មេរៀនទី ១៧ ៖ ថ្ងៃទី ២
កិច្ចការ ១:៩-២៦
សេចក្ដីផ្ដើម
បន្ទាប់ពីបានបង្គាប់ដល់ពួកសិស្សរបស់ទ្រង់អស់រយៈពេល ៤០ ថ្ងៃមក ព្រះយេស៊ូវគ្រីស្ទបានយាងឡើងទៅឋានសួគ៌វិញ ។ ពួកសាវក និង មនុស្សដទៃទៀតបានប្រជុំគ្នាអធិស្ឋាន និង ទូលអង្វរ ។ តាមរយៈការបំផុសគំនិត នោះ ម៉ាត់ធាស ត្រូវបានហៅឲ្យបំពេញមុខងារនៅក្នុងកូរ៉ុមនៃពួកសាវកដប់ពីរនាក់ ដែលបន្សល់ទុកមកពីការក្បត់ និង ការស្លាប់របស់យូដាស-អ៊ីស្ការីយ៉ុត ។
កិច្ចការ ១:៩-១២
ព្រះអង្គសង្គ្រោះយាងឡើងទៅស្ថានសួគ៌
សូមអានសេចក្តីថ្លែងការណ៍ដូចតទៅនេះអំពីការយាងមកជាលើកទីពីររបស់ព្រះយេស៊ូវគ្រីស្ទ ហើយសរសេរថាតើសេចក្តីថ្លែងនិមួយៗនោះត្រូវ ( ត ) ឬ ខុស ( ខ )នៅក្នុងចន្លោះដែលបានផ្តល់ឲ្យ ។ សូមប្រើខគម្ពីរដែលមាន ដើម្បីជួយអ្នកឲ្យឆ្លើយបានត្រឹមត្រូវ ។
-
____ ១. ព្រះយេស៊ូវគ្រីស្ទនឹងយាងត្រឡប់មកកាន់ផែនដីនៅថ្ងៃចុងក្រោយ ។ ( សូមមើល ម៉ូសេ ៧:៦០ ) ។
-
____ ២. នៅពេលការយាងមកជាលើកទីពីររបស់ទ្រង់មកដល់ នោះព្រះយេស៊ូវគ្រីស្ទនឹងបង្ហាញព្រះកាយទ្រង់ដល់ពួកសុចរិតតែប៉ុណ្ណោះ ។ ( សូមមើល គ. និង ស. ១០១:២៣; យ៉ូសែប ស្ម៊ីធ--ម៉ាថាយ ១:២៦ ) ។
-
____ ៣. ដោយសារព្រះយេស៊ូវគ្រីស្ទនឹងនៅក្នុងការលាក់បំបាំង ពេលទ្រង់យាងមកម្តងទៀត នោះមនុស្សភាគច្រើននឹងមិនដឹងថាការយាងមកជាលើកទីពីររបស់ទ្រង់កើតឡើងនៅពេលណានោះទេ ។ ( សូមមើល គ. និង ស. ៤៩:២២-២៣ ) ។
អំឡុងពេលនៃការងារបម្រើក្នុងជីវិតរមែងស្លាប់របស់ទ្រង់ ព្រះយេស៊ូវគ្រីស្ទបានព្យាករថា នៅថ្ងៃចុងក្រោយមនុស្សមួយចំនួននឹងផ្សាយពីការបង្រៀនខុសឆ្គងអំពីការយាងមកជាលើកទីពីររបស់ទ្រង់ ( សូមមើល យ៉ូសែប ស្ម៊ីធ--ម៉ាថាយ ១:២២–២៥ ) ។ យើងអាចដឹងថា តើការបង្រៀនជាក់លាក់ណាមួយអំពីការយាងមកជាលើកទីពីររបស់ព្រះយេស៊ូវគ្រីស្ទគឺជាការពិត ឬ ក្លែងក្លាយ ប្រសិនបើយើងធ្វើតាមព្រះបន្ទូលរបស់ព្រះអង្គសង្គ្រោះ និង ប្រសាសន៍របស់ពួកព្យាការីទ្រង់នោះ ។ តាមរយៈការធ្វើកិច្ចការនេះ នោះយើងអាចចៀសវាងពីការបោកបញ្ឆោត ( សូមមើល យ៉ូសែប ស្ម៊ីធ--ម៉ាថាយ ១:៣៧ ) ។
នៅពេលអ្នកសិក្សា កិច្ចការ ១:៩–១២ សូមរកមើលសេចក្តីពិតនានាដែលទាក់ទងនឹងការយាងមកជាលើកទីពីររបស់ព្រះយេស៊ូវគ្រីស្ទ ។
ព្រះអង្គសង្គ្រោះបានបង្គាប់ដល់ពួកសាវករបស់ទ្រង់អស់រយៈពេល ៤០ ថ្ងៃ បន្ទាប់ពីទ្រង់មានព្រះជន្មឡើងវិញ ( សូមមើល កិច្ចការ ១:៣ ) ។ សូមអាន កិច្ចការ ១:៩-១២ ដោយរកមើលអ្វីដែលបានកើតឡើង បន្ទាប់ពីព្រះអង្គសង្គ្រោះបានបញ្ចប់ការបង្គាប់ដល់ពួកគេ ។
សូមស្រមៃថាអ្នកបាននៅទីនោះ ឃើញព្រះអង្គសង្គ្រោះយាងឡើងទៅឋានសួគ៌វិញ ។ តើអ្នកអាចមានគំនិត និងអារម្មណ៍បែបណា ?
