មេរៀនទី ៨០
យ៉ូហាន ២១
សេចក្តីផ្ដើម
ព្រះអម្ចាស់ដែលមានព្រះជន្មរស់ឡើងវិញ បានបង្ហាញអង្គទ្រង់ដល់ពួកសិស្សរបស់ទ្រង់កាលពួកគេកំពុងនេសាទត្រី ។ នៅលើឆ្នេរ ព្រះយេស៊ូវបានសោយជាមួយនឹងពួកសិស្សរបស់ទ្រង់ ហើយបានអញ្ជើញពេត្រុសឲ្យបង្ហាញសេចក្ដីស្រឡាញ់របស់គាត់ ដល់ព្រះអម្ចាស់ដោយឲ្យចំណីដល់ចៀមរបស់ទ្រង់ ។ ព្រះយេស៊ូវបានមានបន្ទូលប្រាប់ជាមុនពីការរងទុក្ករកម្មរបស់ពេត្រុស និង ការប្រែរូបរបស់យ៉ូហាន ។
យោបល់សម្រាប់ការបង្រៀន
យ៉ូហាន ២១:១–១៧
ព្រះអម្ចាស់ដែលមានព្រះជន្មរស់ឡើងវិញ បង្ហាញអង្គទ្រង់ដល់ពួកសិស្សមួយចំនួនរបស់ទ្រង់នៅសមុទ្រទីបេរាស ( សមុទ្រកាលីឡេ )
សូមគូររូប បេះដូងមួយធំនៅលើក្ដារខៀន ។
សូមអញ្ជើញសិស្សឲ្យឡើងមកក្ដារខៀនសរសេរ នៅក្នុងបេះដូងនោះរឿងពីរ ឬបីយ៉ាងដែលពួកគេចូលចិត្ត ។ សូមពន្យល់ថា រឿងទាំងនេះអាចរួមបញ្ចូលទាំងមនុស្ស ទ្រព្យសម្បត្តិ ឬសកម្មភាព ។
នៅពេលសិស្សបានបញ្ចប់ អ្នកក៏អាចសរសេរនូវរឿងមួយចំនួន ដែលអ្នកចូលចិត្តផងដែរ ។
សូមសង្ខេប យ៉ូហាន ២១:១–២ ដោយពន្យល់ថា បន្ទាប់ពីមើលឃើញព្រះអម្ចាស់ ដែលមានព្រះជន្មរស់ឡើងវិញពីរដង ពេត្រុស និងពួកសិស្សផ្សេងទៀតមួយចំនួនបាននៅលើឆ្នេរសមុទ្រកាលីឡេ ( ក៏ត្រូវបានគេហៅថា សមុទ្រទីបេរាស ផងដែរ ) ។ សូមអញ្ជើញសិស្សម្នាក់អាន យ៉ូហាន ២១:៣ ឲ្យឮៗ ។ ចូរសុំឲ្យសិស្សក្នុងថ្នាក់ផ្ទៀងតាមរកមើលអ្វី ដែលពេត្រុសបានសម្រេចចិត្តធ្វើ ។
-
តើអ្នកគិតថាសកម្មភាពអ្វីខ្លះ ដែលពេត្រុសអាចនឹងបន្ថែមទៅក្នុងបញ្ជីរបស់យើងនៃរឿងដែលចូលចិត្តនៅលើក្ដារខៀននោះ ? ( ក្រោយពីសិស្សឆ្លើយតបហើយ សូមសរសេរ ការស្ទួចត្រី នៅក្នុងបេះដូងនៅលើក្ដារខៀន ) ។
-
តើពេត្រុស និងពួកសិស្សដទៃទៀតបានទៅរកត្រីយូរប៉ុណ្ណាដែរ? តើពួកគេចាប់ត្រីបានប៉ុន្មានដែរ ?
ចូរសុំឲ្យសិស្សពិចារណា ហើយគិតពីអារម្មណ៍ដែលពេត្រុស និងពួកសិស្សផ្សេងទៀតអាចនឹងមាន ក្រោយពីចាប់ត្រីមិនបានសោះពេញមួយយប់នោះ ។
សូមអញ្ជើញសិស្សម្នាក់អាន យ៉ូហាន ២១:៤-៦ ឲ្យឮៗ ។ ចូរសុំសិស្សក្នុងថ្នាក់ឲ្យផ្ទៀងតាម រកមើលអ្វីដែលបានកើតឡើងនៅព្រឹកស្អែក ។
-
តើនរណានៅលើឆ្នេរនោះ ?
