មេរៀនទី ១៤៩
យ៉ូហានទី ២–យ៉ូហានទី៣
សេចក្តីផ្តើម
យ៉ូហានបានព្រមានពួកបរិសុទ្ធអំពីមនុស្សដែលបោកបញ្ឆោត និងប្រកាសថា ព្រះយេស៊ូវគ្រីស្ទពុំបានយាងមកក្នុងរូបកាយនោះទេ ។ លោកក៏បានសរសើរកៃយុសចំពោះសេចក្ដីស្មោះត្រង់របស់គាត់ ។
កំណត់ចំណាំ ៖ មេរៀននេះរួមមាននូវយោបល់សម្រាប់ការបង្រៀនមួយនៃយ៉ូហានទី៣ ដែលតម្រូវឲ្យសិស្សទទួលសំបុត្រមកពីឪពុកម្ដាយ ឬថ្នាក់ដឹកនាំសាសនាចក្រ ។ ប្រសិនបើអ្នកជ្រើសប្រើយោបល់សម្រាប់ការបង្រៀននេះ អ្នកនឹងត្រូវរៀបចំបីបួនថ្ងៃទុកជាមុន ។ សូមអញ្ជើញឪពុកម្ដាយ ឬប្រសិនបើចាំបាច់ ថ្នាក់ដឹកនាំសាសនាចក្រក្នុងមូលដ្ឋានរបស់សិស្សម្នាក់ៗឲ្យសរសេរសំបុត្រខ្លីមួយដល់សិស្សដោយបង្ហាញអំណរ ដែលពួកគាត់ធ្លាប់មាន នៅពេលពួកគាត់បានឃើញការខិតខំរបស់សិស្សដើម្បីរស់នៅតាមដំណឹងល្អ ។ សូមប្រាកដថា អ្នកមានសំបុត្រមួយសម្រាប់សិស្សម្នាក់ៗមកពីឪពុកម្ដាយ ឬថ្នាក់ដឹកនាំសាសនាចក្ររបស់ពួកគេនៅថ្ងៃដែលអ្នកបង្រៀនមេរៀននេះ ។
យោបល់សម្រាប់ការបង្រៀន
យ៉ូហាន ទី២
យ៉ូហាន ព្រមានអំពីមនុស្សដែលបង្រៀនគោលលទ្ធិខុសឆ្គង
សូមប្រាប់ឈ្មោះអត្តពលករដ៏ល្បីល្បាញម្នាក់ ដែលសិស្សភាគច្រើនស្គាល់ ។
-
តើអត្តពលកររូបនេះអាចធ្វើអ្វីខ្លះ ដើម្បីបន្តមានសុខភាពល្អដើម្បីធ្វើការប្រកួតឲ្យកាន់តែល្អនោះ ?
-
តើអ្វីអាចកើតឡើង ប្រសិនបើអត្តពលករម្នាក់នេះឈប់ទៅកន្លែងហាត់ប្រាណ ហើយចាប់ផ្ដើមបរិភោគអាហារមិនល្អ មើលទូរទស្សន៍យូរៗ លេងវីដេអូហ្គេម និងប្រើគ្រឿងញៀន ដែលប៉ះពាល់ដល់រាងកាយ បន្ទាប់ពីការខិតខំធ្វើឲ្យរូបកាយបានរឹងមាំមកនោះ ?
សូមអញ្ជើញ សិស្សឲ្យពិចារណាពីរបៀបដែលអត្តពលករដ៏ជោគជ័យនោះត្រូវធ្វើកិច្ចការ ដើម្បីរក្សារូបកាយឲ្យមាំមួនអាចប្រៀបបាននឹងកិច្ចការ ដែលសមាជិកសាសនាចក្រត្រូវធ្វើដើម្បីរក្សាពរជ័យនានាដែលពួកគេបានទទួលតាមរយៈដំណឹងល្អដែរ ។ នៅពេលពួកគេសិក្សា យ៉ូហានទី ២ សូមអញ្ជើញពួកគេឲ្យរកមើលគោលការណ៍មួយ ដែលអាចជួយពួកគេឲ្យរក្សាពរជ័យដែលពួកគេបានទទួលក្នុងនាមជាសមាជិកសាសនាចក្រ ។
សូមសង្ខេប យ៉ូហានទី២ ១:១–៤ ដោយពន្យល់ថា សាវកយ៉ូហានបានចាប់ផ្ដើមសរសេរសំបុត្ររបស់លោកដោយលើកឡើងអំពី « លោកស្រីរើសតាំង និងកូនចៅរបស់លោកស្រី » ដែលជាការលើកឡើងដោយផ្ទាល់ទៅកាន់សមាជិកស្ត្រីម្នាក់ក្នុងសាសនាចក្រ និងកូនចៅរបស់គាត់ ឬ ជាភាសាតំណាង ដើម្បីពិពណ៌នាពីក្រុមជំនុំមួយក្នុងសាសនាចក្រ ។
សូមអញ្ជើញសិស្សម្នាក់អាន យ៉ូហានទី២ ១:៥–៦ឲ្យឮៗ ។ សូមឲ្យសិស្សក្នុងថ្នាក់ផ្ទៀងតាមរកមើលបទបញ្ញត្តិ ដែលយ៉ូហានបានរំឭកដល់ពួកបរិសុទ្ធ ។
-
តើបទបញ្ញត្តិអ្វីទៅដែលយ៉ូហានបានរំឭកដល់ពួកបរិសុទ្ធ ?
