មេរៀនទី ១ ៖ ថ្ងៃទី ២
តួនាទីរបស់សិស្ស
សេចក្តីផ្តើម
ព្រះវិញ្ញាណបរិសុទ្ធ គ្រូបង្រៀន និង សិស្សមានតួនាទីសំខាន់មួយនៅក្នុងការរៀនសូត្រដំណឹងល្អ ។ មេរៀននេះអាចជួយអ្នកឲ្យយល់ពីតួនាទីទាំងនេះ ដើម្បីអ្នកអាចទទួលបានភាពជោគជ័យនៅក្នុងការខិតខំរៀនសូត្ររបស់ខ្លួន ។ អ្នកប្រហែលជាត្រូវរំឭកគោលការណ៍នានា ដែលបានបង្រៀននៅក្នុងមេរៀននេះជាទៀងទាត់ ដើម្បីរំឭកខ្លួនឯងអំពីទំនួលខុសត្រូវរបស់ខ្លួនក្នុងការរៀនសូត្រដំណឹងល្អ ។
តួនាទីរបស់ព្រះវិញ្ញាណបរិសុទ្ធ គ្រូបង្រៀន និង សិស្សនៅក្នុងការរៀនសូត្រដំណឹងល្អ
សូមពិចារណាអំពីស្ថានភាពខាងក្រោម ៖
មានយុវនារីម្នាក់ទទួលបានការបំផុសគំនិត និង ការស្អាងឡើង នៅពេលនាងបានរៀនមេរៀនថ្នាក់សិក្ខាសាលានៅផ្ទះរបស់នាង ។ នាងបានទទួលអារម្មណ៍ពីព្រះចេស្តានៃព្រះវិញ្ញាណបរិសុទ្ធ ។ នាងមានអំណរគុណសម្រាប់អ្វីៗដែលនាងរៀន និង រិះគិតពីរបៀបនានាដើម្បីអនុវត្តចំណុចទាំងនោះក្នុងជីវិតរបស់នាង ។ យុវនារីម្នាក់ទៀតបានបញ្ចប់មេរៀនដូចគ្នានោះ ប៉ុន្តែជារឿយៗនាងមានភាពធុញទ្រាន់ ហើយមានអារម្មណ៍ថានាងរៀនអ្វីមិនបានច្រើនទេពីមេរៀនទាំងនោះ ។
-
សូមឆ្លើយសំណួរខាងក្រោមនេះ នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖ តើហេតុផលមួយចំនួនណាខ្លះដែលអាចកើតមាន ជាមូលហេតុដែលធ្វើឲ្យយុវនារីទាំងពីរនេះមានបទពិសោធន៍ផ្សេងគ្នា ខណៈដែលពួកគេរៀនចប់មេរៀនថ្នាក់សិក្ខាសាលាតែមួយដូចគ្នានោះ ?
នៅពេលអ្នកសិក្សាមេរៀនថ្ងៃនេះ សូមរកមើលគោលលទ្ធិ និង គោលការណ៍នានាដែលអាចជួយអ្នកបំពេញនូវតួនាទីរបស់ខ្លួនក្នុងនាមជាសិស្សថ្នាក់សិក្ខាសាលា ហើយពង្រឹងទីបន្ទាល់របស់ខ្លួនអំពីដំណឹងល្អនៃព្រះយេស៊ូវគ្រីស្ទ ។
មានបុគ្គលបីរូបដែលមានតួនាទីយ៉ាងសំខាន់នៅក្នុងបរិយាកាសរៀនសូត្រដំណឹងល្អដូចជាថ្នាក់សិក្ខាសាលានេះគឺ ៖ ព្រះវិញ្ញាណបរិសុទ្ធ គ្រូបង្រៀន និង សិស្ស ។
សូមអាន យ៉ូហាន ១៤:២៦ និង យ៉ូហាន ១៦:១៣ដោយរកមើលតួនាទីមួយចំនួននៃព្រះវិញ្ញាណបរិសុទ្ធ ។
សេចក្ដីពិតមួយដែលយើងអាចរៀនពីខគម្ពីរទាំងនេះអំពីតួនាទីរបស់ព្រះវិញ្ញាណបរិសុទ្ធនោះគឺថា ព្រះវិញ្ញាណបរិសុទ្ធបង្រៀនសេចក្តីពិត ។
ផ្អែកលើអ្វីដែលអ្នកមានបទពិសោធន៍នៅក្នុងជីវិត តើយើងអាចដឹងបានដោយរបៀបណា នៅពេលព្រះវិញ្ញាណបរិសុទ្ធកំពុងបង្រៀនសេចក្ដីពិតដល់យើង ? ( អ្នកអាចឃើញថា គោលលទ្ធិ និង សេចក្ដីសញ្ញា ៨:២-៣ អាចជួយឆ្លើយសំណួរនេះ ) ។
សូមអាន គោលលទ្ធិ និង សេចក្តីសញ្ញា ៥០:១៣-១៤រកមើលតួនាទីរបស់គ្រូបង្រៀនដំណឹងល្អ ។ សូមកត់ចំណាំថាខគម្ពីរទាំងនេះត្រូវបានប្រទានឲ្យទៅសមាជិកសាសនាចក្រជំនាន់មុនដែលត្រូវបានតែងតាំងឲ្យបង្រៀនដំណឹងល្អ ។
តើតួនាទីរបស់គ្រូបង្រៀនដំណឹងល្អមានអ្វីខ្លះ ?
