មេរៀនទី ២ ៖ ថ្ងៃទី ៤
ម៉ាថាយ ៥
សេចក្ដីផ្ដើម
ម៉ាថាយ ៥–៧ កត់ត្រាអំពីទេសនកថាមួយដែល ព្រះអង្គសង្គ្រោះបានប្រទាននៅពេលទ្រង់បានចាប់ផ្ដើមការងារបម្រើរបស់ទ្រង់ ។ វាត្រូវបានគេស្គាល់ថាជា ទេសនកថានៅលើភ្នំ ។ មេរៀននេះគ្របដណ្ដប់លើ ម៉ាថាយ ៥ មានគោលការណ៍ទាំងឡាយ ដែលព្រះអង្គសង្គ្រោះបានបង្រៀន ដែលនាំទៅរកសុភមង្គល ។ ទ្រង់ក៏បានត្រាស់បញ្ជាពួកសិស្សរបស់ទ្រង់ ឲ្យធ្វើជាគំរូល្អ ហើយបានបង្រៀនអំពីក្រឹត្យវិន័យខ្ពស់ជាងផងដែរ ។
ម៉ាថាយ ៥:១-១២
ព្រះអង្គសង្គ្រោះចាប់ផ្ដើម ទេសនកថានៅលើភ្នំ ដោយបង្រៀនអំពីបទប្រទានពរទាំងឡាយ
តើអ្នកនឹងឆ្លើយសំណួរខាងក្រោមនេះ យ៉ាងដូចម្ដេច ៖ តើអ្នកសប្បាយចិត្តដែរឬទេ ? ហេតុអ្វីសប្បាយ ឬ ហេតុអ្វីមិនសប្បាយ ?
សូមគូសចំណាំអ្វីដែល ប្រធាន ឌៀថើរ អេស្វ អុជដូហ្វ ក្នុងគណៈប្រធានទីមួយ បានមានប្រសាសន៍អំពីសុភមង្គល ៖
រូបភាពប្រធាន ឌៀថើរ អេស្វ អុជដូហ្វ« ជាញឹកញាប់ណាស់ ដែលយើងត្រូវធ្លាក់ក្នុងការបំភាន់ថា មានអ្វីមួយដែលយើងពុំអាចចាប់យកបាន ជាអ្វីមួយដែលនឹងនាំយើងឲ្យមានសុភមង្គលនោះគឺ ៖ ស្ថានភាពគ្រួសារដ៏ល្អជាងនេះ ស្ថានភាពហិរញ្ញវត្ថុដ៏ប្រសើរជាងនេះ ឬ ទីបញ្ចប់នៃឧបសគ្គ ។
« … ស្ថានភាពដ៏នៅអស់កល្បជានិច្ចពុំសំខាន់ ឬ កំណត់សុភមង្គលរបស់យើងឡើយ ។
« យើង ពិតជាសំខាន់ ។ យើង កំណត់សុភមង្គលយើង » (« Of Regrets and Resolutions » Ensign ឬ Liahona ខែ វិច្ឆិកា ឆ្នាំ ២០១២ ទំព័រ ២៣ ) ។
នៅពេលអ្នកសិក្សា ម៉ាថាយ ៥ សូមស្វែងរកគោលការណ៍ទាំងឡាយ ដែលអាចជួយអ្នកយល់អំពីអ្វីដែលនឹងនាំឲ្យមានសុភមង្គលដ៏ពិត ។
សូមអានត្រួសៗនៅ ម៉ាថាយ ៥:៣–១១ ដោយស្វែងរកពាក្យដដែលៗ ដែលមានប្រើនៅដើមនៃខគម្ពីរនីមួយៗ ។ ( អ្នកអាចនឹងចង់គូសចំណាំ និយមន័យនៃពាក្យ មានពរហើយ ដែលមានប្រើនៅក្នុង ម៉ាថាយ ៥:៣ លេខយោង a ) ។
ដោយសារពាក្យ មានពរ បកប្រែមកពីពាក្យឡាតាំង beatus ដែលមានន័យថា មានសំណាង ឬ រីករាយ នោះខគម្ពីរទាំងនេះត្រូវបានហៅជាទូទៅថាបទប្រទានពរទាំងឡាយ ។
