មេរៀនទី ២៤ ៖ ថ្ងៃទី ៣
កាឡាទី
សេចក្តីផ្ដើម
សាវកប៉ុលបានបន្ទោសពួកបរិសុទ្ធនៅកាឡាទីចំពោះការធ្វើតាមសេចក្ដីបង្រៀនខុសឆ្គងនានា ហើយលោកបានបន្ទោសដល់ពួកគ្រូបង្រៀនខុសឆ្គងដែលដឹកនាំពួកគេទៅរកផ្លូវខុស ។ លោកក៏បានបង្រៀនដែរថា គឺដូចជាអ័ប្រាហាំបានក្លាយជាអ្នកគ្រងមរតកពីព្រះ នោះពួកបរិសុទ្ធនៅកាឡាទីក៏អាចក្លាយជាអ្នកគ្រងមរតកពីព្រះដែរ តាមរយៈការមានសេចក្ដីជំនឿ និងការដើរតាមព្រះយេស៊ូវគ្រីស្ទប្រសើរជាងការធ្វើតាមការទាមទារនៃក្រឹត្យវិន័យរបស់លោកម៉ូសេ ។
កាឡាទី ១–២
ប៉ុលស្ដីបន្ទោសពួកបរិសុទ្ធចំពោះការធ្វើតាមពួកគ្រូបង្រៀនខុសឆ្គង ហើយលើកទឹកចិត្តពួកគេឲ្យបែរមករកដំណឹងល្អវិញ
សូមស្រមៃថា បងប្អូនបង្កើត ឬមិត្តភក្ដិម្នាក់របស់អ្នកបានប្រាប់អ្នកថា គាត់គិតថាសេចក្ដីបង្រៀនរបស់សាសនាចក្រលែងការពិតទៀតហើយ ។ ជាលទ្ធផល បុគ្គលនេះបានឈប់ចូលរួមក្នុងសាសនាចក្រ ហើយឈប់រស់នៅតាមដំណឹងល្អតទៅទៀត ។
-
សូមសរសេរនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ថា តើអ្នកនឹងថ្លែងយ៉ាងដូចម្ដេចទៅកាន់បងប្អូនបង្កើត ឬមិត្តភក្ដិរបស់អ្នក ដើម្បីជួយគាត់ឲ្យត្រឡប់មកជឿលើសេចក្ដីបង្រៀនរបស់សាសនាចក្រវិញ ។
នៅពេលអ្នកសិក្សា កាឡាទី ១ ហើយរៀនអំពីមូលហេតុដែលពួកបរិសុទ្ធនៅក្រុងកាឡាទីបានដើរចេញពីដំណឹងល្អដ៏ពិត សូមស្វែងរកសេចក្ដីពិតមួយដែលអាចជួយបងប្អូនបង្កើត ឬមិត្តភក្តិរបស់អ្នកឲ្យមានសេចក្ដីជំនឿឡើងវិញ ។
កាឡាទីគឺជាតំបន់មួយស្ថិតនៅអាស៊ីតូចកណ្ដាលភាគខាងជើង ដែលរួមបញ្ចូលទាំងទីក្រុងនានាដែលសាវកប៉ុលបានទៅដល់អំឡុងដំណើរផ្សាយសាសនាទីពីរ និងទីបីរបស់លោក ( សូមមើល កិច្ចការ ១៦:៦; ១៨:២៣ សូមមើលផងដែរ ផែនទីក្នុងព្រះគម្ពីរប៊ីប ទី ១៣ « ដំណើររបស់សាវកប៉ុលទៅផ្សាយសាសនា » ) ។ សូមអាន កាឡាទី ១:៦–៧ ដោយស្វែងរកបញ្ហាមួយដែលលេចឡើងក្នុងចំណោមសមាជិកសាសនាចក្រនៅក្រុងកាឡាទី ។
