មេរៀនទី ៣២ ៖ ថ្ងៃទី ៣
វិវរណៈ ១៧-១៩
សេចក្ដីផ្ដើម
សាវកយ៉ូហានបានឃើញថា បាប៊ីឡូនខាងវិញ្ញាណ ឬភពនៃមនុស្សទុច្ចរិត នឹងច្បាំងទាស់នឹងកូនចៀមនៃព្រះ ហើយថាកូនចៀមនឹងមានជ័យជំនះលើអារក្ស ។ ពួកបរិសុទ្ធត្រូវបានហៅឲ្យចេញមកពីបាប៊ីឡូខាងវិញ្ញាណ ហើយអ្នកដែលស្អាតស្អំ ហើយសុចរិតនឹងត្រូវបានហៅឲ្យចូលរួមពិធីលាងសោយភោជក្នុងពិធីរៀបអភិសេកនៃកូនចៀម ។ យ៉ូហានបានឃើញព្រះយេស៊ូវគ្រីស្ទយាងមកនៅក្នុងព្រះចេស្ដាដ៏អស្ចារ្យដើម្បីបំផ្លាញជនដែលទាស់នឹងទ្រង់ ។
វិវរណៈ ១៧-១៨
យ៉ូហានបានព្យាករពីការបំផ្លិចបំផ្លាញខាងវិញ្ញាណនៃបាប៊ីឡូន
អែលឌើរ លីន ជី រ៉ូប៊ីន នៃពួកចិតសិបនាក់បានបង្រៀនថា « វាស្រួលជាងដើម្បីគេចចេញពីការល្បួង ជាជាងតតាំងនឹងការល្បួង » ( « Avoid It » [ Brigham Young University devotional ថ្ងៃទី ១៧ ខែ កញ្ញា ឆ្នាំ ២០១៣ ] ទំព័រ ១ speeches.byu.edu ) ។
ហេតុអ្វីអ្នកគិតថាការគេចចេញពីការល្បួងគឺងាយស្រួលជាងការតតាំងនឹងវា ?
សូមគិតពីអ្វីដែលអាចកើតមានឡើង ប្រសិនបើយើងដាក់ខ្លួនឯងនៅក្នុងស្ថានភាពដែលយើងត្រូវតែតតាំងនឹងការល្បួងជានិច្ចនោះ ?
នៅពេលអ្នកសិក្សា វិវរណៈ ១៧–១៨ សូមរកមើលសេចក្ដីពិតដែលនឹងជួយអ្នកឲ្យស្គាល់ពីរបៀបគេចចេញពីការល្បួង និងអំពើបាបជាច្រើននៃពិភពលោកនេះ ។
នៅក្នុង វិវរណៈ ១៦ យើងបានរៀនថា សាវកយ៉ូហានបាននិមិត្តឃើញទេវតាប្រាំពីរអង្គដែលនឹងចាក់សេចក្តីវេទនាលើមនុស្សទុច្ចរិតនៅថ្ងៃចុងក្រោយ ។ សូមអាន វិវរណៈ ១៧:១ ដោយរកមើលថា ទេវតាមួយអង្គក្នុងចំណោមទេវតាទាំងប្រាំពីរបានមានបន្ទូលថានឹងបង្ហាញអ្វីខ្លះដល់យ៉ូហាន ។
យោងតាម វិវរណៈ ១៧:១៥ « ទឹកច្រើន » ដែលស្ត្រីនោះអង្គុយលើ ( សូមមើល ខទី ១ ) តំណាងឲ្យមនុស្ស និង សាសន៍នានាដែលនាងមានអំណាច និង ឥទ្ធិពលលើ ( សូមមើលផងដែរ នីហ្វៃទី ១ ១៤:១១ ) ។
សូមអាន វិវរណៈ ១៧:២–៦ ដោយរកមើលពាក្យ និង ឃ្លានានាដែលពិពណ៌នាអំពីស្ត្រីនោះ និងឥទ្ធិពលរបស់នាងទៅលើពិភពលោក ។ ពាក្យ សហាយស្មន់ នៅក្នុង ខទី ២ សំដៅទៅលើភាពអសីលធម៌ និង ទង្វើមិនសុចរិត ។
នៅក្នុង ខទី ២ តើឥទ្ធិពលរបស់ស្ត្រីនោះទៅលើពួកអ្នកដឹកនាំ និងប្រជាជននៅលើផែនដីនេះត្រូវបានពិពណ៌នាយ៉ាងដូចម្ដេច ?
