មេរៀនទី ២
ផែនការនៃសេចក្ដីសង្គ្រោះ
សេចក្ដីផ្ដើម
ប្រធានប៊យ ឃេ ផាកកឺក្នុងកូរ៉ុមនៃពួកសាវកដប់ពីរនាក់ បានណែនាំដល់គ្រូបង្រៀនខាងសាសនាឲ្យបង្ហាញទិដ្ឋភាពទូទៅដោយសង្ខេបអំពីផែនការនៃសេចក្ដីសង្គ្រោះ នៅពេលចាប់ផ្ដើមថ្នាក់ក្នុងឆ្នាំនីមួយៗ ៖
« ទិដ្ឋភាពទូទៅដោយសង្ខេបអំពី ‹ ផែនការនៃសុភមង្គល › … ប្រសិនបើត្រូវបានផ្ដល់ឲ្យនៅពេលចាប់ផ្ដើម ហើយត្រឡប់ទៅមើលម្តងទៀតជាញឹកញាប់ នោះវានឹងក្លាយជាគុណធម៌ដែលចាក់ជ្រៅទៅក្នុងដួងចិត្តសិស្សរបស់អ្នក » ( « The Great Plan of Happiness » [ សុន្ទរកថាទៅកាន់គ្រូបង្រៀនស៊ី.អ៊ី.អេសខាងសាសនា ថ្ងៃទី១០ ខែសីហា ឆ្នាំ១៩៩៣ ] si.lds.orgសូមមើលផងដែរ Teaching Seminary: Preservice Readings [ Church Educational System manual ឆ្នាំ២០០៤ ] ទំព័រ ៦៨–៧៤ ) ។
មេរៀននេះផ្ដល់នូវទិដ្ឋភាពទូទៅដោយសង្ខេបអំពីផែនការនៃសេចក្ដីសង្គ្រោះ ហើយផ្ដោតលើតួនាទីដ៏សំខាន់របស់ព្រះយេស៊ូវគ្រីស្ទ និង ដង្វាយធួនរបស់ទ្រង់នៅក្នុងផែនការនោះ ។
យោបល់សម្រាប់ការបង្រៀន
តួនាទីរបស់ព្រះយេស៊ូវគ្រីស្ទនៅក្នុងជីវិតមុនឆាកជីវិតនេះ
ជាផ្នែកមួយនៃ ការប្រជុំធម្មនិដ្ឋាននេះ អ្នកគួរអញ្ជើញសិស្សឲ្យច្រៀងវគ្គទី ១ និងទី ៤នៃបទ « ខ្ញុំជឿលើព្រះគ្រីស្ទ » ( ទំនុកតម្កើង ទំព័រ ៧៥ ) ឬទំនុកតម្កើងមួយទៀតអំពីព្រះអង្គសង្គ្រោះ ។ សូមចាប់ផ្ដើមមេរៀននេះដោយសួរ ៖
-
តើអ្នកនឹងឆ្លើយបែបណាដែរ ប្រសិនបើមនុស្សម្នាក់សួរអ្នកថា ហេតុអ្វីបានជាព្រះយេស៊ូវគ្រីស្ទជាអង្គដ៏សំខាន់ចំពោះអ្នក ?
សូមពន្យល់ដល់សិស្សថា នៅក្នុងមេរៀនថ្ងៃនេះពួកគេនឹងរៀនអំពីតួនាទីរបស់ព្រះយេស៊ូវគ្រីស្ទនៅក្នុងផែនការនៃសេចក្ដីសង្គ្រោះរបស់ព្រះវរបិតាសួគ៌ ។ ចូរសុំឲ្យពួកគេរកមើលសេចក្ដីពិតទាំងឡាយ ដែលអាចជួយពង្រឹងសេចក្ដីជំនឿរបស់ពួកគេទៅលើព្រះយេស៊ូវគ្រីស្ទ នៅពេលពួកគេសិក្សាក្នុងថ្ងៃនេះ ។
សូមចម្លងតារាងខាងក្រោមដាក់លើក្ដារខៀន ។ អ្នកក៏គួររៀបចំវាជា ក្រដាសចែក ឲ្យសិស្សផងដែរ ។ ( ប្រសិនបើចែកក្រដាសនោះ ចូរសុំឲ្យសិស្សបំពេញតារាងរបស់ពួកគេនៅពេលអ្នកបំពេញ តារាង នោះនៅលើក្ដារខៀន ) ។
ព្រះយេស៊ូវគ្រីស្ទ គឺជាកត្តាដ៏សំខាន់នៃផែនការនៃសេចក្ដីសង្គ្រោះរបស់ព្រះវរបិតាសួគ៌
សៀវភៅសិក្សាព្រះគម្ពីរសញ្ញាថ្មីសម្រាប់គ្រូថ្នាក់សិក្ខាសាលា—មេរៀនទី ២
ជីវិតមុនឆាកជីវិតនេះ |
ជីវិតរមែងស្លាប់ |
