មេរៀនទី ១
សេចក្ដីផ្ដើមអំពីព្រះគម្ពីរសញ្ញាថ្មី
សេចក្ដីផ្ដើម
ព្រះគម្ពីរសញ្ញាថ្មី គឺជាកំណត់ត្រាដ៏សំខាន់មួយអំពីជីវិតរមែងស្លាប់ ការបង្រៀន និង ដង្វាយធួនរបស់ព្រះយេស៊ូវគ្រីស្ទ ការស្ថាបនាសាសនាចក្ររបស់ទ្រង់ ហើយនិងការបម្រើនៃពួកសិស្សរបស់ទ្រង់កាលពីបុរាណ នៅពេលទ្រង់បានបន្តដឹកនាំពួកគេ បន្ទាប់ពីការយាងត្រឡប់ទៅស្ថានសួគ៌វិញរបស់ទ្រង់ ។ មេរៀននេះមានគោលបំណងរៀបចំខ្លួន ហើយលើកទឹកចិត្តសិស្សឲ្យសិក្សាព្រះគម្ពីរសញ្ញាថ្មី ដោយណែនាំពួកគេឲ្យស្គាល់ពីមូលបទសំខាន់ពីរដែលមាននៅក្នុងការបង្រៀនរបស់ព្រះយេស៊ូវគ្រីស្ទ និងពួកសាវករបស់ទ្រង់កាលពីបុរាណ ៖ ការអញ្ជើញម្ដងហើយម្ដងទៀតរបស់ព្រះអង្គសង្គ្រោះឲ្យមករកទ្រង់ និង ទំនួលខុសត្រូវនៃពួកសិស្សរបស់ទ្រង់ដើម្បីជួយមនុស្សដទៃទៀតឲ្យធ្វើរឿងដូចគ្នា ។
យោបល់សម្រាប់ការបង្រៀន
ព្រះគម្ពីរសញ្ញាថ្មីជួយយើងឲ្យមករកព្រះយេស៊ូវគ្រីស្ទ
សូមសរសេរសំណួរខាងក្រោមនេះ នៅលើក្ដារខៀនពីមុនចាប់ផ្ដើមបង្រៀន ៖ តើបន្ទុកដ៏លំបាកមួយចំនួនដែលយុវវ័យជួបនៅក្នុងសម័យយើងនេះមានអ្វីខ្លះ ?
សូមយកប្រអប់ទទេរ ឬកាបូបស្ពាយមួយ ព្រមទាំងរបស់ធ្ងន់ៗដើម្បីដាក់នៅក្នុងប្រអប់ ឬកាបូបនោះដូចជា ដុំថ្ម ឬសៀវភៅទៅថ្នាក់រៀន ។ សូមអញ្ជើញសិស្សម្នាក់ឲ្យមកខាងមុខក្ដារខៀន ហើយឲ្យគាត់កាន់ប្រអប់ទទេរ ឬស្ពាយកាបូបនោះ ។ ចូរសុំឲ្យសិស្សផ្សេងទៀតឆ្លើយនឹងសំណួរដែលមាននៅលើក្ដារខៀន ហើយសុំឲ្យសិស្សម្នាក់ទៀតឡើងមកសរសេរចម្លើយរបស់សិស្សនោះ នៅលើក្ដារខៀន ។ បន្ទាប់ពីទទួលបានចម្លើយនីមួយៗ សូមដាក់របស់ធ្ងន់មួយនៅក្នុងប្រអប់ ឬកាបូបនោះរហូតដល់វាពេញ ។
-
តើអ្នកមានអារម្មណ៍បែបណាដែរ ប្រសិនបើអ្នកត្រូវទ្របន្ទុកនេះពេញមួយថ្ងៃ ?
