សេចក្តីណែនាំស្ដីពីព្រះគម្ពីរសញ្ញាថ្មី សៀវភៅសិក្សាសម្រាប់គ្រូបង្រៀនថ្នាក់សិក្ខាសាលា

សេចក្តីណែនាំស្ដីពី ព្រះគម្ពីរសញ្ញាថ្មី សៀវភៅសិក្សាសម្រាប់គ្រូបង្រៀនថ្នាក់សិក្ខាសាលា

គោលបំណងរបស់យើង

គោលបំណងរបស់ថ្នាក់សិក្ខាសាលា និង ថ្នាក់វិទ្យាស្ថានសាសនា ចែងថា៖

« គោលបំណងរបស់យើង គឺដើម្បីជួយយុវវ័យ និងយុវមជ្ឈិមវ័យទាំងឡាយឲ្យយល់ និងពឹងផ្អែកលើការបង្រៀនទាំងនេះ និងលើដង្វាយធួនរបស់ព្រះយេស៊ូវគ្រីស្ទ ឲ្យមានភាពសក្តិសមសម្រាប់ពរជ័យទាំងឡាយនៃព្រះវិហារបរិសុទ្ធ ហើយរៀបចំខ្លួនពួកគេ ក្រុមគ្រួសារពួកគេ និងអ្នកដទៃទៀត សម្រាប់ជីវិតដ៏នៅអស់កល្បជានិច្ចជាមួយនឹងព្រះវរបិតារបស់ពួកគេដែលគង់នៅឋានសួគ៌ » ( ការបង្រៀន និងការរៀនសូត្រដំណឹងល្អ ៖ ក្បួនខ្នាតសម្រាប់គ្រូបង្រៀន និងថ្នាក់ដឹកនាំនៅក្នុងថ្នាក់សិក្ខាសាលា និង ថ្នាក់វិទ្យាស្ថានសាសនា [ ឆ្នាំ ២០១២ ] ទំព័រ ១ ) ។

ដើម្បីសម្រេចបាននូវគោលលបំណងរបស់យើង នោះយើងបង្រៀនសិស្សអំពីគោលលទ្ធិ និង គោលការណ៍ទាំងឡាយនៃដំណឹងល្អ ដូចដែលមាននៅក្នុងព្រះគម្ពីរ និង ពាក្យសម្តីរបស់ព្យាការីទាំងឡាយ ។ គោលលទ្ធិ និង គោលការណ៍ទាំងនេះគឺត្រូវបានបង្រៀនតាមរបៀបមួយ ដែលដឹកនាំឲ្យមានការយល់ដឹង និង ការស្អាងឡើង ។ យើងជួយសិស្សទាំងឡាយឲ្យបំពេញតួនាទីរបស់ពួកគេ នៅក្នុងដំណើរការនៃការរៀនសូត្រ និង រៀបចំពួកគេឲ្យបង្រៀនដំណឹងល្អដល់អ្នកដទៃទៀត ។

ដើម្បីសម្រេចបានគោលបំណងទាំងនេះ នោះអ្នក និង សិស្សដែលអ្នកបង្រៀនត្រូវបានលើកទឹកចិត្តឲ្យសហការគ្នាធ្វើតាម មូលដ្ឋានគ្រឹះនៃការបង្រៀន និង ការរៀនដំណឹងល្អ នៅពេលអ្នកសិក្សាព្រះគម្ពីររួមគ្នាដូចខាងក្រោម ៖

បង្រៀន និង រៀនសូត្រដោយព្រះវិញ្ញាណ ។
បង្កើតបរិយាកាសរៀនសូត្រ ដែលពោរពេញដោយសេចក្តីស្រឡាញ់ ការគោរព និង មានគោលបំណង ។
សិក្សាព្រះគម្ពីររៀងរាល់ថ្ងៃ និង អានមេរៀននៃវគ្គសិក្សា ។ [ តារាងសម្រាប់តាមដានការអានព្រះគម្ពីរនៅក្នុងព្រះគម្ពីរសញ្ញថ្មីទាំងមូល អាចមាននៅជាមួយនឹង ប័ណ្ណចំណេះចំណានខគម្ពីរព្រះគម្ពីរសញ្ញាថ្មី នៅលើ LDS.org និងនៅលើ store.lds.org ( ទំនិញ ល.រ. ១០៤៨០ ) ] ។
យល់អំពីបរិបទ និង មាតិកានៃព្រះគម្ពីរ ព្រមទាំងពាក្យសម្តីរបស់ព្យាការីទាំងឡាយ ។
ស្វែងរក យល់ ដឹងអំពីសេចក្តីពិត និង សារៈសំខាន់នៃដំណឹងល្អ ហើយអនុវត្តគោលលទ្ធិ និង គោលការណ៍ទាំងឡាយនៃដំណឹងល្អ ។
ពន្យល់ ចែកចាយ និង ថ្លែងទីបន្ទាល់អំពីគោលលទ្ធិ និង គោលការណ៍ទាំងឡាយនៃដំណឹងល្អ ។
រៀនឲ្យស្ទាត់អំពីវគ្គបទគម្ពីរសំខាន់ៗ និងគោលលទ្ធិគ្រឹះ » (Gospel Teaching and Learning ទំព័រ ១០ ) ។

បន្ថែមទៅលើការសម្រេចគោលបំណងទាំងនេះ អ្នកត្រូវតែជួយសិស្សឲ្យស្មោះត្រង់ចំពោះដំណឹងល្អនៃព្រះយេស៊ូវគ្រីស្ទ ហើយរៀនញែកដឹងសេចក្ដីពិតចេញពីកំហុស ។ សិស្សអាចមានសំណួរអំពីគោលលទ្ធិ ប្រវត្តិសាស្ត្រ ឬគោលជំហរលើបញ្ហាសង្គមរបស់សាសនាចក្រ ។ អ្នកអាចរៀបចំសិស្សឲ្យលើកសំណួរបែបនេះឡើងដោយជួយពួកគេឲ្យ « ស្វែងរកការរៀនសូត្រ គឺដោយសារការសិក្សា និង ដោយសារសេចក្តីជំនឿផង » ( គ. និង ស. ៨៨:១១៨ ) និងដោយប្រើធនធាននានានៅក្នុងផ្នែក ស្វែងរកសេចក្ដីពិត នៃ si.lds.org ។

សៀវភៅណែនាំសម្រាប់គ្រូបង្រៀននេះត្រូវបានរៀបចំឡើង ដើម្បីជួយដល់អ្នកឲ្យទទួលបានជោគជ័យក្នុងការសម្រេចនូវគោលបំណងទាំងនេះ ។

ការរៀបចំមេរៀន

ព្រះអម្ចាស់បានបញ្ជាដល់អស់អ្នកដែលបង្រៀនដំណឹងល្អរបស់ទ្រង់ឲ្យ « បង្រៀនគោលការណ៍ទាំងឡាយនៃដំណឹងល្អរបស់យើង ដែលមាននៅក្នុងព្រះគម្ពីរប៊ីប និង ព្រះគម្ពីរមរមន គឺជាភាពពោរពេញនៃដំណឹងល្អ » (គ. និង ស. ៤២:១២) ។ ទ្រង់បានត្រាស់បង្គាប់បន្ថែមទៀតថា សេចក្តីពិតទាំងនេះគួរតែត្រូវបានបង្រៀនដូចដែល « ត្រូវបានដឹកនាំពីព្រះវិញ្ញាណ » ដែល « ត្រូវបានប្រទានដល់អ្នក … ដោយពាក្យអធិស្ឋាននៃសេចក្តីជំនឿ » (គ. និង ស. ៤២:១៣–១៤) ។ នៅពេលរៀបចំមេរៀននីមួយៗ សូមអធិស្ឋានស្វែងរកការដឹកនាំពីព្រះវិញ្ញាណ ដើម្បីជួយអ្នកឲ្យយល់ពីព្រះគម្ពីរ និងគោលលទ្ធិ ព្រមទាំងគោលការណ៍នានាដែលមាននៅក្នុងព្រះគម្ពីរ ។ ដូចគ្នានេះដែរ សូមធ្វើតាមការបំផុសគំនិតពីព្រះវិញ្ញាណ នៅពេលអ្នកដាក់ផែនការអំពីរបៀបជួយសិស្សឲ្យយល់អំពីបទគម្ពីរ រៀនទទួលការបង្រៀនពីព្រះវិញ្ញាណបរិសុទ្ធ ហើយមានឆន្ទៈដើម្បីអនុវត្តអ្វីដែលពួកគេរៀន ។

