យ៉ូហានទី ១

សេចក្ដីផ្ដើម

សាវកយ៉ូហានបានអញ្ជើញឲ្យសមាជិកសាសនាចក្រ ស្វែងរកសេចក្តីប្រកបជាមួយព្រះជាព្រះវរបិតា និងព្រះរាជបុត្រាទ្រង់គឺព្រះយេស៊ូវគ្រីស្ទ ។ លោកបានគូសបញ្ជាក់ពីភាពចាំបាច់ក្នុងការគោរពបញ្ញត្តិព្រះ ដើម្បីបង្ហាញសេចក្តីស្រឡាញ់របស់យើងចំពោះទ្រង់ ។ យ៉ូហានក៏បានរំឭកសមាជិកសាសនាចក្រឲ្យចេះស្រឡាញ់គ្នាទៅវិញទៅមកផងដែរ ។

យ៉ូហានទី ១

យ៉ូហានពន្យល់ពីសារៈសំខាន់នៃការគោរពព្រះបញ្ញត្តិ និងឲ្យចេះស្រឡាញ់គ្នាទៅវិញទៅមក

នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក សូមសរសេរពាក្យ ការក្បត់សាសនា និង និយមន័យរបស់វា ។ ប្រសិនបើអ្នកត្រូវការជំនួយ សូមប្រើ Topical Guide សេចក្ដីណែនាំដល់បទគម្ពីរទាំងឡាយ ឬ Basic Doctrines ឯកសារដែលមាននៅដើមទំព័រនៃសៀវភៅណែនាំនេះ ។

សាវកយ៉ូហានបានសរសេរសំបុត្រនេះ នាគ្រាដែលការក្បត់សាសនាកំពុងគំរាមកំហែងសាសនាចក្រ ។ លោកបានព្រមានពួកបរិសុទ្ធអំពីពួកទទឹងនឹងព្រះគ្រីស្ទ ( សូមមើល យ៉ូហានទី ១ ២:១៨–២៦, ៤:៣ ) ។ អ្នកទទឹងនឹងព្រះគ្រីស្ទគឺ « នរណាក៏ដោយ ឬ អ្វីក៏ដោយ ដែលក្លែងបន្លំផែនការនៃដំណឹងល្អដ៏ពិតនៃសេចក្ដីសង្គ្រោះ និង ដែលប្រឆាំងនឹងព្រះគ្រីស្ទដោយបើកចំហ ឬ ដោយសម្ងាត់ក្ដី » ព្រមទាំងប្រឆាំងនឹងសិទ្ធិអំណាច និង ការបង្រៀនរបស់អ្នកបម្រើដែលទ្រង់បានរើស ( សេចក្ដីណែនាំដល់បទគម្ពីរទាំងឡាយ « អ្នកទទឹងនឹងព្រះគ្រីស្ទ » scriptures.lds.org) ។ អ្នកទទឹងនឹងព្រះគ្រីស្ទមួយចំនួននៅក្នុងជំនាន់របស់យ៉ូហាន បានបង្រៀនថាព្រះយេស៊ូវគ្រីស្ទពុំមានរូបកាយឡើយ អំឡុងពេលនៅលើផែនដីនេះ ប៉ុន្តែគ្រាន់តែបង្ហាញជារូបកាយបែបនោះប៉ុណ្ណោះ ។

សូមអាន យ៉ូហានទី ១ ១:១-៤ ដោយរកមើលអ្វីដែលយ៉ូហានបានឆ្លើយបដិសេធចំពោះការបង្រៀនខុសឆ្គងនោះ ។ សូមកត់សម្គាល់ថាពាក្យ « ព្រះបន្ទូលនៃជីវិត » នៅក្នុង ខទី ១ សំដៅទៅលើព្រះយេស៊ូវគ្រីស្ទ ។

សូមកត់សម្គាល់នៅក្នុង ខទី ៣–៤ ថាយ៉ូហានចង់ឲ្យពួកបរិសុទ្ធ មានសេចក្តីប្រកបជាមួយថ្នាក់ដឹកនាំសាសនាចក្រ ដែលមានសេចក្តីប្រកបជាមួយព្រះវរបិតាសួគ៌ និង ព្រះយេស៊ូវគ្រីស្ទ ។ លោកក៏មានប្រាថ្នាថា ពួកគេជួបបទពិសោធន៍នៃសេចក្ដីអំណរពេញលេញផងដែរ ។ គោលការណ៍មួយដែលយើងអាចរៀនពីខគម្ពីរទាំងនេះគឺថា ប្រសិនបើយើងទទួល ហើយធ្វើតាមការបង្រៀនរបស់ព្យាការី និង សាវក នោះយើងអាចទទួលបានសេចក្តីប្រកបជាមួយព្រះវរបិតា និង ព្រះរាជបុត្រា ។