នៅសម័យអ៊ីស្រាអែលពីបុរាណ ពេលខ្លះមានពពកបានបង្ហាញជាតំណាងនៃវត្តមាន និង សិរីល្អរបស់ព្រះ ( សូមមើល និក្ខមនំ ៤០:៣៤ ) ។ ពពកដែលបានលើកឡើងនៅក្នុង កិច្ចការ ១:៩ គឺជាពពកនៃសិរីល្អ ( សូមមើល Bible Dictionary « Cloud » ) ។ បុរសពីរនាក់ដែលបានលើកឡើងនៅក្នុង កិច្ចការ ១:១០ គឺជាពួកទេវតា ។
សូមកត់ចំណាំនៅក្នុង កិច្ចការ ១:១១ អំពីអ្វីដែលពួកទេវតាបានមានបន្ទូលប្រាប់ពួកសាវក ។ សេចក្តីពិតមួយដែលយើងអាចរៀនពីសេចក្តីថ្លែងការណ៍របស់ពួកទេវតានោះគឺថា នៅពេលការយាងមកជាលើកទីពីររបស់ទ្រង់ នោះព្រះអង្គសង្គ្រោះនឹងយាងចុះពីឋានសួគ៌នៅក្នុងសិរីល្អ ។
សូមកត់ចំណាំនៅក្នុង កិច្ចការ ១:១២ ថាការយាងឡើងទៅឋានសួគ៌របស់ព្រះអង្គសង្គ្រោះ បានកើតឡើងនៅលើភ្នំ អូលីវ ។ នៅពេលព្រះអង្គសង្គ្រោះយាងមកម្តងទៀត នោះព្រះកាយរបស់ទ្រង់នឹងមានរូបរាងដូចជាពេលទ្រង់យាងចុះ ហើយគង់នៅលើភ្នំអូលីវដូច្នោះដែរ ( សូមមើល សាការី ១៤:៤, គ. និង ស. ៤៥:៤៧–៥៣, ១៣៣:១៩–២០ ) ។ ការណ៍នេះនឹងកើតឡើងពីមុនការបង្ហាញព្រះកាយដ៍អស្ចារ្យ និង ធំធេងនោះដល់ពិភពលោក ( សូមមើល អេសាយ ៤០:៥ ) ។
សូមពិចារណាលើសំណួរខាងក្រោមនេះ ៖ តើការដឹងពីលក្ខណៈដែលព្រះអង្គសង្គ្រោះនឹងយាងត្រឡប់មកវិញ អាចជួយយើងឲ្យចៀសវាងពីការបោកបញ្ឆោត ខណៈដែលយើងរង់ចាំការយាងមកជាលើកទីពីររបស់ព្រះអង្គសង្គ្រោះយ៉ាងដូចម្ដេច ?
កិច្ចការ ១:១៣-២៦
ម៉ាត់ធាសត្រូវបានជ្រើសរើសឲ្យបំពេញតំណែងទំនេរ ក្នុងកូរ៉ុមនៃពួកសាវកដប់ពីរនាក់
បន្ទាប់ពីពួកសាវកបានត្រឡប់ទៅក្រុងយេរូសាឡិមពីភ្នំអូលីវ នោះពួកគេបានជួបជុំគ្នាជាមួយបុរស និង ស្ត្រីស្មោះត្រង់មួយចំនួនទៀត រួមមានម៉ារា ម្តាយរបស់ព្រះយេស៊ូវ ដើម្បីអធិស្ឋាន ហើយថ្វាយបង្គំ ។ សូមអាន កិច្ចការ ១:១៣ ហើយរាប់ចំនួនសាវកដែលបានរៀបរាប់នោះ ។
ហេតុអ្វីមានសាវកតែ ១១ នាក់នាគ្រានោះ ?