សូមអញ្ជើញសិស្សម្នាក់អាន យ៉ូហានទី២ ១:៧ ឲ្យឮៗ ។ សូមឲ្យសិស្សក្នុងថ្នាក់ផ្ទៀងតាមរកមើលហេតុផលដែលយ៉ូហានបានទូន្មានសមាជិកសាសនាចក្រឲ្យ « ប្រព្រឹត្តតាម » ( យ៉ូហានទី ២ ១:៦ ) ឬប្រតិបត្តិតាមបទបញ្ញត្តិនោះ ។
-
ហេតុអ្វីយ៉ូហានទូន្មានឲ្យសមាជិកសាសនាចក្រប្រតិបត្តិតាមបទបញ្ញត្តិ ?
-
តើ « អ្នកប្រវ័ញ្ចបញ្ឆោត » ( ខទី ៧ ) កំពុងបង្រៀនអំពីអ្វីខ្លះ ?
សូមពន្យល់ថា នៅពេលយ៉ូហានសរសេរសំបុត្រនេះ មានទស្សនវិទូខាងដូសេតម្នាក់កំពុងទទួលបានប្រជាប្រិយភាព ។ ពួកដូសេតបានជឿថា ព្រះត្រូវបានលើកតម្កើងយ៉ាងខ្ពស់ រហូតដល់ទ្រង់លែងរងទុក្ខ លែងសុគត ឬលែងមានបទពិសោធន៍នៃជីវិតរមែងស្លាប់ផ្សេងទៀត ។ ហេតុដូច្នេះហើយ ពួកគេបានសន្មតថា ព្រះយេស៊ូវគ្រីស្ទក្នុងនាមជាបុត្រានៃព្រះពុំបានយាងមកក្នុងសាច់ឈាមទេ ប៉ុន្តែមានតែវិញ្ញាណរបស់ទ្រង់ប៉ុណ្ណោះ ទំនង ជាធ្វើកិច្ចការដែលមនុស្សនឹងធ្វើ ឬដកពិសោធន៍ ។
-
តើអ្វីទៅជាគំរូមួយចំនួននៃការបង្រៀនខុសឆ្គងនៅជំនាន់របស់យើងដែលផ្ទុយពីសេចក្ដីពិតនៃដំណឹងល្អ ?
-
ហេតុអ្វីការបង្រៀនទាំងនេះមានគ្រោះថ្នាក់ខាងវិញ្ញាណ ?
