មេរៀនទី ៩ ៖ ថ្ងៃទី ៣
លូកា ២
សេចក្តីផ្តើម
យ៉ូសែប និង ម៉ារាបានធ្វើដំណើរទៅកាន់ភូមិបេថ្លេហិម ហើយព្រះយេស៊ូវបានប្រសូតនៅទីនោះ ។ ពួកអ្នកគង្វាលបានគោរពតាមការណែនាំរបស់ទេវតា ដើម្បីទៅរកមើលព្រះឱរសយេស៊ូវដែលទើបនឹងប្រសូត បន្ទាប់មកពួកគេបានប្រកាសអំពីការប្រសូតរបស់ព្រះយេស៊ូវទៅដល់អ្នកដទៃទៀត ។ ស៊ីម្មាន បានប្រទានពរដល់ព្រះយេស៊ូវនៅព្រះវិហារបរិសុទ្ធ ហើយនាងអាណ បានចែកចាយទីបន្ទាល់របស់នាងថា ព្រះប្រោសលោះបានប្រសូតមកហើយ ។ ព្រះយេស៊ូវក៏កាន់តែធំ « ប្រកបដោយប្រាជ្ញារឹតតែច្រើនឡើង ហើយជាទីគាប់ព្រះហឫទ័យដល់ព្រះ និងចិត្តមនុស្សផង » (លូកា ២:៥២) ។
លូកា ២:១-២០
ព្រះយេស៊ូវប្រសូតនៅភូមិបេថ្លេហិម
តើអ្នកមានទំនុកចិត្តខ្លាំងប៉ុណ្ណានៅក្នុងចំណេះដឹងរបស់អ្នក អំពីព្រឹត្តិការណ៍ទាក់ទងនឹងកំណើតរបស់ព្រះអង្គសង្គ្រោះ ? សូមល្បងខ្លួនអ្នក ដោយបំពេញសំណួរខាងក្រោមនេះ ៖ សូមសរសេរសេចក្តីថ្លែងការណ៍និមួយៗនេះថាតើវាត្រូវ ( ត ) ឬ ខុស ( ខ ) ។
-
____ ១. ម៉ារា និងយ៉ូសែប បានចេញទៅបេថ្លេហិមដើម្បីបង់ពន្ធ ។
-
____ ២. ម៉ារា និងយ៉ូសែប បានធ្វើដំណើរ ២៧ ម៉ែល ( ៤៤ គីឡូម៉ែត្រ ) ពីស្រុកណាសារ៉ែត ទៅភូមិបេថ្លេហិម ។
-
____ ៣. ព្រះឱរសយេស៊ូវត្រូវបានដាក់ឲ្យផ្ទំនៅក្នុងស្នូកមួយ ដោយសារតែផ្ទះសំណាក់គ្មានកន្លែងសម្រាក ។
-
____ ៤. ពួកអ្នកគង្វាលបានដើរតាមផ្កាយទៅកាន់ទីស្នូកដែលព្រះយេស៊ូវផ្ទំ ។
-
____ ៥. ក្រៅពីម៉ារា និងយ៉ូសែប មនុស្សដំបូងនៅក្នុងកំណត់ត្រាដែលបានឃើញព្រះយេស៊ូវគ្រីស្ទ គឺពួកអ្នកគង្វាល ។
-
____ ៦. ទេវតាបានប្រាប់ពួកអ្នកគង្វាលកុំឲ្យប្រាប់នរណាអំពីអ្វីដែលពួកគេបានឃើញឡើយ ។
នៅពេលអ្នកសិក្សា លូកា ២សូមរកមើល ចម្លើយនានា ចំពោះសំណួរទាំងនេះ ដើម្បីឃើញថាប្រសិនបើអ្នកបានឆ្លើយចម្លើយត្រឹមត្រូវ ។
សូមមើល លូកា ២:១–៥ដោយរកមើលមូលហេតុដែលយ៉ូសែប និងម៉ារា ធ្វើដំណើរទៅកាន់ភូមិបេថ្លេហិម ។
សូមកត់សម្គាល់ថា លូកា ២:១ លេខយោង ខ បញ្ជាក់ថា សេសារ ចង់ឲ្យប្រជាជនចុះបញ្ជី ឬរាប់ចំនួនប្រជាជន ។ ការណ៍នេះធ្វើឡើងក្នុងគោលបំណងដាក់ពន្ធ ។
