មេរៀនទី ១៥១
វិវរណៈ ១
សេចក្តីផ្តើម
កាលនៅលើកោះប៉ាត់ម៉ុស យ៉ូហានបានសរសេរសំបុត្រមួយអំពីការលើកទឹកចិត្តទៅពួកជំនុំទាំងប្រាំពីររបស់សាសនាចក្រដោយពិពណ៌នានូវវិវរណៈដែលលោកបានទទួល ។ យ៉ូហានបានថ្លែងទីបន្ទាល់អំពីអ្វីដែលទេវតា និងព្រះយេស៊ូវគ្រីស្ទបានមានបន្ទូលដល់លោក ។ យ៉ូហានក៏បានកត់ត្រាព័ត៌មានលម្អិតអំពីការនិមិត្តរបស់លោកអំពីព្រះអម្ចាស់ ព្រះយេស៊ូវគ្រីស្ទផងដែរ ។
យោបល់សម្រាប់ការបង្រៀន
វិវរណៈ ១:១–១១
យ៉ូហានបានថ្លែងទីបន្ទាល់អំពីការនិមិត្តរបស់លោក
ពីមុនថ្នាក់ចាប់ផ្ដើម សូមដាក់វត្ថុមួយនៅលើតុ ឬកៅអីនៅពីមុខសិស្សក្នុងថ្នាក់ ។ សូមគ្របវត្ថុនោះ ដើម្បីកុំឲ្យសិស្សដឹងថាវាគឺជាអ្វី ។ នៅពេលថ្នាក់ចាប់ផ្ដើម សូមអញ្ជើញសិស្សឲ្យទស្សន៍ទាយថាវត្ថុនោះគឺជាអ្វី ។ បន្ទាប់ពីសិស្សបីបួននាក់បានទស្សន៍ទាយរួច សូមអញ្ជើញសិស្សម្នាក់ឲ្យឡើងមកក្ដារខៀន ហើយឲ្យគាត់បើកមើលវត្ថុនោះឲ្យឃើញតែម្នាក់ឯងបានហើយ ។ សូមឲ្យសិស្សនោះពិពណ៌នាអំពីវត្ថុនោះប្រាប់ដល់សិស្សក្នុងថ្នាក់ ។
-
តើសិស្សដែលបានពិពណ៌នាអំពីវត្ថុនោះអាចតំណាងឲ្យតួនាទីមួយរបស់ពួកព្យាការី និងពួកសាវកបានយ៉ាងដូចម្ដេច ?
សូមឲ្យសិស្សនោះទៅកាន់កន្លែងអង្គុយវិញ ។ សូមអញ្ជើញសិស្សឲ្យបើកទៅគម្ពីរវិវរណៈ ។ សូមពន្យល់ថា គម្ពីរនេះក៏ត្រូវបានគេស្គាល់ថាជាអាប៉ូកាលីពដែរ ហើយនៅក្នុងភាសាក្រិកមានន័យថា វិវរណៈ ការពន្យល់ប្រាប់ ឬការបើកសម្ដែងអំពីអ្វីដែលបានលាក់បាំង ។ នៅក្នុងគម្ពីរនេះ សាវកប៉ុលបានកត់ត្រាទុកនូវសេចក្ដីពិតទាំងឡាយ ដែលត្រូវបានបើកសម្ដែងមកកាន់លោកអំពីព្រះអម្ចាស់ព្រះយេស៊ូវគ្រីស្ទ តួនាទីរបស់ទ្រង់នៅក្នុងផែនការនៃសេចក្ដីសង្គ្រោះរបស់ព្រះវរបិតាសួគ៌ ព្រឹត្តិការណ៍ដែលនឹងនាំឆ្ពោះទៅកាន់ការយាងមកជាលើកទីពីរ និងរជ្ជកាលនៃសហស្សវត្សរ៍របស់ទ្រង់ ។
សូមអញ្ជើញសិស្សឲ្យរកមើលសេចក្ដីពិត ដែលត្រូវបានបើកសម្ដែងដល់យ៉ូហាន នៅពេលពួកគេសិក្សាគម្ពីរវិវរណៈ ។
សូមអញ្ជើញសិស្សម្នាក់អានការបកប្រែដោយយ៉ូសែប ស្ម៊ីធ វិវរណៈ ១:១–៣ ឲ្យឮៗ ដែលមាននៅក្នុងសេចក្ដីណែនាំដល់បទគម្ពីរទាំងឡាយ ។ ចូរសុំសិស្សក្នុងថ្នាក់ឲ្យផ្ទៀងតាមរកមើលថាយ៉ូហានបានបង្រៀនអ្វីខ្លះអំពីវិវរណៈដែលលោកបានទទួល ។
-
ហេតុអ្វីវិវរណៈនេះត្រូវបានប្រទានឲ្យទៅយ៉ូហាន ?
