វិវរណៈ ១–១១ ( មេរៀនទី ៣១ )

ការរៀបចំសម្ភារសម្រាប់គ្រូបង្រៀនដល់សិស្សដែលសិក្សានៅផ្ទះ

សេចក្ដីសង្ខេបនៃមេរៀនសិក្សានៅផ្ទះប្រចាំថ្ងៃ

សេចក្ដីសង្ខេបខាងក្រោមអំពីព្រឹត្តិការណ៍គោលលទ្ធិ និងគោលការណ៍ដែលសិស្សបានរៀន នៅពេលពួកគេបានសិក្សា វិវរណៈ ១–១១ ( មេរៀនទី ៣១ ) ពុំមែនត្រូវយកមកបង្រៀនជាផ្នែកនៃមេរៀនរបស់អ្នកនោះទេ ។ មេរៀនដែលអ្នកបង្រៀនផ្ដោតលើគោលលទ្ធិ និង គោលការណ៍តែពីរបីនេះប៉ុណ្ណោះ ។ សូមធ្វើតាមការបំផុសគំនិតពីព្រះវិញ្ញាណបរិសុទ្ធ នៅពេលអ្នកគិតអំពីតម្រូវការរបស់សិស្ស ។

ថ្ងៃទី ១ ( វិវរណៈ ១–៣ )

នៅពេលសិស្សសិក្សាអំពីវិវណៈរបស់សាវកយ៉ូហាន ពួកគេបានរៀនថា នៅពេលយើងអាន ស្វែងរកការយល់ដឹង ហើយគោរពតាមព្រះបន្ទូលរបស់ព្រះអម្ចាស់ នោះយើងនឹងបានពរ ។ យ៉ូហានបានបង្រៀនសមាជិកសាសនាចក្រថា ព្រះយេស៊ូវគ្រីស្ទឃុំគ្រង ហើយមើលថែពួកអ្នកដើរតាមដ៏ស្មោះត្រង់របស់ទ្រង់ ហើយថាទ្រង់គឺជាអង្គដែលមានព្រះជន្មឡើងវិញដ៏រុងរឿង ដែលមានព្រះចេស្ដាលើសេចក្ដីស្លាប់ និងស្ថាននរក ។ សិស្សក៏បានរៀនផងដែរថា នៅពេលយើងបើកទ្វារទទួលយកព្រះអង្គសង្គ្រោះ ទ្រង់នឹងយាងចូលមករកយើង ហើយបរិភោគជាមួយនឹងយើង ។

ថ្ងៃទី ២ ( វិវរណៈ ៤–៥ )

នៅក្នុងមេរៀននេះ សិស្សអានអំពីការនិមិត្តរបស់យ៉ូហានអំពីកូនចៀមរបស់ព្រះ ហើយរៀននូវសេចក្ដីពិតដូចតទៅនេះ ៖ នៅពេលយើងស្គាល់អំពីមហិទ្ធិឫទ្ធិរបស់ព្រះវរបិតាសួគ៌ នោះយើងមានបំណងចង់ថ្វាយបង្គំ ហើយសរសើរតម្កើងទ្រង់ ។ ព្រះយេស៊ូវគ្រីស្ទគឺជាព្រះតែមួយអង្គគត់ដែលសក្ដិសម ហើយអាចប្រោសលោះយើងបាន ។ នៅពេលយើងស្គាល់ ហើយមានអំណរគុណចំពោះអ្វីដែលព្រះវរបិតាសួគ៌ និងព្រះយេស៊ូវគ្រីស្ទបានធ្វើសម្រាប់យើង នោះយើងមានបំណងចង់ថ្វាយបង្គំ ហើយសរសេរតម្កើងចំពោះទ្រង់ទាំងពីរអង្គ ។

ថ្ងៃទី ៣ ( វិវរណៈ ៦–៧ )