អ្នកទាំងឡាយណាដែលរុកគួនដល់ពួកបរិសុទ្ធកាឡាទី ហើយបង្ខូចសេចក្ដីបង្រៀននៃដំណឹងល្អគឺកំពុងបង្កើតនូវភាពសង្ស័យ ( សូមមើល កាឡាទី ១:៧ ) អំពីសេចក្ដីបង្រៀនរបស់ប៉ុលដែលថា សេចក្ដីសង្គ្រោះកើតមានតែតាមរយៈព្រះយេស៊ូវគ្រីស្ទប៉ុណ្ណោះ ។ ពួកគ្រូបង្រៀនខុសឆ្គងទាំងនេះគឺជាពួកគ្រិស្តសាសនិកសាសន៍យូដាដែលស្គាល់ថាជាពួកគ្រិស្តសាសនិកដែលនៅតែមានះធ្វើតាមក្រឹត្យវិន័យរបស់លោកម៉ូសេ ។ ពួកគេបានអះអាងថា ដើម្បីបានសង្គ្រោះ ពួកបរិសុទ្ធនៅកាឡាទីត្រូវកាត់ស្បែក ហើយធ្វើតាមក្រឹត្យវិន័យរបស់លោកម៉ូសេ ។
សូមអាន កាឡាទី ១:៨–៩ ដោយស្វែងរកថាតើប៉ុលបានថ្លែងដូចម្ដេចអំពីអ្នកទាំងឡាយ ដែលផ្សាយដំណឹងល្អផ្ទុយទៅនឹងដំណឹងល្អដែលលោកបានផ្សាយក្នុងនាមជាសាវកមួយរូបរបស់ព្រះអម្ចាស់ ។
សូមអាន កាឡាទី ១:១០-១២ ដោយស្វែងរកប្រភពនៃសេចក្ដីបង្រៀនរបស់ប៉ុល ។ អ្នកអាចគូសចំណាំ ឬ កត់ចំណាំនៅក្នុងព្រះគម្ពីររបស់អ្នកនូវអ្វីដែលអ្នករកឃើញ ។
យើងរៀនចេញពីសេចក្ដីបង្រៀនរបស់ប៉ុលថា ព្រះយេស៊ូវបានបើកសម្ដែងគោលលទ្ធិពិតដល់ពួកព្យាការីរបស់ទ្រង់ ។
-
សូមឆ្លើយសំណួរមួយ ឬ សំណួរទាំងអស់ខាងក្រោមនេះ ដាក់នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖
-
តើការចងចាំថាព្រះគឺជាប្រភពនៃគោលលទ្ធិពិត អាចជួយយើងនៅពេលយើងមានមន្ទិលលើសេចក្ដីបង្រៀនរបស់ព្យាការីយ៉ាងដូចម្ដេច ?
-
តើយើងអាចធ្វើអ្វីខ្លះដើម្បីទទួលបានវិវរណៈមកពីព្រះ ដើម្បីយើងអាចដឹងដោយខ្លួនយើងថា សេចក្ដីបង្រៀនរបស់ព្យាការីគឺជាការពិត ?
-
តើសេចក្ដីពិតនេះអាចជួយនរណាម្នាក់ដែលមានបញ្ហាក្នុងការជឿលើសេចក្ដីបង្រៀនរបស់ពួកព្យាការីយ៉ាងដូចម្ដេច ?
