មេរៀនទី ២ ថ្ងៃទី ២ ៖ ម៉ាថាយ ៣

មេរៀនទី ២ ៖ ថ្ងៃទី ២

ម៉ាថាយ ៣

សេចក្តីផ្តើម

យ៉ូហាន បាទីស្ទ បានប្រកាសដំណឹងល្អ ហើយបានធ្វើពិធីបុណ្យជ្រមុជទឹកនៅស្រុកយូដា ។ ព្រះយេស៊ូវគ្រីស្ទបានធ្វើដំណើរចេញពីស្រុកកាលីឡេ ទៅឯទន្លេ យ័រដាន់ ជាទន្លេដែលទ្រង់បានទទួលពិធីបុណ្យជ្រមុជទឹកដោយយ៉ូហាន ។ ព្រះជាព្រះវរបិតា បានថ្លែងទីបន្ទាល់អំពីព្រះយេស៊ូវ ថាជាព្រះរាជបុត្រាស្ងួនភ្ងារបស់ទ្រង់ ។

ម៉ាថាយ ៣:១-១២

យ៉ូហាន បាទីស្ទ ប្រកាសដំណឹងល្អនៅស្រុកយូដា

សូមស្រមៃថា អ្នកកំពុងអង្គុយនៅក្នុងថ្នាក់ ហើយមានសិស្សម្នាក់អង្គុយពីក្រោយអ្នក បានយករបស់របរអ្នក ( ដូចជា ប៊ិច សៀវភៅ ឬ អាវក្រៅ ) ។ គាត់បានសុំទោសអ្នកដែលបានយករបស់នោះ ប៉ុន្តែគាត់នៅតែបន្តយករបស់ពីសិស្សដទៃទៀត ។ គាត់បានសុំការអភ័យទោសរាល់ពេល ប៉ុន្តែគាត់នៅតែបន្តយករបស់ដែលមិនមែនជាកម្មសិទ្ធិរបស់ខ្លួន ។ តើអ្នកគិតយ៉ាងដូចម្ដេច អំពីការសុំការអភ័យទោសរបស់សិស្សរូបនេះ ?

តើការប្រព្រឹត្តរបស់សិស្សរូបនេះ អាចមានសភាពស្រដៀងទៅនឹងការព្យាយាមប្រែចិត្តដោយពុំមានបំណងប្រាថ្នាដ៏ស្មោះយ៉ាងដូចម្ដេច ?

នៅពេលអ្នកសិក្សា ម៉ាថាយ ៣ សូមស្វែងរកសេចក្ដីពិតនានា ដែលជួយយើងឲ្យយល់អំពីអ្វីដែលយើងត្រូវធ្វើ ដើម្បីប្រែចិត្តយ៉ាងពិតប្រាកដ ។

ព្រះយេស៊ូវគ្រីស្ទ បានចម្រើនព្រះជន្មដល់វ័យដែលត្រូវចាប់ផ្ដើមការបម្រើរបស់ទ្រង់ ។ ( អាយុជាទូទៅដែលបុរសសាសន៍អ៊ីស្រាអែល ចាប់ផ្ដើមការបម្រើគឺនៅវ័យ ៣០ ឆ្នាំ [ សូមមើល ជនគណនា ៤:៣ ] ) ។ សូមអាន ម៉ាថាយ ៣:១–៤ ដោយស្វែងរកអ្វីដែលបានកើតឡើងនៅគ្រានោះ ដែលបានជួយរៀបចំមនុស្សឲ្យទទួលការបម្រើរបស់ព្រះអង្គសង្គ្រោះ ។

