មេរៀនទី ១៥៥
វិវរណៈ ៦–១១ ភាគ ២
សេចក្តីផ្តើម
យ៉ូហានបានឃើញការបើកត្រាទាំងប្រាំពីរ ហើយបានរៀនអំពីបេសកកម្មរបស់លោក ដើម្បីចូលរួមនៅក្នុងការប្រមូលផ្ដុំសាសន៍អ៊ីស្រាអែលនៅថ្ងៃចុងក្រោយ ។
យោបល់សម្រាប់ការបង្រៀន
វិវរណៈ ៨–៩
យ៉ូហានឃើញការបើកត្រាទាំងប្រាំពីរ
សូមចែកសិស្សជាគូ ហើយឲ្យសិស្សពន្យល់ទៅដៃគូរបស់ពួកគេនូវអ្វី ដែលពួកគេបានរៀននៅក្នុងការសិក្សារបស់ពួកគេក្នុង វិវរណៈ ៦–៧ ដែលអាចជួយពួកគេឲ្យបន្តមានចិត្តរីករាយ ហើយមានភាពវិជ្ជមាននៅក្នុងភាពមិនប្រាកដប្រជា និងភាពច្របូកច្របល់ ។
សូមសរសេរនៅលើក្ដារខៀននូវគោលការណ៍ដូចតទៅនេះ ដែលបានស្គាល់នៅក្នុងមេរៀនមុន ៖ប្រសិនបើយើងស៊ូទ្រាំនឹងសេចក្ដីទុក្ខលំបាកដោយស្មោះត្រង់ ហើយឲ្យបានបរិសុទ្ធតាមរយៈដង្វាយធួនរបស់ព្រះយេស៊ូវគ្រីស្ទ នោះយើងនឹងរីករាយនឹងសិរីល្អសេឡេស្ទាលជាមួយនឹងព្រះ ។ សូមលើកទឹកចិត្តសិស្សឲ្យរកមើលអំពីរបៀប ដែលគោលការណ៍នេះទាក់ទងនឹងព្រឹត្តិការណ៍ដែលពួកគេនឹងរៀននៅក្នុងមេរៀននៅថ្ងៃនេះ ។
សូមរៀបចំតារាងខាងក្រោមជាក្រដាសសម្រាប់ចែក ឬ គូរវានៅលើក្ដារខៀន ៖
-
យោងតាមតារាងនេះ តើមានខគម្ពីរប៉ុន្មាននៅក្នុងគម្ពីរវិវរណៈ ដែលមានព្រឹត្តិការណ៍នៃត្រាប្រាំមួយដំបូង ? ( ២៥ ) ។
-
តើមានខគម្ពីរប៉ុន្មាន ដែលមានព្រឹត្តិការណ៍នៃត្រាទីប្រាំពីរ ? ( ២១១ + ១៥ = ២២៦ ) ។
សូមចង្អុលបង្ហាញថា យ៉ូហានបានសរសេរអំពីព្រឹត្តិការណ៍ទាក់ទងនឹងរយៈពេលឆ្នាំទីប្រាំពីរពាន់ច្រើនជាងលោកបានសរសេរអំពីព្រឹត្តិការណ៍អំពីរឿងផ្សេងៗទៀត ។ លោកបានសរសេរជាពិសេសអំពីព្រឹត្តិការណ៍ ដែលនឹងកើតឡើងតាំងពីគ្រាបើកត្រាទីប្រាំពីរ រហូតដល់ការយាងមកជាលើកទីពីររបស់ព្រះយេស៊ូវគ្រីស្ទ ។
-
ហេតុអ្វីអ្នកគិតថា យ៉ូហានបានផ្ដោតការសរសេររបស់លោកលើព្រឹត្តិការណ៍នៃត្រាទីប្រាំពីរ ?