អំឡុងពេលទ្រង់យាងទៅជួបពួកសាសន៍នីហ្វៃ ព្រះយេស៊ូវគ្រីស្ទបានប្រទានទេសនកថាមួយ ដែលស្រដៀងទៅនឹងទេសនកថានៅលើភ្នំនៅក្នុង ម៉ាថាយ ៥ ដែរ ។ មុនពេលទ្រង់ចាប់ផ្ដើមទេសនាទៅកាន់ពួកសាសន៍នីហ្វៃ ព្រះអង្គសង្គ្រោះបានពន្យល់ថា របៀបដើម្បីមកឯទ្រង់ គឺតាមរយៈពិធីបុណ្យជ្រមុជទឹក និង ការទទួលព្រះវិញ្ញាណបរិសុទ្ធ ( សូមមើល នីហ្វៃទី៣ ១២:១–២ ) ។ បទប្រទានពរទាំងឡាយដែលមាននៅក្នុង ម៉ាថាយ ៥:១–១២ និង នីហ្វៃទី៣ ១២:១–១២ ផ្ដល់មាគ៌ាមួយឲ្យយើងដឹងអំពីរបៀប ដើម្បីមកឯទ្រង់ ។
សូមអាន នីហ្វៃទី៣ ១២:៣–៦ ដោយស្វែងរករបៀបដែលសារលិខិតរបស់ព្រះអម្ចាស់នៅក្នុងខគម្ពីរទាំងនេះ ផ្ដល់នូវការយល់ដឹងកាន់តែខ្ពស់ចំពោះវគ្គបទគម្ពីរនៅក្នុង ម៉ាថាយ ៥:៣–៦ ។
-
សូមជ្រើសរើសបទប្រទានពរមួយនៅក្នុង ម៉ាថាយ ៥:៣–១២ ។ នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក សូមសរសេរសុន្ទរកថាខ្លីមួយអំពីបទប្រទានពរនោះ ។ ( អ្នកអាចនឹងចង់រួមបញ្ចូលការយល់ដឹងចេញពី នីហ្វៃទី៣ ១២ ) ។ សូមដាក់បញ្ចូលព័ត៌មានខាងក្រោមនេះ ជាផ្នែកនៃសុន្ទរកថារបស់អ្នក ៖
-
ស្វែងរកពរជ័យដែលយើងត្រូវបានសន្យា នៅពេលយើងរស់នៅតាមបទប្រទានពរនោះ ។
-
ណែនាំអំពីវិធីជាក់លាក់ទាំងឡាយ ដែលយើងអាចរស់នៅឲ្យស្របនឹងបទប្រទានពរនេះ ។
-
ពន្យល់អំពីរបៀបដែលការរស់នៅស្របតាមបទប្រទានពរនេះ អាចនាំសុភមង្គលដល់យើង ។ អ្នកក៏អាចនឹងចង់ចែកចាយបទពិសោធន៍មួយ ដែលបង្ហាញអំពីរបៀបដែលបទប្រទានពរនោះ បាននាំសុភមង្គលដល់យើង ។
-
អ្នកអាចនឹងកត់ចំណាំថា បទប្រទានពរនីមួយៗ បង្រៀនអំពីលក្ខណៈរបស់ព្រះយេស៊ូវគ្រីស្ទ ។ ដោយការរស់នៅតាមការបង្រៀនទាំងនេះ យើងអាចប្រែក្លាយកាន់តែដូចជាទ្រង់ ។ ចេញពី ម៉ាថាយ ៥ យើងរៀនថា នៅពេលយើងអភិវឌ្ឍលក្ខណៈដូចជាព្រះគ្រីស្ទ នោះយើងរកឃើញសុភមង្គលកាន់តែច្រើនឡើង ។
សូមជ្រើសរើសលក្ខណៈមួយចេញពីបទប្រទានពរទាំងឡាយ រួចដាក់គោលដៅមួយ ដែលនឹងជួយអ្នកឲ្យអភិវឌ្ឍលក្ខណៈនោះ ។
ម៉ាថាយ ៥:១៣–១៦
ព្រះយេស៊ូវគ្រីស្ទណែនាំ ពួកសិស្សរបស់ទ្រង់ឲ្យធ្វើគំរូសុចរិត
