មេរៀនទី ១៥ ៖ ថ្ងៃទី ៣
យ៉ូហាន ១៣
សេចក្តីផ្ដើម
បន្ទាប់ពីសោយអាហារនៃបុណ្យរំលងរួចហើយនោះ ព្រះអង្គសង្គ្រោះបានលាងជើងឲ្យសាវកទ្រង់ បានប្រាប់យូដាសថាជាអ្នកក្បត់ទ្រង់ ហើយបានប្រទាននូវ « ព្រះបញ្ញត្តិថ្មី » មួយដល់ពួកសាវករបស់ទ្រង់ (យ៉ូហាន ១៣:៣៤) ។ ក្នុងសប្តាហ៍ចុងក្រោយនៃការបម្រើនៃជីវិតរមែងស្លាប់របស់ទ្រង់ ព្រះយេស៊ូវគ្រីស្ទផ្តោតការបង្រៀនរបស់ទ្រង់លើការគោរពប្រតិបត្តិ ការបម្រើ និង សេចក្តីស្រឡាញ់—ជាលក្ខណៈដែលបង្ហាញពីជីវិតទ្រង់ និង គួរតែបង្ហាញពីជីវិតរបស់យើងក្នុងនាមជាសិស្សរបស់ទ្រង់ ។
យ៉ូហាន ១៣:១-១៧
ព្រះយេស៊ូវលាងជើងឲ្យសាវករបស់ទ្រង់
សូមពិចារណាទៅលើសំណួរខាងក្រោមនេះ ៖
-
តើអ្នកនឹងដាក់ខ្លួនរបស់អ្នកនៅកន្លែងណានៅលើ ក្រាហ្វិក?
-
តើអ្នកចង់សប្បាយជាងអ្វីដែលអ្នកមានសព្វថ្ងែនេះដែរឬទេ ?
-
តើអ្នកអាចគិតពីនរណាម្នាក់ ដែលអ្នកចង់ជួយឲ្យកាន់តែមានភាពរីករាយខ្លាំងជាងនេះឬទេ ?
នៅពេលអ្នកសិក្សា យ៉ូហាន ១៣សូមរកមើលគោលការណ៍មួយដែលបង្រៀនអ្វីដែលយើងអាចធ្វើ ដើម្បីកាន់តែរីករាយ ។
បន្ទាប់ពីការយាងចូលក្នុងក្រុងយេរូសាឡិមដោយជោគជ័យ ទ្រង់បានប្រារព្ធពិធីជប់លៀងបុណ្យរំលងជាមួយសាវករបស់ទ្រង់ ។ យ៉ូហាន ១៣:១–៣ បានប្រាប់ថា នៅពេលព្រះយេស៊ូវចែកអាហារនេះ ( អាហារយប់ថ្ងៃចុងក្រោយ ) ជាមួយសាវករបស់ទ្រង់ នោះទ្រង់បានដឹងថាទ្រង់នឹងសុគតក្នុងពេលឆាប់ៗនេះ ហើយព្រះវិញ្ញាណរបស់ទ្រង់នឹងត្រឡប់ទៅកាន់ព្រះវរបិតាសួគ៌របស់ទ្រង់វិញ ។
សូមអាន យ៉ូហាន ១៣:៤–៥ដោយរកមើលអ្វីដែលព្រះយេស៊ូវបានធ្វើបន្ទាប់ពីទ្រង់ និង សាវករបស់ទ្រង់បានបរិភោគអាហារបុណ្យរំលងហើយនោះ ។ ឃ្លា « ដោះព្រះពស្ត្រពេញ » នៅក្នុង យ៉ូហាន ១៣:៤ មានន័យថាព្រះយេស៊ូវបានដោះព្រះពស្ត្រក្រៅរបស់ទ្រង់ចេញ ។ វាដូចគ្នាទៅនឹងមនុស្សម្នាក់នៅជំនាន់របស់យើងដែលដោះអាវធំចេញផងដែរ ។