-
តើយ៉ូហានចង់ឲ្យពួកបរិសុទ្ធធ្វើអ្វីខ្លះជាមួយនឹងវិវរណៈនេះ ?
ដើម្បីជួយសិស្សឲ្យយល់អំពីហេតុផល ដែលយ៉ូហានបានលើកឡើងទាំងជនដែលស្ដាប់ឮពាក្យសម្ដីរបស់លោក និងជនដែលអានពាក្យសម្ដីរបស់លោក សូមពន្យល់ថា នៅក្នុងជំនាន់របស់យ៉ូហាន មានពួកបរិសុទ្ធជាច្រើនពុំចេះអានអក្សរទេ ដូច្នេះពួកគេបានស្គាល់គម្ពីរវិវរណៈតាមរយៈការស្ដាប់មនុស្សដទៃទៀតអានគម្ពីរនេះឮៗ ។
-
តើយ៉ូហានបាននិយាយអ្វីខ្លះ អំពីមនុស្សដែលនឹងអាន ស្វែងរកការយល់ដឹង ហើយគោរព ( ប្រតិបត្តិតាម ) ការបង្រៀនដែលបានកត់ត្រានៅក្នុងគម្ពីរវិវរណៈនេះ ?
-
តើអ្នកអាចសង្ខេបការបង្រៀនរបស់យ៉ូហាននៅក្នុង វិវរណៈ ១:៣ទៅជាគោលការណ៍មួយបានយ៉ាងដូចម្ដេច ? ( សិស្សគួរស្គាល់គោលការណ៍ដូចតទៅនេះ ៖ នៅពេលយើងអាន ស្វែងយល់ដឹង ហើយគោរពតាមព្រះបន្ទូលរបស់ព្រះអម្ចាស់ យើងនឹងមានពរ ) ។
សូមអញ្ជើញសិស្សម្នាក់អាន វិវរណៈ ១:៤ ឲ្យឮៗ ។ ចូរសុំឲ្យសិស្សក្នុងថ្នាក់ផ្ទៀងតាម រកមើលថាយ៉ូហានបាននិយាយអំពីនរណាខ្លះនៅក្នុងសំបុត្ររបស់លោក ។
-
តើយ៉ូហានបាននិយាយអំពីនរណាខ្លះនៅក្នុងសំបុត្ររបស់លោក ? ( សូមពន្យល់ថា « ពួកជំនុំទាំង ៧ នៅស្រុកអាស៊ី » សំដៅទៅលើក្រុមជំនុំទាំងប្រាំពីរក្នុងសាសនាចក្រ ប្រៀបបាននឹងវួដ និងសាខានៅថ្ងៃសព្វថ្ងៃនេះដែរ ដែលមានទីតាំងនៅក្នុងតំបន់ភាគខាងលិចនៃប្រទេសតួគីនាពេលបច្ចុប្បន្ននេះ ។ « ព្រះវិញ្ញាណទាំង ៧ » សំដៅទៅលើថ្នាក់ដឹកនាំនៃក្រុមជុំនំទាំងនោះ ) ។
សូមអញ្ជើញឲ្យសិស្សពីរបីនាក់ប្ដូរវេនគ្នាអានឮៗនៅក្នុង វិវរណៈ ១:៥–៨ ។ សូមអញ្ជើញសិស្សក្នុងថ្នាក់ឲ្យផ្ទៀងតាមរកមើលអ្វីដែលយ៉ូហាន បាទីស្ទ ចង់ឲ្យមនុស្សដឹងអំពីព្រះយេស៊ូវគ្រីស្ទ ។ សូមពិចារណាអញ្ជើញសិស្សឲ្យគូសចំណាំអ្វីដែលពួកគេរកឃើញ ។
-
តើយ៉ូហានចង់ឲ្យពួកជំនុំទាំងប្រាំពីរនោះដឹងអ្វីខ្លះអំពីព្រះយេស៊ូវគ្រីស្ទ ?
