឲ្យវិនិច្ឆ័យបុគ្គលបែបនេះថាមិនសុចរិត ឬខ្វះក្ដីមេត្តាចំពោះពួកគេ ) ។
សូមសរសេរសំណួរខាងក្រោមនេះនៅលើ ក្តារខៀន ៖
នៅពេលសិស្សសិក្សា យ៉ូហាន ៨:១–១១ សូមលើកទឹកចិត្តសិស្សឲ្យរកមើលសេចក្ដីពិតនានា ដែលអាចជួយពួកគេឆ្លើយនឹងសំណួរនេះ ។
សូមពន្យល់ថា បន្ទាប់ពីបុណ្យបារាំ ព្រះយេស៊ូវគ្រីស្ទបានបន្តគង់នៅក្រុងយេរូសាឡិមមួយរយៈទៀត ហើយបានបង្រៀនប្រជាជននៅឯព្រះវិហារបរិសុទ្ធ ( សូមមើល យ៉ូហាន ៨:១–២ ) ។
សូមអញ្ជើញសិស្សម្នាក់អាន យ៉ូហាន ៨:៣-៦ ឲ្យឮៗ ។ ចូរសុំឲ្យសិស្សក្នុងថ្នាក់ផ្ទៀងតាម រកមើលអ្វីដែលបានកើតឡើង នៅពេលព្រះយេស៊ូវបានបង្រៀនដល់ប្រជាជន ។
-
តើមានអ្វីបានកើតឡើង នៅពេលព្រះយេស៊ូវបានបង្រៀនដល់ប្រជាជននោះ ?
-
តើពួកអាចារ្យ និងពួកផារិស៊ីបានទូលសួរដល់ព្រះអង្គសង្គ្រោះនូវសំណួរអ្វីខ្លះ ?
-
យោងតាម ខទី ៦តើពួកអាចារ្យ និងពួកផារិស៊ីមានចេតនាអ្វី ? ( ពួកគេចង់បង្ខូចកិត្តិយសរបស់ព្រះយេស៊ូវនៅចំពោះមុខបណ្តាជន ហើយបង្កើតលេសមួយដើម្បីចោទប្រកាន់ទ្រង់ ដោយសារពួកគេចង់បានមូលហេតុមួយដើម្បីចាប់ព្រះកាយទ្រង់ ហើយកាត់ទោសទ្រង់ដល់ជីវិត [ សូមមើល យ៉ូហាន ៧:១, ៣២ ] ) ។
សូមពន្យល់ថា ប្រសិនបើព្រះយេស៊ូវមានបន្ទូលឲ្យចោលស្ត្រីនោះនឹងដុំថ្ម គឺទ្រង់កំពុងតែអនុញ្ញាតឲ្យមានការដាក់ទោសមួយ ដែលមិននិយមប្រើនៅក្នុងចំណោមប្រជាជនយូដា ហើយបំពានច្បាប់របស់រ៉ូមទៀត ។ ប្រសិនបើព្រះយេស៊ូវមានបន្ទូលកុំឲ្យចោលស្ត្រីនោះនឹងដុំថ្ម នោះទ្រង់នឹងមិនគោរពដល់ក្រឹត្យវិន័យរបស់ម៉ូសេ ឬប្រព្រឹត្តចំពោះទំនៀមទំលាប់ពីបុរាណ ដែលពួកគេទទួលស្គាល់ដោយខ្វះការគោរព ។ ( សូមមើល ប្រ៊ូស អ័រ ម៉ាក់ខន់ឃី Doctrinal New Testament Commentary វ៉ុលទី ៣ [ ឆ្នាំ ១៩៦៥–៧៣ ] ១:៤៥០-៥១ ) ។
សូមអញ្ជើញសិស្សម្នាក់អាន យ៉ូហាន ៨:៧-៨ ឲ្យឮៗ ។ ចូរសុំសិស្សក្នុងថ្នាក់ឲ្យផ្ទៀងតាម ថាតើព្រះអង្គសង្គ្រោះបានមានព្រះបន្ទូលតបទៅវិញយ៉ាងដូចម្ដេចដែរ ។
-
យោងតាមខទី ៧តើព្រះយេស៊ូវមានបន្ទូលតបទៅវិញយ៉ាងដូចម្ដេច ?
