មេរៀនទី ២៦ ៖ ថ្ងៃទី ១
កូល៉ុស
សេចក្ដីផ្ដើម
សាវកប៉ុលបានបង្រៀនអំពីភាពឧត្តុង្គឧត្តមបំផុត ( ភាពប្រសើរលើសគេ ភាពអស្ចារ្យ ឬ ភាពវិសេសវិសាល ) របស់ព្រះយេស៊ូវគ្រីស្ទ ហើយបានព្រមានទាស់នឹងគោលលទ្ធិខុសឆ្គង ។ លោកបានលើកទឹកចិត្តពួកបរិសុទ្ធកូល៉ុសឲ្យចេះស្រឡាញ់អ្វីដែលជារបស់ផងស្ថានសួគ៌ ហើយអភិវឌ្ឍឲ្យមានលក្ខណៈសម្បត្តិរបស់ព្រះគ្រីស្ទ ។ ប៉ុលក៏បានណែនាំពួកគេឲ្យមានភាពគួរសម និងឆ្លាតវៃពេលប្រាស្រ័យទាក់ទងជាមួយមនុស្សដទៃដែរ ។
កូល៉ុស ១-២
ប៉ុលបង្រៀនអំពីភាពឧត្តុង្គឧត្តមបំផុតរបស់ព្រះយេស៊ូវគ្រីស្ទ ហើយព្រមានទាស់នឹងគោលលទ្ធិខុសឆ្គង
សូមស្រមៃអំពីដើមឈើពីរដើមដែលមានទំហំស្រដៀងគ្នា—ដែលមួយដើមមានចាក់ឫសរាក់ ហើយមួយដើមទៀតមានចាក់ឫសជ្រៅ ។ ប្រសិនបើមានខ្យល់ព្យុះកើតឡើង តើដើមឈើមួយណាដែលនឹងរលំ ? ហេតុអ្វី ?
សូមអានសេចក្ដីថ្លែងការណ៍ខាងក្រោមដោយអែលឌើរ នែល អិល អាន់ឌើរសិន ក្នុងកូរ៉ុមនៃពួកសាវកដប់ពីរនាក់ ដោយស្វែងរកប្រភេទនៃខ្យល់គួចដែលយើងគួរតែប្រយ័ត្នខ្លួន ៖ « កង្វល់ដែលធំជាងការរញ្ជួយដី និង សង្គ្រាម [ នៅថ្ងៃចុងក្រោយ ] ដែលបានព្យាករទុកទៅទៀតនោះគឺ ខ្យល់គួចខាងវិញ្ញាណដែលអាចផ្ដាច់អ្នកចេញពីគ្រឹះខាងវិញ្ញាណរបស់អ្នក ហើយដាក់វិញ្ញាណអ្នកនៅទីដែលអ្នកនឹងនឹកស្មានមិនដល់ ពេលខ្លះអ្នកមិនបានទាំងដឹងខ្លួនថាអ្នកត្រូវបានផ្ដាច់ចេញផង » ( « Spiritual Whirlwinds » Ensign ឬ Liahona ខែ ឧសភា ឆ្នាំ ២០១៤ ទំព័រ ១៨ ) ។
តើមានឧទាហរណ៍អ្វីខ្លះនៃខ្យល់គួចខាងវិញ្ញាណ ដែលអាចរំលើងឫស ឬផ្ដាច់យើងចេញពីសេចក្ដីជំនឿទៅលើព្រះយេស៊ូវគ្រីស្ទ ?
ហេតុអ្វីបានជាខ្យល់គួចខាងវិញ្ញាណទាំងនេះអាចជារឿងកាន់តែវឹកវរជាងឧបសគ្គខាងសាច់ឈាមដូចជា រញ្ជួញដី ឬសង្គ្រាមទៅទៀត ?