« នៅក្នុងសម័យព្រះគម្ពីរសញ្ញាថ្មី មនុស្សបានពាក់ស្បែកជើងសង្រែក ដោយភាគច្រើនដើរលើផ្លូវលំ ដែលមានអាចម៍សត្វគជាគំនរ ហើយកម្រនឹងមានទឹកលាងជើងណាស់ ។ ជើងរបស់ពួកគេកខ្វក់ខ្លាំងណាស់ ហើយការលាងជើងឲ្យមនុស្សម្នាក់ផ្សេងទៀតអាចជាកិច្ចការដែលមិនគួរពេញចិត្តនឹងធ្វើឡើយ ។ … ជាទូទៅទម្លាប់នៃការទទួលស្វាគមន៍បែបនេះធ្វើឡើងដោយអ្នកបម្រើដែលមានឋានៈទាបបំផុត » (New Testament Student Manual [ Church Educational System manual ឆ្នាំ ២០១៤ ] ទំព័រ ២៤២) ។
-
សូមឆ្លើយសំណួរខាងក្រោមនេះ ដាក់នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖
-
ប្រសិនបើអ្នកបាននៅទីនោះ នៅពេលព្រះយេស៊ូវបានលាងជើងឲ្យសាវករបស់ទ្រង់ តើអ្នកអាចមានប្រតិកម្មបែបណា ប្រសិនបើព្រះយេស៊ូវបានចាប់ផ្តើមលាងជើងឲ្យអ្នកនោះ?
-
តើទង្វើនៃការលាងជើងពួកសាវកបង្ហាញពីបុគ្គលិកលក្ខណៈអ្វីខ្លះរបស់ព្រះយេស៊ូវ ?
-
សូមអាន ការបកប្រែដោយយ៉ូសែប ស៊្មីធ យ៉ូហាន ១៣:៨ ( នៅក្នុង Bible appendix ) ដោយរកមើលអ្វីដែលពេត្រុសបាននិយាយនៅពេលព្រះអង្គសង្គ្រោះបានចាប់ផ្តើមលាងជើងរបស់លោក ។
បន្ទាប់មកសូមអាន ការបកប្រែដោយយ៉ូសែប ស៊្មីធ យ៉ូហាន ១៣:៩-១០ ( នៅក្នុង Bible appendix ) ដោយរកមើលចម្លើយរបស់ពេត្រុសចំពោះអ្វីដែលព្រះអម្ចាស់បានប្រាប់ទ្រង់ ។
នៅក្នុង យ៉ូហាន ១៣:៩តើយើងរៀនអ្វីខ្លះអំពីពេត្រុសចេញពីចម្លើយរបស់លោកចំពោះអ្វីដែលព្រះអម្ចាស់បានប្រាប់លោក ?
តាមរយៈការលាងជើងឲ្យពួកសាវករបស់ទ្រង់ នោះព្រះអង្គសង្គ្រោះមិនគ្រាន់តែបង្ហាញពីទង្វើដ៏អស្ចារ្យនៃការបម្រើនោះឡើយ ប៉ុន្តែទ្រង់បានបំពេញផ្នែកមួយនៃក្រឹត្យវិន័យលោកម៉ូសេ ហើយបានតាំងពិធីបរិសុទ្ធដ៏ពិសិដ្ឋដើម្បីជួយអ្នកដើរតាមដ៏ស្មោះត្រង់របស់ទ្រង់ឲ្យប្រែជាស្អាតចេញពីអំពើបាប ។ ពិធីបរិសុទ្ធនេះត្រូវបានស្តារឡើងវិញនៅក្នុងសម័យកាន់កាប់ត្រួតត្រារបស់យើងតាមរយៈព្យាការី យ៉ូសែប ស៊្មីធ ( សូមមើល គ. និង ស. ៨៨:៧៤–៧៥, ១៣៧–៤១) ។
សូមអាន យ៉ូហាន ១៣:១១ដោយរកមើលមូលហេតុដែលព្រះយេស៊ូវបានមានបន្ទូលទៅសាវករបស់ទ្រង់ថា « អ្នករាល់គ្នាមិនមែនស្អាតគ្រប់គ្នាទេ » ។
