• Home
  • ChurchofJesusChrist.org
• Mga Propeta ug mga Apostoles
• President Thomas S. Monson

Presidente Thomas S. Monson

(1927–2018)

Propeta ug Higala

---

• Manggihatagon nga Panimalay
• Pagtubo ngadto sa Pagkahingkod
• Personal nga Pagpangalagad
• Pagserbisyo isip Sakop sa Korum sa Napulog Duha ka mga Apostoles
• Sakop sa Unang Kapangulohan
• Presidente sa Simbahan

---

Ang pasyente sa emergency room daw andam na nga mogawas, apan ang doktor sa Siyudad sa Salt Lake ug ang iyang sakop nagduha-duha. Samtang ang pagtambal ug pagkaayo sa tawo daw kompleto na, ang iyang nagkagidlay nga hitsura ug walay klaro nga kahimtang sa pagpuyo makapabalaka. “Aduna ka bay sakop sa pamilya, bisan kinsang higala nga makatabang nimo nga masunod ang imong pagpatambal?” nangutana ang doktor. “Wala gayud,” mitubag ang pasyente, hangtud nga duna siyay nahinumduman: “Sa tinuod lang, duna koy higala nga usahay moatiman nako. Ang iyang ngalan mao si Tom Monson.”²

Si Presidente Thomas S. Monson mihimo sa iyang naila na nga pagwara-wara human sa usa ka sesyon sa Abril 2013 nga kinatibuk-ang komperensya.

Si Presidente Thomas Spencer Monson “usa ka espesyal nga higala sa mga ubus og kahimtang” ug sa “mga walay trabaho ug mga kabus,” sama sa gisulti sa usa ka dugay na nga higala.³ Sa tibuok niyang kinabuhi, lakip ang sobra sa tulo ka dekada nga grabe nga mga responsibilidad isip sakop sa Unang Kapangulohan, iyang gihimo nga dakong prayoridad ang personal nga mga pagbisita sa tigulang nga mga higala ug mga langyaw ug, sa dihang giaghat sa Espiritu, migawas kadali gikan sa importanting mga miting aron sa paghatag og mga panalangin sa priesthood ngadto sa masakiton nga mga bata. Sa dihang mitambong siya og mga kalihokan sa professional sports, imbis nga modapit sa inila nga mga kauban o mga opisyal sa publiko nga motambong uban kaniya, iyang gidala ang mga higala sa mga katuigan sa iyang kabatan-on gikan sa pobre nga kasilinganan. Mitambong siya sa matag reunion sa West High School nga nagsul-ob sa iyang name badge nga “Tom Monson”. Kining sama nga Thomas Monson, sumala sa usa sa iyang mga anak, “hingpit gayud nga walay pagpihig kon unsa ang pampublikong kahimtang, personalidad, o ubang makapaila nga mga kalampusan sa usa ka indibidwal: ang mapainubsanong higala sulod sa 50 na ka tuig makadawat og susama—o sobra pa—nga pagtagad kay sa usa ka gobernador, senador, o inila nga negosyante.”⁴

Presidente Thomas S. Monson. Litrato pinaagi ni Tom Smart, Deseret News.

Ang mga tawo nga anaa sa taas ug ubos nga posisyon, uban sa minilyon ka mga higala ug mga sumusunod sa sulod ug gawas sa Simbahan, nawad-an og usa ka maunungon nga higala sa pagtaliwan sa ika-16 nga Presidente sa Ang Simbahan ni Jesukristo sa mga Santos sa Ulahing mga Adlaw. Namahayag nga “kanunay nakong gikinahanglan ang tabang sa Ginoo, ug kanunay akong nangayo niini,”⁵ gibiyaan ni Presidente Monson ang usa ka administrasyon nga nailhan sa pagtabang sa tibuok kalibutan pinaagi sa humanitarian aid, mga web page sa Simbahan nga mas nakapatin-aw ug nakatabang sa mga miyembro nga makasabut sa lisud nga mga isyu, mga kampanya sa relasyong pampubliko nga gitumong sa pagtabang sa kalibutan nga makasabut sa Simbahan, ug daghang mga kalamboan nga gituyo sa pagpauswag sa buhat sa kaluwasan. Apil niini mao ang pagpaubos sa edad diin ang mga batan-ong lalaki ug babaye mahimong moserbisyo og full-time nga misyon, pagpadaghan sa mga paagi nga ang mga misyonaryo mahimong mokontak sa uban (lakip na sa paggamit sa teknolohiya), ug mga online forum diin magtagbo ang mga lider ug miyembro sa Simbahan alang sa mga diskusyon nga daw nag-atubangay. Sa iyang panahon, usa ka bag-ong handbook sa Simbahan ang gihimo nga naghatag og gibug-ton sa Kristohanon nga pagkadisipulo. Gipayano ang buhat sa family history, nga nahimong mas sayon ang pagsiksik ug pagsumiter og mga ngalan ngadto sa templo alang sa proxy nga mga bunyag ug ubang mga ordinansa sa kaluwasan.

Bisan pa sa iyang daghang mahinungdanon nga mga kalampusan, pipila lang ang makiglalis nga ang labing importante nga kabilin ni Presidente Monson naglangkob sa iyang kusganon nga personal nga ehemplo. Usa sa iyang paborito nga kasulatan, nga makita diha sa Mga Buhat 10:38, naghulagway ni Jesus sa Nazaret isip tawo “[kinsa nag]pangadto-adto sa paghimog mga kaayohan.” Si Presidente Monson kanunay nga makita nga nagbuhat og kaayohan sa mga paagi nga giawhag sa Manluluwas nga atong buhaton: paghatag og pagkaon ngadto sa gigutom, pagpasaka sa estranghero, pagsinina sa hubo, pagduaw sa masakiton, ug pagsulod sa mga bilanggoan sa kamingaw ug kasagmuyo nga kasagaran nagpriso sa mga masulub-on (tan-awa Mateo 25:34–40). Ang iyang pagkamanggiloy-on sa katawhan, ang paghatag og gibug-aton sa mga tawo kay sa mga programa, ug ang dedikasyon sa pagsunod sa Espiritu nakapahimo sa usa ka reporter nga nagsunod kang Presidente Monson sulod sa mga dekada sa pagsulat, “Pipila ra ang mga tawo nga akong nahimamat kinsa mihimo og ingon ka dako nga paningkamot sa pagbayaw ug paghatag og kahupayan, kalingawan ug kamaya ngadto sa uban.”⁶ Ang usa ka kinabuhi nga puno sa pamilya, kalisdanan, oportunidad, ug, siyempre, serbisyo mitabang sa pagmugna og talagsaon nga Kristohanong kabilin sa personal nga pangalagad ni Thomas S. Monson.

---

Manggihatagon nga Panimalay

Sa eskina sa 500 South ug 200 West, dili layo gikan sa riles sa tren nga mitadlas sa Siyudad sa Salt Lake, si George Spencer ug Gladys Condie Monson miamuma og pamilya sa panahon sa Grabeng Depresyon [Great Depression] nga gilibutan sa mga paryente ni Gladys, kaliwatan sa mga pioneer gikan sa Scotland. Ang mga apohan ni George mipasakop sa Simbahan didto sa Sweden ug England sa wala pa molalin ngadto sa Amerika ug manimuyo sa Siyudad sa Salt Lake. Niadtong Agosto 21, 1927, ang unang anak nga lalaki ug ikaduhang anak ni George ug Gladys natawo, si Thomas Spencer Monson, gipangalanan sunod sa iyang lolo nga habig sa inahan, si Thomas Hait Condie, ug sa iyang amahan.

Gipalibutan sa pamilya, ang mga Monson mihalad usab sa ilang gugma ngadto sa daghan pa nga mga tawo. Ang mga pagbisita sa gutom nga lumalabay nga mga tawo [transients] nga moagi sa lungsod komon ra diha sa kasilinganan, ug si Gladys Monson mipasaka ug mipakaon kanila “nga daw ang matag usa dinapit nga bisita”, nahinumduman ni Presidente Monson sa kaulahian.⁷ Mipadala usab si Gladys Monson og sinemana nga mga panihapon sa Dominggo ngadto ni “Manong Bob” sa unahan sa ilang balay, kinsa kanunay nga mitanyag kang Tom og sinsilyo alang sa paghatud. “Dili ko makadawat sa kwarta,” mahunahunaong mitubag si Tom. “Panitan ko sa akong mama.⁸ Ma-Dominggo, ang amahan ni Tom moalsa usahay ni Tiyo Elias, ang iyang igsoon nga nabakol tungod sa arthritis, ngadto sa iyang 1928 nga Oldsmobile, nga kuyog si Tom, ug ilibut siya sa siyudad.

“Niini nga panahon sa akong kinabuhi nakadayeg ko pag-ayo sa mga lihok sa akong mama ug papa,” nakaobserbar si Presidente Monson. “Wala ko makaamgo nga panagsa ra sila mosimba.”⁹ Nahinumdom usab siya og pagbati sa pagkamatugtanon ug pakigdait: “Wala gayud ako makadungog sa akong amahan nga misulti og negatibo mahitungod sa laing tawo. Gani, dili siya magpabilin sa kwarto kon adunay mamulong nga walay pagrespeto o negatibo ngadto sa laing tawo.”¹⁰

Dili ikatingala, kini nga mga kinaiya ug mga lihok nakaimpluwensya ni Tom. Hilabihan ang kalipay nga nakadawat og elektrik nga train set usa ka Pasko, nangayo pa gihapon siya sa iyang mama—ug nakadawat—og dugang nga sakyanan gikan sa usa ka dili kaayo nindot nga train set nga giandam isip gasa alang sa anak sa biyuda nga nagpuyo unahan sa ilang balay. Wala madugay, dihang gihatud ni Tom ug sa iyang mama ang gasa ug nakita ni Tom ang kalipay sa bata sa dili kaayo nindot nga train set, nakonsensya siya. Midagan siya balik sa ilang balay aron sa pagkuha dili lang sa sakyanan nga iyang kinuha gikan sa set, apan usab ang iyaha mismo.¹¹ Si Tom sa wala madugay mihalad sa iyang duha ka binuhi nga kuneho alang sa panihapon sa Pasko ngadto sa pamilya sa usa ka higala nga wala pa sukad makatilaw og pabo o manok.¹² Ug sa dihang ang usa ka babaye nasuko kang Tom ug sa iyang mga barkada tungod sa mga baseball nga motugpa sa iyang nataran atol sa ilang mga dula sa mga silingan (kanunay niyang sakmiton ang mga baseball ug taguan kini), nakahukom si Tom nga pakalmahon ang sitwasyon. Walay pakig-istorya tali nilang duha, kanunay niyang bisbisan ang nataran sa babaye panahon sa ting-init ug kahigon ang mga dahon gikan sa iyang nataran panahon sa tinglarag. Dayon usa ka adlaw gipasulod siya sa babaye ug gidulutan og gatas ug cookies—ug gihatag kaniya ang usa ka kahon nga puno sa mga baseball.”¹³

