1 Ao e koro bukina bwa ngke I a tia ni uotaki nako Ngai ae Nibwaai, n Tamneiu, man noori bwaai aikai ni kabane, ao I a oki nakon ana umwanrianna tamau.

2 Ao e koro bukina bwa I nooriia tariu, ao a kauntaeka imarenaia ni kaineti ma bwaai ake e a tia n taekin tamau nakoia.

3 Bwa e koaua ae e a tia n taekin bwaai aika mwaiti aika a kakawaki nakoia, aika a kangaanga ^ananoia, ma ti ngkana te aomata e butiia te Uea; ma ngkai a matoa nanoia, ngaia are a aikoa butiia te Uea n aron are a riai ni karaoia.

4 Ao ngkai, Ngai ae Nibwaai, e a rawawata nanou ibukin matoan nanoia, ao riki ibukin bwaai ake I a tia n noori, ao a na koro bukiia ngkai e korakora buakakaia natiia aomata.

5 Ao e koro bukina bwa I a konaaki ibukin karawawatakiu, bwa I taku inanou bwa a korakora riki ^akarawawatakiu nakon bwaai ni kabane, ibukin ^btiringakia au botanaomata, bwa I a tia n noora bwakaia.

6 Ao e koro bukina bwa ngke e a tia n oki ^akorakorau ao I a taetae nakoia tariu, ni butiia bwa a na tuangai bukin aia kauntaeka.

7 Ao a taku: Taraia, ti aki ota n taian taeka ake e taekin Tamara ni kaineti ma mwangan raoi te kai te oriwa, ao ni kaineti naba ma Tientaire.

8 Ao I taku nakoia: Kam a tia n ^atitirakina te Uea?

9 Ao a taku nakoiu: Ti tuai; bwa te Uea e tuai ni kaoti bwaai n aron aikai nakoira.

10 Taraia, I taku nakoia: Bukin teraa ngkai kam tuai ni kaawakin ana tua te Uea? Bukin tera ngkai kam na mate ibukin ^amatoan nanomi?

11 Kam aki uring bwaai ake e taekin te Uea?—Ngke arona bwa kam aki kamatoai nanomi, ao n ^atitirakinai ma te onimaki, ni kakoaua bwa e na reke iroumi, ma n teimatoa ni kaawakin au tua, ao e koaua bwa a na bon kaotaki nanon bwaai aikai nakoimi.

12 Taraia, I taku nakoimi, bwa e kabotauaki te bata are Iteraera ma te kai te oriwa, iroun Tamnein te Uea are e mena i nanon tamara, ao taraia, ti raure nako ma te bata are Iteraera ke ti aki, ao tiaki ngaira ^amwangan te bata are Iteraera?

13 Ao ngkai, nanon te bwai are taekinna tamara are e kabootauaki ma kanimwan taian mwanga rinanon bwaninia Tientaire, are ni boong aika kaitira, n te tai are a na tia kanoara ni ^akerikaki n aia aki onimaki, eng, i nanon te maan ae ririki aika mwaiti, ma rooro aika mwaiti i mwin rokon te ^bMesia n rabwata nakoia natia aomata, ao ngkanne e nang roko bwaninin ana ^ceuangkerio te Mesia nakoia Tientaire, ao mai irouia ^dTientaire nakoia nikiraia kanoara—

14 Ao n te bong arei a na ataia nikiraia ^akanoara ae ngaia kaain te bata are Iteraera, ao bon ngaia ana ^baomata i nanon te berita ae tabu te Uea; ao a na ^cataa taekaia aia bakatibu, ao taekan naba ana euangkerio aia Tia Kaboia, ake a reiakinaki irouna nakoia tamaia; mangaia ae a na ataa taekan aia Tia Kaboia ma nanon ana reirei bwa a aonga n rabakau ni kawaria ao ni kamaiuaki.

15 Ao n te bong arei, e koaua bwa a na bon aki kimwareirei man anga aia nebonebo nakon Atuaia ae e aki totoki, ae ^aaia bwaa ma kamaiuaia? Eng, n te bong arei, e koaua ae a na aki reke irouia te korakora ma kanan rabwataia man ^bkain te kurebe ni koaua? Eng, e koaua bwa a na aki botaki ma ana nanai ni koaua te Atua?

16 Taraia, I tuangkami aio, Eng; a na manga uringaki i buakon te bata are Iteraera; a na manga ^akatomaki, ngkai bon ngaia mwangan raoi te kai ae te oriwa, nakon te kai ae te oriwa ni koaua.

17 Ao aio are e kananonaa tamara; ao e kananonaa ae e na aki riki ni karokoa ae a tia ni kamaenakoaki irouia Tientaire; ao e kananonaa are e na riki aio mai irouia Tientaire, ao e na kaota mwaakana te Uea nakoia Tientaire, ngkai e na ^aaki butimwaeaki irouia Iutaia, ke man te bata are Iteraera.

18 Mangaia ae e aki ti taekinia kanoara tamara, ma e taekinia naba kain te bata are Iteraera ni kabane, ni katereterea te berita ae tabu are e na kakoroaki bukina ni boong aika kaitira; are te berita are e tabu are e karaoia te Uea nakon tamara ae Aberaam, ni kangai: A na kabwaia kaain aonaba ni kabaneia i nanon am ^akariki.