ទ្រង់កំពុងមានព្រះបន្ទូលសំដៅលើយូដាស-អ៊ីស្ការីយ៉ុត ដែលនឹងក្បត់ទ្រង់ ។
សូមអាន យ៉ូហាន ១៣:១២-១៧ដោយរកមើលអ្វីដែលព្រះអង្គសង្គ្រោះបានបង្រៀនសាវករបស់ទ្រង់បន្ទាប់ពីទ្រង់បានលាងជើងរបស់ពួកគេហើយ ។ សូមគិតពីការគូសចំណាំឃ្លាដែលពិពណ៌នាថា គំរូ ដែលព្រះអង្គសង្គ្រោះបង្ហាញ ហើយបានអញ្ជើញសាវករបស់ទ្រង់ឲ្យធ្វើតាម ។
ផ្អែកទៅលើការសន្យារបស់ព្រះអង្គសង្គ្រោះចំពោះពួកសាវករបស់ទ្រង់ដែលបានកត់ត្រានៅក្នុង យ៉ូហាន ១៣:១៧តើពរជ័យអ្វីខ្លះដែលយើងនឹងទទួលបាន នៅពេលយើងធ្វើតាមគំរូរបស់ទ្រង់តាមរយៈការបម្រើដល់មនុស្សដទៃនោះ ? សូមឆ្លើយសំណួរនេះដោយបំពេញសេចក្តីថ្លែងការណ៍នៃគោលការណ៍ដូចតទៅនេះ ៖ នៅពេលយើងធ្វើតាមគំរូរបស់ព្រះអង្គសង្គ្រោះដោយការបម្រើដល់អ្នកដទៃ នោះយើងនឹង ____________________។
-
សូមបំពេញកិច្ចការដូចខាងក្រោមនេះ នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖
-
សូមឆ្លើយសំណួរខាងក្រោមនេះ ៖ តើអ្នកគិតថា ហេតុអ្វីយើងនឹងកាន់តែសប្បាយរីករាយ ប្រសិនបើយើងបម្រើមនុស្សដទៃដូចជាព្រះអង្គសង្គ្រោះបានធ្វើនោះ ?
-
សូមសរសេរពីគ្រាមួយ នៅពេលអ្នករីករាយដោយសារអ្នកបានធ្វើតាមគំរូរបស់ព្រះអង្គសង្គ្រោះដោយការបម្រើអ្នកដទៃ ។
-
រូបភាពអែលឌើរ អិម រ័សុល បាឡឺដសូមអានសេចក្ដីថ្លែងការណ៍ខាងក្រោមដោយអែលឌើរ អិម រ័សុល បាឡឺដ នៃកូរ៉ុមនៃពួកសាវកដប់ពីរនាក់ ដោយរកមើលអ្វីដែលយើងអាចធ្វើដើម្បីស្វែងរកឱកាសបម្រើមនុស្សដទៃ ៖ « នៅក្នុងការអធិស្ឋានរៀងរាល់ព្រឹករបស់អ្នក សូមទូលសុំព្រះវរបិតាសួគ៌ឲ្យដឹកនាំអ្នក ដើម្បីឲ្យស្គាល់ឱកាស បម្រើកូនចៅដ៏មានតម្លៃណាម្នាក់របស់ទ្រង់ ។ រួចហើយ សូមឲ្យដួងចិត្តអ្នកពេញទៅដោយសេចក្តីជំនឿ និង សេចក្តីស្រឡាញ់ពេញក្នុងមួយថ្ងៃ ដោយស្វែងរកដើម្បីជួយដល់នរណាម្នាក់ ។ … ប្រសិនបើអ្នកធ្វើបែបនេះ ចំណាប់អារម្មណ៍ខាងវិញ្ញាណរបស់អ្នក នឹងត្រូវបានពង្រីកឡើង ហើយអ្នកនឹងរកឃើញឱកាសទាំងឡាយដើម្បីបម្រើ ដែលអ្នកពុំធ្លាប់គិតពីមុនមក » (« Be Anxiously Engaged » Ensign ឬ Liahona ខែ វិច្ឆិកា ឆ្នាំ ២០១២ ទំព័រ ៣១ ) ។