ជីវិតក្រោយពីជីវិតនេះ |
---|---|---|
© ២០១៥ ដោយ Intellectual Reserve, Inc. រក្សាសិទ្ធិគ្រប់យ៉ាង ។
សូមចង្អុលបង្ហាញថា ផែនការរបស់ព្រះវរបិតាសួគ៌មានបីដំណាក់កាលសំខាន់ៗ ៖ (១) ជីវិតរបស់យើងមុនឆាកជីវិតនេះដែលបានដឹកនាំទៅរកការចាប់កំណើតរបស់យើងខាងសាច់ឈាម (២) ជីវិតរមែងស្លាប់របស់យើងនៅលើផែនដី និង (៣) ជីវិតរបស់យើងក្រោយពីជីវិតនេះ ដែលនឹងកើតឡើងបន្ទាប់ពីសេចក្ដីស្លាប់ខាងរូបកាយរបស់យើង ។
ចូរសុំឲ្យសិស្សម្នាក់អានសេចក្ដីថ្លែងការណ៍ខាងក្រោមនេះឮៗ ហើយសុំឲ្យសិស្សផ្សេងទៀតស្ដាប់រកដែនកំណត់ដែលយើងបានដកពិសោធន៍នៅក្នុងជីវិតរបស់យើងមុនឆាកជីវិតនេះ ។
« យើងបានរស់នៅជាកូនចៅវិញ្ញាណរបស់ព្រះវរបិតារបស់យើងនៅក្នុងស្ថានសួគ៌ពីមុនយើងកើតលើផែនដីនេះ ។ ទោះបីជាយ៉ាងណាក៏ដោយ ក៏យើងមិនដូចព្រះវរបិតាសួគ៌របស់យើង ហើយក៏មិនអាចក្លាយដូចជាទ្រង់ ហើយរីករាយជាមួយពរជ័យដែលទ្រង់រីករាយដោយគ្មានបទពិសោធន៍នៃការរស់នៅជាមតភាពនៃរូបកាយដែរ ។
« ព្រះរាជបំណងទាំងមូលរបស់ព្រះ—កិច្ចការ និង សិរីល្អរបស់ទ្រង់—គឺអាចធ្វើឲ្យយើងម្នាក់ៗរីករាយជាមួយនឹងពរជ័យទាំងអស់របស់ទ្រង់ ។ ទ្រង់បានប្រទានផែនការមួយដ៏ល្អឥតខ្ចោះដើម្បីសម្រេចបានព្រះរាជបំណងរបស់ទ្រង់ ។ យើងបានយល់ ហើយបានទទួលយកផែនការនេះ មុនយើងមកផែនដីនេះ ។ …
« ដើម្បីរីកចម្រើន ហើយប្រែក្លាយដូចជាព្រះ យើងម្នាក់ៗត្រូវតែទទួលរូបកាយ ហើយទទួលការសាកល្បងនៅអំឡុងពេលនៃសេចក្ដីសាកល្បងនៅលើផែនដី » ( ប្រកាសដំណឹងល្អរបស់យើង ៖ សៀវភៅណែនាំសម្រាប់ការបម្រើរបស់អ្នកផ្សព្វផ្សាយសាសនា [ ឆ្នាំ ២០០៤ ] ទំព័រ ៤៨, ៤៩ ) ។
-
តើដែនកំណត់អ្វីខ្លះដែលយើងមាន នៅក្នុងជីវិតយើងមុនឆាកជីវិតនេះ ?
សូមពន្យល់ថា នៅពេលព្រះវរបិតាសួគ៌បានសំដែងពីផែនការនៃសុភមង្គលរបស់ទ្រង់ យើងបានដឹងថា នឹងមានព្រះអង្គសង្គ្រោះមួយអង្គដើម្បីអនុវត្តផែនការនេះ ។ លូស៊ីហ្វើរ ដែលជាកូនចៅវិញ្ញាណម្នាក់របស់ព្រះវរបិតាសួគ៌បានបះបោរប្រឆាំងនឹងផែនការរបស់ព្រះវរបិតាសួគ៌ ។ វាត្រូវបានគេស្គាល់ជា សាតាំង ភាសាហេព្រើរមានន័យថា « មារសត្រូវ » ។
សុំសិស្សម្នាក់អាន យ៉ូហាន ៤:១-៣ ឲ្យឮ ។ ចូរសុំឲ្យសិស្សក្នុងថ្នាក់ផ្ទៀងតាម រកមើលអ្វីដែលសាតាំងបានទាមទារពីព្រះវរបិតាសួគ៌ ។
-
តើសាតាំងបានទាមទារអ្វីខ្លះពីព្រះវរបិតាសួគ៌ ?
-
យោងតាម ខទី ២តើព្រះវរបិតាសួគ៌បានមានបន្ទូលអ្វីខ្លះអំពីព្រះយេស៊ូវគ្រីស្ទ ?
