មេរៀនទី ១៧ ៖ ថ្ងៃទី ១
កិច្ចការ ១:១-៨
សេចក្ដីផ្ដើម
ព្រះយេស៊ូវគ្រីស្ទបានបម្រើដល់ពួកសាវករបស់ទ្រង់អស់រយៈពេល ៤០ថ្ងៃ បន្ទាប់ពីទ្រង់មានព្រះជន្មរស់ឡើងវិញ ។ ទ្រង់បានរៀបចំពួកគេដើម្បីឲ្យធ្វើជាសាក្សីអំពីទ្រង់ទូទាំងផែនដី ។
កិច្ចការ ១:១-៨
ព្រះយេស៊ូវគ្រីស្ទបម្រើដល់ពួកសាវករបស់ទ្រង់អស់រយៈពេល ៤០ថ្ងៃ
សូមស្រមៃគិតពីមិត្តម្នាក់ដែលមានជំនឿផ្សេង បានមកជួបអ្នកដោយមានបំណងចង់ដឹងបន្ថែមអំពីសាសនាចក្ររបស់អ្នក ហើយសួរថា « តើនរណាជាអ្នកដឹកនាំសាសនាចក្ររបស់ឯង ? » តើអ្នកនឹងឆ្លើយយ៉ាងដូចម្ដេច ?
នៅពេលអ្នកសិក្សា កិច្ចការ ១:១-៨ សូមរកមើលសេចក្តីពិតនានាដែលអាចជួយអ្នកឲ្យឆ្លើយសំណួរនោះ ហើយយល់ថាពួកសាវកដែលដឹកនាំសាសនាចក្រពីបុរាណគឺជាសាក្សីអំពីព្រះយេស៊ូវគ្រីស្ទ ហើយមានកាតព្វកិច្ចដើម្បីចែកចាយទីបន្ទាល់នោះទូទាំងពិភពលោក ។ ពួកសាវកដែលដឹកនាំសាសនាចក្រសព្វថ្ងៃនេះមាននូវពរជ័យ និង ទំនួលខុសត្រូវដូចគ្នានោះផងដែរ ។
សូមបើកទៅគម្ពីរកិច្ចការនៅក្នុងព្រះគម្ពីររបស់អ្នក ហើយរកមើលចំណងជើងពេញនៃឈ្មោះសៀវភៅនេះ ។
គម្ពីរកិច្ចការគឺជាដំណើរផ្លាស់ប្ដូរមួយដ៏សំខាន់នៅក្នុងព្រះគម្ពីរសញ្ញាថ្មី ។ ដំណឹងល្អរបស់ម៉ាថាយ ម៉ាកុស លូកា និង យ៉ូហាន ផ្តល់នូវដំណើររឿងនៃការងារបម្រើក្នុងជីវិតរមែងស្លាប់ និង ដង្វាយធួនរបស់ព្រះអង្គសង្គ្រោះ ។ ផ្ទុយទៅវិញគម្ពីរកិច្ចការរៀបរាប់ពីការងារបម្រើរបស់ពួកសាវកបន្ទាប់ពី ការយាងទៅឋានសួគ៌វិញរបស់ព្រះអង្គសង្គ្រោះ ។
សូមអាន កិច្ចការ ១:១-២ ដោយរកមើលថានរណាដែលសរសេរគម្ពីរនេះ ។
លូកាគឺជាអ្នកនិពន្ធគម្ពីរកិច្ចការនេះ ហើយ« រឿងមួយច្បាប់មុននោះ » ដែលនិយាយនៅក្នុង ខទី ១ គឺជាដំណឹងល្អរបស់លូកា ដែលបានសរសេរឡើងទៅដល់បុគ្គលម្នាក់មិនស្គាល់ដែលមានឈ្មោះថា ថេវភីល ។ គោលបំណងក្នុងការសរសេររបស់លូកាគឺដើម្បីជួយថេវភីលឲ្យទទួលទីបន្ទាល់មួយអំពីព្រះយេស៊ូវគ្រីស្ទ ( សូមមើល លូកា ១:១–៤ ) ។
សូមអាន កិច្ចការ ១:២ ដោយរកមើលរបៀបដែលព្រះយេស៊ូវគ្រីស្ទបានបន្តដឹកនាំសាសនាចក្ររបស់ទ្រង់បន្ទាប់ពីទ្រង់មានព្រះជន្មរស់ឡើងវិញ ។
យោងតាម ខទី ២ តើព្រះយេស៊ូវគ្រីស្ទបានដឹកនាំសាសនាចក្ររបស់ទ្រង់តាំងពីទ្រង់សុគតដោយរបៀបណា ?
