មេរៀនទី ៦ ៖ ថ្ងៃទី ៣
ម៉ាថាយ ២៥
សេចក្ដីផ្ដើម
នៅពេលព្រះយេស៊ូវគ្រីស្ទបានបង្រៀនតែពួកសិស្សរបស់ទ្រង់នៅលើភ្នំដើមអូលីវអំពីការយាងមកជាលើកទីពីររបស់ទ្រង់ ទ្រង់បានបង្រៀនរឿងប្រៀបប្រដូចមួយអំពីស្ត្រីព្រហ្មចារីទាំងដប់នាក់ ។ ទ្រង់ក៏បានពន្យល់ផងដែរថា ទ្រង់នឹងញែកមនុស្សសុចរិតចេញពីមនុស្សទុច្ចរិត នៅពេលទ្រង់យាងមកម្ដងទៀត ។
ម៉ាថាយ ២៥:១-១៣
ព្រះយេស៊ូវគ្រីស្ទបង្រៀនរឿងប្រៀបប្រដូចមួយអំពីស្ត្រីព្រហ្មចារីទាំងដប់នាក់
សូមស្រមៃថាតើអ្នកអាចនឹងមានអារម្មណ៍យ៉ាងណា ប្រសិនបើអ្នកគឺជាយុវជននៅក្នុងរឿងខាងក្រោមដែលតំណាលដោយអែលឌើរ ជែហ្វ្រី អ័រ ហូឡិន ក្នុងកូរ៉ុមនៃពួកសាវកដប់ពីរនាក់ ដែលបានឮយុវជនម្នាក់នេះបានត្រឡប់មកពីបេសកកម្មវិញបានចែកចាយបទពិសោធន៍ផ្ទាល់ខ្លួននៅក្នុងការប្រជុំថ្លែងទីបន្ទាល់ ។
« គាត់ … បានប្រាប់អំពីពេលដែលគាត់ត្រឡប់មកផ្ទះវិញ បន្ទាប់ពីដើរលេងជាគូ ដែលមិនយូរប៉ុន្មានក្រោយពីគាត់ត្រូវបានតែងតាំងជាអែលឌើរនៅអាយុ ១៨ ឆ្នាំ ។ មានអ្វីមួយបានកើតឡើងនៅក្នុងការដើរលេងជាគូនេះ ដែលធ្វើឲ្យគាត់ពុំមានមោទភាពចំពោះខ្លួនគាត់នោះទេ ។ គាត់ពុំបានអធិប្បាយល្អិតល្អន់ ហើយគាត់ក៏មិនគួរនិយាយអ្វីៗបែបនោះនៅមុខមហាជនឡើយ ។ រហូតមកដល់ថ្ងៃនេះ ខ្ញុំមិនបានដឹងអំពីរឿងពិតនៃហេតុការណ៍ដែលបានកើតឡើងនោះទេ ប៉ុន្តែវាពិតជាសំខាន់ចំពោះគាត់ ដែលបានប៉ះទង្គិចដល់វិញ្ញាណរបស់គាត់ និង ការឲ្យតម្លៃលើខ្លួនឯង ។
« ខណៈដែលគាត់កំពុងអង្គុយនៅក្នុងឡានមួយសន្ទុះ លើផ្លូវទៅផ្ទះរបស់គាត់ ដោយគិតអំពីរឿងរ៉ាវនានា និង មានអារម្មណ៍សោកស្តាយយ៉ាងខ្លាំងចំពោះអ្វីដែលបានកើតឡើង នោះម្តាយរបស់គាត់ដែលមិនមែនសមាជិក បានរត់ចេញមកពីផ្ទះ ដោយតម្រង់ទៅកាន់ឡានរបស់គាត់ទាំងក្តីបារម្ភ ។ ភ្លាមនោះ ម្តាយរូបនេះ បាននិយាយប្រាប់ថា ប្អូនប្រុសរបស់យុវជនម្នាក់នេះ ដែលទើបតែបានដួលនៅក្នុងផ្ទះ បានប៉ះទង្គិចក្បាលយ៉ាងខ្លាំង ហើយបានប្រកាច់ និង កន្ត្រាក់ផងដែរ ។ ឪពុកដែលមិនមែនជាសមាជិកនោះ បានទូសព្ទហៅឡានសង្គ្រោះបន្ទាន់ ប៉ុន្តែវាបានចំណាយពេលច្រើនទម្រាំមកដល់ដើម្បីជួយសង្គ្រោះ ។
« ម្តាយរូបនោះបានស្រែកយំថា ‹ សូមមកនេះ ហើយធ្វើអ្វីមួយដើម្បីជួយ › ។ ‹ តើពុំមានអ្វីដែលកូនធ្វើនៅក្នុងព្រះវិហាររបស់កូននៅចំពេលបែបនេះទេឬ ? កូនមានបព្វជិតភាពរបស់ពួកគេ ។ សូមមកនេះ ហើយធ្វើអ្វីមួយដើម្បីជួយ › ។ …
« … នៅពេលយប់នេះ នៅពេលមនុស្សម្នាក់ដែលគាត់ស្រឡាញ់យ៉ាងខ្លាំងត្រូវការសេចក្តីជំនឿ និង កម្លាំងរបស់គាត់ នោះយុវជនរូបនេះពុំអាចឆ្លើយតបបានឡើយ ។ ដោយបានផ្តល់នូវអារម្មណ៍ដែលគាត់ទើបតែបានពុះពារ និង អារម្មណ៍រវើរវាយចំពោះអ្វីដែលគាត់ទើបតែបានប្រព្រឹត្ត—មិនថាអ្វីនោះទេ—គាត់មិនអាចឲ្យខ្លួនរបស់គាត់ ទៅចំពោះព្រះភក្ត្រព្រះអម្ចាស់ ហើយអំពាវនាវសូមពរជ័យដែលត្រូវការបានឡើយ » ( « The Confidence of Worthiness » Liahona ខែ មេសា ឆ្នាំ ២០១៤ ទំព័រ ៥៨–៥៩ ) ។
តើអ្នកនឹងគិតដូចម្ដេច ប្រសិនបើអ្នកជាយុវជននោះហើយស្ថិតនៅក្នុងស្ថានភាពនេះ ? ហេតុអ្វីបានជាវាសំខាន់ដែលត្រូវត្រៀមខ្លួនជានិច្ច ?
