Ngāue Fakaetauhi ʻa e Kōlomu Lakanga Taulaʻeiki Faka-Melekisēteki Kuo Fakamālohiá pea mo e Fineʻofá
Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní
ʻŌfisi ʻo e Kau Palesitenisī ʻUluakí
47 East South Temple Street, Salt Lake City, Utah 84150-1200
2 ʻEpeleli 2018
Ki he: Kau Taki Māʻolungá; Kau Palesitenisī Lahi ʻo e Ngaahi Houalotú; Kau Fitungofulu Fakaʻēliá; Palesiteni Fakasiteiki, Fakamisiona mo e Fakavahefonua; Pīsope mo e Palesiteni Fakakolo; Ngaahi Fakataha Alēlea ʻa e Siteikí mo e Uōtí
(Ke lau ʻi he houalotu sākalamēnití)
Siʻi Kāinga ʻOfeina:
Ngāue Fakaetauhi ʻa e Kōlomu Lakanga Taulaʻeiki Faka-Melekisēteki Kuo Fakamālohiá pea mo e Fineʻofá
ʻOku hanga ʻe he ngāue fakaetauhi ʻa e Fakamoʻuí, ʻo faʻifaʻitaki mai ʻa e ongo fekau lahí: “Ke ke ʻofa ki [he ʻEikí] ko ho ʻOtuá ʻaki ho laumālié kotoa, mo hoʻo moʻuí kotoa, mo ho lotó kotoa” pea “Ke ke ʻofa ki ho kaungāʻapí ʻo hangē pē ko koé” (Mātiu 22:37, 39). Naʻe akonaki foki ʻe Sīsū ʻi he laumālie ko iá ʻo pehē, “Ko kimoutolu ʻa e faʻahinga kuó u fili ke tauhi ki he kakai ní” (3 Nīfai 13:25).
Ke fakatefito e ngaahi ngāue ʻa e ngaahi kōlomu ʻo e Lakanga Taulaʻeiki Faka-Melekisētekí mo e Fineʻofá ʻi he ngāue fakaetauhí ʻo hangē ko ia ne akoʻi ʻe he Fakamoʻuí, ʻoku mau fanongonongo atu ai e ngaahi liliu ko ʻení:
- ʻI he lēvolo ʻo e uōtí, ʻe taha pē kōlomu Lakanga Taulaʻeiki Faka-Melekisētekí. ʻOku fakatahaʻi he taimí ni ʻa e kau mēmipa ʻo e kōlomu ʻo e kaumātuʻá mo e kulupu ʻo e kau taulaʻeiki lahí, ki ha kōlomu mo e kau palesitenisī pē ʻe taha. ʻOku ui ʻa e kōlomú ko e “kōlomu kaumātuʻá,” pea ʻoku fakangata leva e kulupu taulaʻeiki lahi ʻa e uōtí.
- ʻI he lēvolo ʻo e siteikí, ʻe taha pē ʻa e kōlomu taulaʻeiki lahí. ʻOku hokohoko atu pē e kei hoko e kau palesitenisī fakasiteikí ko e kau palesitenisī ʻo e kōlomu ʻo e kau taulaʻeiki lahí. Ko e kau mēmipa ʻo e kōlomu ko iá ʻa e kau taulaʻeiki lahi pē ʻoku nau lolotonga ngāue ʻi he kau palesitenisī fakasiteikí, kau pīsopelikí, fakataha alēlea maʻolungá, mo e kau pēteliake ʻoku lolotonga ngāué.
- Fetongi ʻe he ngāue fakaetauhí, ʻa e faiako fakaʻapí mo e faiako ʻaʻahí. ʻOku hoko he taimí ni e polokalama ne ui kimuʻa ko e faiako fakaʻapí mo e faiako ʻaʻahí ko ha ngāue ʻoku fakafekauʻaki ʻo ʻo ui ko e “ngāue fakaetauhí, ʻo tokangaʻi ʻe he kau palesitenisī ʻo e kōlomu kaumātuʻá mo e Fineʻofá, ʻo fakatatau mo e fakahinohino ʻa e pīsopé. Ko e ngāue fakaetauhí ko hono tokangaekina faka-Kalaisi ia ʻo e niʻihi kehé mo tokoni ke feau ʻenau ngaahi fie maʻu fakalaumālie mo fakatuʻasinó.
- Fakakau e toʻu tupú ʻi he ngāue fakaetauhí. ʻE malava ke fakakau e Loumailé mo e Maea Meití ʻi he ngāue fakaetauhí ke nau hoa mo e kau Fineʻofá, kae hokohoko atu pē e hoa ʻa e kau taulaʻeikí mo e kau akonakí pea mo e kau maʻu Lakanga Taulaʻeiki Faka-Melekisētekí.
ʻOku totonu ke fakahoko e liliu ki he kōlomú, ʻi he vave tahá. Mahalo naʻa kiʻi fuoloa ʻa e fakaangaanga ki he ngāue fakaetauhí, ka ʻoku totonu ke fai leva ia he vave tahá. ʻE lava ke maʻu ha fakamatala lahi ange mei he ministering.lds.org/ton.
Fakaʻapaʻapa atu,
Ko e Kau Palesitenisī ʻUluakí