សូមអាន នីហ្វៃទី ២ ៣៣:១ដោយរកមើលថាព្រះវិញ្ញាណបរិសុទ្ធបានធ្វើអ្វី នៅពេលសេចក្ដីពិតត្រូវបានបង្រៀនដោយព្រះចេស្ដារបស់ទ្រង់ ។
យោងតាម នីហ្វៃទី ២ ៣៣:១តើព្រះវិញ្ញាណបរិសុទ្ធធ្វើអ្វីសម្រាប់យើង ?
សូមអាន គោលលទ្ធិ និង សេចក្តីសញ្ញា ៨៨:១១៨ដោយរកមើលនូវរបៀបដែលយើងត្រូវតែស្វែងរកការរៀនសូត្រ ។
របៀបមួយដែលយើងត្រូវតែស្វែងរកការរៀនសូត្រនោះគឺតាមរយៈសេចក្ដីជំនឿ ។ អែលឌើរ ដេវីឌ អេ បែដណា ក្នុងកូរ៉ុមនៃពួកសាវកដប់ពីរនាក់បានពន្យល់ពីអ្វីដែលកើតឡើងនៅពេលយើងស្វែងរកការរៀនសូត្រដោយសេចក្តីជំនឿ ។ បន្ទាប់ពីដកស្រង់ពី នីហ្វៃទី ២ ៣៣:១អែលឌើរ បែដណា បានមានប្រសាសន៍ ៖ « សូមកត់ចំណាំពីរបៀបដែលព្រះចេស្ដានៃព្រះវិញ្ញាណនាំសារលិខិត ទៅដល់ ប៉ុន្ដែមិនមែនចាំបាច់ ទៅក្នុង ដួងចិត្តនោះទេ ។ « គ្រូបង្រៀនម្នាក់អាចពន្យល់ បង្ហាញ លួងលោម ហើយធ្វើទីបន្ទាល់ និងធ្វើយ៉ាងដូច្នោះដោយមានអំណាច និងប្រសិទ្ធភាពខាងវិញ្ញាណ ។ ទោះយ៉ាងនេះក៏ដោយ នៅទីបំផុតសារលិខិតមួយ និង សាក្សីនៃព្រះវិញ្ញាណបរិសុទ្ធអាចជា្របចូលទៅក្នុងដួងចិត្តបាន ដរាបណាអ្នកទទួលមា្នក់អនុញ្ញាតឲ្យវាចូលតែប៉ុណ្ណោះ ។ ការរៀនសូត្រដោយសេចក្ដីជំនឿបើកផ្លូវ ចូលទៅក្នុង ដួងចិត្ត » ( « Seek Learning by Faith » Ensign ខែ កញ្ញា ឆ្នាំ ២០០៧ ទំព័រ ៦១ ) ។
ចេញពីសេចក្តីថ្លែងការណ៍នេះយើងរៀនថា ប្រសិនបើយើងខិតខំរៀនសូត្រដោយសេចក្ដីជំនឿ នោះទើបយើងយាងព្រះវិញ្ញាណបរិសុទ្ធឲ្យចូលមកក្នុងដួងចិត្តរបស់យើងដើម្បីបង្រៀន ហើយថ្លែងទីបន្ទាល់ពីសេចក្ដីពិត ។
-
សេចក្ដីជំនឿគឺលើសពីជំនឿអកម្មទៅទៀត ។ យើងបង្ហាញសេចក្ដីជំនឿរបស់យើងតាមរយៈសកម្មភាព ។ សូមឆ្លើយសំណួរខាងក្រោមនេះ នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖ តើអ្នកគិតថាយើងអាចធ្វើអ្វីខ្លះដើម្បីរៀនសូត្រដោយសេចក្ដីជំនឿនោះ ?
