មេរៀនទី ៩ ៖ ថ្ងៃទី ២
លូកា ១
សេចក្តីផ្តើម
ទេវតាកាព្រីយ៉ែលបានបង្ហាញព្រះកាយដល់សាការី ហើយបានប្រាប់ថា សាការី និងភរិយាគាត់អេលីសាបិត នឹងមានកូនប្រុសម្នាក់ ដែលពួកគេគួរដាក់ឈ្មោះថា យ៉ូហាន ។ ប្រាំមួយខែក្រោយមក ទេវតាដដែលនោះ បានបង្ហាញព្រះកាយដល់ម៉ារា ហើយបានប្រាប់ថា នាងនឹងធ្វើជាមាតារបស់ព្រះរាជបុត្រានៃព្រះ ។ ម៉ារាបានទៅលេងអេលីសាបិត ហើយពួកគេបានរីករាយនឹងការយាងមករបស់ព្រះអង្គសង្គ្រោះ ។ បីខែក្រោយមក អេលីសាបិត បានបង្កើតយ៉ូហាន ដែលគេបានស្គាល់ថាជាយ៉ូហាន-បាទីស្ទ ។
លូកា ១:១-៤
លូកាពន្យល់ពីមូលហេតុសម្រាប់ការសរសេរដំណឹងល្អរបស់លោក
តើអ្នកអាចឃើញពីព្រឹត្តិការណ៍ដែលបង្ហាញនៅក្នុង រូបភាពខាងក្រោមដែរឬទេ ? នៅក្រោមរូបភាពនិមួយៗ សូមសរសេរការពិពណ៌នាអំពីព្រឹត្តិការណ៍នោះ ។
ព្រះគ្រីស្ទនៅក្នុងព្រះវិហារបរិសុទ្ធ ដោយ ហិនរីឆ ហូហ្វមិន ទទួលសិទ្ធិអនុញ្ញាតពីក្រុមហ៊ុន C. Harrison Conroy Co., Inc ។
រូបភាពទាំងនេះបង្ហាញពីព្រឹត្តការណ៍មួយចំនួន និងការបង្រៀនមកពីការបម្រើក្នុងជីវិតរមែងស្លាប់របស់ព្រះអង្គសង្គ្រោះ ដែលត្រូវបានកត់ត្រាដោយលូកា ប៉ុន្តែពុំមាននៅក្នុងដំណឹងល្អរបស់ម៉ាថាយ ម៉ាកុស និងយ៉ូហានទេ ។
លូកាបានចាប់ផ្ដើមដំណឹងល្អរបស់លោក ដោយថ្លែងអំពីមនុស្សម្នាក់ឈ្មោះ « ថេវភីល » ( សូមមើល លូកា ១:៣) ហើយបានពន្យល់អំពីមូលហេតុរបស់គាត់ចំពោះការសរសេរនោះ ។ ថេវភីល មានន័យថា « មិត្តរបស់ព្រះ » ( Bible Dictionary « Theophilus ») ។
សូមអាន ម៉ាកុស ១:១-៤ដោយរកមើលមូលហេតុរបស់លូកាសម្រាប់ការសរសេរដំណឹងល្អនេះ ។
ផ្អែកទៅលើ លូកា ១:៤តើការសិក្សាដំណឹងល្អរបស់លូកាអាចមានប្រយោជន៍អ្វីខ្លះចំពោះអ្នក ?
នៅពេលអ្នកសិក្សាដំណឹងល្អរបស់លូកា នោះអ្នកអាចបាន « ជ្រាបពីសេចក្តីពិត » (លូកា ១:៤) អំពីសេចក្ដីពិតទាំងឡាយដែលអ្នកត្រូវបានបង្រៀនអំពីព្រះយេស៊ូវគ្រីស្ទ ។
លូកា ១:៥-២៥
ទេវតាកាព្រីយ៉ែលប្រកាសអំពីការចាប់កំណើតរបស់យ៉ូហានដល់សាការី ហើយអេលីសាបិតមានផ្ទៃពោះ
តើអ្នកគិតថា អ្នកអាចទប់ដង្ហើមរបស់អ្នកបានយូរប៉ុណ្ណា ? សូមដាក់ម៉ោងកំណត់រយៈពេល ១០ទៅ ៣០វិនាទី ហើយចាប់ផ្តើមវានៅពេលអ្នកចាប់ផ្តើមទប់ដង្ហើមរបស់អ្នក ឬ អ្នកអាចមើលទៅទ្រនិចវិនាទីនៃនាឡិកា ។ ប្រសិនបើអាច សូមទប់ដង្ហើមរបស់អ្នករហូតដល់សំឡេងម៉ោងរោទិ៍ ឬ រហូតចប់ម៉ោងនោះ ។
តើអ្នកកំពុងគិតអំពីអ្វីខ្លះ អំឡុងពេលពីរបីវិនាទីចុងក្រោយ ពីមុនដល់ម៉ោងរោទិ៍ ហើយដល់ម៉ោងចប់នោះ ? តើការទប់ដង្ហើមរបស់អ្នកអាចស្រដៀងនឹងអារម្មណ៍នៃការរំពឹងទុក អំឡុងពេលរង់ចាំការបំពេញនៃព្រះបន្ទូលនៃព្រះយ៉ាងដូចម្តេច ?