ម៉ាថាយ ២៥ គឺជាការបន្តបង្រៀនរបស់ព្រះអង្គសង្គ្រោះនៅលើភ្នំដើមអូលីវ ហើយការបង្រៀននោះរួមបញ្ចូលទាំងរឿងប្រៀបប្រដូចចំនួនបី ដែលបង្រៀនអំពីរបៀបត្រៀមខ្លួនជួបព្រះអម្ចាស់នៅពេលទ្រង់យាងមកម្ដងទៀត ។
កាលទ្រង់គង់នៅលើភ្នំដើមអូលីវ ព្រះយេស៊ូវគ្រីស្ទបានបង្រៀនពួកសិស្សទ្រង់អំពីការយាងមកជាលើកទីពីររបស់ទ្រង់ ( សូមមើល ម៉ាថាយ ២៤ ) ។ តាមរយៈរឿងប្រៀបប្រដូចអំពីស្ត្រីព្រហ្មចារីដប់នាក់ ព្រះយេស៊ូវបានបង្រៀនថា យើងត្រូវតែត្រៀមខ្លួនសម្រាប់ការយាងមកជាលើកទីពីររបស់ទ្រង់ ។
សូមអាន ម៉ាថាយ ២៥:១–៤ ដោយស្វែងរកកត្តាសំខាន់ៗនៅក្នុងរឿងប្រៀបប្រដូចនេះ ។ អ្នកអាចគូសចំណាំនូវអ្វីដែលអ្នករកឃើញ ។
យោងតាមទំនៀមទម្លាប់នៃអាពាហ៍ពិពាហ៍របស់សាសន៍យូដា កូនប្រុស ឬ « កូនកម្លោះ អមដំណើរដោយមិត្តជិតស្និទ្ធរបស់ខ្លួន ទៅផ្ទះកូនក្រមុំនៅពេលយប់ ។ បន្ទាប់ពីពិធីអាពាហ៍ពិពាហ៍បានបញ្ចប់ទៅ ពិធីទទួលភោជនាហារនឹងធ្វើឡើងនៅផ្ទះកូនប្រុស ។ ភ្ញៀវដែលមកចូលរួមត្រូវមានចង្កៀង ឬចន្លុះ » ដើម្បីបង្ហាញថាពួកគេជាផ្នែកមួយនៃពិធីជប់លៀងសម្រាប់អាពាហ៍ពិពាហ៍នេះ និងដើម្បីបន្ថែមពន្លឺ ព្រមទាំងភាពស្រស់បំព្រងដល់ឱកាសនោះ ( New Testament Student Manual [ Church Educational System manual ឆ្នាំ ២០១៤ ] ទំព័រ ៧៨ ) ។
សូមអានដំណើររឿងបញ្ចប់នៃរឿងប្រៀបប្រដូចនេះនៅក្នុង ម៉ាថាយ ២៥:៥–១៣ ដោយស្វែងរកអ្វីដែលស្ត្រីព្រហ្មចារីមានគំនិតទាំងប្រាំនាក់បានធ្វើ និង អ្វីដែលស្ត្រីព្រហ្មចារីល្ងង់ទាំងប្រាំនាក់បានធ្វើ ។
ជំនួសដោយការអាន ម៉ាថាយ ២៥:៥–១៣ អ្នកអាចទស្សនាវីដេអូ « They That Are Wise » ( កូដពេលវេលា ០:០០–៥:៤៦ ) ដែលបង្ហាញអំពីរឿងប្រៀបប្រដូចនៃស្ត្រីព្រហ្មចារីទាំងដប់នាក់ ។ វីដេអូនេះមាននៅលើគេហទំព័រ LDS.org ។ នៅពេលទស្សនាវីដេអូនេះ សូមរកមើលអ្វីដែលស្ត្រីព្រហ្មចារីមានគំនិតទាំងប្រាំនាក់បានធ្វើ និង អ្វីដែលស្ត្រីព្រហ្មចារីល្ងង់ទាំងប្រាំនាក់បានធ្វើ ។
សូមពិចារណាអំពីកត្តាសំខាន់ៗខាងក្រោមនៅក្នុងរឿងប្រៀបប្រដូចនេះ រួចសរសេរថាតើអ្នកគិតថាកត្តានីមួយៗទាំងនេះតំណាងឲ្យអ្វីខ្លះ ៖
កូនកម្លោះ
ស្ត្រីព្រហ្មចារីមានគំនិត
ស្ត្រីព្រហ្មចារីល្ងង់
ចង្កៀង
ប្រេង
ឃ្លា « តែដោយព្រោះប្ដីមក » ( ម៉ាថាយ ២៥:៥ ) និង « លុះដល់កណ្ដាលអធ្រាត្រ ស្រាប់តែឮសូរសំរែក » ( ម៉ាថាយ ២៥:៦ ) សំដៅទៅលើការយាងមកជាលើកទីពីររបស់ព្រះយេស៊ូវគ្រីស្ទ ។ សូមពិចារណាអំពីអ្វីដែលអ្នកអាចរៀន អំពីការយាងមកជាលើកទីពីរចេញពីឃ្លាទាំងនេះ ។ អ្នកអាចនឹងចង់សរសេរពាក្យ ព្រះយេស៊ូវគ្រីស្ទ នៅលើគែមព្រះគម្ពីរក្បែរ ខទី ៥–៦ ។
