មេរៀនទី ៨ ៖ ថ្ងៃទី ៤
ម៉ាកុស ៩:៣០-៥០
សេចក្តីផ្តើម
ព្រះយេស៊ូវបានប្រាប់ពួកសិស្សរបស់ទ្រង់អំពីការសុគត និង ការរស់ឡើងវិញដែលនឹងកើតឡើងចំពោះទ្រង់ ហើយបានបង្រៀនពួកគេអំពីអ្នកដែលនឹងបានធំបំផុតនៅក្នុងនគររបស់ព្រះ ។ ទ្រង់បានព្រមានពីលទ្ធផលនៃការដឹកនាំមនុស្សដទៃឲ្យធ្វើបាប ហើយបានបង្គាប់ពួកសិស្សរបស់ទ្រង់ ឲ្យញែកខ្លួនពួកគេចេញពីឥទ្ធិពលនានាដែលនឹងនាំឲ្យពួកគេមានបាប ។
ម៉ាកុស ៩:៣០-៣៧
ព្រះយេស៊ូវប្រាប់ពួកសិស្សរបស់ទ្រង់ជាមុនអំពីការសុគត និង ការរស់ឡើងវិញរបស់ទ្រង់ ហើយបង្រៀនអំពីអ្នកដែលនឹងបានទៅជាធំបំផុតនៅក្នុងនគររបស់ព្រះ
បន្ទាប់ពីបានបណ្តេញវិញ្ញាណអសោចចេញពីក្មេងប្រុសម្នាក់មក ( សូមមើល ម៉ាកុស ៩:១៧–២៩) ព្រះអង្គសង្គ្រោះបានយាងកាត់តាមសមុទ្រកាលីឡេជាមួយពួកសិស្សរបស់ទ្រង់ ។ សូមអាន ម៉ាកុស ៩:៣១–៣២ដោយរកមើលព្រឹត្តិការណ៍នានាដែលព្រះអង្គសង្គ្រោះបានព្យាករ ។
សូមកត់ចំណាំនៅក្នុងខគម្ពីរទាំងនេះថា បន្ទាប់ពីព្រះយេស៊ូវបានប្រាប់ពួកសិស្សទ្រង់ថា ទ្រង់នឹងត្រូវគេធ្វើគត់ ហើយមានព្រះជន្មរស់ឡើងវិញនៅថ្ងៃទីបី នោះជាថ្មីម្តងទៀតពួកគេពុំបានយល់ពីអ្វីដែលទ្រង់មានព្រះបន្ទូល ហើយខ្លាចនឹងទូលសួរទ្រង់ ។
នៅក្នុង ម៉ាកុស ៩:៣៣–៣៧យើងរៀនថា នៅពេលព្រះយេស៊ូវគ្រីស្ទបានយាងទៅក្រុងកាពើណិម ទ្រង់បានបង្រៀនដល់ពួកសិស្សរបស់ទ្រង់ថា អស់អ្នកដែលបន្ទាបខ្លួនបម្រើមនុស្សដទៃនឹងត្រូវបានចាត់ទុកថាជាអ្នកធំជាងគេបំផុត ឬ មានកិត្តិយសយ៉ាងខ្លាំងនៅក្នុងនគររបស់ព្រះ ។ ទ្រង់ក៏បានបង្គាប់ពួកគេឲ្យទទួលឲ្យចូលសាសនាចក្រផងដែរនូវអស់អ្នកដែលបន្ទាបខ្លួនរបស់ពួកគេដូចជាកូនក្មេង ហើយអស់អ្នកដែលទទួលទ្រង់ ( សូមមើលការបកប្រែដោយយ៉ូសែប ស្ម៊ីធ ម៉ាកុស ៩:៣៤–៣៥ [ នៅក្នុង ម៉ាកុស ៩:៣៧ លេខយោង ក] ) ។
ម៉ាកុស ៩:៣៨-៥០
ព្រះយេស៊ូវបានព្រមានប្រឆាំងនឹងឥទ្ធិពលដែលនាំមនុស្សដទៃឲ្យមានបាប និង ការពុំញែកខ្លួនចេញពីឥទ្ធិពលអាក្រក់
ប្រសិនបើអ្នកបានជួបនឹងមនុស្សមួយក្រុមដែលកំពុងព្យាយាម ហើយមានចិត្តតម្រង់ឆ្ពោះទៅរកអ្វីមួយ តើអ្នកនឹងឆ្លើយតបយ៉ាងដូចម្តេច ? តើអ្នកនឹងទៅរកមើលជាមួយពួកគេ ដើម្បីដឹងថាតើពួកគេកំពុងរកមើលអ្វីដែរឬទេ ?