សូមស្រមៃថាអ្នកពុំធ្លាប់លេងបាល់ទាល់ទេ ប៉ុន្តែគ្រូបង្រៀនម្នាក់បានសន្យានឹងអ្នកថាគាត់អាចបង្រៀនអ្នកឲ្យចេះលេងបាល់ទាត់យ៉ាងល្អដើម្បីលេងក្នុងក្រុមកីឡាបាល់ទាត់មួយបាន ។ អ្នកជឿលើសមត្ថភាពរបស់គ្រូបង្រៀននោះដើម្បីបង្រៀន និងជឿលើសមត្ថភាពរបស់អ្នកដើម្បីរៀន ។ គ្រូបង្រៀននាំអ្នកទៅទីលានបាល់ទាត់ ។ គាត់ពន្យល់ ហើយបង្ហាញពីរបៀបបណ្ដើរបាល់ ប៉ុន្តែគាត់ពុំអនុញ្ញាតឲ្យអ្នកសាកល្បងធ្វើវាដោយខ្លួនឯងឡើយ ។ ក្រោយមកគាត់ពន្យល់ពីរបៀបបញ្ជូនបាល់ និង បង្ហាញវាដោយបញ្ចូនបាល់នោះមកឲ្យអ្នក ។ ប៉ុន្តែ ពីមុនអ្នកមានឱកាសសាកល្បងបញ្ចូនបាល់ត្រឡប់ឲ្យគាត់វិញនោះ គ្រូបង្រៀនរត់មកកាន់អ្នក ហើយដណ្តើមយកបាល់នោះមកវិញ ។ គាត់ធ្វើដូចគ្នាសម្រាប់ការបោះបាល់ចូលវិញ បន្ទាប់ពីវាបានចេញទៅខាងក្រៅទីលាន ។ គាត់អរគុណសម្រាប់ពេលវេលារបស់អ្នក ហើយបានដើរចេញទៅ ។
បន្ទាប់ពីបានរៀនមេរៀនបែបនេះហើយ តើអ្នកមានអារម្មណ៍ថាត្រូវត្រៀមខ្លួនបែបណាដើម្បីសាកល្បងសម្រាប់ក្រុមបាល់ទាត់មួយ ? ហេតុអ្វី ?
ទោះបីជាការរៀនសូត្រ និង ការមើលអ្នកដទៃលេងបាល់បាត់អាចជួយក្តី ប្រសិនបើអ្នកចង់អភិវឌ្ឍជំនាញដែលចាំបាច់ដើម្បីមានភាពជោគជ័យក្នុងកីឡាបាល់ទាត់ តើអ្នកត្រូវធ្វើអ្វីខ្លះ ?
តើគំរូនេះអាចទាក់ទិននឹងការរៀនសូត្រដោយសេចក្ដីជំនឿបានដោយរបៀបណា ?