សូមគិតពីការសរសេរសេចក្តីថ្លែងការណ៍របស់អែលឌើរ បាឡឺដនៅលើក្រដាសមួយសន្លឹកផ្សេងទៀត ហើយដាក់វានៅទីណាដែលវាអាចរំឭកអ្នកឲ្យអធិស្ឋានរកមើលឱកាសនានាដើម្បីបម្រើមនុស្សដទៃ ។ អ្នកអាចកត់ត្រានៅក្នុងសៀវភៅកំណត់ហេតុសិក្សាព្រះគម្ពីររបស់អ្នក ហើយចែកចាយវាជាមួយមនុស្សដទៃ ពីរបៀបដែលការអធិស្ឋានរបស់អ្នក បានទទួលចម្លើយនៅពេលអ្នកអនុវត្តការទូន្មានរបស់អែលឌើរ បាឡឺដ ។
យ៉ូហាន ១៣:១៨-៣០
ព្រះយេស៊ូវស្គាល់អ្នកក្បត់ទ្រង់
យោងតាម យ៉ូហាន ១៣:១៨–៣០បន្ទាប់ពីព្រះយេស៊ូវបានបង្រៀនសាវករបស់ទ្រង់ថា ពួកគេនឹងរីករាយ ប្រសិនបើពួកគេបម្រើមនុស្សដទៃ នោះទ្រង់បានមានបន្ទូលថា មានម្នាក់ក្នុងចំណោមពួកគេនឹងក្បត់ទ្រង់ ។ នៅពេលយ៉ូហាន បានសួរព្រះអង្គសង្គ្រោះថា នរណានឹងក្បត់ទ្រង់ នោះព្រះយេស៊ូវបានប្រាប់គាត់ថាវាគឺជា « អ្នក… ដែលខ្ញុំនឹងជ្រលក់ចំណិតនំបុ័ងហុចទៅឲ្យ [ ចំណិតនំបុ័ងតូចមួយ ] » (យ៉ូហាន ១៣:២៦) ហើយទ្រង់បានហុចឲ្យទៅយូដាស-អ៊ីស្ការីយ៉ុត ។
យ៉ូហាន ១៣:៣១-៣៨
ព្រះយេស៊ូវបង្រៀនពួកសិស្សរបស់ទ្រង់ឲ្យស្រឡាញ់គ្នាទៅវិញទៅមក
តើធ្លាប់មាននរណាម្នាក់ចោទប្រកាន់អ្នកថាមិនមែនជាគ្រីស្ទាន ឬ ជាអ្នកដើរតាមដ៏ពិតរបស់ព្រះយេស៊ូវគ្រីស្ទ ដោយសារតែអ្នកជាសមាជិកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយដែរឬទេ ? នេះអាចដោយសារតែជំនឿជាក់លាក់ដែលយើងមាន លើការស្តារឡើងវិញ ដូចជាជំនឿរបស់យើងលើព្រះគម្ពីរមរមន ហើយថាសមាជិកនៃក្រុមព្រះគឺជាតួអង្គបីផ្សេងគ្នា និង ដាច់ដោយឡែកពីគ្នា ។ តើអ្នកឆ្លើយតបដោយរបៀបណា ? ( ឬ ប្រសិនបើអ្នកពុំមានបទពិសោធន៍បែបនោះទេ តើអ្នកនឹងឆ្លើយតបចំពោះមនុស្សម្នាក់ដែលបានប្រាប់អ្នកថាអ្នកពុំមែនជាគ្រីស្ទានដោយរបៀបណា ? )