នៅក្នុងវគ្គសិក្សានេះ ព្រះគម្ពីរសញ្ញាថ្មីគឺជាអត្ថបទចម្បងរបស់អ្នក នៅពេលអ្នករៀបចំ និងបង្រៀន ។ សូមសិក្សាជំពូកឬខគម្ពីរនានាដែលអ្នកនឹងបង្រៀនដោយការអធិស្ឋាន ។ សូមព្យាយាមយល់ពីបរិបទ និង មាតិកានៃបណ្តុំបទគម្ពីរ រួមទាំងខ្សែរឿង មនុស្ស ទីកន្លែង និងព្រឹត្តិការណ៍នានា ។ នៅពេលអ្នកកាន់តែស្គាល់បរិបទ និង មាតិកានៃបណ្តុំបទគម្ពីរ នោះសូមព្យាយាមស្វែងរកគោលលទ្ធិ និង គោលការណ៍ដែលមាននៅក្នុងខគម្ពីរនោះ ហើយសម្រេចចិត្តថាសេចក្តីពិតណាមួយដែលសំខាន់សម្រាប់សិស្សរបស់អ្នកដើម្បីយល់ ហើយអនុវត្តវានោះ ។ កាលណាអ្នកបានរកឃើញអ្វី ដែលអ្នកផ្តោតយកចិត្តទុកដាក់ហើយនោះ សូមកំណត់អំពីវិធីសាស្ត្រ យុទ្ធសាស្ត្រ និង សកម្មភាពណាមួយដែលនឹងជួយសិស្សរបស់អ្នកបានល្អបំផុតឲ្យរៀន និង អនុវត្តសេចក្តីពិតដ៏ពិសិដ្ឋដែលមាននៅក្នុងព្រះគម្ពីរនេះ ។

សៀវភៅសិក្សានេះត្រូវបានរៀបចំឡើង ដើម្បីជួយអ្នកក្នុងដំណើរការនេះ ។ សូមរំឭកមេរៀនដោយយកចិត្តទុកដាក់ ឲ្យស្របទៅនឹងបណ្តុំបទគម្ពីរដែលអ្នកនឹងបង្រៀន ។ អ្នកអាចជ្រើសប្រើប្រាស់យោបល់ណែនាំទាំងអស់ ឬមួយចំនួនសម្រាប់បណ្តុំបទគម្ពីរ ឬ អ្នកអាចសម្របសម្រួលទៅតាមគំនិត ដែលបានណែនាំទៅតាមតម្រូវការ និង ស្ថានភាពសិស្សដែលអ្នកបង្រៀន ។

វាសំខាន់ថា អ្នកជួយសិស្សឲ្យសិក្សាបណ្តុំបទគម្ពីរទាំងមូលនៅក្នុងមេរៀននីមួយៗ ។ ការធ្វើដូច្នេះនឹងជួយសិស្សឲ្យចាប់យកសារលិខិតពេញលេញ ដែលអ្នកសរសេរព្រះគម្ពីរមានបំណងចង់បង្ហាញ ។ ប៉ុន្តែ នៅពេលអ្នកគ្រោងមេរៀនរបស់ខ្លួន អ្នកអាចរកឃើញថា អ្នកពុំមានពេលគ្រប់គ្រាន់នៅក្នុងម៉ោងបង្រៀន ដើម្បីប្រើគ្រប់អស់ទាំងយោបល់នៃការបង្រៀននៅក្នុងសៀវភៅសិក្សានេះឡើយ ។ សូមស្វែងរកការណែនាំពីព្រះវិញ្ញាណ ហើយពិចារណាដោយការអធិស្ឋានអំពីតម្រូវការនៃសិស្សរបស់អ្នក នៅពេលអ្នកសម្រេចចិត្តដើម្បីបញ្ជាក់អត្ថន័យលើផ្នែកណាមួយនៃបណ្តុំបទគម្ពីរ ដើម្បីជួយសិស្សឲ្យទទួលអារម្មណ៍នៃសេចក្តីពិត និង សារៈសំខាន់របស់សេចក្តីពិតនៃដំណឹងល្អ ហើយអនុវត្តវានៅក្នុងជីវិតរបស់ពួកគេ ។ ប្រសិនបើពេលវេលាខ្លី អ្នកត្រូវតែសម្របសម្រួលផ្នែកដទៃទៀតនៃមេរៀន ដោយសង្ខេបក្រុមខគម្ពីរនោះឲ្យខ្លី ឬ តាមរយៈការនាំសិស្សឲ្យរកឃើញគោលការណ៍ ឬ គោលលទ្ធិមួយយ៉ាងលឿន ពីមុនបន្តទៅក្រុមខគម្ពីរបន្ទាប់ទៀត ។

នៅពេលអ្នកពិចារណអំពីរបៀបដើម្បីសម្របសម្រួលមេរៀន សូមប្រាកដថាបានធ្វើតាមការប្រឹក្សានេះ ពីអែលឌើរ ដាល្លិន អេក អូក ក្នុងកូរ៉ុមនៃពួកសាវកដប់ពីរនាក់ ៖

« ខ្ញុំស្ដាប់ឮប្រធាន ផាកកឺ លោកបានបង្រៀនជាញឹកញាប់ថា ដំបូងយើងត្រូវទទួលយក បន្ទាប់មកសម្របតាមវា ។ ប្រសិនបើយើងគ្រោងលើកយកមេរៀនដែលមាននៅក្នុងសៀវភៅ ដោយយកចិត្តទុកដាក់មុននឹងយើងបង្រៀន នោះយើងអាចធ្វើតាមព្រះវិញ្ញាណដើម្បីសម្របសម្រួលតាមវាបាន » ( « 4.3.4 Decide through Inspiration » ដកស្រង់មកពី « A Panel Discussion with Elder Dallin H. Oaks » [ Seminaries and Institutes of Religion satellite broadcast ថ្ងៃទី ៧ ខែ សីហា ឆ្នាំ២០១២ ] LDS.org) ។

នៅពេលអ្នករៀបចំបង្រៀន សូមនឹកគិតដល់សិស្សដែលមានតម្រូវការជាពិសេសផង ។ សូមសម្របសម្រួលសកម្មភាពនានា និងការរំពឹងទុកទាំងឡាយដើម្បីជួយសិស្សឲ្យទទួលបានជោគជ័យ ។ ទំនាក់ទំនងជាមួយនឹងឪពុកម្ដាយ និង អ្នកដឹកនាំដែលនឹងជួយអ្នកឲ្យដឹងអំពីតម្រូវការរបស់សិស្ស ហើយជួយអ្នកឲ្យបានជោគជ័យ ក្នុងការផ្ដល់នូវបទពិសោធន៍ដ៏មានន័យសម្រាប់សិស្ស ។

អំឡុងពេលនៃការរៀបចំមេរៀនរបស់អ្នក អ្នកអាចជ្រើសរើសប្រើប្រាស់ឧបករណ៍កំណត់ចំណាំ និង សៀវភៅកំណត់ហេតុនៅលើគេហទំព័រ LDS.org ឬ នៅក្នុង Gospel Library សម្រាប់ឧបករណ៍ចល័តរបស់អ្នក ។ អ្នកអាចប្រើប្រាស់ឧបករណ៍ទាំងនេះដើម្បីគូសចំណាំព្រះគម្ពីរ សុន្ទរកថាសន្និសីទ អត្ថបទទស្សនាវដ្តីនៃសាសនាចក្រ និង មេរៀននានា ។ អ្នកអាចបន្ថែម ឬ រក្សាទុកកំណត់ចំណាំនោះសម្រាប់ប្រើវាអំឡុងពេលអ្នកបង្រៀន ។ ដើម្បីរៀនបន្ថែមអំពីរបៀបប្រើប្រាស់ឧបករណ៍ទាំងនេះ សូមមើល Notes and Journal Help នៅគេហទំព័រ LDS.org។

សម្ភារមួយចំនួននៅក្នុងសៀវភៅសិក្សានេះបានប្រែសម្រួលមកពី New Testament Student Manual ( Church Educational System Manual ឆ្នាំ ២០១៤ ) ។

ការប្រើសៀវភៅសិក្សាសម្រាប់គ្រូបង្រៀនប្រចាំថ្ងៃ

សេចក្ដីផ្ដើមនៃគម្ពីរ

សេចក្តីផ្តើមនៃគម្ពីរផ្ដល់នូវទិដ្ឋភាពទូទៅនៃគម្ពីរនីមួយៗ ។ នៅក្នុងចំណោមរឿងផ្សេងទៀត វាពន្យល់ថា គម្ពីរនីមួយៗបានសរសេរឡើងដោយនរណា រៀបរាប់អំពីលក្ខណៈខុសប្លែកគ្នានៃគម្ពីរនីមួយៗ ហើយផ្ដល់នូវសេចក្ដីសង្ខេបមួយស្ដីពីមាតិកានៃគម្ពីរនីមួយៗ ។