នៅពេលសិស្សបានរៀនអំពីត្រាទាំងប្រាំពីរ ពួកគេបានរកឃើញថា ប្រសិនបើយើងស៊ូទ្រាំនឹងសេចក្ដីទុក្ខលំបាកដោយស្មោះត្រង់ ហើយប្រែក្លាយជាបរិសុទ្ធតាមរយៈដង្វាយធួនរបស់ព្រះយេស៊ូវគ្រីស្ទ នោះយើងនឹងរីករាយនឹងសិរីល្អសេឡេស្ទាលជាមួយនឹងព្រះ ។

ថ្ងៃទី ៤ ( វិវរណៈ ៨–១១ )

សិស្សបានរំឭកឡើងវិញនូវគោលការណ៍ដែលបានស្គាល់នៅក្នុងមេរៀនសម្រាប់ថ្ងៃទី ៣ នៅពេលពួកគេបានរៀនអំពីការនិមិត្តរបស់យ៉ូហាន ទាក់ទងនឹងការបើកត្រាទាំងប្រាំពីរនោះ ។

សេចក្តីផ្តើម

មេរៀននេះអាចជួយសិស្សឲ្យយល់នូវអ្វីដែលព្រះអម្ចាស់នឹងធ្វើសម្រាប់យើង ដោយសារទ្រង់ស្គាល់ ហើយស្រឡាញ់យើង ។ លើសពីនេះទៀត វាអាចជួយសិស្សឲ្យស្គាល់ថា តើពួកគេត្រូវធ្វើអ្វីខ្លះ ដើម្បីទទួលបានជីវិតដ៏នៅអស់កល្បជានិច្ច ។

យោបល់សម្រាប់ការបង្រៀន

វិវរណៈ ២–៣

យ៉ូហានសរសេរអំពីបន្ទូលទាំងឡាយរបស់ព្រះយេស៊ូវគ្រីស្ទដល់ថ្នាក់ដឹកនាំនៃក្រុមជំនុំទាំងប្រាំពីរ ។

កំណត់ចំណាំ ៖ សម្រាប់ព័ត៌មានបន្ថែមអំពីសេចក្ដីណែនាំរបស់ព្រះអម្ចាស់ដល់ក្រុមជំនុំទាំងប្រាំពីររបស់សាសនាចក្រ អ្នកគួរមើលនៅក្នុង New Testament Student Manual ( Church Educational System manual ឆ្នាំ ២០១៤ ) ទំព័រ ៥៣១–៣២ ។

សូមអញ្ជើញសិស្សម្នាក់ឲ្យអានឮៗនូវដំណើររឿងខាងក្រោមដោយស៊ិស្ទើរ ស៊ីឌនី អេស រេណល្តស៍ អតីតសមាជិកមួយរូបនៅក្នុងគណៈប្រធានអង្គបឋមសិក្សាទូទៅ ៖ សូមឲ្យសិស្សក្នុងថ្នាក់ស្ដាប់រកមើលថា តើពួកគេអាចរៀនអ្វីខ្លះនៅក្នុងដំណើររឿងនេះអំពីព្រះអម្ចាស់ ។

រូបភាព
ស៊ីដនី អេស រេណលស៍

« ស៊ិស្ទើរ ហ្គេល ក្លេគ នៃគណៈប្រធានអង្គបឋមសិក្សាទូទៅ និងស្វាមីគាត់បានរស់ក្នុងប្រទេសប្រេស៊ីលអស់រយៈពេលជាច្រើនឆ្នាំ ។ ថ្មីៗនេះ គាត់មានកិច្ចការមួយខាងអង្គការបឋមសិក្សានៅប្រទេសជប៉ុន ។ នៅពេលគាត់ដើរចូលទៅក្នុងសាលាជំនុំនៅថ្ងៃអាទិត្យ គាត់បានសង្កេតឃើញគ្រួសារជនជាតិប្រេស៊ីលមួយគ្រួសារនៅក្នុងចំណោមពួកបរិសុទ្ធជប៉ុន ។ … គាត់មានពេលតែមួយនាទីដើម្បីរាក់ទាក់នឹងពួកគេ ហើយបានដឹងថា ម្ដាយ និងកូនៗមានចិត្តសោមនស្សខ្លាំងណាស់ ប៉ុន្តែសង្កេតឃើញថាឪពុកអង្គុយយ៉ាងស្ងៀមស្ងាត់ ។ ‹ ខ្ញុំនឹងមានឱកាសនិយាយនឹងពួកគេក្រោយពីការប្រជុំ › គាត់បានគិត នៅពេលគាត់បានប្រញាប់ឡើងទៅអង្គុយនៅលើវេទិកា ។ គាត់បានថ្លែងសុន្ទរកថារបស់គាត់ជាភាសាអង់គ្លេស ហើយត្រូវបានគេបកប្រែជាភាសាជប៉ុន រួចគាត់បានទទួលការបំផុសឲ្យថ្លែងទីបន្ទាល់ជាភាសាព័រទុយហ្គាល់ផងដែរ ។ គាត់រៀងស្ទាក់ស្ទើរដោយសារគ្មានអ្នកបកប្រែជាភាសាព័រទុយហ្គាយ ហើយមនុស្ស ៩៨ ភាគរយនឹងពុំយល់អំពីអ្វីដែលគាត់នឹងនិយាយឡើយ ។