សុំឲ្យសិស្សពន្យល់ពីការប្រឈម ឬការលំបាកនានាដែលបន្ទុកមួយចំនួន ដែលបានសរសេរនៅលើក្ដារខៀនអាចបង្កដល់មនុស្សម្នាក់ ។
សូមពន្យល់ថា ព្រះគម្ពីរសញ្ញាថ្មីបង្រៀនយើងអំពីការបម្រើនៅក្នុងជីវិតរមែងស្លាប់ និង ក្រោយការមានព្រះជន្មរស់ឡើងវិញរបស់ព្រះយេស៊ូវគ្រីស្ទ រួមបញ្ចូលទាំងការបង្រៀន អព្ភូតហេតុ ពលិកម្មធួន និងការយាងរបស់ទ្រង់ទៅជួបនឹងពួកសិស្សនៃសាសនាចក្រកាលពីបុរាណ ។ តាមរយៈការបង្រៀនទាំងឡាយ និងទំនាក់ទំនងរបស់ទ្រង់ជាមួយមនុស្សដទៃទៀតនោះវាគឺជាសេចក្ដីពិតមួយដែលបានលើកឡើងម្ដងហើយម្ដងទៀត ដែលអាចជួយយើងសម្រាលបន្ទុកដែលយើងមាន ។
សូមពន្យល់ថា ម៉ាថាយ ១១ មានដាក់បញ្ចូលនូវឧទាហរណ៍មួយនៃបាវចនាដ៏សំខាន់នេះដែលសិស្សនឹងឃើញជារឿយៗនៅក្នុងការសិក្សារបស់ពួកគេអំពីព្រះគម្ពីរសញ្ញាថ្មីនាឆ្នាំនេះ ។ សូមអញ្ជើញសិស្សម្នាក់អាន ម៉ាថាយ ១១:២៨ ឲ្យឮៗ ។ សុំឲ្យសិស្សផ្សេងទៀតផ្ទៀងតាម ដោយរកមើលការអញ្ជើញរបស់ព្រះអង្គសង្គ្រោះទៅកាន់អស់អ្នកដែលទ្រទ្រង់បន្ទុកធ្ងន់ ។
-
តើអ្នកគិតថា ការនឿយព្រួយ ហើយមានផ្ទុកធ្ងន់ មានន័យដូចម្ដេច ?
-
តើព្រះអង្គសង្គ្រោះបានមានបន្ទូលថាយើងត្រូវធ្វើអ្វីខ្លះ ដើម្បីទទួលបានសេចក្តីសម្រាករបស់ទ្រង់ ? ( សូមសរសេរគោលការណ៍ខាងក្រោមនេះនៅលើក្ដារខៀនដោយប្រើពាក្យរបស់សិស្ស ៖ នៅពេលយើងមករកព្រះយេស៊ូវគ្រីស្ទ រួមជាមួយនឹងបន្ទុករបស់យើងនោះ ទ្រង់នឹងឲ្យយើងបានសម្រាក ) ។
-
តើអ្នកគិតថា ការមករកព្រះយេស៊ូគ្រីស្ទមានន័យដូចម្ដេច ?
ដើម្បីជួយសិស្សឲ្យយល់ដឹងពីអត្ថន័យនៃការមករកព្រះគ្រីស្ទ សូមអញ្ជើញសិស្សម្នាក់អាន ម៉ាថាយ ១១:២៩–៣០ ឲ្យឮៗ ។ ចូរសុំឲ្យសិស្សក្នុងថ្នាក់ផ្ទៀងតាម ហើយស្វែងរកបន្ទូលណែនាំរបស់ព្រះអង្គសង្គ្រោះទៅកាន់អស់អ្នកដែលមានបំណងប្រាថ្នាចង់មករកទ្រង់ ។
-
យោងតាមខគម្ពីរទាំងនេះ តើយើងត្រូវធ្វើអ្វីខ្លះ ដើម្បីមករកព្រះគ្រីស្ទ ?
សូមគូរ រូប នឹមគោមួយនៅលើក្ដារខៀន ឬបង្ហាញរូបនឹមមួយ ។
សូមពន្យល់ថា នឹមគឺជាធ្នឹម ឈើមួយ ដែលភ្ជាប់ ឬដាក់គោ ឬ សត្វដទៃទៀតមួយនឹម ដើម្បីឲ្យវាអាចទាញបន្ទុកមួយរួមគ្នា ។
-
តើអ្វីទៅជាគោលបំណង និង អត្ថប្រយោជន៍របស់នឹម ? ( ទោះបីជា នឹមនោះគឺជាទម្ងន់ ឬបន្ទុកមួយក្ដី ក៏វាអនុញ្ញាតឲ្យសត្វទាំងពីរក្បាលរួមថាមពល និង កម្លាំងរបស់វា ដើម្បីបង្កើននូវផលិតភាពរបស់វាដែរ ) ។
-
តើអ្នកគិតថា ការទទួលយកនឹមរបស់ព្រះអង្គសង្គ្រោះដាក់មកលើយើង មានន័យដូចម្ដេច ?