នៅក្នុង កិច្ចការ ១:១៥-២០ យើងរៀនថាពេត្រុសបានក្រោកឈរឡើងនៅមុខពួកសិស្ស ១២០នាក់ ហើយបាននិយាយអំពីការស្លាប់របស់យូដាស-អ៊ីស្ការីយ៉ុត ។ ដោយសារយូដាសគឺជាសាវកម្នាក់នៃពួកដប់ពីរនាក់ នោះពួកសិស្សបានជួបជុំគ្នាដើម្បីជ្រើសរើសសាវកថ្មីម្នាក់ ។
សូមពិចារណាពីរបៀបផ្សេងៗ ដែលអ្នកដឹកនាំមួយចំនួនដូចតទៅនេះ ត្រូវបានជ្រើសរើស ៖ មេបញ្ជាការ អ្នកដឹកនាំរដ្ឋាភិបាលក្នុងមូលដ្ឋាន ស្តេច ឬ ម្ចាស់ក្សត្រី និង ប្រធានក្រុមហ៊ុន ។ តើលក្ខណៈសម្បត្តិអ្វីខ្លះដែលតម្រូវឲ្យមានសម្រាប់មុខងារជាថ្នាក់ដឹកនាំទាំងនេះ ?
សូមពិចារណាពីរបៀបដែលសាវកម្នាក់របស់ព្រះយេស៊ូវគ្រីស្ទត្រូវបានជ្រើសរើស និង គុណសម្បត្តិនានាដែលមនុស្សម្នាក់បម្រើជាសាវក ។
សូមអាន កិច្ចការ ១:២១–២៦ ដោយរកមើលរបៀបដែលសាវកថ្មីម្នាក់ត្រូវបានជ្រើសរើស បន្ទាប់ពីការស្លាប់របស់យូដាស-អ៊ីស្ការីយ៉ុត ។
នៅក្នុង ខទី ២៦ ឃ្លា « គេចាប់ឆ្នោត » សំដៅទៅលើវិធីសាស្ត្រពីបុរាណក្នុងការសម្រេចចិត្ត ។ ក្នុងចំណោមពួកអ្នកស្មោះត្រង់ នោះព្រះហស្តរបស់ព្រះនឹងនាំឲ្យមានលទ្ធផល ( សូមមើល សុភាសិត ១៦:៣៣ ) ។
អែលឌើរ ប្រ៊ូស អ័រ ម៉ាក់ខន់ឃី ក្នុងកូរ៉ុមនៃពួកសាវកដប់ពីរនាក់ បានពន្យល់ដូចនេះ ៖ « ប្រសិនបើពួកគេចាប់ឆ្នោត នោះវាគឺជារបៀបដែលព្រះអម្ចាស់បានជ្រើសរើសយកលទ្ធផល ។ ប៉ុន្តែប្រហែលជា ‹ ពួកគេបានផ្តល់ការបោះឆ្នោត › ដោយសន្មត់ថាជា ‹ ការបោះឆ្នោតគាំទ្រ › ដើម្បីលើកស្ទួយគាត់ឡើង ដែលព្រះបានជ្រើសរើស ដើម្បីបម្រើនៅក្នុងភាពជាសាវកដ៏បរិសុទ្ធ » ( Doctrinal New Testament Commentary ភាគទី ៣. [ ឆ្នាំ ១៩៦៥–៧៣ ] ២:៣២ ) ។
យោងតាម កិច្ចការ ១:២១–២២ ពេត្រុសបាននិយាយថាសាវកថ្មីនឹងត្រូវបានជ្រើសរើសក្នុងចំណោមអស់អ្នកដែលបានស្គាល់ព្រះយេស៊ូវដោយផ្ទាល់ ហើយបានឃើញការងារបម្រើរបស់ទ្រង់ ចាប់តាំងពីដើមដំបូងរហូតដល់ការរស់ឡើងវិញរបស់ទ្រង់ ។
តើមានអ្វីបានទាក់ចិត្តអ្នកអំពីការអធិស្ឋានរបស់ពួកសាវកដែលបានកត់ត្រានៅក្នុង កិច្ចការ ១:២៤–២៥ ?