-
តើព្រះយេស៊ូវគ្រីស្ទត្រូវបានជ្រើសរើសឲ្យធ្វើអ្វី ? ( បន្ទាប់ពីសិស្សឆ្លើយ សូមសរសេរសេចក្ដីពិតខាងក្រោមនេះលើក្ដារខៀននៅក្រោមពាក្យ ជីវិតមុនឆាកជីវិតនេះ ៖ ព្រះយេស៊ូវគ្រីស្ទត្រូវបានជ្រើសរើសនៅក្នុងជីវិតមុនឆាកជីវិតនេះដើម្បី ធ្វើជាព្រះអង្គសង្គ្រោះរបស់មនុស្សលោក ) ។
សូមពន្យល់ថា ក្រោយពីព្រះយេស៊ូវគ្រីស្ទត្រូវបានជ្រើសរើសឲ្យអនុវត្តផែនការនៃសេចក្ដីសង្គ្រោះរបស់ព្រះវរបិតាសួគ៌ ទ្រង់បានបង្កើតផែនដីនេះដែលយើងម្នាក់ៗអាចទទួលបានរូបកាយ និង បទពិសោធន៍ ។
ចូរសុំឲ្យសិស្សម្នាក់អាន ហេព្រើរ ១:១-២ ឲ្យឮៗ ។ ចូរសុំឲ្យសិស្សក្នុងថ្នាក់ផ្ទៀងតាម ដោយ រកមើលតួនាទីរបស់ព្រះយេស៊ូវគ្រីស្ទនៅក្នុងការបង្កបង្កើតផែនដី ។
-
តើតួនាទីរបស់ព្រះយេស៊ូវគ្រីស្ទនៅក្នុងការបង្កបង្កើតផែនដីមានអ្វីខ្លះ ? ( សូមសរសេរគោលលទ្ធិខាងក្រោមនៅលើក្តារខៀនក្រោមពាក្យ ជីវិតមុនឆាកជីវិតនេះ ៖ ក្រោមការដឹកនាំរបស់ព្រះវរបិតាសួគ៌ ព្រះយេស៊ូវគ្រីស្ទបានបង្កើតផែនដី ) ។
សូមអញ្ជើញសិស្សគិតពីភាពស្រស់ស្អាតរបស់ផែនដី ។ អ្នកគួរបង្ហាញរូបភាពមួយ ឬច្រើនពីភាពស្រស់ស្អាតរបស់ផែនដី ។
-
តើការដឹងថា ព្រះយេស៊ូវគ្រីស្ទបានបង្កើតផែនដីនេះ និងភពរាប់លានទៀតដូចគ្នានេះដែរ វាជះឥទ្ធិពលដល់អារម្មណ៍របស់អ្នកទៅលើទ្រង់យ៉ាងណាដែរ ?
តួនាទីរបស់ព្រះយេស៊ូវគ្រីស្ទនៅក្នុងជីវិតរមែងស្លាប់
សូមពន្យល់ថា នៅក្នុងជីវិតរមែងស្លាប់យើងដកពិសោធន៍ដែនកំណត់ ឬឧបសគ្គបន្ថែមទៀតដែលរារាំងយើងមិនឲ្យក្លាយដូចជាព្រះវរបិតាសួគ៌ ហើយត្រឡប់ទៅវត្តមានរបស់ទ្រង់វិញ ។ ចូរសុំឲ្យសិស្សម្នាក់អានឲ្យឮ នូវសេចក្ដីថ្លែងការណ៍ខាងក្រោម ហើយសុំឲ្យសិស្សក្នុងថ្នាក់ស្តាប់ ហើយ ស្វែងរកឧបសគ្គពីរដែលយើងដកពិសោធន៍នៅក្នុងជីវិតរមែងស្លាប់ ។
« នៅក្នុងជីវិតរមែងស្លាប់ យើងរស់នៅក្នុងលក្ខខណ្ឌដែលសេចក្ដីស្លាប់ទាំងខាងរូបកាយ និង ខាងវិញ្ញាណ ។ ព្រះមានសិរីល្អ និង អមតៈនៃសាច់ និង ឈាមយ៉ាងល្អឥតខ្ចោះ ។ ដើម្បីប្រែក្លាយដូចជាព្រះ និងត្រឡប់ទៅរស់នៅទីវត្តមានរបស់ទ្រង់ យើងក៏ត្រូវតែមានរូបកាយអមតៈនៃសាច់ និងឆ្អឹងយ៉ាងល្អឥតខ្ចោះដែរ ។ ទោះបីជាយ៉ាងណាក៏ដោយ ព្រោះតែការធ្លាក់របស់អ័ដាម និង អេវ៉ា មនុស្សគ្រប់គ្នានៅលើផែនដីមានរូបកាយរមែងស្លាប់ដែលមិនល្អឥតខ្ចោះ ហើយនៅទីបំផុតនឹងស្លាប់ ។ ប្រសិនបើពុំមានព្រះអង្គសង្គ្រោះ ព្រះយេស៊ូវគ្រីស្ទ សេចក្ដីស្លាប់អាចបញ្ចប់រាល់សេចក្ដីសង្ឃឹមសម្រាប់ជីវិតនាពេលអនាគតរួមរស់នឹងព្រះវរបិតាសួគ៌ ។