យើងរៀននៅក្នុង កិច្ចការ ១:២ ថា ព្រះយេស៊ូវគ្រីស្ទដឹកនាំសាសនាចក្ររបស់ទ្រង់តាមរយៈការបើកសម្តែង ព្រះឆន្ទៈរបស់ទ្រង់ដល់ពួកសាវកទ្រង់តាមរយៈព្រះវិញ្ញាណបរិសុទ្ធ ។
អែលឌើរ ជែហ្វ្រី អ័រ ហូឡិនក្នុងកូរ៉ូមនៃពួកសាវកដប់ពីរនាក់ បានបង្រៀនថា ព្រះយេស៊ូវគ្រីស្ទបានបន្តដឹកនាំសាសនាចក្ររបស់ទ្រង់បន្ទាប់ពីទ្រង់មានព្រះជន្មរស់ឡើងវិញ ៖
« ចេញមកពីខគម្ពីរទីមួយនៃគម្ពីរកិច្ចការ … មានការប្រកាសមួយថាសាសនាចក្រនឹងបន្តដឹកនាំដោយ ព្រះ ពុំមែនដោយសារមនុស្សឡើយ ។ … ពិតណាស់ ចំណងជើងកាន់តែពេញលេញសម្រាប់គម្ពីរកិច្ចការ អាចដាក់យ៉ាងសមរម្យបែបនេះថា ‹ កិច្ចការរបស់ព្រះគ្រីស្ទដែលមានព្រះជន្មរស់ឡើងវិញ ធ្វើការតាមរយៈព្រះវិញ្ញាណបរិសុទ្ធនៅក្នុងជីវិត និង ការងារបម្រើនៃពួកសាវកដែលបានតែងតាំង › ។ …
« ការដឹកនាំនៃសាសនាចក្រគឺដូចគ្នា ។ ព្រះអង្គសង្គ្រោះបានប្តូរទីតាំង ប៉ុន្តែការដឹកនាំ និង ថ្នាក់ដឹកនាំនៃសាសនាចក្រគឺនៅតែដដែលសុទ្ធសាធ » ( « Teaching, Preaching, Healing » Ensign ខែ មករា ឆ្នាំ ២០០៣ ទំព័រ ៣៧ ) ។
សូមគិតអំពីមូលហេតុសំខាន់ដែលត្រូវដឹងថា ព្រះយេស៊ូវគ្រីស្ទបន្តដឹកនាំសាសនាចក្ររបស់ទ្រង់តាមរយៈវិវរណៈសព្វថ្ងៃនេះ ?
-
សូមសញ្ជឹងគិតពីបទពិសោធន៍នានាដែលបានពង្រឹងទីបន្ទាល់របស់អ្នកថា ព្រះយេស៊ូវគ្រីស្ទដឹកនាំសាសនាចក្ររបស់ទ្រង់សព្វថ្ងៃនេះតាមរយៈវិវរណៈ ។ សូមសរសេរបទពិសោធន៍របស់អ្នក នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ។ ប្រសិនបើអ្នកមានអារម្មណ៍ថាពុំធ្លាប់មានបទពិសោធន៍បែបនេះទេ សូមឲ្យសមាជិកស្មោះត្រង់ម្នាក់នៃសាសាចក្រចែកចាយជាមួយអ្នក នូវរបៀបដែលគាត់ដឹងថាព្រះអម្ចាស់ដឹកនាំសាសនាចក្ររបស់ទ្រង់តាមរយៈវិវរណៈ ។ នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក សូមសរសេរអំពីអ្វីដែលអ្នកបានរៀនពីការសន្ទនារបស់អ្នក ។
ព្រះយេស៊ូវបានចំណាយពេល ៤០ ថ្ងៃផ្តល់ការណែនាំដោយព្រះអង្គទ្រង់ផ្ទាល់ ដល់ពួកសាវកពីមុនទ្រង់យាងទៅឋានសួគ៌វិញ ហើយពួកសាវកបានចាប់ផ្តើមដឹកនាំសាសនាចក្រនៅលើផែនដីនេះតាមរយៈព្រះវិញ្ញាណបរិសុទ្ធ ។ សូមអាន កិច្ចការ ១:៣ ដោយរកមើលអ្វីដែលពួកសាវកបានជួប ហើយរៀនអំឡុងពេល ៤០ ថ្ងៃនោះ ។