-
តើដំបូងឡើយពួកសិស្សបានស្គាល់ព្រះយេស៊ូវដែរទេ ?
-
តើព្រះយេស៊ូវបង្រៀនពួកគេឲ្យធ្វើអ្វីខ្លះ ?
-
តើមានអ្វីបានកើតឡើង បន្ទាប់ពីពួកគេបានធ្វើតាមសេចក្ដីណែនាំរបស់ព្រះយេស៊ូវ ?
សូមឲ្យសិស្សម្នាក់អានសេចក្ដីថ្លែងការណ៍ខាងក្រោមនេះឮៗដោយអែលឌើរ ជែហ្វ្រី អ័រ ហូឡិន នៃកូរ៉ុមនៃពួកសាវកដប់ពីរនាក់ ៖
« កាលពីបីឆ្នាំមុន បុរសទាំងនេះបាននេសាទនៅក្នុងសមុទ្រនេះ ។ ក្នុងស្ថានភាពដូចគ្នានេះដែរ តាមបទគម្ពីរបានចែងថា ពួកគេ ‹បានដឹកអួនទាល់ភ្លឺ គ្មានបានអ្វីសោះ › [ លូកា ៥:៥ ] ។ ប៉ុន្តែអ្នកស្រុកកាលីឡេនៅលើមាត់ច្រាំងនោះបានហៅពួកគេឲ្យទម្លាក់អួនពួកគេចុះ រួចពួកគេបានទម្លាក់ចុះទៅ ‹ នោះក៏ជាប់បានត្រីសន្ធឹក › [ លូកា ៥:៦ ] រហូតដល់អួនពួកគេដាច់ ដោយសារត្រីដែលចាប់បាន មានចំនួនអាចដាក់បានបំពេញដល់ទៅពីរទូក នោះពួកគេក៏ចាប់ផ្ដើមលិច ។
« ឥឡូវវាបានកើតឡើងម្ដងទៀត » (« The First Great Commandment » Ensign ឬ Liahona ខែ វិច្ឆិកា ឆ្នាំ២០១២ ទំព័រ ៨៤ ) ។
-
តើការចាប់ត្រីបានដោយអព្ភូតហេតុជាលើកទីពីរ បានជួយពួកសិស្សឲ្យស្គាល់ជនដែលនៅលើឆ្នេរនោះដោយរបៀបណា ?
-
ប្រសិនបើអ្នកមានវត្តមាននៅលើទូកនោះជាមួយនឹងពួកសិស្ស តើអ្នកប្រហែលជាគិត ឬ មានអារម្មណ៍យ៉ាងដូចម្ដេចដែរ ?
សូមសង្ខេប យ៉ូហាន ២១:៧–១៤ ដោយពន្យល់ថា កាលសិស្សមិនអាចលើកសំណាញ់ដែលមានសុទ្ធតែត្រីចូលទៅក្នុងទូក យ៉ូហានបានប្រកាសថា បុរសដែលនៅលើឆ្នេរនោះគឺជាព្រះអម្ចាស់ ។ ពេត្រុសបានលោតចូលទៅក្នុងសមុទ្រភ្លាម ហើយហែលទៅរកព្រះយេស៊ូវ ខណៈសិស្សដទៃទៀតជិះទូកមកតាមក្រោយ ។ កាលពួកគេបានមកដល់ឆ្នេរវិញ ព្រះយេស៊ូវបានត្រៀមអាហារសម្រាប់ពួកគេ ។
សូមពន្យល់ថា អែលឌើរ ជែហ្វ្រី អ័រ ហូឡិន បានបរិយាយយ៉ាងល្អិតល្អន់អំពីដំណើររឿងនេះដោយបង្រៀនថា បន្ទាប់ពីពេត្រុស និងពួកសិស្សដទៃទៀតបានបដិសេធព្រះអង្គសង្គ្រោះ ព្រះយេស៊ូវអាចនឹង « [ ទតមើល ] ទៅទូកតូចចំណាស់ អួនកណ្ដាចរបស់ពួកគេ និងគំនរត្រី ១៥៣ ក្បាល នោះព្រះយេស៊ូវ [ បានមានបន្ទូល ] ទៅកាន់សាវករៀមច្បងរបស់ទ្រង់ » (« The First Great Commandment »ទំព័រ ៨៤ ) ហើយបន្ទាប់មកក៏មានបន្ទូលទៅពេត្រុស ។
សូមអញ្ជើញសិស្សម្នាក់អាន យ៉ូហាន ២១:១៥-១៧ ឲ្យឮៗ ។ ចូរសុំសិស្សក្នុងថ្នាក់ឲ្យផ្ទៀងតាម ហើយរកមើលសំណួរដែលព្រះយេស៊ូវបានសួរដល់ពេត្រុសម្ដងហើយម្ដងទៀត ។ អ្នកអាចផ្ដល់យោបល់ថា សិស្សគួរតែគូសចំណាំអ្វីដែលពួកគេរកឃើញ ។
-
តើព្រះយេស៊ូវបានសួរសំណួរអ្វីទៅពេត្រុសរហូតដល់ទៅបីដង ?