សូមអញ្ជើញសិស្សម្នាក់អាន យ៉ូហានទី២ ១:៨ ឲ្យឮៗ ។ សូមឲ្យសិស្សក្នុងថ្នាក់ផ្ទៀងតាមរកមើលថា យ៉ូហានបានដាស់តឿនឲ្យសមាជិកសាសនាចក្រធ្វើអ្វីខ្លះ នៅក្នុងពន្លឺនៃការបង្រៀនខុសឆ្គងទាំងនេះ ។ សូមពន្យល់ថា ឃ្លា « ត្រូវឲ្យអ្នករាល់គ្នាប្រយ័ត្ន » មានន័យថា ឲ្យប្រយ័ត្នប្រយែងខ្លួនកុំឲ្យសម្របតាមការបង្រៀនខុសឆ្គង ហើយពាក្យ បានធ្វើ អាចមានន័យថាបានអនុវត្ត ឬទទួល ។
-
តើយើងអាចរៀនគោលការណ៍អ្វីខ្លះមកពីការបង្រៀនរបស់យ៉ូហាននៅក្នុង ខទី ៦–៨ អំពីរបៀបដែលយើងអាចបន្តរីករាយនឹងពរជ័យនៃដំណឹងល្អដែលយើងបានទទួល ? ( ដោយប្រើពាក្យសម្ដីរបស់ពួកគេផ្ទាល់ សិស្សគួរស្គាល់គោលការណ៍មួយដែលស្រដៀងគ្នានឹងគោលការណ៍ដូចតទៅ ៖ នៅពេលយើងគោរពបទបញ្ញត្តិ ហើយប្រុងប្រយ័ត្ន នោះយើងអាចបន្តរីករាយនឹងពរជ័យនៃដំណឹងល្អដែលយើងធ្លាប់ទទួលបាន ។ សូមសរសេរគោលការណ៍នេះនៅលើក្ដារខៀន ) ។
សូមអញ្ជើញសិស្សឲ្យសរសេរជាបញ្ជីមួយអំពីពរជ័យនៃដំណឹងល្អ ដែលពួកគេបានទទួលរួចហើយ ឬសង្ឃឹមថានឹងបានទទួលនៅក្នុងសៀវភៅសរសេរ ឬសៀវភៅកំណត់ត្រាការសិក្សាព្រះគម្ពីររបស់ពួកគេ ។ សូមអញ្ជើញពួកគេឲ្យចែកចាយអ្វី ដែលពួកគេបានសរសេរជាមួយសិស្សនៅក្នុងថ្នាក់ ។ សូមសរសេរចម្លើយរបស់ពួកគេនៅលើក្តារខៀន ។
-
តើការសម្របតាមការបង្រៀនខុសឆ្គងអាចរារាំងយើងមិនឲ្យទទួលបាន និងបន្តរីករាយនឹងពរជ័យនៃដំណឹងល្អទាំងនេះយ៉ាងដូចម្ដេច ?
សូមអញ្ជើញសិស្សម្នាក់អាន យ៉ូហានទី២ ១:៩ ឲ្យឮៗ ។ សូមឲ្យសិស្សក្នុងថ្នាក់ផ្ទៀងតាមរកមើលថាអ្វីទៅដែលយ៉ូហានបានបង្រៀនថានឹងកើតឡើងចំពោះជនដែលរស់នៅតាមគោលលទ្ធិរបស់ព្រះគ្រីស្ទ ឬបន្តនៅជិត ហើយស៊ូទ្រាំនៅក្នុងដំណឹងល្អ ។
-
តើជនដែលរស់នៅតាមគោលលទ្ធិនៃព្រះគ្រីស្ទនឹងទទួលបានអ្វីខ្លះ ? ( បន្ទាប់ពីសិស្សឆ្លើយតបរួច ចូរសរសេរគោលការណ៍ដូចតទៅនេះនៅលើក្ដារខៀន ៖ ប្រសិនបើយើងរស់នៅតាមគោលលទ្ធិរបស់ព្រះគ្រីស្ទ យើងនឹងមានព្រះវរបិតា និងព្រះរាជបុត្រាគង់នៅជាមួយនឹងយើង ) ។
សូមចង្អុលបង្ហាញថា វិធីមួយដែលយើងមានព្រះវរបិតា និងព្រះរាជបុត្រាគង់នៅជាមួយនឹងយើង គឺតាមរយៈគូកននៃព្រះវិញ្ញាណបរិសុទ្ធ ។
សូមឲ្យសិស្សសញ្ជឹងគិតពីការខិតខំរបស់ពួកគេ ដើម្បីគោរពតាមបទបញ្ញត្តិ មានការប្រុងប្រយ័ត្ន ហើយរស់នៅតាមដំណឹងល្អ ។ សូមអញ្ជើញពួកគេឲ្យសរសេរនូវហេតុផល ដែលពួកគេចង់រក្សាពរជ័យដែលពួកគេបានទទួលតាមរយៈដំណឹងល្អ និងកិច្ចការមួយដែលពួកគេនឹងធ្វើថ្ងៃនេះ ដើម្បីមានភាពស្មោះត្រង់ និងភាពទៀងទាត់កាន់តែច្រើននៅក្នុងការគោរពតាមបទបញ្ញត្តិ ។
សូមសង្ខេប យ៉ូហានទី ២ ១:១០–១៣ ដោយពន្យល់ថា យ៉ូហានបានលើកទឹកចិត្តពួកបរិសុទ្ធឲ្យចៀសវាងពីមនុស្សដែលប្រកាសគោលលទ្ធិក្លែងក្លាយ ។ លោកក៏បានបង្ហាញអំពីបំណងប្រាថ្នារបស់លោក ដើម្បីទៅសួរសុខទុក្ខដោយផ្ទាល់ដល់ពួកបរិសុទ្ធដែលលោកបានសរសេរសំបុត្រទៅដែរ ។
យ៉ូហានទី៣
លោកបានសរសើរកៃយុសចំពោះសេចក្ដីស្មោះត្រង់របស់គាត់
សូមយកដុំក្រួសតូចមួយ និងចានសម្លធំមួយ ដែលមានទឹកពេញមកថ្នាក់រៀន ។ សូមឲ្យសិស្សម្នាក់ទម្លាក់ដុំក្រួសនោះចូលទៅក្នុងទឹកដោយកុំធ្វើឲ្យវារង្គើ ។
-
ហេតុអ្វីវាជារឿងដ៏សំខាន់ ដើម្បីកុំឲ្យក្រួសនោះធ្វើឲ្យទឹករង្គើ ?