( ការជឿ និង ការទុកចិត្តថាព្រះវិញ្ញាណអាចបង្រៀនយើងតែម្យ៉ាងគឺពុំគ្រប់គ្រាន់ឡើយ ។ ដើម្បីទទួលបានចំណេះដឹងពីសេចក្ដីពិតរបស់ព្រះ យើងក៏ត្រូវខិតខំរៀនសូត្រ ហើយអនុវត្តអ្វីដែលយើងរៀនសូត្រផងដែរ ។ អែលឌើរ បែដណា បានបង្រៀនអំពីសកម្មភាពដែលបំផុសឲ្យមានជំនឿដែលទាក់ទងនឹងការរៀនសូត្រដោយសេចក្តីជំនឿ ៖
« អ្នករៀនម្នាក់អនុវត្តសិទ្ធិជ្រើសរើសរបស់ពួកគេ តាមរយៈការធ្វើសកម្មភាពស្របទៅតាមគោលការណ៍ត្រឹមត្រូវ បើកដួងចិត្តពួកគេឲ្យព្រះវិញ្ញាណបរិសុទ្ធ ហើយយាងការបង្រៀនរបស់ទ្រង់ អំណាចនៃការថ្លែងទីបន្ទាល់ និងសាក្សីបញ្ជាក់របស់ទ្រង់ ។ ការរៀនសូត្រដោយសេចក្ដីជំនឿ តម្រូវឲ្យមានកិច្ចខិតខំខាងវិញ្ញាណ ខាងសតិអារម្មណ៍ និង ខាងរូបកាយ ហើយពុំមែនគ្រាន់តែជាការទទួលភាពអកម្មនោះទេ ។ វាគឺនៅក្នុងសេចក្តីស្មោះត្រង់ និង ភាពខ្ជាប់ខ្ជួននៃសកម្មភាពដែលបានបំផុសគំនិតយើងឲ្យមានសេចក្ដីជំនឿនោះ ដែលយើងបង្ហាញចំពោះព្រះវរបិតាសួគ៌ និង ព្រះរាជបុត្រារបស់ទ្រង់ ព្រះយេស៊ូវគ្រីស្ទ ជាការស្ម័គ្រចិត្តរបស់យើងដើម្បីរៀន និង ទទួលយកការបង្ហាត់បង្រៀនពីព្រះវិញ្ញាណបរិសុទ្ធ ។ …
« … ការរៀនសូត្រដោយសេចក្ដីជំនឿ តម្រូវឲ្យមានទាំង ‹ ចិត្ត និង គំនិតដែលស្ម័គ្រតាម › ( គ. និង ស. ៦៤:៣៤ ) ។ ការរៀនសូត្រដោយសេចក្ដីជំនឿ គឺជាលទ្ធផលនៃព្រះវិញ្ញាណបរិសុទ្ធ ដែលនាំព្រះចេស្ដានៃព្រះបន្ទូលនៃព្រះមកកាន់ដួងចិត្តផង និង ចូលដល់ក្នុងដួងចិត្តផង ។ ការរៀនសូត្រដោយសេចក្ដីជំនឿ ពុំអាចត្រូវបានផ្ទេរពីគ្រូបង្រៀនទៅសិស្សម្នាក់តាមរយៈការបង្រៀន ការបង្ហាញ ឬតាមសកម្មភាពក្នុងថ្នាក់រៀនទេ តែសិស្សម្នាក់ត្រូវតែអនុវត្តសេចក្ដីជំនឿ និងធ្វើសកម្មភាព ដើម្បីទទួលបានចំណេះដឹងសម្រាប់ខ្លួនគាត់ » (« Seek Learning by Faith »ទំព័រ ៦៤ ) ។
សូមរំឭកឡើងវិញពីយុវនារីដែលបានពិពណ៌នានៅដើមមេរៀន ដែលជារឿយៗនាងមានភាពធុញទ្រាន់ ហើយមានអារម្មណ៍ថានាងរៀនអ្វីមិនបានច្រើនទេពីមេរៀនថ្នាក់សិក្ខាសាលាដែលសិក្សានៅផ្ទះនោះ ។ សូមស្រមៃថា គាត់បានបង្ហាញកង្វល់ទាំងនេះដល់អ្នក ។ ចេញពីអ្វីដែលនាងបាននិយាយកាលពីដើម អំពីរបៀបដែលនាងបញ្ចប់មេរៀន នោះអ្នកបានឃើញថាជាញយៗនាងសរសេរចម្លើយកិច្ចការខ្លួនយ៉ាងរាក់កំផែលនៅក្នុងសៀវភៅកំណត់ហេតុការសិក្សាព្រះគម្ពីររបស់ខ្លួន ហើយជាញឹកញាប់នាងត្រូវបានបង្វែរអារម្មណ៍ចេញដោយចំណាប់អារម្មណ៍ផ្សេងៗ នៅពេលនាងរៀនមេរៀនរបស់ខ្លួន ។ នាងក៏ពុំបានចូលរួមក្នុងសកម្មភាពថ្នាក់ ឬ ការពិភាក្សាគ្នាក្នុងថ្នាក់អំឡុងពេលនៃថ្នាក់រៀនរៀងរាល់សប្តាហ៍ផងដែរ ។
