មេរៀនទី ១ ៖ ថ្ងៃទី ១
ផែនការនៃសេចក្តីសង្រ្គោះ
សេចក្តីផ្តើម
ប្រធាន ប៊យ ឃេ ផាកកឺ ក្នុងកូរ៉ុមនៃពួកសាវកដប់ពីរនាក់ បានសង្កត់ធ្ងន់ពីសារៈសំខាន់នៃការសង្ខេបនូវទិដ្ឋភាពទូទៅនៃផែនការនៃសេចក្តីសង្រ្គោះនៅពេលចាប់ផ្ដើមថ្នាក់សិក្ខាសាលានៃឆ្នាំនីមួយៗ ៖
« ប្រសិនបើការសង្ខេបពីទិដ្ឋភាពទូទៅនៃ ‹ ផែនការនៃសុភមង្គល › …ត្រូវបានធ្វើឡើងនៅពេលចាប់ផ្ដើមឆ្នាំសិក្សា ហើយយូរៗម្តងត្រឡប់ទៅមើលវា នោះវានឹងមានម្លៃមហិមាចំពោះ…សិស្ស ។ …
« យុវវ័យងឿងឆ្ងល់ថា ‹ ហេតុអ្វី ? ›-- ហេតុអ្វីក៏យើងត្រូវបានបញ្ជាឲ្យ ធ្វើ កិច្ចការមួយចំនួន និង មិន ឲ្យធ្វើកិច្ចការមួយចំនួនទៀតដូច្នេះ ? ទោះបីជាចំណេះដឹងអំពីផែនការនៃសុភមង្គលត្រូវបានសង្ខេបក្តីក៏វាអាចផ្តល់ ‹ ចម្លើយ › ដល់ពួកគេបានដែរ » ( « The Great Plan of Happiness » នៅក្នុង Teaching Seminary: Preservice Readings [ Church Educational System manual ឆ្នាំ ២០០៤ ] ទំព័រ ៦៩–៧០ គេហទំព័រ LDS.orgសូមមើល អាលម៉ា ១២:៣២ ) ។
មេរៀននេះផ្ដល់នូវការសង្ខេបពីទិដ្ឋភាពទូទៅនៃផែនការនៃសេចក្តីសង្គ្រោះ ហើយផ្ដោតលើតួនាទីដ៏សំខាន់របស់ព្រះយេស៊ូវគ្រីស្ទ និង ដង្វាយធួនរបស់ទ្រង់នៅក្នុងផែនការនោះ ។
តួនាទីរបស់ព្រះយេស៊ូវគ្រីស្ទនៅក្នុងជីវិតមុនឆាកជីវិតនេះ
តើអ្នកនឹងឆ្លើយដូចម្តេច ប្រសិនបើមនុស្សម្នាក់សួរអ្នកថាហេតុអ្វីព្រះយេស៊ូវគ្រីស្ទជាអង្គដ៏សំខាន់ចំពោះអ្នក ?