សូមពិចារណាអំពីពរជ័យ ឬចម្លើយមួយមកពីព្រះ ដែលពួកគេកំពុងរង់ចាំ ឬសង្ឃឹមចង់បាននោះ ។ នៅពេលអ្នកសិក្សា លូកា ១សូមរកមើលសេចក្តីពិតដែលអាចជួយអ្នក នៅពេលអ្នកកំពុងរង់ចាំព្រះបន្ទូលរបស់ព្រះ ត្រូវបានបំពេញនៅក្នុងជីវិតរបស់អ្នក ។
សូមអាន លូកា ១:៥-៧ដោយរកមើលពរជ័យដែលសាការី និង អេលីសាបិតបានកំពុងរង់ចាំអំឡុងពេលយ៉ាងយូរនៅក្នុងជីវិតរបស់ពួកគាត់ ។
តើយើងបានរៀនអ្វីខ្លះអំពីសាការី និងអេលីសាបិត ចេញមកពីខគម្ពីរទាំងនេះ ?
ទាំងសាការី និងអេលីសាបិតគឺជាកូនចៅរបស់អើរ៉ុន មកពីតំណពូជពង្សដែលជាសង្ឃ និងសង្ឃជាន់ខ្ពស់នៃអ៊ីស្រាអែលទាំងអស់ដែលបានជ្រើសរើស ។ ការណ៍នេះមានន័យថាយ៉ូហាន គឺជាអ្នកគ្រងមរតកបព្វជិតភាពអើរ៉ុនពីកំណើត ហើយនឹងភាពជាអ្នកដឹកនាំក្នុងបព្វជិតភាពនោះ ។ ព្យាការី យ៉ូសែប ស្ម៊ីធ បានមានប្រសាសន៍ថា « សាការីគឺជាសង្ឃម្នាក់របស់ព្រះ ហើយធ្វើជាអធិបតីនៅក្នុងព្រះវិហារបរិសុទ្ធ ហើយយ៉ូហានគឺជាសង្ឃបន្ទាប់ពីឪពុករបស់លោក ហើយកាន់កូនសោនៃបព្វជិតភាពអើរ៉ុន » ( នៅក្នុង History of the Church ៥:២៥៧ ) ។
លូកា ១:៨-១០ កត់ត្រាថាសាការី ត្រូវបានតែងតាំងឲ្យដុតគ្រឿងក្រអូបនៅក្នុងព្រះវិហារបរិសុទ្ធយេរូសាឡិម ។ ការណ៍នេះជាកិត្តិយសមួយដែលមានចំពោះសង្ឃម្នាក់ ដែលមានតែម្ដងក្នុងមួយជីវិតរបស់លោកប៉ុណ្ណោះ ។
សូមអាន លូកា ១:១១-១៣ដោយរកមើលអ្វីដែលបានកើតឡើងអំឡុងពេលដែលសាការីស្ថិតនៅក្នុងព្រះវិហារបរិសុទ្ធ ។
សូមកត់ចំណាំនៅក្នុង ខទី ១៣ ថា ទេវតាមានបន្ទូលថា « ពាក្យដែលលោកទូលអង្វរ នោះបានទទួលហើយ » ។ សាការី និងអេលីសាបិត ទំនងជាបានអធិស្ឋានអស់ជាច្រើនឆ្នាំមកហើយដើម្បីសុំមានកូនម្នាក់នោះ ។ អ្នកអាចនឹងចង់គូសចំណាំឃ្លានេះ នៅក្នុងព្រះគម្ពីររបស់អ្នក ។
តើសាការីមានអារម្មណ៍យ៉ាងណា ពេលគាត់បានស្ដាប់ឮថាគាត់ និងអេលីសាបិតនឹងមានកូនប្រុសម្នាក់ ទោះជាពួកគេ « ចាស់ណាស់ » ក៏ដោយនោះ ? (លូកា ១:៧) ?