Bisan pa, kanunay nga miangkon si Presidente Monson nga ang maayo niyang binuhatan sa batan-on pa adunay kauban nga binugoy nga kinaiya nga usahay moresulta ngadto sa pagbadlong. Siya ug ang usa ka ig-agaw kausa nanguha og saag nga mga iro sa silingan ug gisulod kini sa balay-balay sa mga uling [coal shed] diha sa nataran, diin ang unom niini mihasmag sa papa ni Tom sa iyang pag-abli sa pultahan.¹⁴ Usa ka hapon ang presidente sa Primary mibira ni Tom ug miingon nga nasubo siya sa kakiat sa daghan sa mga batang lalaki panahon sa pangbukas nga mga tulumanon sa Primary. Mitanyag og tabang si Tom. “Ang mga problema sa disiplina sa Primary,” nahinumdom siya, “mihunong nianang higayuna.”¹⁵ Bisan pa, ang mga tintasyon mipadayon. Kausa mikombinser siya sa usa ka higala nga dili motambong sa usa ka hapon nga klase sa Primary uban kaniya. Mangikyas sila human mokuha si Tom og usa ka sentimo gikan sa iyang bulsa ug isulod kini sa donation box alang sa Primary Children’s Hospital. Dayon ilang gamiton ang dies sentimos nga naa sa iyang bulsa aron mopalit og Fudgsicles sa Hatch Dairy. Hinoon, naguba ang plano sa dihang nadiskubrihan sa mga bata nga wala tuyoang nadonar ni Tom ang dies sentimos imbis ang usa ka sentimo. Mao nga namalik ang duha, diin masulub-ong gidonar na lang usab ni Tom ang usa ka sentimo. “Sulod sa dugayng panahon,” miingon siya, “akong gibati nga, tingali, ako ang adunay labing dako nga nahatag sa Primary Children’s Hospital.”¹⁶

Ang bata nga Tom Monson nagsakay sa tricycle atubangan sa panimalay sa iyang pagkabata.

Ang kanunay nga pagbisita sa kabina sa pamilya diha sa Provo Canyon mipasiugda og tibuok kinabuhi nga gugma sa pagpangayam og itik, pagkamping, pagpangisda, ug paglangoy-langoy sa suba; gani nakaluwas si Tom kausa og batang babaye nga naanud ngadto sa makuyaw nga lilo.¹⁷ Misulti siya mahitungod sa usa ka kasinatian sa dihang siya ug ang usa ka higala sa walay paghunahuna misunog sa mga sagbut duol sa balay sa pamilya. Sama sa naandan, gigamit niya ang istorya isip usa ka bayanan aron mapaambit ang usa ka importante nga baruganan sa ebanghelyo.¹⁸

Si Thomas S. Monson—gilitratohan sa wala isip 13 anyos nga bata sa Vivian Park ug diha sa tuo uban sa iyang anak nga si Clark niadtong Hulyo 19, 1971—adunay tibuok kinabuhi nga gugma alang sa mga kalihokang panggawas [outdoors].

Ang iyang pagbisita pipila ka beses matag semana sa Chapman public library nga duol sa ilang balay sa Siyudad sa Salt Lake mipasiugda og gugma sa mga libro ug mga tigsulat, diin sa kaulahian nakahimo siya og tag-as nga pagkutlo gikan sa paboritong mga magbabalak sama ni Wordsworth, Longfellow, Bryant, Tennyson, ug Shakespeare.¹⁹

Usa ka partikular nga interes, ang pag-atiman og mga pati, nga nasugdan panahon sa kabatan-on ug mipadayon sa pagkahingkod, mitudlo sa batan-ong Tom og usa ka leksyon sa pagkatinugyanan sa dihang ang usa ka adviser sa korum sa Aaronic Priesthood mihatag kaniya og usa ka pati nga kanunayng mipauli sa panimalay sa adviser, sa ingon nakamugna og oportunidad sa sinemana nga priesthood interview sa batan-on.²⁰ Hinoon, ang usa ka minahal nga magtutudlo sa Sunday School, si Lucy Gertsch, maoy gitudlo ni Tom nga nakahatag kaniya og pundasyon alang sa iyang pagpamatuod ni Jesukristo. Ang iyang gugma alang sa klase sa badlungon nga mga batang lalaki miusab sa ilang kiat nga mga kinaiya samtang naminaw sila sa mga leksyon ni Sister Gertsch mahitungod sa Biblia nga puno sa Espiritu.²¹

---

Pagtubo ngadto sa Pagkahingkod

Ang ekonomikanhong mga limitasyon sa Grabeng Depresyon nakapugos ni Tom sa edad nga 12 nga mosugod sa pagtrabaho alang sa iyang amahan, kinsa midumala og kompaniya nga pang-imprinta.²² Ang mga epekto sa Ikaduhang Gubat sa Kalibutan, hinoon, daw mas dako nga problema kay sa Depresyon samtang mitambong si Tom sa high school. “Ang matag batan-ong lalaki nasayud nga kon magpadayon [ang gubat], malakip siya sa militar,” miingon si Presidente Monson mahitungod sa iyang pagkatin-edyer.²³ Usa ka maayo nga estudyante nga adunay gugma sa kasaysayan, mi-enroll siya sa University of Utah sa edad nga 17.²⁴ Seryuso niyang gikonsiderar nga mahimong usa ka magtutudlo sa kasaysayan, apan mikuha hinoon og business degree, samtang nalingaw usab sa mga klase sa institute nga gitudlo ni Dr. Lowell Bennion ug Dr. T. Edgar Lyon.²⁵

Samtang didto sa unibersidad iyang nahimamat ang gugma sa iyang kinabuhi. Human gipaila-ila ngadto ni Frances Johnson sa usa ka Hello Day nga kalihokan, si Tom sa wala madugay nangulitawo kaniya. Sa kaulahian naghunahuna siya nga “wala ko kaandam sa dignidad ug kahilum nga mipatigbabaw [sa iyang panimalay],” gikumpara ang iyang mas banha nga panimalay ngadto sa panimalay sa mga Johnson.²⁶ Ang amahan ni Frances nakabantay sa Monson nga apelyido ug, uban sa nagluha nga mga mata, migakos ni Tom human ang duha nakaamgo nga ang igsoon sa lolo ni Tom nga si Elias mipaila sa pamilyang Johnson ngadto sa ebanghelyo didto sa Sweden.²⁷ Si Tom ug Frances ganahan kaayo og dagkong mga banda ug kanunayng moapil sa mga sayaw uban sa mga lider sa banda sama ni Tommy Dorsey ug Glenn Miller.²⁸

Niadtong 1945, si Tom miapil sa U.S. Naval Reserve. Sulod sa unang tulo ka semana sa inisyal nga training, mipasiaw siya wala madugay, “Nakumbinsir ko nga nameligro ang akong kinabuhi. Ang navy wala mosulay sa pagbansay nako; misulay kini sa pagpatay nako.” Apan ang espiritwal nga mga kasinatian nag-uban sa lisud nga mga panahon. Human ang usa ka chief petty officer mipalinya sa tanan usa ka Dominggo ug gitudloan ang mga Katoliko, Judeo, ug mga Protestante ngadto sa ilang mga dapit mitinganan, miduol siya kang Tom ug nangutana, “Ug unsa may tawag ninyo sa inyong kaugalingon?”

“Hangtud nianang panahona,” nahinumdom si Presidente Monson sa kadugayan, “wala ko kamatikod nga dunay nagbarug sa akong tapad o sa akong luyo diha sa drill ground. Hapit nagdungan, ang matag usa namo mitubag, ‘mga Mormon!’”²⁹

Usa ka gabii sa wala pa ang Pasko, ang LDS nga higala ni Tom nga si Leland Merrill, nga anaa sa tupad nga katre, misugod sa pag-agulo sa kasakit. Sa kadesperado, mihunghong siya, “Monson, Monson, dili ba elder ka?” ug nangayo og panalangin sa priesthood—nga wala pa sukad mahimo ni Tom. Hilum nga nag-ampo alang sa tabang, si Tom nakadawat og tubag: “Tan-awa sa ilawom sa bag,” diin sa alas 2:00 sa buntag nakakita siya og missionary handbook, nga naghatag og mga instruksyon kon unsaon sa pagpanalangin sa masakiton. “Uban sa mga 60 ka kuryuso nga mga sailor nga nanan-aw, mipadayon ko sa pagpanalangin,” miingon siya sa kadugayan. “Sa wala pa nako masulod og balik sa bag ang akong butang, nahinanok na si Leland Merrill.”³⁰ Nakat-on usab si Tom gikan sa uban atol sa pagserbisyo sa militar ug midayeg sa usa ka batan-ong lalaki nga Katoliko kinsa miluhod aron mag-ampo matag gabii samtang “kami nga mga Mormon nga batan-on mag-ampo samtang naghigda sa among mga katre.”³¹

Si Tom miserbisyo sulod sa usa ka tuig ug miuli aron mogradwar nga dunay pasidungog gikan sa University of Utah, mitrabaho isip usa ka advertising executive sa gipanag-iya sa Simbahan nga Deseret News nga gipanag-iya sa Simbahan. Pipila ka bulan human makagradwar, gipakaslan niya si Frances Johnson sa Salt Lake temple niadtong Oktubre 7, 1948. “Akong nakat-unan sa sayo pa nga mobarug sa akong kaugalingon,” miingon si Sister Monson mahitungod sa ilang unang mga katuigan sa kaminyoon.³² Diha-diha dayon, ang Ginoo mihangyo sa batan-ong si Brother ug Sister Monson sa pagsugod sa ilang walay kutas nga partisipasyon sa pagtukod sa gingharian sa Dios.