-
នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក សូមសរសេរឧទាហរណ៍ពីកិច្ចការបី ឬ បួនខាងវិញ្ញាណ សតិអារម្មណ៍ និង កម្លាំងកាយ ដែលអ្នកនឹងលើកទឹកចិត្តដល់យុវនារីម្នាក់នេះ ឲ្យអនុវត្តតាម ដើម្បីនាងអាចទទួលបានប្រយោជន៍ពីការរៀនសូត្រដោយសេចក្តីជំនឿ ។
គំរូមកពីខ្សែជីវិតរបស់សាវកពេត្រុស បង្ហាញយើងពីរបៀបដែលការខិតខំរៀនសូត្រដោយសេចក្ដីជំនឿយាងព្រះវិញ្ញាណបរិសុទ្ធចូលមកក្នុងដួងចិត្តយើងដើម្បីបង្រៀន ហើយថ្លែងទីបន្ទាល់ពីសេចក្ដីពិត ។ សូមអាន ម៉ាថាយ ២:១៨-២០ដោយស្វែងរកអញ្ជើញរបស់ព្រះអង្គសង្គ្រោះចំពោះពេត្រុស និង បងប្រុសរបស់គាត់អនទ្រ ។
តើព្រះអង្គសង្គ្រោះបានហៅពេត្រុស និង អនទ្រេឲ្យធ្វើអ្វីខ្លះ ?
ព្រះយេស៊ូវគ្រីស្ទបានហៅពេត្រុស និង អនទ្រឲ្យដើរតាមទ្រង់ ។
តើចម្លើយរបស់ពួកលោកគឺជាគំរូមួយនៃការខិតខំរៀនសូត្រដោយសេចក្ដីជំនឿបានយ៉ាងដូចម្ដេច ?
ទង្វើរបស់ពេត្រុសក្នុងការធ្វើតាមព្រះយេស៊ូវគ្រីស្ទបានអនុញ្ញាតឲ្យលោកបាននៅជិតនឹងព្រះអង្គសង្គ្រោះនៅក្នុងការបម្រើរបស់ទ្រង់ក្នុងជីវិតរមែងស្លាប់ ។ គាត់មានឯកសិទ្ធិស្តាប់ឮជាទៀងទាត់នូវការបង្រៀនរបស់ព្រះអង្គសង្គ្រោះ និង ឃើញទ្រង់សម្តែងអព្ភូតហេតុជាច្រើន ។ ពេត្រុសថែមទាំងបានដើរនៅលើទឹកដោយការអញ្ជើញរបស់ព្រះអង្គសង្គ្រោះទៀតផង ( សូមមើល ម៉ាថាយ ១៤:២៨–២៩) ។
នាគ្រាមួយនោះ ព្រះយេស៊ូវបានសួរសំណួរពីរដល់ពួកសិស្សរបស់ទ្រង់ ។ សូមអាន ម៉ាថាយ ១៦:១៣-១៧ដោយរកមើលសំណួរផ្ទាល់ខ្លួនដែលព្រះអង្គសង្គ្រោះបានសួរពួកសិស្សរបស់ទ្រង់ និង របៀបដែលពេត្រុសបានឆ្លើយនឹងសំណួរនោះ ។
សូមកត់ចំណាំថានៅក្នុង ខ ១៧ ព្រះអង្គសង្គ្រោះបានពន្យល់អ្វីខ្លះអំពីរបៀបដែលពេត្រុសបានទទួលចំណេះដឹងរបស់លោក ។ ពេត្រុសបានទទួលចំណេះដឹងរបស់លោក តាមរយៈវិវរណៈមកពីព្រះវរបិតាសួគ៌ដែលបានមកតាមរយៈព្រះចេស្តានៃព្រះវិញ្ញាណបរិសុទ្ធ ។ សូមពិចារណាពីរបៀបដែលបទពិសោធន៍របស់ពេត្រុសគឺជាការឆ្លុះបញ្ចាំងមួយពីសេចក្ដីពិតដែលយើងដឹងនៅក្នុងមេរៀននេះ ។
-
សូមបំពេញកិច្ចការខាងក្រោមនេះនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖
-
ពិពណ៌នាពីគ្រាមួយដែលអ្នកបានស្វែងរកការរៀនសូត្រដោយសេចក្ដីជំនឿ ។ តើព្រះវិញ្ញាណបរិសុទ្ធបានបំពេញតួនាទីរបស់ទ្រង់នៅក្នុងការរៀនសូត្រអំពីដំណឹងល្អយ៉ាងដូចម្ដេច នៅពេលអ្នកបានធ្វើដូច្នេះ ?