រូបភាព

យ៉ូហានកំពុងបង្រៀន

យ៉ូហាន បាទីស្ទ គឺជា « កូនប្រុសរបស់សាការី និង អេលីសាបិត ដោយធ្វើជាសង្ឃតាមរយៈឪពុកម្ដាយ ។ ខ្សែស្រឡាយនេះមានសារៈសំខាន់ណាស់ ព្រោះ យ៉ូហាន គឺជាតួអង្គក្នុងក្រឹត្យវិន័យនៃលោកម៉ូសេ ដែលត្រូវបានបង្កើតឡើងដើម្បីរៀបចំផ្លូវថ្វាយព្រះមែស៊ី ហើយរៀបចំមនុស្សឲ្យបានរួចរាល់ដើម្បីទទួលទ្រង់ » ( Bible Dictionary, « John the Baptist ») ។ អេលីសាបិត ក៏ជាសាច់ញាតិរបស់ ម៉ារា ដែលជាព្រះមាតារបស់ព្រះយេស៊ូវដែរ ។ យ៉ូហានកាន់កូនសោនៃបព្វជិតភាពអើរ៉ុន [ សូមមើល គ. និង ស. ១៣; ៨៤:២៧–២៨ ) ។ សម្លៀកបំពាក់ និង អាហាររបស់លោក ដែលមានពិពណ៌នានៅក្នុង ម៉ាថាយ ៣:៤ បង្ហាញអំពីស្ថានភាពដ៏រាបទាបរបស់លោក ។

ចេញពីអ្វីដែលអ្នកបានរៀននៅក្នុង ម៉ាថាយ ៣:១–៤ តើយ៉ូហានបានធ្វើអ្វី ?

បេសកកម្មរបស់យ៉ូហាន ត្រូវបានទាយទុកជាមុនដោយអេសាយ និង ព្យាការីដទៃៗទៀត ( សូមមើល អេសាយ ៤០:៣, ម៉ាឡាគី ៣:១, នីហ្វៃទី១ ១០:៧–១០ ) ។ យ៉ូហានត្រូវរៀបចំផ្លូវថ្វាយព្រះមែស៊ី ( ព្រះយេស៊ូវគ្រីស្ទ ) ដោយប្រកាសអំពីការប្រែចិត្ត និង ពិធីបុណ្យជ្រមុជដោយទឹក ។

សូមអាន ម៉ាថាយ ៣:៥–៦ ដោយស្វែងរកថាតើប្រជាជនបានឆ្លើយតប ចំពោះសារលិខិតរបស់យ៉ូហាន យ៉ាងដូចម្ដេច ។

តើប្រជាជន បានឆ្លើយតបនឹងសារលិខិតរបស់យ៉ូហានយ៉ាងដូចម្ដេច ?

ការយល់ព្រមសារភាពអំពើបាបរបស់បុគ្គលម្នាក់ដល់ព្រះវរបិតាសួគ៌ ហើយប្រសិនបើចាំបាច់ដល់ថ្នាក់ដឹកនាំបព្វជិតភាពដែលបានចាត់តាំង គឺជាកត្តាដ៏សំខាន់ចំពោះការប្រែចិត្ត ( សូមមើល ពិតចំពោះសេចក្ដីជំនឿ ៖ ឯកសារយោងនៃដំណឹងល្អ [ ឆ្នាំ ២០០៤ ] ទំព័រ ១៣៤ ) ។