សូមសង្ខេប វិវរណៈ ៨:១–៦ ដោយពន្យល់ថា ខគម្ពីរទាំងនេះពិពណ៌នាអំពីព្រះអង្គសង្គ្រោះបើកត្រាទីប្រាំពីរ ។ យ៉ូហានបានឃើញទេវតាទីប្រាំពីរ ដែលទទួលបានត្រែប្រាំពីរ ។ កាលពីបុរាណ ត្រែត្រូវបានប្រើដើម្បី « ប្រកាសភាពអាសន្ន ឲ្យសញ្ញា [ កងទ័ព ] សម្រាប់ចម្បាំង ឬប្រកាសការមកដល់របស់ស្ដេច » ( Gerald N. Lund, « Seeing the Book of Revelation as a Book of Revelation » Ensign ខែ ធ្នូ ឆ្នាំ ១៩៨៧ ទំព័រ ៥០ ) ។ នៅក្នុងឧទាហរណ៍នេះ ការផ្លុំត្រែនឹងឲ្យសញ្ញានូវការចាប់ផ្ដើមនៃការញាំញី និងការបំផ្លិចបំផ្លាញនៅក្នុងការរៀបចំសម្រាប់រជ្ជកាលនៃសហស្សវត្សរ៍របស់ព្រះយេស៊ូវគ្រីស្ទ ។
សូមអញ្ជើញសិស្សឲ្យសរសេរ « ត្រាទីប្រាំពីរ » នៅផ្នែកខាងលើនៃក្រដាសមួយសន្លឹក ឬនៅក្នុងសៀវភៅសរសេរ ឬសៀវភៅកំណត់ត្រាការសិក្សាព្រះគម្ពីររបស់ពួកគេ ហើយគូររូបត្រែប្រាំពីរនៅគែមទំព័រផ្នែកខាងក្រោម ។
សូមសរសេរសេចក្ដីយោងខាងក្រោមនេះនៅលើក្ដារខៀន ប៉ុន្តែលុបចោលសំណួរដែលមានបន្ទាប់ពីសេចក្ដីយោងនីមួយៗ ។ សូមអញ្ជើញសិស្សឲ្យសរសេរសេចក្ដីយោងនោះនៅក្បែរត្រែលើក្រដាសរបស់ពួកគេ ៖
ទីមួយ—វិវរណៈ ៨:៧ ។ តើមានអ្វីបានកើតឡើងជាលទ្ធផលនៃ « ព្រិល ហើយភ្លើង » ដែលបានធ្លាក់ចុះមកផែនដី កាលទេវតាទីមួយបានផ្លុំត្រែរបស់ខ្លួន ?
ទីពីរ—វិវរណៈ ៨:៨–៩ ។ តើរឿងបីយ៉ាងដែលត្រូវទទួលរងនៅពេលត្រែទីពីរត្រូវបានបន្លឺឡើងជាអ្វីទៅ ?
ទីបី—វិវរណៈ ៨:១០–១១ ។ តើផ្កាយដែលធ្លាក់មកនោះឈ្មោះអ្វី ? ( សូមពន្យល់ថា ស្លែង គឺជារុក្ខជាតិល្វីងមួយប្រភេទដែលប្រើដើម្បីតំណាងឲ្យ « ភយន្តរាយដ៏ល្វីងជូរចត់ ឬភាពសោកសៅ » [ Bible Dictionary, « Wormwood » ] ) ។ តើមានអ្វីកើតឡើងនៅពេលវាធ្លាក់មក ?
ទីបួន—វិវរណៈ ៨:១២ ។ បន្ទាប់ពីការបន្លឺសំឡេងនៃត្រែទីបួន តើអ្វីទៅជារឿងបីយ៉ាងដែលមានភាពងងឹតខ្លះៗនោះ ?
ទីប្រាំ—វិវរណៈ ៩:១–៣ ។ តើអ្វីទៅដែលចេញមកពីបាតរណ្ដៅ កាលទេវតាទីប្រាំបើកវា ?
ទីប្រាំមួយ—វិវរណៈ ៩:១៣–១៦, ១៨ ។ តើមានទាហានជាច្រើននាក់ដែលបានចូលរួមនៅក្នុងចម្បាំងដ៏ធំ ដែលយ៉ូហានបានឃើញបន្ទាប់ពីត្រែទីប្រាំមួយបានបន្លឺសំឡេងឡើង ? តើផ្នែកអ្វីនៃខ្លួនរបស់មនុស្សដែលលោកបានឃើញថា ត្រូវបានសម្លាប់នៅក្នុងចម្បាំងនេះ ?