សេចក្ដីណែនាំនៃបណ្តុំបទគម្ពីរ

សេចក្ដីណែនាំនៃបណ្តុំបទគម្ពីរផ្ដល់នូវទិដ្ឋភាពទូទៅដ៏ខ្លីមួយនៃបរិបទ និង មាតិកានៃបណ្តុំបទគម្ពីរសម្រាប់មេរៀននីមួយៗ ។

សេចក្ដីសង្ខេបនៃក្រុមខគម្ពីរ និង បរិបទ

ជាញឹកញាប់ បណ្តុំបទគម្ពីរត្រូវបានបែងចែកចេញទៅជាវគ្គតូចៗ ឬ ក្រុមខគម្ពីរដែលផ្តោតលើប្រធានបទ ឬ សកម្មភាពជាក់លាក់មួយ ។ សេចក្ដីយោងនៃក្រុមខគម្ពីរនីមួយៗ ត្រូវបានបន្តដោយសេចក្ដីសង្ខេបខ្លីនៃហេតុការណ៍ ឬការបង្រៀននៅក្នុងក្រុមខគម្ពីរនោះ ។

ជំនួយក្នុងការបង្រៀន

ជំនួយក្នុងការបង្រៀននឹងពន្យល់អំពីគោលការណ៍ និង វិធីបង្រៀនដំណឹងល្អ ។ វាអាចជួយអ្នកនៅក្នុងការខិតខំ ដើម្បីកែលម្អក្នុងនាមជាគ្រូបង្រៀនម្នាក់ ។

តួសេចក្តីនៃមេរៀន

តួសេចក្តីនៃមេរៀនមានសេចក្តីណែនាំសម្រាប់អ្នក នៅពេលអ្នកសិក្សា និង បង្រៀន ។ វាផ្ដល់គំនិតបង្រៀន រួមមានសំណួរ សកម្មភាព ការដកស្រង់ ដ្យាក្រាម និង តារាងនានា ។

គោលលទ្ធិ និង គោលការណ៍ទាំងឡាយ

នៅពេលគោលលទ្ធិ និងគោលការណ៍ទាំងឡាយលេចឡើងនៅក្នុងការសិក្សាអត្ថបទព្រះគម្ពីរ នោះវាត្រូវបានគូសបញ្ជាក់ជាអក្សរខ្មៅដិត ដើម្បីជួយអ្នកឲ្យរកឃើញ និងផ្ដោតយកចិត្តទុកដាក់លើវានៅក្នុងការពិភាក្សារបស់អ្នកជាមួយសិស្ស ។

រូបភាព

រូបភាពនៃអ្នកដឹកនាំសាសនាចក្រ និង ព្រឹត្តិការណ៍នានាអំពីព្រះគម្ពីរ តំណាងឲ្យជំនួយចក្ខុវិស័យ ដែលអ្នកអាចបង្ហាញ ប្រសិនបើវាមាននៅពេលអ្នកបង្រៀន ។

ចំណេះចំណានខគម្ពីរ

វគ្គចំណេះចំណានខគម្ពីរទាំង ២៥ មាននៅក្នុងព្រះគម្ពីសញ្ញាថ្មី ត្រូវបានគូសចំណាំនៅក្នុងបរិបទក្នុងមេរៀនដែលមានវា ។ មេរៀននីមួយៗក៏មាននូវគំនិតសម្រាប់ការបង្រៀនផងដែរ សម្រាប់វគ្គបទគម្ពីរទាំងនេះ ។ ដើម្បីជួយអ្នកឲ្យបង្រៀនវគ្គចំណេះចំណានខគម្ពីរជាទៀងទាត់ នោះមានសកម្មភាពរំឭកចំណេះចំណានខគម្ពីរជាច្រើននៅក្នុងសៀវភៅសិក្សានេះ ។ ចំពោះគំនិតបន្ថែមសម្រាប់ការបង្រៀនចំណេះចំណានខគម្ពីរ សូមមើលឧបសម្ព័ន្ធនៃសៀវភៅសិក្សានេះ ឬSeminary Student Resources នៅគេហទំព័រ LDS.org ។

ចន្លោះជួរឈរ

ចន្លោះជួរឈរនៅក្នុងសៀវភៅសិក្សាសម្រាប់គ្រូ ដែលបានបោះពុម្ពអាចត្រូវបានប្រើសម្រាប់ការរៀបចំមេរៀនរួមមានការសរសេរកត់ចំណាំ គោលការណ៍ បទពិសោធន៍ ឬ គំនិតផ្សេងទៀត នៅពេលអ្នកទទួលបានការបំផុសគំនិតពីព្រះវិញ្ញាណបរិសុទ្ធ ។

សេចក្តីពន្យល់ និង ព័ត៌មានសាច់រឿង

ការដកស្រង់ និង ការពន្យល់បន្ថែមត្រូវបានផ្ដល់ឲ្យនៅចុងបញ្ចប់មេរៀនមួយចំនួន ដើម្បីបន្ថែមការយល់ដឹងស្ដីពីប្រវត្តិបរិបទ ទស្សនៈជាក់លាក់ ឬ វគ្គបទគម្ពីរនានា ។ សូមប្រើព័ត៌មាននៅក្នុងផ្នែកនេះ ដើម្បីរៀបចំឆ្លើយនឹងសំណួរ ឬ ផ្ដល់ការយល់ដឹងបន្ថែមនៅពេលអ្នកបង្រៀន ។ សេចក្តីអធិប្បាយបន្ថែមផ្សេងទៀត អាចរកបាននៅក្នុងទម្រង់អេឡិចត្រូនិចនៃសៀវភៅសិក្សានេះនៅគេហទំព័រ LDS.org និងនៅក្នុងកម្មវិធីបណ្ណាល័យដំណឹងល្អ ។

គំនិតបន្ថែមសម្រាប់ការបង្រៀន

គំនិតបន្ថែមនានាសម្រាប់ការបង្រៀន មាននៅខាងចុងនៃមេរៀនមួយចំនួន ។ គំនិតនេះផ្តល់ជាយោបល់សម្រាប់ការបង្រៀនគោលលទ្ធិ និង គោលការណ៍ដែលពុំអាចរកឃើញ ឬ សង្កត់ធ្ងន់នៅក្នុងតួសេចក្តីនៃមេរៀន ។ វាក៏ផ្តល់ផងដែរនូវយោបល់ស្តីពីការប្រើប្រាស់ប្រព័ន្ធផ្សព្វផ្សាយសោតទស្សន៍ ដូចជាឌី.វី.ឌី. បទបង្ហាញ និង វីដេអូនៅលើគេហទំព័រ LDS.org។ គំនិតបន្ថែមសម្រាប់ការបង្រៀនអាចរកបាន នៅក្នុងទម្រង់អេឡិចត្រូនិចនៃសៀវភៅសិក្សានេះនៅគេហទំព័រ LDS.org និងនៅក្នុងកម្មវិធីបណ្ណាល័យដំណឹងល្អ ។

កម្មវិធីសិក្សាថ្នាក់សិក្ខាសាលាប្រចាំថ្ងៃ ( ម៉ោងសិក្សាអំពីសាសនា និង ម៉ោងព្រឹកព្រលឹម )

សៀវភៅសិក្សានេះ រួមមានមូលដ្ឋានគ្រឹះដូចខាងក្រោមសម្រាប់គ្រូបង្រៀនថ្នាក់សិក្ខាសាលាប្រចាំថ្ងៃ ៖ មេរៀនប្រចាំថ្ងៃសម្រាប់គ្រូបង្រៀនចំនួន ១៦០ មេរៀន ជំនួយក្នុងការបង្រៀន សេចក្ដីផ្ដើមនៃគម្ពីរ និង ធនធានសម្រាប់ការបង្រៀនចំណេះចំណានខគម្ពីរ និង គោលលទ្ធិគ្រឹះទាំងឡាយ ។