« បន្ទាប់ពីការប្រជុំនោះ ឪពុកដែលជាជនជាតិប្រេស៊ីលរូបនោះបានដើរមករកគាត់ ហើយពោលថា ‹ ស៊ិស្ទើរ ទំនៀមទម្លាប់នៅទីនេះមានភាពខុសប្លែកខ្លាំងណាស់ ហើយខ្ញុំបានឯកោតែឯង ។ ការមកព្រះវិហារដោយពុំបានយល់អ្វីសោះនោះ វាគឺជារឿងពិបាកណាស់ ។ ពេលខ្លះខ្ញុំគិតថា វានឹងប្រសើរជាង ប្រសិនបើខ្ញុំនៅផ្ទះអានព្រះគម្ពីរវិញនោះ ។ ខ្ញុំបានប្រាប់ភរិយារបស់ខ្ញុំថា « ខ្ញុំនឹងសាកល្បងម្ដងទៀត » ហើយខ្ញុំបានមកនៅថ្ងៃនេះដោយគិតថា វាគឺជាលើកចុងក្រោយសម្រាប់ខ្ញុំ ។ នៅពេលអ្នកថ្លែងទីបន្ទាល់របស់អ្នកជាភាសាព័រទុយហ្គាល់ ព្រះវិញ្ញាណបានប៉ះដល់ដួងចិត្តខ្ញុំ ហើយខ្ញុំបានដឹងថា នេះគឺជាកន្លែងដែលខ្ញុំត្រូវមក ។ ព្រះជ្រាបថាខ្ញុំនៅទីនេះ ហើយទ្រង់នឹងជួយខ្ញុំ › » ( « He Knows Us; He Loves Us » Ensign ឬ Liahona ខែ វិច្ឆិកា ឆ្នាំ ២០០៣ ទំព័រ ៧៦ ) ។

តើយើងអាចរៀនអ្វីខ្លះអំពីព្រះអម្ចាស់នៅក្នុងដំណើររឿងនេះ ?

សូមសរសេរឃ្លាមិនពេញលេញខាងក្រោមនៅលើក្ដារខៀន ៖ ដោយសារព្រះអម្ចាស់ស្គាល់យើងម្នាក់ៗ … នៅពេលសិស្សសិក្សា វិវរណៈ ២–៣ សូមអញ្ជើញសិស្សឲ្យរកមើលសេចក្ដីពិតដែលជួយពួកគេឲ្យយល់ថា ព្រះអម្ចាស់អាចធ្វើអ្វីខ្លះសម្រាប់ពួកគេ ដោយសារទ្រង់ស្គាល់ពួកគេនោះ ។

សូមពន្យល់ថា វិវរណៈ ២–៣ មាននូវកំណត់ត្រារបស់សាវកយ៉ូហានអំពីបន្ទូលរបស់ព្រះយេស៊ូវគ្រីស្ទទៅពួកជំនុំទាំងប្រាំពីររបស់សាសនាចក្រនៅអាស៊ីតូច ( ប្រទេសតួគីបច្ចុប្បន្ន ) ។