-
ដូចមានកត់ត្រានៅក្នុង កាឡាទី ១:១៣–២:២១ ប៉ុលបានមានប្រសាសន៍ប្រាប់អំពីការប្រែចិត្តជឿ និងដំណើរផ្សាយសាសនាលើកដំបូងរបស់លោក ។ លោកក៏បានពន្យល់ផងដែរអំពីមូលហេតុដែលគ្រិស្តសាសនិកដែលជាសាសន៍ដទៃពុំត្រូវពឹងផ្អែកទៅលើទម្លាប់ដែលថា សេចក្ដីសង្គ្រោះគឺមាននៅក្នុងក្រឹត្យវិន័យរបស់លោកម៉ូសេឡើយ ផ្ទុយទៅវិញ គឺតាមរយៈសេចក្ដីជំនឿលើព្រះយេស៊ូវគ្រីស្ទដែលយើងត្រូវបានអត់ទោសឲ្យ ( ឬបានរាប់ជាសុចរិត ) ។ ប៉ុលបានថ្លែងទីបន្ទាល់ថាលោករស់ « ដោយសេចក្តីជំនឿ ជឿដល់ព្រះរាជបុត្រានៃព្រះ ដែលទ្រង់ស្រឡាញ់ខ្ញុំ ក៏បានប្រគល់ព្រះអង្គទ្រង់ជំនួសខ្ញុំហើយ » ( កាឡាទី ២:២០ ) ។
កាឡាទី ៣–៤
ប៉ុលអញ្ជើញពួកកាឡាទីឲ្យទទួលពរជ័យទាំងអស់ដែលបានសន្យាដល់អ័ប្រាហាំតាមរយៈព្រះយេស៊ូវគ្រីស្ទ
ហេតុអ្វីបានជាបុគ្គលទាំងឡាយខាងក្រោមនេះអាចមានអារម្មណ៍ថាពិបាកក្នុងការទទួលបានពរជ័យពីព្រះអម្ចាស់ បើប្រៀបធៀបទៅនឹងមនុស្សដទៃទៀតក្នុងសាសនាចក្រដែលស្គាល់ដំណឹងល្អ ហើយស្មោះត្រង់ចំពោះដំណឹងល្អតាំងពីនៅក្មេង ?
-
យុវជនម្នាក់បានធំឡើងនៅក្នុងគ្រួសារមិនសូវសកម្ម ហើយមិនបានរៀនដំណឹងល្អកាលពីគាត់នៅក្មេងឡើយ ។ គ្រួសារគាត់ឥឡូវនេះ បានត្រឡប់មកសកម្មក្នុងសាសនាចក្រវិញ ហើយកំពុងចាប់ផ្ដើមរៀន និងរស់នៅតាមដំណឹងល្អ ។
-
ស្ត្រីម្នាក់ចំអក ព្រមទាំងរិះគន់សាសនាចក្រអស់ជាច្រើនឆ្នាំ ។ ថ្មីៗនេះ គាត់បានផ្លាស់ប្ដូរចិត្ត ហើយបានទទួលបុណ្យជ្រមុជទឹក ។
នៅពេលអ្នកសិក្សា កាឡាទី ៣–៤ សូមស្វែងរកសេចក្ដីពិតមួយដែលអាចជួយអ្នកយល់ថា តើមានពរជ័យណាខ្លះសម្រាប់មនុស្សគ្រប់រូប ដោយមិនគិតអំពីស្ថានភាព ឬជម្រើសពីមុនៗរបស់គាត់ឡើយ ។
ដោយសារតែពួកកាឡាទីគឺជាសាសន៍ដទៃដែលប្រែចិត្តជឿលើគ្រិស្តសាសនា នោះពួកគេពុំមែនជាពូជអំបូររបស់អ័ប្រាហាំ ជាអ្នកដែលពរជ័យទាំងអស់របស់ព្រះត្រូវបានសន្យានោះទេ ។
សូមអាន កាឡាទី ៣:៧–៩ ដោយស្វែងរកសេចក្ដីដែលប៉ុលបានបង្រៀនអំពីអ្នកទាំងឡាយដែល « មានសេចក្តីជំនឿ » ( កាឡាទី ៣:៧ ) ឬអ្នកដែលជឿលើព្រះយេស៊ូវគ្រីស្ទ ។
យោងតាម ខទី ៨ តើព្រះអម្ចាស់បានសន្យាអ្វីខ្លះដល់អ័ប្រាហាំ ?
យោងតាម ខទី ៩ តើមានអ្វីខ្លះនឹងកើតឡើងចំពោះអ្នកទាំងឡាយដែលមានសេចក្ដីជំនឿទៅលើព្រះយេស៊ូវគ្រីស្ទ ?