-
តើអ្នកគិតថា ព្រះអង្គសង្គ្រោះសព្វព្រះទ័យឲ្យបុរសទាំងនេះដឹងពីអ្វី កាលទ្រង់បានមានបន្ទូលថា « អ្នកណាដែលគ្មានបាបសោះ ចូរឲ្យអ្នកនោះចោលនាងនឹងថ្មជាមុនគេចុះ » ? ( ខទី ៧ ) ។
សូមអញ្ជើញសិស្សម្នាក់អាន យ៉ូហាន ៨:៩ ឲ្យឮៗ ។ ចូរសុំសិស្សក្នុងថ្នាក់ឲ្យផ្ទៀងតាម រកមើលអ្វីដែលបានកើតឡើង នៅពេលពួកផារិស៊ី និងពួកអាចារ្យបានពិចារណាពីព្រះបន្ទូលរបស់ព្រះអង្គសង្គ្រោះ ។
-
តើអ្នកគិតថាឃ្លា « បញ្ញាចិត្តគេ បានចោទប្រកាន់ទោសខ្លួន » មានន័យយ៉ាងណា ?
-
ដោយជ្រើសដើរចេញទៅ តើពួកបុរសទាំងនេះបានទទួលស្គាល់អ្វី ?
-
តើយើងអាចរៀនសេចក្ដីពិតអ្វីខ្លះ មកពីដំណើរឿងនេះ អំពីរបៀបចៀសវាងពីការថ្កោលទោសមនុស្សដទៃ ? ( សិស្សអាចនឹងប្រើពាក្យផ្សេងគ្នា ប៉ុន្តែចូរប្រាកដថាពួកគេស្គាល់គោលការណ៍ដូចខាងក្រោមនេះ ៖ ការទទួលស្គាល់ភាពមិនល្អឥតខ្ចោះរបស់យើង អាចជួយយើងឲ្យចៀសវាងពីការថ្កោលទោសមនុស្សដទៃទៀត ។ ចូរសរសេរគោលការណ៍នេះនៅក្រោមសំណួរនៅលើក្ដារខៀន ) ។
-
តើអ្នកគិតថា ការទទួលស្គាល់ភាពមិនល្អឥតខ្ចោះរបស់យើង អាចជួយយើងឲ្យចៀសវាងពីការថ្កោលទោសមនុស្សដទៃទៀតបានដោយរបៀបណា ?
សូមរំឭកសិស្សថា ស្ត្រីម្នាក់នេះត្រូវបានគេចោទថាបានប្រព្រឹត្តអំពើសាហាស្មន់ ដែលជាអំពើបាបដ៏ធ្ងន់ធ្ងរបំផុត ( សូមមើល អាលម៉ា ៣៩:៣–៥ ) ។
-
តើអ្នកគិតថាស្ត្រីនោះមានអារម្មណ៍បែបណា នៅពេលអំពើបាបរបស់គាត់ត្រូវបានលាតត្រដាងនៅចំពោះព្រះយេស៊ូវ និង ហ្វូងមនុស្សដ៏ធំដូចនេះ ?
សូមអញ្ជើញសិស្សម្នាក់អាន យ៉ូហាន ៨:១០-១១ឲ្យឮៗ ។ ចូរសុំឲ្យសិស្សអានឲ្យឮៗផងដែរនូវឃ្លាខាងក្រោមនៅក្នុងការបកប្រែដោយយ៉ូសែប ស្ម៊ីធ ខទី ១១« ហើយស្ត្រីនោះបានសរសើរតម្កើងព្រះចាប់ពីពេលនោះមក ហើយបានជឿដល់ព្រះនាមទ្រង់ » ។ ចូរសុំសិស្សក្នុងថ្នាក់ឲ្យផ្ទៀងតាម ថាតើព្រះអង្គសង្គ្រោះបានមានបន្ទូលតបទៅស្ត្រីនេះយ៉ាងដូចម្ដេច ។
-
តើព្រះអង្គសង្គ្រោះបានបង្ហាញសេចក្ដីស្រឡាញ់ និងសេចក្ដីមេត្តាដល់ស្ត្រីរូបនេះយ៉ាងដូចម្ដេច ?
-
តើព្រះអង្គសង្គ្រោះបានបង្គាប់ស្ដី្រនោះអ្វីខ្លះ ?
ដើម្បីជួយសិស្សយល់ថា ព្រះអង្គសង្គ្រោះពុំបានមានចិត្តអាណិតដល់អំពើបាបរបស់ស្ដ្រីនេះទេ សូមអញ្ជើញសិស្សម្នាក់អានឲ្យឮៗនូវសេចក្ដីថ្លែងការណ៍ដោយប្រធាន ស្ពែនស៊ើរ ដបុលយូ ឃឹមបឹលដូចតទៅនេះ ៖
« ការបង្គាប់របស់ទ្រង់ដល់នាងគឺ ‹ អញ្ជើញទៅចុះ តែកុំធ្វើបាបទៀតឡើយ › ។ ទ្រង់កំពុងតែណែនាំស្ត្រីដែលមានអំពើបាបនោះឲ្យទៅតាមផ្លូវរបស់នាង លះបង់ចោលជីវិតអាក្រក់របស់នាង ឈប់ប្រព្រឹត្តអំពើបាបទៀត ផ្លាស់ប្រែជីវិតនាងជាថ្មី ។ ទ្រង់កំពុងមានបន្ទូលថា នាងអើយ ចូរទៅចុះ ហើយចាប់ផ្ដើមការប្រែចិត្តរបស់នាងចុះ ហើយទ្រង់កំពុងចង្អុលបង្ហាញនាងពីជំហានចាប់ផ្ដើម—ដើម្បី លះបង់អំពើរំលងរបស់នាង » ( The Miracle of Forgiveness [ ឆ្នាំ១៩៦៩ ] ទំព័រ ១៦៥ ) ។
-
តើយើងរៀនសេចក្ដីពិតអ្វីខ្លះ អំពីព្រះអង្គសង្គ្រោះនៅក្នុងខទី ១០-១១ ? ( សិស្សអាចនឹងប្រើពាក្យខុសៗគ្នា ប៉ុន្តែពួកគេគួរស្គាល់ពីសេចក្ដីពិតខាងក្រោមនេះ ៖ ព្រះអង្គសង្គ្រោះបង្ហាញសេចក្តីមេត្តាករុណាដល់យើង ដោយផ្តល់ដល់យើងនូវឱកាសដើម្បីប្រែចិត្ត ។ សូមសរសេរសេចក្ដីពិតនេះនៅលើក្ដារខៀន ) ។
-
តើការយល់ដឹងពីសេចក្ដីពិតនេះអាចជួយយើង នៅពេលយើងមានបាបបានយ៉ាងដូចម្ដេច ?
-
តើសេចក្ដីពិតពីរដែលយើងបានរកឃើញ អាចជួយយើងឲ្យឆ្លើយតបនឹងស្ថានភាពនានា កាលយើងនៅជាមួយនឹងមនុស្សដទៃដែលមានអាការៈ និងឥរិយាបថមិនសមស្របតាមបទដ្ឋានរបស់ព្រះអម្ចាស់បានយ៉ាងដូចម្ដេច ?
-
យោងតាមការបកប្រែដោយយ៉ូសែប ស្ម៊ីធ ក្នុង ខទី ១១តើសេចក្ដីមេត្តារបស់ព្រះអង្គសង្គ្រោះមានប្រសិទ្ធភាពអ្វីខ្លះទៅលើស្ដ្រីនោះ ?