នៅក្នុងមេរៀនថ្ងៃនេះ អ្នកនឹងរៀនអំពីតួនាទីរបស់ព្រះយេស៊ូវគ្រីស្ទនៅក្នុងផែនការនៃសេចក្តីសង្គ្រោះរបស់ព្រះវរបិតាសួគ៌ ។ នៅពេលសិក្សា សូមរកមើលសេចក្ដីពិតដែលអាចជួយពង្រឹងសេចក្ដីជំនឿរបស់អ្នកលើព្រះយេស៊ូវគ្រីស្ទ ។
-
សូមគូសតារាងខាងក្រោមនេះនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ។ អ្នកនឹងសរសេរគោលលទ្ធិនានានៅក្នុងតារាង នៅពេលអ្នកសិក្សាមេរៀននេះ ។
ព្រះយេស៊ូវគ្រីស្ទគឺជាអង្គដ៏សំខាន់នៃផែនការនៃសេចក្តីសង្គ្រោះរបស់ព្រះវរបិតាសួគ៌
ជីវិតមុនឆាកជីវិតនេះ
ជីវិតរមែងស្លាប់
ជីវិតក្រោយពីជីវិតនេះ
ផែនការរបស់ព្រះវរបិតាសួគ៌សម្រាប់សេចក្តីសង្គ្រោះរបស់យើងរួមមានបីដំណាក់កាល ៖ ជីវិតមុនឆាកជីវិតនេះដែលមានពីមុនកំណើតនៃរូបកាយរបស់យើង ជីវិតរមែងស្លាប់ និង ជីវិតក្រោយពីជីវិតនេះ ។
សូមអានសេចក្ដីថ្លែងការណ៍ខាងក្រោមនេះ ហើយគូសចំណាំពាក្យ ឬ ឃ្លាដែលពិពណ៌នាអំពីដែនកំណត់ដែលយើងមាននៅក្នុងជីវិតមុនឆាកជីវិតនេះ ៖
« យើងបានរស់នៅជាកូនចៅវិញ្ញាណរបស់ព្រះវរបិតារបស់យើងនៅក្នុងស្ថានសួគ៌ពីមុនយើងកើតលើផែនដីនេះ [ សូមមើល កិច្ចការ ១៧:២៨–២៩, អ័ប្រាហាំ ៣:២២–២៦ ] ។ ទោះបីជាយ៉ាងណាក៏ដោយ ក៏យើងមិនដូចព្រះវរបិតាសួគ៌របស់យើង ហើយក៏មិនអាចក្លាយដូចជាទ្រង់ ហើយរីករាយជាមួយពរជ័យដែលទ្រង់រីករាយដោយគ្មានបទពិសោធន៍នៃការរស់នៅជីវិតរមែងស្លាប់ជាមួយនឹងរូបកាយខាងសាច់ឈាមដែរ ។
« ព្រះរាជបំណងទាំងមូលរបស់ព្រះ—កិច្ចការ និង សិរីល្អរបស់ទ្រង់—គឺអាចធ្វើឲ្យយើងម្នាក់ៗរីករាយជាមួយនឹងពរជ័យទាំងអស់របស់ទ្រង់ [ សូមមើល ម៉ូសេ ១:៣៩ ] ។ ទ្រង់បានប្រទានផែនការមួយដ៏ល្អឥតខ្ចោះដើម្បីសម្រេចបានព្រះរាជបំណងរបស់ទ្រង់ ។ យើងបានយល់ ហើយបានទទួលយកផែនការនេះមុនយើងមកផែនដីនេះ ។ …
«…ដើម្បីរីកចម្រើន ហើយប្រែក្លាយដូចជាព្រះ យើងម្នាក់ៗត្រូវតែទទួលរូបកាយ ហើយទទួលការសាកល្បងនៅអំឡុងពេលនៃសេចក្ដីសាកល្បងនៅលើផែនដី » ( ប្រកាសដំណឹងល្អរបស់យើង ៖ មគ្គុទេសន៍ចំពោះការបម្រើជាអ្នកផ្សព្វផ្សាយសាសនា [ ឆ្នាំ ២០០៤ ] ទំព័រ ៤៨–៥០ ) ។
នៅពេលព្រះវរបិតាសួគ៌បានបង្ហាញពីផែនការនៃសុភមង្គលរបស់ទ្រង់ យើងបានដឹងថា នឹងមានព្រះអង្គសង្គ្រោះមួយអង្គដើម្បីអនុវត្តផែនការនេះ ។ លូស៊ីហ្វើរ ដែលជាកូនចៅវិញ្ញាណម្នាក់របស់ព្រះវរបិតាសួគ៌បានបះបោរប្រឆាំងនឹងផែនការរបស់ព្រះវរបិតាសួគ៌ ។ វាត្រូវបានហៅថាសាតាំង ។
សូមអាន ម៉ូសេ ៤:១–៣, ដោយរកមើលអ្វីដែលសាតាំងទាមទារពីព្រះវរបិតាសួគ៌ ។
តើសាតាំងបានទាមទារអ្វីខ្លះពីព្រះវរបិតាសួគ៌ ?