ជាញឹកញាប់ អាកប្បកិរិយារបស់មនុស្សអាចជះឥទ្ធិពលដល់អ្នកផ្សេងទៀត ដោយដឹកនាំពួកគេឲ្យចាប់យកពាក្យសម្តី ទង្វើ ឬ ឥរិយាបថស្រដៀងគ្នានោះ ។ តើពេលណាដែរ ដែលអ្នកបានឃើញនរណាម្នាក់ បានផ្លាស់ប្តូរពាក្យសម្តី ទង្វើ ឬ ឥរិយាបថរបស់ខ្លួនដោយសារតែឥទ្ធិពលមកពីមនុស្សដទៃ ?
នៅពេលអ្នកសិក្សា ម៉ាកុស ៩:៣៨–៥០សូមរកមើលសេចក្តីពិតនានាដែលអាចជួយអ្នក ឲ្យពិចារណាអំពីឥទ្ធិពលរបស់អ្នកលើកិច្ចខិតខំរបស់មនុស្សដទៃ ដើម្បីធ្វើតាមព្រះអង្គសង្គ្រោះ ព្រមទាំងឥទ្ធិពលរបស់មនុស្សដទៃដែលមានលើអ្នក ។
សូមអាន ម៉ាកុស ៩:៣៨ដោយរកមើលស្ថានភាពដែលសាវកយ៉ូហានបានប្រាប់ដល់ព្រះអង្គសង្គ្រោះ ។
អែលឌើរ ប្រ៊ូស អ័រ ម៉ាក់ខន់ឃី ក្នុងកូរ៉ុមនៃពួកសាវកដប់ពីរនាក់បានពន្យល់ថា សាវកបានហាមឃាត់បុរសនេះ ពីការបណ្តេញអារក្សចេញដោយសារតែគាត់មិនដើរជាមួយនឹងពួកសាវកដប់ពីនាក់ ៖ « គាត់មិនមែនជាមនុស្សម្នាក់នៅក្នុងរង្វង់នៃពួកសិស្សដែលបន្តធ្វើដំណើរ បរិភោគ ដេក និង សន្ទនាជាមួយព្រះអម្ចាស់ឡើយ ។ … ប៉ុន្តែចេញពីការឆ្លើយតបរបស់ព្រះអម្ចាស់ ចម្លើយនោះគឺជាភស្តុតាងថា គាត់គឺជាសមាជិកនៃនគរព្រះ ជាអ្នកបម្រើស្របច្បាប់ដែលកំពុងធ្វើកិច្ចការនៅក្នុងសិទ្ធិអំណាចនៃបព្វជិតភាព និង ដោយអំណាចនៃសេចក្តីជំនឿ » (Doctrinal New Testament Commentary ភាគទី ៣ [ ឆ្នាំ ១៩៦៥–៧៣ ] ១:៤១៧ ) ។
ព្រះអង្គសង្គ្រោះបានប្រាប់សាវកទាំងនោះថា កុំឃាត់បុរសនោះឡើយ ហើយបានបង្រៀនថាមនុស្សដែលជួយក្នុងការតំណាងឲ្យទ្រង់នឹងបានទទួលរង្វាន់ ( សូមមើល ម៉ាកុស ៩:៣៩–៤១) ។
សូមអាន ម៉ាកុស ៩:៤២ដោយរកមើលការព្រមានរបស់ព្រះអង្គសង្គ្រោះ ។ នៅក្នុងបរិបទនេះ រវាតចិត្ត មានន័យថាដឹកនាំឲ្យវង្វេង ឬ ជះឥទ្ធិពលដល់នរណាម្នាក់ឲ្យមានបាប ។
« កូនណាមួយដែលជឿដល់ [ ព្រះយេស៊ូវ ] » រួមបញ្ចូលទាំងពួកសិស្សគ្រប់ជំនាន់របស់ព្រះអង្គសង្គ្រោះ ដែលបន្ទាបខ្លួន ដែលទុកចិត្តលើទ្រង់ ។ អ្នកនោះក៏រួមមានអស់អ្នកដែលមានជំនឿនៅខ្ចី ដូចជាយុវវ័យ និង អ្នកប្រែចិត្តជឿថ្មី ។