សូមគិតអំពីមនុស្សម្នាក់ដែលអ្នកស្គាល់ ដូចជាសមាជិកគ្រួសារ ឬ មិត្តភក្ដិម្នាក់ ដែលអាចទទួលពរដោយការខិតទៅជិតព្រះវរបិតាសួគ៌ ។ នៅពេលអ្នកបន្តសិក្សា ម៉ាថាយ ៥ សូមស្វែងរកគោលការណ៍នានា ដែលអាចដឹកនាំអ្នក នៅពេលអ្នកព្យាយាមជួយបុគ្គលរូបនេះ ។
សូមបង្កើតបញ្ជីអំពីសារៈប្រយោជន៍របស់អំបិល ដែលអ្នកអាចគិតឃើញ ៖
សូមបញ្ជូលទៅក្នុងបញ្ជីរបស់អ្នក បន្ទាប់ពីអាននូវអ្វីដែលអែលឌើរ ខាឡូស អ៊ី អេសេ នៃពួកចិតសិបនាក់ បានមានប្រសាសន៍អំពីអំបិល ៖
រូបភាពអែលឌើរ ខាឡូស អ៊ី អេសេ« [ អំបិល ] មានសារៈប្រយោជន៍ចំពោះសុខភាព កោសិការាងកាយត្រូវការអំបិលដើម្បីរស់រាន និង ដំណើរការ ។ វាមានសារធាតុសម្អាត ឬ សម្លាប់មេរោគ ។ វាគឺជាអ្នកការពាររាងកាយ ។ វាគឺជាគ្រឿងផ្សំមួយបែប ដាក់នៅក្នុងអាហារ និង ផលិតផលនានា ។ ហើយវាត្រូវបានឲ្យតម្លៃថា អំបិលមានសារៈប្រយោជន៍ជាងមួយម៉ឺនបួនពាន់ប្រភេទ ។ …
« … « [ អំបិលដែល ] មានជាតិប្រៃ … គឺស្អាត សុទ្ធ គ្មានសារជាតិពុល ហើយមានប្រយោជន៍ ។ នៅក្នុងស្ថានភាព ឬ លក្ខខណ្ឌនេះ អំបិលនឹងការពារ ផ្ដល់រសជាតិ ព្យាបាល ហើយធ្វើមុខងារដ៏មានប្រយោជន៍ផ្សេងទៀត » (« Salt of the Earth: Savor of Men and Saviors of Men » Ensign ខែ ឧសភា ឆ្នាំ ១៩៨០ ទំព័រ ៤២ ) ។
សូមអាន ម៉ាថាយ ៥:១៣ ដោយស្វែងរកថាតើនរណា ដែលព្រះអង្គសង្គ្រោះបានប្រៀបធៀបទៅជាអំបិល ។
សូមគិតអំពីរបៀបដែលពួកសិស្សរបស់ព្រះយេស៊ូវគ្រីស្ទ អាចបង្ហាញលក្ខណៈសម្បត្តិដូចគ្នានឹងអំបិលល្អ ។
យោងតាម ខទី ១៣ តើមានអ្វីកើតឡើង កាលអំបិលអស់ជាតិប្រៃ ?
ពាក្យ ជាតិប្រៃ ពុំមែនសំដៅតែរសជាតិរបស់អំបិលប៉ុណ្ណោះទេ ប៉ុន្តែក៏សំដៅទៅលើគុណសម្បត្តិដាច់ដោយឡែក ដែលធ្វើឲ្យវាក្លាយទៅជាភ្នាក់ងារព្យាបាល និង ការពារដែរ ។
តើអ្នកគិតថា អ្វីដែលបណ្ដាលឲ្យអំបិលត្រូវបាត់បង់រសជាតិប្រៃរបស់វា ?
អំបិលបាត់បង់ជាតិប្រៃរបស់វា នៅពេលវាលាយនឹងសារធាតុផ្សេងទៀត ( ដូចជាដីជាដើម ) ហើយទៅជាកខ្វក់ ។
ប្រសិនបើអំបិលតំណាងឲ្យពួកសិស្សរបស់ព្រះយេស៊ូវគ្រីស្ទ តើដី ឬ សារធាតុពុលផ្សេងទៀត តំណាងឲ្យអ្វី ?