នៅក្នុង ម៉ូសេ ៤:២ យើងរៀនថាព្រះយេស៊ូវគ្រីស្ទគឺជាអង្គជម្រើសចាប់តាំងពីដំបូងមកដើម្បីធ្វើតាមព្រះឆន្ទៈរបស់ព្រះវរបិតាសួគ៌ ។ នៅក្នុងតារាងរបស់អ្នក នៅក្នុងជួរឈរ « ជីវិតមុនឆាកជីវិតនេះ » សូមសរសេរគោលលទ្ធិខាងក្រោមដែលយើងរៀនពីវគ្គបទគម្ពីរនេះ ៖ ព្រះយេស៊ូវគ្រីស្ទត្រូវបានជ្រើសរើសនៅក្នុងជីវិតមុនឆាកជីវិតនេះដើម្បី ធ្វើជាព្រះអង្គប្រោសលោះរបស់មនុស្សលោក ។
ក្រោយពីព្រះយេស៊ូវគ្រីស្ទត្រូវបានជ្រើសរើសឲ្យអនុវត្តផែនការនៃសេចក្តីសង្គ្រោះរបស់ព្រះវរបិតាសួគ៌ នោះផែនដីចាំបាច់ត្រូវបង្កើតឡើងជាកន្លែងដែលយើងម្នាក់ៗអាចទទួលបានរូបកាយ និង បទពិសោធន៍ ។
សូមអាន ហេព្រើរ ១:១–២, ដោយរកមើលតួនាទីរបស់ព្រះយេស៊ូវគ្រីស្ទនៅក្នុងការបង្កបង្កើតផែនដី ។
ចេញពីខគម្ពីរទាំងនេះយើងរៀននូវគោលលទ្ធិខាងក្រោមនេះ ៖ ក្រោមការដឹកនាំរបស់ព្រះវរបិតាសួគ៌ ព្រះយេស៊ូវគ្រីស្ទបានបង្កើតផែនដី ។ សូមសរសេរគោលលទ្ធិនេះនៅក្នុងជួរឈរ « ជីវិតមុនឆាកជីវិតនេះ » នៃតារាងរបស់អ្នកនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ។
-
សូមគិតអំពីសម្រស់នៃផែនដីនេះ និង អំពីពេលវេលា ព្រមទាំងទីកន្លែងនានាដែលអ្នកពិតជាមានអំណរគុណចំពោះវា ។ នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក សូមឆ្លើយសំណួរខាងក្រោមនេះ ៖
-
សូមពិពណ៌នាអំពីគ្រាមួយដែលអ្នកមានអំណរគុណចំពោះសម្រស់នៃផែនដី ។
-
តើការដឹងថា ព្រះយេស៊ូវគ្រីស្ទបានបង្កើតផែនដីនេះ ជះឥទ្ធិពលដល់អារម្មណ៍របស់អ្នកអំពីទ្រង់យ៉ាងណាដែរ ?