អែលឌើរ ម៉ាក់ខនឃី បានពន្យល់ថា « វាជាការប្រសើរជាងបើស្លាប់ទៅ ហើយត្រូវបានបដិសេធពីពរជ័យនានានៃការបន្តមាននូវជីវិតរមែងស្លាប់ ជាជាងរស់នៅ ហើយដឹកនាំព្រលឹងជាច្រើនចេញពីសេចក្តីពិត » ហើយមានបទពិសោធន៍នៃការរងទុក្ខដ៏ធ្ងន់ធ្ងរ ហើយបែកចេញពីព្រះដែលបណ្តាលមកពីទង្វើរបស់យើង (Doctrinal New Testament Commentary ១:៤២០ ) ។
គោលការណ៍មួយដែលយើងរៀនពីការព្រមានរបស់ព្រះអង្គសង្គ្រោះនៅក្នុង ម៉ាកុស ៩:៤២ គឺថា ប្រសិនបើយើងជះឥទ្ធិពលដល់មនុស្សដទៃដែលជឿលើព្រះយេស៊ូវគ្រីស្ទឲ្យមានបាប នោះយើងនឹងត្រូវទទួលខុសត្រូវចំពោះព្រះ ។
សូមសញ្ជឹងគិតពីរបៀបនានា ដែលមនុស្សម្នាក់អាចជះឥទ្ធិពលលើអ្នកដែលជឿលើព្រះយេស៊ូវគ្រីស្ទឲ្យមានបាប ។
សូមពិចារណាពីឥទ្ធិពលរបស់អ្នក លើមនុស្សដែលជឿលើព្រះយេស៊ូវគ្រីស្ទ ។ តើអ្នកកំពុងតែជះឥទ្ធិពលលើពួកគេ ដោយដឹកនាំជីវិតរបស់ពួកគេដើរឆ្ពោះទៅកាន់ទ្រង់ ឬ នាំគេងាកចេញពីទ្រង់ ?
-
នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក សូមសរសេរពីរបៀបមួយចំនួនដែលអ្នកអាចជះឥទ្ធិពលលើមនុស្សដទៃ ឲ្យជឿលើព្រះយេស៊ូវគ្រីស្ទ ហើយចៀសចេញពីអំពើបាប ។ សូមគូររង្វង់លើគំនិតណាមួយ ហើយដាក់គោលដៅដើម្បីអនុវត្តវា ។
សូមព្យាយាមចង ហើយស្រាយខ្សែស្បែកជើង ក្រវ៉ាត់-ក ឬ ចំណងនានាដោយប្រើតែដៃម្ខាង ។
តើឧបសគ្គអ្វីខ្លះដែលអ្នកនឹងមាន ប្រសិនបើអ្នកពិការដៃម្ខាងនោះ ? តើពេលណាទៅ ដែលការស៊ូបាត់បង់ដៃម្ខាងប្រសើរជាងទុកដៃទាំងពីរឲ្យនៅនោះ ?
ការកាត់អវៈអយៈ គឺជាការកាត់ចេញនូវផ្នែកនៃរាងកាយដោយចេតនា ដូចជាកាត់ដៃ ឬ ជើងម្ខាង ដោយសារតែមកពីការរងរបួសធ្ងន់ធ្ងរ ជំងឺ ឬ រោគឆ្លង ។ ទោះបីជាការកាត់អវៈអយៈ ហើយក្រោយពីជាសះស្បើយជារឿងដែលឈឺចាប់ និង ប៉ះទង្គិចអារម្មណ៍យ៉ាងណាក្តី វាអាចការពារជំងឺ ឬ ការបង្ករោគនោះមិនឲ្យរាលដាល និង បណ្តាលឲ្យរបួសកាន់តែធ្ងន់ធ្ងរ ឬ ស្លាប់ ។
សូមអាន ម៉ាកុស ៩:៤៣ដោយរកមើលអ្វីដែលព្រះអង្គសង្គ្រោះបង្រៀនថា តើពេលណាទៅ ដែលការស៊ូបាត់បង់ដៃម្ខាងប្រសើរជាងទុកដៃទាំងពីរឲ្យនៅនោះ ។