-
កាលព្រះយេស៊ូវបានសួរថា « តើអ្នកស្រឡាញ់ខ្ញុំជាជាងរបស់ទាំងនេះឬអី ? » (ខទី ១៥) តើអ្នកគិតថាពាក្យ របស់ទាំងនេះ សំដៅទៅលើអ្វី ? ( ព្រះយេស៊ូវអាចនឹងសំដៅទៅលើគំនរត្រី ឬរឿងផ្សេងទៀតដែលទាក់ទងនឹងជីវិតរបស់អ្នកនេសាទត្រីម្នាក់ ។ សូមសរសេរសំណួរខាងក្រោមនេះដាក់លើក្ដារខៀននៅក្បែររូបបេះដូង ៖ តើអ្នកស្រឡាញ់ខ្ញុំជាជាងរបស់ទាំងនេះឬអី ? )
-
តើពេត្រុសបានឆ្លើយបែបណាដែរ ?
-
តើអ្នកនឹងមានអារម្មណ៍បែបណាដែរ ប្រសិនបើអ្នកស្ថិតនៅក្នុងតួនាទីរបស់ពេត្រុស ហើយត្រូវបានព្រះយេស៊ូវសួរអ្នករហូតដល់បីដងថា តើអ្នកស្រឡាញ់ទ្រង់ដែរឬអត់ ?
ដើម្បីជួយសិស្សឲ្យយល់ពីហេតុផលដែល ព្រះយេស៊ូវបានសួរសំណួរនេះដល់ទៅបីដងនោះ សូមអញ្ជើញសិស្សម្នាក់អានឲ្យឮៗ នូវសេចក្ដីថ្លែងការណ៍ខាងក្រោមនេះដោយអែលឌើរ ហូឡិន ៖
« ( ហើយជាថ្មីម្ដងទៀត ខ្ញុំទទួលស្គាល់ថា នេះជាចំណេះដឹងដែលពុំបានកត់ត្រានៅក្នុងគម្ពីរ ) ប្រហែលជាព្រះយេស៊ូវបានឆ្លើយតបដោយមានបន្ទូលបែបនេះ ៖ ‹ ហេតុអ្វីអ្នកមកទីនេះ ពេត្រុស? ហេតុអ្វីក៏យើងមកឆ្នេរដដែលនេះ ដែលមានអួនដដែល និងមានការសន្ទនាដដែលនេះ ? តើវាមិនជាក់ស្ដែងទេឬអីនៅពេលនោះ ហើយតើវាមិនជាក់ស្ដែងទេឬអី នៅពេលនេះថាបើយើងចង់បានត្រី តើយើងនឹងបានត្រីទេឬអី ? ពេត្រុស អ្វីដែលយើងត្រូវការគឺជាពួកសិស្ស—ហើយយើងត្រូវការពួកគេជារៀងរហូត ។ យើងត្រូវការមនុស្សម្នាក់ដើម្បីឲ្យចំណីដល់ចៀមរបស់យើង ហើយជួយសង្គ្រោះកូនចៀមរបស់យើង ។ យើងត្រូវការមនុស្សម្នាក់ដើម្បីប្រកាសដំណឹងល្អរបស់យើង ហើយការពារសេចក្ដីជំនឿរបស់យើង ។ យើងត្រូវការមនុស្សម្នាក់ដែលស្រឡាញ់យើង គឺស្រឡាញ់យើងដោយពិតប្រាកដ ហើយស្រឡាញ់អ្វីដែលព្រះវរបិតាយើងដែលគង់នៅស្ថានសួគ៌បានប្រទានសិទ្ធិឲ្យយើងធ្វើ ។…ហេតុដូច្នេះហើយពេត្រុស នេះជាលើកទីពីរ ហើយប្រហែលជាលើកចុងក្រោយ ដែលយើងសុំឲ្យអ្នកលះបង់របស់ទាំងនេះ ហើយទៅបង្រៀន ហើយថ្លែងទីបន្ទាល់ ធ្វើការ ហើយបម្រើដោយស្មោះត្រង់រហូតដល់ថ្ងៃដែលពួកគេនឹងធ្វើចំពោះអ្នកដូចជាពួកគេបានធ្វើដាក់យើងដែរ › » («The First Great Commandment» ទំព័រ ៨៤ ) ។