នៅក្នុង ខទី ៣ពាក្យ រងទុក្ខ សំដៅលើពលិកម្មធួនរបស់ព្រះអង្គសង្គ្រោះ និង ការរងទុក្ខរបស់ទ្រង់ ។ ឃ្លាថា « ភស្តុតាងជាច្រើន » សំដៅលើភស្តុងតាងដែលមិនគួរឲ្យជឿដែលព្រះយេស៊ូវបានប្រទានមកថាទ្រង់បានមានព្រះជន្មរស់ឡើងវិញ ។
សូមអាន កិច្ចការ ១:៤–៥ ដោយរកមើលអ្វីដែលព្រះយេស៊ូវបានបញ្ជាឲ្យពួកសាវកធ្វើ ។ អ្នកអាចគូសចំណាំអ្វីដែលអ្នករកឃើញ ។
ព្រះយេស៊ូវបានត្រាស់បង្គាប់ឲ្យពួកសាវកស្នាក់នៅក្រុងយេរូសាឡិម រហូតដល់ពួកគេត្រូវបានជ្រមុជដោយព្រះវិញ្ញាណបរិសុទ្ធ ។ ការណ៍នេះគឺសំដៅទៅលើការទទួលបានភាពជាប់លាប់ជានិច្ចជាដៃគូនៃព្រះវិញ្ញាណបរិសុទ្ធ ដែលសាវកពុំចាំបាច់ត្រូវការឡើយ កាលព្រះអម្ចាស់បានគង់នៅជាមួយពួកគេនោះ ។
សូមអាន កិច្ចការ ១:៨ ដោយរកមើលអ្វីដែលពួកសាវកត្រូវបានបង្គាប់ឲ្យធ្វើ បន្ទាប់ពីពួកគេបានទទួលព្រះវិញ្ញាណបរិសុទ្ធ ។
ចេញពីអ្វីដែលព្រះអង្គសង្គ្រោះបានបង្រៀននៅក្នុង ខទី ៨ យើងរៀនថា ពួកសាវកគឺជាសាក្សីអំពីព្រះយេស៊ូវគ្រីស្ទ ហើយថ្លែងទីបន្ទាល់អំពីទ្រង់ទូទាំងផែនដីនេះ ។
ប្រធាន ហ្គរដុន ប៊ី ហ៊ិងគ្លី បានបង្រៀនអំពីទំនួលខុសត្រូវនៃពួកសាវកសព្វថ្ងៃនេះ ក្នុងការធ្វើជាសាក្សីអំពីព្រះយេស៊ូវគ្រីស្ទ ៖ « នៅក្នុងសម័យបច្ចុប្បន្ននេះព្រះអម្ចាស់បានហៅសាក្សីពិសេស ១៥ នាក់ ដើម្បីថ្លែងទីបន្ទាល់អំពីភាពជាព្រះរបស់ទ្រង់នៅចំពោះមុខមនុស្សលោកទាំងអស់ ។ ការទទួលខុសត្រូវរបស់ពួកគេគឺជាការហៅពិសេសេមួយ ដ្បិតពួកគេគឺជាសាវកដ៏ជម្រើសនៃព្រះអម្ចាស់ព្រះយេស៊ូវគ្រីស្ទ ហើយបានទទួលអំណាចពីទ្រង់ ។ ពួកគេត្រូវបានបង្គាប់ឲ្យថ្លែងសាក្សីអំពីភាពមានព្រះជន្មពិតរបស់ទ្រង់ តាមរយៈព្រះចេស្តា និង សិទ្ធិអំណាចនៃសាវកដ៏បរិសុទ្ធដែលត្រូវបានប្រទានដល់ពួកគេ » ( នៅក្នុង « Special Witnesses of Christ » Ensign ខែ មេសា ឆ្នាំ ២០០១ ទំព័រ ៤ ) ។
សូមអានឯកសារ « ព្រះគ្រីស្ទដ៏មានព្រះជន្មរស់ ៖ ទីបន្ទាល់នៃពួកសាវក » ដែលមានអមមកជាមួយនៅក្នុងមេរៀននេះ ។ សូមគូសចំណាំផ្នែកនានានៃទីបន្ទាល់របស់ពួកសាវក ដែលមានសារៈសំខាន់បំផុតចំពោះអ្នក ។
-
សូមឆ្លើយសំណួរខាងក្រោមនេះ នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖ តើទីបន្ទាល់របស់ពួកសាវកសម័យទំនើបមានឥទ្ធិពលលើទីបន្ទាល់ផ្ទាល់ខ្លួនរបស់អ្នកអំពីព្រះយេស៊ូវគ្រីស្ទយ៉ាងដូចម្ដេច ?