សូមបើកទៅផែនទីព្រះគម្ពីរប៊ីបលេខ ១១ « ដែនដីបរិសុទ្ធនៅសម័យព្រះគម្ពីរសញ្ញាថ្មី » មាននៅក្នុងឧបសម្ព័ន្ធក្នុងព្រះគម្ពីរប៊ីប ។ សូមស្វែងរកស្រុកណាសារ៉ែត និង បេថ្លេហិមនៅលើផែនទី ។
សូមកត់ចំណាំថា « បេថ្លេហិម [ គឺ ] មានចម្ងាយប្រហែលជា ៨៥–៩០ ម៉ាល ( ១៣៧–១៤៥ គីឡូម៉ែត្រ ) ភាគខាងត្បូងភូមិណាសារ៉ែតយ៉ាងហោចណាស់ធ្វើដំណើរដោយថ្មើរជើងត្រូវប្រើពេលអស់ បួនទៅប្រាំថ្ងៃប្រហែលជាយូរជាងនេះបើផ្អែកលើស្ថានភាពរបស់ម៉ារា » (New Testament Student Manual [ Church Educational System manual ឆ្នាំ ២០១៤ ] ទំព័រ ១៤៣) ។
សូមពិចារណាអំពីអ្វីដែលអ្នកគិតថា នឹងជាស្ថានភាពសមរម្យបំផុតសម្រាប់ការប្រសូតនៃអង្គបង្កបង្កើត និងជាព្រះអង្គសង្គ្រោះនៃពិភពលោក ។ សូមអាន លូកា ២:៦-៧ដោយរកមើលកាលៈទេសៈនានានៃការប្រសូតរបស់ព្រះយេស៊ូវគ្រីស្ទ ។
សូមអាន លូកា ២:៨–១៤ដោយរកមើលថាតើការប្រសូតរបស់ព្រះអង្គសង្គ្រោះត្រូវបានប្រកាសយ៉ាងដូចម្តេច ។
សូមកត់ចំណាំថា លូកា ២:១០ ពិពណ៌នាពីអារម្មណ៍ដែលយើងអាចមានបទពិសោធន៍ ដោយសារតែព្រះអង្គសង្គ្រោះបានប្រសូត ។ សូមគិតពីការសរសេរសេចក្តីពិតដូចតទៅនេះ ដាក់ក្នុងព្រះគម្ពីររបស់អ្នក ៖ ដោយសារតែព្រះអង្គសង្គ្រោះបានប្រសូតមកលើផែនដី នោះយើងអាចទទួលបទពិសោធន៍នៃអំណរដ៏មហិមា ។
នៅពេលអ្នកបន្ដសិក្សា លូកា ២សូមរកមើលគំរូនៃរបៀបដែលចំណេះដឹងអំពីការប្រសូតរបស់ព្រះអង្គសង្គ្រោះ បាននាំមកនូវក្ដីអំណរដល់អ្នកដទៃ ។
សូមអាន លូកា ២:១៥-២០ដោយគូសចំណាំពាក្យ ឬ ឃ្លានានាដែលបង្ហាញពីរបៀបដែលពួកអ្នកគង្វាលបានឆ្លើយតប ចំពោះការណែនាំរបស់ពួកទេវតា ។
សូមកត់ចំណាំថាពួកអ្នកគង្វាលបានឆ្លើយតបចំពោះសារដំណឹងរបស់ទេវតានោះភ្លាម ។ តើពួកអ្នកគង្វាលទទួលបានសាក្សី ឬទីបន្ទាល់អ្វីខ្លះដោយសារតែពួកគេធ្វើតាមសារដំណឹងនេះ ?
សូមមើល លូកា ២:១៧–២០ឡើងវិញ ដោយរកមើលអ្វីដែលពួកអ្នកគង្វាលបានធ្វើ បន្ទាប់ពីពួកគេបានទទួលសាក្សីអំពីព្រះយេស៊ូវគ្រីស្ទ ។ តើអ្នកគិតថា ហេតុអ្វីពួកអ្នកគង្វាលបានចែកចាយជាមួយអ្នកដទៃអំពីអ្វីដែលពួកគេបានជួប និង បានឮដូច្នេះ ?