---

Personal nga Pagpangalagad

Niadtong Mayo 1950, ang bishop ni Tom ug Frances, si John R. Burt, gitawag ngadto sa kapangulohan sa stake. Gipangutana kon kinsay angay nga moserbisyo isip bishop nga mopuli kaniya, si Bishop Burt mihunong sulod sa pipila ka minutos: “Naningkamot ko sa paghunahuna kon unsaon sa pagpasabut sa [presidente sa stake] nganong gihunahuna nako nga ang 22 anyos nga batan-on ang angay nga mopuli nako isip bishop.”³³ Niana misugod ang pagpangalagad sa batan-ong si Thomas S. Monson diha sa Temple View Sixth-Seventh Ward, uban sa 85 ka mga biyuda niini ug ang pinakadako nga panginahanglan alang sa mga welfare service sa Simbahan nianang higayuna. Ang pagserbisyo isip bishop niining partikular nga ward milig-on ug mipakusog sa kusganon na nga kinaiya ni Tom sa kamanggiloy-on. Iyang gibisita ang matag biyuda panahon sa Pasko, midala og mga gasa nga kendi, mga libro, o aslunon nga mga manok.³⁴ Nasuod niya pag-ayo ang “iyang mga biyuda” nga mihimo siya og tinuig nga pagbisita ngadto sa daghan kanila bisan dugay na siyang na-release isip bishop, gani nakahimo sa pagpamulong sa tanang 85 ka haya sa iyang panahon isip General Authority.³⁵ “Ang akong kakulangan mipaubos kanako,” nahinumdom siya sa lima ka tuig nga nagserbisyo siya isip bishop; apan mapasalamaton siya nga “nakapalambo ko sa sayo pa kaayo sa akong kinabuhi og diwa sa kamanggiloy-on sa uban kinsa tingali nanginahanglan, bisan unsa pa ang edad o kahimtang.”³⁶ Nangalagad siya sa tanan nga anaa sa mga utlanan sa iyang ward, lakip niadtong lahi og relihiyon, ug nangita sa dili kaayo aktibo nga mga miyembro bisan kon nagkinahanglan kini nga moadto sa estasyon sa gas usa ka Dominggo sa buntag diin iyang giawhag ang usa ka batan-ong lalaki nga nagtrabaho sa grease pit nga mobalik sa iyang mga miting sa korum.³⁷

Si Bishop Monson (tunga) uban sa katapusang duha sa iyang unom ka mga magtatambag: si Elwood A. Blank (wala) ug si William M. Larsen (tuo).

Kining partikular nga calling mihatag usab og usa ka lisud nga leksyon. Samtang nagtambong og miting sa pagpangulo sa stake, si Bishop Monson mibati og kusog nga pagdasig nga mobiya diha-diha dayon aron sa pagbisita sa usa ka tigulang nga miyembro sa ward nga gitambalan sa ospital sa mga beterano. Walay swerte, namulong pa ang presidente sa stake, mao nga ang batan-ong bishop wala mahimutang nga naghulat hangtud nga nahuman ang pagpamulong dayon nagdali siyang miadto sa ospital. Samtang nagdagan siya ngadto sa kwarto sa tawo, usa ka nurse ang mipahunong niya. Nangutana siya, “Ikaw ba si Bishop Monson?” ug mipadayon sa pagsulti kaniya nga “ang pasyente nangita nimo sa wala pa siya mamatay.”³⁸ Miuli si Bishop Monson nianang gabhiona nga misaad nga dili na gayud siya mopakyas sa paglihok sumala sa pag-aghat gikan sa Espiritu Santo, usa ka pasalig nga balik-balik nga napakita sa nahibilin niyang pagserbisyo sa Simbahan.

Gitawag siya sa pagserbisyo isip magtatambag sa kapangulohan sa stake sa edad nga 27 ug isip presidente sa misyon sa Canada niadtong 1959, sa edad nga 31. Ang mga misyonaryo ubos sa iyang paggiya nakahinumdom sa usa ka lider nga napahiangay kaayo sa Espiritu nga kanunay siyang misunod sa mga impresyon sa pagbisita sa apartment sa usa ka misyonaryo sa dili pa makabuhat og sayop ang misyonaryo.³⁹ Iyang gitutukan ang mga misyonaryo pinaagi sa pagkat-on sa tanan nilang mga ngalan, nakigtambag kanila mahitungod sa ilang mga problema ug mga kabalaka, ug mibuhat sa tanan nga iyang mahimo aron mapugngan ang sayo nga mga pagpauli ug mga disciplinary council. Niining higayuna, ang pamilyang Monson midako na nga naglakip sa duha ka gagmayng mga bata, si Thomas Lee ug Ann Frances. Ang ikatulo nga bata, si Clark Spencer, natawo sa Canada. Ang pamilya mitagamtam og mas dakong oras nga magkauban niini nga assignment sa misyon kay sa ilang naandan, ug si Tom nakapalambo og pagkamaunungon ngadto sa Canada nga tataw gihapon niadtong 2010, sa diha nga, isip Presidente sa Simbahan, iyang gipahinungod ang Canada Vancouver Temple nga adunay bandila sa Canada diha sa iyang lapel ug giusab ang pambukas nga awit ngadto sa “O Canada.”⁴⁰

Sa iyang pagpauli sa Siyudad sa Salt Lake, si Tom nahimong general manager sa Deseret Press, ug si Frances gitutok ang kaugalingon sa pagpadako sa mga bata, pagserbisyo sa mga calling sa ward, ug pagsuporta sa iyang bana samtang miserbisyo siya sa lain-lain nga mga kinatibuk-ang priesthood committee sa Simbahan.

Ang ekstensibo nga pag-apil ni Tom sa mga committee sa Simbahan sama sa Adult Correlation, Missionary, o Genealogy, sa pagkatinuod, nakahimo kaniya sa pagtuo nga ang usa ka pagdapit ngadto sa opisina ni Presidente David O. McKay tingali adunay kalabutan sa iyang kasamtangang buluhaton. Dili diay. Si Presidente McKay mihatag sa tawag nga moserbisyo isip sakop sa Korum sa Napulog Duha ka mga Apostoles, mipuli ni Elder N. Eldon Tanner, kinsa gitawag isip magtatambag sa Unang Kapangulohan. Si Tom nakalitan kaayo ug nahingangha nga dili siya makasulti. Sa katapusan, gisiguro niya kang Presidente McKay nga ang “bisan unsa nga talento nga tingali gipanalangin kanako ihalad sa pag-alagad sa Agalon lakip ang akong kinabuhi kon gikinahanglan.”⁴¹

Si Presidente Monson miuyon nga himoong kompidensyal ang sagradong tawag ngadto sa tanan gawas sa iyang asawa ug wala makatulog sa tibuok gabii sa wala pa ang kinatibuk-ang komperensya sa Oktubre 4, 1963. Sa iyang pag-abut sa komperensya, milingkod siya uban sa mga sakop sa Priesthood Home Teaching committee diin siya miserbisyo. Usa ka higala nga iyang tapad, si Hugh Smith, misulti kaniya mahitungod sa katingalahan nga sulagmang panghitabo: sa katapusang duha ka mga higayon nga dunay gitawag nga General Authority, kana nga tawo naglingkod tupad ni Hugh.⁴² Human gitawag ang pangalan ni Thomas Monson, “si Hugh Smith mitan-aw nako ug yano lang nga miingon, ‘Ang kilat miigo sa ikatulong higayon.’ Akong gituohan nga ang paglakaw gikan sa mga tigpaminaw ngadto sa pulpito mao ang labing taas nga paglakaw sa akong kinabuhi.”⁴³

Si Thomas S. Monson naglingkod diha sa mga nanambong sa kinatibuk-ang komperensya sa Oktubre 4, 1963, sa wala pa gipahibalo nga siya gitawag sa edad nga 36 ngadto sa Korum sa Napulog Duha ka mga Apostoles.

---

Pagserbisyo isip Sakop sa Korum sa Napulog Duha ka mga Apostoles

Si Thomas S. Monson, sa edad nga 36, nahimong pinakabata nga tawo nga gitawag ngadto sa Korum sa Napulog Duha ka mga Apostoles sukad niadtong 1910, sa diha nga si Joseph Fielding Smith miapil sa Korum sa edad nga 33. Ang iyang pagserbisyo sa Napulog Duha milungtad og 22 ka tuig, gikan sa 1963 hangtud sa iyang pagkatawag ngadto sa Unang Kapangulohan ubos ni Presidente Ezra Taft Benson niadtong 1985, ug naglakip sa pagserbisyo sa matag dagkong committee sa Simbahan, kasagaran isip ang pangulo.⁴⁴ Niining panahona, ang kinatibuk-ang miyembro sa Simbahan nausab gikan sa grupo sa magkasusama nga mga tawo nga nakasentro diha sa kasadpang Estados Unidos ngadto sa hilabihan ka nagkalain-lain nga komunidad sa tibuok kalibutan.⁴⁵ Gitawag siya ni Presidente David O. McKay ngadto sa pagka-apostol apan mipadayon sa pagserbisyo ubos ni Presidente Joseph Fielding Smith gikan sa 1970 hangtud sa 1972 ug dayon ubos ni Harold B. Lee gikan sa 1972 hangtud sa 1973. Sa panahon kadto sa pagdumala ni Presidente Spencer W. Kimball, gikan sa 1973 hangtud sa 1985, nga si Presidente Monson nangulo sa committee sa pagmantala sa mga kasulatan nga niadtong 1979 nakamugna og 2,400 ka pahina nga edisyon sa King James Version sa Biblia nga naglakip og Topical Guide, Bible Dictionary, ug bag-o nga sistema sa footnote. Si Presidente Monson miapil usab uban ni Presidente Kimball diha sa makasaysayanong pinadayag nga ang tanang takus nga mga miyembro nga lalaki makadawat sa priesthood.⁴⁶

Si Elder Thomas S. Monson naglingkod tupad ni Elder Gordon B. Hinckley, Elder Howard W. Hunter, ug Elder Richard L. Evans. Si Elder Ezra Taft Benson nagbarug sa pulpito atol sa kinatibuk-ang komperensya.

Apan alang sa mga miyembro nga natanggong sulod sa komunista nga mga nasud sa Europe human sa Ikaduhang Gubat sa Kalibutan, ang labing dakong nabuhat ni Presidente Monson isip sakop sa Korum sa Napulog Duha ka mga Apostoles mao ang iyang pagdumala sa mga Santos sa Silangang Europa. “Ang aktwal nga mga panalangin nga iyang gidala sa among nasud ug sa Europe,” miobserbar ang German nga sakop sa Unang Kapangulohan nga si Dieter F. Uchtdorf, “hilabihan ka tinuod ug mahinungdanon ug talagsaon sa kabililhon niini nga nagtuo gayud ako nga ang Ginoo miandam kaniya nga mahimong instrumento sa pag-usab sa kasaysayan sa Germany.”⁴⁷ Ang Komunista nga gobyerno sa German Democratic Republic grabe nga mipugong sa relihiyosong pagsaulog, apan ang mga miyembro sa Simbahan mipadayon nga nagmatinud-anon bisan pa sa diskriminasyon, kawalay mga oportunidad sa trabaho ug edukasyon, ug kanunay nga pagpaniid kon mag-abut sila. Kanunay nga mibisita si Presidente Monson kanila, kausa mituon sa tibuok handbook sa Simbahan sa katuyoan nga usabon og type ang tibuok basahon human makatabok didto sa East Germany, tungod kay ang mga materyal sa Simbahan dili tugutan nga madala pasulod sa nasud. Miadto siya sa opisina sa usa ka branch ug misugod niini nga buluhaton, ug human sa pipila ka mga pahina mitan-aw siya sa palibut ug nakadiskubre og kopya sa handbook nga naa sa estante sa iyang luyo.⁴⁸ Walay kakapoy siya nga mitrabaho uban sa mga opisyales nga East German nga tugutan bisan ang pipila lang ka mga Santos nga makatambong sa kinatibuk-ang komperensya ug mobisita sa templo gawas sa nasud, apan sa gihapon ang mga Santos nga East German nangandoy sa mga oportunidad nga susama sa ubang mga miyembro sa tibuok kalibutan.