សេចក្ដីផ្ដើមនៃគម្ពីរ

សេចក្ដីផ្ដើមនៃគម្ពីរគឺដាក់នៅពីមុនមេរៀនដំបូងនៃគម្ពីរនីមួយៗ ។ សេចក្ដីផ្ដើមនៃគម្ពីរផ្ដល់នូវទិដ្ឋភាពទូទៅនៃគម្ពីរនីមួយៗ ដោយឆ្លើយនឹងសំណួរដូចតទៅនេះ ៖ ហេតុអ្វីត្រូវសិក្សាគម្ពីរនេះ ? តើនរណាជាអ្នកសរសេរគម្ពីរនេះ ? តើនៅពេលណា និង នៅកន្លែងណាដែលគម្ពីរនេះត្រូវបានសរសេរ ? តើវាសរសេរទៅកាន់នរណា ? ហេតុអ្វី ? និងតើលក្ខណៈខុសប្លែកគ្នាមួយចំនួននៃគម្ពីរនេះមានអ្វីខ្លះ ? សេចក្ដីផ្ដើមទាំងឡាយក៏បង្ហាញដោយសង្ខេបនូវមាតិកានៃគម្ពីរនីមួយៗផងដែរ ។ ពួកគ្រូបង្រៀនគួររួមបញ្ចូលបរិបទ និងព័ត៌មានសាច់រឿងមកពីសេចក្ដីផ្ដើមនៃគម្ពីរទៅក្នុងមេរៀន ប្រសិនបើចាំបាច់ ។

មេរៀនប្រចាំថ្ងៃសម្រាប់គ្រូបង្រៀន

ទម្រង់នៃមេរៀន

មេរៀននីមួយៗនៅក្នុងសៀភៅសិក្សានេះផ្តោតលើបណ្តុំបទគម្ពីរមួយ ជាជាងផ្តោតទៅលើគំនិត គោលលទ្ធិ ឬ គោលការណ៍ពិសេសណាមួយ ។ ទម្រង់នៃមេរៀននេះជួយអ្នក និង សិស្សរបស់អ្នកឲ្យសិក្សាព្រះគម្ពីរតាមលំដាប់លំដោយ ហើយពិភាក្សាពីគោលលទ្ធិ និង គោលការណ៍ដែលវាមាននៅក្នុងអត្ថបទព្រះគម្ពីរ ។ នៅពេលសិស្សរៀនមាតិកានៅក្នុងគោលលទ្ធិ ឬ គោលការណ៍ដែលរកឃើញ នោះការយល់ដឹងរបស់ពួកគេអំពីសេចក្តីពិតនោះនឹងកាន់តែជ្រាលជ្រៅ ។ លើសពីនេះទៅទៀត សិស្សនឹងមើលឃើញ ហើយយល់កាន់តែប្រសើរឡើងអំពីវិសាលភាពទាំងមូលនៃសារលិខិតដែលបំផុសគំនិតដល់អ្នកសរសេរគម្ពីរ ដែលមានបំណងចង់បង្ហាញ ។ ការបង្រៀនព្រះគម្ពីរតាមរបៀបនេះក៏នឹងជួយសិស្សឲ្យរៀនផងដែរ ពីរបៀបស្វែងរក និង អនុវត្តសេចក្តីពិតដ៏អស់កល្បនានានៅក្នុងការសិក្សាព្រះគម្ពីរផ្ទាល់ខ្លួនរបស់ពួកគេ ។

នៅក្នុងមេរៀននីមួយៗគ្រប់ផ្នែកទាំងអស់នៃបណ្តុំបទគម្ពីរពុំត្រូវបានសង្កត់ធ្ងន់ឡើយ ។ ផ្នែកមួយចំនួនត្រូវបានផ្តោតលើតិចតួច ដោយសារវាពុំសូវផ្តោតសំខាន់លើសារលិខិតទាំងមូល នូវការបំផុសគំនិតរបស់អ្នកសរសេរ ឬ ដោយសារវាពុំសូវពាក់ព័ន្ធចំពោះយុវវ័យទេ ។ អ្នកមានទំនួលខុសត្រូវដើម្បីកែសម្រួលមេរៀនទាំងនេះទៅតាមតម្រូវការ និង ការចាប់អារម្មណ៍របស់សិស្សដែលអ្នកបង្រៀន ។ អ្នកអាចសម្របសម្រួលគំនិតនៃមេរៀននៅក្នុងសៀវភៅសិក្សានេះ ដោយជ្រើសយកការសង្កត់ធ្ងន់កាន់តែខ្លាំងចំពោះគោលលទ្ធិ ឬ គោលការណ៍ពិសេសៗ ជាជាងគំនិតនានាដែលត្រូវបានផ្តល់ឲ្យក្នុងមេរៀន ឬ ដោយជ្រើសយកការសង្កត់ធ្ងន់តែបន្តិចបន្តួចលើផ្នែកមួយនៃបណ្តុំបទគម្ពីរ ដែលត្រូវបានបង្កើតឡើងឲ្យយល់កាន់តែច្បាស់នៅក្នុងសៀវភៅសិក្សានេះ ។ សូមស្វែងរកការណែនាំពីព្រះវិញ្ញាណបរិសុទ្ធ ដើម្បីជួយអ្នកឲ្យធ្វើការកែសម្រួលនេះ នៅពេលអ្នករៀបចំ និង បង្រៀន ។

គោលលទ្ធិ និង គោលការណ៍ទាំងឡាយ

នៅក្នុងតួសេចក្តីនៃមេរៀននីមួយៗ អ្នកនឹងរកឃើញថា គោលលទ្ធិ និង គោលការណ៍គន្លឹះមួយចំនួននោះត្រូវបានគូសបញ្ជាក់ជាអក្សរដិតខ្មៅ ។ គោលលទ្ធិ និង គោលការណ៍ទាំងនេះត្រូវបានរកឃើញនៅក្នុងកម្មវិធីសិក្សាដោយសារ (១) វាឆ្លុះបញ្ចាំងពីសារលិខិតសំខាន់នៃបណ្តុំបទគម្ពីរ (២) ជាពិសេស វាអាចអនុវត្តបានចំពោះសេចក្តីត្រូវការ និង ស្ថានភាពនានារបស់សិស្ស (៣) វាគឺជាសេចក្តីពិតដ៏សំខាន់ ដែលអាចជួយសិស្សឲ្យមានទំនាក់ទំនងកាន់តែខ្លាំងឡើងជាមួយព្រះអម្ចាស់ ។ សូមដឹងថា ព្រះគម្ពីរសញ្ញាថ្មីបង្រៀនសេចក្តីពិតមួយចំនួនច្រើនជាងសេចក្តីពិតទាំងអស់ដែលមាននៅក្នុងកម្មវិធីសិក្សា ។ ប្រធាន ប៊យដ៍ ឃេ ផាកកឺ ក្នុងកូរ៉ុមនៃពួកសាវកដប់ពីរនាក់បានបង្រៀនថា ព្រះគម្ពីរមាននូវ « បណ្តុំនៃសេចក្តីពិតដ៏អស់កល្ប ដែលនឹងបំពេញនូវសេចក្តីត្រូវការនៃជនគ្រប់រូបនៅក្នុងគ្រប់ស្ថានភាពទាំងអស់ » (« The Great Plan of Happiness » [ CES Symposium on the Doctrine and Covenants/Church History, ថ្ងៃទី ១០ ខែ សីហា ឆ្នាំ ១៩៩៣ ] គេហទំព័រ si.lds.org, សូមមើលផងដែរ Teaching Seminary: Preservice Readings [ ឆ្នាំ ២០០៤ ] ទំព័រ៦៩ , គេហទំព័រ LDS.org) ។

នៅពេលអ្នកបង្រៀន សូមផ្តល់ឱកាសឲ្យសិស្សជានិច្ចដើម្បីស្វែងរកគោលលទ្ធិ និង គោលការណ៍នានានៅក្នុងព្រះគម្ពីរ ។ នៅពេលសិស្សបង្ហាញសេចក្តីពិតដែលពួកគេរកឃើញ នោះជាញឹកញាប់ពួកគេអាចប្រើពាក្យ ដែលខុសគ្នាអំពីរបៀបដែលគោលលទ្ធិ ឬ គោលការណ៍នោះបានថ្លែងនៅក្នុងសៀវភៅសិក្សានោះ ។ ពួកគេក៏អាចរកឃើញផងដែរ នូវសេចក្តីពិតដែលពុំមាននៅក្នុងគម្រោងមេរៀន ។ សូមប្រុងប្រយ័ត្ន កុំផ្តល់យោបល់ដោយងាយៗថា ចម្លើយរបស់សិស្សគឺខុស ដោយសារតែពាក្យដែលពួកគេប្រើដើម្បីបង្ហាញពីសេចក្តីពិត ខុសពីអ្វីដែលបានប្រើនៅក្នុងសៀវភៅសិក្សា ឬ ដោយសារពួកគេបានរកឃើញសេចក្តីពិតមួយ ដែលពុំបានលើកឡើងនៅក្នុងកម្មវិធីសិក្សានោះ ។ ទោះជាយ៉ាងណាក្ដី ប្រសិនបើប្រយោគរបស់សិស្សម្នាក់ខុសពីគោលលទ្ធិ នោះវាជាទំនួលខុសត្រូវរបស់អ្នកដើម្បីជួយសិស្សដោយឥរិយាបទទន់ភ្លន់ ដើម្បីជួយកែតម្រូវសេចក្តីថ្លែងការណ៍របស់គាត់ ដោយធ្វើការនេះដោយសេចក្តីស្រឡាញ់ និង ការទុកចិត្ត ។ ការធ្វើដូច្នោះអាចផ្ដល់នូវបទពិសោធន៍រៀនសូត្រយ៉ាងសំខាន់ដល់សិស្សក្នុងថ្នាក់របស់អ្នក ។