អែលឌើរ ដាល្លិន អេក អូក ក្នុងកូរ៉ុមនៃពួកសាវកដប់ពីរនាក់ បានបង្រៀនថាតើស្ត្រីព្រហ្មចារីទាំងដប់នាក់តំណាងឲ្យនរណា ៖ « ស្ត្រីព្រហ្មចារីទាំងដប់នាក់ តំណាងឲ្យសមាជិកនៃសាសនាចក្ររបស់ព្រះគ្រីស្ទ ដ្បិតសមាជិកទាំងអស់គ្នាត្រូវបានអញ្ជើញឲ្យទទួលភោជនាហារ ហើយសមាជិកទាំងអស់គ្នាបានដឹងហើយថា ត្រូវបានអនុញ្ញាតឲ្យចូលទៅ នៅពេលកូនកម្លោះបានមកដល់ ។ ប៉ុន្តែមានតែសមាជិកពាក់កណ្ដាលប៉ុណ្ណោះ ដែលត្រៀមខ្លួនជាស្រេច នៅពេលកូនកម្លោះបានមកដល់នោះ » ( «Preparation for the Second Coming» Ensign ឬ Liahona ខែ ឧសភា ឆ្នាំ ២០០៤ ទំព័រ ៨ ) ។
អ្នកអាចនឹងចង់សរសេរពាក្យ សមាជិកនៃសាសនាចក្រ នៅលើគែមព្រះគម្ពីរក្បែរ ម៉ាថាយ ២៥:១–២ ។
សូមរំឭក ម៉ាថាយ ២៥:៨–៩ ឡើងវិញ រួចពិចារណាអំពីមូលហេតុដែលស្ត្រីព្រហ្មចារីមានគំនិត ពុំចែកប្រេងរបស់ខ្លួនឲ្យទៅស្ត្រីព្រហ្មចារីល្ងង់ ។ ប្រធាន ស្ពែនស៊ើរ ដបុលយូ ឃឹមបឹល បានបង្រៀនថាតើប្រេងតំណាងឲ្យអ្វីទៅ និងហេតុអ្វីបានជាវាពុំអាចចែកបាន ៖
« ទង្វើបែបនេះពុំមែនជាអត្តទត្ថភាព ឬ ការមិនមានសណ្ដានចិត្តនោះទេ ។ ប្រេងដែលយើងត្រូវការដើម្បីស្វែងរកការដឹកនាំ និង បង្កើនចំណេះដឹង មិនអាចចែកចាយបានឡើយ ។ តើយើងអាចចែកចាយការគោរពប្រតិបត្តិចំពោះគោលការណ៍នៃដង្វាយមួយភាគក្នុងដប់ សេចក្ដីរម្ងាប់ទុក្ខដែលកើតចេញពីការរស់នៅដោយសុចរិតភាព ឬ ចែកចាយភាពរីកចម្រើននៃចំណេះដឹង បានយ៉ាងដូចម្ដេចទៅ ? តើបុគ្គលម្នាក់អាចចែកចាយសេចក្ដីជំនឿ ឬ ទីបន្ទាល់បានយ៉ាងដូចម្ដេចទៅ ? តើបុគ្គលម្នាក់អាចចែកចាយឥរិយាបថ ឬ បរិសុទ្ធភាព ឬ ចែកចាយបទពិសោធន៍ក្នុងបេសកកម្ម បានយ៉ាងដូចម្ដេចទៅ ? តើបុគ្គលម្នាក់អាចចែកចាយអាទិភាព ដើម្បីចូលក្នុងព្រះវិហារបរិសុទ្ធបានយ៉ាងដូចម្ដេចទៅ ? បុគ្គលម្នាក់ៗត្រូវតែមានប្រេងនោះផ្ទាល់ខ្លួន ។ …
« ក្នុងរឿងប្រដូចនោះ ប្រេងអាចរកទិញបាននៅឯផ្សារ ។ នៅក្នុងជីវិតយើង ប្រេងនៃការត្រៀមខ្លួនជាស្រេច ស្រក់មកមួយតំណក់ម្ដងៗតាមរយៈការរស់នៅដោយសុចរិត ។ … រាល់ទង្វើនៃការលះបង់ និង ការគោរពប្រតិបត្តិគឺជាតំណក់ប្រេងមួយតំណក់ដែលបានបន្ថែមទៅក្នុងចង្កៀងរបស់យើង » ( Faith Precedes the Miracle [ ឆ្នាំ ១៩៧២ ] ទំព័រ ២៥៥–៥៦ ) ។
-
