Pi Chep nib Thothup
1 Nephi 13


Guruy Ni 13

Nephi e guy u malikʼay fare galasia rokʼ fare Moʼoniyanʼ ni kan toey nga fithikʼ fapi Gentiles, morngaʼagen yu Mariken nni pirʼeg nge rogon e paer riy, fare malog ni tay e yungin nib tamilang ma rib gaʼfan ko fare ke Bible, rogon e paer ko fapi gentiles u napʼan nra palog gaed ko tin riyulʼ, fare sulyarmen ko fare gospel, rogon e wub ni tay e babyor nib thothup ko tin tomur e rran, nge fare monʼog ni tay e Zion. Napʼan 600–592 M.K.

1 Me yibi buch ni fare angel e non ngog, ni gaʼar: Musap! Mug sap mug guy nib yoʼor e nam nge gilʼilungun.

2 Me gaʼar fare angel ngog: Mang e kam guy? Mu gguʼar: Kug guy nib yoʼor e nam nge gilʼilungun.

3 Me gaʼar ngog: Ireray fapi nam nge gilʼilungun fapi Gentiles.

4 Me yibi buch nug guy u fithikʼ fapi nam ko Gentiles ba galasia ni kan yarmiy nib gaaʼ.

5 Me gaʼar fare angel ngog: Muguy fare galasia ni ke sum niʼir e thʼabi kireb u fithikʼ gubin e pi galasia, niʼir e be liiʼ e gidiiʼ rokʼ Got, arragon ma kube gafgow nagraed, ma be mʼag raed nge yuluyraed u butʼ, ma ke mʼag e chen nga kʼangraed, nge fekraed ni kalbus.

6 Me yibi buch ni kug guy e re galasia ney ni rib gaaʼ ni thʼabi kireb; mug guy ni fare moʼoniyanʼ e ire sunmiy.

7 Ma kug guy e gol, nge silber, nge mad ni silk, nge mad ni row, nge mad ni dubʼag mab gel, nge urngin mit e mad ni thʼabi felʼ; ma kug guy e gathar nib yoʼor.

8 Me non fare angel ngog, ni gaʼar: Amusap, gol, nge silber, nge mad nib mungunguy, nge mad nib row ni fafalelʼ raʼen, nge mad ni kan firgiy, nge mad ni thʼabi felʼ, nge pi gathar, e ireram e pi ʼarʼar ko re galasia ney ni thʼabi kireb.

9 Nge ku bachan e pi falʼfan nu fayleng e yaed be gafgow nag e gidiiʼ rokʼ Got riy, min kolraed ngan fekraed nga kalbus.

10 Me yibi buch nug sap mug guy yungi day nib gaaʼ; ni kar kiiʼeged fapi Gentiles ko fapi bitir rokʼ piwalageg.

11 Me yibi buch ni fare angel e gaʼar ngog: Musap, fare damomuw rokʼ Got e ke aw nga dakean pifak piwalagem.

12 Mug sap mug guy beeʼ nib moʼon u fithikʼ fapi Gentiles, niʼir e bay fa yungi day nib gaaʼ ni be kiiʼegraed pifak piwalageg; mug guy fare Kan ni Thothup rokʼ Got, ni ke yib nga butʼ nga dakean fare moʼon; me yaen u dakean fapi yungi day nib gaaʼ, nge yaeni taw ngakʼ pifak piwalageg, ni faʼan yaed bay ko farengi nam nni michmicheg.

13 Me yibi buch nug guy fare Kan ni Thothup rokʼ Got, ni ke yib nga dakean ku boech e Gentiles; ma ranoed ngar chuw gaed u kalbus, u dakean fayungi day nib gaaʼ.

14 Me yibi buch nug guy nib yoʼor yu ulung i Gentiles u dakean farengi nam nni michmicheg; mug guy fare damomuw rokʼ Got, ngakʼ fapi bitir ni fak piwalageg; ni kar garar gaed u pʼoewchen fapi Gentiles min liiʼraed ngar mʼaed.

