មេរៀនទី ៣២ ៖ ថ្ងៃទី ១
វិវរណៈ ១២-១៣
សេចក្ដីផ្ដើម
វិវរណៈ ១២–១៤ មានការផ្អាកមួយនៅក្នុងលំហូរជាលំដាប់លំដោយនៃការនិមិត្តរបស់សាវកយ៉ូហាន ។ យ៉ូហានបានឃើញការនិមិត្តមួយអំពីនាគមួយក្បាលកំពុងគម្រាមកំហែងដល់ស្ត្រីម្នាក់ និងកូនរបស់នាង ។ លោកបានសរសេរអំពីសង្គ្រាមនៅស្ថានសួគ៌ និងអំពីនគរនៅក្នុងលោកិយដែលទាស់នឹងពួកអ្នកដើរតាមព្រះ ។
វិវរណៈ ១២
យ៉ូហានបានបង្ហាញឲ្យឃើញថា សាតាំង និងបរិវាររបស់វាតែងប្រឆាំងទាស់នឹងព្រះអម្ចាស់ និង សាសនាចក្រទ្រង់ជានិច្ច
សូមគូសបន្ទាត់ភ្ជាប់ការគម្រាមនីមួយៗនៅជួរឈរខាងឆ្វេងទៅនឹងរបៀបដើម្បីតស៊ូនឹងវាដែលមាននៅជួរឈរខាងស្ដាំ ។
|
ការគម្រាម |
របៀបតស៊ូនឹងការគំរាមកំហែង |
|---|---|
|
រលាកនឹងកម្ដៅថ្ងៃ |
ការប្រែចិត្ត និងការទុកចិត្តលើព្រះយេស៊ូវគ្រីស្ទ |
|
ពួកកងទ័ពសត្រូវ |
ថ្នាំពេទ្យ ឬការសម្រាក |
|
ជំងឺ |
ក្រែមការពារកម្ដៅថ្ងៃ ឬ សម្លៀកបំពាក់ |
|
អំពើបាប និងកំហុស |
សេចក្ដីពិតនៅក្នុង វិវរណៈ ១២ |
|
ឥទ្ធិពលរបស់សាតាំង |
គ្រឿងសព្វាវុធសង្គ្រាម |
តើមានការគំរាមកំហែងណាមួយដែលអ្នកបានតតាំងជាមួយនាពេលថ្មីៗនេះ ? តើអ្នកគិតថា ការគំរាមកំហែងមួយណាគ្រោះថ្នាក់បំផុត ? ហេតុអ្វី ?
នៅពេលអ្នកសិក្សា វិវរណៈ ១២ សូមរកមើលសេចក្ដីពិតដែលអាចជួយអ្នកឲ្យតតាំងនឹងឥទ្ធិពលរបស់សាតាំង ។ វិវរណៈ ១២–១៤ គឺជាការផ្អាកនៅក្នុងការពិពណ៌នានៃការនិមិត្តរបស់យ៉ូហានអំពីព្រឹត្តិការណ៍នៃត្រាទីប្រាំពីរ ។ ជាមួយនឹងការផ្អាកនេះ ព្រះអម្ចាស់ប្រហែលជាជួយយ៉ូហានឲ្យយល់ពីអត្ថន័យនៃឃ្លា « នគរទាំងប៉ុន្មាននៅលោកីយ៍ » និង « នគររបស់ព្រះអម្ចាស់ » នៅក្នុង ( វិវរណៈ ១១:១៥ ) ។ ការបកប្រែដោយយ៉ូសែប ស្ម៊ីធនៃវិវរណៈ ១២ ទាំងអស់ មាននៅក្នុងសេចក្ដីណែនាំដល់បទគម្ពីរទាំងឡាយ ។
សូមមើលរូបភាពខាងក្រោមនេះ ហើយពិចារណាថាតើវាជានិមិត្តសញ្ញាតំណាងឲ្យអ្វី ។
សូមអាន វិវរណៈ ១២:១-២, ៥ ដោយរកមើលអ្វីបានកើតឡើងចំពោះស្ត្រីនោះ ។ ( ការបកប្រែដោយយ៉ូសែប ស្ម៊ីធដាក់ ខទី ៥ ដោយផ្ទាល់បន្ទាប់ពី ខទី ២ ) ។
សូមកត់សម្គាល់ថា កូនរបស់ស្ត្រីនោះនឹង « ត្រូវឃ្វាលគ្រប់អស់ទាំងសាសន៍ដោយដំបងដែក » ? ( វិវរណៈ ១២:៥ ) ។
សូមអាន វិវរណៈ ១២:៣-៤ ដោយរកមើលអ្វីដែលបានគំរាមកំហែងដល់ស្ត្រីនោះ និង កូនរបស់នាង ។
តើអ្នកគិតថានិមិត្តសញ្ញាដែលបានពិពណ៌នានៅក្នុង ខទី ១-៤ អាចតំណាងឲ្យអ្វី ?