Dayon, niadtong 1978, si Presidente Kimball misaad ni Presidente Monson nga “ang Ginoo dili mohikaw sa mga panalangin sa templo niadtong takus nga mga miyembro [nga East German]” ug midugang nga nagpahiyum, “Ikaw ang mangita og paagi.”⁴⁹ Samtang si Presidente Monson ug ang lider sa Simbahan sa East Germany nga si Henry Burkhardt padayon nga mihangyo sa gobyerno og pagtugot alang sa unom ka managtiayon matag panahon nga mobisita sa Swiss Temple, nakadawat sila og talagsaong sugyot gikan sa mga lider sa gobyerno: “Nganong dili man mo magtukod og templo dinhi?” Niadtong Oktubre 1982, ang Unang Kapangulohan mipahibalo nga usa ka templo ang tukuron sa Freiberg, German Democratic Republic, ang labing una nga templo nga gitukod sulod sa usa ka Komunista nga nasud. Kini nga pahibalo daw sama nga hapit dili katuohan sa milagruso nga kasabutan nga sa kaulahian gihimo ni Presidente Monson, kaniadto-Elder Russell M. Nelson sa Korum sa Napulog Duha ka mga Apostoles, ug mga lider sa Simbahan sa East Germany uban sa mga opisyales sa gobyerno ug pangulo sa nasud nga si Erich Honecker nga tugutan ang mga misyonaryo nga mosulod ug mobiya sa nasud sa wala pa ang pagkahagsa sa Berlin Wall.⁵⁰ “Usa ako ka buhing saksi,” misulat si Presidente Monson, “kon sa unsang paagi ang kamot sa Ginoo napakita sa pagbantay sa mga miyembro sa Simbahan sa mga nasud nga kanhi gidumala sa mga Komunista.”⁵¹

Sa atubangan sa Freiberg Germany Temple, gipahinungod niadtong 1985. Gikan sa tuo: Elder Thomas S. Monson uban sa iyang asawa, si Frances; Elder Robert D. Hales uban sa iyang asawa, si Maria; Elder Joseph B. Wirthlin uban sa iyang asawa, si Elisa; Emil Fetzer.

Bisan pa, taliwala sa makapausab sa kalibutan nga mga panghitabo ug bug-at nga mga katungdanan sa administrasyon, ang pangalagad ni Presidente Monson padayon nga nakatutok sa mga pag-aghat sa Espiritu Santo ug sa pagtabang sa usa. Human makahatag og panalangin ngadto sa usa ka higala nga anaa sa ospital sa mga beterano, gibati ni Presidente Monson nga siya “mas dako og nabuhat nga maayo niana nga pagbisita kay sa usa ka semana nga mga miting sa headquarters sa Simbahan.”⁵² Daghan ang mga istorya mahitungod sa mga pagtipas gikan sa mga katungdanan sa General Authority samtang si Presidente Monson miadto sa mga kwarto sa ospital, mga nursing home, ug mga higdaanan sa pribadong mga balay sa pagbisita sa mga masakiton ug mga nag-inusara nga naghulat kaniya. Sa diha nga ang mga iskedyul sa mga miting sa stake sa Shreveport, Louisiana, dili makatugot ni Presidente Monson sa pagbisita sa usa ka himatyon nga batang babaye nga nangayo og panalangin kaniya, andam gihapon siya sa dihang, atol sa sesyon pagpangulo sa Sabado sa gabii, “nakadungog ko og tingog nga namulong sa akong espiritu,” miingon siya. “Ang mensahe mubo, ang mga pulong pamilyar: ‘Paduola kanako ang gagmayng kabataan, ug ayaw ninyo sila pagpugngi, kay ang gingharian sa Dios ila sa mga sama kanila’ (Marcos 10:14).”⁵³ Mibiyahe siya og 129 ka kilometro ngadto sa panimalay ni Christal Methvin pagkasunod buntag, mipanalangin kaniya sa usa ka panagpundok sa pamilya nga puno sa Espiritu sa wala pa siya mamatay paglabay sa upat ka adlaw.

Sa dihang nakigtagbo siya sa mga kabus nga mga miyembro nga East German, gihatag ni Presidente Monson ang iyang mga amerikana [suit], mga sapatos, calculator, ug bisan gani ang usa ka hugpong sa minarkahan nga mga kasulatan.⁵⁴ Ug wala gayud siya makalimot sa iyang isig ka mga miyembro gikan sa Sixth-Seventh Ward, nagbantay sa nagkatigulang na ug gagmay’g kinitaan nga mga higala sama ni Ed Erickson, kinsa gidapit ni Presidente Monson sa mga panagpundok sa pamilya, gipasiugdahan ang mga pagsaulog og birthday, ug gihinumduman sa usa ka 2009 nga pakigpulong: “Pagbaton og kaisug nga molikay sa paghukom ug pagpanaway niadtong naglibut kaninyo, ingon man sa kaisug sa pagsiguro nga ang tanan nalakip ug mobati nga gihigugma ug gihatagan og bili.”⁵⁵

Ang kamatinuoron ug kamahigalaon ni Presidente Monson nakaawhag og pakigrelasyon ug pakigdait alang sa Simbahan tali sa nagkalain-laing mga relihiyon, lungsuranon nga mga organisasyon, ug mga lider sa komunidad. Nagdako siya sa usa ka nagkadaiya nga kasilinganan, mibati nga suod sa mga paryente sa lain-laing mga relihiyon, ug tinud-anay nga namahayag, “Nagtuo ko nga adunay maayo nga mga tawo bisan asa.”⁵⁶ Dali siya nga makigsagol sa uban, “daghan kanila dili gayud mga miyembro sa Simbahan,” miobserbar siya, “apan mga indibidwal nga mahunahunaon sa komunidad ug pagkalungsuranon.”⁵⁷ Ang mga lider sa komunidad sama sa usa ka kanhi tigmantala sa Salt Lake Tribune, usa ka Katoliko, misulti sa ilang pagdayeg: “Kon nahimamat na ka niya, si Tom Monson imo nang higala. … Ang Simbahan mihatag niini nga komunidad og espesyal nga panaghiusa pinaagi sa pakighigala sa dihang gibutang si Tom Monson diha sa Unang Kapangulohan.”⁵⁸ Usa ka manlalaban sa komunikad sa Salt Lake kausa mi-obserbar, “Wala ko masayud kon ang mga tawo nahibalo ba kon unsa ka dako ang pag-apil sa LDS nga Simbahan diha sa dili pangnegosyo nga kalibutan. Si Presidente Monson nahibalo gayud kon unsa ang mga panginahanglan.”⁵⁹ Ang laing relihiyuso nga lider misulat ni Presidente Monson: “Kanunay nimong giablihan ang imong kasingkasing aron matubag ang mga panginahanglan ug mga hangyo sa Salvation Army. Sigurado nga ikaw ug ang imong mga kauban mihatag ngari kanamo sa inyong kainit ug mabination nga mga kinaiya.”⁶⁰ Mitambong siya ug namulong sa mga kalihokan nga gipahigayon kalabut sa 1993 nga pagpahinungod sa gipahiuli nga Cathedral sa Madeleine sa Siyudad sa Salt Lake ug namulong usab sa Katoliko nga mga haya sa suod nga mga higala.⁶¹

Ang mga kalingawan sama sa pagpadako og mga pati mihatag og pahulay gikan sa kabug-aton sa mga katungdanan ni Presidente Monson ug midasig sa iyang mga apo sa tuhod nga tawagon siya og “Lolo Birdie.” Ang iyang kahilig sa pagpadako og mga pati makita diha sa merit badge kalabut sa pagpadako og mga pati nga gitanyag sa Boy Scouts of America sulod sa mubong panahon. Ang iyang pagserbisyo diha sa Scouts’ National Executive Board nagsugod niadtong 1969 ug mipadayon sulod sa katuigan samtang nadawat niya ang Silver Beaver Award, Silver Buffalo Award, ug ang pinakataas nga award sa internasyonal nga Scouting, ang Bronze Wolf, niadtong 1993. Hinoon, usa ka kanhi chief Scout executive, si Roy Williams, nangomedya nga si Presidente Monson wala pa gayud maulii sa desisyon sa Scout nga hunungon ang merit badge sa pagpadako og pati.⁶²

Ang mga kalingawan sama sa pagpadako og mga pati mihatag og pahulay gikan sa kabug-aton sa mga katungdanan ni Presidente Monson ug midasig sa iyang mga apo sa tuhod nga tawagon siya og “Lolo Birdie;

Ang mga giinteresan ni Presidente Monson daghan kaayo. Samtang sakop sa Korum sa Napulog Duha ka mga Apostoles, nakaangkon siya og master’s degree sa business administration, ug sa tibuok niya nga mga pagbiyahe ganahan siya nga mobisita sa mga sementeryo sa militar—tinahud nga mga dapit nga makamugna, miingon siya, og mga hunahuna sa “nangaguba nga mga damgo, wala matuman nga mga paglaum, napuno sa kasakit nga mga kasingkasing, ug mga kinabuhi nga sayo nga naputol tungod sa gubat.”⁶³ Ganahan siya nga magtuon mahitungod sa Ikaduhang Gubat sa Kalibutan ug, sa mas gaan nga hilisgutan, nalingaw sa binalik nga mga Perry Mason nga salida sa telebisyon sa gabii, bisan og usahay makatulog siya ug dili na makakita sa katapusan.⁶⁴ Ganahan usab siya sa mga musical. “Ako ang unsay gitawag sa akong asawa, si Frances, nga ‘show-a-holic,’” misulti siya kausa sa nanambong sa kinatibuk-ang komperensya.⁶⁵ Malingaw usab siya nga motan-aw og mga dula sa football sa Bag-ong Tuig diin “magsugod ko nga walay dapigan nga magtan-aw sa duha ka mga football team, apan sulod sa pipila ka minutos nakapili na ko og team nga sa akong hunahuna angay nga modaug.”⁶⁶ Makaistorya siya bahin sa mga manok ngadto sa iyang tupad sa tibuok nga flight sa eroplano ug, sa usa ka prayer breakfast sa Boy Scouts of America sa White House niadtong 1989, nakadiskubre og susama nga gugma alang sa mga English springer spaniel uban sa presidente sa Estados Unidos nga si George Bush.⁶⁷