នៅក្នុង វិវរណៈ ១៧:៦ ការដែលស្ត្រីនោះស្រវឹងនឹងឈាមនៃពួកបរិសុទ្ធ និងពួកអ្នកធ្វើបន្ទាល់ តើអ្នកគិតថាវាតំណាងឲ្យអ្វី ? សូមកត់សម្គាល់ថាពាក្យ សេចក្តីអស្ចារ្យ នៅក្នុងខគម្ពីរនេះមានន័យថាគួរឲ្យភ្ញាក់ផ្អើល ឬអស្ចារ្យ ។
សត្វដែលបានរៀបរាប់នៅក្នុង វិវរណៈ ១៧:៣ អាចនឹងតំណាងឲ្យក្រុងរ៉ូមនៅជំនាន់របស់យ៉ូហាន ក៏ដូចជានគរ និងសាសន៍ដ៏ពុករលួយនៅថ្ងៃចុងក្រោយផងដែរ ( សូមមើល វិវរណៈ ១៧:៨–១៣ ) ។
សូមអាន វិវរណៈ ១៧:១៨ ដោយរកមើលថា ស្ត្រីនោះតំណាងឲ្យអ្វី ។
« ទីក្រុងដ៏ធំ » នៅក្នុង ខទី ១៨ សំដៅទៅលើបាប៊ីឡូនខាងវិញ្ញាណ ( សូមមើល វិវរណៈ ១៤:៨; គ. និង ស. ១៣៣:១៤ ) ។ ដោយសារតែរឿងខាងលោកិយ និងភាពពុករលួយនៃបាប៊ីឡូនកាលពីបុរាណ និងដោយសារតែវាគឺជាកន្លែងមួយដែលកូនចៅអ៊ីស្រាអែលបានធ្លាក់ក្នុងសេវកភាព នោះនៅក្នុងព្រះគម្ពីរជារឿយៗប្រើពាក្យបាប៊ីឡូនតំណាងឲ្យអំពើបាប រឿងលោកិយ ឥទ្ធិពលនៃអំពើអាក្រក់នៅលើផែនដី និងសេវកភាពខាងវិញ្ញាណ ( សូមមើលផងដែរ នីហ្វៃទី ១ ១៣:១–៩; ១៤:៩–១០ ) ។
សូមអាន វិវរណៈ ១៧:១៤ ដោយរកមើលថា តើអ្នកដើរតាមបាប៊ីឡូននឹងច្បាំងទាស់នឹងនរណា ។
តើអ្វីទៅនឹងក្លាយជាលទ្ធផលនៃសង្គ្រាមនេះ ?
ចេញពីខគម្ពីរនេះយើងរៀនថា នៅថ្ងៃចុងក្រោយ ព្រះយេស៊ូវគ្រីស្ទនឹងយកឈ្នះលើអំពើទុច្ចរិតនៃលោកិយ ។ សូមពិចារណាពីការគូសចំណាំ ឬ កត់ចំណាំពាក្យនៅក្នុង វិវរណៈ ១៧:១៤ ដែលបង្រៀនពីសេចក្តីពិតនេះ ។
-
នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក សូមសរសេរអំពីរបៀបដែលការដឹងពីសេចក្តីពិតនេះ អាចជួយដល់អ្នកក្នុងនាមជាអ្នកដើរតាមព្រះយេស៊ូវគ្រីស្ទ ។
នៅក្នុង វិវរណៈ ១៨:១–៣ យើងអានថា មានទេវតាមួយអង្គទៀតបានប្រកាសពីការធ្លាក់នៃបាប៊ីឡូនដ៏ទុច្ចរិតនោះ ។ សូមអាន វិវរណៈ ១៨:៤ រកមើលថាព្រះអម្ចាស់បានបង្គាប់ឲ្យរាស្ត្ររបស់ទ្រង់ធ្វើអ្វីខ្លះ ។
តើហេតុផលអ្វីទៅដែលព្រះអម្ចាស់បានបង្គាប់ឲ្យរាស្ត្ររបស់ទ្រង់ចេញពីបាប៊ីឡូន ?
