មេរៀនទី ៣០ ៖ ថ្ងៃទី ៣
យ៉ូហានទី ២–យ៉ូហានទី ៣
សេចក្ដីផ្ដើម
សាវកយ៉ូហានបានព្រមានដល់ពួកបរិសុទ្ធអំពីមនុស្សដែលបោកបញ្ឆោត និង បង្រៀនថា ព្រះយេស៊ូវគ្រីស្ទពុំបានប្រសូតមកក្នុងរូបកាយជាសាច់ឈាមទេ ។ លោកក៏បានសរសើរដល់ កៃយុស ជាសមាជិកសាសនាចក្រម្នាក់ចំពោះភាពស្មោះត្រង់របស់គាត់ ។
យ៉ូហាន ទី ២
យ៉ូហានព្រមានអំពីមនុស្សដែលបង្រៀនគោលលទ្ធិក្លែងក្លាយ
សូមគិតពីអត្តពលករដ៏ល្បីល្បាញម្នាក់ ។ តើអត្តពលកររូបនោះអាចធ្វើអ្វីខ្លះដើម្បីបន្តមានសុខភាពល្អដើម្បីរត់បានល្អ ?
តើមានហេតុការណ៍អ្វីអាចកើតមានឡើង ប្រសិនបើអត្តពលករនោះ ឈប់ហាត់ប្រាណ ហើយចាប់ផ្តើមបរិភោគអាហារដែលបំផ្លាញសុខភាព មើលទូរទស្សន៍ច្រើន លេងវីដេអូហ្គេម ហើយប្រើសារធាតុនានាដែលមានគ្រោះថ្នាក់ដល់រាងកាយ បន្ទាប់ពីបានព្យាយាមដើម្បីបានរូបរាងល្អនោះ ?
សូមពិចារណាអំពីរបៀបដែលកិច្ចការរបស់អត្តពលករដ៏មានជោគជ័យនោះត្រូវតែធ្វើ ដើម្បីរក្សាលក្ខខណ្ឌរូបកាយរបស់ពួកគេឲ្យបានល្អបំផុត ដែលអាចប្រៀបធៀបទៅនឹងកិច្ចការដែលសមាជិកសាសនាចក្រត្រូវតែធ្វើ ដើម្បីរក្សាទុកនូវពរជ័យដែលពួកគេបានទទួលតាមរយៈដំណឹងល្អ ។ នៅពេលអ្នកសិក្សា យ៉ូហានទី ២ សូមរកមើលគោលការណ៍មួយ ដែលអាចជួយអ្នកឲ្យរក្សាទុកនូវពរជ័យនានា ដែលអ្នកបានទទួលក្នុងនាមជាសមាជិកសាសនាចក្រ ។
ដូចបានកត់ត្រានៅក្នុង យ៉ូហានទី ២ ១:១–៤ សាវកយ៉ូហាន បានចាប់ផ្តើមសរសេរសំបុត្រនេះ ដោយថ្លែងថា « លោកស្រីរើសតាំង និងកូនចៅរបស់លោកស្រី » ដែលអាចជាការថ្លែងផ្ទាល់ទៅកាន់ស្ត្រីនានាដែលជាសមាជិកនៃសាសនាចក្រ និង កូនៗរបស់ពួកគេ ឬ ភាសានិមិត្តរូបដែលពិពណ៌នាអំពីក្រុមជំនុំសាសនាចក្រមួយ ។
សូមអាន យ៉ូហានទី ២ ១:៥-៦ ដោយរកមើលបទបញ្ញត្តិដែលយ៉ូហានបានរំឭកពួកបរិសុទ្ធ ។
សូមអាន យ៉ូហានទី ២ ១:៧ ដោយរកមើលមូលហេតុដែលយ៉ូហានបានទូន្មានសមាជិកសាសនាចក្រឲ្យ « ប្រព្រឹត្តតាម » ( យ៉ូហានទី ២ ១:៦ ) ឬ គោរពព្រះបញ្ញត្តិរបស់ព្រះ ។
តើពួកអ្នកបោកបញ្ឆោត និង ពួកទទឹងនឹងព្រះគ្រីស្ទកំពុងបង្រៀនអ្វីខ្លះ ?