-
សូមបំពេញកិច្ចការខាងក្រោមនេះ នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖
-
យោងតាមអ្វីដែលអ្នកបានរៀនពីសកម្មភាពរបស់ពួកអ្នកគង្វាល សូមបំពេញគោលការណ៍ខាងក្រោមនេះ ៖ នៅពេលយើងទទួលបានទីបន្ទាល់របស់យើងអំពីព្រះយេស៊ូវគ្រីស្ទ នោះយើងនឹងចង់ ។
-
សូមគិតអំពីគ្រាមួយ ដែលអ្នកមានបំណងប្រាថ្នាមួយ ដើម្បីចែកចាយទីបន្ទាល់របស់ខ្លួនអំពីព្រះយេស៊ូវគ្រីស្ទ និងដំណឹងល្អរបស់ទ្រង់ជាមួយអ្នកដទៃ ។ សូមសរសេរអំពីមូលហេតុដែលអ្នកបានមានបំណងប្រាថ្នាបែបនោះ ។
-
លូកា ២:២១-៣៩
ស៊ីម្មាន និង អាណ ប្រកាសអំពីព្រះយេស៊ូវថាជាព្រះអង្គសង្គ្រោះនៃពិភពលោក
នៅក្នុង លូកា ២:២១-២៤ យើងអានថា បន្ទាប់ពីការប្រសូតរបស់ព្រះយេស៊ូវបានប្រាំបីថ្ងៃ នោះម៉ារា និងយ៉ូសែប បាននាំទ្រង់ទៅព្រះវិហារបរិសុទ្ធស្របតាមច្បាប់របស់យូដា ( សូមមើល និក្ខមនំ ១៣:២) ។ មនុស្សពីរនាក់ដែលនៅព្រះវិហារបរិសុទ្ធនាថ្ងៃ នោះបានទទួលស្គាល់ព្រះឱរសយេស៊ូវជាព្រះមែស៊ី ។
សូមអានដំណើររឿងរបស់ស៊ីម្មាននៅក្នុង លូកា ២:២៥–៣២។ ( សូមកត់ចំណាំថាឃ្លា « រង់ចាំសេចក្តីដោះទុក្ខ របស់សាសន៍អ៊ីស្រាអែល » នៅក្នុង លូកា ២:២៥ សំដៅទៅលើការរង់ចាំព្រះមែស៊ីយាងមក ) ។ ក្រោយមកសូមអានដំណើររឿងរបស់អាណនៅក្នុង លូកា ២:៣៦-៣៨។ នៅក្នុងដំណើររឿងទាំងពីរ សូមរកមើលគំរូនៃរបៀបដែលចំណេះដឹងអំពីការប្រសូតរបស់អង្គសង្គ្រោះ បាននាំមកនូវក្ដីអំណរដល់បុគ្គលទាំងនេះ ។
តើក្រោយមកស៊ីម្មាន និង អាណ បានថ្លែងទីបន្ទាល់អំពីព្រះយេស៊ូវគ្រីស្ទតាមរបៀបណា ?
យើងអាននៅក្នុង លូកា ២:៣៤-៣៥ ថាស៊ីម្មានក៏បានប្រទានពរដល់ម៉ារា និងយ៉ូសែបផងដែរ ។ ការបកប្រែដោយយ៉ូសែប ស៊្មីធ បញ្ជាក់ច្បាស់ពីការព្យាកររបស់ស៊ីម្មានដល់ម៉ារា ៖ « មែនហើយ លំពែងនឹងចាក់ទំលុះព្រលឹងគាត់ដែរ ដើម្បីឲ្យគំនិតក្នុងចិត្តរបស់មនុស្សជាច្រើនបានសម្តែងចេញមក » ។ (ការបកប្រែដោយយ៉ូសែប ស្ម៊ីធ លូកា ២:៣៥ ) ។
-
នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក សូមពន្យល់ពីមូលហេតុនៃការដឹងពីការប្រសូតរបស់ព្រះអង្គសង្គ្រោះបាននាំអំណរមកដល់អ្នក ។ សូមគិតពីការចែកចាយទីបន្ទាល់នេះជាមួយមិត្តភក្តិ ឬ អំឡុងពេលធ្វើរាត្រីជួបជុំក្រុមគ្រួសារ ។
យោងតាម លូកា ២:៣៩បន្ទាប់ពីយកព្រះយេស៊ូវទៅព្រះវិហារបរិសុទ្ធរួចមក ម៉ារា និង យ៉ូសែប បានត្រឡប់ទៅផ្ទះរបស់ពួកគេវិញនៅភូមិណាសារ៉ែតជាមួយព្រះយេស៊ូវ ។
លូកា ២:៤០-៥២
ព្រះរាជកុមារព្រះយេស៊ូវក៏កាន់តែធំ « ប្រកបដោយប្រាជ្ញារឹតតែច្រើនឡើង ហើយជាទីគាប់ព្រះហឫទ័យដល់ព្រះ និងចិត្តមនុស្សផង »
សូមសរសេរពីអ្វីមួយចំនួនដែលអ្នកចង់កែលម្អខ្លួនរបស់អ្នក ៖
តើការស្គាល់ថាព្រះយេស៊ូវថាជាអង្គបែបណា កាលទ្រង់មានព្រះជន្មស្របាលអ្នក អាចជួយអ្នកឲ្យប្រែក្លាយទៅជាមនុស្សដែលអ្នកចង់បានយ៉ាងដូចម្តេច ?
