សេចក្ដីណែនាំស្តីពីគម្ពីរ យ៉ូហានទី ២
ហេតុអ្វីសិក្សាគម្ពីរនេះ ?
នៅក្នុងសំបុត្រទីពីររបស់សាវកយ៉ូហាន បានបង្ហាញកង្វល់អំពីឥទ្ធិពលនៃការក្បត់សាសនានៅក្នុងសាសនាចក្រ ។ ទន្ទឹមនឹងនោះដែរ លោកក៏បានបង្ហាញអំណរចំពោះសមាជិកសាសនាចក្រដែលបានបន្តមានភាពរឹងមាំ ហើយភក្ដីភាពចំពោះដំណឹងល្អ ( សូមមើល យ៉ូហានទី ២ ១:៤ ) ។ ប្រសាសន៍របស់លោកបង្ហាញពីអំណរ និងការដឹងគុណដែលថ្នាក់ដឹកនាំសាសនាចក្រមានចំពោះជនដែលបន្តស្មោះត្រង់ចំពោះព្រះអម្ចាស់ ។ នៅពេលអ្នកសិក្សា យ៉ូហានទី ២ ពួកគេអាចទទួលបានភាពរឹងមាំដោយការរំឭករបស់យ៉ូហានឲ្យចេះស្រឡាញ់គ្នា គោរពតាមព្រះបញ្ញត្តិរបស់ព្រះ ហើយរស់នៅដោយស្មោះត្រង់តាមគោលលទ្ធិនៃព្រះគ្រីស្ទ ។
តើនរណាបានសរសេរគម្ពីរនេះ ?
អ្នកនិពន្ធបានបង្ហាញខ្លួនលោកជា « អ្នកចាស់ទុំ » ( យ៉ូហានទី ២ ១:១ ) ហើយយោងតាមទម្លាប់យ៉ូហានដែលជាសាវកមួយរូបក្នុងចំណោមពួកសាវកដើមទាំងដប់ពីរនាក់ បានសរសេរសំបុត្រនេះ ( សូមមើល Bible Dictionary « John, Epistles of » ) ។
តើគម្ពីរនេះត្រូវបានសរសេរឡើងនៅពេលណា ហើយនៅកន្លែងណា ?
គ្មាននរណាម្នាក់ដឹងពិតប្រាកដពីពេលវេលា និងទីកន្លែងដែលគម្ពីរយ៉ូហានទី ២ ត្រូវបានសរសេរឡើងឡើយ ។ ប្រសិនបើទម្លាប់នៃការស្នាក់នៅដ៏យូររបស់យ៉ូហាននៅអេភេសូរមានភាពត្រឹមត្រូវ នោះលោកអាចសរសេរសំបុត្រនេះនៅទីនោះនៅចន្លោះ គ.ស. ឆ្នាំ ៧០ និង ១០០ ។
តើគម្ពីរនេះត្រូវបានសរសេរដល់នរណា ហើយតើហេតុអ្វី ?
សំបុត្រទីពីររបស់យ៉ូហានបានសរសេរទៅកាន់ « លោកស្រីរើសតាំង និងកូនចៅរបស់លោកស្រី » ( យ៉ូហានទី ២ ១:១ ) ។ យើងមិនបានដឹងថាយ៉ូហានកំពុងតែលើកឡើងពីគ្រួសារលោក ឬមនុស្សមួយក្រុមជាក់លាក់ផ្សេងទៀត ឬកំពុងថ្លែងទៅកាន់សាសនាចក្រដែលប្រើជាពាក្យប្រៀបធៀបនោះទេ ។
អែលឌើរ ប្រ៊ូស អ័រ ម៉ាក់ខន់ឃី ក្នុងកូរ៉ុមនៃពួកសាវកដប់ពីរនាក់បានសរសេរថា យ៉ូហានទី ២ និងយ៉ូហានទី ៣ ប្រហែលជាសំបុត្រដែលយ៉ូហានសរសេរទៅសមាជិកគ្រួសារលោកផ្ទាល់ ( សូមមើល Doctrinal New Testament Commentary ភាគទី ៣ [ ឆ្នាំ១៩៦៥–៧៣ ], ៣:៤០៩–១០, ១២–១៤ ) ។
អាចនិយាយម្យ៉ាងទៀតបានថាឃ្លា « លោកស្រីរើសតាំង » គឺសំដៅទៅលើក្រុមជំនុំសាសនាគ្រីស្ទមួយ ( សូមមើល យ៉ូហានទី ២ ១:១៣ ) ។ ពាក្យភាសាក្រិកសម្រាប់ពាក្យ ព្រះវិហារ ជានាមភេទស្រី ហើយវាជារឿងទូទៅដែលប្រដូចសាសនាចក្រទៅនឹងស្ត្រីម្នាក់ ( សូមមើល អេភេសូរ ៥:២៥–២៧, ៣២, ការបកប្រែដោយយ៉ូសែប ស្ម៊ីធ, វិវរណៈ ១២:១–៣, ៧ [ នៅក្នុងសេចក្ដីណែនាំដល់បទគម្ពីរទាំងឡាយ ], វិវរណៈ ១៩:៧–៨ ) ។
ដូចជានៅក្នុង យ៉ូហានទី ១ យ៉ូហានទំនងជាសរសេរសំបុត្រនេះដើម្បីឆ្លើយតបនឹងការបង្រៀនខុសឆ្គងថា ព្រះយេស៊ូវគ្រីស្ទពុំបានប្រសូតមកកាន់ផែនដីនេះក្នុងរូបកាយជាសាច់ឈាមទេ ។ លោកបានពន្យល់ថា សមាជិកដែលបានបង្រៀនថា ព្រះគ្រីស្ទគ្មានព្រះកាយខាងសាច់ឈាមមិនគួរឲ្យទទួលចូលទៅក្នុងផ្ទះ ឬក្រុមជំនុំរបស់នរណាម្នាក់ឡើយ ( សូមមើល យ៉ូហានទី ២ ១:៧–១០ ) ។
តើគម្ពីរនេះមានលក្ខណៈពិសេសអ្វីខ្លះ ?
នៅក្នុងសំបុត្រនេះយ៉ូហានបានព្រមានអំពីគ្រូបង្រៀនក្លែងក្លាយដែលបានចូលទៅក្នុងសាសនាចក្រ ។ លោកបានណែនាំមិនឲ្យសមាជិកសាសនាចក្រស្ដាប់ ឬសេពគប់នឹងបុគ្គលទាំងនេះឡើយ ។
គម្រោងមេរៀន
យ៉ូហានទី ២ ១ ។ យ៉ូហានរំឭកសមាជិកសាសនាចក្រពីព្រះបញ្ញត្តិឲ្យចេះស្រឡាញ់គ្នាទៅវិញទៅមក ។ លោកព្រមានពីពួកគ្រូបង្រៀនក្លែងក្លាយ និងពួកបោកបញ្ឆោតនៅក្នុងសាសនាចក្រ ហើយទូន្មានសមាជិកសាសនាចក្រកុំបណ្ដោយឲ្យពួកគេបន្តនៅក្នុងក្រុមជំនុំរបស់ខ្លួន ។