-
តើឃ្លាណាមួយអំពីព្រះយេស៊ូវគ្រីស្ទក្នុងខគម្ពីរទាំងនេះ មានអត្ថន័យពិសេសចំពោះអ្នក ? ហេតុអ្វី ? ( អ្នកគួរចង្អុលបង្ហាញថា អាល់ផា និង អូមេកា គឺជាតួអក្សរដំបូង និងចុងក្រោយបង្អស់នៃតួអក្សររបស់ក្រិក ។ ចំណងជើងនេះចង្អុលបង្ហាញថា តួនាទីរបស់ព្រះគ្រីស្ទនៅក្នុងផែនការនៃសេចក្ដីសង្គ្រោះរបស់ព្រះវរបិតាសួគ៌រួមមានអ្វីៗទាំងអស់ តាំងពីដំបូងរហូតដល់ចុងបញ្ចប់ ។ [ សូមមើលផងដែរ វិវរណៈ ២២:១៣ ] ) ។
សូមអញ្ជើញសិស្សម្នាក់អាន វិវរណៈ ១:៩–១១ ឲ្យឮៗ ។ ចូរសុំឲ្យសិស្សក្នុងថ្នាក់ផ្ទៀងតាមរកមើលថា យ៉ូហាននៅទីណាពេលលោកបានទទួលវិវរណៈនេះ និងទីតាំងនៃពួកជំនុំទាំងប្រាំពីរ ។
-
តើយ៉ូហាននៅទីណាពេលលោកបានទទួលវិវរណៈនេះ ? តើពួកក្រុមជំនុំទាំងប្រាំពីរនោះមានទីតាំងនៅទីណា ?
សូមពិចារណាឲ្យសិស្សបើកទៅផែនទីក្នុងព្រះគម្ពីរប៊ីប លេខ ១៣ « ដំណើររបស់សាវកប៉ុលទៅផ្សាយសាសនា » ដើម្បីរកប៉ាត់ម៉ុស និងក្រុងមួយចំនួនក្នុងចំណោមក្រុងទាំងប្រាំពីរដែលមាននៅក្នុង វិវរណៈ ១:១១ ។
ដើម្បីជួយសិស្សឲ្យយល់អំពីទិដ្ឋភាពនៃប៉ាតម៉ុស សូមពិចារណាអញ្ជើញពួកគេឲ្យស្វែងរករូបថតអំពីព្រះគម្ពីរប៊ីបទី ៣២ « កោះប៉ាត់ម៉ុស » ។
-
យោងតាម វិវរណៈ ១:៩ ហេតុអ្វីយ៉ូហាននៅលើកោះប៉ាត់ម៉ុស ?