ព្រះគម្ពីរមានព័ត៌មានលម្អិតបន្ដិបន្ដួចអំពីកុមារភាពរបស់ព្រះយេស៊ូវ ប៉ុន្តែព័ត៌មានលម្អិតទាំងនោះ អាចនឹងជាពរជ័យដ៏អស្ចារ្យមួយ ហើយដឹកនាំយើង នៅពេលយើងព្យាយាមកែលម្អខ្លួនយើង ។ សូមអាន លូកា ២:៤០ដោយរកមើលរបៀបដែលលូកាបានពិព៌ណនាពីជីវិតកាលពីព្រះរាជកុមារភាពរបស់ព្រះយេស៊ូវ ។ សូមកត់ចំណាំថា រឹតតែច្រើនឡើង មានន័យថា ធំឡើង ឬចម្រើនឡើង ។
បន្ទាប់មក សូមអាន លូកា ២:៤១–៤៩ដោយរកមើលនូវអ្វីដែលព្រះយេស៊ូវបានធ្វើពេលទ្រង់មានព្រះជន្ម ១២ ព្រះវស្សា ។
ហេតុអ្វីព្រះយេស៊ូវបន្តគង់នៅព្រះវិហារបរិសុទ្ធ ? ( សូមអាន ម៉ាកុស ២:៤៦ លេខយោង គ ដោយរកមើលរបៀបដែលការបកប្រែដោយយ៉ូសែប ស្ម៊ីធ បញ្ជាក់យ៉ាងច្បាស់ពីអ្វីដែលព្រះយេស៊ូវកំពុងតែធ្វើនៅឯព្រះវិហារបរិសុទ្ធ ) ។
ប្រសិនបើ អ្នកអាចមើល « Young Jesus Teaches in the Temple » ( ២:៣០ ) មកពី The Life of Jesus Christ Bible Videos ដែលមាននៅក្នុងគេហទំព័រ LDS.orgដើម្បី មើលការបរិយាយពីអ្វីដែលបានកើតឡើង នៅពេលយ៉ូសែប និង ម៉ារាបានរកព្រះយេស៊ូវឃើញនៅព្រះវិហារបរិសុទ្ធ ។ ប្រសិនបើគ្មានវីដេអូទេនោះ សូមអាន លូកា ២:៤៨–៥០ដោយរកមើលអ្វីដែលព្រះយេស៊ូវបានមានបន្ទូលទៅកាន់ម៉ារា និង យ៉ូសែប នៅពេលពួកគេបានរកឃើញទ្រង់ ។
តើដំណើររឿងនេះបើកសម្ដែងអ្វី អំពីចំណេះដឹងរបស់ព្រះយេស៊ូវអំពីអត្តសញ្ញាណដ៏ទេវភាពរបស់ទ្រង់កាលទ្រង់នៅយុវវ័យ ?