-
តើគោលការណ៍អ្វីខ្លះដែលយើងអាចរៀនពីបទពិសោធន៍របស់ពេត្រុស ? ( បន្ទាប់ពីសិស្សឆ្លើយសូមសរសេរគោលការណ៍ខាងក្រោមនេះនៅលើក្ដារខៀន ៖ ប្រសិនបើយើងស្រឡាញ់ព្រះអង្គសង្គ្រោះ និងព្រះវរបិតាសួគ៌លើសអ្វីៗទាំងអស់ យើងនឹងឲ្យចំណីដល់ចៀមរបស់ពួកទ្រង់ ) ។
-
តើនរណាខ្លះជាកូនចៀមរបស់ព្រះវរបិតាសួគ៌ និង ព្រះយេស៊ូវគ្រីស្ទ ? តើយើងឲ្យចំណីវាដូចម្តេច?
សូមអញ្ជើញសិស្សម្នាក់ឲ្យអានសេចក្ដីថ្លែងការណ៍ខាងក្រោមឲ្យឮៗដោយអែលឌើរ រ៉ូបឺត ឌី ហែល នៃកូរ៉ុមនៃពួកសាវកដប់ពីរនាក់ ៖
« នេះគឺជាការអំពាវនាវរបស់ព្រះគ្រីស្ទដល់ពួកគ្រីស្ទានគ្រប់រូបនាបច្ចុប្បន្ននេះ ៖ ‹ ចូរឲ្យចំណីដល់កូនចៀមខ្ញុំស៊ីផង ។ … ចូរឲ្យចំណីដល់ហ្វូងចៀមខ្ញុំស៊ីផង › —គឺចែកចាយដំណឹងល្អរបស់យើងដល់មនុស្សទាំងចាស់ទាំងក្មេង ដោយលើកស្ទួយ ឲ្យពរ លួងលោម លើកទឹកចិត្ត ហើយពង្រឹងពួកគេ ជាពិសេសដល់ជនដែលគិត ហើយជឿខុសពីយើង » (« Being a More Christian Christian » Ensign ឬ Liahona ខែ វិច្ឆិកា ឆ្នាំ ២០១២ ទំព័រ ៩១ ) ។
ដើម្បីជួយសិស្សឲ្យយល់ពីរបៀបដែលគោលការណ៍ដែលពួកគេទើបសំគាល់ឃើញអាចទាក់ទងនឹងយើង សូមអញ្ជើញសិស្សបីនាក់ឲ្យប្ដូរវេនគ្នាអានសាច់រឿងខាងក្រោមនេះឲ្យឮៗ ។ អ្នកអាចសម្របសាច់រឿងទាំងនេះទៅតាមតម្រូវការ និងចំណាប់អារម្មណ៍នៃសិស្សរបស់អ្នក ។ បន្ទាប់ពីសាច់រឿងនីមួយៗត្រូវបានអានចប់ ចូរសួរសំណួរតាមក្រោយ ។
-
មានក្មេងប្រុសមួយក្រុម បានអញ្ជើញយុវជនម្នាក់ឲ្យអង្គុយជាមួយពួកគេនៅម៉ោងបាយថ្ងៃត្រង់ ហើយគាត់សង្ឃឹមថានឹងក្លាយជាមិត្តជាមួយនឹងពួកគេ ។ អំឡុងពេលនៃការសន្ទនារបស់ពួកគេ មានក្មេងប្រុសម្នាក់នៅក្នុងក្រុមនោះចាប់ផ្ដើមចំអន់ឲ្យក្មេងប្រុសម្នាក់ទៀតជាសាធារណៈ ។
-
មានយុវនារីម្នាក់ចូលចិត្តលេងបាត់ទាត់ ។ នាងបានចំណាយពេលជាច្រើនម៉ោងក្នុងមួយសប្ដាហ៍ ដើម្បីលេងបាល់ទាត់ ហើយមានពេលតិចតួចណាស់សម្រាប់រឿងផ្សេងទៀតដូចជា រាត្រីជួបជុំក្រុមគ្រួសារ និងការសិក្សាព្រះគម្ពីរផ្ទាល់ខ្លួន ។