សូមពន្យល់ថា យ៉ូហានបានទទួលវិវរណៈនេះនៅក្នុងគ្រាលំបាកមួយសម្រាប់សមាជិកសាសនាចក្រ ។ នៅក្នុងគ្រានេះ មានការបៀតបៀនដ៏ធំមកលើពួកបរិសុទ្ធ ហើយមានការក្បត់សាសនា និងការបែកបាក់ផ្សេងៗនៅក្នុងចំណោមសមាជិកសាសនាចក្រ ។ លើសពីនេះទៀត ពួកសាវកគ្រប់រូបលើកលែងតែយ៉ូហានត្រូវបានគេសម្លាប់ ។ គម្ពីរវិវរណៈប្រហែលជាសរសេរនៅក្នុងសម័យនៃស្ដេចរ៉ូមឈ្មោះ ដូមីត ដែលបានបង្កើតការថ្វាយបង្គំដល់ស្ដេចឡើងវិញនៅទូទាំងអាណាចក្ររ៉ូម ហើយបាននិរទេស ឬបានសម្លាប់ជនដែលមិនព្រមថ្វាយបង្គំរូបព្រះ ដែលបានអនុម័តដោយរដ្ឋាភិបាលរបស់រ៉ូម ។ មានមនុស្សជាច្រើនជឿថា យ៉ូហានត្រូវបានគេនិរទេសទៅកោះប៉ាតម៉ុសដោយសារតែហេតុផលនោះ ។
-
យោងតាម វិវរណៈ ១:១០ តើយ៉ូហានបានពិពណ៌អំពីស្ថានភាពរបស់លោក កាលលោកបានទទួលវិវរណៈនេះយ៉ាងដូចម្ដេច ?
-
តើអ្នកគិតថាឃ្លា « ខ្ញុំបានត្រឡប់ជានៅដោយវិញ្ញាណ » មានអត្ថន័យដូចម្ដេចដែរ ?
-
យោងតាម ខទី ១១តើព្រះយេស៊ូវគ្រីស្ទបានបង្គាប់យ៉ូហានឲ្យធ្វើអ្វីខ្លះ ?
សូមពន្យល់ថា យើងរៀននៅក្នុងព្រះគម្ពីរមរមនថា នីហ្វៃមានការនិមិត្តមួយស្រដៀងគ្នានឹងការនិមិត្តរបស់យ៉ូហានដែរ ។ នីហ្វៃបានឃើញព្រឹត្តិការណ៍នៃថ្ងៃចុងក្រោយ ( រួមបញ្ចូលទាំងការយាងមកជាលើកទីពីររបស់ព្រះយេស៊ូវគ្រីស្ទ សហស្សវត្សរ៍ និងការបញ្ចប់កិច្ចការរបស់ព្រះនៅលើផែនដីនេះ ) ប៉ុន្តែលោកត្រូវបានបង្គាប់កុំឲ្យសរសេរអំពីវា ដោយសារយ៉ូហានត្រូវបានតែងតាំងពីមុនផែនដីដើម្បីធ្វើរឿងនេះ ( សូមមើល នីហ្វៃទី១ ១៤:២៤–២៩ ) ។
-
ហេតុអ្វីវាមានសារៈសំខាន់សម្រាប់យើង ដើម្បីសិក្សាពាក្យពេចន៍របស់យ៉ូហាននៅក្នុងវិវរណៈ ?