សូមអាន ម៉ាថាយ ៣:៧ ដោយស្វែងរកថាតើ យ៉ូហាន បានថ្លែងទៅកាន់នរណា ។

ពួកផារិស៊ីគឺជាមនុស្សខាងសាសនាមួយក្រុមនៅក្នុងចំណោមពួកសាសន៍យូដា ដែលឈ្មោះមានន័យថា ព្រាត់ ឬ បែកពីគ្នា ។ ពួកគេបានតម្កើងខ្លួនទៅលើការគោរពតាមក្រឹត្យវិន័យលោកម៉ូសេយ៉ាងតឹងរ៉ឹង ហើយជឿថាសេចក្ដីបន្ថែមទៅនឹងក្រឹត្យវិន័យនេះដែលបង្កើតដោយមនុស្ស ដែលហៅថាជាច្បាប់តាមមាត់ សំខាន់ដូចគ្នានឹងក្រឹត្យវិន័យរបស់លោកម៉ូសេដែរ ( សូមមើល Bible Dictionary “Pharisees” ) ។ ពួកសាឌូស៊ីជាក្រុមតូចមួយ តែមានអំណាចផ្នែកនយោបាយនៅក្នុងចំណោមពួកសាសន៍យូដាដែលជឿលើការកាន់តាមតួអក្សរនៃក្រឹត្យវិន័យរបស់លោកម៉ូសេ ប៉ុន្តែ ពួកគេពុំជឿលើគោលលទ្ធិនៃការរស់ឡើងវិញ ឬ ជីវិតដ៏នៅអស់កល្បជានិច្ចឡើយ ( សូមមើល Bible Dictionary, “Sadducees” ) ។

តើយ៉ូហានបានហៅពួកផារិស៊ី និង ពួកសាឌូស៊ីយ៉ាងដូចម្ដេច ?

ពស់វែកប៉ាឡេស្ទីន គឺជាពស់មួយប្រភេទនៅអ៊ីស្រាអែល ដែលមានពិសសាហាវបំផុត ។ ពស់វែកនេះចេញធ្វើសកម្មភាពនៅពេលយប់ ហើយជាធម្មតាលាក់ខ្លួនចាំប្រមាញ់ចំណីរបស់វា ។ កាលពួកវាជួបនឹងការគំរាមកំហែង ពស់វែកនេះនឹងឆ្វាយរង្វេល បន្លឺសូរស៊ឺៗ ហើយវាយប្រហារទៅលើសត្រូវរបស់វា ។

តើអ្នកគិតថា ហេតុអ្វីបានជាយ៉ូហាន ហៅពួកផារិស៊ី និងពួកសាឌូស៊ីថា ជាពូជពស់វែក ?

ការបកប្រែដោយយ៉ូសែប ស្ម៊ីធ មានពាក្យពេចន៍បន្ថែម ដែលយ៉ូហានបានថ្លែងទៅកាន់ពួកផារិស៊ី និង ពួកសាឌូស៊ី ។ បន្ទាប់ពីបានថ្លែងទៅកាន់ពួកគេនៅក្នុង ម៉ាថាយ ៣:៧ យ៉ូហាន បានព្រមាន ៖

« ហេតុអ្វីបានជាអ្នកមិនទទួលយកការបង្រៀនពីទ្រង់ ដែលព្រះបានបញ្ជូនមកនោះ ? ប្រសិនបើអ្នកមិនទទួលយកការបង្រៀននេះទុកក្នុងដួងចិត្តរបស់អ្នកទេ នោះអ្នកមិនបានទទួលខ្ញុំឡើយ ហើយប្រសិនបើអ្នកមិនទទួលខ្ញុំទេ នោះអ្នកមិនបានទទួលទ្រង់ ដែលបានបញ្ជូនខ្ញុំឲ្យមកធ្វើបន្ទាល់ ចំណែកឯអំពើបាបទាំងឡាយរបស់អ្នកមិនអាចគ្របបាំងបានឡើយ ។

« ហេតុដូច្នេះហើយ ចូរប្រែចិត្តចុះ ហើយបង្កើតផ្លែផ្កាដើម្បីបំពេញតាមការប្រែចិត្ត » ( ការបកប្រែដោយ យ៉ូសែប ស៊្មីធ ម៉ាថាយ ៣:៣៤–៣៥ [ នៅក្នុងសេចក្ដីបន្ថែមនៃព្រះគម្ពីរប៊ីប ] ) ។

យោងតាម យ៉ូហាន ប្រសិនបើពួកផារិស៊ី និង ពួកសាឌូស៊ីបដិសេធការបង្រៀនរបស់លោក តើពួកគេនឹងបដិសេធនរណាដែរ ?