« រួមជាមួយនឹងសេចក្ដីស្លាប់ខាងរូបកាយ អំពើបាបគឺជាឧបសគ្គចម្បងដេលធ្វើឲ្យយើងពុំអាចប្រែក្លាយដូចជាព្រះវរបិតាយើងដែលគង់នៅស្ថានសួគ៌ ហើយត្រឡប់ទៅត្រឡប់វត្តមានរបស់ទ្រង់វិញ ។ នៅក្នុងលក្ខខណ្ឌនៃជីវិតរមែងស្លាប់ យើងតែងតែធ្លាក់ក្នុងការល្បួង ធ្វើខុសបញ្ញត្តិរបស់ព្រះ ហើយមានបាប ។ … ទោះបីពេលខ្លះអំពើបាបពុំមានផលអាក្រក់ភ្លាមៗក៏ដោយ វាតែងតែនាំទៅរកភាពអព្ភមង្គល ។ អំពើបាបធ្វើឲ្យមានអារម្មណ៍ថា មានកំហុស និងការខ្មាស់អៀន ។ ដោយសារតែអំពើបាបរបស់យើង យើងពុំអាចត្រឡប់ទៅរស់នៅជាមួយព្រះវរបិតាសួគ៌បានទេ ដរាបណាយើងទទួលបានការអភ័យទោស ហើយស្អាតស្អំជាមុនសិន ។
« … ដូចគ្នានឹងសេចក្ដីស្លាប់រូបកាយដែរ យើងមិនអាចឈ្នះលើឥទ្ធិពលនៃអំពើបាបដោយខ្លួនយើងបានទេ » (ប្រកាសដំណឹងល្អរបស់យើងទំព័រ ៥០) ។
សូមពន្យល់ថា ពីមុនព្រះយេស៊ូវប្រសូតមកលើផែនដី មានទេវតាមួយអង្គបានលេចមកឯយ៉ូសែបនៅក្នុងសុបិន កាលគាត់បានដឹងថា ម៉ារាកំពុងមានផ្ទៃពោះ ។ ចូរសុំឲ្យសិស្សម្នាក់អាន ម៉ាថាយ ១:២១ ឲ្យឮៗ ។ ចូរសុំឲ្យសិស្សក្នុងថ្នាក់ផ្ទៀងតាម រកមើលអ្វី ដែលទេវតាអង្គនោះបានប្រកាសប្រាប់ទៅ យ៉ូសែប ។
-
តើទេវតាបានមានបន្ទូលថាព្រះយេស៊ូវនឹងធ្វើអ្វីខ្លះ ? ( បន្ទាប់ពីសិស្សឆ្លើយ ចូរសរសេរគោលលទ្ធិខាងក្រោមនៅលើក្ដារខៀនក្រោមពាក្យ ជីវិតរមែងស្លាប់ ៖ ព្រះយេស៊ូវគ្រីស្ទបានយាងមកសង្គ្រោះពួកយើងចេញពីអំពើបាបរបស់យើង ) ។
-
តើព្រះយេស៊ូវគ្រីស្ទបានធ្វើអ្វីខ្លះ ដើម្បីឲ្យយើងត្រូវបានសង្គ្រោះចេញពីអំពើបាបរបស់យើង ?
ហេតុអ្វីបានជានាងយំ ? © ២០១៥ ដោយ ស៊ីម៉ន ដេវៃ ។ ប្រើប្រាស់ដោយមានការអនុញ្ញាត្តពី Altus Fine Art altusfineart.com ។
សូមបង្ហាញរូបភាព ព្រះយេស៊ូវកំពុងអធិស្ឋានក្នុងសួនច្បារគែតសាម៉ានី, ការឆ្កាងនិង ម៉ារា និង ព្រះយេស៊ូវគ្រីស្ទដែលមានព្រះជន្មរស់ឡើងវិញ ( Gospel Art Book [ ឆ្នាំ ២០០៩ ] ល.រ. ៥៦, ៥៧, ៥៩ សូមមើលផងដែរ LDS.org ) ។ សូមរំឭកសិស្សថា ការរងទុក្ខ, សេចក្ដីស្លាប់និង ការរស់ឡើងវិញ របស់ព្រះយេស៊ូវគ្រីស្ទត្រូវហៅថាជា ដង្វាយធួន ។
-
តើយើងត្រូវធ្វើអ្វីខ្លះដើម្បីទទួលបានការសង្គ្រោះចេញពីអំពើបាបរបស់យើងតាមរយៈដង្វាយធួននៃព្រះយេស៊ូវគ្រីស្ទ ? ( សូមមើល កិច្ចការ ២:៣៨ ) ។
តួនាទីរបស់ព្រះយេស៊ូវគ្រីស្ទនៅក្នុងជីវិតក្រោយពីជីវិតនេះ
ចូរសុំឲ្យសិស្សគិតពីមនុស្សម្នាក់ដែលបានចែកឋានទៅ ។ លុះពីរបីនាទីក្រោយមក សូមសួរ ៖
-
យោងតាមការយល់ដឹងរបស់អ្នកអំពីផែនការនៃសេចក្ដីសង្គ្រោះ តើអ្នកដែលបានចែកឋានទៅរស់នៅទីណាដែរ ? ( នៅពេលមនុស្សស្លាប់ វិញ្ញាណមនុស្សទាំងអស់ចូលទៅក្នុងពិភពវិញ្ញាណ ) ។ ដើម្បីបន្ថែមដល់ការយល់ដឹងរបស់សិស្ស អ្នកគួរសុំឲ្យសិស្សម្នាក់អាន អាលម៉ា ៤០:១១–១៤ ឲ្យឮៗ ) ។
សូមបង្ហាញ រូបភាព ការតម្កល់ព្រះសពរបស់ព្រះយេស៊ូវ ( Gospel Art Book ល.រ. ៥៨ សូមមើលផងដែរ LDS.org ) ។ ចូរសុំឲ្យសិស្សម្នាក់ឲ្យអាន ពេត្រុសទី ១ ៣:១៨–២០, ៤:៦ ឲ្យឮៗ ។ បន្ទាប់មក សូមសួរ ៖
-
តើព្រះយេស៊ូវគ្រីស្ទបានធ្វើអ្វីខ្លះភ្លាមៗក្រោយពីការសុគតរបស់ទ្រង់ ?