សុំឲ្យសិស្សម្នាក់អានសេចក្ដីថ្លែងការណ៍ខាងក្រោមនេះមកពីអែលឌើរ ដេវីឌ អេ បែដណា នៃកូរ៉ុមនៃពួកសាវកដប់ពីរនាក់ឲ្យឮៗ ៖ សុំឲ្យសិស្សស្ដាប់ ហើយគិតពីរបៀបដែលយើងអាចយកនឹមរបស់ព្រះអង្គសង្គ្រោះមកដាក់លើយើង ហើយថាតើពរជ័យអ្វីខ្លះដែលយើងអាចទទួលបានតាមរយៈការធ្វើដូច្នេះ ។
« នឹមមួយទឹម សត្វឲ្យដើរទន្ទឹមគ្នា ដើម្បីវាអាចឈានទៅមុខទាំងអស់គ្នា ក្នុងការសម្រេចកិច្ចការមួយ។
« ចូរពិចារណាអំពីការអញ្ជើញដ៏ពិសេសរបស់ព្រះអម្ចាស់ដល់យើងម្នាក់ៗថា ‹ ចូរទទួលនឹមខ្ញុំចុះ › ។ ការចុះនិងការរក្សាសេចក្តីសញ្ញាពិសិដ្ឋ គឺជាការទឹមយើងជាមួយនឹងព្រះអម្ចាស់ព្រះយេស៊ូវគ្រីស្ទ ។ មានន័យថា ព្រះអង្គសង្គ្រោះ កំពុងតែអញ្ជើញយើង ឲ្យពឹងផ្អែក ហើយទាញជាមួយនឹងទ្រង់ ទោះជាសមត្ថភាពល្អបំផុតរបស់យើង មិនស្មើ ឬមិនអាចប្រៀបនឹងទ្រង់ក៏ដោយ ។ កាលណាយើងទុកចិត្ត ហើយទាញបន្ទុកយើងជាមួយទ្រង់ ក្នុងដំណើរនៃជីវិតរមែងស្លាប់នេះ នោះនឹមទ្រង់ពិតជាងាយ ហើយបន្ទុកទ្រង់ពិតជាស្រាល ។
« យើងនឹងពុំនៅម្នាក់ឯងឡើយ ។ យើងអាចឆ្ពោះទៅមុខក្នុង ជីវិតប្រចាំថ្ងៃរបស់យើង ដោយមានជំនួយពីស្ថានសួគ៌ ។ តាមរយៈដង្វាយធួនរបស់ព្រះអង្គសង្គ្រោះយើងអាចទទួលបានសមត្ថភាព និង ‹ លើសកម្លាំង[របស់យើង] › (‹ ខ្ញុំនឹងដើរតាមព្រះអង្គ › ទំនុកតម្កើង លេខ ១៣៥) » (« Bear Up Their Burdens with Ease » ឬ Liahona ខែ ឧសភា ឆ្នាំ ២០១៤ ទំព័រ ៨៨) ។
-
តើអ្វីទៅដែល« ទឹម »យើងនឹងព្រះអង្គសង្គ្រោះ ព្រះយេស៊ូវគ្រីស្ទ ?
-
យោងតាមអែលឌើរ បែដណា តើពរជ័យនៃការជាប់នឹមជាមួយព្រះអង្គសង្គ្រោះមានអ្វីខ្លះ ?