តើអ្នកនឹងសង្ខេបសារលិខិតរបស់យ៉ូហាន ដល់ពួកគេយ៉ាងដូចម្ដេច ?

សូមគិតអំពីការគូសចំណាំឃ្លា « បង្កើតផល ដែលសំណំនឹងសេចក្ដីប្រែចិត្ត » នៅក្នុង ម៉ាថាយ ៣:៨ ។

រូបភាព

ផ្លែនៅលើដើមឈើ

នៅក្នុងព្រះគម្ពីរ ពេលខ្លះមនុស្សត្រូវបានប្រៀបធៀបជាដើមឈើដែលឲ្យផលល្អ ឬ អាក្រក់ ។ ផ្លែតំណាងឲ្យបំណងប្រាថ្នា និង ទង្វើរបស់យើង ។ ឃ្លា « សំណំនឹង » នៅក្នុង ខទី ៨ មានន័យថា « សក្ដិសមនឹង » ( សូមមើល ម៉ាថាយ ៣:៨ លេខយោង ខ ) ។

សូមគិតអំពីទិដ្ឋភាពនៅដើមមេរៀននេះ—អំពីសិស្សដែលយករបស់របរពីសិស្សដទៃទៀត ។ តើសិស្សនោះបានបង្ហាញគោលការណ៍ដ៏ពិតនៃការប្រែចិត្ត តាមរយៈបំណងប្រាថ្នា ឬ ទង្វើរបស់ខ្លួនដែរឬទេ ? ហេតុអ្វីគាត់មិនបានបង្ហាញ ?

ម៉ាថាយ ៣:៨ ជួយយើងឲ្យយល់ថា យើងបង្ហាញការប្រែចិត្តដ៏ពិតចំពោះព្រះអម្ចាស់ នៅពេលផ្លាស់ប្ដូរបំណងប្រាថ្នា និង ទង្វើរបស់យើងដើម្បីធ្វើតាមការបង្រៀនរបស់ទ្រង់ ។ សូមពិចារណាអំពីការសរសេរគោលការណ៍នេះនៅលើគែមព្រះគម្ពីរក្បែរ ម៉ាថាយ ៣:៨ ។

សូមគិតអំពីរបៀបដែលបំណងប្រាថ្នា និង ទង្វើរបស់យើង អាចចង្អុលបង្ហាញថា យើងពិតជាបានប្រែចិត្តពីអំពើបាបទាំងឡាយរបស់យើង នៅពេលអ្នកគិតអំពីឥរិយាបថដូចតទៅ ៖ ការលួចមើលពេលប្រលង ការប្រព្រឹត្តមិនល្អចំពោះបងប្អូន ការប្រើភាសាអសុរស និង ការបើកមើលការណ៍អាសគ្រាម ។

នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក សូមពន្យល់ថាតើមនុស្សម្នាក់ ដែលបានប្រែចិត្តពីអំពើបាបទាំងនេះហើយ អាចគិត និង ប្រព្រឹត្តយ៉ាងដូចម្ដេច ។

សូមអាន ម៉ាថាយ ៣:១០ ដោយស្វែងរកផលវិបាកនៃការពុំប្រែចិត្តយ៉ាងពិតប្រាកដ ។

សូមគិតអំពីបំណងប្រាថ្នា ឬ ទង្វើនានា ដែលអ្នកអាចនឹងត្រូវផ្លាស់ប្ដូរដើម្បីប្រែចិត្តយ៉ាងពិតប្រាកដ ។ សូមគិតអំពីរបៀបដែលអ្នកអាចធ្វើ ដើម្បីបង្ហាញការប្រែចិត្តពិតដោយផ្លាស់ប្ដូរបំណងប្រាថ្នា និង ទង្វើនានាដែលពុំស្របតាមការបង្រៀនរបស់ព្រះ ។

