សេចក្ដីណែនាំស្ដីពីកម្មវិធីថ្នាក់សិក្ខាសាលាដែលសិក្សានៅតាមផ្ទះ
កម្មវិធីថ្នាក់សិក្ខាសាលាដែលសិក្សានៅតាមផ្ទះ ត្រូវបានរៀបរៀងឡើង ដើម្បីជួយអ្នកឲ្យពង្រឹងការយល់ដឹងរបស់អ្នក អំពីដំណឹងល្អនៃព្រះយេស៊ូវគ្រីស្ទ ហើយអនុវត្តការបង្រៀននៃដំណឹងល្អនៅក្នុងជីវិតប្រចាំថ្ងៃរបស់អ្នក តាមរយៈការសិក្សាព្រះគម្ពីរនានា ។ សម្រាប់ការសិក្សារបស់អ្នកនៅក្នុងឆ្នាំសិក្សានេះ ដំបូង អ្នកនឹងបញ្ចប់ការចាត់តាំងឲ្យអាន ចេញពីព្រះគម្ពីរនៃវគ្គសិក្សានេះ—គឺព្រះគម្ពីរសញ្ញាថ្មី —ហើយបន្ទាប់មក អ្នកនឹងបញ្ចប់មេរៀននីមួយៗ ។ អ្នកនឹងជួបជាមួយគ្រូថ្នាក់សិក្ខាសាលា ក្នុងមួយសប្ដាហ៍ម្ដង ដើម្បីដាក់ជូននូវកិច្ចការ និង ការចូលរួមរបស់អ្នក នៅក្នុងមេរៀនប្រចាំសប្ដាហ៍ ។
ថ្នាក់សិក្ខាសាលា គឺជាកម្មវិធីអប់រំខាងសាសនាប្រចាំថ្ងៃ ។ ការសិក្សាព្រះគម្ពីរទាំងឡាយរបស់អ្នកប្រកបដោយការអធិស្ឋាន គប្បីជាទម្លាប់មួយជាប្រចាំថ្ងៃ ។ អ្នកនឹងត្រូវធ្វើកិច្ចការថ្នាក់សិក្ខាសាលារបស់អ្នករាល់ថ្ងៃទៅរៀន ទោះបីអ្នកមិនចូលរួមនៅថ្នាក់សិក្ខាសាលារាល់ថ្ងៃក៏ដោយ ។ មាន ៣២ មេរៀន ដែលត្រូវបញ្ចប់នៅអំឡុងវគ្គសិក្សានេះ ។ តារាងអំណាននៅ ទំព័រ ០០០ បង្ហាញពីអ្វីដែលអ្នកគប្បីសិក្សាសម្រាប់មេរៀននីមួយៗ ។ គ្រូរបស់អ្នកនឹងជួយអ្នកឲ្យយល់ថាពេលណាដែលមេរៀននីមួយៗត្រូវដល់ពេលប្រមូល ។ ចំណាយពេលប្រហែល ៣០ នាទី ដើម្បីបញ្ចប់មេរៀននីមួយៗនៃមេរៀនទាំងឡាយនៅក្នុងសៀវភៅមគ្គុទេសក៍ការសិក្សានេះ បន្ថែមលើការសិក្សាព្រះគម្ពីរប្រចាំថ្ងៃរបស់អ្នក ។
ក្រៅពីកំណត់ហេតុផ្ទាល់ខ្លួនរបស់អ្នក អ្នកគប្បីមានសៀវភៅកំណត់ហេតុសិក្សាព្រះគម្ពីរពីរ ( ឬ សៀវភៅសរសេរពីរក្បាល ) ដែលអ្នកនឹងសរសេរកិច្ចការទាំងឡាយចេញពីសកម្មភាពក្នុងសៀវភៅមគ្គុទេសក៍ការសិក្សា ។ រាល់សប្ដាហ៍ដែលអ្នកជួបជាមួយគ្រូរបស់អ្នក អ្នកគប្បីប្រគល់សៀវភៅកំណត់ហេតុការសិក្សាព្រះគម្ពីរ ដែលមាននូវកិច្ចការទាំងឡាយដែលបានបញ្ចប់ ចេញពីសកម្មភាពក្នុងសៀវភៅមគ្គុទេសក៍ការសិក្សា ដែលអ្នកបានបញ្ចប់សម្រាប់សប្ដាហ៍នោះ ។ គ្រូរបស់អ្នកនឹងអាន ហើយឆ្លើយតបចំពោះកិច្ចការទាំងនោះ ហើយប្រគល់សៀវភៅកំណត់ហេតុការសិក្សាព្រះគម្ពីរដល់អ្នកវិញ នៅសប្ដាហ៍បន្ទាប់ ។ អ្នកក៏អាចសរសេរចម្លើយរបស់អ្នកនៅលើក្រដាសសៀវភៅដែលអាចដកហូតចេញចូលបាន ហើយប្រគល់ក្រដាសកិច្ចការទាំងឡាយដែលអ្នកបានធ្វើនៅសប្ដាហ៍នោះ ។ ហើយនៅពេលដែលគ្រូអ្នកប្រគល់ក្រដាសទាំងនោះត្រឡប់មកវិញ នោះអ្នកអាចដាក់វាចូលក្នុងសៀវភៅវិញ ។