សូមអាន ការបកប្រែដោយយ៉ូសែប ស៊្មីធ វិវរណៈ ១២:៧-៨ ( នៅក្នុងសេចក្តីណែនាំដល់បទគម្ពីរទាំងឡាយ ) ដោយរកមើលអ្វីដែលតំណាងឲ្យសត្វនាគ ស្ត្រី និង កូន ។ អ្នកអាចសរសេរ ឬ កត់ចំណាំអត្ថន័យនៃនិមិត្តរូបនីមួយៗក្បែរ វិវរណៈ ១២:១–៥ ។
នាគតំណាងឲ្យសាតាំង ( សូមមើល ការបកប្រែដោយយ៉ូសែប ស្ម៊ីធ វិវរណៈ ១២:៨ ) ស្ត្រីតំណាងឲ្យ « សាសនាចក្រនៃព្រះ » ហើយកូនតំណាងឲ្យ « នគរនៃព្រះរបស់យើង និងព្រះគ្រីស្ទរបស់ទ្រង់ » ( ការបកប្រែដោយ យ៉ូសែប ស៊្មីធ វិវរណៈ ១២:៧ ) ។ នគរនេះរួមមានសមាជិកស្មោះត្រង់នៃសាសនាចក្ររបស់ព្រះអម្ចាស់ ។ ( សម្រាប់ការពន្យល់បន្ថែមអំពីនិមិត្តរូបនៅក្នុងវគ្គបទគម្ពីរនេះ សូមមើល New Testament Student Manual [ Church Educational System manual ឆ្នាំ ២០១៤ ] ទំព័រ ៥៥០–៥២ ) ។
យោងតាម វិវរណៈ ១២:៤ តើនាគនោះមានបំណងចង់ធ្វើអ្វី ?
ហេតុអ្វីអ្នកគិតថា សាតាំងខិតខំយ៉ាងខ្លាំងដើម្បីបំផ្លាញនគរព្រះ និងព្រះគ្រីស្ទ ?
សូមអាន វិវរណៈ ១២:៦ ដោយរកមើលថា ស្ត្រីនោះបានធ្វើអ្វីខ្លះ ដោយសារតែការគំរាមកំហែងរបស់នាគនោះ ។
ស្ត្រីបានរត់គេចខ្លួនចូលទៅក្នុងទីរហោស្ថានតំណាងឲ្យសាសនាចក្រចូលទៅក្នុងការក្បត់សាសនាដ៏ធំ និងបព្វជិតភាពត្រូវបានដកចេញពីផែនដីនេះបន្ទាប់ពីការស្លាប់របស់ព្រះយេស៊ូវគ្រីស្ទ និងពួកសាវករបស់ទ្រង់ ។
បន្ទាប់ពីយ៉ូហានបានឃើញនាគនោះគំរាមដល់ស្ត្រី និងកូននាង លោកបានឃើញព្រឹត្តិការណ៍មួយមកពីជីវិតមុនឆាកជីវិតនេះរបស់យើង—នៅពេលសាតាំង និង ពួកបរិវារវាបានវាយប្រឆាំងទាស់នឹងផែនការនៃសេចក្តីសង្គ្រោះ និងពួកបរិសុទ្ធរបស់ព្រះ ។
សូមអាន ការបកប្រែដោយយ៉ូសែប ស៊្មីធ វិវរណៈ ១២:៦-១១ ( នៅក្នុងសេចក្តីណែនាំដល់បទគម្ពីរទាំងឡាយ ) ដោយរកមើលអ្វីដែលបានកើតឡើងចំពោះសាតាំងទាំងអំឡុងពេលសង្គ្រាមនៅស្ថានសួគ៌ និង របៀបដែលពួកបរិសុទ្ធរបស់ព្រះបានយកឈ្នះលើសាតាំង និង ពួកបរិវារវា ។ អ្នកអាចគូសចំណាំ ឬ កត់ចំណាំអ្វីដែលអ្នករកឃើញ ។
វិវរណៈ ១២:៤ ចែងថា កន្ទុយនាគនោះ « ទាញផ្កាយនៅលើមេឃមួយភាគក្នុងបីគ្រវាត់ចោលទៅផែនដី » ។ នេះគឺជានិមិត្តរូបនៃចំនួនដ៏ច្រើននៃកូនវិញ្ញាណរបស់ព្រះវរបិតាសួគ៌ដែលជ្រើសដើរតាមសាតាំង ។ « មីកែល និងពួកទេវតារបស់លោក » [ វិវរណៈ ១២:៧ ] គឺលោកអ័ដាម និងកូនចៅវិញ្ញាណសុចរិតផ្សេងទៀតរបស់ព្រះ ។
យោងតាម វិវរណៈ ១២:១១ តើពួកពលបរិវារស្ថានសួគ៌ដ៏សុចរិត ( រួមទាំងអ្នក ) យកឈ្នះសាតាំងយ៉ាងដូចម្ដេច ?