-
តួនាទីរបស់ព្រះយេស៊ូវគ្រីស្ទនៅក្នុងជីវិតរមែងស្លាប់
បន្ទាប់ពីមកកាន់ផែនដី ហើយទទួលរូបកាយ នោះយើងដកពិសោធន៍នូវឧបសគ្គផ្សេងៗទៀតដែលរារាំងយើងមិនឲ្យក្លាយដូចជាព្រះវរបិតាសួគ៌ ហើយត្រឡប់ទៅវត្តមានរបស់ទ្រង់វិញ ។ ឧបសគ្គពីរនៃឧបសគ្គទាំងនោះ គឺសេចក្តីស្លាប់ខាងរូបកាយ និង សេចក្ដីស្លាប់ខាងវិញ្ញាណ ។ សេចក្តីស្លាប់ខាងរូបកាយគឺជាការបែកចេញនៃរូបកាយរបស់យើង និង វិញ្ញាណរបស់យើង ហើយសេចក្តីស្លាប់ខាងវិញ្ញាណគឺជាការបែកចេញពីព្រះ ។ សូមអានសេចក្ដីថ្លែងការណ៍ខាងក្រោមនេះ ហើយគូសចំណាំពាក្យ ឬ ឃ្លាដែលពិពណ៌នាអំពីឧបសគ្គទាំងពីរនេះដែលយើងដកពិសោធន៍អំឡុងពេលជីវិតមែងស្លាប់របស់យើង ។
« នៅក្នុងជីវិតរមែងស្លាប់ យើងរស់នៅក្នុងលក្ខខណ្ឌនៃសេចក្ដីស្លាប់ទាំងខាងរូបកាយ និង ខាងវិញ្ញាណ ។ ព្រះមានព្រះកាយជាសាច់ និង ឆ្អឹងដ៏អមតៈដែលមានសិរីរុងរឿងយ៉ាងល្អឥតខ្ចោះ ។ ដើម្បីប្រែក្លាយដូចជាព្រះ និងត្រឡប់ទៅរស់នៅទីវត្តមានរបស់ទ្រង់ យើងក៏ត្រូវតែមានរូបកាយជាសាច់ និងឆ្អឹងដ៏អមតៈយ៉ាងល្អឥតខ្ចោះដែរ ។ ទោះបីជាយ៉ាងណាក៏ដោយ ព្រោះតែការធ្លាក់របស់អ័ដាម និង អេវ៉ា មនុស្សគ្រប់គ្នានៅលើផែនដីមានរូបកាយរមែងស្លាប់ដែលមិនល្អឥតខ្ចោះ ហើយនៅទីបំផុតនឹងស្លាប់ ។ ប្រសិនបើពុំមានព្រះអង្គសង្គ្រោះ ព្រះយេស៊ូវគ្រីស្ទទេ នោះសេចក្ដីស្លាប់អាចបញ្ចប់រាល់សេចក្ដីសង្ឃឹមសម្រាប់ជីវិតនាពេលអនាគតដើម្បីរួមរស់នឹងព្រះវរបិតាសួគ៌ ។
« រួមជាមួយនឹងសេចក្ដីស្លាប់ខាងរូបកាយ អំពើបាបគឺជាឧបសគ្គចម្បងដែលធ្វើឲ្យយើងពុំអាចប្រែក្លាយដូចជាព្រះវរបិតាយើងដែលគង់នៅស្ថានសួគ៌ ហើយត្រឡប់ទៅកាន់ទីវត្តមានរបស់ទ្រង់វិញ ។ នៅក្នុងលក្ខខណ្ឌនៃជីវិតរមែងស្លាប់ យើងតែងតែធ្លាក់ក្នុងការល្បួង ធ្វើខុសបញ្ញត្តិរបស់ព្រះ ហើយមានបាប ។ … ទោះបីពេលខ្លះអំពើបាបពុំមានផលអាក្រក់ភ្លាមៗក៏ដោយ វាតែងតែនាំទៅរកភាពអព្ភមង្គល ។ អំពើបាបធ្វើឲ្យមានអារម្មណ៍ថាមានការខុសឆ្គង និងខ្មាស់អៀន ។ ដោយសារតែអំពើបាបរបស់យើង យើងពុំអាចត្រឡប់ទៅរស់នៅជាមួយព្រះវរបិតាសួគ៌បានទេ លុះត្រាតែយើងទទួលបានការអភ័យទោស ហើយស្អាតស្អំជាមុនសិន ។