សេចក្តីពិតមួយដែលយើងអាចរៀនចេញពីដំណើររឿងនេះគឺថា ពួកសាវករបស់ព្រះយេស៊ូវគ្រីស្ទត្រូវបានហៅពីព្រះតាមរយៈវិវរណៈ ។ សូមគិតពីការសរសេរសេចក្តីពិតនេះនៅក្នុងព្រះគម្ពីររបស់អ្នកក្បែរ កិច្ចការ ១:២៤ ។
-
សូមឆ្លើយសំណួរខាងក្រោមក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖ តើអ្នកគិតថា ហេតុអ្វីវាសំខាន់ ដែលសាវកម្នាក់ត្រូវបានហៅដោយព្រះតាមរយៈវិវរណៈ ជាជាងត្រូវបានជ្រើសរើសនៅក្នុងរបៀបស្រដៀងគ្នាទៅនឹងការជ្រើសរើសអ្នកដឹកនាំក្នុងពិភពលោក ?
ឧទាហរណ៍ អំពីរបៀបដែលពួកសាវកសម័យទំនើបត្រូវបានជ្រើសរើសតាមរយៈវិវរណៈ សូមអានដំណើររឿងខាងក្រោមនេះមកពីប្រធាន ហ៊ីប៊ើរ ចេ ក្រាន្ត ៖
« ប្រធាន [ ហ៊ីប៊ើរ ចេ ] ក្រាន្តបានទទួលវិវរណៈក្នុងនាមជាប្រធាននៃសាសនាចក្រដើម្បីដឹកនាំសាសនាចក្រទាំងមូល ។ នៅពេលវិវរណៈបែបនេះកើតឡើង គឺបន្ទាប់ពីលោកត្រូវបានញែកចេញជាប្រធាននៃសាសនាចក្រ ជាពេលលោកបានស្វែងរកព្រះឆន្ទៈរបស់ព្រះអម្ចាស់ នៅក្នុងការតែងតាំងដល់សមាជិកថ្មីនៃកូរ៉ុមនៃពួកសាវកដប់ពីរនាក់ ។ នៅពេលលោកបានពិចារណាពីទំនួលខុសត្រូវនេះ គំនិតរបស់លោកត្រូវបានបំផុសដដែលៗទៅកាន់មិត្តជិតស្និទរបស់លោកឈ្មោះ រីឆាដ ដ័បុលយូ យាំង ជាពួកបរិសុទ្ធថ្ងៃចុងក្រោយដ៏ស្មោះត្រង់ និង អ្នកដឹកនាំមានបទពិសោធន៍ម្នាក់ ។ ប្រធាន ក្រាន្ត បានពិភាក្សាពីលទ្ធភាពនេះជាមួយទីប្រឹក្សារបស់លោក ដែលបានគាំទ្រដល់ការសម្រេចចិត្តរបស់លោក ។ ទីបំផុតនៅពេលលោកមានទំនុកចិត្តជាមួយនឹងកិច្ចការនេះ នោះលោកបានសរសេរឈ្មោះរបស់មិត្តលោកនៅលើក្រដាសមួយសន្លឹក ហើយយកក្រដាសនោះទៅជាមួយគាត់ដើម្បីទៅកាន់ការប្រជុំក្នុងព្រះវិហារបរិសុទ្ធប្រចាំសប្តាហ៍ជាមួយគណៈប្រធានទីមួយ និង កូរ៉ុមនៃពួកដប់ពីរនាក់ ។ ប៉ុន្តែ នៅពេលលោកហៀបនឹងបង្ហាញឈ្មោះនោះសម្រាប់ការអនុមតិមកពីពួកបងប្អូនប្រុស នោះលោកពុំអាចធ្វើការណ៍នោះបានឡើយ។ ជំនួសឲ្យការបង្ហាញឈ្មោះរបស់ រីឆាដ ដ័បុលយូ យាំង នោះគាត់បែរជាបានបង្ហាញឈ្មោះ មេលវិន ជេ បាឡាដ ជាបុរសម្នាក់ដែលគាត់ពុំស្គាល់ទៅវិញ ។ ក្រោយមកប្រធានក្រាន្តបានប្រាប់ពីឥទ្ធិពលនៃបទពិសោធន៍នេះចំពោះគាត់ ៖