យោងតាម វិវរណៈ ១២:៨–៩ តើសាតាំង និងពួកបរិវារវាត្រូវបានបញ្ជូនទៅណាបន្ទាប់ពីការបះបោររបស់វាមក ?
សូមអាន ការបកប្រែដោយយ៉ូសែប ស្ម៊ីធ វិវរណៈ ១២:១២, ១៧ ( សេចក្តីណែនាំដល់បទគម្ពីរទាំងឡាយ ) ដោយរកមើលថា សាតាំងច្បាំងទាស់នឹងនរណាបន្ទាប់ពីវាត្រូវបានបណ្ដេញចេញពីស្ថានសួគ៌ ។
ការយល់ពីរបៀបដែលយើងឈ្នះលើសាតាំងនៅក្នុងជីវិតមុនជីវិតលើផែនដីនេះ អាចជួយយើងឲ្យដឹងពីរបៀបយកឈ្នះលើឥទ្ធិពល និង ការវាយប្រហាររបស់វា នៅលើផែនដីនេះ ។ ចេញពីវគ្គបទគម្ពីរទាំងនេះនៅក្នុង វិវរណៈ ១២ យើងអាចរកឃើញគោលការណ៍ដូចតទៅនេះ ៖ យើងអាចយកឈ្នះលើឥទ្ធិពលរបស់សាតាំងតាមរយៈដង្វាយធួនរបស់ព្រះអង្គសង្គ្រោះ និងដោយបន្តស្មោះចំពោះទីបន្ទាល់របស់យើងអំពីដំណឹងល្អ ។ អ្នកអាចសរសេរ ឬ កត់ចំណាំគោលការណ៍នេះ នៅក្នុងព្រះគម្ពីររបស់អ្នក ។
អែលឌើរ ជេម ជេ ហាម៉ូឡា នៃពួកចិតសិននាក់ បានបង្រៀនអំពីរបៀបដែលសាតាំងកំពុងវាយប្រហារក្នុងជំនាន់របស់អ្នក ៖
« បុត្រាបុត្រីដ៏ក្លាហាន ហើយរាបសាមួយចំនួនរបស់ព្រះវរបិតាត្រូវបានរក្សាទុកសម្រាប់ថ្ងៃចុងក្រោយនេះ ហើយធ្វើការសម្រាប់ព្រះវរបិតារបស់យើង និងព្រះរាជបុត្រារបស់ទ្រង់ ។ ភាពក្លាហាន និងភាពរាបសារបស់ពួកគេបានបង្ហាញនៅក្នុងចម្បាំងជាមួយនឹងសាតាំងកាលពីជីវិតមុនផែនដីនេះ ។ …
« ដោយនគរព្រះបានស្ដារឡើងវិញនៅលើផែនដីនេះ និងកំណើតរបស់បងប្អូនមកលើផែនដីនេះ សាតាំងដឹងថា ‹ ពេលវេលាវាខ្លីណាស់ហើយ › [ វិវរណៈ ១២:១២ ] ។ ដូច្នេះហើយ សាតាំងកំពុងត្រៀមរាល់ធនធានដែលវាមានដើម្បីអូសទាញបងប្អូនឲ្យធ្លាក់ចូលក្នុងអំពើរំលង ។ វាដឹងថា ប្រសិនបើវាអាចនាំបងប្អូនចូលទៅក្នុងអំពើរំលងបាន វាអាចរារាំងបងប្អូនពីការបម្រើបេសកកម្មពេញម៉ោង ការរៀបការនៅក្នុងព្រះវិហារបរិសុទ្ធ និងការការពារកូនចៅរបស់បងប្អូននាពេលអនាគតនៅក្នុងសេចក្ដីជំនឿ ហើយអ្វីៗទាំងនេះនឹងធ្វើឲ្យបងប្អូន និងសាសនាចក្រចុះអន់ថយ ។ វាដឹងថា គ្មានអ្វីអាចផ្ដួលរំលំនគរព្រះបានឡើយ ‹ លើកលែងតែអំពើរំលងនៃរាស្ត្រ [ របស់ទ្រង់ ] ប៉ុណ្ណោះ › [ ម៉ូសាយ ២៧:១៣ ] ។ និយាយមិនខុសមែន—ឥឡូវនេះការផ្ដោតនៃសង្គ្រាមរបស់វាគឺទៅលើបងប្អូន » ( « Winning the War against Evil » Ensign ឬ Liahona ខែ វិច្ឆិកា ឆ្នាំ២០០៨ ទំព័រ ៥០-៥១ ) ។
តើសាតាំង និងពួកបរិវារវាខិតខំធ្វើឲ្យយើងចុះខ្សោយតាមរបៀបណា ?