នៅពេលសាវកយ៉ូហានបានសរសេរសំបុត្រនេះ នោះមានទស្សនៈមួយដែលគេស្គាល់ថាជាលទ្ធិព្រះអរូបកំពុងមានប្រជាប្រិយភាព ។ ពួកអ្នកជឿលទ្ធិព្រះអរូប បានជឿថាព្រះមានភាពតម្កើងឡើង ដែលទ្រង់គង់នៅលើអស់ទាំងការឈឺចាប់ សេចក្តីស្លាប់ ឬ បទពិសោធន៍ផ្សេងទៀតនៃជីវិតរមែងស្លាប់ ។ ហេតុដូច្នោះហើយ ពួកគេបានសន្និដ្ឋានថា ព្រះយេស៊ូវគ្រីស្ទក្នុងនាមជាព្រះរាជបុត្រនៃព្រះ ពុំបានប្រសូតមកទទួលសាច់ និង ឈាមឡើយ ប៉ុន្តែមានតែវិញ្ញាណរបស់ទ្រង់តែប៉ុណ្ណោះដែល ហាក់បីដូចជា ( ជាអត្ថន័យមួយមកពីភាសាក្រិកអំពីពាក្យ លទ្ធិព្រះអរូប បានពន្យល់ ) ធ្វើនូវកិច្ចការនានា ដែលជីវិតរមែងស្លាប់នេះនឹងធ្វើ ឬ ជួបបទពិសោធន៍ ។
តើមានឧទាហរណ៍អ្វីខ្លះអំពីការបង្រៀនខុសឆ្គងនៅជំនាន់យើងនេះ ដែលផ្ទុយនឹងសេចក្តីពិតនានានៃដំណឹងល្អនោះ ?
ហេតុអ្វីការបង្រៀនទាំងនេះវាមានគ្រោះថ្នាក់ដល់ខាងវិញ្ញាណ ?
សូមអាន យ៉ូហានទី ២ ១:៨ ដោយរកមើលអ្វីដែលយ៉ូហានបានទូន្មានសមាជិកសាសនាចក្រ ឲ្យធ្វើដោយសារការបង្រៀនខុសឆ្គងទាំងនេះ ។ « ត្រូវឲ្យអ្នករាល់គ្នាប្រយ័ត្ន » មានន័យថា ប្រុងប្រយ័ត្ន ឬ យកចិត្តទុកដាក់កុំបណ្តោយខ្លួននឹងការបង្រៀនខុសឆ្គងនោះ ។ បានធ្វើហើយនោះ មានន័យថា បានធ្វើកិច្ចការហើយ ( សូមមើល យ៉ូហានទី ២ ១:៨ ) ឬ ធ្វើកិច្ចការឲ្យ ហើយបានទទួល ។
គោលការណ៍មួយ ដែលយើងអាចរៀនចេញពី យ៉ូហានទី ២ ១:៦–៨ គឺថា នៅពេលយើងរក្សាព្រះបញ្ញត្តិរបស់ព្រះ ហើយមានស្មារតីប្រុងប្រយ័ត្ន នោះយើងអាចបន្តរីករាយនឹងពរជ័យនៃដំណឹងល្អដែលយើងបានទទួល ។
-
សូមឆ្លើយសំណួរខាងក្រោមនេះ ដាក់នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖
-
សូមសរសេរពរជ័យដំណឹងល្អនានា ដែលអ្នកបានទទួល និង សង្ឃឹមថាទទួលបាន ។
-
ហេតុអ្វីយើងត្រូវតែបន្តរក្សាបញ្ញត្តិព្រះ ហើយរស់នៅតាមដំណឹងល្អ ដើម្បីទទួលបាន ហើយបន្តរីករាយនឹងពរជ័យនៃដំណឹងល្អដែលយើងបានទទួល ?