សូមពិចារណាមួយភ្លែត អំពីខ្យល់គួចខាងវិញ្ញាណអ្វីខ្លះដែលអាចនឹងផ្ដល់ផលប៉ះពាល់ដល់អ្នក ។
សាវកប៉ុលបានសរសេរសំបុត្រមួយច្បាប់ទៅកាន់សមាជិកសាសនាចក្រនៅក្រុងកូល៉ុស បន្ទាប់ពីបានដឹងអំពីឥទ្ធិពល និងសេចក្ដីបង្រៀនខុសឆ្គងនៅទីនោះ ដែលគំរាមកំហែងផ្ដាច់ឫសពួកគេចេញពីសេចក្ដីជំនឿទៅលើព្រះយេស៊ូវគ្រីស្ទ ។ នៅពេលអ្នកសិក្សាគម្ពីរកូល៉ុស សូមស្វែងរករបៀបដែលប៉ុលបានព្យាយាមពង្រឹងសេចក្ដីជំនឿរបស់សមាជិកសាសនាចក្រទៅលើព្រះគ្រីស្ទ ហើយស្វែងរកពរជ័យនានាមកពីការចាក់ឫសសេចក្ដីជំនឿយ៉ាងជ្រៅទៅលើព្រះគ្រីស្ទ ។
ក្រុងកូល៉ុសគឺជាទីតាំងប្រទេសតួគីនាពេលបច្ចុប្បន្ននេះ ។ សូមបើកទៅផែនទីក្នុងព្រះគម្ពីរប៊ីបលេខ ១៣ « ដំណើររបស់ប៉ុលទៅផ្សាយសាសនា » ហើយ ស្វែងរកទីតាំង ក្រុងឡៅឌីសេនៅលើផែនទី ។ ក្រុងកូល៉ុសមានទីតាំងប្រមាណ ១៧.៧ គីឡូម៉ែត្រ នៅភាគអាគ្នេយ៍ក្រុងឡៅឌីសេ ។
ដូចមានកត់ត្រានៅក្នុង កូល៉ុស ១:១–១១ ប៉ុលបានពោលពាក្យជម្រាបសួរពួកបរិសុទ្ធកូល៉ុស ហើយបានទទួលស្គាល់ភាពស្មោះត្រង់របស់ពួកគេ ។ លោកបានពន្យល់ថា ដំណឹងល្អនាំមកនូវផលផ្លែ ឬពរជ័យ នៅក្នុងជីវិតនៃអ្នកទាំងឡាយណាដែលទទួលយក ហើយរស់នៅតាមវា ។ ប៉ុលបានបង្រៀនពួកបរិសុទ្ធអំពីព្រះយេស៊ូវគ្រីស្ទ ។
សូមអាន កូល៉ុស ១:១២–១៩ ដោយស្វែងរកសេចក្ដីពិតនានាដែលប៉ុលបានបង្រៀនអំពីព្រះយេស៊ូវគ្រីស្ទ ។ អ្នកអាចគូសចំណាំ ឬ កត់ចំណាំនៅក្នុងព្រះគម្ពីររបស់អ្នកនូវអ្វីដែលអ្នករកឃើញ ។ ឃ្លា « ផ្លាស់យើងមក » នៅក្នុង ខទី ១៣ មានន័យថា « បានកែប្រែយើង » ពាក្យ ដ៏មើលមិនឃើញ នៅក្នុង ខទី ១៥ មានន័យថា « មិនអាចមើលឃើញ » ។
កូល៉ុស ១:១២–១៩ បង្រៀនសេចក្ដីពិតដូចខាងក្រោមអំពីព្រះយេស៊ូវគ្រីស្ទ ៖ ព្រះយេស៊ូវគ្រីស្ទគឺជាព្រះប្រោសលោះ ជាបុត្រច្បងនៃបុត្រាបុត្រីខាងវិញ្ញាណរបស់ព្រះវរបិតាសួគ៌ ជាព្រះបង្កបង្កើតរបស់សព្វសារពើ ជាសិរសានៃសាសនាចក្រ និងជាអង្គដំបូងបង្អស់ដែលបានមានព្រះជន្មរស់ឡើងវិញ ។
-
សូមឆ្លើយសំណួរខាងក្រោមនេះនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖
-
តើអ្នកគិតថា ហេតុអ្វីបានជាវាសំខាន់សម្រាប់យើងដែលត្រូវដឹង ហើយជឿលើសេចក្ដីពិតទាំងនេះអំពីព្រះយេស៊ូវគ្រីស្ទ ?
