Japta 15

Ol laen blong Lihae bae oli kasem gospel long ol Jentael long ol lata-dei—Kam tugeta blong Isrel i olsem wan olif tri we ol stret branj blong hem bae oli joenem olgeta bakegen long olif tri ia—Nifae i givim mining blong visen blong tri blong laef mo i tokbaot jastis blong God, taem we hem i divaedem ol man nogud aot long olgeta we i stret. Raonabaot 600–592 yia bifo Kraes i bon.

 Mo i bin hapen se afta mi, Nifae, spirit i bin karem mi i go longwe, mo mi bin lukim ol samting ia, mi bin go bak long tenet blong papa blong mi.

 Mo i bin hapen se mi bin luk ol brata blong mi, mo oli bin stap rao wan wetem narawan long saed blong ol samting we papa blong mi i bin talem long olgeta.

 From i tru we hem i bin talem plante bigfala samting long olgeta, we i bin had blong andastanem, hemia nomo sapos wan man i no askem Lod; mo from ol hat blong olgeta i strong, taswe oli no bin lukluk long Lod olsem we oli sud mekem.

 Mo nao mi, Nifae, mi bin harem nogud from ol hat blong olgeta i strong, mo tu, from ol samting we mi bin lukim, mo mi bin save se oli mas kam blong hapen, from ol bigfala fasin nogud blong ol pikinini blong ol man.

 Mo i bin hapen se ol hadtaem blong mi i bin mekem mi mi slak, from mi bin ting se ol hadtaem blong mi i bin bigwan bitim evriwan, from ol pipol blong mi i bin foldaon, from mi bin luk foldaon blong olgeta.

 Mo i bin hapen se afta we mi bin kasem paoa mi bin toktok long ol brata blong mi, mi bin wantem save long olgeta wanem i stamba tingting blong rao blong olgeta.

 Mo oli bin talem: Luk, mifala i no save andastanem ol toktok we papa blong yumi i bin talemaot long saed blong ol stret branj blong olif tri, mo tu long saed blong ol Jentael.

 Mo mi bin talem long olgeta: Yufala i bin askem Lod?

 Mo oli bin talem long mi: Mifala i no bin askem Lod; from Lod i no mekem mifala i save long saed blong eni samting olsem.

 10 Luk, mi bin talem long olgeta: Hao nao yufala i no holem ol komanmen blong Lod? Hao nao yufala i wantem ded, from ol hat blong yufala i strong?

 11 Yufala i no tingbaot ol samting we Lod i bin talemaot?—Sapos yufala i no mekem ol hat blong yufala i kam strong, mo askem mi wetem fet, bilivim se bae yufala i kasem, mo wok had oltaem blong holem ol komanmen blong mi, i tru we ol samting ia bae oli mas kam long yufala.

 12 Luk, mi talem long yufala, se laen blong Isrel oli bin skelem olsem wan olif tri, tru long Spirit blong Lod we i bin stap long papa blong yumi; mo luk, yumi no bin kamaot long laen blong Isrel, mo yumi no wan branj blong laen blong Isrel?

 13 Mo nao, samting we papa blong yumi i minim long saed blong ol stret branj we oli joenem insaed long tri ia, i long taem blong fulwan blong ol Jentael, hem i long ol lata-dei, taem we bae ol laen blong yumi i bin kam slak from oli lusum bilif, yes, blong spes blong plante yia, mo plante jeneresen afta we Mesaea bae i soemaot hem long bodi long ol pikinini blong ol man, afta bae gospel we i fulwan blong Mesaea bae i kam long ol Jentael, mo long ol Jentael i go long smol haf we i stap yet blong ol laen blong yumi—

 14 Mo long dei ia bae smol haf we i stap yet blong ol laen blong yumi bae oli save se oli blong laen blong Isrel, mo we oli ol kavenan pipol blong Lod; mo afta bae oli save mo kam blong save long saed blong ol bubu blong olgeta, mo tu oli kam blong save long saed blong gospel blong Ridima blong olgeta, we hem i bin givhan long ol bubu blong olgeta; from samting ia, bae oli kam blong save Ridima blong olgeta, mo ol impoten pat blong doktrin blong hem, blong oli save gat save olsem wanem blong kam long hem mo sev.

 15 Mo afta long dei ia bae oli no glad, mo presem God blong olgeta, we i no gat en, ston blong olgeta, mo fasin blong sevem man blong olgeta? Yes, long dei ia, bae oli no kasem paoa mo gudfala kakae long prapa rop? Yes, bae oli no kam long tru yad blong God?

 16 Luk, mi talem long yufala, Yes; Lod bae i tingbaot olgeta bakegen long medel blong ol laen blong Isrel; Lod bae i joenem olgeta, from oli ol stret branj blong olif tri, long tru olif tri.

 17 Mo hemia i wanem we papa blong yumi i minim; mo hem i minim se samting ia bae i no kam blong hapen kasem taem afta ol Jentael i mekem olgeta i seraot olbaot; mo hem i minim se bae i hapen tru long ol Jentael, blong Lod i save soemaot paoa blong hem long ol Jentael, from stamba tingting we ol Jiu, o ol laen blong Isrel, bae oli sakemaot hem.