ល្បឿនបង្រៀន

សៀវភៅសិក្សានេះមានមេរៀនថ្នាក់សិក្ខាសាលាប្រចាំថ្ងៃចំនួន ១៦០ មេរៀន ។ អ្នកអាចសម្របសម្រួលមេរៀននេះ និង ល្បឿននៃការបង្រៀនទៅតាមតម្រូវការនៃរយៈពេលវេលាដែលអ្នកមាន ដើម្បីបង្រៀនវគ្គសិក្សានេះ ។ សូមមើលឧបសម្ព័ន្ធនៃសៀវភៅសិក្សានេះ សម្រាប់សេចក្តីណែនាំគំរូនៃល្បឿនបង្រៀន ។ សេចក្តីណែនាំនៃល្បឿនបង្រៀនផ្អែកទៅលើឆ្នាំសិក្សាដែលមានរយៈពេល ៣៦ សប្តាហ៍ ឬ ១៨០ ថ្ងៃ និងរួមបញ្ចូលនូវ ២០ ថ្ងៃ « ដែលអាចផ្លាស់ប្ដូរបាន » ដែលអ្នកអាចប្រើដើម្បីសម្រួលមេរៀនប្រចាំថ្ងៃ ជួយសិស្សឲ្យសូត្រចាំវគ្គចំណេះចំណានខគម្ពីរស្ទាត់ និង គោលលទ្ធិគ្រឹះ រំឭកមេរៀនពីមុនៗ ចាត់ចែង ហើយពិនិត្យការវាយតម្លៃលើការរៀនសូត្រដែលចាំបាច់ ហើយទុកពេលសម្រាប់កាលវិភាគដែលអាក់ខាននានា ។

កិច្ចការជំនួសអវត្តមាន

សៀវភៅមគ្គុទេសន៍ការសិក្សាព្រះគម្ពីរសញ្ញាថ្មីសម្រាប់សិស្សថ្នាក់សិក្ខាសាលាដែលសិក្សានៅផ្ទះ អាចត្រូវបានប្រើប្រាស់ក្នុងកម្មវិធីសិក្សាថ្នាក់សិក្ខាសាលាប្រចាំថ្ងៃជាធនធាន ដើម្បីផ្តល់កិច្ចការដែលសិស្សមិនទាន់បានបំពេញនៅឡើយ ។ មេរៀននៅក្នុងសៀវភៅមគ្គុទេសន៍ការសិក្សាសម្រាប់សិស្សដែលសិក្សានៅផ្ទះ ស្របនឹងមេរៀនដែលមាននៅក្នុងសៀវភៅសិក្សានេះ ។ សិស្សដែលអវត្តមានច្រើនលើសលុបអាចត្រូវបានចាត់ឲ្យបំពេញនូវកិច្ចការនានានៅក្នុងសៀវភៅមគ្គុទេសន៍ការសិក្សា ដែលត្រូវគ្នានឹងមាតិកាដែលពួកគេពុំបានធ្វើ ព្រោះមិនបានមករៀន ។ កិច្ចការនោះអាចបោះពុម្ពចេញពីគេហទំព័រLDS.org ដូច្នេះអ្នកពុំចាំបាច់ត្រូវផ្តល់សៀវភៅសិក្សាទាំងមូលនេះដល់សិស្ស ដែលត្រូវធ្វើកិច្ចការជំនួសពេលដែលអវត្តមានឡើយ ។ ព័ត៌មានបន្ថែមទាក់ទងនឹង សៀវភៅមគ្គុទេសន៍ការសិក្សាព្រះគម្ពីរសញ្ញាថ្មីសម្រាប់សិស្សថ្នាក់សិក្ខាសាលាដែលសិក្សានៅផ្ទះ គឺត្រូវបានផ្តល់ឲ្យនៅក្នុងវគ្គចំណងជើង « កម្មវិធីសិក្សាថ្នាក់សិក្ខាសាលាដែលសិក្សានៅផ្ទះ » នៅក្នុងសៀវភៅសិក្សានេះ ។

ជំនួយក្នុងការបង្រៀន

ជំនួយក្នុងការបង្រៀនមាននៅគែមទំព័រនៃសៀវភៅសិក្សានេះ ។ ការបង្រៀនទាំងនេះជួយពន្យល់ និង បង្ហាញអំពីរបៀបដែលអ្នក និង សិស្សដែលអ្នកបង្រៀន អាចអនុវត្តការបង្រៀន និងការរៀនសូត្រមូលដ្ឋានគ្រឹះនៃដំណឹងល្អនៅក្នុងការសិក្សារបស់អ្នកអំពីព្រះគម្ពីរសញ្ញាថ្មី ។ វាក៏ផ្តល់ផងដែរនូវយោបល់នានាស្តីអំពីរបៀបដ៏មានប្រសិទ្ធភាព ដើម្បីប្រើវិធីសាស្ត្រ ជំនាញ និង យុទ្ធសាស្រ្តបង្រៀនផ្សេងៗ ។ នៅពេលអ្នកយល់គោលការណ៍ដែលមាននៅក្នុងជំនួយក្នុងការបង្រៀន សូមរកមើលរបៀបនានាដើម្បីអនុវត្ត ហើយប្រើវាឲ្យបានជាប់លាប់នៅក្នុងការបង្រៀនរបស់អ្នក ។

ចំណេះចំណានខគម្ពីរ និង គោលលទ្ធិគ្រឹះ

ដើម្បីជួយសិស្សឲ្យរក្សាទុកនូវសេចក្តីពិតដ៏អស់កល្បជានិច្ច និង ដើម្បីបង្កើនទំនុកចិត្តរបស់ពួកគេលើការរៀនសូត្រ និង ការបង្រៀនចេញពីព្រះគម្ពីរ នោះថ្នាក់សិក្ខាសាលា និង វិទ្យាស្ថានសាសនា ( ស&វ ) បានជ្រើសរើសវគ្គបទគម្ពីរជាច្រើនសម្រាប់សិស្សឲ្យសូត្រចាំស្ទាត់ក្នុងអំឡុងពេលនៃវគ្គសិក្សានីមួយៗ ។ លើសពីនេះទៀតបញ្ជី គោលលទ្ធិគ្រឹះ ត្រូវបានដាក់បញ្ចូលដើម្បីបង្ហាញនូវគោលលទ្ធិគន្លឹះដែលសិស្សគួរតែយល់ ជឿ ហើយរស់នៅតាមពេញបួនឆ្នាំនៃថ្នាក់សិក្ខាសាលា និង ពេញមួយជីវិតរបស់ពួកគេ ។ សៀវភៅសិក្សាសម្រាប់វគ្គសិក្សានីមួយៗ ក្នុងថ្នាក់សិក្ខាសាលា ត្រូវបានរៀបចំដើម្បីបង្ហាញអំពីគោលលទ្ធិគ្រឹះ នៅពេលវាលេចឡើងអំឡុងពេលសិស្សសិក្សាព្រះគម្ពីរតាមលំដាប់លំដោយរបស់វគ្គគម្ពីរ ។ មានវគ្គចំណេះចំណានខគម្ពីរជាច្រើន ត្រូវបានជ្រើសរើសជាមួយនឹងគោលលទ្ធិគ្រឹះនៅក្នុងចិត្ត ដូច្នេះហើយ នៅពេលអ្នកបង្រៀនវគ្គចំណេះចំណានខគម្ពីរដល់សិស្ស នោះអ្នកនឹងបង្រៀនគោលលទ្ធិគ្រឹះផងដែរ ។

នៅពេលសិស្សបានរក្សាទុកនូវសេចក្តីពិតដ៏អស់កល្បជានិច្ចនៅក្នុងគំនិត និង ដួងចិត្តរបស់ខ្លួន នោះព្រះវិញ្ញាណបរិសុទ្ធនឹងនាំសេចក្តីពិតទាំងនេះ ទៅដល់ការចងចាំនៅពេលដែលចាំបាច់ និង ផ្តល់ភាពក្លាហានដល់គេដើម្បីធ្វើសកម្មភាពដោយសេចក្តីជំនឿ ( សូមមើល យ៉ូហាន ១៤:២៦) ។ ប្រធាន ហាវើដ ដបុលយូ ហឹនធើរ បានបង្រៀន ៖

