សេចក្ដីណែនាំស្តីពី ថែស្សាឡូនីចទី ២
ហេតុអ្វីសិក្សាគម្ពីរនេះ ?
នៅក្នុងសំបុត្រទីពីររបស់លោកទៅកាន់ពួកថែស្សាឡូនីច ប៉ុលបានសរសេរពាក្យពេចន៍ដំបូន្មាន និង សេចក្ដីស្រាយបំភ្លឺទៅដល់សមាជិកសាសនាចក្រដែលយល់ច្រឡំអំពីទិដ្ឋភាពមួយចំនួននៃការយាងមកជាលើកទីពីររបស់ព្រះយេស៊ូវគ្រីស្ទ ។ ការសិក្សាអំពីការបង្រៀននានារបស់លោកអាចជួយអ្នកយល់អំពីលក្ខណៈនៃការក្បត់សាសនាដែលបានកើតឡើង និង របៀបត្រៀមខ្លួនយ៉ាងត្រឹមត្រូវសម្រាប់ការយាងត្រឡប់មកវិញរបស់ព្រះអម្ចាស់ ។
តើនរណាបានសរសេរគម្ពីរនេះ ?
សាវកប៉ុលបានសរសេរ ថែស្សាឡូនីចទី ២ ( សូមមើល ថែស្សាឡូនីចទី ២ ១:១ សូមមើលផងដែរ ថែស្សាឡូនីចទី ២ ២:៥ ; ៣:១៧ ) ។ នៅដើមសំបុត្រមួយច្បាប់នេះ ក៏មានពាក្យជម្រាបសួរពីស៊ីឡាស និង ធីម៉ូថេដែរ ( ថែស្សាឡូនីចទី ២ ១:១ ) ។
តើគម្ពីរនេះត្រូវបានសរសេរឡើងនៅពេលណា ហើយនៅកន្លែងណា ?
« ប៉ុលបានសរសេរសំបុត្រនេះទៅកាន់ពួកថែស្សាឡូនីចពីក្រុងកូរិនថូស អំឡុងពេលការធ្វើដំណើរផ្សព្វផ្សាយសាសនាជាលើកទីពីររបស់លោក » ប្រមាណឆ្នាំ ៥០–៥១ នៃ គ. ស. ( សេចក្ដីណែនាំដល់បទគម្ពីរទាំងឡាយ « សំបុត្ររបស់ប៉ុល » scriptures.lds.org ) ។
តើគម្ពីរនេះត្រូវបានសរសេរដល់នរណា ហើយតើហេតុអ្វី ?
ប៉ុលបានសរសេរថែស្សាឡូនីចទី ២ ទៅកាន់សមាជិកសាសនាចក្រនៅក្រុងថែស្សាឡូនីច ។ ប្រធានបទនៃថែស្សាឡូនីចទី ១ និង ថែស្សាឡូនីចទី ២ មានសភាពស្រដៀងគ្នា ដោយប្រាប់ថា លោកបានសរសេរ ថែស្សាឡូនីចទី ២ ដើម្បីស្រាយបំភ្លឺ ហើយបកស្រាយអំពីសំបុត្រទីមួយ ។ យើងឃើញថាមានពួកបរិសុទ្ធថែស្សាឡូនីចបានទទួលសំបុត្រក្លែងក្លាយមួយដែលអះអាងថាមកពីប៉ុល ដែលបណ្ដាលឲ្យពួកបរិសុទ្ធខ្លះជឿថាការយាងមកជាលើកទីពីរបានកើតឡើងរួចទៅហើយ ( សូមមើល ថែស្សាឡូនីចទី ២ ២:២ ) ។
« នៅចន្លោះពេលដ៏ខ្លីនៃសំបុត្រទាំងពីរច្បាប់នេះ សាសនាចក្របានរងទុក្ខនឹងសេចក្ដីបៀតបៀន [ សូមមើល ថែស្សាឡូនីចទី ២ ១:៤ ] ទស្សនដែលយល់ថាព្រះអម្ចាស់យាងត្រឡប់មកវិញភ្លាមៗ បានបង្កឲ្យមានការរំជើបរំជួលខុសប្រក្រតី [ សូមមើល ថែស្សាឡូនីចទី ២ ២:២ ] » ( Bible Dictionary « Pauline Epistles » ) ។ ប៉ុលបានសរសេរ ថែស្សាឡូនីចទី ២ ដើម្បីពង្រឹងសេចក្ដីជំនឿរបស់សមាជិកទាំងនេះ ហើយដើម្បីកែតម្រូវការយល់ច្រឡំអំពីគោលលទ្ធិ ។
តើមានលក្ខណៈពិសេសអ្វីខ្លះ នៅក្នុងគម្ពីរនេះ ?