-
សូមអាន យ៉ូហានទី ២ ១:៩ ដោយរកមើលអ្វីដែលយ៉ូហានបានបង្រៀនថា កើតឡើងចំពោះ អស់អ្នកដែលរស់នៅតាម ឬ បន្តធ្វើតាមគោលលទ្ធិនៃព្រះគ្រីស្ទ ។ គោលលទ្ធិនៃព្រះគ្រីស្ទគឺមានសេចក្តីជំនឿ ប្រែចិត្ត ជ្រមុជទឹក ទទួលអំណោយទាននៃព្រះវិញ្ញាណបរិសុទ្ធ ពីម្នាក់ដែលមានសិទ្ធិអំណាចបព្វជិតភាពត្រឹមត្រូវ ហើយកាន់ខ្ជាប់ដរាបដល់ចុងបំផុត ( សូមមើល នីហ្វៃទី ២ ៣១:១៥–២១ ) ។
សេចក្តីពិតមួយដែលយើងអាចរៀនពី យ៉ូហានទី ២ ១:៩ គឺថា ប្រសិនបើយើងរស់នៅតាមគោលលទ្ធិនៃព្រះគ្រីស្ទ នោះយើងនឹងមានព្រះវរបិតា និង ព្រះរាជបុត្រាគង់នៅជាមួយយើង ។
របៀបមួយដែលយើងមានព្រះវរបិតា និង ព្រះរាជបុត្រា គង់នៅជាមួយយើងនោះគឺតាមរយៈភាពជាដៃគូនៃព្រះវិញ្ញាណបរិសុទ្ធ ។
សូមពិចារណាអំពីសេចក្ដីពិតពីរដែលមាននៅក្នុងមេរៀននេះ ។ តើកិច្ចខិតខំរបស់អ្នកក្នុងការរក្សាព្រះបញ្ញត្តិទាំងឡាយរបស់ព្រះមានការប្រុងប្រយ័ត្ន ហើយរស់នៅតាមដំណឹងល្អដល់កម្រិតណាហើយ ? តើពរជ័យដំណឹងល្អអ្វីខ្លះដែលអ្នកចង់រីករាយក្នុងពេលនេះ និងនាពេលអនាគតនោះ ? តើអ្នកនឹងធ្វើអ្វីខ្លះនាពេលបច្ចុប្បន្ននេះ ដើម្បីកាន់តែស្មោះត្រង់ក្នុងការរក្សាព្រះបញ្ញត្តិ ហើយរស់នៅតាមគោលលទ្ធិនៃព្រះគ្រីស្ទ ?
ដូចមានកត់ត្រានៅក្នុង យ៉ូហានទី ២ ១:១០–១៣ យ៉ូហានបានលើកទឹកចិត្តដល់ពួកបរិសុទ្ធឲ្យចៀសវាងពីមនុស្សដែលផ្សាយគោលលទ្ធិខុសឆ្គង ។ លោកក៏បានបង្ហាញពីបំណងប្រាថ្នារបស់លោក ដើម្បីទៅជួបពួកបរិសុទ្ធដែលលោកសរសេរសំបុត្រទៅនោះដោយផ្ទាល់ផងដែរ ។
យ៉ូហានទី ៣
យ៉ូហានសរសើរដល់ កៃយុសចំពោះភាពស្មោះត្រង់របស់គាត់
តើមានអ្វីកើតឡើងចំពោះផ្ទៃទឹកខាងលើ នៅពេលមានអ្វីមួយប៉ះវានោះ ? តើវាអាចទៅរួចទេ ប្រសិនបើប៉ះទឹកនោះហើយមិនមានផលប៉ះពាល់អ្វីសោះនោះ ? តើការប៉ះផ្ទៃទឹកខាងលើ ដូចគ្នាទៅនឹងការរស់នៅតាមដំណឹងល្អយ៉ាងដូចម្តេច ?
នៅក្នុងយ៉ូហានទី ៣ សាវកយ៉ូហានបានថ្លែងពីសមាជិកស្មោះត្រង់ម្នាក់នៃសាសនាចក្រឈ្មោះថា កៃយុស ។ សូមអាន យ៉ូហានទី ៣ ១:១-៤ ដោយរកមើលរបៀបដែលយ៉ូហានបានទទួលឥទ្ធិពល ដោយសារតែភាពស្មោះត្រង់របស់កៃយុសក្នុងការរស់នៅតាមដំណឹងល្អ ។ ពាក្យ ពួកកូន នៅក្នុង ខទី ៤ អាចសំដៅលើសមាជិកសាសនាចក្រ ដែលយ៉ូហានបានជួយឲ្យប្រែចិត្តលើដំណឹងល្អ ។
ផ្អែកលើភាពស្មោះត្រង់របស់ កៃយុស ដែលជះឥទ្ធិពលដល់យ៉ូហាន តើសេចក្តីពិតអ្វីដែលយើងរកឃើញពី យ៉ូហានទី ៣ ១:១–៤ អំពីរបៀបដើម្បីរស់នៅតាមដំណឹងល្អ អាចជះឥទ្ធិពលដល់ខ្លួនយើង និង អ្នកដទៃ ?