-
តើអ្នកនឹងធ្វើអ្វីខ្លះដើម្បីរៀនសូត្រដោយសេចក្ដីជំនឿ ហើយយាងព្រះវិញ្ញាណបរិសុទ្ធឲ្យចូលមកក្នុងដួងចិត្តរបស់អ្នកដើម្បីបង្រៀន ហើយថ្លែងទីបន្ទាល់ពីសេចក្ដីពិតនោះ ? ប្រសិនបើអ្នកត្រូវការគំនិតជាក់លាក់មួយចំនួនពីអ្វីដែលអ្នកអាចធ្វើ នោះអ្នកអាចជ្រើសរើសផ្តោតលើសកម្មភាពមួយ ឬ ពីរខាងក្រោមនេះ ៖
-
សិក្សាព្រះគម្ពីរជាប្រចាំថ្ងៃ ។
-
អភិវឌ្ឍជំនាញក្នុងការសិក្សាព្រះគម្ពីរ ដូចជាគូសសញ្ញាសំគាល់ ធ្វើសេចក្តីយោងបទគម្ពីរ និងការប្រើប្រាស់ជំនួយនៃការសិក្សាព្រះគម្ពីរ ។
-
ចូលរួមនៅក្នុងសកម្មភាពរៀនសូត្រដោយគារវភាព និង ដោយយកចិត្តទុកដាក់ ហើយចៀសវាងការរំខាននានា ។
-
បញ្ចប់សកម្មភាពរៀនសូត្រនៅក្នុងមេរៀននីមួយៗប្រកបដោយអត្ថន័យ ។
-
កត់ត្រាពីអារម្មណ៍ គំនិតបន្ថែមទៀត ហើយសរសេរទុកនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ។
-
ពន្យល់គោលលទ្ធិ និង គោលការណ៍នៃដំណឹងល្អដល់មនុស្សដទៃទៀត កត់ត្រា ហើយចែកចាយគំនិត និង បទពិសោធន៍ដែលទាក់ទិននឹងគោលលទ្ធិ និង គោលការណ៍នៃដំណឹងល្អ ហើយថ្លែងទីបន្ទាល់ពីសេចក្ដីពិតពេញលេញនៃគោលលទ្ធិ និង គោលការណ៍នៃដំណឹងល្អ ។
-
អនុវត្តគោលលទ្ធិ និងគោលការណ៍នៃដំណឹងល្អនៅក្នុងជីវិតរបស់អ្នក ( សូមមើល យ៉ូហាន ៧:១៧) ។
-
-
នៅពេលអ្នកព្យាយាមរៀនសូត្រដោយសេចក្តីជំនឿនៅក្នុងបទពិសោធន៍នៃថា្នក់សិក្ខាសាលារបស់អ្នក នោះអ្នកនឹងធ្វើតាមការទូន្មានរបស់ប្រធាន ថូម៉ាស អេស ម៉នសុន ៖ « យុវវ័យអើយ ! ខ្ញុំសុំឲ្យអ្នកចូលរៀនថ្នាក់សិក្ខាសាលា ។ ចូរសិក្សាព្រះគម្ពីររបស់អ្នកជារៀងរាល់ថ្ងៃ ។ ចូរស្ដាប់គ្រូបង្រៀនរបស់អ្នកដោយយកចិត្តទុកដាក់ ។ ចូរអនុវត្តអ្វីដែលអ្នករៀនប្រកបដោយការអធិស្ឋាន » (« Participate in Seminary » ថ្ងៃទី ១២ ខែ សីហា ឆ្នាំ ២០១១ seminary.lds.org) ។
-
សូមសរសេរឃ្លាខាងក្រោមនេះ ពីខាងក្រោមកិច្ចការថ្ងៃនេះនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖
ខ្ញុំបានសិក្សាមេរៀនអំពី « តួនាទីរបស់សិស្ស » ហើយបានបញ្ចប់វានៅ ( កាលបរិច្ឆេទ ) ។
សំណួរ គំនិត និង ការយល់ដឹងបន្ថែមដែលខ្ញុំចង់ចែកចាយជាមួយគ្រូរបស់ខ្ញុំ ៖