-
មានយុវជនម្នាក់មមាញឹកនឹងការសិក្សា ព្រមទាំងសកម្មភាពក្រៅម៉ោងសិក្សាផ្សេងទៀត ។ ពេញមួយសប្ដាហ៍ គាត់បានទន្ទឹងរង់ចាំការមានពេលទំនេរដ៏កម្រមួយចំនួនជាមួយនឹងមិត្តភក្ដិនៅយប់ថ្ងៃសុក្រ ។ មុនពេលគាត់ទូរសព្ទទៅមិត្តរបស់គាត់ ដៃគូបង្រៀនតាមផ្ទះរបស់គាត់បានទូរសព្ទមកសួរថា តើគាត់អាចចេញទៅជួយដល់គ្រួសារមួយដែលពួកគេបានចាត់តាំងឲ្យ ដែលមានសេចក្ដីត្រូវការជាបន្ទាន់បានទេ ។
-
តើមានការជ្រើសរើសអ្វីខ្លះសម្រាប់បុគ្គលនេះ ?
-
តើបុគ្គលម្នាក់នេះអាចធ្វើបានដូចម្តេចខ្លះ ដើម្បីបង្ហាញសេចក្ដីស្រឡាញ់របស់ខ្លួនចំពោះព្រះអម្ចាស់ ? តើទង្វើនោះបានបង្ហាញសេចក្ដីស្រឡាញ់ចំពោះព្រះអម្ចាស់តាមរបៀបណា ?
សូមឲ្យសិស្សម្នាក់អានឮៗនូវសេចក្ដីថ្លែងការណ៍ខាងក្រោមដោយអែលឌើរ ហូឡិន ៖
« បងប្អូនប្រុសស្រីជាទីស្រឡាញ់របស់ខ្ញុំអើយ ខ្ញុំពុំដឹងច្បាស់ពីបទពិសោធន៍របស់យើងនឹងមានសភាពយ៉ាងណានៅថ្ងៃជំនុំជំរះនោះទេ ប៉ុន្តែខ្ញុំនឹងពិតជាភ្ញាក់ផ្អើលណាស់ បើនៅក្នុងការសន្ទនានោះ ព្រះពុំសួរយើងដូចគ្នានឹងអ្វីដែលព្រះគ្រីស្ទបានសួរដល់ពេត្រុសនោះ ៖ ‹ តើអ្នកស្រឡាញ់ខ្ញុំទេ ? ›» (« The First Great Commandment » ទំព័រ ៨៤ ) ។
ចូរចែកចាយទីបន្ទាល់របស់អ្នកអំពីសារៈសំខាន់នៃការជ្រើសស្រឡាញ់ព្រះវរបិតាសួគ៌ និងព្រះយេស៊ូវគ្រីស្ទឲ្យលើសពីអ្វីៗទាំងអស់ និងការបង្ហាញសេចក្ដីស្រឡាញ់នោះដោយឲ្យចំណីដល់ហ្វូងចៀមរបស់ទ្រង់ ។
ចូរលើកលើកឡើងពីអ្វីដែលបានសរសេរនៅក្នុងរូបបេះដូងនៅលើក្ដារខៀន និងសំណួរដែលបានសរសេរនៅក្បែរវត្ថុទាំងនោះ ៖ « តើអ្នកស្រឡាញ់ខ្ញុំជាជាងរបស់ទាំងនេះឬអី ? » ចូរគូសបន្ទាត់ក្រោមពាក្យ របស់ទាំងនេះ ហើយអញ្ជើញសិស្សឲ្យឆ្លើយសំណួរខាងក្រោមទាំងនេះនៅក្នុងសៀវភៅកំណត់ចំណាំក្នុងថ្នាក់ ឬកំណត់ហេតុការសិក្សាព្រះគម្ពីររបស់ពួកគេ ៖
-
ប្រសិនបើព្រះយេស៊ូវបានសួរសំណួរដូចគ្នានេះដល់អ្នក តើអ្នកគិតថាទ្រង់ចង់មានបន្ទូលអំពីអ្វីទៅ នៅក្នុងជីវិតរបស់អ្នកចំពោះពាក្យថា « របស់ទាំងនេះ » ?