នៅពេលសិស្សបន្តសិក្សាគម្ពីរវិវរណៈ សូមអញ្ជើញពួកគេឲ្យរកមើលសេចក្ដីពិតអំពីថ្ងៃចុងក្រោយ ការយាងមកជាលើកទីពីររបស់ព្រះយេស៊ូវគ្រីស្ទ សហស្សវត្សរ៍ និងការបញ្ចប់កិច្ចការរបស់ព្រះនៅលើផែនដីនេះ ។
វិវរណៈ១:១២–២០
យ៉ូហានឃើញព្រះអម្ចាស់ ព្រះយេស៊ូវគ្រីស្ទនៅក្នុងការនិមិត្តមួយ
ដើម្បីណែនាំអំពីគំនិតនៃនិមិត្តសញ្ញា សូមបង្ហាញ ( ឬគូរនៅលើក្ដារខៀន ) រូបភាពនៃសញ្ញាមួយចំនួនតូចដែលគេអាចស្គាល់ទូទៅនៅក្នុងវប្បធម៌របស់អ្នក ដែលអាចងាយយល់ដោយពុំចាំបាច់ប្រើពាក្យ ។ ឧទាហរណ៍ អ្នកអាចដាក់បង្ហាញសញ្ញាចរាចរ ឬ សញ្ញាហាមឃាត់ ។ សូមឲ្យសិស្សពន្យល់អំពីគោលបំណងនៃសញ្ញាទាំងនេះ ។
សូមពន្យល់ថា នៅក្នុងគម្ពីរវិវរណៈ យ៉ូហានបានប្រើនិមិត្តសញ្ញា និងរូបភាពដើម្បី បង្រៀននូវសារលិខិតដ៏សំខាន់អំពីដំណឹងល្អ ។ និមិត្តសញ្ញានានាអាចជាឧបករណ៍បង្រៀនដ៏មានឥទ្ធិពល ដោយសារវាអាចបញ្ជូនព័ត៌មានទៅកាន់មនុស្សនៅក្នុងជំនាន់ និងវប្បធម៌ខុសៗគ្នា ។ វាក៏អាចបញ្ជូនសារលិខិតខុសគ្នាមួយចំនួនតូចផងដែរ ។
សូមចែកសិស្សទៅជាគូ ។ សូមអញ្ជើញគូនីមួយៗឲ្យអាន វិវរណៈ ១:១២–១៨ ឮៗរួមគ្នារកមើលនិមិត្តសញ្ញាដែលយ៉ូហានបានប្រើ ដើម្បីពិពណ៌នាអំពីវិវរណៈរបស់លោក ។ អ្នកគួរឲ្យយោបល់សិស្សគូសចំណាំនិមិត្តសញ្ញាដែលពួកគេបានអាន ។
-
តើយ៉ូហានបានប្រើនិមិត្តសញ្ញាអ្វី ដើម្បីពិពណ៌នាអំពីវិវរណៈរបស់លោក ?
សូមផ្ដល់ ឯកសារ នៃតារាងខាងក្រោម ( ឬបង្កើតតារាងថ្មីនៅលើក្ដារខៀន ) ដល់សិស្ស ។ សូមអញ្ជើញដៃគូនីមួយៗឲ្យអានសេចក្ដីយោងបទគម្ពីរ ឬនៅក្នុងជួរឈរខាងស្ដាំនៃតារាង ហើយសរសេរនៅក្នុងជួរឈរនោះនូវអត្ថន័យដែលអាចមានសម្រាប់និមិត្តសញ្ញានីមួយៗដែលយ៉ូហានបានប្រើ ។
និមិត្តសញ្ញានៅក្នុង វិវរណៈ ១
ព្រះគម្ពីរសញ្ញាថ្មី សៀវភៅសិក្សាសម្រាប់គ្រូបង្រៀនថ្នាក់សិក្ខាសាលា—មេរៀនទី ១៥១
និមិត្តសញ្ញា |
អត្ថន័យដែលអាចមាន |
---|---|
វិវរណៈ ១:១២—ចង្កៀងមាសប្រាំពីរ | |
វិវរណៈ ១:១៦–១៧—ព្រះហស្ដស្ដាំ | |