សូមអាន ម៉ាថាយ ៣:១១ ដោយស្វែងរកអ្វីដែល យ៉ូហាន បាទីស្ទ បានថ្លែងថាព្រះអង្គសង្គ្រោះនឹងធ្វើ ។

ព្រះយេស៊ូវនឹងធ្វើបុណ្យជ្រមុជ « ដោយព្រះវិញ្ញាណបរិសុទ្ធ និង ដោយភ្លើង » ( ម៉ាថាយ ៣:១១ ) ។ ពិធីបុណ្យជ្រមុជនេះមានសារៈសំខាន់ បន្ទាប់ពីពិធីបុណ្យជ្រមុជដោយទឹក ហើយសំដៅទៅលើការទទួលបានអំណោយទានព្រះវិញ្ញាណបរិសុទ្ធ ដែលញែកចេញជាបរិសុទ្ធ និង ដុតសម្អាតព្រលឹងយើងដូចជាភ្លើងដូច្នោះដែរ ( សូមមើល នីហ្វៃទី២ ៣១:១៣–១៤, ១៧ ) ។

ម៉ាថាយ ៣:១២ ពិពណ៌នាអំពីអ្វីដែលនឹងកើតឡើង ជាទីសម្គាល់ដល់ពួកសុចរិតដែលទទួលយកព្រះយេស៊ូវគ្រីស្ទ និង ដល់ពួកទុច្ចរិតដែលបដិសេធទ្រង់ ។

ម៉ាថាយ ៣:១៣-១៧

ព្រះយេស៊ូវគ្រីស្ទបានទទួលពិធីបុណ្យជ្រមុជទឹក ហើយព្រះវរបិតាបានប្រកាសថាទ្រង់ជាព្រះរាជបុត្រាស្ងួនភ្ងារបស់ទ្រង់

សូមយកពេលបន្តិចគិតអំពីពិធីបុណ្យជ្រមុជទឹករបស់អ្នក ។ នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក សូមកត់ត្រាអ្វីដែលអ្នកចងចាំអំពីព្រឹត្តិការណ៍ដ៏សំខាន់នេះនៅក្នុងជីវិតរបស់អ្នក ។

ដូចមានកត់ត្រានៅក្នុង ម៉ាថាយ ៣:១៣–១៧ ព្រះយេស៊ូវគ្រីស្ទបានទទួលពិធីបុណ្យជ្រមុជទឹក ។ នៅពេលអ្នកសិក្សាខគម្ពីរទាំងនេះ សូមស្វែងរកភាពស្រដៀងគ្នារវាងពិធីបុណ្យជ្រមុជទឹករបស់អ្នក និង របស់ព្រះអង្គសង្គ្រោះ ។

សូមអាន ម៉ាថាយ ៣:១៣–១៧ ដោយស្វែងរកចម្លើយចំពោះសំណួរទាំងបីខាងក្រោមនេះ អំពីព្រះយេស៊ូវ ៖

ដោយនរណា ?

ដោយរបៀបណា ?

ហេតុអ្វី ?

បើចាំបាច់ សូមកែប្រែចម្លើយរបស់អ្នកដោយយោងតាមព័ត៌មានដូចខាងក្រោមនេះ ៖

ព្រះយេស៊ូវបានធ្វើដំណើរពីស្រុកកាលីឡេ ទៅទន្លេ យ័រដាន់ ដើម្បីទទួលពិធីបុណ្យជ្រមុជទឹក ព្រោះ យ៉ូហាន កាន់កូនសោបព្វជិតភាពអើរ៉ុន ហើយមានសិទ្ធិអំណាចធ្វើពិធីបរិសុទ្ធនៃពិធីបុណ្យជ្រមុជទឹក ។ សូមសរសេរ យ៉ូហាន បាទីស្ទ និង សិទ្ធិអំណាចត្រឹមត្រូវ នៅលើបន្ទាត់ក្បែរ « ដោយនរណា ? »