« ‹ ខ្ញុំបានមានអារម្មណ៍បំផុសគំនិតពីព្រះមានព្រះជន្មរស់ឲ្យដឹកនាំខ្ញុំនៅក្នុងកិច្ចការរបស់ខ្ញុំ ។ ចាប់តាំងពីថ្ងៃនោះមក ខ្ញុំបានជ្រើសរើសជនចម្លែកមួយដែលសក្តិសមធ្វើជាសាវកម្នាក់ ជំនួសឲ្យមិត្តភក្តិជិតស្និទ្ធជាច្រើនឆ្នាំរបស់ខ្ញុំ ខ្ញុំបានដឹងថា ខ្ញុំត្រូវបានផ្តល់ឲ្យនូវពន្លឺ និង ការបំផុសគំនិត ព្រមទាំងការណែនាំពីព្រះក្នុងការដឹកនាំកិច្ចការរបស់ទ្រង់នៅលើផែនដីនេះ › » ( Teachings of Presidents of the Church: Heber J. Grant [ ឆ្នាំ ២០០២ ] ទំព័រ ១៨១–៨២ ) ។
សូមសញ្ចឹងគិតពីរបៀបដែលសេចក្តីពិតដែលបានបង្រៀននៅក្នុង កិច្ចការ ១:២៤ ត្រូវបានបង្ហាញនៅក្នុងដំណើររឿងនេះ រៀបរាប់ពីការហៅនៃពួកសាវកសម័យទំនើប ។
តើការហៅបម្រើរបស់សាវកម្នាក់បង្ហាញថាព្រះអង្គសង្គ្រោះបន្តដឹកនាំសាសនាចក្ររបស់ទ្រង់យ៉ាងដូចម្ដេច ? ( សូមចាំពីសេចក្តីពិតដែលបានបង្រៀននៅក្នុង កិច្ចការ ១:២—ថា ព្រះយេស៊ូវគ្រីស្ទដឹកនាំសាសនាចក្ររបស់ទ្រង់តាមរយៈការបើកសម្តែង ព្រះឆន្ទៈរបស់ទ្រង់ដល់ពួកសាវកទ្រង់តាមរយៈព្រះវិញ្ញាណបរិសុទ្ធ ) ។
-
សូមឆ្លើយនឹងសំណួរខាងក្រោមមួយ ឬ ច្រើនជាងនោះនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖
-
តើនៅពេលណាដែលអ្នកធ្លាប់បានឃើញសាវកថ្មីម្នាក់ត្រូវបានហៅបម្រើក្នុងកូរ៉ុមនៃពួកសាវកដប់ពីរនាក់ ហើយតើអ្នកមានអារម្មណ៍បែបណានៅពេលអ្នកបានគាំទ្រគាត់នៅក្នុងការហៅនោះ ?
-
តើមានបទពិសោធន៍ណាខ្លះដែលបានជួយអ្នកឲ្យដឹងថាពួកសាវកដែលកំពុងរស់នៅត្រូវបានហៅពីព្រះ ?
-
ហេតុអ្វីវាសំខាន់ចំពោះអ្នក ដែលត្រូវមានទីបន្ទាល់ថាពួកសាវកកំពុងរស់នៅត្រូវបានហៅពីព្រះ ?
-
តើអ្នកស្គាល់ឈ្មោះទាំងអស់របស់ពួកសាវកដែលកំពុងបម្រើនៅក្នុងសាសាចក្របច្ចុប្បន្ននេះដែរឬទេ ? សូមសរសេរឈ្មោះរបស់ពួកសាវកបច្ចុប្បន្ននេះឲ្យបានច្រើនតាមដែលអ្នកអាចចាំបាន ។ ( ដើម្បីដឹងថា អ្នករៀបរាប់ឈ្មោះរបស់ពួកសាវកបច្ចុប្បន្នទាំងអស់ត្រឹមត្រូវបានល្អប៉ុណ្ណានោះ សូមមើលទំព័រដែលមានរូបភាព និង ឈ្មោះរបស់ពួកអ្នកសិទ្ធិអំណាចទូទៅនៅក្នុងការបោះពុម្ពនៃសន្និសីទទូទៅចុងក្រោយបំផុតនៃ Ensign ឬ Liahona ឬ ស្រាវជ្រាវនៅលើគេហទំព័រ LDS.org ) ។
-
-
សូមសរសេរឃ្លាខាងក្រោមនេះពីខាងក្រោមកិច្ចការថ្ងៃនេះ នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖
ខ្ញុំបានសិក្សា កិច្ចការ ១:៩-២៦ ហើយបានបញ្ចប់មេរៀននេះនៅ ( កាលបរិច្ឆេទ ) ។
សំណួរ គំនិត និង ការយល់ដឹងបន្ថែមដែលខ្ញុំចង់ចែកចាយជាមួយគ្រូរបស់ខ្ញុំ ៖