ដើម្បីមានសេចក្តីប្រកបមានន័យថា រីករាយជាមួយនឹងទំនាក់ទំនងនៃការទុកចិត្ត មិត្តភាព អន្តរកម្ម និង សាមគ្គីភាព ។ សូមគិតអំពីបុរសនានាដែលបម្រើនៅក្នុងគណៈប្រធានទីមួយ និងកូរ៉ុមនៃពួកសាវកដប់ពីរនាក់ ។ តើការធ្វើតាមការបង្រៀនរបស់ព្យាការី និង សាវកជួយយើងឲ្យទទួលបានសេចក្តីប្រកបជាមួយព្រះវរបិតាសួគ៌របស់យើង និងព្រះរាជបុត្រាទ្រង់គឺព្រះយេស៊ូវគ្រីស្ទ យ៉ាងដូចម្ដេចដែរ ?

សូមអាន យ៉ូហានទី ១ ១:៥-៦ ដោយរកមើលអ្វីដែលអាចរារាំងយើង ពីការមានសេចក្តីប្រកបជាមួយព្រះវរបិតាយើងដែលគង់នៅស្ថានសួគ៌ ។

ប្រធានបទដ៏សំខាន់បំផុតនៃការសរសេររបស់យ៉ូហាននោះត្រូវបានបង្ហាញនៅក្នុង យ៉ូហានទី ១ ១:៥—ព្រះយេស៊ូវគ្រីស្ទគឺជាពន្លឺនៃពិភពលោក ( សូមមើល យ៉ូហាន ១:៤–៩, ៨:១២, ៩:១–៥) ។ សូមគិតពីគ្រាមួយ នៅពេលអ្នកបានដើរចូលទៅក្នុងទីងងឹត ។ យ៉ូហានប្រើថាពាក្យ សេចក្តីងងឹត សំដៅលើភាពងងឹតខាងវិញ្ញាណ ។

តើអ្នកគិតថា ការដើរនៅក្នុងសេចក្តីងងឹតខាងវិញ្ញាណមានន័យដូចម្ដេច ?

សូមសិក្សា យ៉ូហានទី ១ ១:៧–២:៦ ដោយរកមើលសេចក្ដីពិតដែលយ៉ូហានបានបង្រៀន ដែលអាចជួយយើងឲ្យស្គាល់ពីរបៀបដើម្បីដើរនៅក្នុងពន្លឺនៃដំណឹងល្អ ។ ពាក្យ ដង្វាយធួន នៅក្នុង យ៉ូហានទី ១ ២:២ មានន័យថា ការពលិកម្មធួនដែលបំពេញនូវសេចក្តីយុត្តិធម៌នៃព្រះ ។

នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក សូមសរសេរសេចក្តីពិតមួយចំនួន ដែលអ្នករកឃើញនៅក្នុង យ៉ូហានទី ១ ១:៧–២:៦ ។ បន្ទាប់មកសូមគិតអំពីរបៀបដែលអ្នកនឹងឆ្លើយសំណួរដូចតទៅនេះ ៖
1. ហេតុអ្វីអ្នកគិតថាសេចក្តីស្រឡាញ់របស់យើងចំពោះព្រះ ប្រែកាន់តែល្អឥតខ្ចោះ ឬ ពេញលេញ នៅពេលយើងគោរពព្រះបញ្ញត្តិរបស់ទ្រង់ ?
2. តើនៅពេលណាដែលអ្នកជួបនូវបទពិសោធន៍នៃសេចក្តីស្រឡាញ់ដ៏មហិមាចំពោះព្រះ នៅពេលអ្នកព្យាយាមគោរពតាមព្រះបញ្ញត្តិរបស់ទ្រង់ ?