គោលការណ៍មួយដែលយើងអាចរៀនពី វិវរណៈ ១៨:៤ គឺថា ការញែកខ្លួនយើងចេញពីអំពើទុច្ចរិតនៃលោកិយអាចជួយយើងឲ្យចៀសផុតពីអំពើបាប និងការជំនុំជម្រះដែលនឹងកើតមានដល់មនុស្សទុច្ចរិតនៅថ្ងៃចុងក្រោយ ។ សូមគិតពីការសរសេរ ឬ កត់ចំណាំគោលការណ៍នេះក្នុងព្រះគម្ពីររបស់អ្នកក្បែរនឹង វិវរណៈ ១៨:៤ ។
-
សូមឆ្លើយសំណួរខាងក្រោមនេះនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖
-
តើដំណឹងល្អនៃព្រះយេស៊ូវគ្រីស្ទដែលបានស្ដារឡើងវិញជួយយើងឲ្យញែកខ្លួនយើងពីអំពើទុច្ចរិតនៃលោកិយយ៉ាងដូចម្ដេច ?
-
តើមានឧបសគ្គអ្វីខ្លះ ដែលយុវវ័យអាចជួប នៅពេលពួកគេព្យាយាមញែកខ្លួនពួកគេចេញពីអំពើទុច្ចរិតខាងលោកិយ កាលបន្តរស់នៅក្នុងចំណោមសេចក្ដីស្រឡាញ់ ហើយទាក់ទងនឹងជនដែលមានបទដ្ឋានខុសពីយើង ?
-
តើការញែកខ្លួនចេញពីឥទ្ធិពល និងការអនុវត្តទុច្ចរិតបានជួយអ្នក និង មនុស្សដទៃទៀតដែលអ្នកស្គាល់ឲ្យចៀសផុតពីការល្បួង និងអំពើបាបមួយចំនួននៃលោកិយបានយ៉ាងដូចម្ដេច ?
-
សូមគិតអំពីឥទ្ធិពលមិនសុចរិត ឬ ការអនុវត្តអ្វីខ្លះដែលអ្នកអាចញែកខ្លួនចេញ និង របៀបដែលអ្នកធ្វើកិច្ចការនេះ ។ សូមទូលសុំដល់ព្រះវរបិតាសួគ៌នៅក្នុងការអធិស្ឋាន ដើម្បីជួយអ្នកនៅក្នុងកិច្ចខិតខំញែកខ្លួនចេញពីឥទ្ធិពល និង ការអនុវត្តមិនសុចរិត ។
សូមក្នុង វិវរណៈ ១៨:៥–២៤ យើងអានថា យ៉ូហានបានឃើញពីការធ្លាក់នៃបាប៊ីឡូនដ៏ទុច្ចរិត និងភាពសោកសៅនៃពួកអ្នកគាំទ្ររបស់វា ។
វិវរណៈ ១៩
យ៉ូហានឃើញព្រះយេស៊ូវគ្រីស្ទយាងមកនៅក្នុងព្រះចេស្ដាដើម្បីបំផ្លាញជនដែលទាស់នឹងទ្រង់
សូមពិចារណាអំពីអំណោយដ៏ល្អបំផុតដែលអ្នកអាចផ្ដល់ឲ្យទៅស្វាមី ឬភរិយារបស់អ្នកនាពេលអនាគត នៅថ្ងៃមង្គលការរបស់អ្នក ។
សូមអានសេចក្តីថ្លែងដូចតទៅនេះដោយ អែលឌើរ ជែហ្វ្រី អ័រ ហូឡិន ក្នុងកូរ៉ុមនៃសាវកពួកដប់ពីរនាក់ ៖ « នៅថ្ងៃមង្គលការរបស់អ្នក អំណោយដ៏ល្អបំផុតដែលអ្នកអាចផ្ដល់ឲ្យដៃគូដ៏នៅអស់កល្បជានិច្ចរបស់អ្នកគឺសេចក្ដីល្អរបស់អ្នក—ស្អាតស្អំ ហើយបរិសុទ្ធ ហើយសក្ដិសមនឹងទទួលបានមកវិញនូវបរិសុទ្ធភាព » ( « Personal Purity » Ensign ខែ វិច្ឆិកា ឆ្នាំ ១៩៩៨ ទំព័រ ៧៧ ) ។
ហេតុអ្វីអ្នកគិតថាការស្អាតស្អំ ហើយបរិសុទ្ធគឺជាអំណោយដ៏ល្អបំផុតដែលអ្នកអាចផ្ដល់ឲ្យស្វាមី ឬភរិយារបស់អ្នកនៅថ្ងៃមង្គលការ ?