-
តើអ្នកនឹងឆ្លើយសំណួររបស់ទ្រង់យ៉ាងដូចម្ដេច ?
-
តើអ្នកនឹងបង្ហាញសេចក្ដីស្រឡាញ់របស់អ្នកចំពោះព្រះអម្ចាស់តាមរបៀបណា ?
យ៉ូហាន ២១:១៨-២៥
ព្រះយេស៊ូវប្រាប់ពីការរងទុក្ខទុក្ករកម្មរបស់ពេត្រុស និង ការបកប្រែរបស់យ៉ូហាន
សូមសង្ខេប យ៉ូហាន ២១:១៨-២១ ដោយពន្យល់ថា ព្រះយេស៊ូវបានព្យាករថា នៅពេលពេត្រុសមានអាយុចាស់ « នោះគាត់នឹងសន្ធឹងដៃ [ របស់គាត់ ] ទៅ » (ខទី ១៨) ហើយត្រូវនាំទៅកន្លែងដែលគាត់មិនចង់ទៅ ។ វាជាទំនៀមទម្លាប់ដែលជឿថា ពេត្រុសបានស្លាប់ដោយសារការឆ្កាង ។ ប៉ុន្តែគេនិយាយថា ពេត្រុសបានស្នើសុំឲ្យគេឆ្កាងគាត់ដាំក្បាលចុះក្រោម ដោយព្រោះគាត់ចាត់ទុកខ្លួនឯងថាគាត់ពុំសក្តិសមនឹងស្លាប់តាមរបៀបដូចព្រះអង្គសង្គ្រោះឡើយ ( សូមមើល យ៉ូសែប ហ៉្វីលឌីង ស៊្មីធ Doctrines of Salvation ចងក្រងដោយ ប្រ៊ូស អ័រ ម៉ាក់ខន់ឃី វ៉ុលទី ៣ [ ឆ្នាំ ១៩៥៤–៥៦ ] ៣:១៥១–៥២ ) ។
បន្ទាប់ពីឮអំពីការព្យាករណ៍នេះ ពេត្រុសបានទូលសួរថា តើនឹងមានអ្វីកើតឡើងចំពោះសាវកយ៉ូហាន ឬ យ៉ូហានដ៏ជាទីស្រឡាញ់ ។ សូមអញ្ជើញសិស្សម្នាក់អាន យ៉ូហាន ២១:២២-២៣ ឲ្យឮៗ ។ ចូរសុំសិស្សក្នុងថ្នាក់ឲ្យផ្ទៀងតាមរកមើលរបៀប ដែលព្រះអង្គសង្គ្រោះបានឆ្លើយតបនឹងពេត្រុស ។
-
តើពេត្រុសបានដឹងអ្វីខ្លះអំពីយ៉ូហាន ?
សូមពន្យល់ថា ពាក្យ នៅ នៅក្នុង ខទី ២២ មានន័យថា បន្តរស់នៅលើផែនដីនេះ ។ ហេតុដូច្នេះហើយ យ៉ូហាននឹងបន្តរស់នៅលើផែនដីនេះ ជាតួអង្គប្រែរូប រហូតដល់ការយាងមកជាលើកទីពីររបស់ព្រះយេស៊ូវគ្រីស្ទ ។ ពួកអ្នកដែលបានផ្លាស់ប្រែរូបគឺជា « ជនទាំងឡាយណាដែលបានផ្លាស់ប្រែ ដើម្បីកុំឲ្យស្គាល់ការឈឺចាប់ ឬសេចក្តីស្លាប់ ដរាបដល់ការរស់ឡើងវិញទៅរកអមតភាព » ( សេចក្ដីណែនាំដល់បទគម្ពីរទាំងឡាយ « ពួកអ្នកដែលបានផ្លាស់ប្រែរូប » ,scriptures.lds.org) ។
-
យោងតាម ខទី ២២តើព្រះយេស៊ូវបានចង់ឲ្យពេត្រុសផ្តោតទៅលើអ្វី ជាជាងខ្វល់ខ្វាយអំពីខ្លួនឯងជាមួយនឹងអ្វីដែលនឹងកើតឡើងចំពោះយ៉ូហាននោះ ?
សូមអញ្ជើញសិស្សម្នាក់អាន យ៉ូហាន ២១:២៤-២៥ ឲ្យឮៗ ។ ចូរសុំឲ្យសិស្សក្នុងថ្នាក់ផ្ទៀងតាមរកមើលអ្វី ដែលយ៉ូហានចង់ឲ្យមនុស្សគ្រប់គ្នាដឹង នៅពេលគាត់បានបញ្ចប់កំណត់ត្រារបស់គាត់ ។
-
តើយ៉ូហានចង់ឲ្យមនុស្សគ្រប់គ្នាដឹងអ្វីខ្លះ នៅពេលគាត់បានបញ្ចប់កំណត់ត្រារបស់គាត់ ?
សូមសរសេរសំណួរខាងក្រោមនេះនៅលើ ក្តារខៀន ៖
ចេញពីអ្វីៗទាំងអស់ដែលបានសរសេរនៅក្នុងកំណត់ត្រារបស់ម៉ាថាយ ម៉ាកុស លូកា និង យ៉ូហាន តើរឿង ព្រឹត្តិការណ៍ ឬ ការបង្រៀនអ្វីខ្លះ នៅក្នុងការបម្រើក្នុងជីវិតរមែងស្លាប់របស់ព្រះអង្គសង្គ្រោះដែលមានឥទ្ធិពលយ៉ាងខ្លាំងអស្ចារ្យមកលើអ្នក ? ហេតុអ្វី ?
សូមអញ្ជើញសិស្សឲ្យសញ្ជឹងគិតពីចម្លើយរបស់ពួកគេចំពោះសំណួរទាំងនេះ ។ អ្នកអាចចាក់ភ្លេងទំនុកតម្កើងដោយស្ងៀមស្ងាត់ ដូចជា « ចូរមកតាមខ្ញុំ » (ទំនុកតម្កើង ល.រ. ៦៣ ) ហើយអនុញ្ញាតឲ្យសិស្សមើលសៀវភៅកំណត់ចំណាំក្នុងថ្នាក់ ឬកំណត់ហេតុការសិក្សាព្រះគម្ពីររបស់ពួកគេដើម្បីរំឭកពីសេចក្ដីពិតមួយចំនួនដែលពួកគេបានរៀន ។ បន្ទាប់ពីផ្ដល់ពេលវេលាគ្រប់គ្រាន់ហើយ ចូរអញ្ជើញសិស្សពីរបីនាក់ឲ្យឡើងមកខាងមុខក្ដារខៀន ហើយចែកចាយចម្លើយរបស់ពួកគេជាមួយសិស្សក្នុងថ្នាក់ ។
អ្នកគួរបញ្ចប់ដោយថ្លែងទីបន្ទាល់អំពីសេចក្ដីពិតដ៏ពេញលេញនៃដំណើររឿងអំពីការងារបម្រើក្នុងជីវិតរមែងស្លាប់ និងដង្វាយធួនរបស់ព្រះយេស៊ូវគ្រីស្ទត្រូវបានសរសេរដោយ ម៉ាថាយ ម៉ាកុស លូកា និងយ៉ូហាន ។
សេចក្តីពន្យល់ និង ព័ត៌មានសាច់រឿង
យ៉ូហាន ២១:១–១៩ ។ បញ្ញត្តិធំទីមួយ
ចំពោះការការពន្យល់បន្ថែមទៀតស្ដីពីការសន្ទនារវាងព្រះយេស៊ូវ និងពេត្រុស ដែលបានកត់ត្រានៅក្នុង យ៉ូហាន ២១ សូមអានសុន្ទរកថារបស់អែលឌើរ ជែហ្វ្រី អ័រ ហូឡិន « The First Great Commandment » (Ensign ឬ Liahona ខែ វិច្ឆិកា ឆ្នាំ ២០១២ ទំព័រ ៨៣–៨៥ ) ។
យ៉ូហាន ២១:២២–២៣ ។ « នៅទាល់តែខ្ញុំមក »