សូមអាន យ៉ូហាន ១៣:៣៤–៣៥ដោយរកមើលអ្វីដែលព្រះយេស៊ូវបានមានបន្ទូល ដែលនឹងជួយមនុស្សដទៃឲ្យទទួលស្គាល់ថាពួកសាវកគឺជាសិស្សរបស់ព្រះយេស៊ូវគ្រីស្ទ ។ សូមគិតពីការគូសចំណាំនៅក្នុង យ៉ូហាន ១៣:៣៤ ពីបញ្ញត្តិដែលព្រះយេស៊ូវបានប្រទានដល់សាវករបស់ទ្រង់ ។
សូមកត់ចំណាំថា យ៉ូហាន ១៣:៣៥ បានចែងថា មនុស្សដទៃអាចដឹងថាសាវកទាំងនេះគឺជាពួកសិស្សរបស់ព្រះយេស៊ូវគ្រីស្ទ ប្រសិនបើពួកសាវកទាំងនោះស្រឡាញ់គ្នាទៅវិញទៅមកដូចព្រះយេស៊ូវស្រឡាញ់ពួកគេដែរ ។ ចេញពីខគម្ពីរទាំងនេះយើងរៀនថា នៅពេលយើងស្រឡាញ់គ្នាទៅវិញទៅមក ដូចព្រះយេស៊ូវគ្រីស្ទស្រឡាញ់យើង នោះមនុស្សដទៃទៀតនឹងស្គាល់ថាយើងគឺសិស្សរបស់ទ្រង់ ។
-
យោងតាមអ្វី ដែលអ្នកបានសិក្សាឆ្នាំនេះអំពីព្រះយេស៊ូវគ្រីស្ទ សូមសរសេរនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នកនូវរបៀបប្រាំយ៉ាងដែលទ្រង់បង្ហាញថាទ្រង់ស្រឡាញ់មនុស្ស ។
សូមអានដំណើរខាងក្រោមនេះ ដែលបានថ្លែងដោយអែលឌើរ ប៉ុល អ៊ី ខូអែលឡែកឃើរ នៃពួកចិតសិបនាក់ ដោយរកមើលរបៀបដែលអ្នកផ្សព្វផ្សាយសាសនាបានពិពណ៌នានៅក្នុងដំណើររឿងនេះបានធ្វើតាមការទូន្មានរបស់ព្រះអម្ចាស់ដើម្បីស្រឡាញ់គ្នាទៅវិញទៅមក ៖
រូបភាពអែលឌើរ ប៉ុល អ៊ី ខូអែលឡែកឃើរ« អ្នកផ្សព្វផ្សាយវ័យក្មេងពីរនាក់ បានគោះទ្វារមួយ ដោយសង្ឃឹមថា រកឃើញនរណាម្នាក់ ដែលនឹងទទួលយកសាររបស់ពួកគេ ។ ទ្វារបានបើកឡើង ហើយបុរសមាឌធំម្នាក់បានទទួលពួកគេ ដោយ សំឡេងដែលមិនសូវរួសរាយប៉ុន្មានថា ៖ ‹ ខ្ញុំគិតថា ខ្ញុំបានប្រាប់អ្នករួចហើយ ថាកុំឲ្យគោះទ្វារខ្ញុំទៀត ។ ខ្ញុំបានព្រមានអ្នកពីមុនហើយ ថាបើអ្នកមកម្ដងទៀត វានឹងមិនមែនជា បទពិសោធន៍ដ៏រីករាយនោះទេ ។ ឥឡូវថយចេញទៅ › ។ គាត់បានបិទទ្វារយ៉ាងលឿន ។