-
ក្រៅពីខ្លួនអ្នកទៅ តើមានមនុស្សណាផ្សេងទៀត ដែលអាចរងឥទ្ធិពលវិជ្ជមានតាមរយៈការជ្រើសរើសរបស់អ្នកដើម្បីរស់នៅតាមដំណឹងល្អនោះឬទេ ?
សូមពន្យល់ថា ដូចដែលបានកត់ត្រានៅក្នុង យ៉ូហានទី ៣ យ៉ូហានបានលើកឡើងអំពីសមាជិកសាសនាចក្រដ៏ស្មោះត្រង់ម្នាក់ឈ្មោះ កៃយុស ។
សូមអញ្ជើញសិស្សម្នាក់អាន យ៉ូហានទី៣ ១:១–៤ឲ្យឮៗ ។ ចូរឲ្យសិស្សក្នុងថ្នាក់ផ្ទៀងតាមរកមើលរបៀប ដែលយ៉ូហានបានរងឥទ្ធិពលពីកៃយុសតាមរយៈសេចក្ដីស្មោះត្រង់របស់គាត់ក្នុងការរស់នៅតាមដំណឹងល្អ ។ សូមពន្យល់ថា ពួកកូន នៅក្នុង ខទី ៤ អាចនឹងសំដៅទៅលើសមាជិកសាសនាចក្រដែលយ៉ូហានបានជួយឲ្យប្រែចិត្តជឿលើដំណឹងល្អ ។
-
តើយ៉ូហានបានរងឥទ្ធិពលពីកៃយុស តាមរយៈសេចក្ដីស្មោះត្រង់របស់គាត់ក្នុងការរស់នៅតាមដំណឹងល្អយ៉ាងដូចម្ដេចខ្លះ ?
-
តើអ្នកនឹងសង្ខេបសេចក្ដីពិតមួយ នៅក្នុងខគម្ពីរទាំងនេះអំពីរបៀបដែលការរស់នៅតាមដំណឹងល្អអាចជះឥទ្ធិពលដល់ខ្លួនយើង និងមនុស្សដទៃទៀតយ៉ាងដូចម្ដេច ? ( សិស្សអាចនឹងរកឃើញសេចក្ដីពិត ខុសគ្នាមួយ ប៉ុន្តែត្រូវប្រាកដថា ពួកគេស្គាល់សេចក្ដីពិតមួយដែលស្រដៀងគ្នានឹងសេចក្ដីពិតដូចតទៅនេះ ៖ ការរស់នៅតាមដំណឹងល្អនាំមកនូវអំណរ មិនត្រឹមតែចំពោះខ្លួនយើងប៉ុណ្ណោះទេ ប៉ុន្តែដល់មនុស្សដទៃផងដែរ ) ។
-
តើអ្នកធ្លាប់ដកពិសោធន៍នូវអំណរ ដោយសារមនុស្សម្នាក់ផ្សេងទៀតបានរស់នៅតាមដំណឹងល្អដោយស្មោះត្រង់នៅពេលណាដែរ ?