« … ដូចគ្នានឹងសេចក្ដីស្លាប់ខាងរូបកាយដែរ យើងមិនអាចឈ្នះលើឥទ្ធិពលនៃអំពើបាបដោយខ្លួនយើងបានទេ ។ គ្មានអ្វីជួយយើងបានឡើយក្រៅពីដង្វាយធួនរបស់ព្រះយេស៊ូវគ្រីស្ទ » (ប្រកាសដំណឹងល្អរបស់យើង ទំព័រ ៥១ ) ។
ពីមុនព្រះយេស៊ូវប្រសូតមកលើផែនដី បន្ទាប់ពីយ៉ូសែប បានដឹងថាម៉ារីមានកូន នោះទេវតាបានមកជួបគាត់នៅក្នុងសុបិន ។ សូមអាន ម៉ាថាយ ១:២១ដោយរកមើលអ្វីដែលទេវតាអង្គនោះបានប្រកាសប្រាប់ទៅយ៉ូសែប ។
ចេញមកពីអ្វីដែលទេវតានោះបានថ្លែងពីអ្វីដែលព្រះយេស៊ូវនឹងធ្វើ នោះយើងរៀនថា ព្រះយេស៊ូវគ្រីស្ទបានយាងមកដើម្បីសង្គ្រោះយើងពីអំពើបាប ។ សូមសរសេរគោលលទ្ធិនេះនៅក្នុងជួរឈរ « ជីវិតរមែងស្លាប់ » លើតារាងរបស់អ្នក ។
យើងអាចត្រូវបានសង្គ្រោះចេញពីអំពើបាបរបស់យើង ដោយសារដង្វាយធួនរបស់ព្រះយេស៊ូវគ្រីស្ទ ។ ដង្វាយធួននៃព្រះយេស៊ូវគ្រីស្ទ រួមមានការរងទុក្ខ ការសុគត និង ការរស់ឡើងវិញរបស់ព្រះយេស៊ូវគ្រីស្ទ ។
-
សូមឆ្លើយសំណួរខាងក្រោមនេះនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖
-
តើយើងត្រូវធ្វើអ្វីខ្លះដើម្បីទទួលបានការសង្គ្រោះពីអំពើបាបរបស់យើងតាមរយៈដង្វាយធួនរបស់ព្រះយេស៊ូវគ្រីស្ទ ?
-
យោងតាម កិច្ចការ ២:៣២តើយើងត្រូវតែធ្វើអ្វីខ្លះទៀត ?
-
តួនាទីរបស់ព្រះយេស៊ូវគ្រីស្ទនៅក្នុងជីវិតក្រោយពីជីវិតនេះ
តើអ្នកធ្លាប់មានសមាជិកគ្រួសារ ឬ មិត្តភក្តិដ៏ជាទីស្រឡាញ់ស្លាប់ដែរឬទេ ?
ដោយសារចំណេះដឹងរបស់យើងអំពីផែនការនៃសេចក្តីសង្គ្រោះរបស់ព្រះវរបិតាសួគ៌ នោះយើងដឹងថា នៅពេលស្លាប់វិញ្ញាណមនុស្សទាំងអស់ចូលទៅក្នុងពិភពវិញ្ញាណ ។
សូមអាន ពេត្រុសទី ១ ៣:១៨–២០ និង ពេត្រុសទី ១ ៤:៦ដោយរកមើលអ្វីដែលព្រះយេស៊ូវបានធ្វើភ្លាមបន្ទាប់ពីការសុគតរបស់ទ្រង់ ។
សូមមើល គោលលទ្ធិ និង សេចក្តីសញ្ញា ១៣៨:១៨–១៩, ៣០–៣២ដោយរកមើលអ្វីដែលព្រះយេស៊ូវគ្រីស្ទបានធ្វើដើម្បីអនុញ្ញាតឲ្យដំណឹងល្អត្រូវបានប្រកាសដល់មនុស្សគ្រប់គ្នាក្នុងពិភពវិញ្ញាណ ។ (គោលលទ្ធិ និង សេចក្តីសញ្ញា ១៣៨ គឺជាវិវរណៈមួយអំពីពិភពវិញ្ញាណដែលបានទទួលដោយប្រធាន យ៉ូសែប អែហ្វ ស្ម៊ីធ ខណៈដែលលោកកំពុងពិចារណាអំពីការយាងរបស់ព្រះអង្គសង្គ្រោះទៅជួបវិញ្ញាណរបស់មរណជន អំឡុងពេលដែលព្រះកាយរបស់ទ្រង់នៅក្នុងផ្នូរនៅឡើយ ) ។