« ខ្ញុំសុំលើកទឹកចិត្តអ្នកយ៉ាងម៉ឹងមាត់ ឲ្យប្រើបា្រស់ព្រះគម្ពីរនៅក្នុងការបង្រៀនរបស់អ្នក និង ធ្វើអ្វីៗគ្រប់យ៉ាងក្នុងអំណាចរបស់អ្នក ដើម្បីជួយសិស្សឲ្យប្រើប្រាស់ និង មានអារម្មណ៍កាន់តែកក់ក្តៅចំពោះព្រះគម្ពីរ ។ ខ្ញុំចង់ឲ្យមនុស្សវ័យក្មេងរបស់យើងមានទំនុកចិត្តលើព្រះគម្ពីរ ។ …

« … យើងចង់ឲ្យសិស្សមានទំនុកចិត្តលើអានុភាព និង សេចក្តីពិតនៃព្រះគម្ពីរ មានទំនុកចិត្តថា ព្រះវរបិតាសួគ៌របស់ពួកគេ ពិតជាកំពុងមានព្រះបន្ទូលទៅកាន់ពួកគេតាមរយៈព្រះគម្ពីរមែន ហើយទំនុកចិត្តថាពួកគេអាចងាកទៅអានព្រះគម្ពីរ ហើយរកចម្លើយចំពោះបញ្ហា និង ការអធិស្ឋានរបស់ពួកគេ ។ …

« …យើងសង្ឃឹមថា គ្មានសិស្សណាម្នាក់របស់អ្នកនឹងចាកចេញពីថ្នាក់របស់អ្នកដោយការភ័យខ្លាច ឬអៀនខ្មាស់ ឬ អាម៉ាស់មុខ ដែលពួកគេមិនអាចរកជំនួយដែលពួកគេត្រូវការ ដោយសារពួកគេមិនចេះព្រះគម្ពីរច្បាស់គ្រប់គ្រាន់ ក្នុងការរកវគ្គបទគម្ពីរត្រឹមត្រូវនោះឡើយ » (« Eternal Investments » [ address to CES religious educators, ថ្ងៃទី ១០ ខែ កុម្ភៈ ឆ្នាំ ១៩៨៩ ] ទំព័រ ២ si.lds.org, សូមមើលផងដែរ Teaching Seminary: Preservice Readings [ ឆ្នាំ ២០០៤ ] ទំព័រ ២០,LDS.org) ។

សូមមើលឧបសម្ព័ន្ធនៃសៀវភៅសិក្សានេះ សម្រាប់ព័ត៌មានបន្ថែមអំពីចំណេះចំណានខគម្ពីរ និង គោលលទ្ធិគ្រឹះ ។

ការប្រើប្រាស់មេរៀនដែលសិក្សានៅផ្ទះ

សេចក្ដីសង្ខេបនៃមេរៀនរបស់សិស្ស

សេចក្ដីសង្ខេបនេះនឹងជួយអ្នកឲ្យស្គាល់បរិបទ និង គោលលទ្ធិ ព្រមទាំងគោលការណ៍នានា ដែលសិស្សបានសិក្សាក្នុងមួយសប្ដាហ៍ នៅក្នុងសៀវភៅមគ្គុទេសន៍ការសិក្សារបស់សិស្ស ។

សេចក្ដីផ្ដើមនៃមេរៀន

សេចក្ដីផ្ដើមនៃមេរៀននេះនឹងជួយអ្នកឲ្យស្គាល់ពីផ្នែកខ្លះៗនៃបណ្តុំបទគម្ពីរណាមួយ ដែលនឹងត្រូវលើកយកមកបញ្ជាក់នៅក្នុងមេរៀននេះ ។

សេចក្ដីសង្ខេបនៃក្រុមខគម្ពីរ និង បរិបទ

ខគម្ពីរត្រូវបានដាក់ជាក្រុម ស្របតាមទីតាំងដែលផ្លាស់ប្តូរនៅក្នុងបរិបទ ឬ មាតិកាដែលមានពាសពេញទាំងបណ្តុំបទគម្ពីរ ។ សេចក្ដីយោងនៃក្រុមខគម្ពីរនីមួយៗ ត្រូវបានបន្តដោយសេចក្ដីសង្ខេបខ្លីនៃហេតុការណ៍ ឬការបង្រៀននៅក្នុងក្រុមខគម្ពីរនោះ ។

តួសេចក្តីនៃមេរៀន

តួសេចក្តីនៃមេរៀនផ្តល់នូវសេចក្តីណែនាំសម្រាប់អ្នក នៅពេលអ្នកសិក្សា និង បង្រៀន ។ វាផ្ដល់គំនិតបង្រៀន រួមមានសំណួរ សកម្មភាព ការដកស្រង់ ដ្យាក្រាម និង តារាងនានា ។

គោលលទ្ធិ និង គោលការណ៍ទាំងឡាយ

សេចក្ដីណែនាំនៃមេរៀនបន្ទាប់

កថាខណ្ឌចុងក្រោយនៃមេរៀននីមួយៗផ្តល់ការចង្អុលបង្ហាញមួយទៅមេរៀនបន្ទាប់ ។ សូមចែកចាយកថាខណ្ឌនេះជាមួយសិស្សរបស់អ្នក នៅពេលបញ្ចប់មេរៀននីមួយៗ ដើម្បីជួយពួកគេឲ្យខ្នះខ្នែងសិក្សាព្រះគម្ពីរអំឡុងពេលនៃសប្ដាហ៍ក្រោយ ។

កម្មវិធីថ្នាក់សិក្ខាសាលាសិក្សានៅផ្ទះ

ក្រោមការដឹកនាំរបស់ថ្នាក់ដឹកនាំបព្វជិតភាពក្នុងមូលដ្ឋាន និង អ្នកតំណាង ស&វ នោះថ្នាក់សិក្ខាសាលាសិក្សានៅផ្ទះអាចត្រូវបានរៀបចំឡើងនៅកន្លែងណា ដែលសិស្សពុំអាចចូលរួមរៀននៅក្នុងថ្នាក់ជារៀងរាល់ថ្ងៃបាន ដោយសារតែចម្ងាយផ្លូវឬ កត្តាផ្សេងៗទៀត ( ដូចជាពិការភាពជាដើម ) ។ ជាទូទៅ ថ្នាក់សិក្ខាសាលាសិក្សានៅផ្ទះពុំដូចថ្នាក់រៀនដែលបង្រៀនរៀងរាល់ថ្ងៃ ( ថ្ងៃនៃសប្តាហ៍ ) នៅពេលព្រឹកព្រលឹម ឬ ម៉ោងសិក្សាអំពីសាសនាសម្រាប់ថ្នាក់សិក្ខាសាលាឡើយ ។

កម្មវិធីសិក្សានៅផ្ទះអនុញ្ញាតឲ្យសិស្សទទួលបានក្រេឌីតនៅក្នុងថ្នាក់សិក្ខាសាលា តាមរយៈការបំពេញមេរៀននីមួយៗនៅផ្ទះ ជាជាងចូលរួមរៀននៅក្នុងថ្នាក់រៀងរាល់ថ្ងៃនៃសប្តាហ៍ ។ មេរៀនទាំងនេះមាននៅក្នុងសៀវភៅសិក្សាផ្សេងមួយទៀត សៀវភៅមគ្គុទេសន៍ការសិក្សាព្រះគម្ពីរសញ្ញាថ្មីសម្រាប់សិស្សថ្នាក់សិក្ខាសាលាសិក្សានៅផ្ទះ ។ មួយសប្ដាហ៍ម្ដង សិស្សនឹងជួបជាមួយនឹងគ្រូបង្រៀនថ្នាក់សិក្ខាសាលា ដើម្បីប្រគល់កិច្ចការរបស់ពួកគេ និង ចូលរួមក្នុងមេរៀនប្រចាំសប្ដាហ៍ ។ សៀវភៅមគ្គុទេសន៍ការសិក្សារបស់សិស្ស និង មេរៀនប្រចាំសប្តាហ៍ ត្រូវបានពន្យល់បន្ថែមទៀតនៅខាងក្រោមនេះ ។