19 Ao e koro bukina bwa Ngai ae Nibwaai, I taetae nakoia ni kaineti ma bwaai aikai; eng, I taetae nakoia ni kaineti ma ^aikotakiia Iutaia ni boong aika kaitira.

20 Ao I taekin nakoia kanoan ana taeka ^aItaia, are e taekin bwaai aika a kaineti ma ikotakiia Iutaia, ke te bata are Iteraera; bwa i mwin ikotakiia ao a na aki manga kamangaoaki, ke ni manga kamaenakoaki riki. Ao e koro bukina bwa a mwaiti bwaai ake I taekin nakoia tariu, n te aro are a rau nanoia ao a ^bkarinanoia imatan te Uea.

21 Ao e koro bukina bwa a manga taetae riki nakoiu, ni kangai: Tera nanon are nooria tamara n te mii? Tera nanon te ^akai are e nooria?

22 Ao e koro bukina nakoia: Bon katotongan te ^akai ni kamaiu.

23 Ao a taku nakoiu: Tera nanon te ^akai te biti are nooria tamara, are a tiki nakon te kai?

24 Ao I tuangiia ae bon ana ^ataeka te Atua; ao ane e ongo nakon ana taeka te Atua, ao n ^btaua ni kamatoa, ao a na bon aki maamate; ao a na aki kona naba n rootaki n taian ^ckariri ao ^dkanoan ana kai ni katebe aika ura ^eteuare e buakaka ma ni kamatakiaki, ni kairia nakon te mate.

25 Mangaia ae Ngai ae Nibwaai, I a kaungaia bwa a na ^aongo ana taeka te Uea; eng, I kabonganai korakoran tamneiu ni kabane ni kaungai nanoia, ao riki ma au kona ni kabane, bwa a na ongo ana taeka te Atua ao n uringnga ni kaawakin ana tua ni kabane n taai nako ao ni bwaai ni kabane.

26 Ao a taku nakoiu: Tera nanon te ^akaraanga n ran are e nooria tamara?

27 Ao I tuangiia ae te ^aran are e nooria tamau bon te ^bkammaira; ao a mwaiti bwaai ake a katabea ana iango n te aro are e aki noora kammairan te ran.

28 Ao I tuangiia bon te ^amarenaua ae buakaka, are karaureia aika buakaka man te kai ni kamaiu, ao mai irouia naba ana aomata aika itiaki te Atua.

29 Ao I tuangiia ae bon katotongan ^amoone ae kamwara, are e tuangai te anera bwa e a tia ni katauraoaki ibukiia aika buakaka.

30 Ao I tuangiia naba ae e a tia tamara n noora aron ana ^amotiraoi te Atua are e karaureia aika buakaka mai irouia aika raoiroi; ao ootana bon titebo ma ootan te ai ae e ura, are e waerake nakon te Atua n aki toki, ao akea tokina.

31 Ao a taku nakoiu: Nanon aei bon karawawatan te rabwata i nanon ana bong ni ^akataki, ke nanona te bwai are e na riki nakon te tamnei i mwin ^bmaten te rabwata, ke e ti taekinaki iai baika a kaineti ma te maiu n rabwata?

32 Ao e koro bukina bwa I tuangiia bwa a kananonaaki iai aron te maiu n rabwata ao n tamnei; bwa ane e na roko te bong are a motikaki iai taekaia man aron aia ^amwakuri, eng, are taian mwakuri ake e karaoi te rabwata n tain te kataki.

33 Mangaia ae ngkana a ^amate i nanon aia buakaka ao a na riai n ^bteweaki nako naba ni kaineti ma bwain te maiu n tamnei, aika a kaineti ma te raoiroi; mangaia ae a na kateaki imatan te Atua, bwa a na ^cmotikaki taekaia n aron aia ^dmwakuri; ao ngkana aia mwakuri a tia ni kammaira ao a bon ^ekammaira; ao ngkana a kammaira ao a na aki kona ni ^fmaeka n uean te Atua; bwa ngkana a kona, ao nanona e kammaira naba uean te Atua.

34 Ma taraia, I tuangkami aio, e aki ^akammaira uean te Atua, ao bon akea te bwai ae bareka ae e kona n rin n uean te Atua; mangaia ae e na iai te tabo ae kammaira are e a tia ni katauraoaki ibukin te bwai ae kammaira.

35 Ao bon iai te tabo are e a tia ni katauraoaki, eng, are bon ^amoone are kamwara are I a tia n taekinna, ao te ^briaboro ae te tia katauraoia; mangaia ae nnen tamneia aomata i mwin te mate bon te maeka n uean te Atua, ke te teweaki nako ibukin te ^cmotiraoi are I a tia n taekinna.

36 Mangaia ae a na tukaki aika buakaka mai i buakoia aika a raoiroi, ao man te ^akai ni kamaiu naba, are moan te ^btangiraki riki uaana nakon uaanikai nako; eng, ao bon te ^ckabanea ni korakora mai buakon ana ^dbwai n tangira nako te Atua. Ao aikai bwaai ake I taekin nakoia tariu. Amen.