រូបភាព

យ៉ូហាន បាទីស្ទ ធ្វើពិធីបុណ្យជ្រមុជទឹកឲ្យព្រះយេស៊ូវ

ព្រះយេស៊ូវយាង « ឡើងពីទឹកភ្លាម » ( ម៉ាថាយ ៣:១៦ ) បង្ហាញថា ទ្រង់បានទទួលពិធីបុណ្យជ្រមុជទឹកដោយការពន្លិចទៅក្នុងទឹក—ដែលមានន័យថា ទ្រង់ត្រូវបានគ្របដណ្ដប់ដោយទឹកទាំងស្រុង ។ សូមសរសេរ ដោយការពន្លិចទៅក្នុងទឹក នៅលើបន្ទាត់ក្បែរ « ដោយរបៀបណា ? »

យ៉ូហាន បាទីស្ទ បានដឹងថា តំណែង និង សិទ្ធិអំណាចរបស់ព្រះយេស៊ូវគឺមហិមាជាងលោកទៅទៀត ។ ទោះជាយ៉ាងណាក៏ដោយ យោងតាម ម៉ាថាយ ៣:១៥ ព្រះយេស៊ូវបានមានព្រះបន្ទូលថា ទ្រង់ត្រូវទទួលពិធីបុណ្យជ្រមុជទឹក « ដើម្បីសម្រេចតាមគ្រប់ទាំងសេចក្តីសុចរិត » ។ សូមសរសេរ ឃ្លានេះនៅលើបន្ទាត់ក្បែរ « ហេតុអ្វី ? »

« ដើម្បីសម្រេចតាមគ្រប់ទាំងសេចក្តីសុចរិត » មានន័យថា ការធ្វើគ្រប់កិច្ចការដែលព្រះវរបិតាសួគ៌តម្រូវឲ្យយើងធ្វើ ដើម្បីយើងអាចរស់នៅជាមួយនឹងទ្រង់ម្ដងទៀត ។ សេចក្ដីសុចរិត រួមមាននូវការទទួលពិធីបរិសុទ្ធទាំងឡាយនៃសេចក្ដីសង្គ្រោះ ។ ដោយបានទទួលពិធីបុណ្យជ្រមុជទឹក នោះព្រះយេស៊ូវបានធ្វើគំរូដ៏ឥតខ្ចោះ ដើម្បីឲ្យយើងធ្វើតាម ។ សូមអាន នីហ្វៃទី២ ៣១:៤–៩ រួចសរសេរវាទុកជាបទគម្ពីរយោង នៅលើគែមព្រះគម្ពីរក្បែរ ម៉ាថាយ ៣:១៥ ។ សូមគូសចំណាំពាក្យ ឬ ឃ្លានានា ដែលជួយអ្នកយល់អំពីអត្ថន័យនៃ « ដើម្បីសម្រេចតាមគ្រប់ទាំងសេចក្តីសុចរិត » ។

សូមឆ្លើយសំណួរទាំងបីមុននេះ ដើម្បីស្វែងរកគោលលទ្ធិអំពីពិធីបុណ្យជ្រមុជទឹកដ៏ត្រឹមត្រូវ ចេញពី ម៉ាថាយ ៣:១៣–១៧ ។

តើបុណ្យជ្រមុជទឹករបស់អ្នកស្រដៀងគ្នាទៅនឹងគំរូ ដែលព្រះអង្គសង្គ្រោះបានបង្ហាញដល់យើងយ៉ាងដូចម្ដេច ?