វិវរណៈ ១:១៦—ផ្កាយប្រាំពីរ |
ផ្កាយប្រាំពីរគឺជាពួកអ្នកបម្រើនៃពួកជំនុំទាំងប្រាំពីរ ( Joseph Smith Translation, Revelation ១:២០ ) ។ |
វិវរណៈ ១:១៦—ដាវមុខពីរដ៏មុត | |
វិវរណៈ ១:១៨—កូនសោនៃសេចក្ដីស្លាប់ និងស្ថានឃុំព្រលឹងមនុស្សស្លាប់ |
© 2015 by Intellectual Reserve, Inc. All rights reserved. ។
បន្ទាប់ពីទុកពេលគ្រប់គ្រាន់ហើយ សូមឲ្យសិស្សបីបួននាក់ប្រាប់អំពីអត្ថន័យដែលអាចមាននៃនិមិត្តសញ្ញានីមួយៗ ដែលយ៉ូហានបានប្រើ ។ ប្រសិនបើចាំបាច់ សូមជួយពួកគេឲ្យស្គាល់ថា ចង្កៀងទាំងប្រាំពីរតំណាងឲ្យពួកជំនុំទាំងប្រាំពីរដែលត្រូវលើកពន្លឺនៃដំណឹងល្អឡើង ព្រះហស្ដស្ដាំតំណាងឲ្យព្រះចេស្ដា និងការអនុមតិរបស់ព្រះ ផ្កាយប្រាំពីរតំណាងឲ្យពួកអ្នកបម្រើ ឬថ្នាក់ដឹកនាំគ្រប់គ្រងពួកជំនុំទាំងប្រាំពីរដែលដឹកនាំដោយព្រះអម្ចាស់ ដាវតំណាងឲ្យបន្ទូលព្រះ ការប្រកាសកាត់សេចក្ដីចំពោះជនទុច្ចរិត និងការដោះលែងជនគ្មានទោស ហើយកូនសោនៃស្ថានឃុំព្រលឹង និងសេចក្ដីស្លាប់តំណាងឲ្យព្រះចេស្ដារបស់ព្រះអម្ចាស់ដើម្បីយកឈ្នះលើសេចក្ដីស្លាប់ខាងវិញ្ញាណ និងខាងសាច់ឈាម ។
-
ដោយផ្អែកលើសារលិខិតដែលព្រះអម្ចាស់បានបើកសម្ដែងដល់ពួកបរិសុទ្ធតាមរយៈយ៉ូហាន តើយើងអាចរៀននូវសេចក្ដីពិតអ្វីខ្លះអំពីព្រះយេស៊ូវគ្រីស្ទ និងទំនាក់ទំនងរបស់ទ្រង់នឹងពួកអ្នកដើរតាមដ៏ស្មោះត្រង់របស់ទ្រង់ ? ( សិស្សអាចប្រើពាក្យផ្សេងគ្នា ប៉ុន្តែត្រូវប្រាកដថា ពួកគេស្គាល់សេចក្ដីពិតមួយដែលស្រដៀងគ្នានឹងសេចក្ដីពិតដូចតទៅនេះ ៖ ព្រះយេស៊ូវគ្រីស្ទឃុំគ្រង ហើយមើលថែពួកអ្នកដើរតាមដ៏ស្មោះត្រង់របស់ទ្រង់ ) ។
សូមរំឭកសិស្សអំពីការប្រឈម ដែលសមាជិកសាសនាចក្រនៅក្នុងជំនាន់របស់យ៉ូហានបានជួបប្រទះ ។
-
ហេតុអ្វីក៏វាសំខាន់ឲ្យសមាជិកសាសនាចក្រនៅជំនាន់របស់យ៉ូហានដឹងថា ព្រះយេស៊ូវគ្រីស្ទបានបន្តឃុំគ្រង ហើយមើលថែដល់ពួកគេ ?
-
ហេតុអ្វីបានជាវាសំខាន់ចំពោះយើងដើម្បីចងចាំពីសេចក្ដីពិតដូចគ្នានេះ ?