សៀវភៅមគ្គុទេសន៍ការសិក្សាសម្រាប់សិស្សសិក្សានៅផ្ទះ

សៀវភៅមគ្គុទេសន៍ការសិក្សាព្រះគម្ពីរសញ្ញាថ្មីសម្រាប់សិស្សថ្នាក់សិក្ខាសាលាដែលសិក្សានៅផ្ទះ ត្រូវបានរៀបចំឡើងដើម្បីជួយសិស្សដែលសិក្សានៅផ្ទះ ឲ្យទទួលនូវបទពិសោធន៍នៅក្នុងការសិក្សាព្រះគម្ពីរសញ្ញាថ្មី ស្រដៀងនឹងសិស្សដែលចូលរៀននៅក្នុងថ្នាក់រៀន រៀងរាល់ថ្ងៃនៃសប្តាហ៍ដែរ ។ ហេតុដូច្នោះហើយ ល្បឿនបង្រៀននៃសៀវភៅមគ្គុទេសន៍ការសិក្សារបស់សិស្ស ព្រមទាំងគោលលទ្ធិ និង គោលការណ៍ដែលវាបញ្ជាក់អត្ថន័យនោះ វាស្របទៅនឹងមេរៀននៅក្នុងសៀវភៅសិក្សានេះ ។ សៀវភៅមគ្គុទេសន៍ការសិក្សារបស់សិស្ស ក៏រួមមាននូវសេចក្តីណែនាំអំពីចំណេះចំណានខគម្ពីរផងដែរ ។ វគ្គចំណេះចំណានខគម្ពីរត្រូវបានរៀបរាប់នៅក្នុងបរិបទ ដូចដែលវាមាននៅក្នុងអត្ថបទព្រះគម្ពីរ ហើយជាញឹកញាប់សកម្មភាពសរសេរនានា ត្រូវបានផ្តល់ឲ្យនៅក្នុងមេរៀននានាដែលមានវគ្គបទគម្ពីរនោះ ។

រៀងរាល់សប្តាហ៍ សិស្សថ្នាក់សិក្ខាសាលាដែលសិក្សានៅផ្ទះ ត្រូវបញ្ចប់មេរៀនបួនមកពីសៀវភៅមគ្គុទេសន៍ការសិក្សារបស់សិស្ស ហើយចូលរួមនៅក្នុងមេរៀនប្រចាំសប្តាហ៍មួយ ដែលបង្រៀនដោយគ្រូថ្នាក់សិក្ខាសាលារបស់ពួកគេ ។ សិស្សបំពេញកិច្ចការមួយចំនួនពីសៀវភៅមគ្គុទេសន៍ការសិក្សា នៅក្នុងកំណត់ហេតុការសិក្សាព្រះគម្ពីររបស់ពួកគេ ។ សិស្សគួរតែមានសៀវភៅកំណត់ហេតុការសិក្សាព្រះគម្ពីរពីរក្បាល ដូច្នេះពួកគេអាចទុកមួយនៅជាមួយគ្រូ ហើយទុកមួយទៀតសម្រាប់សរសេរខ្លួនឯង ។ នៅពេលសិស្សជួបជាមួយគ្រូរបស់ខ្លួនរាល់សប្តាហ៍ សៀវភៅកំណត់ហេតុមួយដែលសិក្សានៅផ្ទះត្រូវឲ្យទៅគ្រូ ហើយសៀវភៅមួយក្បាលទៀតត្រូវប្រគល់ឲ្យសិស្សវិញ ដើម្បីប្រើសរសេរមេរៀនបន្ទាប់ ។ ( ឧទាហរណ៍ អំឡុងមួយសប្តាហ៍ សិស្សបញ្ចប់កិច្ចការនៅក្នុងសៀវភៅកំណត់ហេតុទីមួយ ។ បន្ទាប់មក សិស្សយកសៀវភៅកំណត់ហេតុនោះទៅថ្នាក់រៀន ហើយប្រគល់វាទៅឲ្យគ្រូបង្រៀន ។ អំឡុងសប្តាហ៍បន្ទាប់ សិស្សបញ្ចប់កិច្ចការនៅក្នុងសៀវភៅកំណត់ហេតុទីពីរ ។ នៅពេលសិស្សប្រគល់សៀវភៅកំណត់ហេតុទីពីរឲ្យគ្រូ នោះគ្រូនឹងឲ្យសៀវភៅកំណត់ហេតុទីមួយមកសិស្សវិញ ។ បន្ទាប់មក សិស្សប្រើសៀវភៅកំណត់ហេតុទីមួយ ដើម្បីបំពេញកិច្ចការនៅសប្តាហ៍បន្ទាប់ ) ។

សិស្សថ្នាក់សិក្ខាសាលាទាំងអស់ ត្រូវបានលើកទឹកចិត្តឲ្យសិក្សាព្រះគម្ពីរប្រចាំថ្ងៃ ហើយអានមេរៀននានា ប៉ុន្ដែសិស្សសិក្សានៅផ្ទះគួរយល់ថា ពួកគេត្រូវបានរំពឹងឲ្យចំណាយពេលពី ៣០ ទៅ ៤០ នាទីបន្ថែមទៀតសម្រាប់មេរៀននីមួយៗនៅក្នុងមេរៀនទាំងបួននៃមេរៀនការសិក្សានៅផ្ទះនៅក្នុងមេរៀននីមួយៗ ហើយចូលរួមនៅក្នុងថ្នាក់សិក្សានៅផ្ទះប្រចាំសប្ដាហ៍ ។

មេរៀនប្រចាំសប្ដាហ៍សម្រាប់គ្រូបង្រៀនដែលបង្រៀនសិស្សនៅផ្ទះ

មេរៀននីមួយៗនៅក្នុង សៀវភៅមគ្គុទេសន៍ការសិក្សាព្រះគម្ពីរសញ្ញាថ្មីសម្រាប់ សិស្សថ្នាក់សិក្ខាសាលាដែលសិក្សានៅផ្ទះ ត្រូវគ្នានឹងមេរៀនចំនួនប្រាំ នៅក្នុងសៀវភៅសិក្សាប្រចាំថ្ងៃរបស់គ្រូបង្រៀន ។ បន្ទាប់ពីមេរៀនទីប្រាំនៅក្នុងសៀវភៅសិក្សានេះ អ្នកនឹងឃើញមានមេរៀនប្រចាំសប្តាហ៍មួយ សម្រាប់គ្រូបង្រៀនដែលបង្រៀនសិស្សនៅផ្ទះ ។ មេរៀនសិក្សានៅផ្ទះនឹងជួយសិស្សឲ្យរំឭក ពង្រីកការយល់ដឹងរបស់ពួកគេ និង អនុវត្តគោលលទ្ធិ និង គោលការណ៍ដែលពួកគេបានរៀន នៅពេលពួកគេបញ្ចប់មេរៀននៅក្នុងសៀវភៅមគ្គុទេសន៍ការសិក្សារបស់សិស្សអំឡុងសប្តាហ៍នោះ ។ មេរៀនទាំងនេះអាចបង្ហាញនូវសេចក្តីពិតបន្ថែម ដែលពុំមាននៅក្នុងសៀវភៅមគ្គុទេសន៍ការសិក្សារបស់សិស្ស ។ ( សម្រាប់ជំនួយនៅក្នុងការរៀបចំកាលវិភាគមេរៀនរបស់អ្នក សូមមើលសេចក្តីណែនាំពីល្បឿននៃការបង្រៀនសម្រាប់គ្រូបង្រៀនសិស្សដែលសិក្សានៅផ្ទះ នៅក្នុងឧបសម្ព័ន្ធនៃសៀវភៅសិក្សានេះ ) ។

ក្នុងនាមជាគ្រូបង្រៀនដល់សិស្សដែលសិក្សានៅផ្ទះម្នាក់ អ្នកអាចមានការយល់ដឹងទាំងស្រុងអំពីអ្វី ដែលសិស្សរបស់អ្នកកំពុងសិក្សានៅផ្ទះរាល់សប្តាហ៍ ដូច្នេះអ្នកអាចឆ្លើយសំណួរ និង បង្កើតការពិភាក្សានានាដ៏មានអត្ថន័យ នៅពេលអ្នកជួបជាមួយនឹងពួកគេ ។ សូមឲ្យសិស្សយកព្រះគម្ពីរ សៀវភៅកំណត់ហេតុសិក្សាព្រះគម្ពីរ និង សៀវភៅមគ្គុទេសន៍ការសិក្សាសិស្ស របស់ពួកគេមកថ្នាក់រៀនរាល់សប្តាហ៍ ដូច្នេះពួកគេអាចប្រើប្រាស់វាពេលកំពុងរៀន ។ សូមសម្របសម្រួលមេរៀននានាស្របទៅតាមតម្រូវការរបស់សិស្ស នៅពេលអ្នកបង្រៀន និង ស្របទៅតាមការណែនាំនៃព្រះវិញ្ញាណបរិសុទ្ធ ។ អ្នកក៏អាចប្រើប្រាស់មេរៀនប្រចាំថ្ងៃរបស់គ្រូបង្រៀននៅក្នុងសៀវភៅសិក្សានេះ នៅពេលអ្នករៀបចំ និង បង្រៀនផងដែរ ។ ការសិក្សាពីជំនួយក្នុងការបង្រៀន និង វិធីសាស្ត្រនានា ដែលបានប្រើនៅក្នុងមេរៀនប្រចាំថ្ងៃ អាចជួយពង្រីកការបង្រៀនប្រចាំសប្តាហ៍របស់អ្នក ។ សូមតម្រូវទៅតាមសេចក្តីត្រូវការពិសេសនានានៃសិស្សដែលអ្នកបង្រៀន ។ ឧទាហរណ៍ ប្រសិនបើសិស្សម្នាក់មានការលំបាកក្នុងការសរសេរ សូមឲ្យគាត់ប្រើម៉ាស៊ីនថតសំឡេង ឬ និយាយគំនិតនោះទៅសមាជិកគ្រួសារ ឬ មិត្តភក្ដិ ដែលអាចសរសេរចម្លើយរបស់គាត់ទុក ។