សូមអញ្ជើញសិស្សឲ្យសរសេរនៅក្នុងសៀវភៅកំណត់ចំណាំក្នុងថ្នាក់ ឬសៀវភៅកំណត់ត្រាការសិក្សាព្រះគម្ពីររបស់ពួកគេ ពីអារម្មណ៍ដែលពួកគេមានចំពោះព្រះអង្គសង្គ្រោះ ដោយសារការព្រមស្ម័គ្ររបស់ទ្រង់ដើម្បីបង្ហាញសេចក្ដីមេត្តាដល់យើង ហើយប្រទានឱកាសឲ្យយើងប្រែចិត្ត ។
យ៉ូហាន ៨:១២-៣០
ព្រះយេស៊ូវបង្រៀនថា ព្រះវរបិតាទ្រង់ថ្លែងទីបន្ទាល់អំពីទ្រង់
សូមអញ្ជើញសិស្សឲ្យបិទភ្នែក ហើយព្យាយាមគូររូបសាមញ្ញមួយអំពីវត្ថុជាក់លាក់មួយ ។ បន្ទាប់មក ចូរសុំសិស្សឲ្យបើកភ្នែកវិញ ហើយប្រៀបធៀបគំនូររបស់ពួកគេជាមួយនឹងគំនូររបស់សិស្សនៅក្បែរខ្លួន ។
-
តើរឿងមួយចំនួនណាខ្លះ ដែលអ្នកអាចធ្វើបានល្អប្រសើរ បើមានពន្លឺនោះ ?
សូមអញ្ជើញសិស្សម្នាក់អានយ៉ូហាន ៨:១២ឲ្យឮៗ ។ ចូរសុំសិស្សក្នុងថ្នាក់ឲ្យផ្ទៀងតាមរកមើលអ្វី ដែលព្រះយេស៊ូវបានប្រកាសអំពីអង្គទ្រង់ផ្ទាល់ ។
-
តើព្រះយេស៊ូវបានមានបន្ទូលហៅអង្គទ្រង់ថាជាអ្វី ? ( សូមសរសេរគោលលទ្ធិខាងក្រោមនៅលើក្តារខៀន ៖ ព្រះយេស៊ូវគ្រីស្ទ គឺជាពន្លឺនៃពិភពលោក ) ។
សូមរំឭកសិស្សថា ព្រះយេស៊ូវបានធ្វើការប្រកាសនេះនៅឯបុណ្យបារាំ ។ នៅរៀងរាល់ល្ងាច នៃពិធីបុណ្យជប់លៀងប្រាំបីថ្ងៃនេះ មានជើងចង្កៀងធំៗ ឬជើងចង្កៀងត្រូវគេដុតបំភ្លឺនៅតាមទីធ្លាព្រះវិហារបរិសុទ្ធ ដើម្បីបំភ្លឺដល់មនុស្សជាច្រើនដែលនៅក្នុងក្រុងយេរូសាឡិម ដើម្បីអបអរដល់ពិធីបុណ្យនេះ ។
-
តើព្រះយេស៊ូវគ្រីស្ទបានប្រទានពន្លឺដល់ស្ត្រី ដែលនាំមកដោយចោទថាបានប្រព្រឹត្តសាហាយស្មន់ និងពួកបុរសដែលចោទប្រកាន់នាងយ៉ាងដូចម្ដេច ?
-
តើគោលការណ៍អ្វីខ្លះ ដែលយើងអាចរៀនពីព្រះបន្ទូលរបស់ព្រះអង្គសង្គ្រោះនៅក្នុង ខទី ១២ ? ( សិស្សអាចនឹងប្រើពាក្យផ្សេងគ្នា ប៉ុន្តែចូរប្រាកដថាពួកគេស្គាល់គោលការណ៍ដូចខាងក្រោមនេះ ៖ ប្រសិនបើយើងដើរតាមព្រះអង្គសង្គ្រោះ យើងនឹងចៀសវាងផុតពីសេចក្ដីងងឹតខាងវិញ្ញាណ ហើយពោរពេញដោយពន្លឺរបស់ទ្រង់ ) ។
-
តើអ្នកមានអារម្មណ៍បែបណាដែរ នៅពេលព្រះអង្គសង្គ្រោះជួយអ្នកឲ្យចៀសផុតពីការដើរនៅក្នុងភាពងងឹតខាងវិញ្ញាណនោះ ?