« ពេលដែលពួកអែលឌើរបានដើរចេញ អ្នកផ្សព្វផ្សាយដែលបម្រើយូរជាង ហើយមានបទពិសោធន៍ជាង បានដាក់ដៃលើស្មា អ្នកផ្សព្វផ្សាយដែលថ្មីជាងដើម្បីលួងលោម និង លើកទឹកចិត្តគាត់ ។ ពួកអ្នកផ្សព្វផ្សាយមិនបានដឹងទេ ថាបុរសនោះបានមើលពួកគេតាមមាត់បង្អួច ដើម្បីប្រាកដថា ពួកគេយល់ពីអ្វីដែលគាត់បានប្រាប់ ។ គាត់ពិតជារំពឹងថា នឹងឃើញពួកគេចំអកដល់ការឆ្លើយតបដ៏គំរោះគំរើយរបស់គាត់ ពេលពួកគេព្យាយាមជួបគាត់នោះ ។ ទោះជាយ៉ាងណា ពេលគាត់បានឃើញអ្នកផ្សព្វផ្សាយទាំងពីររូបដែលបានបង្ហាញចិត្តសប្បុរសចំពោះគ្នា នោះដួងចិត្តរបស់គាត់ទន់ភ្លាម ។ គាត់បានបើកទ្វារ ហើយហៅពួកអ្នកផ្សព្វផ្សាយឲ្យត្រឡប់មកវិញ និង ចែកចាយសារដំណឹងរបស់ពួកគេជាមួយគាត់ ។
« … គោលការណ៍នៃក្ដីស្រឡាញ់ចំពោះគ្នាទៅវិញទៅមក និង ការពង្រីកសមត្ថភាពយើងដើម្បីផ្តោតទៅលើព្រះគ្រីស្ទ ក្នុងរបៀបដែលយើងគិត និយាយ និង ធ្វើគឺជាគ្រឹះ ដើម្បីក្លាយជាសិស្សរបស់ព្រះគ្រីស្ទ និង ជាគ្រូនៃដំណឹងល្អរបស់ទ្រង់ » (« He Truly Loves Us » Ensign ឬ Liahona ខែ ឧសភា ឆ្នាំ ២០១២ ទំព័រ ១៧ ) ។
-
សូមអានទំនុកបទ « ចូរអ្នកស្រឡាញ់គ្នា » (ទំនុកតម្កើង លេខ ១៩៥ ) ហើយគិតពីនរណាម្នាក់ដែលអ្នកស្គាល់ ដែលងាយនឹងទទួលស្គាល់ថាជាសិស្សរបស់ព្រះយេស៊ូវគ្រីស្ទ ដោយសារតែសេចក្តីស្រឡាញ់ដែលគាត់បង្ហាញដល់មនុស្សដទៃ ។ នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក សូមសរសេរអំពីរបៀបដែលបុគ្គលម្នាក់នេះ បង្ហាញសេចក្តីស្រឡាញ់ចំពោះមនុស្សដទៃ ក្នុងរបៀបមួយដែលអ្នកចង់ធ្វើតាមគំរូរបស់គាត់ ។ សូមសរសេរគោលដៅមួយផងដែរ ដែលទាក់ទងនឹងអ្វីដែលអ្នកនឹងធ្វើ ដើម្បីស្រឡាញ់មនុស្សដទៃដូចជាព្រះអង្គសង្គ្រោះស្រឡាញ់ពួកគេ ។
យោងតាម យ៉ូហាន ១៣:៣៦–៣៨បន្ទាប់ពីពេត្រុសបានប្រកាសថា គាត់នឹងថ្វាយជីវិតខ្លួនសម្រាប់ព្រះយេស៊ូវគ្រីស្ទ នោះព្រះយេស៊ូវបានប្រាប់ពេត្រុសថា គាត់នឹងបដិសេធទ្រង់បីដងពីមុនមាន់រងាវ ។
-
សូមសរសេរឃ្លាខាងក្រោមនេះ ពីខាងក្រោមកិច្ចការថ្ងៃនេះនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖
ខ្ញុំបានសិក្សា យ៉ូហាន ១៣ ហើយបានបញ្ចប់មេរៀននេះនៅ ( កាលបរិច្ឆេទ ) ។
សំណួរ គំនិត និង ការយល់ដឹងបន្ថែមដែលខ្ញុំចង់ចែកចាយជាមួយគ្រូរបស់ខ្ញុំ ៖