យើងរៀនចេញពីការបង្រៀនរបស់ព្រះអង្គសង្គ្រោះថា ការមានភាពកខ្វក់ដោយអំពើបាបនៃលោកិយ អាចរារាំងយើងពីការធ្វើជាពរជ័យមួយសម្រាប់មនុស្សដទៃទៀត ។ អ្នកអាចនឹងចង់សរសេរគោលការណ៍នេះ នៅលើគែមព្រះគម្ពីររបស់អ្នកក្បែរ ម៉ាថាយ ៥:១៣ ។
រូបភាពអែលឌើរ ខាឡូស អ៊ី អេសេអែលឌើរ អេសេ ក៏បានផ្ដល់ដំបូន្មានដើម្បីជួយយើង ឲ្យចៀងវាងពីការមានភាពកខ្វក់ដោយអំពើបាបនៃលោកិយដែរ ៖ « ខ្ញុំសូមផ្ដល់សេចក្ដីណែនាំសាមញ្ញៗទាំងនេះ … ទុកជាមធ្យោបាយដើម្បីការពាររសជាតិប្រៃរបស់បុគ្គលម្នាក់ ៖ ប្រសិនបើវាពុំ ស្អាត ទេនោះ ចូរកុំគិតអំពីវា, ប្រសិនបើវាពុំ ពិត ទេនោះ ចូរកុំនិយាយអំពីវា, ប្រសិនបើវាពុំ ល្អ ទេនោះ ចូរកុំប្រព្រឹត្តវា » (« Salt of the Earth » ទំព័រ ៤២–៤៣ ) ។
សូមពិចារណាអំពីអ្វីដែលអ្នកអាចធ្វើនៅថ្ងៃនេះ ដើម្បីចៀសវាងពីការមានភាពកខ្វក់ដោយអំពើបាបនៃលោកិយ ។ សូមចងចាំថា តាមរយៈសេចក្ដីជំនឿទៅលើព្រះយេស៊ូវគ្រីស្ទ និង ការប្រែចិត្ត នោះអ្នកអាចក្លាយជាបរិសុទ្ធ ចេញពីអំពើបាបទាំងឡាយ ដែលអ្នកអាចបានប្រព្រឹត្ត ។
សូមអាន ម៉ាថាយ ៥:១៤–១៦ រួចកត់ចំណាំអំពីរបៀប ដែលព្រះអង្គសង្គ្រោះបានប្រៀបធៀបពួកសិស្សរបស់ទ្រង់ទៅនឹងចង្កៀង ។ ( ម៉ាថាយ ៥:១៤–១៦ គឺជាវគ្គចំណេះចំណានខគម្ពីរ ។ អ្នកអាចនឹងចង់គូសចំណាំវានៅក្នុងរបៀបមួយ ដែលជួយអ្នកអាចងាយរកវាឃើញនៅពេលខាងមុខ ) ។
រូបភាពscripture mastery icon ចំណេះចំណានខគម្ពីរ—ម៉ាថាយ ៥:១៤–១៦
-
នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក សូមគូររូបចង្កៀងធម្មតាមួយ រួចឆ្លើយសំណួរខាងក្រោមនេះ ៖
-
តើឃ្លាដែលចែងថា ចូរឲ្យពន្លឺរបស់អ្នករាល់គ្នាបានភ្លឺ មានន័យដូចម្ដេច ?
-
តើអ្នកគិតថា ហេតុអ្វីបានជាវាមានសារៈសំខាន់ ដែលត្រូវធ្វើតាមព្រះបញ្ញត្តិរបស់ព្រះអម្ចាស់នៅក្នុង ម៉ាថាយ ៥:១៤–១៦ ដើម្បីធ្វើគំរូសុចរិត ?
-
ស្របតាមខគម្ពីរទាំងនេះ យើងរៀនថា គំរូសុចរិតរបស់យើង អាចជួយលើកទឹកចិត្តមនុស្សដទៃ ឲ្យខិតកាន់តែជិតព្រះវរបិតាសួគ៌ ។ សូមពិចារណាអំពីការសរសេរគោលការណ៍នេះ នៅក្នុងព្រះគម្ពីររបស់អ្នក ។
-
សូមឆ្លើយសំណួរដូចខាងក្រោម ដាក់នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖ តើនៅពេលណា ដែលមានមនុស្សម្នាក់ធ្លាប់ធ្វើគំរូសុចរិតមួយ ដែលបានជួយអ្នកឲ្យខិតទៅជិតនឹងព្រះវរបិតាសួគ៌ ?