សូមចង្អុលបង្ហាញថា ការសន្យារបស់ព្រះអង្គសង្គ្រោះអំពី « សេចក្តីសំរាក » នៅក្នុង ម៉ាថាយ ១១:២៨–២៩ ពុំមានន័យថា ទ្រង់នឹងដកយកបញ្ហា ឬការប្រឈមរបស់យើងជានិច្ចនោះទេ ។ ជារឿយៗ ព្រះអង្គសង្គ្រោះនឹងប្រទានសេចក្ដីសុខសាន្ត និង កម្លាំងដែលយើងត្រូវការដល់យើងដើម្បីយកឈ្នះ ឬស៊ូទ្រាំនឹងការសាកល្បងរបស់យើង ហេតុដូច្នេះហើយទើបធ្វើឲ្យបន្ទុករបស់យើងបានស្រាល ។ ប្រសិនបើយើងស្មោះត្រង់នៅក្នុងការប្រឈមទាំងឡាយនៃជីវិតរមែងស្លាប់ សេចក្តីសំរាកដែលយើងនឹងទទួលបានគឺជាភាពតម្កើងឡើងជាមួយនឹងព្រះ ( សូមមើល គ. និង ស. ៨៤:២៣–២៤ ) ។
សុំឲ្យសិស្សពិចារណាពីរបៀបដែលព្រះអង្គសង្គ្រោះបានប្រទានសេចក្តីសំរាកដល់ពួកគេ នៅពេលពួកគេមករកទ្រង់ ។ សូមអញ្ជើញសិស្សពីរបីនាក់ឲ្យចែកចាយបទពិសោធន៍របស់ពួកគេជាមួយសិស្សដទៃទៀតនៅក្នុងថ្នាក់ ។ អ្នកគួរពិចារណាចែកចាយបទពិសោធន៍ផ្ទាល់ខ្លួនមួយរបស់អ្នក ។
សូមអញ្ជើញសិស្សដាក់គោលដៅជាក់លាក់នានាអំពីរបៀបដែលពួកគេអាចមករកព្រះយេស៊ូវគ្រីស្ទពេញមួយឆ្នាំ ក្នុងការសិក្សាអំពីព្រះគម្ពីរសញ្ញាថ្មីនេះ ។ សូមលើកទឹកចិត្តពួកគេឲ្យដាក់បញ្ចូលការសិក្សាព្រះគម្ពីរប្រចាំថ្ងៃ និង ការអាន ព្រះគម្ពីរសញ្ញាថ្មី ទាំងមូលនៅឆ្នាំនេះក្នុងគោលដៅរបស់ពួកគេ ។
ពួកសិស្សរបស់ព្រះយេស៊ូវគ្រីស្ទមានទំនួលខុសត្រូវមួយដើម្បីជួយមនុស្សដទៃទៀតឲ្យមករកទ្រង់ ។
ចូរសុំឲ្យសិស្សគិតពីគ្រានានានៅក្នុងជីវិតរបស់ពួកគេ ដែលពួកគេមានបំណងចង់ប្រាប់នរណាម្នាក់ពីបទពិសោធន៍មួយដែលពួកគេមាន ឬអ្វីមួយដែលពួកគេបានឃើញ បានអាន ឬបានស្ដាប់ឮដោយក្ដីរំភើប ។ សូមអញ្ជើញសិស្សពីរបីនាក់រាយការណ៍ពីអ្វីមួយដែលពួកគេមានបំណងចង់ប្រាប់មនុស្សម្នាក់ដោយក្ដីរំភើប ។
សូមពន្យល់ថា ព្រះគម្ពីរសញ្ញាថ្មីមានឧទាហរណ៍ជាច្រើនពីបុគ្គលដែលទទួលបានការពង្រឹង ការបង្រៀន ឬមានពរដោយសារព្រះអម្ចាស់ រួចហើយមានបំណងចង់ប្រាប់មនុស្សដទៃទៀតអំពីទ្រង់ ។ សូមអញ្ជើញឲ្យសិស្សពីរបីនាក់ប្ដូរវេនគ្នាអានឮៗពី យ៉ូហាន ១:៣៧-៤២ ។ សុំឲ្យសិស្សផ្សេងទៀតផ្ទៀងតាម ដោយស្វែងរកអ្វីដែលពួកសិស្សពីរនាក់របស់យ៉ូហាន បាទីស្ទ បានធ្វើ ក្រោយពីស្ដាប់ឮទីបន្ទាល់របស់លោកអំពីព្រះយេស៊ូវ ។
-
តើអនទ្រេបានរៀនអ្វីខ្លះអំពីព្រះយេស៊ូវ ពេលលោកនិយាយនឹងទ្រង់ ?