ទោះបីជា កិច្ចការ ១:៨ សំដៅយ៉ាងពិសេសពីតួនាទីរបស់ពួកសាវកក្នុងនាមជាសាក្សីពិសេសរបស់ព្រះអង្គសង្គ្រោះក្តី ក៏វាបង្រៀនយើងអំពីអ្វីដែលអាចជួយយើងឲ្យក្លាយជាសាក្សីរបស់ព្រះយេស៊ូវគ្រីស្ទទូទាំងពិភពលោកនេះដែរ ។
ផ្អែកលើការសន្យារបស់ព្រះអម្ចាស់ចំពោះពួកសាវកនៅក្នុង កិច្ចការ ១:៨ យើងរៀនថា តាមរយៈព្រះចេស្តានៃព្រះវិញ្ញាណបរិសុទ្ធ នោះយើងអាចក្លាយជាសាក្សីរបស់ព្រះយេស៊ូវគ្រីស្ទ ។
តើព្រះចេស្តានៃព្រះវិញ្ញាណបរិសុទ្ធ អាចជួយយើងឲ្យក្លាយជាសាក្សីរបស់ព្រះអង្គសង្គ្រោះតាមរបៀបណាខ្លះ ?
-
សូមឆ្លើយសំណួរខាងក្រោមនេះ ដាក់នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖
-
តើនៅពេលណាដែលអ្នកមានអារម្មណ៍ពីព្រះវិញ្ញាណបរិសុទ្ធ កាលមនុស្សផ្សេងទៀតបានចែកចាយទីបន្ទាល់របស់ខ្លួនអំពីព្រះយេស៊ូវគ្រីស្ទ ?
-
តើនៅពេលណាដែលអ្នកធ្លាប់មានអារម្មណ៍ពីព្រះវិញ្ញាណបរិសុទ្ធជួយអ្នកឲ្យថ្លែងទីបន្ទាល់អំពីព្រះយេស៊ូវគ្រីស្ទដល់មនុស្សដទៃ ?
-
សូមស្វែងរកឱកាសដើម្បីចែកចាយទីបន្ទាល់របស់អ្នកអំពីព្រះយេស៊ូវគ្រីស្ទជាមួយមនុស្សដទៃ ហើយសូមទុកចិត្តថាព្រះវិញ្ញាណបរិសុទ្ធ នឹងបញ្ជាក់សេចក្តីពិតអំពីអ្វីដែលអ្នកថ្លែងជាសាក្សីដល់ពួកគេ ។
កិច្ចការ–វិវរណៈ ៖ ទិដ្ឋភាពទូទៅនៃផ្នែកពាក់កណ្តាលទៀតជាផ្នែកបញ្ចប់នៃព្រះគម្ពីរសញ្ញាថ្មី
កិច្ចការ ១:៨ ពុំគ្រាន់តែបង្រៀនពីសេចក្តីពិតអំពីការទទួលខុសត្រូវរបស់ពួកសាវកប៉ុណ្ណោះទេ ប៉ុន្តែវាថែមទាំងបានផ្តល់នូវទិដ្ឋភាពទូទៅមួយអំពីផ្នែកពាក់កណ្តាលទៀតជាផ្នែកបញ្ចប់នៃព្រះគម្ពីរសញ្ញាថ្មី ។ យោងតាម កិច្ចការ ១:៨ តើព្រះអង្គសង្គ្រោះបានព្យាករថាពួកសិស្សរបស់ទ្រង់នឹងធ្វើជាសាក្សីអំពីទ្រង់នៅកន្លែងណា ?