Ang iyang lawom nga mga interes, siyempre, mao ang iyang banay, nga midako aron maglakip og walo ka mga apo ug upat ka mga apo sa tuhod. Samtang ang iyang panahon sa panimalay limitado, ang iyang mga anak nahinumdom nga nakigdula, nangisda, nangayam og itik, nanguhag mga sagbut sa tanaman, nanan-aw og sine, nanglangoy, ug nanakay og balsa uban sa ilang amahan.⁶⁸ Duha ka piho nga mga panumduman ang tataw kaayo alang sa anak nga si Tom: ang pagdula og checkers samtang bata pa uban sa iyang amahan ug ang pag-adto sa iyang amahan sa Louisville, Kentucky, aron sa paghatag kaniya og panalangin tungod kay nagkapulmonya siya atol sa military basic training.⁶⁹ Ang anak nga si Ann nalingaw sa mga report sa Dominggo sa gabii nga ipaambit sa iyang papa ngadto sa pamilya sa iyang pagpauli gikan sa mga buluhaton sa Simbahan. Ug si Clark labing naghambin sa adlaw nga ang iyang papa midrayb og 65 ka kilometro nga tipas sa naandan niyang agianan aron siya ug si Clark makasusi sa salag sa usa ka banog duol sa Randolph, Utah.⁷⁰ Si Presidente Monson ganahan nga manghagbas sa nataran ug sa pag-apil sa pangpamilya nga mga tournament sa Ping-Pong sa basement sa ilang panimalay.⁷¹

Si Thomas S. Monson uban sa iyang asawa, si Frances, ug ilang mga anak, si Tom, Ann, ug Clark.

---

Sakop sa Unang Kapangulohan

Si Thomas S. Monson miserbisyo sulod sa 22 ka tuig diha sa Unang Kapangulohan, nagsugod niadtong 1985 isip Ikaduhang Magtatambag ni Presidente Ezra Taft Benson ug unya mipadayon niana nga tahas uban ni Presidente Howard W. Hunter niadtong 1994. Trese niadto nga mga katuigan, gikan sa 1995 hangtud 2008, diha sa kiliran ni Presidente Gordon B. Hinckley, kinsa mitawag ni Presidente Monson nga mahimo niyang Unang Magtatambag.⁷² Ang panahon ni Presidente Monson diha sa Unang Kapangulohan migamit sa iyang lain-laing mga background sa pagdumala sa Simbahan ug mihatag kaniya og dako nga buluhaton nga nakapalisud sa pagbiya sa opisina. Si Presidente Hinckley nahimong pinakadaghan og nabiyahean nga Presidente sa kasaysayan sa Simbahan, ug kini nga partikular nga administrasyon hilabihan ka busy. Ang gagmay nga mga templo nakapaspas sa paghimo og mga templo; usa ka dako nga bag-ong Conference Center sa Simbahan gitukod aron ang liboan ka mga miyembro makahimo sa pagtambong sa kinatibuk-ang komperensya ug ubang mga kalihokan; ang tibuok kalibutan nga mga miting sa pagbansay pinaagi sa satellite broadcast gisugdan; ug usa ka Adlaw sa Kasaulogan diha sa Rice-Eccles Stadium sa University of Utah misaulog sa ika-200 nga adlawng natawhan ni Propeta Joseph Smith, diin mipasundayag ang 42,000 ka kabatan-onan gikan sa Salt Lake Valley ug Wyoming.⁷³

Hinoon, sama sa naandan, sa mga pulong ni Elder Ronald A. Rasband sa Korum sa Napulog Duha ka mga Apostoles, si Presidente Monson “dili gyud busy kon alang na sa mga tawo,”⁷⁴ ug sa tingtugnaw sa 2000, usa ka tawo nga gigahinan niya og panahon mao ang iyang asawa. Human nahiagum ang iyang asawa og grabe nga pagkatumba, migahin siya og pipila ka semana nga nagtrabaho sa iyang mga papeles diha sa kwarto sa iyang asawa sa ospital hangtud, sa katapusan, si Frances igong naulian aron mosulti sa iyang unang mga pulong: “Nakalimot ko sa pagpadala sa quarterly nga bayad sa buhis.”⁷⁵ Laing nakadawat sa iyang kalooy mao ang Church News reporter nga si Gerry Avant, kinsa kanunay mi-report sa mga biyahe ni Presidente Monson ug kausa gidapit sa pipila ka mga sightseeing uban sa mga Monson tungod kay, sama sa gisulti ni Presidente Monson kaniya, “nagtrabaho ka og maayo.”⁷⁶

---

Presidente sa Simbahan

Si Presidente Gordon B. Hinckley namatay niadtong Enero 27, 2008. Ang Unang Kapangulohan giwala ug si Presidente Monson mibalik ngadto sa iyang posisyon isip Presidente sa Korum sa Napulog Duha ka mga Apostoles. Ang tawo nga nagdako duol sa mga riles sa tren, mipasiugda og kiniat nga mga buhat sa pagkabata diha sa Primary, ug andam nga mipakigbahin sa iyang gamay nga mga kabtangan bisan sa panahon sa Grabeng Depresyon sa wala madugay nahimong pangulo sa minilyon ka mga Santos sa Ulahing mga Adlaw sa tibuok kalibutan. “Wala gayud ako mangagpas sa unsay anaa sa unahan sa bisan unsang butang sa akong kinabuhi,” miingon siya sa usa ka interbyu sa wala pa siya gipaluyohan isip Presidente sa Simbahan sa usa ka maligdong nga katiguman atol sa Abril 2008 nga kinatibuk-ang komperensya. “Posible gani to nga mas taas pa nako og kinabuhi si Presidente Hinckley.” Miingon siya, “Kanunay nakong gisunod ang pilosopiya, ‘Pangalagad sa posisyon diin ikaw gitawag, dili kon asa ka nangalagad kaniadto o kon asa ka unta pwede mangalagad. Pangalagad sa posisyon diin ikaw gitawag.’”⁷⁷

Si Thomas S. Monson gi-set apart ug gi-orden isip ang ika-16 nga Presidente sa Simbahan niadtong Pebrero 3, 2008, mipili ni Presidente Henry B. Eyring nga moserbisyo isip iyang Unang Magtatambag. Alang sa iyang Ikaduha nga Magtatambag, gipili niya si Presidente Dieter F. Uchdorf, usa ka German nga kinabig sa Simbahan nga kahibalo og daghang pinulongan ug sakop sa Korum sa Napulog Duha ka mga Apostoles sukad sa 2004. Ang bag-ong Unang Kapangulohan nagsimbolo sa pangtibuok kalibutan nga kinaiya sa nagkadako nga Simbahan.⁷⁸ Sa usa ka press conference niadtong Pebrero 4, 2008, si Presidente Monson misulti sa mga reporter, “Isip Simbahan motabang kita dili lang sa atong kaugalingon nga mga miyembro, apan usab sa mga tawo sa tibuok kalibutan niana nga diwa sa panag-igsoonay nga gikan ni Ginoong Jesukristo.”⁷⁹

Ang Unang Kapangulohan sa Simbahan gipahibalo sa usa ka news conference niadtong Pebrero 4, 2008: Presidente Thomas S. Monson; Presidente Henry B. Eyring, Unang Magtatambag; ug Presidente Dieter F. Uchtdorf, Ikaduhang Magtatambag.

Kini nga diwa sa panag-igsoonay ug pagtabang sa uban nahimong mga timaan sa administrasyon ni Presidente Monson. Ang mga lider sa Simbahan regular nga nakigtrabaho uban sa mga Katoliko, mga Evangelical Christians, ug sa ubang mga grupo sa relihiyon ug komunidad sa humanitarian nga buhat ug sa pagsuporta sa moral nga mga kawsa. Ang mga lider sa Simbahan midapit sa mga lider sa ubang relihiyon nga mamulong sa mga campus sa LDS ug milig-on sa suporta alang sa relihiyuso nga kagawasan gamit ang online [internet] nga mga kapanguhaan.⁸⁰ Si Presidente Monson ug ang mga sakop sa Korum sa Napulog Duha ka mga Apostoles miawhag usab sa mga miyembro sa Simbahan nga makigtambayayong sa ubang relihiyon diha sa pagserbisyo ug sa pagpalambo sa komunidad ug pagpalig-on sa anaa na nga humanitarian nga mga koneksyon sa ubang mga institusyon aron sa paghupay sa makasagmuyo nga mga panginahanglan sa mga tawo nga naapektuhan sa natural ug hinimo sa tawo nga mga katalagman sa tibuok kalibutan. Sa unang lima ka tuig nga pagdumala ni Presidente Monson, ang Simbahan nakatampo sa mga paningkamot sa pagtabang human sa mga linog sa Haiti ug Nepal, sa tsunami sa Japan, ug mga baha sa Thailand. Mitanyag usab kini og tabang sa pagpangbakuna sa mga tawo sa wala kaayo molambo nga mga nasud, paghatag og limpyo nga tubig sa hilit nga mga barangay, pagpahuwas sa internasyonal nga krisis sa pagkaon, ug paghalad og hinabang atol sa mga katalagman sa Estados Unidos. Kini nga tabang ug impluwensya sa tibuok kalibutan gitiman-an sa Slate.com, diin niadtong 2009 mibutang ni Presidente Monson nga pinakauna sa lista sa 80 ka pinakagamhanan nga mga octogenarian [mga tawo nga nag-edad og 80 hangtud 89] sa Amerika, “ang bugtong tawo sa lista,” sumala sa artikulo, “nga nangulo sa minilyon ka mga tawo isip propeta sa Dios.”⁸¹

Ubos usab sa pagpangulo ni Presidente Monson, ang Church public relations misugod sa pagtabang sa uban nga mas makasabut sa pagkalain-lain sa mga Santos sa Ulahing mga Adlaw. Ang kampanya nga “Usa ako ka Mormon” mipakita og mga Santos sa Ulahing mga Adlaw kinsa nagtrabaho sa ingon ka managlahi nga mga organisasyon sama sa Harley Davidson, Library of Congress, ug mga rock band. Ang punoang buhatan sa Simbahan misugod usab og mga website alang sa kabatan-onan ug sa uban, ug ang BYUtv channel ug website nga gipanag-iya sa Simbahan misugod sa paghimo og mga programa nga tag-as og kalidad nga makadani sa mas daghang tumatan-aw. Diha sa website sa Simbahan, usa ka serye sa tag-as og kalidad nga mga video gisugdan sa pagpakita, nagpakita og mga eksena gikan sa Bag-ong Tugon nga mahimong hangupon sa mga tawo sa daghang relihiyon. Ang ubang online nga mga kapanguhaan naglakip sa pagmantala sa pipila ka mga essay sa Hilisgutan sa Ebanghelyo [Gospel Topics], gituyo aron mahisgutan ang lisud nga mga isyu sa direkta ug edukado nga paagi, ug ang website nga Mormon and Gay, naghatag og tukma nga mga pagtulun-an sa Simbahan ug naghulagway og personal nga mga istorya gikan sa gay [bayot o tomboy] nga mga Santos sa Ulahing mga Adlaw ug sa ilang pamilya.