« នៅគ្រាចាប់ផ្ដើមនៃការងារបម្រើនៅលើផែនដីរបស់ទ្រង់ ព្រះអង្គសង្គ្រោះបានមានបន្ទូលថា ‹ ក្នុងពួកអ្នកដែលឈរនៅទីនេះ មានអ្នកខ្លះមិនត្រូវភ្លក់សេចក្តីស្លាប់ ទាល់តែបានឃើញកូនមនុស្សមក ក្នុងនគររបស់លោក › (ម៉ាថាយ ១៦:២៨) ។ ព្រះគ្រីស្ទដែលមានព្រះជន្មរស់ឡើងវិញបានមានបន្ទូលប្រាប់ជាមុនថា យ៉ូហានគឺជាមនុស្សម្នាក់ដែលនឹងបំពេញការព្យាករនោះ ហើយ ‹ នៅ › លើផែនដីរហូតទាល់ទ្រង់យាងមកម្ដងទៀត ( សូមមើល យ៉ូហាន ២១:២២–២៣ ) ។ ដំណើរឿងដ៏ពេញលេញមួយទៀតអំពីការសន្ទនានេះរវាងព្រះអង្គសង្គ្រោះ ពេត្រុស និងយ៉ូហាន គឺមាននៅក្នុង គោលលទ្ធិ និង សេចក្តីសញ្ញា កណ្ឌ ៧ ដែលជា ‹ ការបកប្រែពីបញ្ជីដែលយ៉ូហានបានសរសេរទុកនៅលើរមូរក្រដាស ហើយបានលាក់ទុកដោយខ្លួនលោកផ្ទាល់ › (គ. និង ស. ៧ សេចក្ដីផ្ដើមកណ្ឌ ) ។ វិវរណៈនេះបញ្ជាក់ថា យ៉ូហានបានសូមដល់ព្រះអង្គសង្គ្រោះសម្រាប់ ‹ អំណាចលើសេចក្ដីស្លាប់ ដើម្បីឲ្យទូលបង្គំអាចនៅរស់ ហើយនាំព្រលឹងទាំងឡាយមករកព្រះអង្គ › ( សូមមើល គ. និង ស. ៧:១–៣ ) ។ ហេតុដូច្នេះហើយ យ៉ូហានបានក្លាយជាមនុស្សម្នាក់ដែល ‹ បានផ្លាស់ប្រែរូប › ។ មនុស្សបែបនេះជា ‹ ជនទាំងឡាយណាដែលបានផ្លាស់ប្រែ ដើម្បីកុំឲ្យស្គាល់ការឈឺចាប់ ឬ សេចក្តីស្លាប់ ដរាបដល់ការរស់ឡើងវិញទៅរកអមភាព › ( សេចក្ដីណែនាំដល់បទគម្ពីរទាំងឡាយ ‹ ពួកអ្នកដែលបានផ្លាស់ប្រែរូប › ,scriptures.lds.org) ។ សម្រាប់ព័ត៌មានបន្ថែមអំពីពួកអ្នកដែលបានផ្លាស់ប្រែរូប សូមមើល នីហ្វៃទី ៣ ២៨:៤–៤០ដែលបញ្ជាក់ថា សិស្សសាសន៍នីហ្វៃទាំងបីរូបបានដកពិសោធន៍ការផ្លាស់ប្រែដូចគ្នានឹងយ៉ូហានដែរ ( សូមមើល នីហ្វៃទី ៣ ២៨:៦) » (New Testament Student Manual [ Church Educational System manual ឆ្នាំ ២០១៤ ] ទំព័រ២៧១ ) ។
ព្យាការីយ៉ូសែប ស្ម៊ីធ បានបង្រៀននៅ ខែ មិថុនា ឆ្នាំ ១៨៣១ ថា យ៉ូហាននៅពេលនោះកំពុងធ្វើការបម្រើនៅក្នុងចំណោមពូជអំបូរទាំងដប់ដែលវង្វេង ( សូមមើល History of the Church, ១:១៧៦ ) ។ ក្រៅពីសេចក្ដីថ្លែងការណ៍នេះ យើងមិនបានដឹងរឿងជាក់លាក់អំពីការងារបម្រើរបស់យ៉ូហាន ជាមនុស្សដែលបានផ្លាស់ប្រែរូបឡើយ ។ វាពុំមែនជារឿងឈ្លាសវៃនោះទេ ដើម្បីប៉ាន់ស្មានអំពីកន្លែង ឬកិច្ចការដែលយ៉ូហានបានធ្វើនោះ ។