15 Mug guy fare Kan ni Thothup rokʼ Somoel, niki yib nga dakean fapi Gentiles, mar yoʼor gaed me yog ngoraed fayungi binaw ni taferaed; mug guy ni yaed ba wechwech, ma ri yaed ba pidorang nge felʼ usun, ni boed rogon e gidiiʼ rog u mʼon riy ni ngan liiʼraed ngar mʼaed.

16 Me yibi buch ni gag, Nephi, e gguy ni fapi Gentiles ni kar chuw gaed u kalbus e ra sobutʼ niged yaed u mit Somoel; me piiʼ Somoel fare gelingin ngoraed.

17 Mug guy ni chitiningraed ni Gentiles e kar mukun gaed nga taʼabang u dakean fayungi day, ngo dakean fapi nam, ni ngar cham gaed ngoraed.

18 Mug guy ni fare gelingin Got e bay roraed, nge fare damomuw rokʼ Got e bay nga dakean fa piʼin ni kar mukun gaed nga taʼabang ni ngar cham gaed ngoraed.

19 Me gag, Nephi, e gguy ni fapi Gentiles ni kar chuw gaed u kalbus ni ke ayuwegraed Got nga gelingin ngar chuw gaed u paʼ gubin e pi nam.

20 Me yibi buch ni gag, Nephi, e gguy ni ke felʼ rograed u dakean farengi nam; ma kug guy bake babyor, ni yibe fek nge un u fithikʼraed iyaen.

21 Me gaʼar fare angel ngog: Gamnang fan e reke babyor nem?

22 Mu gguʼar ngakʼ: Dagnang.

23 Me gaʼar: Musap, ireram e thin ni yib u lʼugun beeʼ nib Jew. Me gag, Nephi, e gguy ni aram rogon; maki gaʼar ngog: Fare ke babyor ni kam guy, e chipin fapi Jews, ni bay e pi mʼag rokʼ Somoel riy, ni ke micheg ngakʼ e pi gidiiʼ ku Israel; ma ku bay riy nib yoʼor fapi prophecy ko fapi profet nib thothup; mab chep ni boed rogon fatinem ni kan ker nga dakean fayungi plate ni brass, machane de yoʼor; ma yug aram rogon machane, bay riy fapi mʼag rokʼ Somoel, ni ke micheg ngakʼ fapi gidiiʼ ku Israel; ere, rib gaʼfan ngakʼ fapi Gentiles.

24 Ma fare angel rokʼ Somoel e gaʼar ngog: Gur e kam guy ni fare ke babyor e yib u lʼugun beeʼ nib Jew; ma napʼan ni yib u lʼugun e re Jew nem ma bay fare gospel ni poloʼ rokʼ Somoel riy, niʼir e ke yoloey fare ragag nge lʼagruw i apostle chipin; ma ri yoloeyed chipin u rogon e tin riyulʼ ni bay rokʼ fare Saaf ku Got.

25 Ere pinnʼey e nge yaen nib machalbog rokʼ fapi Jews ngakʼ fapi Gentiles, u rogon e tin riyulʼ ni bay rokʼ Got.

26 Ma tomuren ni ke yaen u paʼ fare ragag nge lʼagruw i apostle rokʼ fare Saaf, ni yaen rokʼ fapi Jews ngakʼ fapi Gentiles, ere kam guy rogon nni yarmiy fare galasia ni thʼabi kireb, niʼir e thʼabi kireb u fithikʼ gubin e pi galasia; ya amusap, boʼor e tin ni kar chuweged ko fare gospel rokʼ fare Saaf, ni yungin nib tamilang ma rib gaʼfan; ma ku arragon nib yoʼor e pi mʼag rokʼ Somoel ni kar chuweged riy.

27 Ma gubin e pinnʼey e kar rinʼed ni gomanga ra thilyeged fapi yalen rokʼ Somoel nib mangil, ni gomanga ra maʼew niged e pi oewchef mar ʼelʼel niged e pi gumʼirchaʼ ko gidiiʼ.

