សេចក្ដីផ្ដើមនៃសំបុត្រទីបីរបស់យ៉ូហាន
ហេតុអ្វីត្រូវសិក្សាគម្ពីរនេះ ?
នៅក្នុងសំបុត្រខ្លីនេះ យ៉ូហានបានសរសើរដល់កៃយុស ជាសមាជិកសាសនាចក្រម្នាក់ ដែលមានភក្ដីភាពក្នុងអំឡុងពេលនៃការបះបោរប្រឆាំងមួយទាស់នឹងថ្នាក់ដឹកនាំសាសនាចក្រ ។ ការបង្រៀនរបស់យ៉ូហានអាចជួយសិស្សឲ្យយល់កាន់តែប្រសើរឡើងពីការក្បត់សាសនា ដែលបានកើតឡើងក្នុងសាសនាចក្រនៅជំនាន់ព្រះគម្ពីរសញ្ញាថ្មី ហើយអាចបំផុសគំនិតពួកគេឲ្យបន្តស្មោះត្រង់ចំពោះថ្នាក់ដឹកនាំសាសនាចក្រ មិនថាមានការបដិសេធជំទាស់បែបណានោះទេ ។
តើនរណាជាអ្នកសរសេរគម្ពីរនេះ ?
អ្នកនិពន្ធបានបង្ហាញខ្លួនលោកថាជា « អ្នកចាស់ទុំ » ( យ៉ូហានទី៣ ១:១ ) ហើយតាមទម្លាប់ត្រូវបានស្គាល់ថាជាសាវកយ៉ូហាន ។
តើគម្ពីរនេះត្រូវបានសរសេរនៅពេលណា និង នៅកន្លែងណា ?
គ្មាននរណាម្នាក់ដឹកពិតប្រាកដអំពីពេលវេលា និងទីកន្លែងដែលគម្ពីរយ៉ូហានទី ៣ ត្រូវសរសេរឡើងនោះទេ ។
ប្រសិនបើទម្លាប់នៃការស្នាក់នៅដ៏យូររបស់យ៉ូហាននៅអេភេសូរត្រឹមត្រូវ នោះលោកអាចសរសេរសំបុត្រនេះនៅទីនោះនៅចន្លោះ គ.ស. ៧០ និង ១០០ ។
តើគម្ពីរនេះត្រូវបានសរសេរឡើងសម្រាប់នរណា ហើយតើហេតុអ្វីដែរ ?
សំបុត្រទីបីរបស់យ៉ូហានត្រូវបានសរសេរទៅកៃយុស ជាសមាជិកសាសនាចក្រម្នាក់ដែលយ៉ូហានបានសរសើរ ដោយសារគាត់បានបង្ហាញភក្ដីភាពស្មោះស្ម័គ្រចំពោះបុព្វហេតុនៃព្រះគ្រីស្ទ ដោយផ្ដល់ការស្នាក់នៅដល់ពួកអ្នកបម្រើរបស់ព្រះ ពេលពួកគាត់ធ្វើដំណើរ ( សូមមើល យ៉ូហានទី៣ ១:៥–៨ ) ។
យ៉ូហានក៏បានព្រមានដល់កៃយុសផងដែរអំពីមនុស្សម្នាក់ដែលមានឈ្មោះ ឌីអូត្រេព ជាអ្នកដែលមានតួនាទីជាថ្នាក់ដឹកនាំម្នាក់ក្នុងមូលដ្ឋានរបស់សាសនាចក្រ ។ ឌីអូត្រេពបានបដិសេធយ៉ូហាន និងថ្នាក់ដឹកនាំផ្សេងទៀតរបស់សាសនាចក្រដោយបើកចំហ ហើយថែមទាំងរារាំងសមាជិកសាសនាចក្រក្នុងមូលដ្ឋានដែលបានប្រាថ្នាចង់ទទួលពួកគាត់មិនឲ្យចូលរួមការប្រជុំសាសនាចក្រ ( សូមមើល យ៉ូហានទី៣ ១:៩–១០ ) ។ យ៉ូហានបានលើកទឹកចិត្តកៃយុសឲ្យបន្តធ្វើសេចក្ដីល្អ ហើយថ្លែងថា លោករំពឹងទុកថា លោកនឹងទៅលេងនឹងកៃយុសឆាប់ៗនេះ ( សូមមើល យ៉ូហានទី៣ ១:១១–១៤ ) ។
តើគម្ពីរនេះមានលក្ខណៈពិសេសអ្វីខ្លះ ?
នៅក្នុងយ៉ូហានទី៣ យើងឃើញនូវកង្វល់របស់យ៉ូហានស្ដីពីឥទ្ធិពលនៃការក្បត់សាសនានៅក្នុងសាសនាចក្រ ។ យើងក៏ឃើញផងដែរពីសេចក្ដីស្រឡាញ់របស់យ៉ូហានចំពោះមនុស្សដទៃទៀត និងអំណរដែលលោកមានចំពោះជនដែលជ្រើសយកជីវិតនៃការគោរពប្រតិបត្តិ ( សូមមើល យ៉ូហានទី៣ ១:៤ ) ។
គម្រោង
យ៉ូហានទី៣ ១ យ៉ូហានសរសើរកៃយុសចំពោះសេចក្ដីស្មោះត្រង់របស់គាត់ ហើយបានព្រមានប្រឆាំងថ្នាក់ដឹកនាំម្នាក់ដែលបានបដិសេធយ៉ូហាន និងថ្នាក់ដឹកនាំដទៃទៀតរបស់សាសនាចក្រ ។