វិវរណៈ ១៩ មានរឿងប្រៀបប្រដូចមួយអំពីអាពាហ៍ពិពាហ៍ដែលបានប្រើដើម្បីបរិយាយពីការយាងមកជាលើកទីពីររបស់ព្រះអង្គសង្គ្រោះ ។ យោងតាម វិវរណៈ ១៩:១–៦ សាវកយ៉ូហានបានឃើញថា មនុស្សសុចរិតនឹងសរសើរព្រះចំពោះការជំនុំជម្រះរបស់ទ្រង់ទាស់នឹងមនុស្សទុច្ចរិត ។
សូមមើល វិវរណៈ ១៩:៧ ដោយរកមើលថាទេវតាបានប្រកាសដល់យ៉ូហានពីអាពាហ៍ពិពាហ៍របស់នរណា ។
តើយ៉ូហានបានរៀនអ្វីខ្លះអំពីភរិយារបស់កូនចៀម ?
« ពេលរៀបវិវាហមង្គលនៃកូនចៀម » ( វិវរណៈ ១៩:៧ ) សំដៅទៅលើការយាងមកជាលើកទីពីររបស់ព្រះអង្គសង្គ្រោះ ។
សូមអានសេចក្តីថ្លែងដូចតទៅនេះ ដោយអែលឌើរ ប្រ៊ូស អ័រ ម៉ាក់ខន់ឃី ក្នុងកូរ៉ុមនៃពួកសាវកដប់ពីរនាក់ ដោយរកមើលថាតើនរណាជាកូនក្រមុំរបស់កូនចៀម ៖ « នៅក្នុងគ្រាកាន់កាប់ត្រួតត្រានេះ កូនកំលោះដែលជាកូនចៀមរបស់ព្រះនឹងយាងមកប្រកាសរកកូនក្រមុំរបស់ទ្រង់ ដែលជាសាសនាចក្រដែលមានពួកបរិសុទ្ធស្មោះត្រង់ដែលបានទន្ទឹងចាំការយាងត្រឡប់មកវិញរបស់ទ្រង់ » ( Mormon Doctrine កំណែទី ២ [ ឆ្នាំ ១៩៦៦ ] ទំព័រ ៤៦៩ ) ។
សូមពិចារណាអំពីរបៀបមួយចំនួនដែលទំនាក់ទំនងអាពាហ៍ពិពាហ៍មួយ គឺជានិមិត្តរូបមួយដ៏សមរម្យសម្រាប់ទំនាក់ទំនងនៃសេចក្ដីសញ្ញារបស់យើងជាមួយនឹងព្រះយេស៊ូវគ្រីស្ទ ។ នៅពេលអ្នក ពិចារណា សូមគិតអំពីរបៀបដែល អាពាហ៍ពិពាហ៍គឺជាទំនាក់ទំនងមួយដែលតម្រូវឲ្យមានភាពស្មោះត្រង់ ការលះបង់ សេចក្ដីស្រឡាញ់ ការតាំងចិត្ត និងការទុកចិត្ត ។
សូមអាន វិវរណៈ ១៩:៨–៩ ដោយរកមើលថាតើពួកបរិសុទ្ធអាចធ្វើអ្វីខ្លះដើម្បីត្រៀមខ្លួនសម្រាប់ការយាងមកជាលើកទីពីររបស់ព្រះអង្គសង្គ្រោះ ។
សំពត់ទេសសយ៉ាងម៉ត់ដែលបានលើកឡើងនៅក្នុង ខទី ៨ អាចជាតំណាងឲ្យភាពបរិសុទ្ធ ភាពស្អាតស្អំ និងសេចក្ដីសុចរិត ។ ដូចដែលបានតំណាងឲ្យសម្លៀកបំពាក់នៃភរិយារបស់កូនចៀម តើយើងត្រូវធ្វើអ្វីខ្លះដើម្បីត្រៀមខ្លួនសម្រាប់ការយាងមករបស់ព្រះអម្ចាស់ព្រះយេស៊ូវគ្រីស្ទ ?