-
តើការដឹង និងការជឿលើសេចក្ដីពិតទាំងនេះ អាចពង្រឹងសេចក្ដីជំនឿរបស់យើងទៅលើទ្រង់បានយ៉ាងដូចម្ដេច ?
-
ប៉ុលបានបង្រៀនថា ព្រះយេស៊ូវគ្រីស្ទគឺជាព្រះប្រោសលោះរបស់យើង ( សូមមើល កូល៉ុស ១:១៤ ) ។ សូមអាន កូល៉ុស ១:២០–២២ ដោយស្វែងរកសេចក្ដីដែលប៉ុលបានបង្រៀនពួកបរិសុទ្ធកូល៉ុស អំពីសេចក្តីត្រូវការរបស់ពួកគេក្នុងការមានព្រះប្រោសលោះមួយព្រះអង្គ ។
យោងតាម ខទី ២១ តើមនុស្សម្នាក់ងាកចេញ ឬបែកចេញពីព្រះតាមរបៀបណា ?
ពាក្យ ឲ្យជា ( សូមមើល កូល៉ុស ១:២០–២១ ) មានន័យថា នាំឲ្យព្រមព្រៀង ឬចុះសម្រុង ។ យោងតាម កូល៉ុស ១:២០–២២ តើព្រះយេស៊ូវគ្រីស្ទធ្វើឲ្យយើងជានឹងព្រះតាមរបៀបណា ? ( ឃ្លា « តាំងស្ពានមេត្រី ដោយសារព្រះលោហិតនៃការឆ្កាងទ្រង់ » [ ខទី ២០ ] សំដៅទៅលើដង្វាយធួនរបស់ព្រះយេស៊ូវគ្រីស្ទ ) ។
ពរជ័យនៃការបានជានឹងព្រះគឺមានលក្ខខណ្ឌ ។ សូមអាន កូល៉ុស ១:២៣ ដោយស្វែងរកអ្វីដែលតម្រូវឲ្យមាន ដើម្បីបានជានឹងព្រះ ។
ដើម្បី « តាំងនៅជាប់លាប់ ហើយមាំមួនក្នុងសេចក្តីជំនឿ » ( កូល៉ុស ១:២៣ ) មានន័យថា ត្រូវបន្តខ្ជាប់ខ្ជួនក្នុងសេចក្ដីជំនឿរបស់យើងទៅលើព្រះយេស៊ូវគ្រីស្ទ ដោយគោរពតាមព្រះបញ្ញត្តិទាំងឡាយរបស់ទ្រង់ ហើយប្រែចិត្តពីអំពើបាបរបស់យើង ។ ចេញពី កូល៉ុស ១:២០–២៣ យើងរៀនសេចក្ដីពិតដូចខាងក្រោម ៖ យើងអាចបានជានឹងព្រះតាមរយៈដង្វាយធួនរបស់ព្រះយេស៊ូវគ្រីស្ទ ប្រសិនបើយើងបន្តតាំងនៅជាប់លាប់ ហើយមាំមួនក្នុងសេចក្តីជំនឿ ។
-
សូមរំឭកអំពីស្ថានភាពនៃដើមឈើពីរដើមនៅខាងដើមមេរៀននេះ ។ រួចសូមឆ្លើយសំណួរខាងក្រោមនេះ ដាក់នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖
-
តើអ្នកស្គាល់នរណាដែលមានលក្ខណៈដូចជាដើមឈើដែលមានឫសវែង—ដែលតាំងនៅជាប់លាប់ ហើយមាំមួនក្នុងសេចក្តីជំនឿរបស់គាត់ដែរឬទេ ?
-
តើគំរូរបស់គាត់ក្លាយជាពរជ័យចំពោះអ្នកយ៉ាងដូចម្ដេច ?