-
សូមគិតអំពីគ្រាដែលអ្នកមានអារម្មណ៍អំណរ ដោយសារអ្នកបានឃើញ មនុស្សម្នាក់ខិតខំរស់នៅតាមដំណឹងល្អ ។ នៅក្នុងសៀវភៅកំណត់ហេតុសិក្សាព្រះគម្ពីររបស់អ្នក ឬ នៅលើក្រដាសមួយសន្លឹកផ្សេងទៀត សូមសរសេរសំបុត្រអរគុណចំពោះបុគ្គលនោះ សម្រាប់កិច្ចខិតខំរបស់គាត់ដើម្បីរស់នៅតាមដំណឹងល្អ ហើយពន្យល់ពីរបៀបដែលសេចក្តីស្មោះត្រង់របស់គាត់បានជះឥទ្ធិពលលើអ្នក ។ ប្រសិនបើអ្នកសរសេរសំបុត្រ នៅលើក្រដាសមួយសន្លឹកផ្សេង នោះសូមសរសរសំបុត្រសង្ខេបមួយនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ។ សូមគិតពីការជូនសំបុត្រនោះទៅដល់បុគ្គលដែលអ្នកបានសរសេរសំបុត្រនោះឲ្យគាត់ ។
សូមគិតពី គ្រា មួយនៅពេលអ្នកបានឮថ្នាក់ដឹកនាំសាសនាចក្រ ឬ អ្នកផ្សព្វផ្សាយសាសនា ដែលអ្នកមិនស្គាល់ និយាយនៅក្នុងការប្រជុំសាសនាចក្រ ឬ អំឡុងពេលសន្និសីទទូទៅ ។ នៅគ្រាដែលត្រូវបានល្បួង យើងអាចផ្ដល់ការគិតគូរ ឬការគោរពតិចតួចដល់ថ្នាក់ដឹកនាំសាសនាចក្រ ឬ គ្រូបង្រៀនមួយចំនួន ប្រសិនបើយើងពុំស្គាល់ពួកគាត់ ។
សូមអាន យ៉ូហានទី ៣ ១:៥-៨ ដោយរកមើលអ្វីដែលកៃយុសកំពុងធ្វើដែលធ្វើឲ្យយ៉ូហានពេញចិត្ត ។ ពាក្យ ពួកបងប្អូន និងពួកដទៃ នៅក្នុង ខទី ៥ សំដៅលើគ្រូបង្រៀន ឬ អ្នកផ្សព្វផ្សាយសាសនាដែលកៃយុសពុំបានស្គាល់មុខ ។
យ៉ូហានក៏បានសរសេរអំពីថ្នាក់ដឹកនាំសាសនាចក្រឈ្មោះ ឌីអូត្រេព ដែលយ៉ូហានពុំពេញចិត្ត ។ សូមអាន យ៉ូហានទី ៣ ១:៩-១០ ដោយរកមើលមូលហេតុដែលយ៉ូហានមិនពេញចិត្តនឹងគាត់ ។
ឌីអូត្រេពបានប្រែជាបះបោរ ហើយបានប្រព្រឹត្តការក្បត់សាសនាផ្ទាល់ខ្លួន ។ សេចក្តីពិតមួយដែលយើងអាចរៀនពីគំរូល្អរបស់កៃយុស និង គំរូមិនល្អរបស់ឌីអូត្រេពគឺដូចតទៅនេះ ៖ សមាជិកសាសនាចក្រគួរតែទទួល ហើយគាំទ្រដល់អ្នកបម្រើទាំងអស់របស់ព្រះអម្ចាស់ ។
-
នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក សូមសរសេររបៀបមួយចំនួនដែលយើងអាច « ទំនុកបម្រុង » (យ៉ូហានទី ៣ ១:៨) អ្នកបម្រើរបស់ព្រះអម្ចាស់ ។
សូមរកមើលឱកាស ដើម្បីអនុវត្តសេចក្តីពិតមុនៗ តាមរយៈការទទួល និង គាំទ្រដល់ថ្នាក់ដឹកនាំក្នុងមូលដ្ឋាន និង ទូទៅនៃសាសនាចក្រ ។
-
សូមសរសេរឃ្លាខាងក្រោមនេះ ពីក្រោមកិច្ចការថ្ងៃនេះនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖
ខ្ញុំបានសិក្សា យ៉ូហានទី ២–យ៉ូហានទី ៣ ហើយបានបញ្ចប់មេរៀននេះនៅ ( កាលបរិច្ឆេទ ) ។
សំណួរ គំនិត និង ការយល់ដឹងបន្ថែមដែលខ្ញុំចង់ចែកចាយជាមួយគ្រូរបស់ខ្ញុំ ៖