សំបុត្រទីពីរទៅកាន់ពួកថែស្សាឡូនីច ផ្ដល់សេចក្ដីលម្អិតពិសេសអំពីការយាងមកជាលើកទីពីររបស់ព្រះយេស៊ូវគ្រីស្ទ ។ ឧទាហរណ៍មួយចំនួន មានរួមបញ្ចូលទាំងគំនិតទាំងឡាយ ដែលប្រាប់ថាព្រះអម្ចាស់នឹងយាងត្រឡប់មកនៅក្នុង « អណ្តាតភ្លើង » ហើយថាពួកទុច្ចរិតនឹង « រងទុក្ខទោស ជាសេចក្តីហិនវិនាសអស់កល្បជានិច្ច ឃ្លាតពីព្រះភក្ត្រនៃព្រះអម្ចាស់ » ( ថែស្សាឡូនីចទី ២ ១:៨–៩ ) ។
នៅក្នុងសំបុត្រនេះយើងអានថា ប៉ុលក៏បានព្យាករអំពីការក្បត់សាសនាដ៏ធំផងដែរ ដោយបង្រៀនថា សាសនាចក្រនឹងស្ថិតនៅក្រោម « ការបញ្ឆោត » ចេញពីដំណឹងល្អ នៅពីមុនការយាងមកជាលើកទីពីររបស់ព្រះអម្ចាស់ ( សូមមើល ថែស្សាឡូនីចទី ២ ២:២–១២ ) ។ សេចក្ដីបង្រៀនរបស់ប៉ុលអំពីការក្បត់សាសនា រំឭកសមាជិកសាសនាចក្រនៅសម័យទំនើបអំពីមូលហេតុដែលការស្ដារឡើងវិញនៃដំណឹងល្អមានសារៈសំខាន់ ។
គម្រោងមេរៀន
ថែស្សាឡូនីចទី ២ ១ ។ ប៉ុលថ្លែងពាក្យជំរាបសួ ហើយសរសើរពួកបរិសុទ្ធនៅក្រុងថែស្សាឡូនីច ។ លោកបង្រៀនថា អ្នកដែលមិនជឿព្រះនឹងជួបសេចក្ដីសងសឹករបស់ព្រះអម្ចាស់នៅពេលការយាងមកជាលើកទីពីរ ។
ថែស្សាឡូនីចទី ២ ២ ។ ប៉ុលកែតម្រូវគំនិតខុសឆ្គងដែលថាការយាងមកជាលើកទីពីរបានកើតឡើងរួចទៅហើយ ហើយព្យាករថា ការក្បត់សាសនានឹងកើតឡើងនៅពីមុនការយាងត្រឡប់មកវិញរបស់ព្រះអម្ចាស់ ។ លោកលើកទឹកចិត្តពួកបរិសុទ្ធថែស្សាឡូនីចឲ្យបន្តមានចិត្តស្មោះត្រង់ ។
ថែស្សាឡូនីចទី ២ ៣ ។ ប៉ុលទូន្មានសមាជិកសាសនាចក្រឲ្យធ្វើការដើម្បីបំពេញសេចក្ដីត្រូវការខាងសាច់ឈាមរបស់ខ្លួន ហើយកុំនឿយណាយក្នុងការធ្វើល្អឡើយ ។