លូកា ១:១៤-១៧ កត់ត្រាថា ទេវតាកាព្រីយ៉ែល បានប្រាប់ដល់សាការីថា លោក និងអេលីសាបិត នឹង « មានសេចក្តីរីករាយ និងសេចក្តីអំណរ » (ខ ១៤) ហើយថាកូនប្រុសរបស់ពួកគេនឹងរៀបចំមនុស្សជាច្រើនសម្រាប់ព្រះអម្ចាស់ ។
សូមអាន លូកា ១:១៨–២០ដោយរកមើលថាសាការីបានឆ្លើយតបដូចម្តេចចំពោះសាររបស់ការព្រីយ៉ែល ។ ព្យាការី យ៉ូសែប ស្ម៊ីធ បានបង្រៀនថា កាព្រីយ៉ែលគឺជាណូអេ ហើយ « ហើយឈរក្នុងសិទ្ធិអំណាចជាប់នឹងអ័ដាមនៅក្នុងបព្វជិតភាព » (Teachings of Presidents of the Church ៖ យ៉ូសែប ស៊្មីធ [ ឆ្នាំ ២០០៧ ] ទំព័រ ១០៤) ។
សូមកត់ចំណាំពីអ្វីដែលបានកើតឡើងដល់សាការី ដោយសារតែគាត់សង្ស័យចំពោះពាក្យរបស់ទេវតា ។ ចូរគិតពី ការគូសចំណាំនៅក្នុង ខ ២០ ពីអ្វី ដែលទេវតាបានមានបន្ទូល—សារ—ដែលទ្រង់បានថ្លែងទៅសាការី ។
សេចក្តីពិតមួយដែលយើងរៀនពីទេវតាកាព្រីយ៉ែលនោះគឺថា ព្រះបន្ទូលរបស់ព្រះអម្ចាស់ថ្លែងតាមរយៈពួកអ្នកបម្រើរបស់ទ្រង់ នឹងត្រូវបានបំពេញនៅពេលកំណត់ ។ « នៅពេលកំណត់ » មានន័យថា ស្របតាមកាលកំណត់របស់ព្រះអម្ចាស់ ។
-
សូមឆ្លើយសំណួរខាងក្រោមនេះ ដាក់នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖
-
តើការដឹងថាព្រះបន្ទូលរបស់ព្រះអម្ចាស់នឹងត្រូវបានបំពេញទៅតាមកាលកំណត់របស់ទ្រង់ អាចជះឥទ្ធិពលទៅលើរបៀបដែលយើងឆ្លើយតបចំពោះការសន្យារបស់ព្រះអម្ចាស់យ៉ាងដូចម្ដេច ?
-
តើសេចក្ដីពិតនេះអាចជួយនរណាម្នាក់ដែលទន្ទឹងចាំការសន្យារបស់ព្រះឲ្យបានបំពេញយ៉ាងដូចម្ដេច ?