28 Ere, kam guy u tomuren ni ke yaen fare ke babyor u paʼ fare galasia ni thʼabi kireb, ma bay bogi banʼen nib yoʼor nib tamilang ma rib gaʼfan ni kan chuweg ko fare ke babyor, niʼir fare ke babyor rokʼ fare Saaf ku Got.

29 Me tomuren ni kan chuweg riy e pinʼen nib tamilang ma rib gaʼfan, me garar nga dakean gubin e pi nam ko Gentiles; me tomuren ni ke garar nga dakean gubin e pi nam ko Gentiles, arragon, ni thʼaeb e pi yungi day nib gaaʼ, ni ire kum guy fapi Gentiles ni rinʼ, ma kar chuw gaed u kalbus, ni kam guy—ere bachan fapinʼen nib yoʼor nib tamilang ma rib gaʼfan ni kan chuweg ko fare ke babyor, niʼir e rib tamilang nra nang e gidiiʼ fan, u rogon e tamilang ni bay rokʼ fare Saaf ku Got—ere bachan e pinnʼey ni kan chuweg ko fare gospel rokʼ fare Saaf, ma arame rib yoʼor e piʼin ni bay ra mul gaed, arragon, ni aram fan ni Moʼoniyanʼ e ke poloʼ gelngin nga dakeanraed.

30 Yug aram rogon machane, gur e kam guy fapi Gentiles nra chuw gaed u kalbus, min monʼog nagraed u gelingin Got ngar tolang gaed ko gubin e pi nam, u dakean farengi nam niʼir e thʼabi felʼ u fithikʼ e pi nam, niʼir farengi nam ni falʼeg Somoel ni Got ni ba mʼag u thilrow e chitamam, ni nge paer ni pifak e ngar tafnayed; ere, gur e kam guy ni fare Somoel ni Got e dabi pag fapi Gentiles ngar tileged e pi maʼathuk nibe tay pifakam, ni bay u fithikʼ piwalagem.

31 Ma kudabi pag fapi Gentiles ni ngar liiʼed pifak piwalagem.

32 Ma kudabi pag Somoel ni Got ni fapi Gentiles ni ngar pired u fithikʼ e maʼew, niʼir e kam guy ni yaed bay u fithikʼ, ni bachan fapi yungin nib tamilang ma thʼabi gaʼfan ko fare gospel rokʼ fare Saaf ni ki i mithaeg fare galasia ni thʼabi kireb, niʼir faram e kam guy ni kan yarmiy.

33 Ere gaʼar fare Saaf ku Got: Ra wureng anʼug ngakʼ fapi Gentiles, ni bay gub nag e gechig ngakʼ e piʼin ni ke magaey ko fapi gidiiʼ u Israel.

34 Me yibi buch ni fare angel rokʼ Somoel e non ngog, ni gaʼar: Amusap, i gaʼar fare Saaf ku Got, tomuren ni kug gechig nag e tin ni ke magaey ko fapi gidiiʼ ku Israel—ma tiney ni ke magaey e gidiiʼ ni gube weliy morngaʼagen e pifak e chitamam—ere, tomuren ni kug gechig nagraed, min liiʼraed ngar mʼaed nga paʼ fapi Gentiles, me tomuren ni kari mul fapi Gentiles ko mich, ni bachan fa yungin nib tamilang ma thʼabi gaʼfan ko fare gospel rokʼ fare Saaf ni faʼan kiiʼ i mithaeg fare galasia ni thʼabi kireb, niʼir fare chitiningin e pi gathar, ni gaʼar fare Saaf—Bay gu runguy fapi Gentiles u lan e re rran nem, ni arame bay gufek iyib ngoraed, u gelingig, gaʼangin fare gospel rog, niʼir e ba tamilang mab thʼabi gaʼfan, ni yoeg fare Saaf.