ទីប្រាំពីរ—វិវរណៈ ១១:១៥ ។
សូមចែកសិស្សជាប្រាំមួយក្រុម ហើយចាត់ឲ្យក្រុមនីមួយៗនូវសេចក្ដីយោងបទគម្ពីរមួយក្នុងចំណោមសេចក្ដីយោងទាំងប្រាំមួយ ដែលមាននៅលើក្ដារខៀន ( ប្រសិនបើមានសិស្សតិច អ្នកគួរឲ្យសេចក្ដីយោងច្រើនឲ្យដល់ក្រុមមួយចំនួន ) ។ សូមឲ្យក្រុមទាំងឡាយអានបទគម្ពីររបស់ខ្លួនរួមគ្នាឮៗ រកមើលអ្វីដែលបានកើតឡើងបន្ទាប់ពីការបន្លឺសំឡេងនៃត្រែទាំងឡាយ ។ សូមអញ្ជើញពួកគេឲ្យសរសេរអ្វី ដែលពួកគេរកឃើញនៅក្បែរត្រែដែលត្រឹមត្រូវលើក្រដាសរបស់ពួកគេ ។
បន្ទាប់ពីផ្តល់ពេលឲ្យគ្រប់គ្រាន់ហើយ ចូរអញ្ជើញសិស្សម្នាក់មកពីក្រុមនីមួយៗឲ្យប្រាប់អំពីអ្វីដែលពួកគេបានរកឃើញ ។ សូមអញ្ជើញសិស្សឲ្យសរសេរការរកឃើញរបស់ក្រុមនីមួយៗ នៅក្បែរត្រែដែលត្រឹមត្រូវលើក្រដាសរបស់ពួកគេ ។ នៅពេលសិស្សប្រាប់ពីចម្លើយ ប្រសិនបើចាំបាច់ សូមសួរសំណួរដែលភ្ជាប់នឹងសេចក្ដីយោងបទគម្ពីរដែលពួកគេមាន ។
-
តើគោលការណ៍ដែលយើងស្គាល់នៅក្នុងមេរៀនមុន អាចជួយយើងឲ្យជួយជនដែលកំពុងរស់នៅក្នុងព្រឹត្តិការណ៍នៃត្រាទីប្រាំពីរបានយ៉ាងដូចម្ដេច ?
ចូរសុំឲ្យសិស្សម្នាក់អាន វិវរណៈ ៩:២០–២១ ឲ្យឮៗ ។ ចូរសុំឲ្យសិស្សក្នុងថ្នាក់ផ្ទៀងតាមរកមើលថា ពួកទុច្ចរិត ដែលរួចផុតពីការញាំញីទាំងនេះ នឹងឆ្លើយតបយ៉ាងដូចម្ដេច ។ សូមអញ្ជើញសិស្សឲ្យរៀបរាប់ពីអ្វីដែលពួកគេរកឃើញ ។
-
តើការណ៍នេះបង្រៀនយើងអ្វីខ្លះ អំពីសេចក្ដីទុច្ចរិតរបស់មនុស្សទាំងនេះ ?
វិវរណៈ ១០
ទេវតាមួយអង្គណែនាំយ៉ូហានអំពីបេសកកម្មរបស់លោកនៅថ្ងៃចុងក្រោយ
សូមពន្យល់ថា វិវរណៈ ១០ មាននូវការផ្អាកមួយនៅក្នុងរឿងនិទានអំពីការបន្លឺសំឡេងត្រែទាំងប្រាំពីរ និងសេចក្តីទុក្ខវេទនាដែលទាក់ទង។ យើងអាននៅក្នុងជំពូកនេះថា យ៉ូហានត្រូវបានណែនាំដោយទេវតាមួយអង្គទៀត ។
សូមសរសេរពាក្យ ផ្អែម និង ជូរចត់នៅលើក្ដារខៀន ។
-
តើបទពិសោធន៍ណាខ្លះនៅក្នុងជីវិត ដែលអាចលើកមកពិចារណាថាមានទាំងភាពផ្អែមល្ហែម និងភាពជូរចត់ ?