-
នៅក្នុង លូកា ១:២១-២៤ យើងរៀនថានៅពេលសាការីបានចាកចេញពីព្រះវិហារបរិសុទ្ធមក គាត់ពុំអាចនិយាយបានទេ ។ ក្រោយមកអេលីសាបិតបានមានផ្ទៃពោះដូចដែលទេវតាបានសន្យា ។
សូមអានសម្តីរបស់អេលីសាបិតនៅក្នុង លូកា ១:២៥ ហើយពិចារណាអំពីរបៀបដែលអេលីសាបិតអាចមានអារម្មណ៍ជាយ៉ាងណា នៅពេលគាត់ហៀបនឹងមានកូននោះ ។ សេចក្ដីថ្លែងការណ៍របស់គាត់ថា ព្រះអម្ចាស់បាន « ដោះសេចក្តីអាម៉ាស់ខ្មាស [ របស់គាត់ ] នៅកណ្តាលមនុស្សចេញ » អាចនឹងសំដៅទៅលើការខ្មាស់អៀនដែលនាងមាន ដោយសារតែជាស្ត្រីដែលគ្មានកូន ។ នៅសម័យនោះ និង នៅក្នុងវប្បធម៌នោះ ការបង្កើតកូនត្រូវបានឲ្យតម្លៃយ៉ាងខ្លាំង ហើយការពុំអាចមានកូននោះនាំឲ្យមានការពុំផ្តល់កិត្តិយស និង មានអារម្មណ៍ថាអន់ជាងគេ ។
លូកា ១:២៦-៣៨
ទេវតាកាព្រីយ៉ែលប្រកាសអំពីការចាប់កំណើតរបស់ព្រះយេស៊ូវគ្រីស្ទនឹងនាងម៉ារា
នៅក្នុង លូកា ១:២៦-២៧ យើងរៀនថា នៅក្នុងរយៈពេលប្រាំមួយខែនៃការមានផ្ទៃពោះរបស់អេលីសាបិត នោះទេវតាកាព្រីយ៉ែលត្រូវបានបញ្ជូនឲ្យទៅជួបម៉ារា ជាស្ត្រីព្រហ្មចារីយម្នាក់នៅភូមិណាសារ៉ែត ។
សូមអាន លូកា ១:២៨–៣៣ដោយរកមើលឃ្លាដែលអាចនឹងជួយម៉ារាឲ្យយល់អំពីសារៈសំខាន់នៃកិច្ចការដែលព្រះបានប្រទានដល់នាង ។ សូមគិតអំពីការគូសចំណាំអ្វីដែលអ្នករកឃើញ ។ ព្រះយេស៊ូវ គឺជា « ពាក្យនៃភាសាក្រិកមកពីពាក្យ យ៉ូស្វេ ឬ ជេស្វេ ‹ ព្រះគឺជាជំនួយ › ឬ ‹ អង្គសង្គ្រោះ › » ( Bible Dictionary « Jesus ») ។
សូមកត់ចំណាំពាក្យថា « ព្រះរាជបុត្រានៃព្រះដ៏ខ្ពស់បំផុត » (លូកា ១:៣២) សំដៅលើគោលលទ្ធិដែលថា ព្រះយេស៊ូវគ្រីស្ទគឺជាព្រះរាជបុត្រានៃព្រះជាព្រះវរបិតា ។
សូមអាន លូកា ១:៣៤ដោយរកមើលសំណួររបស់ម៉ារា ។ សេចក្ដីថ្លែងរបស់គាត់ដែលថា « ខ្ញុំមិនស្គាល់ប្រុសណាផង » មានន័យថា នាងគឺជាស្ត្រីព្រហ្មចារីយ ។
សូមអាន លូកា ១:៣៥-៣៧ដោយរកមើលចម្លើយរបស់ទេវតាចំពោះសំណួររបស់ម៉ារា ។
យើងពុំដឹងលើសពីដំណើររឿងនៅក្នុងបទគម្ពីរថាតើអព្ភូតហេតុអំពីការចាប់ទុំផ្ទៃរបស់ព្រះយេស៊ូវគ្រីស្ទកើតឡើងយ៉ាងណាទេ យើងគ្រាន់តែអាចប្រាប់ដោយសាមញ្ញថា វាគឺជាអព្ភូតហេតុ ហើយថាទារកដែលរៀបនឹងចាប់កំណើតនោះនឹងជាព្រះរាជបុត្រានៃព្រះ ។
សូមកត់សម្គាល់នៅក្នុង លូកា ១:៣៧ ពីសេចក្ដីពិតដែលទេវតាបានថ្លែង ដែលជួយពន្យល់អំពីព្រឹត្តិការណ៍ដ៏អព្ភូតហេតុនេះ ។ អ្នកអាចចង់គូសចំណាំវានៅក្នុងព្រះគម្ពីររបស់អ្នក ។
សូមពិចារណាពីស្ថានភាពមួយចំនួន ដែលវាអាចមានអារម្មណ៍ថាលំបាក ឬ មិនអាចធ្វើទៅរួច ដើម្បីគោរពព្រះបញ្ញត្តិដោយប្រាកដប្រជា ។ សូមសរសេរឧទាហរណ៍បី ឬ បួននៅត្រង់ចន្លោះដែលបានផ្ដល់ឲ្យ ៖
-
សូមពិចារណាពីសេចក្តីពិតថា ការអ្វីដែលព្រះទ្រង់ធ្វើពុំបាន នោះគ្មានសោះឡើយ ។ សូមឆ្លើយសំណួរខាងក្រោមនេះ នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖ តើអ្នកគិតថា ម៉ារា ឬអេលីសាបិត អាចនឹងនិយាយយ៉ាងណា ដើម្បីលើកទឹកចិត្តយើង ប្រសិនបើយើងមានអារម្មណ៍ថា អ្វីដែលព្រះអម្ចាស់បានសុំឲ្យពួកយើងធ្វើកិច្ចការលំបាកៗ ឬ ដែលពុំអាចធ្វើបាន ? ក្រោយមកសូមសរសេរពីបទពិសោធន៍មួយ ដែលបានពង្រឹងដល់ជំនឿរបស់អ្នកថា ការអ្វីដែលព្រះទ្រង់ធ្វើពុំបាន នោះគ្មានសោះឡើយ ។
សូមអាន លូកា ១:៣៨ដោយរកមើលរបៀបដែលម៉ារាបានឆ្លើយតបចំពោះទេវតា ។
តើភស្ដុតាងអ្វីខ្លះដែលអ្នកបានឃើញនៅក្នុងខគម្ពីរនេះ ដែលម៉ារា បានជឿថាជាព្រះបន្ទូលរបស់ទេវតា ?