-
តើអនទ្រេបានធ្វើអ្វីខ្លះក្រោយពីលោកបានដឹងថា ព្រះយេស៊ូវគឺជាព្រះមែស៊ី ?
-
ហេតុអ្វីអ្នកគិតថាគាត់មានចិត្តត្រេកអរដើម្បីចែចាយដំណឹងនេះដល់ប្អូនប្រុសរបស់លោកឈ្មោះ ស៊ីម៉ូន-ពេត្រុស ?
សូមសង្ខេប យ៉ូហាន ១:៤៣–៤៤ ដោយប្រាប់សិស្សថា ព្រះអង្គសង្គ្រោះបានអញ្ជើញបុរសម្នាក់ឈ្មោះភីលីពឲ្យធ្វើជាសិស្សរបស់ទ្រង់ ។ សូមអញ្ជើញសិស្សម្នាក់អាន ម៉ាថាយ ១:៤៥-៤៦ ឲ្យឮៗ ។ សុំឲ្យសិស្សផ្សេងទៀតផ្ទៀងតាម ដោយរកមើលថាតើភីលីព បានធ្វើអ្វីខ្លះក្រោយពីលោកបានដឹងថា ព្រះយេស៊ូវគឺជាព្រះមែស៊ី ។
-
តើភីលីព បាននិយាយអ្វីខ្លះទៅកាន់ ណាថាណែលអំពីព្រះយេស៊ូវពីស្រុកណាសារ៉ែត ?
-
តើណាថាណែល បានឆ្លើយតបយ៉ាងណាដែរចំពោះទីបន្ទាល់របស់ភីលីពដែលថ្លែងថា ព្រះយេស៊ូវគឺជាព្រះមែស៊ី ?
-
តើការអញ្ជើញរបស់ភីលីពដល់ណាថាណែលគឺជាអ្វីទៅ ?
សូមសរសេរប្រយោគមិនពេញលេញខាងក្រោមនៅលើក្ដារខៀន ៖ នៅពេលយើងមករកព្រះយេស៊ូវគ្រីស្ទ …
-
យោងតាមឧទាហរណ៍ទាំងនេះនៅក្នុងព្រះគម្ពីរសញ្ញាថ្មី តើយើងនឹងមានបំណងប្រាថ្នាអ្វីខ្លះ នៅពេលយើងមករកព្រះយេស៊ូវគ្រីស្ទ ? ( នៅពេលសិស្សឆ្លើយ សូមបំពេញប្រយោគនៅលើក្ដារខៀន ដើម្បីវាឆ្លុះបញ្ចាំងពីគោលការណ៍ខាងក្រោមនេះ ៖ នៅពេលយើងមករកព្រះយេស៊ូវគ្រីស្ទ នោះយើងនឹងមានបំណងប្រាថ្នាដ៏ធំធេងមួយដើម្បីអញ្ជើញមនុស្សដទៃទៀតឲ្យមករកទ្រង់ ) ។
ដើម្បីជួយសិស្សឲ្យយល់កាន់តែប្រសើរពីគោលការណ៍នេះ សូមចម្លង តារាង ដែលភ្ជាប់មកជាមួយនេះ ដាក់លើក្ដារខៀន ៖
-
ហេតុអ្វីអ្នកគិតថាយើងនឹងមានបំណងប្រាថ្នាដ៏ធំធេងមួយដើម្បីអញ្ជើញមនុស្សដទៃទៀតឲ្យមករកព្រះគ្រីស្ទ នៅពេលយើងមករកទ្រង់ដោយខ្លួនឯងនោះ ?