សេចក្តីពិតមួយដែលយើងរៀនចេញពីខគម្ពីរទាំងនោះគឺថា ប្រសិនបើយើងស្អាតស្អំ ហើយសុចរិត នោះយើងនឹងត្រៀមខ្លួនជាស្រេចសម្រាប់ការយាងមករបស់ព្រះអម្ចាស់ព្រះយេស៊ូវគ្រីស្ទ ។ សូមគូសចំណាំ ឬ កត់ចំណាំពាក្យនៅក្នុង វិវរណៈ ១៩:៨ ដែលបង្រៀនពីសេចក្តីពិតនេះ ។
ពាក្យ ប្រទាន នៅក្នុង វិវរណៈ ១៩:៨ មានន័យថាបានផ្ដល់ឲ្យ ឬប្រគល់ឲ្យ ។ ការស្អាតស្អំពីអំពើបាប ហើយបានធ្វើឲ្យសុចរិតគឺជាអំណោយទានមួយមកពីព្រះ ។
សូមពិចារណាពីសំណួរដូចតទៅនេះ ៖ តើព្រះបានធ្វើអ្វីខ្លះដើម្បីប្រទានផ្លូវមួយឲ្យយើងបានស្អាតស្អំពីអំពើបាប ហើយក្លាយជាសុចរិត ? ហេតុអ្វីអ្នកគិតថា ការស្អាតស្អំ ហើយសុចរិតគឺជាអំណោយទានមួយដ៏ល្អបំផុតដែលយើងអាចថ្វាយព្រះអង្គសង្គ្រោះនៅពេលទ្រង់យាងមកម្ដងទៀត ?
សូមសម្រេចចិត្តពីអ្វីដែលអ្នកត្រូវធ្វើដើម្បីបានស្អាតស្អំ ហើយសុចរិត ប្រយោជន៍ឲ្យអ្នកត្រៀមខ្លួនជាស្រេចសម្រាប់ការយាងមករបស់ព្រះអម្ចាស់ព្រះយេស៊ូវគ្រីស្ទ ។ សូមអនុវត្តតាមការបំផុសគំនិតដែលអ្នកទទួលបាន ។
សូមអាន វិវរណៈ ១៩:១០ ដោយរកមើលពីប្រតិកម្មដែលយ៉ូហានមានបន្ទាប់ពីស្ដាប់ឮរឿងដែលទេវតាបានប្រកាសដល់លោក ។ ទេវតានេះបានទទួលសិទ្ធិអំណាចមកពីព្រះ ដើម្បីនិយាយជំនួស និង តំណាងឲ្យព្រះយេស៊ូវគ្រីស្ទ ។
តើទេវតាបានប្រកាសដល់យ៉ូហានថា ទ្រង់ ( ទេវតា ) និងពួកអ្នកបម្រើផ្សេងទៀតរបស់ព្រះមានអ្វីខ្លះ ?
« វិញ្ញាណនៃសេចក្ដីទំនាយ » ( វិវរណៈ ១៩:១០ ) សំដៅទៅលើអំណោយទាននៃវិវរណៈ និងការបំផុសគំនិតមកពីព្រះ ដែលអនុញ្ញាតឲ្យមនុស្សម្នាក់ទទួល ហើយនិយាយពីបន្ទូលរបស់ព្រះ ( សូមមើលសេចក្ដីណែនាំដល់បទគម្ពីរទាំងឡាយ « ព្យាករ, ការព្យាករ », scriptures.lds.org ) ។
តើអ្នកគិតថា ទីបន្ទាល់ដូចជាការព្យាករតាមរបៀបណាខ្លះ ?
តើការមានទីបន្ទាល់អំពីព្រះយេស៊ូវ ជះឥទ្ធិពលបែបណាខ្លះដល់ការរៀបចំខ្លួនរបស់អ្នកសម្រាប់ការយាងមកជាលើកទីពីរនោះ ?