សូមពិចារណាថាតើប្រេងតំណាងឲ្យអ្វី ។ សូមរាយបញ្ជីនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក អំពីទង្វើនៃការលះបង់ និង ការគោរពប្រតិបត្តិនានា ដែលអាចបញ្ចប់ប្រយោគខាងក្រោមនេះ ៖ ស្របតាមប្រធាន ស្ពែនស៊ើរ ដបុលយូ ឃឹមបឹល អ្វីមួយដែលប្រេងនៅក្នុងរឿងប្រៀបប្រដូចនេះអាចតំណាងឲ្យនោះគឺ …
ខាងក្រោមនេះគឺជាសេចក្ដីពិតមួយ ដែលយើងអាចរៀនចេញពីរឿងប្រៀបប្រដូច និង អនុសាសន៍របស់ប្រធាន ឃឹមបឹល ៖ យើងពុំអាចខ្ចីការត្រៀមខ្លួនខាងវិញ្ញាណពីអ្នកដទៃបានឡើយ ។ ភាពរួចរាល់ខាងវិញ្ញាណរួមមាន ទីបន្ទាល់ ការប្រែចិត្តជឿ សេចក្តីជំនឿ និង អំណោយផ្សេងៗទៀតដែលកើតមានដោយផ្ទាល់ខ្លួនតាមរយៈព្រះវិញ្ញាណបរិសុទ្ធ ។
អែលឌើរ ដាវីឌ អេ បែដណា ក្នុងកូរ៉ុមនៃពួកសាវកដប់ពីរនាក់ បានពន្យល់ ៖
« ឥឡូវខ្ញុំចង់ប្រើការបកស្រាយមួយដែលអាចកើតមានក្នុងរឿងប្រៀបប្រដូចអំពីស្ត្រីព្រហ្មចារីទាំងដប់នាក់ ដើម្បីបញ្ជាក់អំពីទំនាក់ទំនងរវាងទីបន្ទាល់ និង ការប្រែចិត្តជឿ ។ ស្ត្រីព្រហ្មចារីដប់នាក់មានប្រាំនាក់មានគំនិត និង ប្រាំនាក់ល្ងង់ បានយកចង្កៀងរបស់គេ ហើយបានទៅជួបកូនកំលោះ ។ សូមគិតអំពីចង្កៀង ដែលពួកស្ត្រីព្រហ្មចារីប្រើថាជាចង្កៀងនៃទីបន្ទាល់ ។ ស្ត្រីព្រហ្មចារីល្ងង់បានយកចង្កៀងនៃទីបន្ទាល់របស់គេ តែពុំបានយកប្រេងទៅជាមួយទេ ។ សូមគិតអំពីប្រេងថាជាប្រេងនៃការប្រែចិត្តជឿ ។ …
« តើស្ត្រីព្រហ្មចារីមានគំនិតទាំងប្រាំនាក់មានចិត្តកំណាញ់ និងមិនចង់ចែកចាយ ឬក៏ពួកគេកំពុងបង្ហាញយ៉ាងត្រឹមត្រូវថា បេ្រងនៃការប្រែចិត្តជឿមិនអាចខ្ចីបាននោះទេ ? តើកម្លាំងខាងវិញ្ញាណដែលជាលទ្ធផលនៃការគោរពតាមព្រះបញ្ញត្តិដោយខ្ជាប់ខ្ជួនអាចត្រូវបានប្រគល់ដល់មនុស្សផ្សេងទៀតបានដែរឬទេ ? តើចំណេះដឹងដែលទទួលបានតាមរយៈការសិក្សា និងការសញ្ជឹងគិតដោយឧស្សាហ៍លើព្រះគម្ពីរនោះអាចត្រូវបានចែករំលែកដល់អ្នកដែលខ្វះខាតឬ ? តើសេចក្ដីសុខសាន្ដនៃដំណឹងល្អដែលនាំមកដល់ពួកបរិសុទ្ធថ្ងៃចុងក្រោយដ៏ស្មោះត្រង់ អាចត្រូវបានផ្ទេរទៅឲ្យបុគ្គលម្នាក់ដែលបានជួបនឹងឧបសគ្គ ឬការលំបាកដ៏ខ្លាំងបានដែរឬទេ ? ចម្លើយដ៏ច្បាស់អំពីសំណួរទាំងនេះនីមួយៗគឺ ទេ ។
« ដូចស្ត្រីព្រហ្មចារីមានគំនិតបានបញ្ជាក់យ៉ាងត្រឹមត្រូវដែរថា យើងម្នាក់ៗត្រូវតែ ‹ ទិញសម្រាប់ខ្លួនយើង › ។ ស្ដ្រីដ៏បំផុសគំនិតទាំងនេះ មិនបានរៀបរាប់អំពីការដោះដូរជំនួញនោះទេ ប៉ុន្ដែពួកគេបានបញ្ជាក់អំពីការទទួលខុសត្រូវផ្ទាល់ខ្លួនរបស់យើងក្នុងការរក្សាចង្កៀងនៃទីបន្ទាល់របស់យើងឲ្យនៅឆេះ និងទទួលបានការផ្គត់ផ្គង់ដ៏ច្រើននៃប្រេងនៃការប្រែចិត្តជឿ ។ ប្រេងដ៏មានតម្លៃនេះត្រូវការមួយតំណក់ម្ដងៗ — ‹ មួយបន្ទាត់ម្ដងៗ [ ហើយ ] មួយសិក្ខាបទម្ដងៗ › ( នីហ្វៃទី ២ ២៨:៣០ ) ប្រកបដោយការអត់ធ្មត់ និងខ្ជាប់ខ្ជួន ។ គ្មានផ្លូវកាត់ទេ គ្មានការត្រៀមខ្លួនភ្លាមៗនោះទេ ។