ការព្យាករមួយចំនួននៅក្នុងព្រះគម្ពីរសញ្ញាចាស់ បង្ហាញថាព្រះមែស៊ីនឹងក្លាយជាពន្លឺដល់គ្រប់សាសន៍ទាំងអស់ ( សូមមើល អេសាយ ៤៩:៦, ៦០:១–៣) ។ ហេតុដូច្នោះហើយ នៅក្នុងការប្រកាសអំពីអង្គទ្រង់ថាជាពន្លឺនៃលោកិយ នោះព្រះយេស៊ូវកំពុងប្រកាសថា ទ្រង់គឺជាព្រះមែស៊ី ។
សូមអញ្ជើញសិស្សម្នាក់ឲ្យអានយ៉ូហាន ៨:១៣ឲ្យឮៗ ។ ចូរសុំឲ្យសិស្សក្នុងថ្នាក់ផ្ទៀងតាម រកមើលរបៀបដែលពួកផារិស៊ីបានឆ្លើយតបទៅនឹងការប្រកាសរបស់ព្រះអង្គសង្គ្រោះ ។
-
តើពួកផារិស៊ីបានឆ្លើយតបនឹងការប្រកាសរបស់ព្រះអង្គសង្គ្រោះយ៉ាងដូចម្ដេច ?
-
ហេតុអ្វីបានជាពួកគេពោលថាកំណត់ត្រា ឬទីបន្ទាល់របស់ព្រះយេស៊ូវមិនពិត ? ( ដោយសារទ្រង់បានថ្លែងទីបន្ទាល់ពីអង្គឯង ) ។
សូមពន្យល់ថា ព្រះយេស៊ូវបានរំឭកដល់ពួកផារិស៊ីថា ក្រឹត្យវិន័យរបស់ម៉ូសេតម្រូវឲ្យមានទីបន្ទាល់យ៉ាងហោចណាស់ពីរនាក់ ដើម្បីបង្កើតសេចក្ដីពិត ( សូមមើល យ៉ូហាន ៨:១៧, ចោទិយកថា ១៧:៦ ) ។ សូមអញ្ជើញសិស្សម្នាក់ឲ្យអានយ៉ូហាន ៨:១៨ឲ្យឮៗ ។ ចូរសុំឲ្យសិស្សក្នុងថ្នាក់ផ្ទៀងតាម រកមើលមនុស្សផ្សេងទៀតដែលបានថ្លែងទីបន្ទាល់ថា ព្រះយេស៊ូវគឺជាព្រះមែស៊ីដែលបានសន្យាទុក ។
-
យោងតាម ខទី ១៨តើព្រះអង្គសង្គ្រោះបានមានបន្ទូលថានរណាទៅ ដែលជាសាក្សីទីពីរចំពោះភាពជាព្រះរបស់ទ្រង់ ? ( អ្នកគួរគូសបញ្ជាក់ថា តាមរយៈព្រះបន្ទូលនេះព្រះយេស៊ូវបានបញ្ជាក់ថាទ្រង់ និងព្រះវរបិតាត្រង់គឺជាតួអង្គពីរដាច់ដោយឡែកពីគ្នា ) ។
សូមអញ្ជើញសិស្សម្នាក់ឲ្យអានយ៉ូហាន ៨:១៩ឲ្យឮៗ ។ ចូរសុំឲ្យសិស្សរកមើលអ្វី ដែលពួកផារិស៊ីពុំបានយល់ដឹងអំពីព្រះយេស៊ូវ និងព្រះវរបិតារបស់ទ្រង់ ។
-
យោងតាម ខទី ១៩ហេតុអ្វីបានជាពួកផារិស៊ីមិនស្គាល់ព្រះវរបិតា ? ( ពួកផារិស៊ីមិនស្គាល់ព្រះវរបិតា ដោយសារពួកគេមិនស្គាល់ព្រះយេស៊ូវ ហើយមិនបានដឹងថាទ្រង់គឺជានរណាពិតប្រាកដ ) ។
-