ព្យាការី យ៉ូសែប ស៊្មីធ បានបើកសម្តែងដូចតទៅនេះអំពីព្រះយេស៊ូវគ្រីស្ទកាលនៅយុវវ័យ ៖ « កាលនៅកុមារភាព ទ្រង់មានគ្រប់បញ្ញាដែលចាំបាច់ដើម្បីអាចឲ្យទ្រង់គ្រប់គ្រង និង ត្រួតត្រាលើនគរពួកយូដា ហើយអាចដោះស្រាយចម្ងល់របស់បណ្ឌិតដ៏ឆ្លាតបំផុត និងចេះដឹងបំផុតអំពីច្បាប់ និងភាពជាព្រះ ហើយបានធ្វើឲ្យទ្រឹស្ដីនិងការអនុវត្តរបស់ពួកគេបង្ហាញចេញមកដូចជាធ្វេសប្រហែល បើប្រៀបធៀបនឹងប្រាជ្ញាដែលទ្រង់បានទទួលមក ប៉ុន្តែទ្រង់គ្រាន់តែជាកុមារតូចម្នាក់ប៉ុណ្ណោះ ហើយខ្វះកម្លាំងខាងរូបកាយ ទោះជាដើម្បីការពារខ្លួនព្រះអង្គទ្រង់ ហើយបានស្ថិតនៅក្រោមភាពរងា ស្រេកឃ្លាន និង សុគត » (History of the Church ៦:៦០៨ ) ។
សូមអាន លូកា ២:៥១–៥២ដោយរកមើលរបៀបនានាដែលព្រះយេស៊ូវបានធំលូតលាស់ឡើង ( សូមមើលផងដែរ ការបកប្រែដោយយ៉ូសែប ស្ម៊ីធ ម៉ាថាយ ៣:២៤–២៦ [ នៅក្នុងឧបសម្ព័ន្ធព្រះគម្ពីរប៊ីប ] ) ។
លូកា ២:៥២ បង្រៀនយើងថាព្រះយេស៊ូវ « ប្រកបដោយប្រាជ្ញារឹតតែច្រើនឡើង » ។ នៅក្នុងខគម្ពីរនោះ យើងក៏បានរៀននូវរបៀបបីយ៉ាងផ្សេងទៀតដែលទ្រង់បានធំឡើងផងដែរ ។ កាន់តែ « ធំ » មានន័យថារាងកាយធំលូតលាស់ ។ ឃ្លា « ទីគាប់ព្រះហឫទ័យដល់ព្រះ » ទាក់ទងនឹងស្ថានភាពខាងវិញ្ញាណ ហើយឃ្លាថា « គាប់ចិត្ត…មនុស្សផង » ទាក់ទងនឹងទំនាក់ទំនងក្នុងសង្គម ។ ដូច្នេះដោយផ្អែកលើការសិក្សារបស់អ្នកពីខគម្ពីរនេះ យើងអាចរៀននូវគោលការណ៍ដូចតទៅនេះ ៖ យើងអាចធ្វើតាមគំរូរបស់ព្រះយេស៊ូវ តាមរយៈការទទួលប្រាជ្ញា និងការលូតលាស់ខាងរូបកាយ ខាងវិញ្ញាណ និងខាងសង្គម ។
សូមពិចារណាទៅលើសំណួរខាងក្រោមនេះ ៖
-
ហេតុអ្វីវាសំខាន់សម្រាប់យើងដើម្បីអភិវឌ្ឍចំណុច នីមួយៗ នៃចំណុចទាំងបួននេះ ?
-
តើអ្នកត្រូវបានប្រទានពរដោយរបៀបណាដែរ នៅពេលអ្នកបានព្យាយាមធ្វើតាមគំរូរបស់ព្រះយេស៊ូវ អំពីការអភិវឌ្ឍព្រះអង្គទ្រង់ក្នុងចំណុចទាំងនេះ ?
-
សូមចម្លងតារាងខាងក្រោមចូលទៅក្នុង សៀវភៅកំណត់ហេតុការសិក្សាព្រះគម្ពីររបស់អ្នក ។ បន្ទាប់មក សូមសរសេរក្រោមផ្នែកនីមួយៗនូវគោលដៅមួយសម្រាប់ការអភិឌ្ឍផ្ទាល់ខ្លួនរបស់អ្នក ហើយដាក់ផែនការសម្រាប់វិធីដែលអ្នកនឹងធ្វើគោលដៅនោះអំឡុងសប្តាហ៍ក្រោយៗទៀត ។
ខ្ញុំអាចធ្វើតាមគំរូរបស់ព្រះយេស៊ូវដោយបង្កើន… | ||||
---|---|---|---|---|
ផ្នែក ៖ |
បញ្ញា |
រូបកាយ |
វិញ្ញាណ |
សង្គម |
គោលដៅ និង ផែនការរបស់ខ្ញុំដើម្បីសម្រេចគោលដៅរបស់ខ្ញុំ ៖ |
-
សូមសរសេរឃ្លាដែលនៅខាងក្រោមនេះ ពីខាងក្រោមកិច្ចការថ្ងៃនេះ នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖
ខ្ញុំបានសិក្សា លូកា ២ ហើយបានបញ្ចប់មេរៀននេះនៅ ( កាលបរិច្ឆេទ ) ។
សំណួរ គំនិត និង ការយល់ដឹងបន្ថែមដែលខ្ញុំចង់ចែកចាយជាមួយគ្រូរបស់ខ្ញុំ ៖