35 Ya, amusap, i gaʼar fare Saaf: Bay gub gu mʼug ngakʼ pifakam, ma yaedra yoloey bogi banʼen nib yoʼor ni bay gu machib nag ngoraed, niʼir e ba tamilang mab thʼabi gaʼfan; me tomuren ni kan liiʼ pifakam ngar mʼaed, ma kar palog gaed ko mich, nge ku arragon ngakʼ pifak piwalagem, muguy, pinnʼey e bay ni mithaeg, ni bay fin nnib nag ngakʼ fapi Gentiles, u dakean fare tawaʼath nge gelingin fare Saaf.

36 Ma ire bay ni yoloey e gospel rog nga langgin, ni yoeg fare Saaf, ni war rog, nge woʼen e thap rog.

37 Ma nge felʼ waʼathan e piʼin ni yaed be gay rogon ni ngar gaaʼ niged e Zion rog ko re rran nem, ya rayog ngoraed fare tawaʼath nge fare gelingin e Kan ni Thothup; ma faʼan yaedra tay riy ni aram rogon nge yaen i madaʼ ko tomur ma yira chibiyraed ngalang ko fabin tomur e rran, ma yaedra thap nga gilʼilungun fare Saaf ni gubinfen; nge piʼin ni yaedra awnag e gapas, arragon, nge morngaʼag ko falfalaenʼ nib gel, ma rib felʼ usraed u dakean e burey.

38 Me yibi buch nug guy e piʼin ni ke magaey u pifak piwalageg, nge fare ke babyor rokʼ fare Saaf ku Got, niʼir e yib u lʼugun fare Jew, niʼir e yib rokʼ fapi Gentiles ngakʼ fa piʼin ni ke magaey u pifak piwalageg.

39 Me tomuren ni ke yib ngoraed mug guy yuken e babyor, ni yib u gelingin fare Saaf, rokʼ fapi Gentiles ngoraed, ni be micheg ngakʼ fapi Gentiles nge piʼin ni ke magaey u pifak piwalageg, nge fapi Jews ni kar garar gaed u dakean e fayleng, ni fapi chep ko fapi profet nge fare ragag nge lʼagruw i apostle rokʼ fare Saaf e rib riyulʼ.

40 Me non fare angel ngog, ni gaʼar: Tiney nib tomur e chep, niʼir e kam guy u fithikʼ fapi Gentiles, e bay ra yaramiyed e tin riyulʼ ko fa tin sommʼon e chep, ni rabaed rokʼ faragag nge lʼagruw i apostle rokʼ fare Saaf, me dag fapinʼen nib tamilang ma thʼabi gaʼfan niʼir faram e kan chuweg riy; me dag ngakʼ gubin e pi mfen, nge pi thin, nge pi gidiiʼ, ni fare Saaf ku Got e ir Fak fachaʼ ni Chitamangiy ni Gubinfen, ma ire Tathapeg ko fayleng; ma gubin e gidiiʼ ma thingar rabaed ngakʼ, ara dabiyog ni ngar thap gaed.

41 Ma thingar rabaed ni boed rogon e thin ni bay yib u lʼugun fare Saaf; ma thin rokʼ fare Saaf e bay nnang u lan e pi chep rokʼ pifakam, ni boed rogon u lan pi chep ko faragag nge lʼagruw i apostle rokʼ fare Saaf; ere bay ni puthuy row nga taʼabang; ya kemus ni taʼareb e Got ni bay nge taʼareb e Tachugol gamanman ko fayleng ni poloʼ.

42 Ma bay yibi taw nga napʼan ni bay i mʼug ngakʼ gubin e pi nam, ngakʼ e fapi Jews nge fapi Gentiles; me tomuren ni ke mʼug ngakʼ fapi Jews nge fapi Gentiles, ma arame bayi mʼug ngakʼ fapi Gentiles nge fapi Jews, ma tin tomur e bayi mʼon, ma tin mʼon e bayi tomur.