សូមពិចារណាពីរបៀបដែលសាតាំងកំពុងធ្វើសង្គ្រាមទាស់នឹងអ្នកផ្ទាល់ ។
-
នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក សូមសរសេររបៀបមួយចំនួនដែលអ្នកអាចបង្កើនសេចក្តីជំនឿរបស់អ្នកលើព្រះយេស៊ូវគ្រីស្ទ ហើយពង្រឹងទីបន្ទាល់អ្នកអំពីទ្រង់ ។
-
សូមឆ្លើយសំណួរខាងក្រោមនេះមួយ ឬ ទាំងពីរ នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖
-
សូមសរសេរអំពីបទពិសោធន៍មួយកាលដែលទីបន្ទាល់ និងសេចក្ដីជំនឿរបស់អ្នកលើដង្វាយធួនរបស់ព្រះអង្គសង្គ្រោះបានជួយអ្នកឲ្យតស៊ូនឹងឥទ្ធិពលរបស់សាតាំង ។
-
សូមសរសេរទីបន្ទាល់របស់អ្នកអំពីដង្វាយធួនរបស់ព្រះយេស៊ូវគ្រីស្ទ ហើយពន្យល់ថា ដង្វាយធួនអាចជួយយើងនៅក្នុងសង្គ្រាមរបស់យើងទាស់នឹងសាតាំង និងបរិវារវាបានយ៉ាងដូចម្ដេច ។
-
សូមជ្រើសយកគំនិតមួយ ឬ ច្រើនដែលអ្នកបានសរសេរ ហើយអនុវត្តវានៅក្នុងចម្បាំងរបស់អ្នកទាស់នឹងសាតាំង និងបរិវារវា ។ អ្នកអាចសរសេរគោលដៅរបស់អ្នក លើក្រដាសមួយសន្លឹកផ្សេងទៀត ហើយដាក់វានៅកន្លែងណាមួយដែលអ្នកអាចឃើញវាញឹកញាប់ ។ នៅពេលអ្នកពឹងផ្អែកលើដង្វាយធួនរបស់ព្រះអង្គសង្គ្រោះ នោះព្រះអម្ចាស់នឹងជួយអ្នកនៅក្នុងការវាយប្រឆាំងនឹងសាតាំង ។
វិវរណៈ ១៣
យ៉ូហានសរសេរអំពីនគរទាំងឡាយលើផែនដីថា នឹងទទួលអំណាចមកពីសាតាំង
នៅក្នុង វិវរណៈ ១៣ យើងអានថា យ៉ូហានបានឃើញការនិមិត្តមួយអំពីសត្វសាហាវដែលតំណាងឲ្យនគរទុច្ចរិតនៅលើផែនដី ដែលសាតាំងគ្រប់គ្រង ។ យ៉ូហានក៏បានឃើញថា តាមរយៈនគរទាំងនេះ សាតាំងនឹងធ្វើកិច្ចការដ៏អស្ចារ្យ និងអព្ភូតហេតុក្លែងក្លាយដើម្បីបោកបញ្ឆោតកូនចៅមនុស្សទាំងអស់លើផែនដី ។
-
សូមសរសេរឃ្លាខាងក្រោមនេះ ពីក្រោមកិច្ចការថ្ងៃនេះនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖
ខ្ញុំបានសិក្សា វិវរណៈ ១២-១៣ ហើយបានបញ្ចប់មេរៀននេះនៅ ( កាលបរិច្ឆេទ ) ។
សំណួរ គំនិត និង ការយល់ដឹងបន្ថែមដែលខ្ញុំចង់ចែកចាយជាមួយគ្រូរបស់ខ្ញុំ ៖