« ‹ ហេតុដូច្នោះហើយ ចូរមានចិត្តស្មោះត្រង់ដោយអធិស្ឋានជានិច្ច ដោយមានចង្កៀងបង្កាត់ ហើយឆេះ ហើយមានប្រេងនៅជាមួយអ្នកផង ដើម្បីឲ្យអ្នកអាចប្រុងប្រៀបជាស្រេចក្នុងកាលការយាងមកនៃប្ដីថ្មោងថ្មី › ( គ. និង ស. ៣៣:១៧ ) » ( « Converted unto the Lord » Ensign ឬ Liahona ខែ វិច្ឆិកា ឆ្នាំ២០១២ ទំព័រ ១០៩ ) ។
ខាងក្រោមនេះគឺជាសេចក្ដីពិតមួយទៀត ដែលយើងអាចរៀនចេញពីរឿងប្រៀបប្រដូចនេះ ៖ យើងត្រៀមខ្លួនសម្រាប់ការយាងមកជាលើកទីពីរដោយការពង្រឹងទីបន្ទាល់ និង ការប្រែចិត្តជឿរបស់យើងតាមរយៈសេចក្ដីសុចរិតប្រចាំថ្ងៃ ។
-
សូមគូររូបចង្កៀងប្រេងដ៏ធំមួយ ដាក់នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ។ សូមចងចាំក្នុងគំនិតរបស់អ្នកថា ប្រេងនៅក្នុងរឿងប្រៀបប្រដូចនេះតំណាងឲ្យការត្រៀមខ្លួនសម្រាប់ការយាងមកជាលើកទីពីររបស់ព្រះយេស៊ូវគ្រីស្ទ សូមរាយបញ្ជីនៅក្នុងរូបចង្កៀងនៃរបៀបដែលអ្នកអាចបន្ថែម « ប្រេង » ទៅក្នុង « ចង្កៀង » របស់អ្នក ។ ប្រសិនបើអាចធ្វើទៅបាន សូមចែកចាយគំនិតរបស់អ្នកជាមួយសមាជិកគ្រួសារ ឬ មិត្តភក្ដិ រួចសួរថាតើពួកគេនឹងផ្ដល់យោបល់អ្វីខ្លះដើម្បីដាក់បញ្ចូលទៅក្នុងបញ្ជីរបស់អ្នក ។
ដើម្បីយល់អំពីរបៀបផ្សេងទៀតដែលអ្នកអាចប្រមូលប្រេងមួយដំណក់ម្ដងៗតាមរយៈការរស់នៅដោយសុចរិត អ្នកអាចទស្សនាវគ្គបញ្ចប់នៃវីដេអូ « They That Are Wise » ( កូដពេលវេលា ៥:៤៦–៨:៤៤ ) ។ នៅពេលអ្នកទស្សនាវីដេអូនេះ សូមសរសេរបញ្ចូលទៅក្នុងបញ្ជីយោបល់នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ។
នៅក្នុងវិវរណៈសម័យទំនើប ព្រះអម្ចាស់បានបញ្ជាក់ថា « នៅថ្ងៃនោះ [ ការយាងមកជាលើកទីពីរ ] ក្នុងកាលដែលយើងនឹងយាងមក ដោយនូវសិរីល្អរបស់យើង នោះពាក្យប្រៀបប្រដូចនឹងត្រូវបានសម្រេច ដែលយើងបានមានបន្ទូលពីស្រីព្រហ្មចារីដប់នាក់ » ( គ. និង ស. ៤៥:៥៦ ) ។
សូមអាន ម៉ាថាយ ២៥:១០–១២ ដោយស្វែងរកអ្វីដែលកូនកម្លោះបានថ្លែងទៅកាន់ស្ត្រីព្រហ្មចារីល្ងង់ ។ វាអាចនឹងមានប្រយោជន៍ដែលត្រូវដឹងថា ការបកប្រែដោយ យ៉ូសែប ស៊្មីធ បញ្ជាក់យ៉ាងច្បាស់ថាកូនកំលោះបានថ្លែងថា « ខ្ញុំមិនស្គាល់នាងទេ » ( ការបកប្រែដោយ យ៉ូសែប ស្ម៊ីធ ម៉ាថាយ ២៥:១១ [ នៅក្នុង ម៉ាថាយ ២៥:១២ លេខយោង ក ] ) ។