Tingali ang labing dagko nga mga kausaban nga nahitabo sa panahon sa pagdumala ni Presidente Monson, hinoon, nahitabo diha sa makasaysayanon nga mga kalamboan sa administrasyon. Ang mahinungdanon nga mga kausaban nakaapekto sa paagi sa Simbahan sa pagpangulo, paglihok, pagtudlo, ug pag-proselyte. Niadtong 2009, ang Simbahan miapud-apod og DVD ug pamphlet kabahin sa mga baruganan sa welfare ug sa 2010 mipagawas og bag-ong handbook sa mga instruksyon alang sa mga lider sa Simbahan, nga giubanan og duha ka mga training broadcast alang sa tibuok kalibutan. Ang bag-ong handbook mihatag og gibug-aton sa pagtrabaho diha sa mga konseho pinaagi sa dayag ug matinuoron nga mga diskusyon, gipagaan ang buluhaton sa bishop pinaagi sa pagdelegar, ug, pinakaimportante, pagtabang nga mga miyembro sa Simbahan nga mahimong tinuod nga mga disipulo ni Jesukristo. Niadtong 2010 usab, ang internasyonal nga mga pagbansay nga gipahigayon sa mga sakop sa Korum sa Napulog Duha ka mga Apostoles misugod sa pag-implementar og mga komperensya sa pagpangulo sa priesthood ug mga pagribyu sa area nga naglakip og komprehensibo nga pagpasabut sa humanitarian nga pagserbisyo, mga panginahanglan sa welfare, misyonaryo nga buhat, ug mga buhat sa templo.

Usa sa labing maukyabon nga mga kalamboan nga nahitabo ubos sa direksyon ni Presidente Monson gipahibalo niadtong Oktubre 2012 nga kinatibuk-ang komperensya sa dihang si Presidente Monson mideklarar nga ang mga lalaki mahimong mosugod sa pagserbisyo og full-time nga misyon sa edad nga 18 ug ang mga babaye sa edad nga 19. Kining talagsaon nga kausaban sa polisiya nga nagpaubos sa edad nga gikinahanglan nakamugna og kadasig alang sa misyonaryo nga buhat nga miresulta sa makasaysayanon nga gidaghanon sa mga lalaki ug ilabi na sa mga babaye nga miserbisyo og full-time nga misyon. Ang paghimo og bag-o nga mga missionary training center ug bag-o nga mga misyon miuban sa pagsaka sa gidaghanon sa mga misyonaryo, nga miabut og 85,000 sa pagtapos sa 2014. Ang mga miyembro nahimo usab nga kabahin sa “pagpadali sa buhat”, mas maayong miandam sa mga anak sulod sa panimalay alang sa mga misyon ug mas hingpit nga miapil sa ilang lokal nga mga programa sa misyonaryo. Ang teknolohiya ug online nga pag-proselyte, ingon man usab ang pagmugna sa “sister training leaders”— usa ka tahas sa pagpangulo alang sa sister nga mga misyonaryo—midugang usab sa makapadasig nga pagbati sa pag-uswag ug pagpangusab nga namugna sa pahibalo sa kausaban sa edad sa pagmisyon.

Ang pagtugot sa batan-ong mga babaye nga makaserbisyo og misyon sa mas batan-on nga edad mihaum sa padayon nga paningkamot sa panahon sa pagdumala ni Presidente Monson nga mas maapil ang kababayen-an sa mga tahas sa pagpangulo, sa paghimo og desisyon, ug sa pag-apil sa ward ug stake council. Aron mas matabangan ang mga babaye ug lalaki nga mga Santos sa Ulahing mga Adlaw nga makadayeg sa importante nga tahas nga nabuhat sa mga sister diha sa ebanghelyo sa matag dispensasyon—ilabi na atol sa pangalagad sa Manluluwas ug sa panahon sa Pagpahiuli gikan sa 1830 hangtud karon—ang Simbahan mimantala sa Anak nga mga babaye sa Akong Gingharian ug miawhag sa paggamit niini diha sa panimalay, sa Relief Society ug Young Women, ug sa mga korum. Niadtong 2014, ang kinatibuk-ang sesyon sa mga babaye sa kinatibuk-ang komperensya mipuli sa kinatibuk-an nga mga miting sa Relief Society ug Young Women, diin ang tanang babaye nga nag-edad og 8 pataas gidapit sa pagtambong niining kaduha sa usa ka tuig nga miting.

Ang mas maayo ug mas interactive nga mga pamaagi sa pagtudlo, ilabi na sa pagtabang sa kabatan-onan nga mahimong hingpit nga partisipante sa ebanghelyo, nahimo usab nga usa ka prayoridad sa mga kausaban sa administrasyon ni Presidente Monson. Ang 2013 nga implementasyon sa Dali, Sunod Kanako, usa ka kurikulum sa kabatan-onan nga gidesinyo sa “pagpanalangin sa mga kabatan-onan sa ilang mga paningkamot nga hingpit nga makabig sa ebanghelyo ni Jesukristo”,⁸² mihatag sa mga magtutudlo ug mga kabatan-onan og mas maayo nga mga paagi sa pagtudlo sama sa gibuhat ni Jesukristo. Migamit kini og online ng mga kapanguhaan, pag-apil sa kabatan-onan, ug dinasig sa Espiritu nga mga diskusyon sa pag-ugmad og pagtuo ug pagsabut sa ebanghelyo. Ang susama nga mga paningkamot sa pagpalambo sa tanang pagtudlo diha sa simbahan miabut sa 2016 uban sa bag-ong kapanguhaan nga Pagtudlo sumala sa Pamaagi sa Manluluwas ug ang pagpaila sa binulan nga mga miting sa teacher council sa mga ward.

Sa panahon usab sa administrasyon ni Presidente Monson, ang mga pahibalo sa bag-ong mga templo nga tukuron sa tibuok kalibutan mipadayon. Ang mga pagpahinungod ug mga pagpahinungod og usab sa mga templo nakahimo ni Presidente Monson sa pagbiyahe sa mga dapit sa tibuok kalibutan, lakip sa Cebu City, Philippines; Curitiba, Brazil; Kyiv, Ukraine; Panama City, Panama; ug Kansas City, Missouri. Niadtong 2013, ang pagsugod sa online nga mga kapanguhaan aron sa pagtabang sa mga miyembro nga makakaplag sa ilang mga katigulangan miresulta sa 11 ka porsyento nga pagsaka sa mga pangalan nga gisumiter sa mga miyembro alang sa mga ordinansa sa templo sa unsay gitawag nga “talagsaon nga tuig alang sa family history.”⁸³

Bisan pa sa bug-at nga panginahanglan sa iyang panahon, hinoon, si Presidente Monson nagpabilin nga si Thomas Monson, ang lider sa Simbahan kinsa, sa mga pulong ni Elder Jeffrey R. Holland sa Korum sa Napulog Duha ka mga Apostoles, “motungha, tingali sa walay pagpahibalo, diha sa haya sa usa ka rank-and-file nga empleyado. Wala na koy mahunahunaan pa nga mas nagpakita sa ehemplo sa pangalagad ni Presidente Monson kay sa niana nga matang sa tinagsa nga pagtagad.”⁸⁴

Niadtong Mayo 23, 2013, gidumala niya ang haya sa iyang kaugalingong asawa, si Frances, human kini namatay pagka-Mayo 17 sa usa ka ospital sa Salt Lake. “Kanunay siya nga misuporta sukad pa sa adlaw sa among kasal,” miingon si Presidente Monson atol sa mga kalihokan, mitawag kaniya nga “sulundon nga asawa ug inahan.”⁸⁵ Gituman niya ang nahibilin sa iyang kapangulohan isip usa ka biyudo, nga kasagarang giubanan sa iyang anak nga si Ann sa espesyal nga mga kalihokan.

Sa panahon ni Presidente Monson isip Presidente sa Simbahan, gihatagan og gibug-aton ang pagpalambo sa pagbalaan sa adlaw nga Igpapahulay isip usa ka paagi nga madugangan ang pagtuo sa Langitnong Amahan ug ni Jesukristo sa mga panahon sa pagduha-duha ug kahadlok. Sugod niadtong 2015, usa ka hiniusa ug nagpadayon nga paningkamot sa tanang level sa Simbahan ug diha sa panimalay miawhag sa mga miyembro sa “paghimo sa Igpapahulay nga usa ka kahimut-an” (tan-awa sa Isaias 58:13) pinaagi sa pagtutok diha sa Ginoo ug sa ilang mga pakigsaad ngadto Kaniya aron maani ang mga panalangin nga gisaad ngadto sa mga matinud-anon.

Si Presidente Monson padayon usab nga nagpabiling nahibalo niadtong mipahilayo gikan sa Simbahan ug wala gayud motratar kanila nga dili takus sa gingharian. Sa diha nga usa ka tigulangon nga lalaki nga wala na malakip sa Simbahan sulod sa 20 ka tuig miadto sa usa ka General Authority aron magpakitambag unsaon sa pagbalik, gipagawas niya ang sulat nga nakaaghat sa iyang kaugalingong tinguha sa pagbalik: “Dugay na kaayo ka nga nawala, ug panahon na aron mobalik. Tom.”⁸⁶ Sumala ni Presidente Monson, “Akong nasayran nga adunay gamay nga pagkabalaan sa matag usa, ug mangita ako niini.”⁸⁷

Bisan Presidente sa Simbahan, gimintinar niya ang iyang pagbati sa pakighugoy-hugoy sa uban, miingon si Elder L. Tom Perry (1922–2015): “Maghisgot siya mahitungod sa dula sa BYU o sa Jazz; maayo kaayo siya nga sports fan. Ug dayon maghisgot siya sa seryusong mga butang.”⁸⁸ Ug gipadayon niya ang iyang pagkasiaw. Sa usa ka panagpundok sa 2009 uban sa mga sakop sa Mormon Tabernacle Choir, milingkod siya diha sa dakong organ ug mihatag sa iyang rendisyon sa “To a Birthday Party” gikan sa libro sa piano sa mga nagsugod pa.⁸⁹ Niadtong 2013, ang Simbahan misaulog sa “100 ka Tuig sa Scouting” uban sa usa ka programa nga mihatag usab og pasidungog sa tibuok kinabuhi nga pagsuporta ni Presidente Monson sa Scouting—usa sa daghang mga interes nga nagpabilin kaniyang konektado sa iyang mga isig ka tawo, kinsa ganahan niyang hupayon ug himoong mas malipayon, nagdapit sa tanang mga Scouter, dili igsapayan ang relihiyon, sa pag-apil.