សូមអញ្ជើញសិស្សម្នាក់អាន វិវរណៈ ២:១–៣, ៦ ឲ្យឮៗ ។ ចូរសុំឲ្យសិស្សក្នុងថ្នាក់ផ្ទៀងតាម រកមើលថា ព្រះអម្ចាស់បានជ្រាបអ្វីខ្លះអំពីពួកបរិសុទ្ធក្នុងអេភេសូរ ។

តើព្រះអម្ចាស់បានជ្រាបអ្វីខ្លះអំពីពួកបរិសុទ្ធនៅអេភេសូរ ? ( សូមពន្យល់ថា ពាក្យ ពួកនីកូឡាស នៅក្នុង ខទី ៦ អាចសំដៅទៅលើក្រុមដែលសមាជិករបស់ខ្លួនបានប្រកាសថា ពួកគេអាចធ្វើអំពើបាបខាងផ្លូវភេទដោយគ្មានការដាក់ទោស ដោយសារតែព្រះគុណរបស់ព្រះនឹងសង្គ្រោះពួកគេ [ សូមមើល Bible Dictionary « Nicolaitans » ] ) ។

សូមចង្អុលបង្ហាញថា ខគម្ពីរទាំងនេះកត់ត្រាថា ព្រះអម្ចាស់បានសរសើរពួកបរិសុទ្ធចំពោះកិច្ចការល្អរបស់ពួកគេ ។ សូមដាក់បន្ថែមទៅនឹងឃ្លានៅលើក្ដារខៀនដើម្បីឲ្យវាមានន័យដូចតទៅនេះ ៖ ដោយសារព្រះអម្ចាស់ស្គាល់យើងម្នាក់ៗ ទ្រង់អាចប្រទាននូវការសរសើរដោយផ្ទាល់ដល់យើង …

សូមអញ្ជើញសិស្សម្នាក់អាន វិវរណៈ ២:៤–៥ ឲ្យឮៗ ។ ចូរសុំឲ្យសិស្សក្នុងថ្នាក់ផ្ទៀងតាម រកមើលថាព្រះអម្ចាស់បានជ្រាបអ្វីខ្លះទៀតអំពីពួកបរិសុទ្ធក្នុងអេភេសូរ ។

តើព្រះអម្ចាស់បានជ្រាបអ្វីខ្លះទៀត អំពីពួកបរិសុទ្ធនៅអេភេសូរ ?

សូមចង្អុលបង្ហាញថា ព្រះអម្ចាស់កំពុងប្រទានការកែតម្រូវដល់ពួកបរិសុទ្ធ ដោយសារតែអំពើបាបរបស់ពួកគេ ។ សូមបំពេញឃ្លានៅលើក្ដារខៀនដើម្បីឲ្យវាបង្ហាញនូវសេចក្ដីពិតដូចតទៅនេះ ៖ ដោយសារព្រះអម្ចាស់ស្គាល់យើងម្នាក់ៗ ទ្រង់អាចប្រទាននូវការសរសើរ និងការកែតម្រូវដោយផ្ទាល់ដល់យើង ។