សូមអញ្ជើញសិស្សម្នាក់អាន វិវរណៈ ១០:១–៣ ឲ្យឮៗ ។ ចូរសុំឲ្យសិស្សក្នុងថ្នាក់ផ្ទៀងតាមរកមើលថា ទេវតានោះកំពុងកាន់អ្វី ។
-
តើទេវតានោះកំពុងកាន់អ្វី ?
សូមអញ្ជើញឲ្យសិស្សពីរនាក់ប្ដូរវេនគ្នាអានឮៗនៅក្នុង វិវរណៈ ១០:៨–១១ ។ ចូរសុំឲ្យសិស្សក្នុងថ្នាក់ផ្ទៀងតាម រកមើលថា យ៉ូហានបានប្រាប់ឲ្យធ្វើអ្វីខ្លះជាមួយនឹងសៀវភៅនោះ ។
-
តើយ៉ូហានបានប្រាប់ឲ្យធ្វើអ្វីខ្លះជាមួយនឹងសៀវភៅនោះ ? តើវាមានរសជាតិយ៉ាងណាដែរ ?
ចូរអញ្ជើញសិស្សម្នាក់ឲ្យអាន គោលលទ្ធិ និង សេចក្ដីសញ្ញា ៧៧:១៤ឲ្យឮៗ ។ ចូរសុំឲ្យសិស្សក្នុងថ្នាក់ផ្ទៀងតាម រកមើលថាការបរិភោគសៀវភៅរបស់យ៉ូហានតំណាងឲ្យអ្វី ។
-
យោងតាមខគម្ពីរនេះ តើការបរិភោគសៀវភៅរបស់យ៉ូហានតំណាងឲ្យអ្វី ? ( ការទទួលយករបស់យ៉ូហាននូវបេសកកម្មរបស់លោកដើម្បីជួយ « ប្រមូលផ្ដុំពូជអំបូរនៃអ៊ីស្រាអែល » ហើយ « ស្ដាររឿងគ្រប់យ៉ាងឡើងវិញ » នៅថ្ងៃចុងក្រោយ ) ។
សូមចង្អុលបង្ហាញថា យ៉ូហានមានពរដោយសារលោកពុំបានស្លាប់ទេ ដើម្បីលោកអាចនាំយកបុគ្គលទាំងឡាយទៅកាន់ព្រះអង្គសង្គ្រោះ ( សូមមើល គ. និង ស. ៧:១–៤ ) ។
-
តើអ្វីទៅដែលយ៉ូហានអាចនឹងជួបនៅក្នុងការបំពេញបេសកកម្មរបស់លោក ដែលនឹងជាភាពផ្អែមល្ហែម ? តើអ្វីទៅអាចនឹងមានភាពជូរចត់ ?
វិវរណៈ ១១
យ៉ូហានឃើញព្យាការីពីររូបត្រូវបានសម្លាប់នៅយេរូសាឡិម និងការបន្លឺសំឡេងនៃត្រែទីប្រាំពីរ
សូមពន្យល់ថា វិវរណៈ ១១ ចាប់ផ្ដើមជាមួយនឹងការពិពណ៌នារបស់យ៉ូហានអំពីព្រឹត្តិការណ៍ដែលនឹងកើតមុនការបន្លឺសំឡេងនៃត្រែទីប្រាំពីរ និងការយាងមកជាលើកទីពីររបស់ព្រះយេស៊ូវគ្រីស្ទ ។ នៅពេលគ្រានេះ ជនទុច្ចរិតនឹងមានអំណាចច្រើន ហើយគ្រប់គ្រងលើផែនដី ហើយកងទ័ពមួយក្រុមនឹងខិតខំវាយលុកក្រុងយេរូសាឡិម ។
សូមអញ្ជើញសិស្សម្នាក់អាន វិវរណៈ ១១:៣–៦ ឲ្យឮៗ ។ សូមឲ្យសិស្សក្នុងថ្នាក់ផ្ទៀងតាម រកមើលថាតើសាក្សីពីរនាក់នឹងធ្វើអ្វីខ្លះ នៅក្នុងយេរូសាឡិមនៅគ្រានោះ ។
-
តើសាក្សីពីរនាក់នេះនឹងធ្វើអ្វីខ្លះ ?