សូមអានការពិពណ៌នាដូចតទៅនេះ ដោយរកមើលបទបញ្ញត្តិពិសេសមួយ ដែលយុវវ័យទាំងពីរនេះមានការលំបាកដើម្បីគោរពតាម ៖

យុវជនម្នាក់អានព្រះគម្ពីររាល់ថ្ងៃ ហើយធ្វើកាតព្វកិច្ចបព្វជិតភាពជាច្រើនរបស់គាត់ដោយស្មោះត្រង់ ប៉ុន្តែជាញឹកញាប់គាត់ពុំធ្វើល្អដាក់ប្អូនប្រុសរបស់គាត់ទេ ។
យុវនារីម្នាក់ចូលរួមរាល់ការប្រជុំនៅព្រះវិហារជាទៀងទាត់ ហើយបានទទួលការទទួលស្គាល់ភាពជាយុវនារីរបស់នាង ។ ប៉ុន្តែ ជាញយៗនាងបានចុះផ្សាយវាចាដែលមិនសមរម្យអំពីមិត្តភក្តិរួមថ្នាក់ និង គ្រូបង្រៀនរបស់នាងនៅលើប្រព័ន្ធផ្សព្វផ្សាយសង្គម ។

តើបទបញ្ញត្តិអ្វីដែលយុវវ័យថ្ងៃចុងក្រោយទាំងពីរនាក់មានការលំបាកគោរពតាមនោះ ? ( សូមមើលវគ្គចំណេះចំណានខគម្ពីរ ម៉ាថាយ ២២:៣៦–៣៩ សម្រាប់ជំនួយក្នុងការឆ្លើយសំណួរនេះ ) ។

សូមគិតអំពីស្ថានភាពនោះដែលអ្នកអាចមានការលំបាក ដើម្បីបង្ហាញក្ដីស្រឡាញ់ចំពោះអ្នកដទៃ ។

សូមអាន យ៉ូហានទី ១ ២:៩–១១, ៤:៧–១១, ១៩–២១ ដោយរកមើលអ្វីដែលយ៉ូហានបានបង្រៀនអំពីសេចក្តីស្រឡាញ់ ។ សូមពិចារណាអំពីការគូសចំណាំ កត់ចំណាំការបង្រៀននានា ដែលមានន័យចំពោះអ្នក ។ រួចសូមឆ្លើយសំណួរខាងក្រោមនេះ ដាក់នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖
1. តើការបង្រៀនមួយណារបស់យ៉ូហានអំពីសេចក្តីស្រឡាញ់ដែលមានអត្ថន័យខ្លាំងចំពោះអ្នក ? ហេតុអ្វី ?
2. គោលការណ៍មួយដែលយើងអាចរកឃើញចេញពីខគម្ពីរទាំងនេះគឺថា នៅពេលយើងស្រឡាញ់ព្រះ នោះយើងនឹងស្រឡាញ់អ្នកដទៃ ។ ហេតុអ្វីអ្នកគិតថា យើងនឹងបង្ហាញសេចក្តីស្រឡាញ់របស់យើងចំពោះអ្នកដទៃ នៅពេលយើងស្រឡាញ់ព្រះពិតប្រាកដនោះ ?

សូមកត់ចំណាំថា យ៉ូហានបាននិយាយដល់ការស្អប់ខ្ពើមអ្នកដទៃនៅក្នុង យ៉ូហានទី ១ ៤:២០ ។ មានរបៀបជាច្រើនដែលយើងអាចដកយកសេចក្តីស្រឡាញ់ ឬ សេចក្តីសប្បុរសរបស់យើងពីអ្នកដទៃ ក្រៅពីការស្អប់ខ្ពើមពួកគេ ។ តើអ្នកគិតថា របៀបទាំងនោះអាចមានអ្វីខ្លះ ?

សូមអាន យ៉ូហានទី ១ ៣:១៧-១៨ ដោយរកមើលរបៀបដែលយើងគួរតែបង្ហាញសេចក្តីស្រឡាញ់របស់យើងចំពោះអ្នកដទៃ ។

ហេតុអ្វីអ្នកគិតថាវាសំខាន់ ដែលយើងបង្ហាញសេចក្តីស្រឡាញ់របស់យើង តាមរយៈទង្វើរបស់យើង ពុំមែនតាមតែពាក្យសម្តីនោះ ?

តើអ្នកស្គាល់នរណាដែលជាគំរូល្អនៃការបង្ហាញសេចក្តីស្រឡាញ់ចំពោះអ្នកដទៃនោះ ?