ដើម្បីបង្ហាញបន្ថែមទៀតអំពីសេចក្ដីពិតនេះ ប្រសិនបើអ្នកជ្រើសឲ្យមានឪពុកម្ដាយ ឬថ្នាក់ដឹកនាំសាសនាចក្រសរសេរសំបុត្រដល់សិស្ស សូមចែកសំបុត្រទាំងនោះនៅពេលនេះ ។ សូមធ្វើឲ្យប្រាកដថា សិស្សម្នាក់ៗ មានសំបុត្រមួយមកពីឪពុកម្ដាយ ឬថ្នាក់ដឹកនាំសាសនាចក្ររបស់គាត់ ហើយអនុញ្ញាតឲ្យសិស្សមានពេលអានសំបុត្រនោះ ។
សូមសង្ខេប យ៉ូហានទី ៣ ១:៥–១៤ ដោយពន្យល់ថា យ៉ូហានបានសរសើរកៃយុស ចំពោះឆន្ទៈរបស់គាត់ដើម្បីទទួលថ្នាក់ដឹកនាំសាសនាចក្រ ឬពួកអ្នកផ្សព្វផ្សាយដែលបានធ្វើដំណើរ ហើយគាត់បានរិះគន់ដល់ថ្នាក់ដឹកនាំក្នុងមូលដ្ឋានម្នាក់ឈ្មោះ ឌីអូត្រេព ដែលពុំបានទទួលយ៉ូហាន និងដៃគូរបស់លោកទេ ។
សូមរំឭកឡើងវិញនូវសេចក្ដីពិតដែលបានបង្ហាញនៅក្នុងមេរៀននេះ ។ សូមថ្លែងទីបន្ទាល់អំពីសេចក្ដីពិតទាំងនេះ ហើយអញ្ជើញសិស្សឲ្យអនុវត្តវានៅក្នុងជីវិតរបស់ពួកគេ ។
សេចក្តីពន្យល់ និង ព័ត៌មានសាច់រឿង
យ៉ូហានទី២ ១:១–៥ ។ « លោកស្រីរើសតាំង »
« យ៉ូហានបានពិពណ៌នាខ្លួនលោកជា ‹ អ្នកចាស់ទុំ › ‹ លោកស្រីរើសតាំង › ដែលលោកសរសេរសំបុត្រទៅ ( សូមមើល យ៉ូហានទី២ ១:១ ) គឺតំណាងឲ្យសាខាមួយក្នុងសាសនាចក្រ ឬជាតំណាងសមាជិកម្នាក់ដែលជាស្ត្រី ប្រហែលជាភរិយាលោកក៏ថាបាន ។ នៅគ្រាកាន់កាប់ត្រួតត្រារបស់យើង អិមម៉ា ស៊្មីធ ភរិយារបស់ព្យាការីយ៉ូសែប ស្ម៊ីធ ត្រូវបានគេថាជា ‹ ស្ត្រីរើសតាំង › ( គ. និង ស. ២៥:៣ ) ។ យ៉ូហានមានចិត្តរីករាយដែលលោកបានរកឃើញពួកកូននៃលោកស្រីរើសតាំងកំពុងដើរនៅក្នុងសេចក្ដីពិត និងកំពុងដើរតាមដំណឹងល្អនៃព្រះយេស៊ូវគ្រីស្ទ » ( New Testament Student Manual [ Church Educational System manual ឆ្នាំ ២០១៤ ] ទំព័រ ៥១៩ ) ។
យ៉ូហានទី៣ ១:៩–១០ ។ « អ្នកឌីអូត្រេពដែលចូលចិត្តចង់ធ្វើធំក្នុងពួកនោះ គាត់មិនទទួលយើងទេ »
អែលឌើរ ប្រ៊ូស អ័រ ម៉ាក់ខន់ឃី ក្នុងកូរ៉ុមនៃពួកសាវកដប់ពីរនាក់បានពន្យល់ប្រាប់ថា ឌីអូត្រេពជានរណា ហើយគាត់បានធ្វើអ្វីខ្លះ ៖
« ឌីអូត្រេពគឺជាអ្នកដឹកនាំក្នុងមូលដ្ឋានម្នាក់ដែលមានកេរ្តិ៍ឈ្មោះ និងឥទ្ធិពល ៖ (១) ដែលមិនព្រមឲ្យគោលលទ្ធិ និងសេចក្ដីណែនាំមកពីសមាជិកមួយរូបក្នុងគណៈប្រធានទីមួយត្រូវបានអាននៅក្នុងក្រុមជំនុំរបស់គាត់ (២) ដែលប្រកាសជំទាស់នឹងព្យាការី (៣) ដែលមិនព្រមទទួលអ្នកតំណាងរបស់សាសនាចក្រដែលត្រូវបានបញ្ជូនឲ្យជួបនឹងគាត់ (៤) ដែលមិនព្រមឲ្យមនុស្សដទៃនៅក្នុងក្រុមជំនុំមើលថែ ឬស្ដាប់ដល់ពួកអ្នកមានសិទ្ធិអំណាចរបស់សាសនាចក្រ និង (៥) ដែលបានបណ្ដេញចេញ ( ត្រូវបានកាត់កាលចេញ ) សមាជិកសាសនាចក្រដែលសក្ដិសម » ( Doctrinal New Testament Commentary វ៉ុលទី ៣ [ ឆ្នាំ ១៩៦៥–៧៣ ] ៣:៤១៣–១៤ ) ។