ដោយប្រើ ផែនទី ដែលមាននៅក្នុងឧបសម្ព័ន្ធនៃព្រះគម្ពីរប៊ីប ឬ នៅក្នុងសេចក្តីណែនាំដល់បទគម្ពីរទាំងឡាយ សូមរកមើលកន្លែងដែលបាននិយាយនៅក្នុងខគម្ពីរ ដើម្បីជួយអ្នកឲ្យស្រមៃគិតពីការធ្វើដំណើររបស់ពួកសាវក និង ការបំពេញតាមការព្យាកររបស់ព្រះអង្គសង្គ្រោះ ។
កិច្ចការ ១–៥ កត់ត្រាអំពីការងារបម្រើរបស់ពួកសាវកនៅក្នុងក្រុងយេរូសាឡិម កិច្ចការ ៦–៩ កត់ត្រាអំពីការងារបម្រើរបស់ពួកសាវកនៅទូទាំងស្រុកយូដា និង ស្រុកសាម៉ារី ហើយ កិច្ចការ ១០–២៨ កត់ត្រាអំពីការងារបម្រើរបស់ពួកសាវកនៅទូទាំងចក្រភពរ៉ូម ឬ « ចុងផែនដីបំផុត » (កិច្ចការ ១:៨ ) ។ អ្នកអាចនឹងសរសេរចំណុចសំខាន់ៗនៃគម្ពីរកិច្ចការទាំងនេះនៅលើគែមនៃព្រះគម្ពីររបស់អ្នកក្បែរ កិច្ចការ ១:៨ ។
សូមបើកទៅតារាងមាតិការបស់ព្រះគម្ពីរប៊ីប ។ សូមមើលគម្ពីរនានានៃព្រះគម្ពីរថ្មី ដែលនៅបន្ទាប់ពីគម្ពីរកិច្ចការ ។ គម្ពីរកូរិនថូសទី ១ រហូតដល់ហេព្រើរគឺជាសំបុត្រ ( លិខិត ) ដែលបានសរសេរដោយសាវកប៉ុល ។ នៅពេលអ្នកសិក្សា កិច្ចការ ៩, ១៣–២៨ អ្នកនឹងរៀនអំពីការប្រែចិត្តជឿ និង ការងារបម្រើរបស់ប៉ុល ។
សូមមើលផែនទី « ទិដ្ឋភាពទូទៅនៃកិច្ចការនៃពួកសាវក » ដែលបង្ហាញឈ្មោះទីក្រុង ឬ តំបន់នានាដែលមានលើកឡើងក្នុងសំបុត្រជាច្រើនរបស់ប៉ុល ។ សំបុត្រជាច្រើនរបស់ប៉ុលនៅក្នុងព្រះគម្ពីរសញ្ញាថ្មីត្រូវបានសរសេរឲ្យក្រុមជំនុំនៃសាសនាចក្រនៅក្នុងទីក្រុងផ្សេងៗគ្នា ដើម្បីដោះស្រាយតម្រូវការជាក់លាក់របស់ពួកគេ ។ ឧទាហរណ៍ ពួកថែស្សាឡូនីចគឺជាប្រជាជនដែលបានរស់នៅក្នុងទីក្រុងថែស្សាសឡូនីច ហើយគម្ពីរ ថែស្សាឡូនីចទី ១ ត្រូវបានគេជឿថាគឺជាសំបុត្រដំបូងគេបង្អស់ដែលប៉ុលបានសរសេរ ។ បន្ថែមលើការសរសេរទៅកាន់ក្រុមជំនុំនៃពួកបរិសុទ្ធ ប៉ុលបានសរសេរទៅកាន់មនុស្សផ្សេងទៀតដូចជា ធីម៉ូថេ ទីតុស និង ភីលេម៉ូន ។
សូមមើលទៅក្នុងតារាងនៃមាតិកាអំពីសំបុត្របន្ទាប់ពីគម្ពីរហេព្រើរ ។ ក្រៅពីប៉ុល ពួកសាវក និង អ្នកដឹកនាំដទៃទៀតនៃសាសនាចក្របានសរសរទៅសមាជិកនៃសាសនាចក្រ ។ សំបុត្រមួយចំនួននេះគឺជាគម្ពីរយ៉ាកុប ពេត្រុស យ៉ូហាន និង យូដាស ។ គម្ពីរវិវរណៈកត់ត្រាអំពីការនិមិត្តដែលបានប្រទានដល់សាវកយ៉ូហាន ។
នៅពេលអ្នកបន្តសិក្សាព្រះគម្ពីរសញ្ញាថ្មីផ្នែកពាក់កណ្តាលទៀតជាផ្នែកបញ្ចប់នេះ សូមអធិស្ឋានប្រយោជន៍ឲ្យព្រះវិញ្ញាណបរិសុទ្ធ អាចបង្រៀនអ្នក ហើយជួយឲ្យអ្នកទទួលបានការយល់ដឹងកាន់តែប្រសើរឡើងអំពីការបង្រៀននៃពួកសាវកក្នុងព្រះគម្ពីរសញ្ញាថ្មី ។
-
សូមសរសេរឃ្លាខាងក្រោមនេះ ពីខាងក្រោមកិច្ចការថ្ងៃនេះនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖
ខ្ញុំបានសិក្សា កិច្ចការ ១:១–៨ ហើយបានបញ្ចប់មេរៀននេះនៅ ( កាលបរិច្ឆេទ ) ។
សំណួរ គំនិត និង ការយល់ដឹងបន្ថែមដែលខ្ញុំចង់ចែកចាយជាមួយគ្រូរបស់ខ្ញុំ ៖