ផ្អែកលើបន្ទូលដែលព្រះអង្គសង្គ្រោះប្រាប់ទៅពួកផារិស៊ី តើយើងអាចធ្វើអ្វីខ្លះ ដើម្បីស្គាល់ព្រះវរបិតាសួគ៌ ? ( សិស្សអាចនឹងប្រើពាក្យខុសៗគ្នា ប៉ុន្តែត្រូវប្រាកដដើម្បីបញ្ជាក់ថា នៅពេលយើងរៀនពីព្រះយេស៊ូវគ្រីស្ទ នោះយើងបានស្គាល់ព្រះវរបិតា ។ ដោយប្រើពាក្យរបស់សិស្ស សូមសរសេរគោលការណ៍នេះនៅលើក្ដារខៀន ) ។
ដើម្បីជួយសិស្សឲ្យយល់ពីគោលការណ៍នេះ សូមអញ្ជើញសិស្សម្នាក់អានឲ្យឮៗនូវសេចក្ដីថ្លែងការណ៍ដូចខាងក្រោមដោយអែលឌើរ ជែហ្វ្រី អ័រ ហូឡិន ក្នុងកូរ៉ុមនៃពួកសាវកដប់ពីរនាក់ ៖
« នៅគ្រប់អ្វីៗទាំងអស់ដែលព្រះយេស៊ូវ យាងមកមានបន្ទូល និងធ្វើរួមមាន និងជាពិសេស នៅក្នុងការរងទុក្ខនៃដង្វាយធួន និងការពលិកម្មរបស់ទ្រង់ នោះទ្រង់កំពុងបង្ហាញដល់យើងថា តើព្រះវរបិតាសួគ៌ដ៏អស់កល្បជានិច្ចរបស់យើង មានលក្ខណៈបែបណា និងយ៉ាងដូចម្តេចហើយថា តើទ្រង់បានលះបង់ គ្រប់យ៉ាងអ្វីខ្លះសម្រាប់កូនចៅរបស់ទ្រង់គ្រប់វ័យ និងគ្រប់ជាតិសាសន៍នោះ ។ ព្រះយេស៊ូវគ្រីស្ទបានព្យាយាមបើកសម្ដែងគ្រប់ព្រះបន្ទូល និងទង្វើ ហើយធ្វើឲ្យយើងដឹងដោយផ្ទាល់អំពីលក្ខណៈពិតរបស់ព្រះបិតារបស់ទ្រង់ ថាគឺជាព្រះវរបិតា ដែលនៅស្ថានសួគ៌របស់យើង ។ …
« ដូច្នេះ ការឲ្យអាហារដល់អ្នកស្រេកឃ្លាន ការព្យាបាលអ្នកឈឺ ការវាយផ្ចាលដល់មនុស្សលាក់ពុត ការទូលអង្វរសុំសេចក្ដីជំនឿ—គឺជារបៀបដែលព្រះគ្រីស្ទបានបង្ហាញយើងពីមាគ៌ានៃព្រះបិតាទ្រង់គឺ ‹ ប្រកបដោយក្ដីមេត្តាករុណា និង ព្រះគុណ កម្រនឹងព្រះពិរោធ អត់ធ្មត់ និងពោរពេញដោយសេចក្ដីល្អ › ។ នៅក្នុងជីវិតរបស់ទ្រង់ និងជាពិសេសនៅក្នុងការសុគតរបស់ទ្រង់ នោះព្រះគ្រីស្ទកំពុងប្រកាសថា ‹ នេះគឺជាសេចក្តីមេត្តាករុណា របស់ព្រះ ដែលយើងកំពុងបង្ហាញដល់អ្នក ព្រមទាំងវាក៏ជាសេចក្តីមេត្តាករុណារបស់យើងផ្ទាល់ផងដែរ › » (« The Grandeur of God » Ensign ឬ Liahona ខែ វិច្ឆិកា ឆ្នាំ ២០០៣ ទំព័រ ៧០, ៧២ ) ។
-
យោងតាមអែលឌើរ ហូឡិន តើយើងអាចរៀនអ្វីខ្លះអំពីព្រះវរបិតារបស់យើង កាលយើងរៀនអំពីព្រះយេស៊ូវគ្រីស្ទ ?