-
សូមរំឭកអំពីខ្យល់កួចដែលកួចបក់បោកទៅលើដើមឈើទាំងពីរដើមនោះ ។ សូមអាន កូល៉ុស ២:៤, ៨ ដោយស្វែងរកខ្យល់កួចខាងវិញ្ញាណ ដែលគំរាមកំហែងផ្តាច់ឫសពួកបរិសុទ្ធកូល៉ុស ។
នៅគ្រានោះ មានទស្សនៈវិជ្ជា និងប្រពៃណីជាច្រើនដែលបានបង្រៀនដោយមនុស្សមួយចំនួន ដែលព្យាយាមលុបបំបាត់សារៈសំខាន់នៃព្រះយេស៊ូវគ្រីស្ទ ។ ទស្សនវិជ្ជាដ៏ខុសឆ្គងផ្សេងៗខាងសាសនាដែលកំពុងមានប្រជាប្រិយភាពនោះបានប្រាប់ថា ពួកទេវតាគឺជាអ្នកសង្រួបសង្រួមយើងជាមួយព្រះជាតួអង្គដែលគួរតែថ្វាយបង្គំ ព្រមទាំងគំនិតដែលថា រូបកាយគឺជាវត្ថុអាក្រក់ ( សូមមើល កូល៉ុស ២:១៦–២៣ ) ។
ហេតុអ្វីបានជាការជឿលើសេចក្ដីបង្រៀនក្លែងក្លាយ រួមមានសេចក្ដីបង្រៀនដែលលុបបំបាត់សារៈសំខាន់នៃព្រះយេស៊ូវគ្រីស្ទ ធ្វើឲ្យមនុស្សម្នាក់ងាយស្រួលនឹងត្រូវរំលើងឫសខាងវិញ្ញាណ ?
សូមអាន កូល៉ុស ២:៦–៧ ស្វែងរកដំបូន្មានដែលប៉ុលបានផ្ដល់ឲ្យ ដើម្បីជួយពួកបរិសុទ្ធចៀសវាងពីការដឹកនាំឲ្យដើរផ្លូវខុស ដោយសារទស្សនវិជ្ជា និងទំនៀមទម្លាប់ខាងលោកិយ ។
យើងរៀនចេញពីខគម្ពីរនេះ នូវសេចក្ដីពិតដូចខាងក្រោម ៖ តាមរយៈការចាក់ឫស និងស្ថាបនានៅលើព្រះយេស៊ូវគ្រីស្ទ យើងអាចចៀសវាងពីការដឹកនាំឲ្យដើរផ្លូវខុសដោយសារទស្សនវិជ្ជា និងទំនៀមទម្លាប់ខាងលោកិយ ។
-
សូមឆ្លើយសំណួរខាងក្រោមនេះ ដាក់នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖
-
តើអ្នកជឿថាកិច្ចការអ្វីដែលមានសារៈសំខាន់បំផុត ដែលយើងអាចធ្វើដើម្បីបានចាក់ឫស ហើយស្ថាបនានៅលើព្រះយេស៊ូវគ្រីស្ទ ?
-
ហេតុអ្វីបានជាអ្នកជឿថា កិច្ចការជាក់លាក់នោះមានសារៈសំខាន់ដល់ម្ល៉េះ ?