សូមអញ្ជើញសិស្សឲ្យគិតអំពីគ្រាមួយ ដែលពួកគេបានមានអារម្មណ៍ថា ព្រះយេស៊ូវគ្រីស្ទបានឃុំគ្រង ហើយមើលថែដល់ពួកគេ ។ សូមឲ្យពួកគេពីរបីនាក់ចែកចាយបទពិសោធន៍របស់ពួកគេជាមួយសិស្សនៅក្នុងថ្នាក់ ។ សូមពិចារណាចែកចាយបទពិសោធន៍មួយរបស់អ្នកផងដែរ ។
សូមអញ្ជើញឲ្យសិស្សម្នាក់អាន វិវរណៈ ១:១៧–១៨ឲ្យឮៗ ។ ចូរសុំសិស្សក្នុងថ្នាក់ឲ្យផ្ទៀងតាម រកមើលថាព្រះអង្គសង្គ្រោះបានមានបន្ទូលអ្វីខ្លះទៅកាន់យ៉ូហាន ។
-
តើយើងអាចរៀនគោលលទ្ធិអ្វីខ្លះអំពីព្រះយេស៊ូវគ្រីស្ទដោយផ្អែកលើអ្វី ដែលទ្រង់បានមានបន្ទូលទៅយ៉ូហាន ? ( សិស្សអាចនឹងប្រើពាក្យផ្សេងគ្នា ប៉ុន្តែពួកគេគួរស្គាល់គោលលទ្ធិដូចតទៅនេះ ៖ ព្រះយេស៊ូវគ្រីស្ទគឺជាអង្គដែលមានព្រះជន្មរស់ឡើងដ៏រុងរឿង ដែលមានព្រះចេស្ដាយកឈ្នះលើសេចក្ដីស្លាប់ និងស្ថាននរក ) ។
-
តើគោលលទ្ធិនេះបាននាំយកសេចក្ដីសង្ឃឹមអ្វីខ្លះ ទៅឲ្យពួកបរិសុទ្ធនៅជំនាន់របស់យ៉ូហាន ?
-
តើគោលលទ្ធិនេះបាននាំយកសេចក្ដីសង្ឃឹមអ្វីខ្លះមកឲ្យយើង ?
-
តើគោលលទ្ធិនេះបានបង្រៀនយើងអ្វីខ្លះអំពីលទ្ធផលចុងបញ្ចប់នៃចម្បាំងរវាងអំពើល្អ និងអំពើអាក្រក់ដែលកើតមានពាសពេញផែនដីនេះ ?
សូមអញ្ជើញសិស្សម្នាក់ឲ្យអានសេចក្ដីថ្លែងការណ៍ដូចខាងក្រោមអំពីគម្ពីរវិវរណៈ ៖
« សារលិខិតនៃវិវរណៈគឺដូចជាក្នុងគ្រប់បទគម្ពីរ ៖ នឹងមានជោគជ័យរបស់ព្រះអម្ចាស់នៅលើផែនដីនេះនៅទីបំផុត យកឈ្នះលើអារក្ស ជាជ័យជំនះដ៏និរន្ដន៍មួយនៃសេចក្ដីល្អលើសេចក្ដីអាក្រក់ ជាជ័យជំនះរបស់ពួកបរិសុទ្ធលើពួកបៀតបៀនពួកគេ ជាជ័យជំនះរបស់នគរព្រះលើនគរមនុស្ស និងសាតាំង » ( Bible Dictionary, « Revelation of John » ) ។
សូមចង្អុលបង្ហាញថា ដោយសារយើងដឹងថានៅទីបំផុត អំពើល្អនឹងយកឈ្នះលើអំពើអាក្រក់ ប៉ុន្តែអ្វីដែលសំខាន់គឺថា តើយើងជ្រើសយកនៅខាងណា ខាងសាតាំង ឬខាងព្រះ ។ អ្នកគួរថ្លែងទីបន្ទាល់អំពីជ័យជំនះរបស់ព្រះអង្គសង្គ្រោះលើសេចក្ដីស្លាប់ និងស្ថាននរក និងអំពីធាតុពិត ដោយសារតែទ្រង់ទើបយើងអាចជ្រើសយកនៅខាងព្រះនៅក្នុងចម្បាំងរវាងអំពើល្អ និងអំពើអាក្រក់នេះ ។