សូមសញ្ជឹងគិតអំពីអ្វី ដែលអ្នកអាចធ្វើ ដើម្បីធ្វើជាគំរូមួយដ៏ល្អដល់គ្រួសារ និង មិត្តភក្ដិរបស់អ្នក ។
ម៉ាថាយ ៥:១៧-៤៨
ព្រះយេស៊ូវគ្រីស្ទ បង្រៀនពួកសិស្សរបស់ទ្រង់អំពីរបៀប ក្លាយទៅជាល្អគ្រប់លក្ខណ៍ដូចជាព្រះវរបិតាសួគ៌
ម៉ាថាយ ៥:១៧–២០ កត់ត្រាថា ព្រះយេស៊ូវគ្រីស្ទបានបង្រៀនថា ទ្រង់ពុំបានយាងមកដើម្បីបំផ្លាញ ឬ លើកចោលសេចក្ដីពិតដ៏អស់កល្បនៅក្នុងក្រឹត្យវិន័យលោកម៉ូសេឡើយ ។ ផ្ទុយទៅវិញ ទ្រង់បានយាងមកដើម្បីស្ដារភាពពេញលេញនៃដំណឹងល្អ ដែលបានបាត់បង់ដោយសារតែភាពទុច្ចរិត និង ការក្បត់សាសនា ដើម្បីកែតម្រូវការបង្រៀនដ៏ខុសឆ្គង និង ដើម្បីបំពេញតាមការព្យាករណ៍ទាំងឡាយដែលត្រូវបានធ្វើឡើងដោយពួកព្យាការីក្នុងព្រះគម្ពីរសញ្ញាចាស់ ។
នៅក្នុង ម៉ាថាយ ៥:២១–៤៨ ព្រះអង្គសង្គ្រោះបានមានព្រះបន្ទូលអំពី ក្រឹត្យវិន័យ និង ទំនៀមទម្លាប់ជាច្រើន ដែលពួកសាសន៍យូដា បានកែប្រែ និង ដាក់បញ្ចូលបន្ថែមទៅក្នុងក្រឹត្យវិន័យលោកម៉ូសេ ។ នៅពេលទ្រង់ពន្យល់អំពីអត្ថន័យដ៏ពិតនៃក្រឹត្យវិន័យទាំងឡាយ ទ្រង់បានបង្រៀនអំពីរបៀបរស់នៅកាន់តែប្រសើរ ។ សមាជិកក្នុងនគរព្រះ ត្រូវតែរស់នៅតាមក្រឹត្យវិន័យខ្ពស់ជាងនេះ ។ ដើម្បីជួយអ្នកស្វែងរកអ្វី ដែលព្រះយេស៊ូវគ្រីស្ទបានបង្រៀនពួកសិស្សរបស់ទ្រង់អំពីក្រឹត្យវិន័យខ្ពស់ជាង សូមធ្វើលំហាត់ផ្គូផ្គងខាងក្រោមនេះ ៖
រស់នៅតាមតែអ្វីដែលក្រឹត្យវិន័យបានប្រាប់ |
របៀបដែលពួកសិស្សរបស់ព្រះយេស៊ូវគ្រីស្ទគួរតែរស់នៅ |
---|---|
|
|
-
សូមរំឭកសេចក្ដីពិតទាំងឡាយ ដែលអ្នកបានរៀននៅក្នុងមេរៀននេះ ។ នៅលើបន្ទាត់ផ្សេងៗគ្នាក្នុងសៀវភៅកំណត់ហេតុការសិក្សាព្រះគម្ពីររបស់អ្នក សូមសរសេរពាក្យ ចាប់ផ្ដើម ឈប់ និង បន្ត ។ សូមវាយតម្លៃលើជីវិតរបស់អ្នក រួចជ្រើសយកកិច្ចការមួយដែលអ្នកអាចចាប់ផ្ដើមធ្វើ កិច្ចការមួយដែលអ្នកអាចឈប់ធ្វើវា និងកិច្ចការមួយដែលអ្នកអាចបន្តធ្វើ ដើម្បីអនុវត្តអ្វីដែលអ្នកបានរៀននៅក្នុងមេរៀននេះ នៅក្នុងជីវិតរបស់អ្នក ។ នៅក្បែរពាក្យដែលត្រឹមត្រូវ នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក សូមសរសេរអ្វីដែលអ្នកបានជ្រើសដើម្បីចាប់ផ្ដើមធ្វើ និង អ្វីដែលអ្នកបានជ្រើសដើម្បីបន្តធ្វើ ។ សូមគូសសញ្ញាកែងនៅក្បែរពាក្យ ឈប់ ដើម្បីបង្ហាញថា អ្នកបានជ្រើសយកអ្វីមួយដែលអ្នកអាចឈប់ធ្វើ ។
-
សូមសរសេរអ្វីដែលនៅខាងក្រោមនេះ ពីខាងក្រោមកិច្ចការថ្ងៃនេះ នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖
ខ្ញុំបានសិក្សា ម៉ាថាយ ៥ ហើយបានបញ្ចប់មេរៀននេះនៅ ( កាលបរិច្ឆេទ ) ។
សំណួរ គំនិត និង ការយល់ដឹងបន្ថែម ដែលខ្ញុំចង់ចែកចាយជាមួយគ្រូរបស់ខ្ញុំ ៖