សូមសង្ខេបនូវអ្វីដែលព្រះយេស៊ូវគ្រីស្ទបានធ្វើដើម្បីអនុញ្ញាតឲ្យដំណឹងល្អត្រូវបានប្រកាសដល់មនុស្សគ្រប់គ្នាក្នុងពិភពវិញ្ញាណ ៖
ព្រះអង្គសង្គ្រោះបានមានព្រះជន្មរស់ឡើងវិញនៅថ្ងៃទីបីបន្ទាប់ពីការសុគតរបស់ទ្រង់ ( សូមមើល កូរិនថូសទី ១ ១៥:៤) ។ នៅពេលបុគ្គលម្នាក់បានរស់ឡើងវិញ នោះវិញ្ញាណ និង រូបកាយរបស់គាត់ត្រូវបានផ្គុំចូលគ្នាវិញ ហើយពុំបែកចេញពីគ្នាទៀតឡើយ ( សូមមើល គ. និង ស. ១៣៨:១៧) ។
ព្រះអម្ចាស់ដែលមានព្រះជន្មរស់ឡើងវិញ
សូមអាន កូរិនថូសទី ១ ១៥:២០–២២ដោយរកមើលពីរបៀបដែលការមានព្រះជន្មឡើងវិញរបស់ព្រះយេស៊ូវគ្រីស្ទមានឥទ្ធិពលដល់យើងម្នាក់ៗ ។
នៅក្នុងតារាងរបស់អ្នកនៅក្នុងជួរឈរ « ជីវិតក្រោយពីជីវិតនេះ » សូមសរសេរគោលលទ្ធិខាងក្រោមនេះ ៖ ដោយសារតែការមានព្រះជន្មរស់ឡើងវិញរបស់ព្រះយេស៊ូវគ្រីស្ទនេះហើយ ទើបមនុស្សលោកទាំងអស់នឹងរស់ឡើងវិញ ។
សូមអាន វិវរណៈ ២០:១២ដោយរកមើលអ្វីដែលនឹងកើតឡើងចំពោះយើងម្នាក់ៗ បន្ទាប់ពីយើងបានរស់ឡើងវិញ ។
បញ្ជីជីវិតអាចតំណាងឲ្យគំនិត និង ទង្វើរបស់មនុស្សម្នាក់នៅក្នុងជីវិតនេះ ក៏ដូចជាកំណត់ត្រាដែលបានរក្សានៅទុកស្ថានសួគ៌អំពីសេចក្ដីសុចរិតផងដែរ ( សូមមើល Bible Dictionary « Book of life ») ។ យើងត្រូវបានជំនុំជម្រះពុំមែនតែទៅលើកិច្ចការរបស់យើងតែម្យ៉ាងទេ ប៉ុន្តែទៅលើគំនិត ពាក្យសម្ដី និង បំណងប្រាថ្នារបស់យើងផងដែរ (សូមមើល ម៉ូសាយ ៤:៣០, អាលម៉ា ១២:១៤, គ. និង ស. ១៣៧:៩ ) ។
សូមអាន យ៉ូហាន ៥:២២ដោយរកមើលថាតើនរណានឹងជំនុំជម្រះយើង ។ ( អ្នកអាចសរសេរ យ៉ូហាន ៥:២២ នៅលើរឹមនៃព្រះគម្ពីររបស់អ្នកក្បែរ វិវរណៈ ២០:១២ ) ។
នៅក្នុងតារាងរបស់អ្នកនៅក្នុងជួរឈរ « ជីវិតក្រោយពីជីវិតនេះ » សូមសរសេរគោលលទ្ធិខាងក្រោមនេះ ៖ ព្រះយេស៊ូវគ្រីស្ទនឹងកាត់សេចក្ដីមនុស្សលោកទាំងអស់ ។