ព្រះអង្គសង្គ្រោះបានបង្រៀនប្រៀបប្រដូចថា ស៊ូឲ្យកំបុតដៃម្ខាងវិញ ជាជាងមានដៃទាំងពីរ នៅពេលដៃម្ខាងរបស់យើងបានជះឥទ្ធិពលដល់យើងឲ្យមានបាប ហើយនឹងបន្តជះឥទ្ធិពលដល់យើងឲ្យមានអំពើបាប ។ ទ្រង់ពុំបានមានព្រះបន្ទូលថា យើងត្រូវតែកាត់ដៃម្ខាងរបស់យើងចេញឡើយ ទ្រង់បានប្រើព្រះបន្ទូលប្រៀបប្រដូចដើម្បី សង្កត់ធ្ងន់ពីសារៈសំខាន់នៃអ្វីដែលទ្រង់កំពុងបង្រៀន ។ ព្រះយេស៊ូវបានប្រើរូបភាពនៃការកាត់ដៃម្ខាងដើម្បីបង្ហាញថាតើវាសំខាន់ និង លំបាកខ្លាំងប៉ុណ្ណាដើម្បីញែកខ្លួនយើងចេញពីឥទ្ធិពលនៃភាពទុច្ចរិតមួយចំនួននោះ ។
ការបកប្រែដោយយ៉ូសែប ស្ម៊ីធ បង្កើនការយល់ដឹងរបស់យើងអំពីការបង្រៀនរបស់ព្រះអង្គសង្គ្រោះនៅក្នុង ម៉ាកុស ៩:៤៣–៤៨។ នៅក្នុងខគម្ពីរទាំងនេះ យើងរៀនថាព្រះអង្គសង្គ្រោះបានប្រើដៃ ជើង និង ភ្នែកដើម្បីធ្វើជានិមិត្តសញ្ញានៃឥទ្ធិពលនៅក្នុងជីវិតរបស់យើង ដែលអាចនាំយើងឲ្យធ្វើអំពើបាប ។
-
សូមគូររូបមនុស្ស នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ។ សូមគូររង្វង់លើដៃ ជើង និង ភ្នែកម្ខាងៗនៅលើរូបដែលអ្នកបានគូរនោះ ។ សូមអាន ការបកប្រែដោយយ៉ូសែប ស្ម៊ីធ ម៉ាកុស ៩:៤០–៤៨ ( នៅក្នុង Bible appendix ) ដោយរកមើលអ្វីដែលព្រះអង្គសង្គ្រោះ បានប្រៀបប្រដូចដៃ ជើង និង ភ្នែកម្ខាងនោះថាបានធ្វើឲ្យ « រវាតចិត្ត » ដល់នរណាម្នាក់ ឬ ជះឥទ្ធិពលដល់នរណាម្នាក់ឲ្យធ្វើអំពើបាប ។ សូមសរសេរពាក្យនានាដែលតំណាងឲ្យដៃ ជើង និង ភ្នែកដែលអ្នកបានគូសរង្វង់លើរូបដែលអ្នកបានគូរនោះ ។ ( ពាក្យ ជីវិត នៅក្នុងខគម្ពីរទាំងនេះ សំដៅទៅលើជីវិតអស់កល្បជានិច្ច ។
នៅពេលព្រះអង្គសង្គ្រោះបានបង្រៀន ដៃតំណាងឲ្យសមាជិកគ្រួសារ និង មិត្តភក្ដិរបស់យើង ជើងតំណាងឲ្យមនុស្សដែលយើងព្យាយាមយកគំរូតាមទាំងរបៀបនៃការគិត និង ទង្វើនានា ហើយភ្នែកតំណាងឲ្យអ្នកដឹកនាំរបស់យើង ។ សូមសញ្ជឹងគិតពីរបៀបនានា ដែលបំបែកយើងចេញពីឥទ្ធិពលទុច្ចរិត ឬ ឥទ្ធិពលដែលដឹកនាំយើងឲ្យធ្វើអំពើបាប ឬ បាត់បង់សេចក្តីជំនឿ ដែលអាចស្រដៀងទៅនឹងការកាត់ដៃ ឬ ជើងចេញ ។ យោងតាមខគម្ពីរដែលអ្នកបានអាន តើមានអ្វីអាចកើតឡើង ប្រសិនបើយើងពុំញែកខ្លួនយើងចេញពីឥទ្ធិពលទុច្ចរិតនេះ ?