តើមានវិធីអ្វីខ្លះដែលយើងអាចទទួលបានការសរសើរ និងការកែតម្រូវដោយផ្ទាល់មកពី ព្រះអម្ចាស់ ? ( តាមរយៈការអធិស្ឋាន ការសិក្សាព្រះគម្ពីរផ្ទាល់ខ្លួនរបស់យើង តាមរយៈពាក្យទូន្មានមកពីថ្នាក់ដឹកនាំសាសនាចក្រ និងឪពុកម្ដាយ ព្រមទាំងពររបស់លោកអយ្យកោ ) ។
តើការដឹងថា ព្រះអម្ចាស់អាចប្រទានដល់យើងនូវការសរសើរ និងការកែតម្រូវ អាចជះឥទ្ធិពលដល់របៀបដែលយើងធ្វើការសិក្សាព្រះគម្ពីរ និងការអធិស្ឋានផ្ទាល់ខ្លួនរបស់យើងយ៉ាងដូចម្ដេច ? តើវាអាចជះឥទ្ធិពលទៅលើរបៀប ដែលយើងឆ្លើយតបចំពោះពាក្យទូន្មានរបស់ថ្នាក់ដឹកនាំសាសនាចក្រ និងឪពុកម្ដាយរបស់យើងយ៉ាងដូចម្ដេចដែរ ?
ហេតុអ្វីយើងគួរមាននូវការខិតខំមួយដើម្បីស្វែងរកការសរសើរ និងការកែតម្រូវដោយផ្ទាល់មកពីព្រះអម្ចាស់ ?
តើអ្នកធ្លាប់ដកពិសោធន៍នូវការសរសើរ ឬការកែតម្រូវដោយផ្ទាល់មកពីព្រះអម្ចាស់នៅពេលណាដែរ ? តើបទពិសោធន៍នេះបានជួយអ្នកឲ្យដឹងថា ព្រះអម្ចាស់ស្គាល់អ្នកម្នាក់ៗយ៉ាងដូចម្ដេចដែរ ? ( សូមហាមសិស្សកុំឲ្យចែកចាយបទពិសោធន៍ដែលពិសិដ្ឋឬ ឯកជនពេក ) ។ អ្នកក៏គួរចែកចាយបទពិសោធន៍មួយផងដែរ ) ។

សូមអញ្ជើញសិស្សឲ្យពិចារណាអំពីសកម្មភាពដែលពួកគេគិតថា ព្រះអម្ចាស់អាចនឹងសរសើរដល់ពួកគេ ក៏ដូចជាគំនិត ឬឥរិយាបថដែលព្រះអម្ចាស់អាចនឹងកែតម្រូវដល់ពួកគេ ។ សូមលើកទឹកចិត្តសិស្សឲ្យដាក់គោលដៅមួយដើម្បីប្រែចិត្ត នៅពេលព្រះអម្ចាស់កែតម្រូវដល់ពួកគេ ។

សូមអញ្ជើញសិស្សម្នាក់អាន វិវរណៈ ២:៧ ឲ្យឮៗ ។ ចូរសុំឲ្យសិស្សក្នុងថ្នាក់ផ្ទៀងតាម រកមើលថា ព្រះអម្ចាស់បានសន្យាអ្វីខ្លះដល់ជនដែលយកឈ្នះ ឬជនដែលស៊ូទ្រាំដោយស្មោះត្រង់ដរាបដល់ចុងបំផុតនោះ ។

តើព្រះអម្ចាស់បានសន្យាអ្វីខ្លះដល់ជនដែលយកឈ្នះ ឬជនដែលកាន់ខ្ជាប់ដរាបដល់ចុងបំផុតនៅក្នុងសេចក្ដីសុចរិត ?
តើអ្នកគិតថា « ការបរិភោគផ្លែរបស់ដើមជីវិត » មានន័យដូចម្ដេច ? ( ខទី ៧ ) ។
តើការស្ដាប់ឮពរជ័យដែលបានសន្យានេះ បន្ទាប់ពីទទួលបានការកែតម្រូវដោយផ្ទាល់មានប្រយោជន៍យ៉ាងណាដែរ ដល់ពួកបរិសុទ្ធនៅអេភេសូរ ?

សូមរំឭកសិស្សថា បន្ថែមពីលើការមានបន្ទូលទៅកាន់ពួកជំនុំរបស់សាសនាចក្រនៅអេភេសូរ ព្រះអម្ចាស់បានមានបន្ទូលទៅពួកជំនុំផ្សេងទៀតរបស់សាសនាចក្រនៅអាស៊ីតូច ។

សូមបំបែកសិស្សក្នុងថ្នាក់ជាប្រាំក្រុម ហើយចាត់ឲ្យក្រុមនីមួយៗនូវបទគម្ពីរមួយដូចខាងក្រោមនេះ ៖

