Puk Se Met lal Nephi
Kol Ac Orekma lal
Sie sramsram kacl Lehi ac muhtwacn kiyacl Sariah, ac wen ahkosr nahtuhl, suc pahngpahng, (muhtwacwacack ke lahp) Laman, Lemuel, Sam, ac Nephi. Leum El sensenkackuhnuhl Lehi in som liki acn Jerusalem, ke srihpen el fahk kahs in pahluh nuh sin mwet uh ke ma koluk lalos ac elos suk in kuhnahoslah moul lal. El fuhfahsryucsr lwen tolu nuh ke yen mwesis weacng sucu lal. Nephi el us tamuhlwel wiyacl ac fohlohklac nuh fin acn Jerusalem in eis ma sihmlac kacn mwet Jew. Sramsram ke kweok lalos. Elos eis acn nahtuhl Ishmael in muhtwacn kiyaclos. Elos eis sucu lalos ac som nuh yen mwesis. Kweok ac ongaiyac lalos ke yen mwesis. Inkacnek in fuhfahsryucsr lalos. Elos tuhkuh nuh ke kof luhlahp. Tamuhlwel lal Nephi lainuhl. El kuhtanglah kaclos, ac muhsaheack soko oak. Elos pahngon inen acn sac Puhs. Elos tuhkuh meoa luhlahp nuh ke acn uliyuck, ac fahfahlac. Ma inge oacna nuh ke sramsram lal Nephi; kuh ke kahs sahyac, nga, Nephi, suhmuhslah ma sihmlac se inge.
Sapta 1
Nephi el muhtwacwacack in sihmihs ke mwet lal—Lehi el liye ke aruhruhma sie e fihrihr ac rit ke sie puk in pahluh—El kaksakihn God, palyei tuhkuh luhn Messiah, ac palye kuhnanuclac luhn acn Jerusalem—El ahkkolukyeyuck sin mwet Jew. Sahp ke yac 600 Met Liki Kraist.
1 Nga, Nephi, isuslac nuh sin ninac ac pahpah wo, ohinge nga tuh lutiyuck kuhtuh ke etwacack nuhkwewa luhn pahpah tuhmuhk; ac liye ma upac pucspucs ke lusen moul luhk uh, ne ohinge, nga luhngseyuck yohk sin Leum ke lusen moul luhk; ahok, nga etuh yohk ke wolacna ac ma lukmac luhn God, ohinge nga oraclah sie ma sihmlac ke mukwikwi luhk ke moul luhk.
2 Ahok, nga oraclah sie ma sihmlac ke kahs luhn pahpah tuhmuhk, ma nwacnwack etwacack luhn mwet Jew ac kahs luhn mwet Egypt.
3 Ac nga etuh lah ma sihmlac ma nga oraclah inge pwacye; ac nga oraclah ke pouk sifacna; ac nga oraclah ma inge fal nuh ke etwacack luhk uh.
4 Tuh tukun ma inge ke muhtwacwacackiyacn yac se emet ke kolyuck lal Zedekiah, tohkohsrah luhn acn Judah, (pahpah tuhmuhk, Lehi, el muhta Jerusalem ke lusen moul lal nohfohn); ac ke yac sacn pacna mwet pahluh pucspucs tuhkuh, palye nuh sin mwet uh lah elos enenuh in auliyak, fin tiac siti luhlahp Jerusalem enenuh in kuhnausyucklac.
5 Ohinge tukun ma inge pahpah tuhmuhk, Lehi, ke el som pruhe nuh sin Leum, ahok, finne ke insiacl kwewa, ke mwet lal.
6 Ac tukun ma inge ke el pruhe nuh sin Leum, sie e fihrihr sikyak ac oan fin sie yot met luhkwel; ac el liye ac lohng ma pucspucs; ac ke srihpen ma suc el liye ac lohng oruh el tuhlaklakwack ac rarrar na upac.
7 Ac tukun ma inge el fohlohklac nuh lohm sel sifacna fin acn Jerusalem; ac el oan fin mwe oan lal, tuh el sesseslah ke Nguhn ac ke ma el tuh liye ah.
8 Ac ke el sesseslah ke Nguhn, el utucklac ke sie aruhruhma, finne tuh el liye inkuhsrao ikacklah, ac el nuhnkuh muh el liye God muhta fin siyah fuhlwact Lal, rauniyucklac ke un lipufacn pucspucs suc on ac kaksakihn God lalos.