ការបញ្ចុះសពរបស់ព្រះគ្រីស្ទ ដោយ ខា ហានរីច ប្លូច ។ ការតាំងពិពណ៌នៃសារមន្ទីរប្រវត្តិសាស្ត្រជាតិនៅវិមាន ហ្វ្រិឌើរីកស្បក នៅ ហីលលើរុត ប្រទេស ដាណឺម៉ាក់ ។ ហាមថតចម្លង
សូមអញ្ជើញសិស្សម្នាក់ឲ្យអាន គោលលទ្ធិ និង សេចក្ដីសញ្ញា ១៣៨:១៨-១៩, ៣០-៣២ ឲ្យឮៗ ។ ចូរសុំឲ្យសិស្សក្នុងថ្នាក់ផ្ទៀងតាម រកមើលអ្វីដែលព្រះយេស៊ូវគ្រីស្ទបានធ្វើ ដើម្បីអនុញ្ញាតឲ្យដំណឹងល្អត្រូវបានប្រកាសដល់មនុស្សគ្រប់គ្នាក្នុងពិភពវិញ្ញាណ ។
-
តើព្រះយេស៊ូវគ្រីស្ទបានធ្វើអ្វីខ្លះ ដើម្បីអនុញ្ញាតឲ្យដំណឹងល្អត្រូវបានប្រកាសដល់មនុស្សគ្រប់គ្នាក្នុងពិភពវិញ្ញាណ ?
-
តើការខិតខំទាំងនេះឆ្លុះបញ្ចាំងពីសេចក្ដីស្រឡាញ់របស់ព្រះវរបិតាសួគ៌ និង ព្រះយេស៊ូវគ្រីស្ទចំពោះមនុស្សគ្រប់គ្នាយ៉ាងដូចម្ដេចដែរ ?
សូមចង្អុលទៅរូបភាពម៉ារា និង ព្រះយេស៊ូវគ្រីស្ទដែលមានព្រះជន្មរស់ឡើងវិញ ( Gospel Art Book ល.រ. ៥៩ សូមមើលផងដែរ LDS.org ) ហើយសួរសិស្ស ៖
-
តើមានអ្វីកើតឡើងនៅថ្ងៃទីបី បន្ទាប់ពីការសុគតរបស់របស់ព្រះអង្គសង្គ្រោះ ? ( ទ្រង់បានមានព្រះជន្មរស់ឡើងវិញ ) ។
-
តើការរស់ឡើងវិញមានន័យដូចម្តេច ? ( វិញ្ញាណ និង រូបកាយរបស់មនុស្សម្នាក់ត្រូវផ្គុំចូលគ្នាវិញ ហើយពុំបែកចេញពីគ្នាទៀតឡើយ [ សូមមើល គ. និង ស. ១៣៨:១៧ ] ) ។
សូមអញ្ជើញសិស្សម្នាក់អាន កូរិនថូសទី ១ ១៥:២០-២២ ឲ្យឮៗ ។ ចូរសុំឲ្យសិស្សក្នុងថ្នាក់ផ្ទៀងតាម រកមើលពីរបៀបដែលការមានព្រះជន្មឡើងវិញរបស់ព្រះយេស៊ូវគ្រីស្ទជះឥទ្ធិពលដល់យើងម្នាក់ៗ ។
-
តើយើងបានរងឥទ្ធិពលយ៉ាងណាដែរ ដោយសារតែការមានព្រះជន្មឡើងវិញរបស់ព្រះយេស៊ូវគ្រីស្ទ ? ( បន្ទាប់ពីសិស្សឆ្លើយហើយ សូមសរសេរគោលលទ្ធិខាងក្រោមនៅលើក្ដារខៀនក្រោមពាក្យ ជីវិតក្រោយពីជីវិតនេះ ៖ ដោយសារការមានព្រះជន្មរស់ឡើងវិញរបស់ព្រះយេស៊ូវគ្រីស្ទ នោះមនុស្សទាំងអស់នឹងបានរស់ឡើងវិញ ) ។
សូមអញ្ជើញសិស្សម្នាក់អាន វិវរណៈ ២០:១២ ឲ្យឮ ។ បន្ទាប់មក សូមសួរ ៖
-
តើនឹងមានអ្វីកើតឡើងចំពោះយើងម្នាក់ៗ បន្ទាប់ពីយើងបានរស់ឡើងវិញ ?