សូមពិចារណាពីរបៀបដែលការទទួលយកពាក្យរបស់ម៉ារា មានភាពខុសគ្នាពីការឆ្លើយតបរបស់សាការីចំពោះការប្រកាសរបស់ទេវតានៅក្នុងព្រះវិហារបរិសុទ្ធ ។ សូមពិចារណាថាតើអ្នកអាចធ្វើតាមគំរូរបស់ម៉ារា និងអេលីសាបិត ដោយការជឿថានៅក្នុងជីវិតរបស់អ្នកផ្ទាល់ គ្មានអ្វីដែលព្រះអម្ចាស់សុំពីអ្នកហើយ នឹងពុំអាចធ្វើបានដោយមានជំនួយទ្រង់នោះឡើយ ។
លូកា ១:៣៩-៥៦
ម៉ារាជួបអេលីសាបិត ហើយពួកគេថ្លែងទីបន្ទាល់ពីព្រះអង្គសង្គ្រោះ
អេលីសាបិត និង ម៉ារាបានបំពេញភាពសំខាន់នៃការបំពេញតួនាទី ដែលបានជួយផ្លាស់ប្តូរពិភពលោក ។ សូមអាន លូកា ១:៤១–៤៥ដោយរកមើលទីបន្ទាល់របស់អេលីសាបិត នៅពេលគាត់ « បានពេញជាព្រះវិញ្ញាណបរិសុទ្ធ » (លូកា ១:៤១) ។
ដោយសារសាក្សីដែលអេលីសាបិតបានទទួលពីព្រះវិញ្ញាណបរិសុទ្ធ តើគាត់បានយល់អ្វីខ្លះហើយអំពីម៉ារា ?
សូមអាន លូកា ១:៤៦–៤៩ដោយរកមើលរបៀបដែលម៉ារាបានសរសើរតម្កើងព្រះអម្ចាស់ ។
សូមកត់សម្គាល់ថានៅក្នុង ខទី ៤៩ ដែលថាព្រះអម្ចាស់ធ្វើនូវ « រឿងអស្ចារ្យ » សម្រាប់នាង ។ សូមអាន លូកា ១:៣៤, ៣៨, ៤៥-៤៦សារឡើងវិញ ដោយរកមើលអ្វីដែលម៉ារាបានធ្វើ ដែលអនុញ្ញាតឲ្យព្រះអម្ចាស់ធ្វើ « រឿងអស្ចារ្យ » សម្រាប់នាង ។
ដូចជាសាការី អេលីសាបិត និងម៉ារា ដែលម្នាក់ៗមានតួនាទីផ្ទាល់ខ្លួនរបស់ពួកគេនៅក្នុងផែនការរបស់ព្រះ នោះយើងក៏មានតួនាទីសំខាន់ដែលបានចាត់តាំងដោយព្រះអម្ចាស់ផងដែរ ។ យើងរៀនពីដំណើររឿងនេះថា ប្រសិនបើយើងព្យាយាមបំពេញតួនាទីដែលព្រះអម្ចាស់មានសម្រាប់យើងដោយស្មោះត្រង់ នោះទ្រង់អាចធ្វើរឿងអស្ចារ្យជាច្រើននៅក្នុងជីវិតរបស់យើង ។
-
សូមពិចារណាពីតួនាទីដែលព្រះអម្ចាស់ចង់ឲ្យអ្នកបំពេញនៅក្នុងផែនការរបស់ទ្រង់ ហើយឆ្លើយសំណួរខាងក្រោមនេះ នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖ តើរឿងអ្វីខ្លះអាចកើតឡើងនៅក្នុងជីវិតរបស់អ្នក ប្រសិនបើអ្នកឆ្លើយតបចំពោះព្រះអម្ចាស់ដូចជាម៉ារាបានធ្វើនោះ ?