សូមពន្យល់ថា ប្រធាន ហិនរី ប៊ី អាវរិង ក្នុងគណៈប្រធានទីមួយ បានបង្រៀនពីពរជ័យដ៏អស្ចារ្យមួយដែលយើងទទួលបាន នៅពេលយើងអញ្ជើញមនុស្សដទៃទៀតឲ្យមករកព្រះយេស៊ូវគ្រីស្ទ ។ សូមអញ្ជើញសិស្សម្នាក់ឲ្យអានសេចក្ដីថ្លែងការណ៍ខាងក្រោមឲ្យឮៗ ៖
រូបភាពប្រធាន ហិនរី ប៊ី អាវរិង« នៅពេលអ្នកអញ្ជើញមនុស្សដទៃទៀត ឲ្យមករកព្រះគ្រីស្ទដោយអស់ពីចិត្ត នោះដួងចិត្តអ្នកនឹងមានការផ្លាស់ប្ដូរ ។ … តាមរយៈការជួយមនុស្សដទៃទៀតឲ្យមករកព្រះគ្រីស្ទ អ្នកនឹងរកឃើញថា អ្នកបានមករកទ្រង់ដោយខ្លួនឯង » ( « Come unto Christ » ខែ មីនា ឆ្នាំ២០០៨ ទំព័រ ៤៩ ) ។
-
នៅពេលយើងអញ្ជើញមនុស្សដទៃទៀតឲ្យមករកព្រះយេស៊ូវគ្រីស្ទ តើមានអ្វីអាចកើតឡើងនៅក្នុងជីវិតយើង ?
សូមបន្ថែមសញ្ញាព្រួញមួយក្នុងរូបគំនូរលើក្ដារខៀន ដើម្បីឲ្យវាមានភាពស្រដៀងគ្នាទៅនឹង តារាង ដែលភ្ជាប់មកជាមួយនោះ ៖
-
ហេតុអ្វីបានជាអ្នកគិតថា ការអញ្ជើញមនុស្សដទៃទៀតឲ្យមករកព្រះគ្រីស្ទអាចជួយយើងឲ្យខិតកាន់តែជិតនឹងទ្រង់ផងដែរ ?
-
តើនរណាបានអញ្ជើញអ្នកឲ្យមករកព្រះអង្គសង្គ្រោះ និង ដំណឹងល្អរបស់ទ្រង់ ? តើជីវិតរបស់អ្នកមានពរជ័យយ៉ាងណាដែរដោយសារទង្វើនេះ ?
សូមលើកទឹកចិត្តសិស្សឲ្យពិចារណាប្រកបដោយការអធិស្ឋានពីមនុស្ស ដែលពួកគេអាចអញ្ជើញឲ្យមករកព្រះយេស៊ូវគ្រីស្ទ ។
-
តើយើងអាចធ្វើអ្វីខ្លះ ដើម្បីអញ្ជើញមនុស្សដទៃទៀតឲ្យមករកទ្រង់ ?
សូមពន្យល់ថា ការអញ្ជើញមិត្តភក្ដិ និង មិត្តរួមថ្នាក់ឲ្យចូលរួមថ្នាក់សិក្ខាសាលាគឺជាវិធីមួយដែលសិស្សអាចអញ្ជើញមនុស្សដទៃទៀតឲ្យ « មកឃើញ »ថាតើព្រះយេស៊ូវគ្រីស្ទគឺជានរណា និងឃើញពីរបៀបដែលដំណឹងល្អរបស់ទ្រង់អាចប្រទានពរដល់ជីវិតរបស់ពួកគេ ។
សូមអញ្ជើញសិស្សម្នាក់អាន យ៉ូហាន ១:៤៧-៥០ ឲ្យឮៗ ។ សុំឲ្យសិស្សផ្សេងទៀតផ្ទៀងតាម ដោយរកមើលអ្វីដែល ណាថាណែល បានដកពិសោធន៍នៅពេលលោកបានជួបនឹងព្រះអង្គសង្គ្រោះ ( សូមពន្យល់ថា ឃ្លា « គ្មានកលឧបាយ »មានន័យថា គ្មានការបោកបញ្ឆោត ) ។
-
តើព្រះអង្គសង្គ្រោះបានមានបន្ទូលអ្វីខ្លះទើបធ្វើឲ្យ ណាថាណែល ប្រកាសថា ព្រះយេស៊ូវគឺជាព្រះរាជបុត្រានៃព្រះ ?
-
យោងតាម ខទី ៥០តើព្រះអង្គសង្គ្រោះបានសន្យាអ្វីខ្លះ ដល់ណាថាណែល ដោយសារតែលោកបានជឿ ?