ប្រសិនបើមានពេល សូមមើលវីដេអូដែលមានចំណងជើងថា « Two Brothers Apart » ដែលមាននៅគេហទំព័រ LDS.org ។ នៅពេលអ្នកមើលវា សូមមើលពីរបៀបដែលបងប្អូនប្រុសទាំងនេះបានអនុវត្តគោលការណ៍នេះ និង ឥទ្ធិពលដែលគោលការណ៍នេះមានចំពោះពួកគេម្នាក់ៗ ។

សូមគិតអំពីនរណាម្នាក់នៅក្នុងជីវិតរបស់អ្នក ដែលអ្នកអាចបង្ហាញសេចក្តីស្រឡាញ់កាន់តែច្រើនជាងមុន ។ នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក សូមសរសេរឈ្មោះបុគ្គលនោះ និង អ្វីដែលជាក់លាក់ ដែលអ្នកអាចធ្វើដើម្បីបង្ហាញសេចក្តីស្រឡាញ់ ឬ សេចក្តីសប្បុរសរបស់អ្នកចំពោះបុគ្គលនោះ ។ អ្នកមិនចាំបាច់បង្ហាញសេចក្តីស្រឡាញ់របស់អ្នកក្នុងរបៀបមួយដ៏ហួសហេតុឡើយ ។ កាយវិការនៃសេចក្តីសប្បុរស និង ចិត្តល្អតូចតាច សាមញ្ញ ជាញយៗវាមានអត្ថន័យខ្លាំងបំផុត ។

នៅពេលយើងបង្ហាញសេចក្តីស្រឡាញ់របស់យើងតាមរយៈសកម្មភាពរបស់យើង នោះយើងកំពុងដើរដូចជាព្រះយេស៊ូវបានយាង ឬ រស់នៅក្នុងជីវិតមួយដូចជាព្រះយេស៊ូវបានរស់នៅ ( សូមមើល យ៉ូហានទី ១ ២:៦, ៣:១–៣ ) ។ ព្រះអម្ចាស់នឹងប្រទានពរដល់អ្នក នៅពេលអ្នកអនុវត្តតាមសេចក្ដីពិតនេះនៅក្នុងជីវិតរបស់អ្នក ។

សូមអាន យ៉ូហានទី ១ ៤:១២ ហើយបន្ទាប់មកសូមអាន ការបកប្រែដោយយ៉ូសែប ស្ម៊ីធ យ៉ូហានទី ១ ៤:១២ ( នៅក្នុង យ៉ូហានទី ១ ៤:១២ ) ។ តើការបកប្រែដោយយ៉ូសែប ស្ម៊ីធផ្តល់នូវភាពច្បាស់លាស់អ្វីខ្លះ អំពីការអាចមើលឃើញព្រះ ?

នៅក្នុង យ៉ូហានទី ១ ៥ យ៉ូហានបានបង្រៀនពីអ្វីដែលយើងត្រូវតែធ្វើ ដើម្បីកើតម្តងទៀតគឺថា « មានព្រះវិញ្ញាណនៃព្រះអម្ចាស់បណ្តាលឲ្យមានការផ្លាស់ប្តូរយ៉ាងធំក្នុងដួងចិត្តរបស់មនុស្សម្នាក់ ដើម្បី [ គាត់ ] ពុំមានបំណងប្រាថ្នាធ្វើអាក្រក់ទៀតឡើយ ប៉ុន្ដែមានបំណងស្វែងរកការណ៍នៃព្រះវិញ ( សេចក្ដីណែនាំដល់បទគម្ពីរទាំងឡាយ « កើតម្តងទៀត កើតពីព្រះ » scriptures.lds.org ) ។ សូមអានវគ្គខគម្ពីរខាងក្រោមនេះ ហើយសរសេរនូវអ្វីដែលអ្នកត្រូវតែធ្វើដើម្បីបានកើតម្តងទៀត ៖

យ៉ូហានទី ១ ៥:១

យ៉ូហានទី ១ ៥:២-៣

យ៉ូហានទី ១ ៥:៤

ការបកប្រែដោយយ៉ូសែប ស្ម៊ីធ យ៉ូហានទី ១ ៥:១៨ ( នៅក្នុង យ៉ូហានទី ១ ៥:១៨ )

សូមសរសេរឃ្លាខាងក្រោមនេះ ពីក្រោមកិច្ចការថ្ងៃនេះនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖

ខ្ញុំបានសិក្សា យ៉ូហានទី ១ ហើយបានបញ្ចប់មេរៀននេះនៅ ( កាលបរិច្ឆេទ ) ។

សំណួរ គំនិត និង ការយល់ដឹងបន្ថែមដែលខ្ញុំចង់ចែកចាយជាមួយគ្រូរបស់ខ្ញុំ ៖