សូមសង្ខេប យ៉ូហាន ៨:២១-២៤ដោយពន្យល់ថា ព្រះអង្គសង្គ្រោះបានព្រមានពួកផារិស៊ីថា ប្រសិនបើពួកគេពុំជឿទ្រង់ទេ នោះពួកគេនឹងស្លាប់ក្នុងអំពើបាបរបស់ខ្លួន ។
សូមអញ្ជើញសិស្សម្នាក់អាន យ៉ូហាន ៨:២៥-៣០ ឲ្យឮៗ ។ ចូរសុំសិស្សក្នុងថ្នាក់ឲ្យរកមើលសេចក្ដីពិតបន្ថែមទៀត ដែលព្រះយេស៊ូវបានបង្រៀនដល់ពួកផារិស៊ីអំពីអង្គទ្រង់ និងព្រះវរបិតាសួគ៌ ។ អ្នកអាចនឹងចង់អញ្ជើញសិស្សឲ្យគូសចំណាំអ្វី ដែលពួកគេបានរកឃើញ ។
-
តើសេចក្ដីពិតបន្ថែមទៀតអ្វីខ្លះ ដែលព្រះយេស៊ូវបានបង្រៀនអំពីអង្គទ្រង់ និងព្រះវរបិតាសួគ៌ ?
-
តើការបង្រៀនរបស់ព្រះអង្គសង្គ្រោះនៅក្នុងខគម្ពីរទាំងនេះ ជួយយើងឲ្យយល់បន្ថែមទៀតអំពីទំនាក់ទំនងរវាងព្រះអង្គសង្គ្រោះ និងព្រះវរបិតាសួគ៌យ៉ាងដូចម្ដេចដែរ ?
សូមអញ្ជើញសិស្សឲ្យចំណាយពេលពីរបីនាទី ដើម្បីពិនិត្យមើលឡើងវិញ ហើយសញ្ជឹងគិតពីដំណើររឿងដែលពួកគេបានសិក្សាពាក់ព័ន្ធនឹងបន្ទូល និងទង្វើរបស់ព្រះយេស៊ូវគ្រីស្ទនៅក្នុងព្រះគម្ពីរសញ្ញាថ្មីឆ្នាំនេះ ( ឧទាហរណ៍ រួមមានដំណើររឿងអំពីស្ត្រី ដែលនាំមកដោយចោទថាបានប្រព្រឹត្តសាហាយស្មន់ ) ។ អ្នកគួរដាក់បង្ហាញរូបភាពនៅក្នុង Gospel Art Book ( [ ឆ្នាំ ២០០៩ ] សូមមើលផងដែរ LDS.org ) ដែលបង្ហាញពីព្រឹត្តិការណ៍នៅក្នុងការងារបម្រើនៅក្នុងជីវិតរមែងស្លាប់របស់ព្រះអង្គសង្គ្រោះ ។ សូមអញ្ជើញសិស្សពីរបីនាក់ឲ្យសង្ខេបដំណើររឿងមួយ ដែលពួកគេម្នាក់ៗបានគិតឃើញ ហើយពន្យល់ដល់សិស្សក្នុងថ្នាក់អំពីអ្វី ដែលវាបង្រៀនអំពីព្រះវរបិតាយើងដែលគង់នៅស្ថានសួគ៌ ។
សូមបញ្ចប់ដោយចែកចាយទីបន្ទាល់របស់អ្នកអំពីព្រះវរបិតាសួគ៌ និងព្រះយេស៊ូវគ្រីស្ទ។