សូមគិតពីការសរសេរសេចក្តីពិតខាងក្រោមនេះនៅក្នុងព្រះគម្ពីររបស់អ្នកនៅក្បែរ ម៉ាកុស ៩:៤៣–៤៨៖ វាជាការប្រសើរជាង ដើម្បីញែកខ្លួនយើងចេញពីឥទ្ធិពលទុច្ចរិតទាំងឡាយ ជាជាងត្រូវបែកចេញពីព្រះនៅទីចុងបញ្ចប់ ។
អែលឌើរ វ៉លធើរ អែហ្វ ហ្គុងស្សាឡែស្សនៃពួកចិតសិប បានបង្រៀនអំពីឥទ្ធិពលផ្សេងៗ ដែលយើងគួរតែញែកខ្លួនរបស់យើងចេញពីវា ៖ « ការកាត់ចេញនោះគឺមិនគ្រាន់តែសំដៅលើការកាត់ចេញពីមិត្តភក្តិតែប៉ុណ្ណោះនោះទេ ប៉ុន្តែសំដៅលើគ្រប់ឥទ្ធិពលអាក្រក់ទាំងអស់ ដូចជាកម្មវិធីទូរទស្សន៍ គេហទំព័រអ៊ិនធើរណែត ខ្សែភាពយន្ត អក្សរសិល្ប៍ ល្បែងកម្សាន្ត ឬ តន្ត្រីដែលមិនសមរម្យទាំងអស់ ។ ការឆ្លាក់គោលការណ៍នេះនៅក្នុងព្រលឹងរបស់យើង នឹងជួយយើងឲ្យទប់ទល់នឹងការល្បួងដែលទាក់ទាញទៅរកឥទ្ធិពលអាក្រក់ៗទាំងនោះ » (« Today Is the Time » Ensign ឬ Liahona ខែ វិច្ឆិកា ឆ្នាំ ២០០៧ ទំព័រ ៥៥ ) ។
ការញែកខ្លួនយើងចេញពីឥទ្ធិពលទុច្ចរិតទាំងនេះពុំមែនមានន័យថា ប្រព្រឹត្តិចំពោះមនុស្សដទៃដោយច្រឡើសបើស កាត់ទោសមនុស្សដទៃ ឬ បដិសេធពុំចូលរួមជាមួយមនុស្សដែលពុំមែនជាសមាជិកនៃសាសនាចក្រនោះឡើយ ។ ផ្ទុយទៅវិញ យើងគួរតែញែកខ្លួនយើងចេញពី ឬ ចៀសវាងពីទំនាក់ទំនងជិតស្និទ្ធជាមួយមនុស្សដែលនឹងនាំយើងឲ្យប្រព្រឹត្តិអំពើបាប ។ ទោះបីជាយើងពុំអាចដកចេញ ឬ ចៀសវាងពីគ្រប់ឥទ្ធិពលនានា ដែលអាចនាំយើងឲ្យប្រព្រឹត្តិអំពើបាបក្តី ព្រះអម្ចាស់នឹងប្រទានពរដល់យើង នៅពេលយើងព្យាយាមញែកខ្លួនរបស់យើងចេញពីឥទ្ធិពលអាក្រក់នានា ដែលយើងអាចធ្វើបានហើយនៅពេលយើងព្យាយាមពង្រីកការដាក់វិន័យខ្លួនឯង ឲ្យចៀសវាងពីឥទ្ធិពលនានាដែលយើងពុំអាចដកចេញពីយើងទាំងស្រុងបាននោះ ។
សូមពិចារណាពីឧបសគ្គនានាដែលយើងអាចជួប តាមរយៈការញែកខ្លួនយើងចេញពីឥទ្ធិពលទុច្ចរិតទាំងនោះ ។ តើយើងអាចដឹងពីរបៀបដ៏សមរម្យដើម្បី ញែកខ្លួនយើងចេញពីឥទ្ធិពលទុច្ចរិតដោយរបៀបណា ?
-
សូមអានស្ថានភាពខាងក្រោមនេះ ។ សូមឆ្លើយសំណួរដែលមានទាំងនេះនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ។
-
ខ្ញុំមានមិត្តច្រើនដែលជាញឹកញាប់លើកទឹកចិត្តខ្ញុំឲ្យចូលរួមនៅក្នុងសកម្មភាពដែលបំពានលើព្រះបញ្ញត្តិរបស់ព្រះ ។ ប៉ុន្តែខ្ញុំគិតថា ខ្ញុំអាចមានឥទ្ធិពលល្អលើពួកគេ ប្រសិនបើខ្ញុំបន្តចំណាយពេលនៅជាមួយពួកគេ ។ តើទំនាក់ទំនងបែបណាខ្លះ ដែលខ្ញុំគួរតែមានជាមួយពួកគេ ? តើខ្ញុំគួរតែនិយាយ និង ធ្វើអ្វីខ្លះដើម្បីញែកខ្លួនខ្ញុំយ៉ាងសមរម្យចេញពីមិត្តភក្តិទាំងនេះ ?