9 Ac tukun ma inge el liye Sie oactui liki inkuhsrao, ac el liye lah sahromromiyacl kahlwem liki na faht ah ke infulwen lwen.
10 Ac el oacyacpac liye singucul luo sahyac fahsr tohkohl, ac sahromromiyaclos kahlwem liki na itu yen engyeng uh.
11 Ac elos oactume nuh ten ac som nuh muhtuhn facluh; ac ma se emet ah tuhkuh ac tu met liki pahpah tuhmuhk, ac sang nuh sel sie puk, ac fahk nuh sel lah el enenuh in riti.
12 Ac tukun ma inge ke el riti, el sesseslah ke Nguhn luhn Leum.
13 Ac el rit, fahk: We, we, nuh Jerusalem, tuh nga liye ma sruhngwacyuck lowos! Ahok, ac ma pucspucs pahpah tuhmuhk el riti ke acn Jerusalem—lah e kuhnausyucklac, ac mwet muhta we; mwet pucspucs ac misac ke katlas, ac mwet pucspucs ac srohoh utucklac nuh Babylon.
14 Ac tukun ma inge ke pahpah tuhmuhk el riti ac liye ma yohk ac wolacna pucspucs, el tuh fahk ma pucspucs nuh sin Leum; suc oacna: Yohk ac wo orekma Lom, O Leum God Kuhlacna! Siyah fuhlwact Lom oan fuhlwact inkuhsrao, ac kuh, ac wolacna, ac pahkotwen Lom oasr yurun mwet nuhkwewa fin facluh; ac, ke srihpen Kom pahkotwen, Kom ac fah tiac lwelah elos suc tuhkuh nuh Yurum in misac!
15 Ac tukun na ohiyac se inge pahpah tuhmuhk el kaksakihn God lal; tuh nguhnal tuh kaksak, ac insiacl nohfohn sesseslah, ke srihpen ma suc el liye, ahok, ma Leum El ahkkahlwemye nuh sel.
16 Ac inge nga, Nephi, tiac oraclah nohfohn sramsram ke ma suc pahpah tuhmuhk el suhmuhslah, tuh el suhmuhslah ma pucspucs ma el liye ke aruhruhma ac ke mwemwe; ac el oacyacpac suhmuhslah ma pucspucs ma el pahlyei ac fahk nuh sin tuhlihk nahtuhl, ma nga ac tiac oraclah nohfohn sramsram kac.
17 Tuhsruhk nga fah oraclah sie sramsram ke mukwikwi luhk ke lusen moul luhk. Liye, nga oraclah sie sramsram fototo ke ma sihmlac luhn pahpah tuhmuhk, fin plwet ma nga oraclah ke pouk sifacna; ohinge, tukun nga ahkfototoyelah ma sihmlac luhn pahpah tuhmuhk na nga fah oraclah sie sramsram ke moul luhk sifacna.
18 Ohinge, nga kena tuh kowos in etuh, lah tukun Leum El ahkkahlwemye ma wolacna pucspucs nuh sin pahpah tuhmuhk, Lehi, ahok, ke kuhnausyucklac luhn acn Jerusalem, liye el som nuh inmahsrlon mwet uh, ac muhtwacwacack in palye ac fahk nuh selos ke ma suc el tuh kwewana liye ac lohng.
19 Ac tukun ma inge mwet Jew elos tuh isruhnuhl ke srihpen ma suc el fahkwack nuh selos; tuh pwacye lah el fahkwack ke ma koluk lalos ac ma sruhngwacyuck lalos; ac el fahkwack ke ma suc el liye ac lohng, ac oacyacpac ke ma suc el riti ke puk sac, ma ahkkahlwemye arulacna kahlwem ke tuhkuh luhn Messiah, ac oacyacpac ke moliyucklac luhn facluh.
20 Ac ke mwet Jew elos lohng ma inge elos tuh kasrkuhsrak sel; ahok, finne oacna nuh sin mwet pahluh ke pacl omeet ah, suc elos luhswack, ac tuhngal ke yot, ac uniyac; ac elos oacyacpac suk moul lal, tuh elos in unilyac. Tuhsruhk liye, nga, Nephi, ac fah ahkkahlwemye nuh suwos lah pahkotwen wo luhn Leum oasr yohrohlos kwewa suc El tuh sulaclah, ke srihpen luhlahlfongi lalos, in oraclah elos in fokoko finne nuh ke kuh luhn moliyucklac.