សូមពន្យល់ថា ណាថាណែល ព្រមជាមួយនឹង អនទ្រេ ពេត្រុស ភីលីព និង អ្នកផ្សេងទៀតបានក្លាយជាសិស្សរបស់ព្រះយេស៊ូវ ។ ដោយសារពួកសាវកទាំងនេះបានស្ដាប់តាមការអញ្ជើញឲ្យមករកព្រះយេស៊ូវគ្រីស្ទ នោះពួកគេបានឃើញ « ការដ៏ធំវិសេស » ( ខទី ៥០ ) រួមបញ្ចូលទាំងអព្ភូតហេតុ និង ការបង្រៀនទាំងឡាយរបស់ព្រះយេស៊ូវគ្រីស្ទ និងការមានព្រះជន្មឡើងវិញ ព្រមទាំងការយាងឡើងទៅស្ថានសួគ៌វិញរបស់ទ្រង់ ។
សូមបញ្ចប់ដោយថ្លែងទីបន្ទាល់ថា នៅពេលសិស្សសិក្សាព្រះគម្ពីរសញ្ញាថ្មីនាឆ្នាំនេះ នោះពួកគេនឹងមានអារម្មណ៍ពីការទូលអង្វរជាបន្តបន្ទាប់របស់ព្រះអង្គសង្គ្រោះឲ្យមករកទ្រង់ ។ នៅពេលពួកគេអនុវត្តគោលលទ្ធិ និង គោលការណ៍ទាំងឡាយដែលពួកគេរៀននៅក្នុងឆ្នាំនេះ ពួកគេនឹងទទួលបានជំនួយរបស់ទ្រង់ដើម្បីសម្រាលបន្ទុករបស់ពួកគេ ហើយពោរពេញដោយបំណងប្រាថ្នាដើម្បីជួយដល់មនុស្សដទៃទៀតឲ្យមករកទ្រង់ដូចជាពួកសាវកពីបុរាណផងដែរ ។
សេចក្តីពន្យល់ និង ព័ត៌មានសាច់រឿង
ម៉ាថាយ ១១:២៩–៣០ ។ « ចូរទទួលនឹមខ្ញុំ »
ប្រធាន ហាវើដ ដបុលយូ ហឹនធើរ បានបង្រៀនពីពរជ័យដែលកើតមាននៅពេលយើងទទួលនឹមរបស់ព្រះគ្រីស្ទ ៖
« ក្នុងសម័យព្រះគម្ពីរប៊ីប នឹមគឺជាឧបករណ៍មួយដែលផ្ដល់ជំនួយយ៉ាងខ្លាំងដល់អ្នកដែលភ្ជួររាស់ដី ។ វាបានអនុញ្ញាតឲ្យកម្លាំងរបស់សត្វពាហនៈទីពីរជួយគាំទ្រដល់ការខិតខំរបស់សត្វពាហនៈតែមួយ ដោយចែករំលែក ហើយកាត់បន្ថយការងារដ៏ធ្ងន់របស់ន័ង្គល ឬរទេះនោះ ។ បន្ទុកមួយដែលមានភាពលើសលុប ឬប្រហែលជាសត្វតែមួយក្បាលមិនអាចទ្រាំទ្របានតែឯង នោះវាអាចទ្រាំទ្របានយ៉ាងស្មើភាពគ្នា ហើយដោយភាព ស្រណុកចិត្តដោយសត្វពីរក្បាលដែលបានដាក់ក្នុងនឹមតែមួយ ។ នឹមរបស់ទ្រង់តម្រូវឲ្យមានការខិតខំមួយដ៏ធំអស្ចារ្យ ហើយស្មោះអស់ពីចិត្ត ប៉ុន្តែចំពោះជនដែលបានប្រែចិត្តជឿពិតប្រាកដ នោះនឹមនេះមានភាពងាយស្រួល ហើយបន្ទុកវាក៏ស្រាលដែរ ។