គោលលទ្ធិដ៏សំខាន់មួយទៀតនៅក្នុង ម៉ាថាយ ៣:១៦–១៧ ទាក់ទងទៅនឹងក្រុមព្រះ ។ សូមអានខគម្ពីរទាំងនេះឡើងវិញ ដោយស្វែងរកអ្វីដែលវាបង្រៀនអំពីព្រះវរបិតា ព្រះរាជបុត្រា និង ព្រះវិញ្ញាណបរិសុទ្ធ ។

នៅលើបន្ទាត់ខាងក្រោមនេះ សូមសរសេរទីតាំងទូទៅនៃអង្គសមាជិកក្រុមព្រះនីមួយៗ នៅពេលព្រះអង្គសង្គ្រោះទទួលពិធីបុណ្យជ្រមុជទឹក ៖

ព្រះវរបិតា ៖

ព្រះរាជបុត្រា ៖

ព្រះវិញ្ញាណបរិសុទ្ធ ៖

វាមានសារៈសំខាន់ដែលត្រូវយល់ថា ព្រះវិញ្ញាណបរិសុទ្ធពុំបានប្រែកាយជាសត្វព្រាបនោះទេ ។ ផ្ទុយទៅវិញ សត្វព្រាបគឺជាសញ្ញា ឬ ជានិមិត្តរូបមួយថា ព្រះវិញ្ញាណបរិសុទ្ធបានយាងចុះមកសណ្ឋិតលើព្រះយេស៊ូវ ( សូមមើល Bible Dictionary « Dove, sign of » ) ។

តើខគម្ពីរទាំងនេះបង្រៀនគោលលទ្ធិអ្វីខ្លះ ដល់យើងអំពីក្រុមព្រះ ? ( សូមមើលផងដែរ គ. និង ស. ១៣០:២២-២៣ ) ។

មានមនុស្សជាច្រើនពុំមានចំណេះដឹងដ៏ត្រឹមត្រូវ ឬ ពេញលេញអំពីក្រុមព្រះឡើយ ។ កាលណាយើងយល់អំពីលក្ខណៈពិតនៃក្រុមព្រះកាន់តែច្រើន នោះយើងមានសេចក្ដីស្រឡាញ់កាន់តែធំធេងចំពោះពួកទ្រង់ ហើយយើងនឹងរៀបចំខ្លួនបង្រៀន ហើយថ្លែងទីបន្ទាល់អំពីពួកទ្រង់ដល់មនុស្សទូទៅ បានកាន់តែប្រសើរឡើង ។

សូមស្វែងរកការបកស្រាយនៃពាក្យ « God » នៅក្នុង Bible Dictionary ឬ ពាក្យ « ព្រះ ក្រុមព្រះ » នៅក្នុងសេចក្ដីណែនាំដល់បទគម្ពីរទាំងឡាយ ( scriptures.lds.org ) ។ សូមអានការបកស្រាយនោះ ដោយស្វែងរកព័ត៌មានអំពីអង្គសមាជិកក្រុមព្រះនិមួយៗ ។ សូមសរសេរនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក មួយ ឬ ពីរប្រយោគ អំពីអង្គសមាជិកក្រុមព្រះនីមួយៗ ដែលរួមបញ្ចូលព័ត៌មានដែលអ្នកដឹងថាចាំបាច់ត្រូវដឹង ។

សូមគិតអំពីការចែកចាយទីបន្ទាល់អំពីព្រះវរបិតា ព្រះរាជបុត្រា និង ព្រះវិញ្ញាណបរិសុទ្ធ ជាមួយនឹងនរណាម្នាក់ដែលអ្នកស្គាល់ ។

សូមសរសេរឃ្លាដែលនៅខាងក្រោមនេះ ពីខាងក្រោមកិច្ចការថ្ងៃនេះ នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖

ខ្ញុំបានសិក្សា ម៉ាថាយ ៣ ហើយបានបញ្ចប់មេរៀននេះនៅ ( កាលបរិច្ឆេទ ) ។

សំណួរ គំនិត និង ការយល់ដឹងបន្ថែម ដែលខ្ញុំចង់ចែកចាយជាមួយគ្រូរបស់ខ្ញុំ ៖