ប្រធាន អ៊ែសរ៉ា ថាហ្វ ប៊ែនសឹន បានថ្លែងទីបន្ទាល់អំពីពរជ័យនៃការបែរជីវិតរបស់យើងទៅរកព្រះ ហើយព្យាយាមដោយស្មោះត្រង់ដើម្បី ធ្វើតាមព្រះឆន្ទៈទ្រង់ ៖ « បុរស និងស្ត្រីដែលបង្វែរជីវិតខ្លួនមករកព្រះនឹងរកឃើញថា ទ្រង់អាចធ្វើឲ្យជីវិតរបស់ពួកគេបានប្រសើរជាង ។ ទ្រង់នឹងធ្វើឲ្យសេចក្ដីអំណរចាក់ចូលយ៉ាងជ្រៅក្នុងចិត្តពួកគេ ពង្រីកទស្សនវិស័យរបស់ពួកគេ ពន្លឿនគំនិតពួកគេ ពង្រឹងកម្លាំងពួកគេ លើកវិញ្ញាណពួកគេឡើង ចម្រើនពរជ័យពួកគេ បង្កើនឱកាសពួកគេ លួងលោមព្រលឹងពួកគេ បង្កើតមិត្តភាព ហើយចាក់ស្រោចនូវសេចក្ដីសុខសាន្ត ។ នរណាក៏ដោយដែលបានលះបង់ជីវិតនៅក្នុងការបម្រើរបស់ព្រះនឹងរកឃើញជីវិតដ៏នៅអស់កល្បជានិច្ច » ( « Jesus Christ—Gifts and Expectations » Ensign ខែ ធ្នូ ឆ្នាំ១៩៨៨ ទំព័រ ៤ ) ។
លូកា ១:៥៧-៨០
យ៉ូហាន បាទីស្ទបានចាប់កំណើត
លូកា ១:៥៧-៨០ ពន្យល់ថា បន្ទាប់ពីអេលីសាបិតបានប្រសូត្របុត្រ នោះសាការីបានបញ្ជាក់នៅក្នុងការសរសេរថា កូននោះគួរដាក់ឈ្មោះថាយ៉ូហាន ។ ឈ្មោះ យ៉ូហាន មានន័យថា « ព្រះយេហូវ៉ាគឺមានសេចក្តីមេត្តាករុណា » ។ នៅពេលនោះលោកអាចនិយាយបានវិញម្តងទៀត ហើយគាត់បានព្យាករអំពីបេសកកម្មរបស់ព្រះយេស៊ូវគ្រីស្ទ និងយ៉ូហាន ។ នៅពេលយើងបំពេញតួនាទីដែលបានផ្ដល់ឲ្យយើងពីព្រះដោយស្មោះត្រង់ ដូចជា សាការី អេលីសាបិត និងម៉ារាបានធ្វើ នោះព្រះអម្ចាស់ក៏អាចធ្វើនូវរឿងអស្ចារ្យទាំងឡាយសម្រាប់យើង និងតាមរយៈយើងផងដែរ ។ សូមរិះគិតពីរបៀបដែលអ្នកអាចបំពេញតួនាទីផ្ទាល់ខ្លួនរបស់អ្នកនៅក្នុងផែនការរបស់ព្រះអម្ចាស់ ។
-
សូមសរសេរឃ្លាដែលនៅខាងក្រោមនេះ ពីខាងក្រោមកិច្ចការថ្ងៃនេះ នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖
ខ្ញុំបានសិក្សា លូកា ១ ហើយបានបញ្ចប់មេរៀននេះនៅ ( កាលបរិច្ឆេទ ) ។
សំណួរ គំនិត និង ការយល់ដឹងបន្ថែមដែលខ្ញុំចង់ចែកចាយជាមួយគ្រូរបស់ខ្ញុំ ៖