សូមអញ្ជើញសិស្សឲ្យ ពិចារណា អ្វីដែលពួកគេអាចធ្វើ ដើម្បីជ្រើសរើសកាន់ពេញលេញថែមទៀតដើម្បីនៅខាងព្រះ ។ សូមលើកទឹកចិត្តពួកគេធ្វើសកម្មភាព តាមការបំផុសគំនិតណាមួយដែលពួកគេបានទទួល ។
សូមអញ្ជើញសិស្សម្នាក់អាន វិវរណៈ១:១៩ ឲ្យឮ ។ ចូរសុំឲ្យសិស្សក្នុងថ្នាក់ផ្ទៀងតាម រកមើលថា ព្រះអម្ចាស់បានប្រាប់យ៉ូហានឲ្យសរសេរអ្វីខ្លះ ។ សូមឲ្យសិស្សប្រាប់ពីអ្វីដែលពួកគេរកឃើញ ។
សូមពន្យល់ថា វិវរណៈ ១ កត់ត្រានូវអ្វីដែលយ៉ូហានបានសរសេរអំពីការនិមិត្តរបស់លោកអំពីព្រះអង្គសង្គ្រោះ ។ ដូចដែលបានកត់ត្រានៅក្នុង វិវរណៈ ២–៣ យ៉ូហានបានសរសេរអំពី« សេចក្តីដែលមាន » ( វិវរណៈ ១:១៩ ) ឬស្ថានភាពរបស់សាសនាចក្រនៅជំនាន់របស់លោក ។ វិវរណៈ ៤–២២ កត់ត្រាអំពីអ្វីដែលយ៉ូហានបានសរសេរ « សេចក្តីទាំងប៉ុន្មាន ដែលត្រូវកើតមកតាមក្រោយ » ( វិវរណៈ ១:១៩ ) ឬនាពេលអនាគត ។
សេចក្តីពន្យល់ និង ព័ត៌មានសាច់រឿង
វិវរណៈ ១:១២ ។ ចង្កៀងមាសប្រាំពីរ
អែលឌើរ ប្រ៊ូស អ័រ ម៉ាក់ខន់ឃី ក្នុងកូរ៉ុមនៃពួកសាវកដប់ពីរនាក់បានបង្រៀនដូចតទៅនេះអំពីចង្កៀងមាសប្រាំពីរ ដែលយ៉ូហានបានឃើញ ៖
« ចង្កៀងសម្រាប់ទុកពន្លឺ វាពុំមែនបង្កើតពន្លឺនោះទេ ។ តួនាទីរបស់វាគឺដើម្បីធ្វើឲ្យមានពន្លឺ ប៉ុន្តែពុំធ្វើឲ្យមានពន្លឺនោះទេ ។ ដូច្នេះដោយការប្រើចង្កៀងប្រាំពីរដើម្បីរ៉ាយរ៉ាប់អំពីពួកជំនុំទាំងប្រាំពីរ ដែលយ៉ូហានកំពុងផ្ដល់ពាក្យទូន្មាននៅពេលនេះ នោះព្រះអម្ចាស់កំពុងបង្ហាញថា ក្រុមជំនុំរបស់ទ្រង់នៅលើផែនដីត្រូវនាំយកពន្លឺទៅកាន់ពិភពលោក ។ ព្រះគ្រីស្ទគឺជាពន្លឺនៃលោកិយ ។ ( យ៉ូហាន ៨:១២ ) ។ ‹ ចូរលើកពន្លឺរបស់អ្នករាល់គ្នាឡើង ប្រយោជន៍ឲ្យបានភ្លឺដល់មនុស្សលោក ។ មើលចុះ យើងជាពន្លឺដែលអ្នករាល់គ្នានឹងលើកឡើង—គឺនូវអ្វីដែលអ្នករាល់គ្នាបានឃើញយើងធ្វើ › (នីហ្វៃទី៣ ១៨:២៤); ម៉ាថាយ ៥:១៤–១៦ ) » ។ ( Doctrinal New Testament Commentary វ៉ុលទី ៣ [ ឆ្នាំ ១៩៦៥–៧៣ ] ៣:៤៤២ ) ។