សូមពន្យល់ថា បញ្ជីជីវិតអាចតំណាងឲ្យគំនិត និង ទង្វើរបស់មនុស្សម្នាក់នៅក្នុងជីវិតនេះ ក៏ដូចជាកំណត់ត្រាដែលបានរក្សានៅទុកស្ថានសួគ៌អំពីសេចក្ដីសុចរិតដែរ ( សូមមើល Bible Dictionary « Book of life » ) ។ សូមគូសបញ្ជាក់ថា យើងត្រូវបានកាត់សេចក្ដី ពុំមែនតែទៅលើកិច្ចការរបស់យើងប៉ុណ្ណោះនោះទេ ប៉ុន្តែក៏ស្របទៅតាមគំនិត ពាក្យសម្ដី និង បំណងប្រាថ្នារបស់យើងផងដែរ ( សូមមើល ម៉ូសាយ ៤:៣០, អាលម៉ា ១២:១៤, ៤១:៣, គ. និង ស. ១៣៧:៩ ) ។
អ្នកគួរផ្ដល់យោបល់ឲ្យសិស្សសរសេរ យ៉ូហាន ៥:២២ នៅលើរឹមនៃព្រះគម្ពីររបស់ពួកគេក្បែរ វិវរណៈ ២០:១២ ។ ចូរសុំឲ្យសិស្សអាន យ៉ូហាន ៥:២២ ដោយស្ងៀមស្ងាត់ ហើយរកមើលថាតើនរណានឹងកាត់សេចក្ដីយើង ។
-
តើនរណានឹងកាត់សេចក្ដីយើង ? ( បន្ទាប់ពីសិស្សឆ្លើយហើយ សូមសរសេរគោលលទ្ធិខាងក្រោមនៅលើក្ដារខៀនក្រោមពាក្យ ជីវិតក្រោយពីជីវិតនេះ ៖ ព្រះយេស៊ូវគ្រីស្ទនឹងកាត់សេចក្ដីមនុស្សលោកទាំងអស់ ) ។
សូមរំឭកសិស្សថា គោលបំណងដ៏សំខាន់បំផុតនៃផែនការរបស់ព្រះវរបិតាសួគ៌គឺ ដើម្បីផ្ដល់ឱកាសឲ្យយើងទទួលបានជីវិតដ៏នៅអស់កល្បជានិច្ច ឬភាពតម្កើងឡើង ដែលវាមានន័យថាជាការប្រែក្លាយដូចជាព្រះវរបិតាសួគ៌ ហើយរស់នៅជាមួយនឹងទ្រង់ក្នុងក្រុមគ្រួសារដ៏នៅអស់កល្បជានិច្ចជារៀងដរាបតទៅ ។ អ្នកគួរបង្ហាញរូបភាពមួយពីគ្រួសាររបស់អ្នក ហើយពន្យល់ថាហេតុអ្វីការដែលអ្នកអាចរស់នៅជាមួយនឹងព្រះវរបិតាសួគ៌ និងគ្រួសាររបស់អ្នកជារៀងរហូតនោះគឺជារឿងដ៏សំខាន់សម្រាប់អ្នក ។
ចូរសុំឲ្យសិស្សម្នាក់អាន យ៉ូហាន ៣:១៦-១៧ ឲ្យឮៗ ។ ចូរសុំឲ្យសិស្សផ្សេងទៀតផ្ទៀងតាម ហើយរកមើលអ្វីដែលយើងត្រូវធ្វើដើម្បីទទួលជីវិតដ៏នៅអស់កល្បជានិច្ច ( ឬអស់កល្បអស់កាលជានិច្ច ) ។
-
តើយើងត្រូវធ្វើអ្វីខ្លះដើម្បីទទួលជីវិតដ៏នៅអស់កល្បជានិច្ច ? ( សូមពន្យល់ថា ការជឿលើព្រះរាជបុត្រាបង្កើតតែមួយ មានន័យថាការអនុវត្តសេចក្ដីជំនឿលើព្រះយេស៊ូវគ្រីស្ទ ហើយរស់នៅស្របតាមដំណឹងល្អរបស់ទ្រង់ ដែលរួមបញ្ចូលទាំងការទទួលពិធីបរិសុទ្ធនៅក្នុងព្រះវិហារបរិសុទ្ធផងដែរ ) ។
-
តើអ្នកនឹងសង្ខេប យ៉ូហាន ៣:១៦ ឲ្យទៅជាគោលការណ៍មួយបានយ៉ាងដូចម្ដេច ? ( បន្ទាប់ពីសិស្សឆ្លើយហើយ សូមសរសេរគោលការណ៍ខាងក្រោមនៅលើក្ដារខៀនក្រោមពាក្យ ជីវិតក្រោយពីជីវិតនេះ ៖ ប្រសិនបើយើងអនុវត្តសេចក្ដីជំនឿលើព្រះយេស៊ូវគ្រីស្ទ ហើយរស់នៅស្របតាមដំណឹងល្អរបស់ទ្រង់ នោះទើបយើងអាចទទួលបានជីវិតដ៏នៅអស់កល្បជានិច្ច ) ។