-
តើឃ្លា « ភ្លើង [ នឹងចេញ ] ពីមាត់គេមក » អាចនឹងមានន័យយ៉ាងណា ? ( ខទី ៥ ) ។ ( ឃ្លានេះអាចជានិមិត្តសញ្ញាអំពីឥទ្ធិពលនៃទីបន្ទាល់ដែលពួកគេនឹងថ្លែង [ សូមមើល យេរេមា ៥:១៤, ២០:៩ ] ) ។
សូមអញ្ជើញសិស្សម្នាក់ឲ្យអាន គោលលទ្ធិ និង សេចក្ដីសញ្ញា ៧៧:១៥ ឲ្យឮៗ ។ ចូរសុំឲ្យសិស្សក្នុងថ្នាក់ផ្ទៀងតាម រកមើលថាសាក្សីពីរនាក់នោះនឹងជានរណា ។ សូមឲ្យសិស្សរាយការណ៍ពីអ្វី ដែលពួកគេរកឃើញ ។
សូមអញ្ជើញសិស្សម្នាក់អាន វិវរណៈ ១១:៧–១២ ឲ្យឮៗ ។ ចូរសុំឲ្យសិស្សក្នុងថ្នាក់ផ្ទៀងតាម រកមើលថាអ្វីនឹងកើតឡើងចំពោះពួកព្យាការីទាំងនេះបន្ទាប់ពីពួកលោកបញ្ចប់ការងារបម្រើរបស់លោកនៅក្នុងចំណោមពួកយូដា ។
-
តើជនទុច្ចរិតនឹងមានប្រតិកម្មបែបណា នៅពេលសាក្សីទាំងពីររូបនេះត្រូវបានគេសម្លាប់ ?
-
តើនឹងមានអ្វីកើតឡើងចំពោះសាក្សីទាំងពីររូបនេះ បន្ទាប់ពីស្លាប់បានបីថ្ងៃកន្លះមក ?
-
តើប្រជាជននោះនឹងមានប្រតិកម្មយ៉ាងណា នៅពេលសាក្សីទាំងពីររូបនោះរស់ពីស្លាប់វិញ ហើយត្រូវបាននាំទៅកាន់ស្ថានសួគ៌ ?
ចូរសុំឲ្យសិស្សម្នាក់អាន វិវរណៈ ១១:១៣–១៥ ឲ្យឮៗ ។ ចូរសុំឲ្យសិស្សក្នុងថ្នាក់ផ្ទៀងតាម រកមើលថានឹងមានអ្វីកើតឡើងពីមុន និងនៅពេលត្រែទីប្រាំពីរត្រូវបានបន្លឺសំឡេងឡើង ។ សូមអញ្ជើញសិស្សឲ្យសរសេរអ្វីដែលពួកគេរកឃើញនៅលើក្រដាសរបស់ពួកគេក្បែរត្រែទីប្រាំពីរ ។
-
បន្ទាប់ការបន្លឺសំឡេងនៃត្រែទីប្រាំពីរ តើនរណានឹងគ្រង « នគរទាំងប៉ុន្មាននៅលោកីយ៍នេះ » ? ( ខទី ១៥ ) ។
សូមសង្ខេប វិវរណៈ ១១:១៦–១៩ ដោយពន្យល់ថា មានពួកអែលឌើរ ២៤ នាក់បានថ្លែងអំណរគុណ ហើយសរសើរព្រះដែលបានប្រទានរង្វាន់ដល់មនុស្សសុចរិត ហើយដាក់ទោសដល់ជនទុច្ចរិត ។ យ៉ូហានក៏បានឃើញនៅក្នុងការនិមិត្តផងដែរ អំពីព្រះវិហារបរិសុទ្ធនៃព្រះនៅស្ថានសួគ៌ និងហឹបនៃសេចក្ដីសញ្ញាដែលតំណាងឲ្យវត្តមានរបស់ព្រះ ។