 18 From samting ia, papa blong yumi i no bin tokbaot ol pikinini blong yumi nomo, be tu long saed blong ol laen blong Isrel, hem i talemaot ol kavenan we bae oli hapen long lata-dei; we kavenan we Lod i bin mekem wetem papa blong yumi Ebraham, i se: Long laen blong yu bae evri famle blong wol bae i kasem blesing.

 19 Mo i bin hapen se mi, Nifae, mi bin talem plante long olgeta long saed blong ol samting ia; yes, mi bin toktok long olgeta long saed blong taem we ol Jiu bae oli kambak long ol lata-dei.

 20 Mo mi bin talem wan moa taem long olgeta ol toktok blong Aesea, we i bin tokbaot taem we ol Jiu bae oli kambak, o long saed blong laen blong Isrel; mo afta we oli bin kambak bae oli nomo save miks, mo tu bae oli nomo seraot olbaot bakegen. Mo i bin hapen se mi bin talem plante toktok long ol brata blong mi, blong mekem se oli bin kwaet mo oli bin putum tingting blong olgeta i stapdaon long fored blong Lod.

 21 Mo i bin hapen se oli bin toktok long mi bakegen, oli se: Wanem mining blong samting ia we papa blong yumi i bin luk long wan drim? Wanem mining blong tri we hem i bin luk?

 22 Mo mi bin talem long olgeta: Hemia i bin wan eksampol blong tri blong laef.

 23 Mo oli bin talem long mi: Wanem mining blong rel blong aean we papa blong yumi i bin luk, we i bin go long tri?

 24 Mo mi bin talem long olgeta se i bin toktok blong God, mo eni man we bae i lisin long toktok blong God, mo bae i holem taet long hem, bae oli no save lus; mo tu ol temtesen mo ol spia blong devel, we i gat faea long hem, i no save winim olgeta kasem taem we oli kam blaen, blong lidim olgeta i gowe blong lus.

 25 From samting ia, mi, Nifae, mi bin askem strong long olgeta blong folem gud long toktok blong Lod; yes, mi bin askem strong long olgeta wetem evri paoa blong sol blong mi, mo wetem evri paoa we mi bin gat, blong oli mas folem gud long toktok blong God, mo tingbaot blong holem ol komanmen blong hem evri taem long evri samting.

 26 Mo oli bin talem long mi: Wanem mining blong reva blong wota we papa blong yumi i bin luk?

 27 Mo mi bin talem long olgeta se ol wota we papa blong mi i bin luk, hem i doti tumas; mo from papa blong yumi i bin bisi tumas blong tingbaot ol narafala samting, hem i no bin luk bigfala doti blong wota.

 28 Mo mi bin talem long olgeta se i bin wan rabis hol, we i bin divaedem ol man nogud long tri blong laef, mo tu long ol sent blong God.

 29 Mo mi bin talem long olgeta se i wan eksampol blong rabis hel ia, we enjel i bin talem long mi se i rere blong ol man nogud.

 30 Mo mi bin talem long olgeta se papa blong mifala i bin luk tu se jastis blong God i bin divaedem tu ol man nogud long olgeta we i stret; mo bigfala laet blong hem i bin olsem bigfala laet blong wan faea, we i stap laet, we i go antap long God blong oltaem mo oltaem, mo i no gat en.

 31 Mo oli bin talem long mi: Samting ia i minim ol safa blong bodi long ol dei blong tes, o hem i minim las ples blong sol afta ded blong bodi blong wol, o hem i tokbaot ol samting we i blong wol?

 32 Mo i bin hapen se mi bin talem long olgeta se hemia i bin wan eksampol blong evri samting blong wol tugeta wetem spirit, from dei bae i kam we oli mas kasem jajmen long ol wok blong olgeta, yes, ol wok we oli bin mekem wetem bodi blong wol long ol dei blong olgeta blong tes.

 33 From samting ia, sapos oli ded wetem nogud fasin blong olgeta, bae Lod i mas sakemaot olgeta tu, long saed blong ol samting we i blong spirit, we oli blong saed blong stret fasin; from samting ia, Lod i mas karem olgeta blong stanap long fes blong God, blong kasem jajmen blong ol wok blong olgeta; mo sapos ol wok blong olgeta i bin doti, oli mas stap doti; mo sapos oli doti, i mas nid se oli no save stap long kingdom blong God; sapos i olsem, kingdom blong God i mas stap doti tu.

 34 Be luk, mi talem long yu, kingdom blong God i no doti, mo i no save gat wan samting we i no klin i save go insaed long kingdom blong God; from samting ia, i mas gat wan ples blong ol samting we i doti we i rere blong ol samting we i doti.

 35 Mo i gat wan ples we i rere, yes, hem i rabis hel ia we mi bin tokbaot, mo devel i man we i mekem rere ples ia; from samting ia, las ples blong ol sol blong ol man, i blong stap long kingdom blong God, o Lod i mas sakemaot olgeta from jastis ia we mi bin tokbaot.

 36 From samting ia, Lod i mas sakemaot ol man nogud long olgeta we i stret, mo tu long tri ia blong laef, we frut blong hem i moa gudgudfala mo ol man i wantem moa bitim ol narafala frut; yes, mo hem i nambawan presen long evri presen blong God. Mo olsem ia nao mi bin toktok long ol brata blong mi. Amen.