នៅចុងបញ្ចប់នៃមេរៀនរាល់សប្តាហ៍ សូមប្រមូលសៀវភៅកំណត់ហេតុសិក្សាព្រះគម្ពីររបស់សិស្ស ហើយលើកទឹកចិត្តពួកគេឲ្យបន្តការសិក្សារបស់ពួកគេ ។ សូមផ្តល់សៀវភៅកំណត់ហេតុសិក្សាព្រះគម្ពីរ សម្រាប់កិច្ចការសប្តាហ៍បន្ទាប់ ដូចដែលបានពន្យល់ពីខាងលើនៅក្នុងវគ្គដែលហៅថា « សៀវភៅមគ្គុទេសន៍ការសិក្សាសម្រាប់សិស្សដែលសិក្សានៅផ្ទះ » ។ (ក្រោមការដឹកនាំថ្នាក់ដឹកនាំបព្វជិតភាព និង ឪពុកម្ដាយ នោះគ្រូបង្រៀនថ្នាក់សិក្ខាសាលាប្រចាំស្តេក [ ដែលបានហៅ ] អាចទាក់ទងសិស្សថ្នាក់សិក្ខាសាលាតាមប្រព័ន្ធអេឡិចត្រូនិច ជាមួយសិស្សដែលចុះឈ្មោះចូលរៀនថ្នាក់សិក្ខាសាលានៅផ្ទះបាន ) ។

នៅពេលអ្នកអានកិច្ចការរបស់សិស្ស នៅក្នុងសៀវភៅកំណត់ហេតុសិក្សាព្រះគម្ពីររបស់សិស្សចប់ហើយ សូមឆ្លើយតបចំពោះកិច្ចការរបស់ពួកគេម្តងម្កាល ដោយសរសេរកំណត់ចំណាំ ឬ មូលវាចារណ៍ខ្លីមួយ នៅពេលអ្នកជួបពួកគេលើកក្រោយ ។ អ្នកក៏អាចស្វែងរកវិធីនានាដើម្បីផ្តល់ការគាំទ្រ និង ផ្តល់មតិកែលម្អដ៏មានអត្ថន័យផងដែរ ។ ការណ៍នេះនឹងជួយសិស្សឲ្យដឹងថា អ្នកខ្វល់អំពីកិច្ចការរបស់ពួកគេ និង ជួយជំរុញទឹកចិត្តពួកគេឲ្យធ្វើកិច្ចការរបស់ពួកគេបានកាន់តែហ្មត់ចត់ ។

កិច្ចខិតខំភាគច្រើនរបស់សិស្ស ដើម្បីសូត្រវគ្គបទគម្ពីរគន្លឹះឲ្យចាំស្ទាត់នឹងអាចធ្វើបាន នៅពេលពួកគេបំពេញមេរៀនសិក្សានៅផ្ទះរបស់ខ្លួន។ គ្រូបង្រៀនដែលបង្រៀនសិស្សនៅផ្ទះ អាចតាមដានកិច្ចខិតខំរបស់សិស្ស អំឡុងពេលមេរៀនសិក្សានៅផ្ទះ ដោយអញ្ជើញសិស្សឲ្យសូត្រ ឬ រំឭកវគ្គចំណេះចំណានខគម្ពីរ ដែលមាននៅក្នុងអត្ថបទសម្រាប់មេរៀនសិក្សានៅសប្តាហ៍នោះ ។

ធនធានផ្សេងទៀត

LDS.org

ព្រះគម្ពីរសញ្ញាថ្មី សៀវភៅសិក្សាសម្រាប់គ្រូបង្រៀនថ្នាក់សិក្ខាសាលា ( nttm.lds.org ) និង សៀវភៅមគ្គុទេសន៍ការសិក្សាព្រះគម្ពីរសញ្ញាថ្មីសម្រាប់សិស្សថ្នាក់សិក្ខាសាលាដែលសិក្សានៅផ្ទះ មាននៅលើគេហទំព័រ LDS.org និងនៅក្នុងកម្មវិធីបណ្ណាល័យដំណឹងល្អសម្រាប់ឧបករណ៍ចល័ត ។ កំណែឌីជីថលនៃសៀវភៅសិក្សាសម្រាប់គ្រូបង្រៀននេះមាននូវសេចក្តីពន្យល់ និង ព័ត៌មានសាច់រឿងបន្ថែម គំនិតបន្ថែមសម្រាប់ការបង្រៀន និងធនធានសម្រាប់ប្រព័ន្ធផ្សព្វផ្សាយ ដែលពុំបានដាក់បញ្ចូលនៅក្នុងសៀវភៅសិក្សាដែលបានបោះពុម្ព ដោយសារតែទំហំមានកំណត់ ។

si.lds.org

គ្រូបង្រៀនអាចមើលគេហទំព័រនៃថ្នាក់សិក្ខាសាលា និង ថ្នាក់វិទ្យាស្ថានសាសនា (si.lds.org) សម្រាប់ជំនួយនៅក្នុងការរៀបចំមេរៀន និង ស្វែងរកគំនិតបន្ថែមសម្រាប់ការបង្រៀន ។

Notes and Journal Tools ( ឧបករណ៍កំណត់ចំណាំ និង កំណត់ហេតុ )

គ្រូបង្រៀន និង សិស្សអាចប្រើ Notes and Journal tools ( ឧបករណ៍កំណត់ចំណាំ និង កំណត់ហេតុ ) តាមអ៊ិនធើរណែត និង ឧបករណ៍ចល័តដើម្បីគូសចំណាំ និង បន្ថែមកំណត់ចំណាំក្នុងកំណែឌីជីថលនៃសៀវភៅសិក្សាទាំងនេះ នៅពេលពួកគេរៀបចំមេរៀន និង សិក្សាព្រះគម្ពីរ ។ សៀវភៅសិក្សារបស់គ្រូបង្រៀន និង សៀវភៅមគ្គុទេសន៍ការសិក្សារបស់សិស្សក៏មាននៅLDS.org ដើម្បីទាញយកជាទម្រង់នានា ( ដូចជាឯកសារ PDF, ePub, និង mobi [Kindle] ) ។

សម្ភារបន្ថែម

ធនធានខាងក្រោមនេះមាននៅលើអ៊ិនធើរណែត តាមរយៈអ្នកគ្រប់គ្រងរបស់អ្នក តាមរយៈមជ្ឈមណ្ឌលចែកចាយរបស់សាសនាចក្រនៅក្នុងមូលដ្ឋាន និង តាមរយៈហាងទំនិញតាមអ៊ិនធើរណែតរបស់សាសនាចក្រនៅគេហទំព័រ (store.lds.org) ៖

Media Library នៅលើគេហទំព័រ LDS.org
Gospel Art Book ( ទំនិញល.រ. ០៦០៤៨ )
Scripture Study Journal ( ទំនិញ ល.រ. ០៩៥៩១ )
ពិតចំពោះសេចក្តីជំនឿ ៖ ឯកសារយោងដំណឹងល្អ ( ទំនិញ ល.រ. ៣៦៨៦៣ )
ប្រធានបទដំណឹងល្អនៅលើគេហទំព័រ LDS.org
ដើម្បីកម្លាំងនៃយុវជន កូនសៀវភៅ ( ទំនិញ ល.រ. ០៩៤០៣ )
New Testament Student Manual ( Church Educational System manual ឆ្នាំ ២០១៤ ) ( ទំនិញ ល.រ. ១០៧៣៤ )