សូមរំឭកសិស្សពីសំណួរដែលអ្នកបានសួរកាលពីចាប់ផ្ដើមថ្នាក់ ៖ « តើអ្នកនឹងឆ្លើយបែបណាដែរ ប្រសិនបើមនុស្សម្នាក់សួរអ្នកថាហេតុអ្វីបានជាព្រះយេស៊ូវគ្រីស្ទជាអង្គដ៏សំខាន់ចំពោះអ្នក ? » ចូរសុំឲ្យសិស្សពន្យល់ពីរបៀបដែលពួកគេអភិវឌ្ឍបន្ថែមទៀតចំពោះចម្លើយរបស់ពួកគេ ទៅនឹងសំណួរនេះដោយផ្អែកលើអ្វី ដែលពួកគេបានរៀននៅថ្ងៃនេះ ។ អ្នកគួរឲ្យសិស្សពីរបីនាក់ចែកចាយទីបន្ទាល់របស់ពួកគេអំពីព្រះយេស៊ូវគ្រីស្ទ និង តួនាទីរបស់ទ្រង់នៅក្នុងផែនការរបស់ព្រះវរបិតាសួគ៌ ។ អ្នកអាចបញ្ចប់មេរៀននេះដោយចែកទីបន្ទាល់ផ្ទាល់ខ្លួនរបស់អ្នកផងដែរ ។
សេចក្តីពន្យល់ និង ព័ត៌មានសាច់រឿង
ព្រះយេស៊ូវគ្រីស្ទបានចុះសេចក្ដីសញ្ញាធ្វើជាព្រះដ៏ប្រោសលោះមួយអង្គ
កាលកំពុងបម្រើនៅក្នុងគណៈប្រធាននៃពួកចិតសិបនាក់ អែលឌើរ ថាត អរ ខាលីស្ទើរ បានបង្រៀនថា ព្រះយេស៊ូវគ្រីស្ទត្រូវបានព្រះវរបិតាសួគ៌ជ្រើសរើស ហើយបានចុះសេចក្ដីសញ្ញាមួយដើម្បីអនុវត្តដង្វាយធួននៅក្នុងផែនការនៃសេចក្ដីសង្គ្រោះរបស់ព្រះវរបិតា ។
« នៅក្នុងការប្រឹក្សានាជីវិតមុនផែនដីនេះ ព្រះអង្គសង្គ្រោះបានធ្វើសេចក្ដីសញ្ញាជាមួយព្រះវរបិតាដើម្បីអនុវត្តដង្វាយធួន ។ យ៉ូហាន ថេលើរ បានសរសេរថា ‹ សេចក្ដីសញ្ញាមួយដែលបានធ្វើឡើងរវាងទ្រង់ និង ព្រះវរបិតាទ្រង់ ដែលនៅក្នុងសេចក្តីសញ្ញានោះ ទ្រង់បានយល់ព្រមធ្វើឲ្យធួននឹងអំពើបាបរបស់ពិភពលោក › [ ( ឆ្នាំ ១៨៨២ ) ទំព័រ ៩៧ ] ហេតុដូច្នេះហើយទើបទ្រង់ត្រូវបានគេស្គាល់ថាជា ‹ កូនចៀមដែលត្រូវគេសំឡាប់ តាំងពីកំណើតលោកីយ៍មក › ( វិវរណៈ ១៣:៨សូមមើលផងដែរ ម៉ូសេ ៧:៤៧ ) » ( [ ឆ្នាំ ២០០០ ] ទំព័រ ៧៤ ) ។
នៅក្នុង អ័ប្រាហាំ ៣:២៧ យើងអានថា ព្រះយេស៊ូវគ្រីស្ទបានបង្ហាញពីព្រះរាជឆន្ទៈរបស់ទ្រង់ដើម្បីបំពេញតួនាទីនៃព្រះដ៏ប្រោសលោះ កាលទ្រង់មានបន្ទូលថា « ទូលបង្គំនៅឯណេះហើយ សូមចាត់ទូលបង្គំចុះ » ។ អែលឌើរ នែល អេ ម៉ាក់ស្វែល ក្នុងកូរ៉ុមនៃពួកសាវកដប់ពីរនាក់បានបង្រៀនដោយអធិប្បាយពីបន្ទូលរបស់ព្រះយេស៊ូវគ្រីស្ទ ៖
« គឺគ្រាមួយនៃគ្រាដ៏ពិសេសទាំងនោះហើយ ដែលបន្ទូលយ៉ាងខ្លីត្រូវបានបន្លឺឡើង ។ គ្មាននរណាម្នាក់បានធ្វើដូចជាព្រះយេស៊ូវឡើយ ដោយបន្ទូលតែប៉ុន្មានម៉ាត់ ប៉ុន្តែបានធ្វើយ៉ាងច្រើនលើសលុបដល់មនុស្សជាច្រើន កាលទ្រង់ថ្វាយអង្គទ្រង់ដើម្បីបង់ថ្លៃសម្រាប់យើងគ្រប់គ្នា »( Plain and Precious Things [ ឆ្នាំ ១៩៨៣ ] ទំព័រ ៥៣ ) ។
ដង្វាយធួននៃព្រះយេស៊ូវគ្រីស្ទ ជួយយើងឲ្យយកឈ្នះលើអំពើបាប និងសេចក្ដីស្លាប់ ។