“Ang pagbati sa hinay nga pagduso sa Ginoo, ang mga pag-aghat,” miingon si Presidente Monson sa usa ka interbyu sa 1997, nakahatag kaniya og labing dakong kalipay, ilabi na sa mga sitwasyon nga sama niadtong gibisitahan niya ang iyang amahan sa ospital ug, nagdali pagkahuman aron motambong sa iyang sunod nga miting, mibati nga angay siyang mohulat duol sa elevator. Usa ka pamilya mihangyo kaniya sa paghatag og panalangin sa ilang inahan, kinsa nanlimbasog tali sa kinabuhi ug kamatayon, ug misugot siya. Wala madugay nianang adlawa, gipahibalo siya nga ang matag sakop sa pamilya nakahalok sa inahan ug nakasulti og malinawon nga panamilit human sa pagpanalangin ug sa wala pa siya mamatay.⁹⁰

“Nahitabo na kana ngari kanako sa tibuok nakong kinabuhi hangtud sa punto nga naningkamot ko nga maminaw niini nga mga pag-aghat,” miobserbar si Presidente Monson. Ug ang dili maihap nga mga indibidwal—nga ang mga istorya sa pipila nasulti na, apan adunay daghan pa kansang mga pakigkita kang Thomas Monson nagpabiling wala masayri—makapamatuod sa koneksyon niining talagsaon nga tawo ngadto sa balaanon. “Makapalambo ka og pasalamat nga ang Langitnong Amahan nakaila kon kinsa ka,” namalandong si Presidente Monson. “Moingon Siya, ‘Ania, buhata kini alang kanako.’ Kanunay kong nagpasalamat Kaniya.”⁹¹

Ug ang iyang pagsaksi ngadto sa kalibutan walay pagkapakyas. “Uban sa tibuok nakong kasingkasing ug tumang pagbati sa akong kalag,” miingon si Presidente Monson, “mangusog ako sa akong tingog agig pagpamatuod isip usa ka linain nga saksi ug mamahayag nga ang Dios tinuod gayud nga buhi. Si Jesus Iyang Anak, ang Bugtong Anak sa Amahan diha sa unod. Siya ang atong Manunubos; Siya ang atong Tigpataliwala sa Amahan. Siya kadto ang namatay sa krus aron sa pagtubos sa atong mga kasal-anan. Nahimo Siya nga unang mga bunga sa Pagkabanhaw. Tungod kay Siya namatay, ang tanan gayud mabuhi pag-usab. ‘O, tam-is kini nga pulong: “Ako nasayud ang akong Manunubos buhi!”’ [Hymns, nu. 136]. Hinaut ang tibuok kalibutan masayud niini ug mosunod niana nga kahibalo.”⁹²

Mubo nga mga sulat

1. Thomas S. Monson, “Pagmaya,,” Liahona, Mayo 2009, 92.
2. Email nga sulat uban ni Gregory Parkin, M.D., Sept. 2, 2008.
3. Sa “A Life Guided by Service,” Deseret News, espesyal nga apas-sumpay sa kinatibuk-ang komperensya, Abr. 1, 2008, 4; tan-awa usab sa Jeffrey R. Holland, “President Thomas S. Monson: Man of Action, Man of Faith, Always ‘on the Lord’s Errand,’” Ensign, Peb. 1986, 12.
4. Tom Monson, anak, email ngadto kang Joshua Perkey, Church Magazines, Peb. 19, 2008.
5. Sa Heidi S. Swinton, To the Rescue: The Biography of Thomas S. Monson (2010), 518.
6. Gerry Avant, “President’s Heartfelt Efforts Universal,” Deseret News, Peb. 7, 2008, M6.
7. Sa “A Life Guided by Service,” 4.
8. Sa “Speaking from Experience,” Deseret News, Peb. 7, 2008, M4.
9. Sa Carrie A. Moore, “LDS Leader Has Fond Memories of Growing Up in the S.L. Area,” Deseret News, Peb. 5, 2008, M3.
10. Sa Gerry Avant, “On Lord’s Errand since His Boyhood,” Church News, Peb. 9, 2008, 5.
11. Daghan sa biyograpikanhong impormasyon niini nga artikulo gikuha gikan sa Swinton, To the Rescue.
12. Tan-awa sa Swinton, To the Rescue, 50–51; “.
13. Tan-awa sa Heidi S. Swinton, “Baseballs and Service”.
14. Tan-awa sa Swinton, To the Rescue, 35.
15. Sa Jeffrey R. Holland, “Presidente Thomas S. Monson: Diha sa mga Tunob sa Magtutudlo,” apas-sumpay sa Liahona, Hunyo 2008, 5.
16. Sa “In His Own Words,” Deseret News, espesyal nga apas-sumpay sa kinatibuk-ang komperensya, Abr. 1, 2008, 7.
17. Tan-awa sa Swinton, To the Rescue, 58.
18. Tan-awa sa Thomas S. Monson, “Ang Pagkamasulundon Makahatag og Panalangin,” Liahona, Mayo 2013, 89–90.
19. Tan-awa sa Moore, “LDS Leader Has Fond Memories,” M3; “A Life Guided by Service,” 5.
20. Tan-awa sa Swinton, To the Rescue, 74–75.
21. Tan-awa sa Swinton, To the Rescue, 63–65.
22. Tan-awa sa Swinton, To the Rescue, 78.
23. Sa Moore, “LDS Leader Has Fond Memories,” M3.
24. Tan-awa sa Swinton, To the Rescue, 79, 87.
25. Tan-awa sa Swinton, To the Rescue, 89, 288.
26. Sa Moore, “LDS Leader Has Fond Memories,” M3.
27. Tan-awa sa Swinton, To the Rescue, 90.
28. Tan-awa sa Swinton, To the Rescue, 92.
29. Thomas S. Monson, “Magmaisugon sa Pagbarug nga Mang-inusara,” Liahona, Nob. 2011, 61.
30. Sa “Speaking from Experience,” M5.
31. Sa Swinton, To the Rescue, 99.
32. Sa Moore, “LDS Leader Has Fond Memories,” M3.
33. Sa “A Life Guided by Service,” 5.
34. Tan-awa sa Swinton, To the Rescue, 144.
35. Tan-awa sa Swinton, To the Rescue, 142.
36. Sa Swinton, To the Rescue, 132.
37. Tan-awa sa Swinton, To the Rescue, 158–59.
38. Tan-awa sa Swinton, To the Rescue, 135–36.
39. Tan-awa sa Gary Bell, sa “Recollecting,” sa Deseret News, Peb. 5, 2008, M3.
40. Tan-awa sa Swinton, To the Rescue, 175–76.
41. Sa Swinton, To the Rescue, 216.
42. Tan-awa sa Swinton, To the Rescue, 217–18.
43. Sa “In His Own Words,” 17.
44. Tan-awa sa Swinton, To the Rescue, 252.
45. Tan-awa sa Swinton, To the Rescue, 224.
46. Tan-awa sa Swinton, To the Rescue, 530–532.
47. Sa Swinton, To the Rescue, 279.
48. Tan-awa sa Swinton, To the Rescue, 293–94.
49. Sa Swinton, To the Rescue, 309.
50. Tan-awa sa Swinton, To the Rescue, 309, 313, 333–34.
51. Sa Swinton, To the Rescue, 340.
52. Sa Swinton, To the Rescue, 405.
53. Sa Jeffrey R. Holland, “Diha sa mga Tunob sa Magtutudlo,” 11.
54. Tan-awa sa Swinton, To the Rescue, 316.
55. Sa Swinton, To the Rescue, 248.
56. Sa Swinton, To the Rescue, 464.
57. Sa Swinton, To the Rescue, 401.
58. John W. Gallivan, sa Jeffrey R. Holland, “Man of Action, Man of Faith,” 15.
59. Pamela Atkinson, sa “Recollecting,” M3.
60. Sa Swinton, To the Rescue, 440.
61. Tan-awa sa Swinton, To the Rescue, 402–3, 453.
62. Tan-awa sa Joseph F. Dougherty, “LDS Leader Also Lifelong Scouter,” Deseret News, Peb. 7, 2008, M6.
63. Sa “In His Own Words,” 20.
64. Ann Dibb, email ngadto ni Joshua Perkey, Church Magazines, Peb. 13, 2008.
65. Thomas S. Monson, “Pagpangita og Kalipay Panahon sa Panaw,” Liahona, Nob. 2008, 85.
66. Sa Swinton, To the Rescue, 452.
67. Tan-awa sa Swinton, To the Rescue, 463–64, 453.
68. Tan-awa sa Swinton, To the Rescue, 200.
69. Tan-awa sa Jeffrey R. Holland, “Man of Action, Man of Faith,” 16–17.
70. Tan-awa sa Jeffrey R. Holland, “Man of Action, Man of Faith,” 17.
71. Tan-awa sa Swinton, To the Rescue, 265.
72. Tan-awa sa Swinton, To the Rescue, 532–33.
73. Sa Swinton, To the Rescue, 471, 472, 478, 484, 485.
74. Sa Swinton, To the Rescue, 485.
75. Sa Swinton, To the Rescue, 492.
76. Sa Swinton, To the Rescue, 487.
77. Gerry Avant, “Church President to Be Sustained in Solemn Assembly,” Church News,Abr. 5, 2008, 3–4; tan-awa usab sa ChurchofJesusChrist.org/church/news/oct-4-is-president-monsons-50-year-anniversary-as-apostle.
78. Tan-awa sa Swinton, To the Rescue, 496.
79. Thomas S. Monson, “The Lord’s Work,” Church News, Peb. 9, 2008, 3.
80. Tan-awa sa “Church Launches New Resources on Freedom of Religion [Ang Simbahan Mipagawas og Bag-ong mga Kapanguhaan kalabut sa Kagawasan sa Relihiyon],” mormonnewsroom.org/article/religious-freedom-resources.
81. Sa Swinton, To the Rescue, 515.
82. Sulat sa Unang Kapangulohan, Sept. 12, 2012.
83. Paul G. Nauta, “2013 Was a Banner Year for Family History,” ChurchofJesusChrist.org/church/news/2013-was-a-banner-year-for-family-history.
84. Sa Swinton, To the Rescue, 502.
85. Gerry Avant, “Sister Frances J. Monson Was ‘the Ideal Wife and Mother [Si Sister Frances J. Monson Mao ang Sulundon nga Asawa ug Inahan],’” ChurchofJesusChrist.org/church/news/sister-frances-j-monson-was-the-ideal-wife-and-mother.
86. Sa Swinton, To the Rescue, 504.
87. Sa Swinton, To the Rescue, 504.
88. Sa Swinton, To the Rescue, 512.
89. Tan-awa sa Swinton, To the Rescue, 515.
90. Gerry Avant, “Oct. 4 Is President Monson’s 50-Year Anniversary as Apostle [Okt. 4 Mao ang 50 ka Tuig nga Anibersaryo sa Pagka-Apostol ni Presidente Monson],” ChurchofJesusChrist.org/church/news/oct-4-is-president-monsons-50-year-anniversary-as-apostle.
91. Gerry Avant, “Oct. 4 Is President Monson’s 50-Year Anniversary as Apostle [Okt. 4 Mao ang 50 ka Tuig nga Anibersaryo sa Pagka-Apostol ni Presidente Monson],” ChurchofJesusChrist.org/church/news/oct-4-is-president-monsons-50-year-anniversary-as-apostle.
92. Thomas S. Monson, “Ako Nasayud Nga Ang Akong Manunubos Buhi!” Liahona, Mayo 2007, 25.