-
សូមពិចារណាលើសេចក្ដីថ្លែងការណ៍ខាងក្រោមនេះដែលថ្លែងដោយអែលឌើរ អាន់ឌើរសិន កាលលោកបានបន្តថ្លែងសុន្ទរកថារបស់លោកអំពីខ្យល់កួចខាងវិញ្ញាណ ៖
« ខ្យល់គួចដ៏កំណាចនេះ គឺជាការល្បួងពីមារសត្រូវ ។ អំពើបាបតែងមាននៅក្នុងពិភពលោកនេះ ប៉ុន្តែវាពុំធ្លាប់មាន ហើយងាយនឹងទទួលយកដូចសព្វថ្ងៃនេះនោះទេ ។ ពិតណាស់ មានកម្លាំងដ៏អស្ចារ្យមួយដែលនឹងធ្វើឲ្យខ្យល់គួចនៃអំពើបាបនេះស្ងប់បាន ។ វាត្រូវបានហៅថា ការប្រែចិត្ត ។
« មិនមែនរាល់ខ្យល់កួចក្នុងជីវិតនេះសុទ្ធតែកើតមកពីទង្វើរបស់អ្នកឡើយ ។ អំពើបាបខ្លះកើតឡើងដោយសារការជ្រើសរើសខុសរបស់អ្នកដទៃ ហើយខ្លះទៀតកើតឡើងដោយសារនេះជាជីវិតរមែងស្លាប់ ។ …
« តើអ្នករៀបចំខ្លួនសម្រាប់ខ្យល់កួចរបស់អ្នកតាមរបៀបណា ? ‹ ចូរចងចាំ … ចុះថា គឺនៅលើសិលានៃព្រះដ៏ប្រោសលោះនៃយើង គឺព្រះគ្រីស្ទជាព្រះរាជបុត្រានៃព្រះ ដែលកូនត្រូវសង់គ្រឹះរបស់កូន ដើម្បីកាលណាអារក្សបញ្ចេញខ្យល់ដ៏ខ្លាំងក្លារបស់វាមក … ព្រួញរបស់វានៅក្នុងខ្យល់គួច … កាលណាព្រិល និង ខ្យល់ព្យុះកំណាចទាំងអស់របស់វាបោកបក់មកលើកូន នោះវានឹងគ្មានអំណាច … ដើម្បីទាញកូនចុះ … ពីព្រោះមកពីសិលាដែលកូនបានសង់នៅលើនោះ › [ ហេលេមិន ៥:១២ ] ។ នេះជាសុវត្ថិភាពរបស់អ្នកនៅក្នុងខ្យល់គួចនោះ » ( « Spiritual Whirlwinds » ទំព័រ ១៨–១៩ ) ។
-
សូមរំឭកអំពីខ្យល់កួចខាងវិញ្ញាណផ្ទាល់ខ្លួនទាំងនោះ ដែលអ្នកបានគិតអំពីវាកាលនៅខាងដើមមេរៀននេះ ។ សូមកត់ត្រានៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក អំពីអ្វីដែលអ្នកនឹងធ្វើដើម្បីបន្តចាក់ឫស និងស្ថាបនានៅលើព្រះយេស៊ូវគ្រីស្ទ និងដើម្បីចៀសវាងពីការរំលើងឫសដោយខ្យល់កួចខាងវិញ្ញាណ ។
កូល៉ុស ៣-៤
ប៉ុលលើកទឹកចិត្តពួកកុល៉ុសឲ្យចេះស្រឡាញ់អ្វីដែលជារបស់ផងស្ថានសួគ៌ ហើយមានភាពវៃឆ្លាត
ដូចមានកត់ត្រានៅក្នុង កូល៉ុស ៣–៤ សាវកប៉ុលបានជំរុញចិត្តឲ្យពួកបរិសុទ្ធកូល៉ុសបញ្ឈប់អំពើទុច្ចរិត ហើយអភិវឌ្ឍឲ្យមានលក្ខណៈសម្បត្តិព្រះយេស៊ូវគ្រីស្ទ ។ លោកក៏បានលើកទឹកចិត្តពួកគេឲ្យអធិស្ឋាន ហើយមានភាពឆ្លាតវៃ ជាពិសេសនៅក្នុងការប្រាស្រ័យទាក់ទងរបស់ពួកគេជាមួយអ្នកដែលមិនមែនជាគ្រិស្តសាសនិក ។ ក្រោយមកលោកបានបន្តពាក្យជម្រាបសួរដល់បងប្អូនរួមការងារបម្រើជាមួយលោក រួមទាំងលូកាផងដែរ ។
-
សូមសរសេរឃ្លាដែលនៅខាងក្រោមនេះ ពីខាងក្រោមកិច្ចការថ្ងៃនេះ នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖
ខ្ញុំបានសិក្សាគម្ពីរកូល៉ុស ហើយបានបញ្ចប់មេរៀននេះនៅ ( កាលបរិច្ឆេទ ) ។
សំណួរ គំនិត និង ការយល់ដឹងបន្ថែមដែលខ្ញុំចង់ចែកចាយជាមួយគ្រូរបស់ខ្ញុំ ៖