សូមបញ្ចប់មេរៀននៅថ្ងៃនេះដោយចែកចាយអារម្មណ៍របស់អ្នកផ្ទាល់អំពីអំណរគុណ ហើយសរសើរចំពោះព្រះសម្រាប់សេចក្ដីល្អ និងយុត្តិធម៌របស់ទ្រង់ ។
សេចក្តីពន្យល់ និង ព័ត៌មានសាច់រឿង
វិវរណៈ ៨–១១ ។ សេចក្ដីអធិប្បាយបន្ថែម
សម្រាប់ព័ត៌មានបន្ថែមស្ដីពីមាតិកានៃ វិវរណៈ ៨–១១ សូមមើលសេចក្ដីអធិប្បាយសម្រាប់ជំពូកទាំងនេះដែលមាននៅក្នុង New Testament Student Manual ( Church Educational System manual ឆ្នាំ ២០១៤ ) ទំព័រ ៥៤៥–៤៩ ។
វិវរណៈ ១០:១–៣, ៨–១១ ។ ក្រាំងតូចដែលយ៉ូហានបានប្រទានឲ្យបរិភោគ
អែលឌើរ ប្រ៊ូស អ័រ ម៉ាក់ខន់ឃី ក្នុងកូរ៉ុមនៃពួកសាវកដប់ពីរនាក់បានបង្រៀន ៖
« ទង្វើរបស់យ៉ូហាននៃការបរិភោគក្រាំងមួយដែលមាននូវបន្ទូលព្រះចំពោះលោក វាគឺជាការគោរពតាមប្រពៃណី និងទំនៀមទម្លាប់ពីបុរាណរបស់អ៊ីស្រាអែល ។ ទង្វើនោះបានបង្ហាញយ៉ាងសំខាន់ថា លោកកំពុងបរិភោគនូវនំប៉័ងនៃជីវិត ថាលោកកំពុងទទួលទាននៃបន្ទូលល្អរបស់ព្រះ ថាលោកកំពុងទទួលទានបន្ទូលរបស់ព្រះគ្រីស្ទ—ដែល ‹ មានភាពផ្អែមល្ហែមដូចជាទឹកឃ្មុំនៅក្នុងមាត់របស់លោក › ។ ប៉ុន្តែវា ‹ ពោះរបស់លោកឈឺ › នោះគឺជាការកាត់សេចក្ដី និងការញាំញីដែលបានសន្យាចំពោះជនដែលបន្ទូលរបស់ព្រះអម្ចាស់ត្រូវបានបញ្ជូនទៅ ហើយធ្វើឲ្យលោកអស់សង្ឃឹម និងមានភាពសោកសៅក្នុងព្រលឹង » ( Doctrinal New Testament Commentary វ៉ុលទី ៣ [ ឆ្នាំ១៩៦៥–៧៣ ] ៣:៥០៧ ) ។
« ក្រាំងនោះ ‹ ផ្អែមដូចទឹកឃ្មុំ › នៅក្នុងមាត់របស់យ៉ូហាន ប៉ុន្តែ ‹ ល្វីង › នៅក្នុងពោះរបស់លោក ( វិវរណៈ ១០:១០ ) អាចនឹងប្រាប់ថា បេសកកម្មរបស់លោកនឹងទាក់ទងជាមួយបទពិសោធន៍ផ្អែមល្ហែម ហើយរីករាយជាច្រើន ប៉ុន្តែក៏មានបទពិសោធន៍នៃការបដិសេធ និងឈឺចាប់ផងដែរ ( សូមមើលផងដែរ ទំនុកដំកើង ១១៩:១០៣ ) » ( New Testament Student Manual [ Church Educational System manual ឆ្នាំ ២០១៤ ] ទំព័រ ៥៤៨ ) ។