« ព្រះគ្រីស្ទទូលសួរថាហេតុអ្វីបានជាប្រឈមនឹងបន្ទុកជីវិតតែម្នាក់ឯង ឬហេតុអ្វីបានជាប្រឈមនឹងវាជាមួយនឹងជំនួយបណ្ដោះអាសន្នដែលនឹងរលាយបាត់ទៅវិញដូច្នេះ ? ចំពោះជនដែលមានបន្ទុកធ្ងន់ មានតែនឹមរបស់ព្រះគ្រីស្ទ និងអំណាច និង សេចក្តីសុខសាន្តនៃការឈរក្បែរព្រះប៉ុណ្ណោះដែលនឹងផ្ដល់ការគាំទ្រ តុល្យភាព និង កម្លាំងដើម្បីតតាំងនឹងការប្រឈមរបស់យើង ហើយស៊ូទ្រាំនឹងកិច្ចការរបស់យើងនៅក្នុង … ជីវិតរមែងស្លាប់នេះ » ( « Come unto Me » ខែ វិច្ឆិកា ឆ្នាំ១៩៩០ ទំព័រ ១៨ សូមមើលផងដែរ « Take My Yoke upon You » [ Ensign ខែ កញ្ញា ឆ្នាំ ២០១៣ ទំព័រ ២២–២៣ ] សម្រាប់រូបនឹម និង ការពន្យល់បន្ថែមទៀតអំពីការប្រើ និង មុខងាររបស់វា ) ។
យ៉ូហាន ១:៣៩, ៤៦ ។ « ចូរតាមខ្ញុំទៅមើលចុះ »
អែលឌើរ នែល អិល អាន់ឌើរសិន ក្នុងកូរ៉ុមនៃពួកសាវដប់ពីរនាក់បានពន្យល់ពីរបៀបដែលយើងអាចធ្វើតាមគំរូរបស់ព្រះអង្គសង្គ្រោះ ក្នុងការចែកចាយដំណឹងល្អដល់មនុស្សដទៃទៀត ៖
« ព្រះអង្គសង្គ្រោះបានបង្រៀនយើងពីរបៀបចែកចាយដំណឹងល្អ ។ ខ្ញុំចូលចិត្តរឿងរបស់អនទ្រេ ដែលបានទូលសួរថា ‹ លោកគ្រូ តើលោកនៅឯណា ? › [ យ៉ូហាន ១:៣៨ ] ។ ព្រះយេស៊ូវអាចមានបន្ទូលតបប្រាប់ពីទីតាំងដែលទ្រង់គង់នៅ ។ ប៉ុន្តែផ្ទុយទៅវិញ ទ្រង់បានមានបន្ទូលទៅអនទ្រេថា ‹ ចូរតាមខ្ញុំទៅមើលចុះ › [ យ៉ូហាន ១:៣៩ ] ។ ខ្ញុំចូលចិត្តគិតថា ព្រះអង្គសង្គ្រោះកំពុងមានបន្ទូលថា ‹ ចូរតាមខ្ញុំទៅមើលពុំមែនគ្រាន់តែកន្លែងដែលខ្ញុំរស់នៅប៉ុណ្ណោះទេ ប៉ុន្តែពីរបៀបដែលខ្ញុំរស់នៅផង ។ ចូរតាមខ្ញុំទៅមើលថាតើខ្ញុំជានរណា ។ ចូរតាមខ្ញុំដើម្បីមានអារម្មណ៍ពីព្រះវិញ្ញាណ › ។ …
« ចំពោះជនដែលបង្ហាញចំណាប់អារម្មណ៍នៅក្នុងការសន្ទនារបស់យើង យើងអាចធ្វើតាមគំរូរបស់ព្រះអង្គសង្គ្រោះដោយអញ្ជើញពួកគេឲ្យ ‹ តាមទៅមើល › ។ មនុស្សខ្លះនឹងទទួលយកការអញ្ជើញរបស់យើង ហើយមនុស្សខ្លះទៀតនឹងពុំទទួលយកទេ ។ យើងទាំងអស់គ្នាស្គាល់មនុស្សម្នាក់ដែលត្រូវបានអញ្ជើញជាច្រើនដងពីមុនទទួលយកការអញ្ជើញឲ្យ‹ តាមទៅមើល › ។ ចូរយើងគិតពីជនដែលពេលមួយធ្លាប់នៅជាមួយយើង ប៉ុន្តែឥឡូវនេះកម្រនឹងឃើញ ដោយអញ្ជើញពួកគេឲ្យត្រឡប់មកវិញ ហើយឃើញម្ដងទៀត » ( « It’s a Miracle » ឬ ខែ ឧសភា ឆ្នាំ២០១៣ ទំព័រ ៧៩ ) ។