តើសេចក្ដីថ្លែងថា « ខ្ញុំមិនស្គាល់នាងទេ » ប្រាប់យើងអ្វីខ្លះអំពីស្ត្រីព្រហ្មចារីល្ងង់ ? តើ ការស្គាល់ ព្រះអម្ចាស់ ខុសពីការគ្រាន់តែ ដឹងអំពី ទ្រង់យ៉ាងដូចម្ដេច ? ( សូមមើល យ៉ូហាន ១៧:៣ ) ។
យើងរៀនចេញពីខគម្ពីរទាំងនេះថា ដើម្បីត្រៀមខ្លួនជាស្រេចសម្រាប់ការយាងមករបស់ព្រះអម្ចាស់ ហើយមានភាពសក្ដិសមឈរនៅក្នុងវត្តមានរបស់ទ្រង់ យើងត្រូវតែមកស្គាល់ទ្រង់ ។
-
សូមឆ្លើយសំណួរខាងក្រោមនេះ ដាក់នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖
-
តើអ្នកបានមកស្គាល់ព្រះអង្គសង្គ្រោះឲ្យច្បាស់ជាងមុនតាមរបៀបណា ?
-
តើការស្គាល់ព្រះអង្គសង្គ្រោះ មានឥទ្ធិពលលើការត្រៀមខ្លួនជាស្រេចខាងវិញ្ញាណសម្រាប់ការយាងមកជាលើកទីពីររបស់ទ្រង់យ៉ាងដូចម្ដេច ?
-
បន្តដំណើររឿងនៅដើមមេរៀន—អំពីយុវជនអ្នកកាន់បព្វជិតភាពដែលមិនបានត្រៀមខ្លួននៅក្នុងគ្រាចាំបាច់នោះ—អែលឌើរ ហូឡិន បានរៀបរាប់ថា យុវជននោះបានប្រញាប់ប្រញាល់ទៅផ្ទះរបស់បុរសចំណាស់ម្នាក់នៅក្នុងវួដរបស់ខ្លួនដែលរស់នៅក្បែរផ្ទះគាត់ ។ បុរសចំណាស់នោះបានប្រសិទ្ធពរឲ្យប្អូនប្រុសយុវជននោះ ដើម្បីធ្វើឲ្យស្ថានភាពគាត់មានភាពនឹងនររហូតដល់វេជ្ជបណ្ឌិតជំនួយបានមកដល់ ។ អែលឌើរ ហូឡិន បានបន្ដ ៖
« ក្រោយមក អ្នកត្រឡប់មកពីផ្សព្វផ្សាយសាសនាដែលខ្ញុំនិយាយដល់នោះ បានថ្លែងដូចនេះ ៖ ‹ គ្មាននរណាម្នាក់ដែលមិនធ្លាប់ប្រឈមមុខ ដូចអ្វីដែលខ្ញុំប្រឈមមុខនៅយប់នោះ ដែលនឹងដឹងអំពីក្តីអាម៉ាស់ដែលខ្ញុំបានមាន និង ក្តីសោកសៅដែលខ្ញុំទ្រាំទ្រចំពោះអារម្មណ៍ដែលគ្មានភាពសក្តិសមក្នុងការប្រើបព្វជិតភាពដែលខ្ញុំកាន់នោះទេ ។ នេះគឺជាអនុស្សាវរីយ៍ដែលកាន់តែឈឺចាប់សម្រាប់ខ្ញុំ ដោយសារវាគឺជាប្អូនប្រុសតូចរបស់ខ្ញុំផ្ទាល់ ដែលត្រូវការខ្ញុំ និង ឪពុកម្តាយជាទីស្រឡាញ់របស់ខ្ញុំដែលមិនមែនជាសមាជិកដែលមានការភ័យខ្លាចយ៉ាងខ្លាំងនោះ ហើយដែលមានការរំពឹងទុកខ្ពស់ពីរូបខ្ញុំ ។ គាត់បាននិយាយថា ‹ ប៉ុន្តែ កាលខ្ញុំឈរនៅចំពោះមុខអ្នកទាំងអស់គ្នាថ្ងៃនេះ នោះខ្ញុំអាចសន្យានឹងអ្នកចំពោះរឿងនេះ ។ ‹ ខ្ញុំមិនល្អឥតខ្ចោះនោះទេ ប៉ុន្តែចាប់តាំងពីយប់នោះមក ខ្ញុំមិនធ្លាប់ធ្វើអ្វីដែលឲ្យខ្លួនខ្ញុំចាកចេញពីការទៅចំពោះព្រះភ័ក្រ្តព្រះអម្ចាស់ ជាមួយទំនុកចិត្ត ហើយអធិស្ឋានទូលសុំជំនួយពីទ្រង់នៅពេលចាំបាច់ឡើយ ។ គាត់ទទួលស្គាល់ថា ‹ ភាពសក្តិសមផ្ទាល់ខ្លួន គឺជាសង្គ្រាមមួយនៅក្នុងពិភពលោកនេះ ដែលយើងរស់នៅ ប៉ុន្តែវាគឺជាសង្គ្រាមមួយដែលខ្ញុំមានជ័យជម្នះ ។ ខ្ញុំបានទទួលអារម្មណ៍ម្រាមដៃនៃការកាត់ទោសចង្អុលមកកាន់ខ្ញុំម្តងនៅក្នុងជីវិតខ្ញុំ ហើយប្រសិនបើខ្ញុំអាចធ្វើអ្វីបាននោះ ខ្ញុំគ្មានបំណងទទួលអារម្មណ៍បែបនេះម្តងទៀតឡើយ ។ គាត់បានបញ្ចប់ថា ‹ ហើយប្រាកដណាស់ ខ្ញុំអាចធ្វើ កិច្ចការទាំងនោះបាន គ្រប់យ៉ាង › » ( « The Confidence of Worthiness » ទំព័រ ៥៩ ) ។
សូមពិចារណាអំពីអ្វីដែលអ្នកត្រូវធ្វើ ដើម្បីត្រៀមខ្លួនខាងវិញ្ញាណសម្រាប់ការយាងមករបស់ព្រះអម្ចាស់ ។ អ្នកអាចគូសរង្វង់លើសកម្មភាពមួយ ឬ ពីរដែលអ្នកបានរាយក្នុងបញ្ជីនៅក្នុងរូបចង្កៀង រួចដាក់គោលដៅដើម្បីអនុវត្តទៅតាមរបៀបដែលនឹងបង្កើនការត្រៀមខ្លួនជាស្រេចខាងវិញ្ញាណរបស់អ្នក ។
ម៉ាថាយ ២៥:១៤-៤៦
ព្រះយេស៊ូវគ្រីស្ទបង្រៀនពួកសិស្សរបស់ទ្រង់នូវរឿងប្រៀបប្រដូចស្ដីពីប្រាក់ពាន់ និង ស្ដីពីចៀម និង ពពែ
ប្រសិនបើឪពុកម្ដាយរបស់អ្នកដើរចូលក្នុងបន្ទប់អ្នក ហើយផ្ដល់ប្រាក់មួយចំនួនធំ តើអ្នកនឹងធ្វើអ្វីជាមួយប្រាក់ទាំងនោះ ?
នៅពេលព្រះអង្គសង្គ្រោះបានបន្តបង្រៀនពួកសិស្សទ្រង់អំពីការយាងមកជាលើកទីពីរ ទ្រង់បានតំណាលរឿងប្រៀបប្រដូចអំពីប្រាក់ ។ នៅក្នុងរឿងប្រៀបប្រដូចនេះ មានបុរសម្នាក់ដែលហៀបនឹងចេញពីស្រុកទៅបានប្រគល់ប្រាក់ដល់បាវបម្រើទាំងបីនាក់ ៖ បាវបម្រើទីមួយប្រាំពាន់ បាវបម្រើទីពីរបានពីរពាន់ ឯបាវបម្រើទីបីបានមួយពាន់ ។ ( ប្រាក់ពាន់គឺជាចំនួនទឹកប្រាក់ ) ។
សូមអាន ម៉ាថាយ ២៥:១៦–១៨ ដោយស្វែងរកថាតើបាវបម្រើបានធ្វើអ្វីខ្លះជាមួយប្រាក់របស់ពួកគេ ។
នៅក្នុង ម៉ាថាយ ២៥:១៩–២៣ យើងរៀនថា នៅពេលចៅហ្វាយបានត្រឡប់មកវិញ គាត់បានឲ្យពួកបាវបម្រើរបស់គាត់រាយការណ៍ថាតើពួកគេបានធ្វើអ្វីខ្លះជាមួយប្រាក់របស់ពួកគេ ។ បាវបម្រើដែលមានប្រាក់ប្រាំពាន់ និង ពីរពាន់ បានប្រើប្រាក់នោះដើម្បីបានចំណេញទ្វេដងលើប្រាក់របស់ចៅហ្វាយខ្លួន ។ ប៉ុន្តែបាវបម្រើដែលមានប្រាក់មួយពាន់បានកប់ប្រាក់នោះចោល ហើយជាលទ្ធផលពុំបង្កើនប្រាក់ចំណេញឲ្យចៅហ្វាយខ្លួនឡើយ ។
សូមអាន ម៉ាថាយ ២៥:២៤-២៥ ដោយស្វែងរកមូលហេតុដែលបាវបម្រើនោះបានកប់ប្រាក់ចោល ។
នៅក្នុងរឿងប្រៀបប្រដូចនេះ ប្រាក់ពាន់អាចប្រដូចទៅនឹងអំណោយទាន ឬ សមត្ថភាពនានាដែលព្រះអម្ចាស់បានប្រទានឲ្យយើង ។ ការភ័យខ្លាចអាចរារាំងយើងមិនឲ្យប្រើអំណោយទាន និងសមត្ថភាពនានាដែលព្រះអម្ចាស់បានប្រទានឲ្យ ។
តើអ្នកគិតថាអ្វីនឹងកើតឡើង ប្រសិនបើយើងពុំអភិវឌ្ឍអំណោយទាន និង សមត្ថភាពនានារបស់យើងដោយសារតែមានការភ័យខ្លាចនោះ ?