សូមអាន វិវរណៈ ១៩:១១–១៦ ដោយរកមើលពាក្យ ឬឃ្លាទាំងឡាយដែលពិពណ៌នាអំពីព្រះអង្គសង្គ្រោះពេលយាងមកជាលើកទីពីររបស់ទ្រង់ ។ សូមអានផងដែរការបកប្រែដោយយ៉ូសែប ស្ម៊ីធ វិវរណៈ ១៩:១៥ ( នៅក្នុង វិវរណៈ ៦:១៤ ) ។
សេះ-សដែលបានលើកឡើងនៅក្នុង វិវរណៈ ១៩:១១ គឺជានិមិត្តរូបនៃជោគជ័យ និង ជ័យជំនះ ។ ព្រះអង្គសង្គ្រោះនឹងយាងមកបង្ក្រាបអំពើបាប និងសេចក្ដីទុច្ចរិត ។
សូមកត់សម្គាល់ពីសភាពនៃព្រះពស្ត្ររបស់ព្រះអង្គសង្គ្រោះដែលបានពិពណ៌នានៅក្នុង វិវរណៈ ១៩:១៣ ។ ឃ្លា « ជ្រលក់ដោយឈាម » មានន័យថាព្រះពស្ត្ររបស់ទ្រង់នឹងមានពណ៌ក្រហមឆ្អៅដូចជាឈាម ។ ពណ៌នេះតំណាងឲ្យការបំផ្លិចបំផ្លាញដល់មនុស្សទុច្ចរិតនៅការយាងមករបស់ទ្រង់ ( សូមមើល គោលលទ្ធិ និង សេចក្តីសញ្ញា ១៣៣:៤៦–៥១ ) ហើយក៏អាចរំឭកដល់យើងផងដែរពីការរងទុក្ខដែលទ្រង់បានជួបនៅគ្រានៃដង្វាយធួនរបស់ទ្រង់ ។
អែលឌើរ នែល អេ. ម៉ាក់ស្វែល ក្នុងកូរ៉ុមនៃពួកសាវកដប់ពីរនាក់បានបង្រៀន ៖
« ដោយមានលោហិតចេញពីគ្រប់គល់រោម ឱ! តើព្រះពស្ត្ររបស់ទ្រង់មានពណ៌ក្រហមយ៉ាងណាទៅនៅក្នុងច្បារគែតសេម៉ានី តើព្រះពស្ត្រខាងក្រៅនោះមានពណ៌ក្រហមឆ្អិនឆ្អៅយ៉ាងណាទៅ !
« គ្មានអ្វីត្រូវងឿងឆ្ងល់ឡើយ នៅពេលព្រះគ្រីស្ទយាងមកនៅក្នុងព្រះចេស្ដា និងសិរីល្អ ទ្រង់នឹងយាងមកក្នុងព្រះពស្ត្រក្រហម ( សូមមើល គ. និង ស. ១៣៣:៤៨ ) ដោយពុំគ្រាន់តែបង្ហាញពីការខ្ញាល់ប៉ុណ្ណោះទេ ប៉ុន្តែក៏ធ្វើឲ្យយើងចងចាំថា ទ្រង់បានរងទុក្ខយ៉ាងណាសម្រាប់យើងម្នាក់ៗនៅច្បារគែតសេម៉ានី និងនៅភ្នំកាលវ៉ារី ! » ( « Overcome … Even As I Also Overcame » Ensign ខែ ឧសភា ឆ្នាំ ១៩៨៧ ទំព័រ ៧២ ) ។
យោងតាម ការបកប្រែដោយយ៉ូសែបសម្រាប់វិវរណៈ ១៩:១៥ យ៉ូហានបានឃើញថា នៅពេលព្រះអង្គសង្គ្រោះបានយាងមកជាស្ដេចនៃអស់ទាំងស្ដេច និងជាព្រះអម្ចាស់នៃអស់ទាំងព្រះអម្ចាស់ ( សូមមើល វិវរណៈ ១៩:១៦ ) ទ្រង់នឹងគ្រប់គ្រងលើសាសន៍ទាំងឡាយដោយបន្ទូលនៃព្រះ ។ នៅក្នុង វិវរណៈ ១៩:១៧–២១ យ៉ូហានបានឃើញការបំផ្លិចបំផ្លាញនៃជនដែលទាស់ប្រឆាំងនឹងកូនចៀមនៃព្រះ ។ សូមកត់សម្គាល់ថាការបកប្រែដោយយ៉ូសែប ស្ម៊ីធនៃ វិវរណៈ ១៩:១៨ បញ្ជាក់ថា « មនុស្សទាំងអស់ ទាំងអ្នកជា និងខ្ញុំគេ ទាំងអ្នកធំ និងអ្នកតូចផង » សំដៅលើ « មនុស្សទាំងអស់ដែលប្រឆាំងទាស់នឹងកូនចៀម » ( នៅក្នុង វិវរណៈ ១៩:១៨ ) ។
-
សូមសរសេរឃ្លាខាងក្រោមនេះ ពីខាងក្រោមកិច្ចការថ្ងៃនេះនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖
ខ្ញុំបានសិក្សា វិវរណៈ ១៧-១៩ ហើយបានបញ្ចប់មេរៀននេះនៅ ( កាលបរិច្ឆេទ ) ។
សំណួរ គំនិត និង ការយល់ដឹងបន្ថែមដែលខ្ញុំចង់ចែកចាយជាមួយគ្រូរបស់ខ្ញុំ ៖