« បានពរជាមួយនឹងលោកអ័ប្រាហាំ » ( កាឡាទី ៣:៩ ) សំដៅទៅលើលទ្ធភាពទទួលបានពរជ័យទាំងឡាយនៃសេចក្ដីសញ្ញាដែលព្រះបានធ្វើជាមួយអ័ប្រាហាំថា តាមរយៈលោក នោះមនុស្សទាំងអស់អាចរីករាយនឹងពរជ័យទាំងឡាយនៃបព្វជិតភាពជាន់ខ្ពស់ អាពាហ៍ពិពាហ៍សេឡេស្ទាល និង ភាពតម្កើងឡើង ( សូមមើល សេចក្ដីណែនាំដល់បទគម្ពីរទាំងឡាយ « សេចក្ដីសញ្ញាអ័ប្រាហាំ » scriptures.lds.org ) ។
យើងអាននៅក្នុង កាឡាទី ៣:១០–២៥ ថា ក្រឹត្យវិន័យរបស់លោកម៉ូសេមិនដែលត្រូវបានរំពឹងថាជាមធ្យោបាយដើម្បីឲ្យមនុស្សអាច « បានរាប់ជាសុចរិត » ឡើយ ( កាឡាទី ៣:១១ ) វាមានន័យថា ពួកគេត្រូវបានអត់ទោសពីអំពើបាប ហើយបានរាប់ថាគ្មានទោស ។ វាត្រូវបានរំពឹងឲ្យធ្វើជាមគ្គុទេសក៍ ឬ « អ្នកដឹកនាំ » ( កាឡាទី ៣:២៤ ) ដើម្បីជួយពួកអ៊ីស្រាអែលឲ្យមករកព្រះយេស៊ូវគ្រីស្ទ ហើយបានរាប់ជាសុចរិតតាមរយៈសេចក្ដីជំនឿទៅលើទ្រង់ ។ សូមកត់ចំណាំថា ការរាប់ជាសុចរិត មានន័យថា « បានលើកលែងពីការដាក់ទោសចំពោះអំពើបាប ហើយរាប់ថាឥតមានទោស » ( សេចក្ដីណែនាំដល់បទគម្ពីរទាំងឡាយ « ការរាប់ជាសុចរិត រាប់ជាសុចរិត » scriptures.lds.org ) ។
សូមបំពេញតារាងខាងក្រោមដោយអានវគ្គបទគម្ពីរទាំងឡាយ រួចឆ្លើយសំណួរ ៖
កាឡាទី ៣:២៦–២៧ ។ តើយើងត្រូវធ្វើអ្វីខ្លះដើម្បីទទួលពរជ័យដែលបានសន្យាដល់លោកអ័ប្រាហាំ ? |
កាឡាទី ៣:២៨–២៩; ៤:៧ ។ ទោះយើងជានរណា ឬជាអ្វីក៏ដោយកាលពីមុន តើយើងក្លាយជាមនុស្សបែបណានៅពេលយើងចូលក្នុងសេចក្ដីសញ្ញានៃដំណឹងល្អតាមរយៈពិធីបុណ្យជ្រមុជទឹក ? |
យើងរៀនចេញពី កាឡាទី ៣:២៦–២៩, ៤:៧ ថា អស់អ្នកទាំងឡាយដែលអនុវត្តសេចក្ដីជំនឿទៅលើព្រះយេស៊ូវគ្រីស្ទ ហើយចូលទៅក្នុងសេចក្ដីសញ្ញានៃដំណឹងល្អ នឹងប្រែក្លាយទៅជាតែមួយនៅក្នុងព្រះគ្រីស្ទ ហើយជាអ្នកគ្រងមរតករបស់ព្រះ ។
ហេតុអ្វីវាជាការសំខាន់ដែលត្រូវដឹងថា ព្រះសន្យាពរជ័យទាំងនេះដល់មនុស្សគ្រប់រូបដែលបានចូលក្នុងសេចក្ដីសញ្ញា ដោយមិនគិតថាពួកគេមានស្ថានភាពយ៉ាងណានោះទេ ?