សូមអាន ម៉ាថាយ ២៥:២៦–៣០ ដើម្បីស្វែងរកថាតើអ្វីបានកើតឡើងចំពោះបាវបម្រើដែលមិនបានប្រាក់ចំណេញនោះ ។
សេចក្ដីពិតដែលយើងអាចរៀនចេញពីរឿងប្រៀបប្រដូចនេះគឺថា ប្រសិនបើយើងមិនអភិវឌ្ឍ ហើយប្រើអំណោយទានខាងវិញ្ញាណរបស់យើងសម្រាប់សេចក្ដីល្អទេ នោះយើងនឹងបាត់បង់វា ។
សូមគិតអំពីរបៀបមួយចំនួន ដែលអ្នកអាចប្រើអំណោយទាន និងសមត្ថភាពនានារបស់អ្នក ដើម្បីពន្លឿនកិច្ចការរបស់ព្រះអម្ចាស់ ។ ទេពកោសល្យមួយដែលអ្នកអាចប្រើគឺ ទីបន្ទាល់របស់អ្នក ( សូមមើល គ. និង ស. ៦០:២–៣ ) ។ សូមគិតដល់ការដាក់ផែនការមួយ ដើម្បីប្រើ ហើយអភិវឌ្ឍអំណោយទាន និង ទេពកោសល្យនានារបស់អ្នកដោយមានចិត្តស្មោះត្រង់ ។
នៅក្នុង ម៉ាថាយ ២៥:៣១–៤៦ យើងរៀនថា នៅពេលការយាងមកជាលើកទីពីររបស់ទ្រង់ ព្រះយេស៊ូវនឹងញែកពួកសុចរិតចេញពីពួកទុច្ចរិត ដូចគ្នាទៅនឹងរបៀបដែលអ្នកគង្វាលញែកចៀមចេញពីពពែដែរ ។ តើព្រះអម្ចាស់សម្គាល់រវាងជនដែលស្រឡាញ់ទ្រង់ ( កូនចៀម ) និងជនដែលមិនស្រឡាញ់ទ្រង់ ( សត្វពពែ ) បានយ៉ាងដូចម្ដេច ?
សូមអាន ម៉ាថាយ ២៥:៤០ ដោយស្វែងរកអ្វីដែលព្រះអង្គសង្គ្រោះបានបង្រៀន អំពីរបៀបដែលយើងបង្ហាញសេចក្ដីស្រឡាញ់ដល់ទ្រង់ ។
យើងរៀនចេញពីខគម្ពីរនេះថា នៅពេលយើងស្រឡាញ់ ហើយបម្រើមនុស្សដទៃ គឺយើងបង្ហាញសេចក្ដីស្រឡាញ់យើងចំពោះព្រះអម្ចាស់ ។
សូមពិចារណាអំពីរបៀបដែលអ្នកធ្លាប់ប្រព្រឹត្តចំពោះមនុស្សទូទៅ កាលពី ២៤ ម៉ោងមុន ។ សូមពិចារណាថាតើអ្នកនឹងជ្រើសធ្វើឲ្យខុសពីមុនឬទេ ប្រសិនបើអ្នកស្ថិតនៅក្នុងស្ថានភាពដដែលនេះនៅពេលអនាគត ។ អំឡុងពេល ២៤ ម៉ោងក្រោយ សូមស្វែងរកឱកាសដើម្បីធ្វើតាមការបំផុសគំនិតពីព្រះវិញ្ញាណបរិសុទ្ធ ហើយបម្រើមនុស្សទូទៅ ។
-
សូមសរសេរឃ្លាខាងក្រោមនេះ ពីខាងក្រោមកិច្ចការថ្ងៃនេះនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖
ខ្ញុំបានសិក្សា ម៉ាថាយ ២៥ ហើយបានបញ្ចប់មេរៀននេះនៅ ( កាលបរិច្ឆេទ ) ។
សំណួរ គំនិត និង ការយល់ដឹងបន្ថែមដែលខ្ញុំចង់ចែកចាយជាមួយគ្រូរបស់ខ្ញុំ ៖