គោលបំណងដ៏សំខាន់បំផុតនៃផែនការរបស់ព្រះវរបិតាសួគ៌គឺផ្ដល់ឱកាសឲ្យយើងទទួលបានជីវិតដ៏នៅអស់កល្បជានិច្ច ឬភាពតម្កើងឡើង ដែលវាមានន័យថាការប្រែក្លាយដូចជាព្រះវរបិតាសួគ៌ ហើយរស់នៅជាមួយនឹងទ្រង់ក្នុងក្រុមគ្រួសារដ៏នៅអស់កល្បជានិច្ចជារៀងដរាបតទៅ ។ សូមគិតអំពីគ្រួសារដែលអ្នកមានឥឡូវនេះ ព្រមទាំងគ្រួសារដែលអ្នករំពឹងថានឹងមាននៅពេលអនាគត ។
-
នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក សូមសរសេរហេតុផលដែលអ្នកអាចរស់នៅជាមួយនឹងព្រះវរបិតាសួគ៌ និងគ្រួសាររបស់អ្នកជារៀងរហូតគឺជារឿងដ៏សំខាន់សម្រាប់អ្នក ។
សូមអាន យ៉ូហាន ៣:៥, ១៦–១៧ដោយរកមើលអ្វីដែលយើងម្នាក់ៗត្រូវធ្វើដើម្បីទទួលជីវិតដ៏នៅអស់កល្បជានិច្ច ( ឬអស់កល្បអស់កាលជានិច្ច ) ។
ដើម្បីជឿលើព្រះរាជបុត្រាបង្កើតតែមួយគឺមានន័យថាការអនុវត្តសេចក្ដីជំនឿលើព្រះយេស៊ូវគ្រីស្ទ ហើយរស់នៅស្របតាមដំណឹងល្អរបស់ទ្រង់ ។
នៅក្នុងតារាងរបស់អ្នកនៅក្នុងជួរឈរ « ជីវិតក្រោយពីជីវិតនេះ » សូមសរសេរគោលលទ្ធិខាងក្រោមនេះ ៖ ប្រសិនបើយើងអនុវត្តសេចក្ដីជំនឿលើព្រះយេស៊ូវគ្រីស្ទ ហើយរស់នៅស្របតាមដំណឹងល្អរបស់ទ្រង់ នោះទើបយើងអាចទទួលបានជីវិតដ៏នៅអស់កល្បជានិច្ច ។
-
សូមគិតម្តងទៀតពីសំណួរដែលបានសួរនៅដើមមេរៀន ៖ « តើអ្នកនឹងឆ្លើយដូចម្តេច ប្រសិនបើមនុស្សម្នាក់សួរអ្នកថាហេតុអ្វីបានជាព្រះយេស៊ូវគ្រីស្ទជាអង្គដ៏សំខាន់ចំពោះអ្នក ? » សូមសរសេរចម្លើយរបស់អ្នកចំពោះសំណួរទាំងនេះនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ដោយផ្អែកលើអ្វីដែលអ្នកបានរៀន និង យល់ដឹងអំឡុងពេលការសិក្សារបស់អ្នកនាថ្ងៃនេះ ។
សូមគិតពីការប្រើតារាងដែលអ្នកបានបង្កើតនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ដើម្បីបង្រៀនគ្រួសាររបស់អ្នក ឬ មនុស្សដទៃអំពីតួនាទីរបស់ព្រះយេស៊ូវគ្រីស្ទ នៅក្នុងផែនការនៃសេចក្តីសង្គ្រោះរបស់ព្រះវរបិតាសួគ៌ ។
-
សូមសរសេរឃ្លាខាងក្រោមនេះ ពីខាងក្រោមកិច្ចការថ្ងៃនេះនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖
ខ្ញុំបានសិក្សាមេរៀនអំពី « ផែនការនៃសេចក្តីសង្គ្រោះ » ហើយបានបញ្ចប់វានៅ ( កាលបរិច្ឆេទ ) ។
សំណួរ គំនិត និង ការយល់ដឹងបន្ថែមដែលខ្ញុំចង់ចែកចាយជាមួយគ្រូរបស់ខ្ញុំ ៖