យើងអាននៅក្នុង កាឡាទី ៤:៨–៣១ ថា ប៉ុលបានអញ្ជើញពួកបរិសុទ្ធកាឡាទីឲ្យត្រឡប់ទៅរកព្រះយេស៊ូវគ្រីស្ទ ហើយគេចចេញពីសេវកភាពដែលកើតមានមកពីការព្យាយាមគោរពតាមទម្លាប់នៃក្រឹត្យវិន័យរបស់លោកម៉ូសេ ។
កាឡាទី ៥–៦
ប៉ុលលើកទឹកចិត្តពួកបរិសុទ្ធកាឡាទីឲ្យស្ដារសេចក្ដីជំនឿរបស់ខ្លួនទៅលើព្រះយេស៊ូវគ្រីស្ទឡើងវិញ
តើមានការល្បួងដ៏លំបាកបំផុតមួយចំនួនណាខ្លះដែលអ្នកជួបប្រទះ ? តើអ្នកអាចយកឈ្នះលើការល្បួងទាំងនេះបានយ៉ាងដូចម្ដេច ?
នៅពេលអ្នកសិក្សា កាឡាទី ៥–៦ សូមស្វែងរកគោលការណ៍នានាដែលអាចជួយអ្នកយកឈ្នះលើការល្បួង ។
សូមអាន កាឡាទី ៥:១៦–១៧ ដោយស្វែងរកឥទ្ធិពលទាំងពីរដែលទាស់នឹងគ្នា ដែលប៉ុលបានពិពណ៌នា ។
« ដើរក្នុងព្រះវិញ្ញាណ » ( កាឡាទី ៥:១៦ ) មានន័យថា រស់នៅសក្ដិសម ហើយធ្វើតាមការបំផុសគំនិតពីព្រះវិញ្ញាណបរិសុទ្ធ ។ « បំពេញសេចក្តីប៉ងប្រាថ្នាខាងសាច់ឈាម » ( កាឡាទី ៥:១៦ ) មានន័យថា បណ្ដោយខ្លួនទៅតាមអំពើបាប ។
សូមបំពេញគោលការណ៍ដូចតទៅនេះ ដោយផ្អែកទៅលើអ្វីដែលអ្នកបានរៀនចេញពី កាឡាទី ៥:១៦ ៖ នៅពេលយើងដើរក្នុងព្រះវិញ្ញាណ នោះយើងនឹងយកឈ្នះលើ ។
សូមពិចារណាថាតើការដើរក្នុងព្រះវិញ្ញាណ អាចជួយអ្នកយកឈ្នះលើការល្បួងយ៉ាងដូចម្ដេច ។
សូមអាន កាឡាទី ៥:២២–២៣ ដោយស្វែងរកលទ្ធផលដទៃទៀតមកពីការដើរក្នុងព្រះវិញ្ញាណ ។ ( សូមកត់ចំណាំថា កាឡាទី ៥:២២–២៣ គឺជាវគ្គចំណេះចំណានខគម្ពីរ ។ អ្នកអាចនឹងចង់គូសចំណាំវានៅតាមវិធីដែលងាយសម្គាល់ ដើម្បីអ្នកអាចងាយរកវាឃើញនៅពេលខាងមុខ ) ។
ចំណេះចំណានខគម្ពីរ—កាឡាទី ៥:២២-២៣
-
ដើម្បីជួយអ្នកទន្ទេញចាំ កាឡាទី ៥:២២–២៣ សូមគូររូបដើមឈើមួយដើមដែលមានផ្លែចំនួនប្រាំបួននៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក—ផ្លែនោះស្ថិតនៅក្នុងជួរចំនួនបីដែលជួរនិមួយៗមានបីផ្លែ ។ សូមសរសេរនៅផ្នែកពីលើដើមឈើថា តែឯផលផ្លែនៃព្រះវិញ្ញាណវិញនោះគឺ … នៅផ្នែកពីក្រោមដើមឈើ សូមសរសេរថា គ្មានក្រឹត្យវិន័យណាទាស់នឹងសេចក្តីយ៉ាងនោះទេ ។ ចាប់ពីជួរផ្លែឈើខាងលើគេ សូមសរសេរតួអក្សរដំបូងគេនៃផលផ្លែដែលប៉ុលបានលើកឡើង ។ សូមហាត់សូត្រចំណេះចំណានខគម្ពីរនេះដោយមើលទៅរូបភាពនេះ ហើយបើកទៅវគ្គបទគម្ពីរប្រសិនបើចាំបាច់ ។ សូមបន្តសូត្ររហូតដល់អ្នកអាចសូត្រចំណេះចំណានខគម្ពីរនេះបានដោយមិនចាំបាច់មើលទៅរូបភាព ឬបើកមើលព្រះគម្ពីរ ។ សូមសូត្របទគម្ពីរនេះឲ្យសមាជិកគ្រួសារ ឬសិស្សក្នុងថ្នាក់សិក្ខាសាលាស្ដាប់ ។
-
សូមឆ្លើយសំណួរខាងក្រោមនេះ នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖ តើការស្វែងរកអំណោយទានទាំងនេះ អាចបង្កើនសមត្ថភាពរបស់អ្នកដើម្បីជួយមនុស្សដទៃយ៉ាងដូចម្ដេច ?
សូមអាន កាឡាទី ៦:១–២ ដោយស្វែងរកថាតើប៉ុលបានបង្រៀនអ្វីខ្លះអំពីរបៀបដែលសមាជិកសាសនាចក្រគួរឆ្លើយតបទៅនរណាម្នាក់ដែលបានធ្វើអំពើបាប ។ « ធ្វើខុសអ្វី » ( កាឡាទី ៦:១ ) មានន័យថាធ្វើអំពើបាប ។
ហេតុអ្វីសំខាន់ដែលត្រូវមាន « ចិត្តសុភាព » ( កាឡាទី ៦:១ ) នៅពេលយើងជួយនរណាម្នាក់ត្រឡប់មកកាន់មាគ៌ានៃដំណឹងល្អវិញ ?
ដូចមានកត់ត្រានៅក្នុង កាឡាទី ៦:៣–៥ ប៉ុលបានបង្រៀនថា យើងមិនគួរក្រអឺតក្រទម និងប្រកាន់គំនិតខ្លួនឯងត្រូវ ហើយថាមនុស្សគ្រប់រូបនឹង « ត្រូវទទួលបន្ទុកជារបស់ផងខ្លួន » ( កាឡាទី ៦:៥ ) ឬទទួលខុសត្រូវលើជម្រើសរបស់ខ្លួនឡើយ ។
តើដើមអ្វីនឹងដុះឡើងនៅពេលអ្នកដាំគ្រាប់ពូជដូចខាងក្រោមនេះ ? សូមសរសេរការប៉ាន់ស្មានរបស់អ្នកនៅក្នុងចន្លោះដែលទាក់ទង ។ ( ចម្លើយមាននៅខាងចុងនៃមេរៀននេះ ) ។
ក. |
|
ខ. |
|
គ. |
|
ប៉ុលបានប្រើយោបល់អំពីគ្រាប់ពូជដើម្បីបង្រៀនអំពីសេចក្ដីពិតខាងវិញ្ញាណ ។ សូមអាន កាឡាទី ៦:៧–៨ ដោយស្វែងរកសេចក្ដីដែលប៉ុលបានបង្រៀនអំពីអ្វីដែលយើងអាចរំពឹងចង់បាន នៅពេលយើងព្រោះ ឬដាំគ្រាប់ពូជ ។ ជាញឹកញាប់ សេចក្ដីបង្រៀនរបស់ប៉ុលនៅក្នុងខគម្ពីរទាំងនេះត្រូវបានហៅថាជាច្បាប់នៃការប្រមូលផល ។
