Aupuru i te ta’ata nā roto i te mau pupu autahu’ara’a a Melehizedeka ’e te Sōtaiete Tauturu ha’apūaihia
Te ʼĒkalesia ʼa Iesu Mesia i te Feiā Mo’a i te Mau Mahana Hopeʼa nei
Te piha tōro’a o te Peresidenira’a Mātāmua
47 East South Temple Street, Salt Lake City, Utah 84150-1200
2 nō ’Ēperēra 2018
Nā : Te mau hui mana fa’atere rahi ; te mau peresidenira’a rahi o te mau pupu tauturu ; te mau Hitu ’Ahuru ārea ; te mau peresideni titi, misiōni ’e mata’eina’a ; te mau ’ēpisekōpo ’e te mau peresideni ’āma’a ; te mau ’āpo’ora’a titi ’e pāroita
(’Ia tai’ohia i roto i te purera’a ’ōro’a)
E te mau taea’e ’e te mau tuahine here ē,
Aupuru i te ta’ata nā roto i te mau pupu autahu’ara’a a Melehizedeka ’e te Sōtaiete Tauturu ha’apūaihia
’Ua fa’ahi’o te tāvinira’a a te Fa’aora i te huru o nā ture rahi e piti : « Hina’aro ’oe i tō Atua ia Iehova ma tō ’ā’au ato’a, ’e ma tō vārua ato’a, ’e ma tō mana’o ato’a » ’e « E aroha atu ’oe i tō ta’ata tupu, mai tō aroha ia ’oe iho na » (Mataio 22:37, 39) Mai te au i te reira vārua, ’ua ha’api’i ato’a Iesu : « ’O ’outou nei tei mā’itihia e au ’ia [aupuru] i teie nei feiā » (3 Nephi 13:25)
’Ei rōtahira’a i te mau tauto’ora’a a te mau pupu autahu’ara’a a Melehizedeka ’e a te mau Sōtaiete Tauturu i ni’a i te aupura’a mai tei ha’api’ihia e te Fa’aora ; tē fa’aara atu nei mātou i te mau fa’atanora’a i muri nei :
- I te pae o te pāroita, hō’ē pupu autahu’ara’a a Melehizedeka. E ’āmuihia i teienei te mau melo nō te pupu peresibutero ’e nō te pupu tahu’a rahi i roto hō’ē pupu ma te hō’ē noa peresidenira’a. E parauhia te reira pupu, te « pupu peresibutero », ’e e fa’a’orehia te mau pupu tahu’a rahi pāroita.
- I te pae o te titi, hō’ē pupu tahu’a rahi. E tāmau noa te peresidenira’a titi i te tāvini ’ei peresidenira’a nō te pupu tahu’a rahi. Te mau melo o te reira pupu, ’o te mau tahu’a rahi noa ïa e tāvini ra i roto i te peresidenira’a titi, te ’episekōpora’a, te ’āpo’ora’a teitei ’e te patereareha e ’ohipa ra.
- E mono te aupurura’a i te hāhaerera’a ’utuāfare ’e te hāhaerera’a a te mau tuahine. I teienei, e riro nā fa’anahora’a ta’a ’ē o te hāhaerera’a ’utuāfare a te mau taea’e ’e a te mau tuahine ’ei tauto’ora’a hō’ē e parauhia te « aupurura’a », e ha’apa’ohia e nā peresidenira’a pupu peresibutero ’e Sōtaiete Tauturu i raro a’e i te fa’aterera’a a te ’episekōpo. Te aupurura’a, ’o te ha’apa’ora’a ïa ia vetahi ’ē mai te Mesia te huru, ’o te tauturura’a ’ia pāhono i tō rātou mau hina’aro pae vārua ’e pae tino.
- Fa’aō i te feiā ’āpī i roto i te aupurura’a. E fa’aōhia te mau Tarona ’e te mau Roti i roto i te aupurura’a ’ei ’āpiti nō te mau tuahine o te Sōtaiete Tauturu, ’e e tāmau noa te mau tahu’a ’e te mau ha’api’i ’ei ’āpiti nō te mau taea’e tei mau i te autahu’ara’a a Melehizedeka.
E ti’a i te mau fa’atanora’a pupu autahu’ara’a ’ia rave-’oi’oi-hia. E tītauhia paha te tahi taime nō te fa’atupura’a i te mau tauira’a nō te aupurura’a, e ti’a rā ’ia fa’anaho-’oi’oi-hia te reira. E roa’a te mau ha’amāramaramara’a hau atu i ni’a ia ministering.lds.org/tah.
Ma te here mau,
Te Peresidenira’a Mātāmua