វិវរណៈ ២:៨–១១
វិវរណៈ ២:១២–១៧
វិវរណៈ ២:១៨–២៩, ការបកប្រែដោយយ៉ូសែប ស្ម៊ីធ វិវរណៈ ២:២៦–២៧ ( នៅក្នុងសេចក្ដីណែនាំដល់បទគម្ពីរទាំងឡាយ )
វិវរណៈ ៣:១–៦( សូមផ្ដល់សំណៅនៃការបកប្រែដោយយ៉ូសែប ស្ម៊ីធ សម្រាប់វិវរណៈ ៣:១–២ ដល់ក្រុមដែលទទួលបានបទគម្ពីរយោងនេះ ៖ « ចូរសរសេរផ្ញើទៅពួកអ្នកបម្រើនៃពួកជំនុំដែលនៅក្រុងសើដេសថា ព្រះដ៏មានព្រះវិញ្ញាណទាំងប្រាំពីរ ដែលជាពួកអ្នកបម្រើទាំងប្រាំពីររបស់ព្រះ ទ្រង់មានព្រះបន្ទូលនូវសេចក្ដីទាំងនេះថា យើងស្គាល់ការដែលអ្នករាល់គ្នាប្រព្រឹត្តហើយ គឺដែលអ្នករាល់គ្នាមានឈ្មោះថារស់ តែអ្នករាល់គ្នាស្លាប់ទេ ។ ហេតុដូច្នេះហើយ ចូរប្រុងប្រយ័ត្ន ហើយចម្រើនកម្លាំងដល់អ្វីៗដែលនៅសល់ ដែលរៀបនឹងស្លាប់នោះដែរ ដ្បិតយើងមិនបានឃើញការដែលអ្នករាល់គ្នាប្រព្រឹត្តនោះ ជាពេញខ្នាតនៅចំពោះព្រះនៃយើងទេ ) ។
វិវរណៈ ៣:៧–១៣

សូមអញ្ជើញសិស្សឲ្យអានខគម្ពីរដែលបានចាត់ដល់ពួកគេជាក្រុម ហើយរកមើលថា ព្រះអម្ចាស់បានទូន្មានឲ្យពួកបរិសុទ្ធធ្វើអ្វីខ្លះ និងពរជ័យដែលទ្រង់បានសន្យាថាពួកគេនឹងទទួលបាន ប្រសិនបើពួកគេធ្វើដូច្នោះ ។ សូមពន្យល់ថា អែលឌើរ ប្រ៊ូស អ័រ ម៉ាក់ខន់ឃី ក្នុងកូរ៉ុមនៃពួកសាវកដប់ពីរនាក់បានបង្រៀនថា « នំម៉ាន៉ាដ៏លាក់កំបាំង » នៅក្នុង វិវរណៈ ២:១៧ គឺជា « នំប៉័ងនៃជីវិត ជាគោលលទ្ធិអំពីទ្រង់ ដែលជានំប៉័ងនៃជិវិត—ដែលបានលាក់កំបាំងពីគំនិតខាងសាច់ឈាម [ ឬខាងលោកិយ ] ។ ហេតុដូច្នេះហើយ ជនដែលបរិភោគនឹងពុំឃ្លានទៀតឡើយ ជីវិតដ៏នៅអស់កល្បជានិច្ចគឺជាមរតករបស់ពួកគេនៅថ្ងៃចុងក្រោយ » ( Doctrinal New Testament Commentary វ៉ុលទី ៣ [ ឆ្នាំ១៩៦៥–៧៣ ] ៣:៤៥១ ) ។

បន្ទាប់ពីផ្តល់ពេលឲ្យគ្រប់គ្រាន់ហើយ ចូរអញ្ជើញសិស្សម្នាក់មកពីក្រុមនីមួយៗឲ្យប្រាប់អំពីអ្វីដែលក្រុមរបស់គាត់បានរកឃើញ ។ សូមអញ្ជើញសិស្សម្នាក់ឲ្យសរសេរនៅលើក្ដារខៀន ( នៅក្រោមពរជ័យដែលបានសន្យានៅក្នុង វិវរណៈ ២:៧ ) ពរជ័យសន្យាដែលក្រុមនីមួយៗបានរកឃើញ ( សូមមើល វិវរណៈ ២:១១, ១៧, ២៦, ៣:៥, ១២ ) ។ បន្ទាប់ពីបានធ្វើចប់សព្វគ្រប់ហើយ សូមចង្អុលបង្ហាញថា ការសន្យាទាំងនេះនីមួយៗសំដៅទៅលើការទទួលបានពរជ័យនៃភាពតម្កើងឡើង ដែលវាសមស្របទៅនឹងការកាន់ខ្ជាប់ដ៏ស្មោះត្រង់របស់យើងដរាបដល់ចុងបំផុត ។