សូមអាន កាឡាទី ៦:៩–១០ ដោយស្វែងរកមូលហេតុដែលប៉ុលបានបង្រៀនអំពីច្បាប់នៃការប្រមូលផល បន្ទាប់ពីលោកបានអញ្ជើញពួកកាឡាទីឲ្យជួយអ្នកដទៃទៀតឲ្យរឹងមាំ ឬត្រឡប់មកកាន់មាគ៌ានៃដំណឹងល្អវិញ ។
យើងរៀនចេញពីខគម្ពីរទាំងនេះថា ប្រសិនបើយើងឧស្សាហ៍ព្យាយាមនៅក្នុងការធ្វើកិច្ចការល្អ នោះយើងនឹងប្រមូលផលពរជ័យនៃទង្វើរបស់យើង ។
-
សូមធ្វើកិច្ចការខាងក្រោមនេះយ៉ាងហោចណាស់ពីរ ដាក់នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖
-
តើការសន្យាថាយើងនឹងប្រមូលផល « ដល់កំណត់ » អាចជួយយើងមិនឲ្យ « រសាយចិត្ត » ( កាឡាទី ៦:៩ ) ឬបោះបង់ចោលការខិតខំរបស់យើងដើម្បីបម្រើមនុស្សដទៃ ហើយរស់នៅតាមដំណឹងល្អក្នុងជីវិតរបស់យើងបានយ៉ាងដូចម្ដេច ?
-
តើនៅពេលណាដែលអ្នក ឬនរណាម្នាក់ដែលអ្នកស្គាល់បានឧស្សាហ៍ព្យាយាមក្នុងការធ្វើការល្អ ទោះជាពរជ័យពុំបានទទួលភ្លាមៗយ៉ាងណាក្ដីនោះ ?
-
សូមពិចារណាដោយការអធិស្ឋានអំពីបុគ្គលដែលអ្នកអាចជួយឲ្យត្រឡប់ទៅរកមាគ៌ានៃដំណឹងល្អវិញ ។ នៅពេលអ្នកពិចារណាអំពីបុគ្គលនោះ សូមសរសេរគោលដៅអំពីរបៀបដែលអ្នកនឹងឧស្សាហ៍ក្នុងការធ្វើការល្អនៅពេលអ្នកព្យាយាមជួយគាត់ ទោះជាអ្នកអាចមិនឃើញលទ្ធផលចេញពីកិច្ចខិតខំរបស់អ្នកភ្លាមៗយ៉ាងណាក្ដី ។
-
ដូចមានកត់ត្រានៅក្នុង កាឡាទី ៦:១១-១៨ ប៉ុលបានបញ្ចប់សំបុត្ររបស់លោកទៅកាន់ពួកបរិសុទ្ធកាឡាទីដោយថ្លែងទីបន្ទាល់ថា សេចក្ដីសុខសាន្ដ និងសេចក្ដីមេត្តាករុណារបស់ព្រះយេស៊ូវគ្រីស្ទ គឺមានមកលើមនុស្សទាំងអស់ដែលបានក្លាយជាការបង្កបង្កើតថ្មីតាមរយៈសេចក្ដីជំនឿទៅលើព្រះនាមទ្រង់ ។
-
សូមសរសេរឃ្លាខាងក្រោមនេះ ពីខាងក្រោមកិច្ចការថ្ងៃនេះនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖
ខ្ញុំបានសិក្សា កាឡាទី ១–៦ ហើយបានបញ្ចប់មេរៀននេះនៅ ( កាលបរិច្ឆេទ ) ។
សំណួរ គំនិត និង ការយល់ដឹងបន្ថែមដែលខ្ញុំចង់ចែកចាយជាមួយគ្រូរបស់ខ្ញុំ ៖