---

Pinili nga mga Pagtulun-an

Ang mosunod nga mga pagtulun-an gikan sa pagpangalagad ni Presidente Monson isip Presidente sa Simbahan ug gihan-ay sa kronolihikanhon nga paagi.

Pagsunod sa mga Pag-aghat: “Ang pinakatam-is nga kasinatian nga akong nahibaloan sa kinabuhi mao ang pagbati og pag-aghat ug paglihok niini ug sa kaulahian mahibaloan nga kini usa ka katumanan sa pag-ampo sa usa ka tawo o sa panginahanglan sa usa ka tawo. Ug gusto nako kanunay nga mahibalo ang Ginoo nga kon aduna Siyay buluhaton nga isugo, si Tom Monson mobuhat niana nga sugo alang Kaniya” (On the Lord’s Errand [DVD, 2008]).

Pagdawat og Balaanong Tabang: “Hinumdumi nga kini nga trabaho dili lamang inyo ug ako. Trabaho kini sa Ginoo, ug kon kita anaa sa buluhaton sa Ginoo, may katungod kita sa panabang sa Ginoo. Hinumdumi nga kon kinsa ang tawagon sa Ginoo, ang Ginoo mopasarang” (“Duty Calls,” Ensign, Mayo 1996, 44).

Gugma alang sa Uban: “Ang pinakaimportante kanunay maglakip sa mga tawo sa atong palibut. Sa kasagaran maghunahuna kita nga unta masayud sila kon unsa nato sila ka mahal. Apan dili lamang kita maghunahuna; kinahanglan nato silang pahibaloon” (“Pagpangita og Kalipay Panahon sa Panaw,” Liahona, Nob. 2008, 86).

Serbisyo: “Gawas kon kalimtan nato ang atong kaugalingon diha sa pagserbisyo sa uban, adunay gamay ra nga katuyoan sa atong kaugalingong kinabuhi. Kadtong kinsa nagpakabuhi lamang alang sa ilang kaugalingon sa katapusan maminusan ang ilang pagkatawo ug sa mapasumbingayong paagi mawagtangan sa ilang kinabuhi, samtang kadtong nahikalimot sa ilang kinabuhi diha sa pagserbisyo sa uban motubo ug molambo—ug sa ingon moluwas sa ilang kinabuhi” (“Unsa may Akong Nabuhat alang sa Usa ka Tawo Karon?” Liahona, Nob. 2009, 85).

Kaminyoon: “Pagpili og kapikas sa mabinantayon ug mainampuong paagi; ug kon kamo naminyo na, magmaunungon gayud ngadto sa usag usa. Bililhon nga tambag ang naggikan sa usa ka gamay nga gikwadrohang plaka nga akong nakita kaniadto sa panimalay sa akong uyoan ug iyaan. Kini mabasa, ‘Pilia ang imong higugmaon; higugmaa ang imong gipili’” (“Gahum sa Priesthood,” Liahona, Mayo 2011, 68).

Mga Panalangin sa Templo: “Hangtud nga kamo makasulod sa balay sa Ginoo ug makadawat sa tanang mga panalangin nga naghulat kaninyo didto, dili ninyo maangkon ang tanan nga ikatanyag sa Simbahan. Ang pinaka-importante ug dagkong mga panalangin sa pagkamiyembro sa Simbahan mao kadtong mga panalangin nga atong madawat sa mga templo sa Dios” (“Ang Balaan nga Templo—ang Suga sa Kalibutan,” Liahona, Mayo 2011, 93).

Ang Pag-ula: “Ako nagtuo nga walay usa nato ang nakasabut sa hingpit sa kaimportante sa unsay gibuhat ni Kristo alang kanato didto sa Getsemani, apan ako mapasalamaton kada adlaw sa akong kinabuhi tungod sa Iyang maulaong sakripisyo alang kanato.

“Sa katapusang gutlo, mahimo unta Siyang motalikod. Apan wala Niya buhata. Giagian Niya ang tanang mga butang aron nga Siya makaluwas sa tanang mga butang. Sa pagbuhat sa ingon, Siya mihatag nato sa kinabuhi lapas niining mortal nga kinabuhi. Giluwas Niya kita gikan sa Pagkapukan ni Adan.

“Sa kahiladman sa akong kalag, ako mapasalamaton kaayo Kaniya. Siya mitudlo nato unsaon sa pagpakabuhi. Siya mitudlo nato unsaon sa pagpakamatay. Iyang gisiguro ang atong kaluwasan” (“Sa Pagpanamilit,” Liahona, Mayo 2011, 114).

Pag-ampo: “Ang atong Langitnong Amahan nahibalo sa atong panginahanglan ug motabang kanato kon kita motawag Kaniya alang sa tabang. Mituo ko nga wala kitay mga kabalaka nga gamay ra kaayo o dili importante. Ang Ginoo naghunahuna sa matag detalye sa atong kinabuhi” (“Hunahunaon ang mga Panalangin,” Liahona, Nob. 2012, 88).

Mga Pagsulay: “Nasayud kita nga adunay panahon nga masinati nato ang hilabihang kasubo, nga kita magbangutan, ug masulayan kon asa kita kutob. Apan, kanang mga kalisdanan makausab nato alang sa mas maayo, makausab sa atong kinabuhi sa paagi nga gitudlo sa Langitnong Amahan nato, ug makapalahi nato kay sa unsa kita kaniadto—mas maayo kay sa kaniadto, mas masinabtunon kay sa kaniadto, mas mosimpatiya kay sa kaniadto, nga may mas lig-ong pagpamatuod kay sa kaniadto” (“Ikaw Dili Ko Kawangon, ni Biyaan Ko Ikaw,” Liahona, Nob. 2013, 87).

Gugma sa Dios: “Ang inyong Langitnong Amahan nahigugma kaninyo—matag usa ninyo. Kana nga gugma dili gayud mausab. Dili kini maimpluwensyahan sa inyong panagway, mga kabtangan, o kantidad sa kwarta nga anaa sa inyong bank account. Dili kini mausab sa inyong mga talento ug mga abilidad. Anaa ra kini. Anaa kini alang kaninyo kon kamo naguol o malipayon, nawad-an sa paglaum o malaumon. Ang gugma sa Dios anaa alang kaninyo dili igsapayan kon mobati man kamo nga angayan o dili sa gugma. Anaa ra kini kanunay” (“Wala Kita Mag-inusara,” Liahona, Nob. 2013, 124).

Pagpangandam: “Kita nagpuyo sa magubot nga panahon. Kasagaran ang atong umaabut wala mahibaloi; busa, kinahanglan gayud nga mangandam para sa walay mga kasiguroan. Kon moabut ang panahon sa pagdesisyon, milabay na ang panahon sa pagpangandam” (“Andam Na Ba Kita?” Liahona, Sept. 2014, 5).

Ehemplo: “Samtang ang kalibutan magkalayo gikan sa mga baruganan ug mga sumbanan nga gihatag sa Langitnong Amahan kanato, mobarug kita tungod kay kita lahi. … Kadtong mga butang nga makapalahi nato gikan sa kalibutan naghatag usab kanato niana nga kahayag ug niana nga espiritu nga modan-ag sa nagkangitngit nga kalibutan” (“Pagpakita og Ehemplo ug Kahayag,” Liahona, Nob. 2015, 88).

Mga Pagpili: “Hinaut nga magpadayon ang atong kaisug sa pagsupak sa kadaghanan sa kalibutan. Hinaut nga pilion nato ang mas lisud nga sakto, kay sa mas sayon nga sayop.

“Sa atong pagpamalandong sa mga desisyon nga atong himoon sa atong kinabuhi kada adlaw—bisan sa paghimo niini nga pagpili o niana nga pagpili—kon mopili kita ni Kristo, nakahimo kita og sakto nga pagpili” (“Mga Pagpili,” Liahona, Mayo 2016, 86).

Gugmang Putli: “Susihon nato ang atong kinabuhi ug tinuon ang pagsunod sa ehemplo sa Manluluwas pinaagi sa pagkamabination, pagkamahigugmaon, ug pagkamatinabangon. Sa pagbuhat nato sa ingon, anaa kita sa mas maayong posisyon nga manawagan sa gahum sa langit alang sa atong kaugalingon, sa atong mga pamilya, ug sa atong mga isig ka-biyahero niining usahay lisud nga panaw balik ngadto sa atong langitnong panimalay” (“Pagkamabination, Gugmang Putli, ug Pagmahal,” Liahona, Mayo 2017, 67).

Ang Basahon ni Mormon: “Mohangyo ko natong tanan nga mainampoong magtuon ug mamalandong sa Basahon ni Mormon kada adlaw. Kon buhaton nato, anaa kita sa posisyon nga makadungog sa tingog sa Espiritu, sa pagbatok sa tintasyon, sa pagbuntog sa pagduhaduha ug kahadlok, ug sa pagdawat sa tabang sa Langit sa atong mga kinabuhi” (“Ang Gahum sa Basahon ni Mormon,” Liahona, Mayo 2017, 87).

  Aduna Ka Bay Feedback Niini nga Pahina?