តើយើងអាចស្គាល់គោលការណ៍អ្វីខ្លះ នៅក្នុងខគម្ពីរទាំងនេះ អំពីអ្វីដែលយើងត្រូវធ្វើដើម្បីទទួលបានពរជ័យនៃភាពតម្កើងឡើង ? ( សូមជួយសិស្សឲ្យស្គាល់គោលការណ៍មួយដែលស្រដៀងគ្នានឹងគោលការណ៍ដូចតទៅនេះ ៖ ប្រសិនបើយើងយកឈ្នះបាន នោះយើងអាចទទួលបានពរជ័យនៃភាពតម្កើងឡើង ) ។

សូមពន្យល់ថា ជនដែលទទួលបានពរជ័យនៃភាពតម្កើងឡើងគឺជាអស់អ្នកដែលយកឈ្នះដោយព្រះគុណរបស់ព្រះលើរាល់ឧបសគ្គទាំងឡាយដែលអាចរារាំងពួកគេពុំឲ្យត្រឡប់ទៅរកទ្រង់វិញ ។ ឧបសគ្គទាំងនេះរួមមាន ទម្លាប់ខាងលោកិយ ការសាកល្បង អំពើបាប និងសេចក្ដីស្លាប់ ។

សូមឲ្យសិស្សពិចារណាថាពួកគេត្រូវយកឈ្នះលើអ្វីខ្លះនៅក្នុងជីវិតរបស់ពួកគេ ។ សូមអញ្ជើញពួកគេឲ្យអធិស្ឋានសូមជំនួយពីព្រះវរបិតាសួគ៌ ដើម្បីយកឈ្នះលើឧបសគ្គដែលអាចរារាំងពួកគេពុំឲ្យត្រឡប់ទៅរកទ្រង់វិញ ។ សូមថ្លែងទីបន្ទាល់អំពីព្រះចេស្ដារបស់ព្រះវរបិតាសួគ៌ដើម្បីជួយពួកគេឲ្យយកឈ្នះលើឧបសគ្គនានា ។

មេរៀនបន្ទាប់ ( វិវរណៈ ១២–២២ )

សូមសួរសិស្សថា ពួកគេធ្លាប់ងឿងឆ្ងល់អំពីសេចក្តីជំនុំជម្រះចុងក្រោយ និងព្រឹត្តិការណ៍នានាដែលបានកើតឡើងនៅក្នុងជីវិតមុនឆាកជីវិតនេះទេ ។ តើសាវកយ៉ូហានបានសរសេរអ្វីខ្លះ អំពីសង្គ្រាមនៅស្ថានសួគ៌ ? តើមានវិញ្ញាណប៉ុន្មាននាក់ ដែលត្រូវបណ្ដេញចេញជាមួយនឹងសាតាំង ? តើសេចក្តីជំនុំជម្រះចុងក្រោយនឹងមានទិដ្ឋភាពបែបណា ? តើយើងនឹងទទួលការកាត់សេចក្ដីតាមរយៈអ្វី នៅពេលយើងឈរនៅចំពោះព្រះ ? តើយ៉ូហានបានពិពណ៌នាភាពរុងរឿងសេឡេស្ទាលយ៉ាងដូចម្ដេច ? សូមពន្យល់ថា នៅពេលពួកគេសិក្សា វិវរណៈ ១២–២២ នៅសប្ដាហ៍ក្រោយ នោះពួកគេនឹងរៀនអំពីចម្លើយចំពោះសំណួរទាំងនេះ ។