-
ខ្ញុំគឺជាអ្នកគាំទ្រក្រុមចម្រៀងដ៏ល្បីល្បាញមួយក្រុមអស់ជាច្រើនឆ្នាំមកហើយ ។ នៅក្នុងតន្ត្រីថ្មីៗនេះរបស់ពួកគេ និង ក្នុងការសម្ភាសន៍នានា ពួកគេបានបង្កើនឲ្យមានអាកប្បកិរិយា និង គំនិតដែលផ្ទុយពីបទដ្ឋាន និង ការបង្រៀនរបស់ព្រះ ។ វាគឺគ្រាន់តែជាតន្ត្រី និង ទំនុកបទចម្រៀងនោះតែប៉ុណ្ណោះមែនទេ ? ដូច្នេះ តើមានគ្រោះថ្នាក់អ្វីខ្លះទៅ ដែលខ្ញុំនៅបន្តស្តាប់តន្ត្រីរបស់ពួកគេ ហើយតាមដានពួកគេនៅលើប្រព័ន្ធផ្សព្វផ្សាយសង្គមនោះ ?
-
ខ្ញុំនៅតែស្តាប់ឮពីកម្មវិធីទូរទស្សន៍ដ៏ល្បីល្បាញ ហើយខ្ញុំចាប់អារម្មណ៍ចង់មើលវា ។ មានគេប្រាប់ខ្ញុំថា មានពាក្យសម្តីមួយចំនួនដែលពុំសមរម្យ និង គ្មានសីលធម៌ ព្រមទាំងមានរូបភាពនៃអំពើហិង្សា ប៉ុន្តែវាពុំមែនថាខ្ញុំនឹងទៅ ហើយទាក់ទងនឹងការណ៍អាក្រក់ទាំងនោះដែលខ្ញុំឮ ឬ ឃើញនោះឡើយ ។ ដូច្នេះតើវានឹងមានបញ្ហាអ្វី ប្រសិនបើខ្ញុំនៅតែមើលវានោះ ?
-
ទោះបីជាពេលខ្លះ ការញែកខ្លួនយើងចេញពីឥទ្ធិពលដែលនាំយើងឲ្យប្រព្រឹត្តអំពើបាប អាចមានការលំបាកក្តី តែហេតុអ្វីរង្វាន់ទាំងនោះ ដែលរួមមានទាំងជីវិតអស់កល្បជានិច្ចផង សក្តិសមនឹងការលះបង់នេះ ?
-
សូមឆ្លើយសំណួរខាងក្រោមនេះនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖
-
តើពេលណាដែរ ដែលអ្នក ឬនរណាម្នាក់ដែលអ្នកស្គាល់ បានជ្រើសរើសដើម្បីញែកខ្លួនចេញពីឥទ្ធិពលទុច្ចរិតនោះ ? ( សូមចៀសវាងសរសេរអ្វីដែលវាជារឿងផ្ទាល់ខ្លួន ឬ សម្ងាត់ពេក ) ។
-
តើពរជ័យអ្វីខ្លះដែលទទួលបានពីការធ្វើបែបនោះ ?
-
សូមសញ្ជឹងគិត ថាតើឥទ្ធិពលទាំងឡាយនៅក្នុងជីវិតរបស់អ្នកអាចកំពុងនាំអ្នកឲ្យប្រព្រឹត្តអំពើបាបដែរឬទេ ។ សូមសរសេរនៅលើក្រដាសមួយសន្លឹក ពីរបៀបដែលអ្នកនឹងញែកខ្លួនអ្នកចេញពីឥទ្ធិពលទាំងនោះ ។ សូមទុកក្រដាសនោះ នៅទីកន្លែងដែលអ្នកអាចមើលឃើញវាញឹកញាប់ ។
-
សូមសរសេរឃ្លាខាងក្រោមនេះពីខាងក្រោមកិច្ចការថ្ងៃនេះ នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖
ខ្ញុំបានសិក្សា ម៉ាកុស ៩:៣០–៥០ ហើយបានបញ្ចប់មេរៀននេះនៅ ( កាលបរិច្ឆេទ ) ។
សំណួរ គំនិត និង ការយល់ដឹងបន្ថែម ដែលខ្ញុំចង់ចែកចាយជាមួយគ្រូរបស់ខ្ញុំ ៖