អែលឌើរ អិម រ័សុល បាឡឺដ ក្នុងកូរ៉ុមនៃពួកសាវកដប់ពីរនាក់បានពន្យល់ថា ដង្វាយធួនរបស់ព្រះយេស៊ូវគ្រីស្ទអនុញ្ញាតឲ្យយើងយកឈ្នះលើឥទ្ធិពលនៃការធ្លាក់របស់អ័ដាម និង អេវ៉ា រួមទាំងឥទ្ធិពលនៃអំពើបាបផ្ទាល់ខ្លួនរបស់យើងផងដែរ ៖
« ជាលទ្ធផលនៃអំពើរំលងរបស់អ័ដាម មនុស្សលោកត្រូវបានបែកចេញពីព្រះ ( សូមមើល រ៉ូម ៦:២៣ ) ហើយនឹងត្រូវបែកចេញជារៀងរហូត ដរាបណារកឃើញវិធីមួយដើម្បីកាត់ផ្ដាច់ចំណងនៃសេចក្ដីស្លាប់ ។ ការណ៍នេះពុំងាយស្រួលឡើយ ពីព្រោះវាតម្រូវឲ្យមានការលះបង់ដោយប្រយោលពីតួអង្គមួយអង្គដែលគ្មានអំពើបាបសោះ ហេតុដូច្នេះហើយទើបទ្រង់អាចលើកដាក់មកលើអង្គទ្រង់នូវអំពើបាបរបស់មនុស្សលោក ។
« សំណាងល្អ ព្រះយេស៊ូវគ្រីស្ទបានបំពេញការលះបង់ដោយភាពអង់អាចក្លាហាននៅក្នុងទីក្រុងយេរូសាឡិមកាលពីបុរាណ ។ … ព្រះយេស៊ូវបានរងទុក្ខដោយសុទ្ធចិត្ត ដើម្បីឲ្យយើងទាំងអស់គ្នាអាចមានឱកាសនឹងត្រូវបានលាងសម្អាត —តាមរយៈការមានសេចក្ដីជំនឿទៅលើទ្រង់ ការប្រែចិត្តពីអំពើបាបរបស់យើង ការជ្រមុជទឹកដោយសិទ្ធិអំណាចបព្វជិតភាពត្រឹមត្រូវ ការទទួលបានអំណោយទានធ្វើឲ្យបរិសុទ្ធនៃព្រះវិញ្ញាណបរិសុទ្ធដោយការបញ្ជាក់ និង ការទទួលយកពិធីការដ៏សំខាន់ផ្សេងទៀត»( « The Atonement and the Value of One Soul » ឬ Liahona ខែ ឧសភា ឆ្នាំ២០០៤ ទំព័រ ៨៤–៨៥ ) ។
ព្រះយេស៊ូវគ្រីស្ទគឺជាតួអង្គយ៉ាងសំខាន់នៅក្នុងផែនការនៃសេចក្ដីសង្គ្រោះ ។
ប្រធាន ហ្គរដុន ប៊ី ហ៊ិងគ្លី បានថ្លែងទីបន្ទាល់ពីផ្នែកសំខាន់របស់ព្រះយេស៊ូវគ្រីស្ទ ក្នុងនាមជាតួអង្គយ៉ាងសំខាន់នៅក្នុងផែនការសង្គ្រោះ ៖
« ដង្វាយធួនរបស់ [ ព្រះយេស៊ូវគ្រីស្ទ] គឺជាព្រឹត្តិការណ៍ដ៏អស្ចារ្យបំផុតនៅក្នុងប្រវត្តិសាស្ត្ររបស់មនុស្សលោក ។ គ្មានអ្វីអាចប្រៀបផ្ទឹមនឹងព្រឹត្តិការណ៍នេះបានឡើយ ។ វាគឺជាផ្នែកដ៏សំខាន់បំផុតនៃផែនការរបស់ព្រះវរបិតាយើង សម្រាប់សុភមង្គលកូនចៅរបស់ទ្រង់ទាំងឡាយ ។ ប្រសិនបើគ្មានវាទេ មនុស្សលោកនឹងរលាយសាបសូន្យដោយគ្មានសេចក្ដីសង្ឃឹម ឬអនាគត » ( « Inspirational Thoughts » ខែ កញ្ញា ឆ្នាំ២០០៧ ទំព័រ ៨ សូមមើលផងដែរ យ៉ូហាន ៣:១៦ ) ។
ព្រះយេស៊ូវគ្រីស្ទ « បានបង្កើតពិភពលោកទាំងឡាយ »
ផែនដីដែលយើងរស់នៅ ពុំមែនជាភពតែមួយគត់ ដែលព្រះយេស៊ូវគ្រីស្ទបានបង្កើតនោះឡើយ ។ ហេព្រើរ ១:១–២ ជួយយើងឲ្យយល់ថា ព្រះយេស៊ូវគ្រីស្ទ « បានបង្កើតពិភពលោកទាំងឡាយ » ក្រោមការដឹកនាំរបស់ព្រះ ដែលជាព្រះវរបិតា ។ គម្ពីរម៉ូសេបើកសម្ដែងថា ទ្រង់បានបង្កើតពិភពលោក « ដ៏ច្រើនឥតគណនា » ( ម៉ូសេ ១:៣២–៣៣ ) ។