ការប្រើប្រាស់សៀវភៅសិក្សានេះ នៅក្នុងកម្មវិធីថ្នាក់សិក្ខាសាលាប្រចាំថ្ងៃ
សៀវភៅសិក្សានេះអាចត្រូវបានប្រើប្រាស់ដោយគ្រូ និង សិស្ស នៅក្នុងកម្មវិធីថ្នាក់សិក្ខាសាលាប្រចាំថ្ងៃ ដើម្បីធ្វើឲ្យមេរៀនកាន់តែប្រសើរឡើង ឬ សម្រាប់ធ្វើកិច្ចការសងវិញ ។ ទោះយ៉ាងណា គឺគ្មានបំណងប្រគល់ឲ្យសិស្សថ្នាក់សិក្ខាសាលាប្រចាំថ្ងៃទាំងអស់គ្នានោះទេ ។ ប្រសិនបើសិស្សម្នាក់ត្រូវការធ្វើមេរៀនសងមួយដើម្បីបានពិន្ទុ នោះគ្រូអាចដាក់កិច្ចការឲ្យគាត់បញ្ចប់មេរៀនដែលសិក្សានៅតាមផ្ទះ ដែលត្រូវគ្នានឹងមេរៀនដែលគាត់មិនបានមករៀននោះ ។
ការប្រើប្រាស់សៀវភៅមគ្គុទេសក៍ការសិក្សាសម្រាប់សិស្សដែលសិក្សានៅតាមផ្ទះ
សេចក្តីណែនាំស្ដីពីអត្ថបទព្រះគម្ពីរ
សេចក្ដីណែនាំផ្ដល់នូវព័ត៌មានសាវតាមួយចំនួន ព្រមទាំងសេចក្ដីសង្ខេបអត្ថបទគម្ពីរសម្រាប់មេរៀននីមួយៗ ។
ក្រុមខគម្ពីរ និង សេចក្ដីសង្ខេបមាតិការឿង
ក្រុមខគម្ពីរ ឆ្លុះបង្ហាញពីការផ្អាក នៅកន្លែងដែលមានការផ្លាស់ប្ដូរសកម្មភាព ឬ ប្រធានបទ ។ ក្រុមខគម្ពីរនីមួយៗមានសេចក្ដីសង្ខេបពីព្រឹត្តិការណ៍ ឬ ការបង្រៀននៅក្នុងខគម្ពីរទាំងនោះ ។
គោលលទ្ធិ និង គោលការណ៍ទាំងឡាយ
ពេលដែលគោលលទ្ធិ និង គោលការណ៍ទាំងឡាយនៃដំណឹងល្អលេចចេញមកពីអត្ថបទគម្ពីរ នោះគោលលទ្ធិ និង គោលការណ៍ទាំងនោះ ត្រូវបានបោះពុម្ពជាអក្សរដិត នៅក្នុងមេរៀន ដើម្បីជួយអ្នកឃើញវាច្បាស់ ។
ជំនួយការសិក្សា
ជំនួយការសិក្សាផ្ដល់នូវការយល់ដឹង និង ពន្យល់ពីការអនុវត្ត ដែលអាចពង្រីកដល់ការសិក្សា និង ការយល់ដឹងរបស់អ្នក អំពីបទគម្ពីរ ។
ចំណេះចំណានខគម្ពីរ
ចំណេះចំណានខគម្ពីរនីមួយៗក្នុងចំណោមចំណេះចំណានខគម្ពីរទាំង ២៥ ដែលមានក្នុងគម្ពីរសញ្ញាថ្មី ត្រូវបានដាក់ដាច់ដោយឡែកៗពីគ្នា ដែលចំណេះចំណានខគម្ពីរទាំងនោះមាននៅក្នុងមេរៀន ដើម្បីជួយអ្នកធ្វើឲ្យចំណេះចំណានរបស់អ្នកកាន់តែស៊ីជម្រៅ ។
ការកត់ត្រាចម្លើយក្នុងសៀវភៅសិក្សា
ពេលខ្លះ អ្នកនឹងត្រូវបានស្នើឲ្យសរសេរចម្លើយនៅក្នុងសៀវភៅសិក្សា នៅបន្ទាត់ចន្លោះ ឬ នៅក្នុងតារាងមួយ ។
កិច្ចការក្នុងសៀវភៅកំណត់ហេតុការសិក្សាព្រះគម្ពីរ
កិច្ចការក្នុងសៀវភៅកំណត់ហេតុការសិក្សាព្រះគម្ពីរ គឺត្រូវបានសរសេរ និង ប្រគល់ទៅគ្រូរបស់អ្នករាល់សប្ដាហ៍ ដើម្បីបានមតិកែតម្រូវមកវិញ ។ ការផ្ដល់នូវគំនិតយ៉ាងយកចិត្តទុកដាក់ដល់ចម្លើយរបស់អ្នក នឹងជួយអ្នកទទួលបានបទពិសោធន៍ដ៏មានអត្ថន័យ ពេលអ្នករៀន និង អនុវត្តសេចក្ដីពិតទាំងឡាយចេញពីបទគម្ពីរ ។