Pāpa’ira’a mo’a
1 Nephi 2


Pene 2

’Ua ’āfa’i atu Lehi i tōna ’utuāfare i roto i te mēdēbara, tāpiri i te miti ’Ute’ute—’Ua vaiiho rātou i tā rātou faufa’a—’Ua pūpū Lehi i te hō’ē tusia i te Fatu ’e ’ua ha’api’i i tāna mau tamari’i tamāroa ’ia ha’apa’o i te mau fa’auera’a—’Ua amuamu Lamana ’e Lemuela i tō rāua metua tāne—’Ua ha’apa’o maita’i Nephi ’e ’ua pure ’oia ma te fa’aro’o ; ’ua paraparau mai te Fatu iāna, ’e ’ua mā’itihia ’oia nō te fa’atere i tōna mau tua’ana. Fātata 600 H.M.

1 Inaha ho’i, i muri a’era, ’ua parau mai ra te Fatu i tō’u metua tāne, ’oia ïa, i roto i te hō’ē moemoeā, ’e ’ua nā ’ō mai ra iāna : E ao tō ’oe, e Lehi, nō te mau mea tā ’oe i rave ra ; ’e nō te mea ho’i ē, ’ua itoito ’oe ’e ’ua fa’a’ite atu i teie nei nūna’a i te mau mea tā’u i fa’aue atu ia ’oe ra, inaha, tē tītau nei rātou ’ia taparahi ia ’oe.

2 ’E i muri a’era, ’ua fa’aue mai ra te Fatu i tō’u metua tāne, ’oia ïa i roto i te hō’ē moemoeā, ’ia rave ’oia i tōna ’utuāfare ’e ’ia haere atu i roto i te mēdēbara.

3 ’E i muri a’era, ’ua ha’apa’o maita’i ’oia i te parau a te Fatu, nō reira ’ua rave ’oia mai tā te Fatu i fa’aue mai iāna ra.

4 ’E i muri a’era, ’ua haere atu ra ’oia i roto i te mēdēbara. ’E ’ua fa’aru’e ihora ’oia i tōna fare, ’e tōna ra fenua ’āi’a, ’e tāna ’auro, ’e tāna ’ārio, ’e tāna mau tao’a faufa’a rahi, ’e ’aore e mea tāna i hōpoi atu, maori rā tōna ’utuāfare, ’e tāna mau mā’a, ’e tōna mau ti’ahapa, ’e ’ua haere atu ra i roto i te mēdēbara.

5 ’E ’ua haere atu ra ’oia i raro i te mau hiti fenua i fātata i te miti ’Ute’ute ra ; ’e ’ua haere atu ra ’oia i roto i te mēdēbara nā te mau hiti fenua piri a’e i te miti ’Ute’ute ra ; ’e ’ua haere atu ’oia i roto i te mēdēbara ’e tōna ’utuāfare, ’oia ho’i tō’u ra metua vahine, ’o Saria, ’e tō’u mau tua’ana, ’o Lamana, ’o Lemuela, ’e ’o Samu.

6 ’E i muri a’era, e tae a’era i te toru o te mahana nō tōna terera’a nā te mēdēbara ra, ’ua fa’ati’a ihora ’oia i tōna ti’ahapa i roto i te hō’ē peho i te pae o te hō’ē ’ānāvai pape ra.

7 ’E i muri a’era, ’ua patu ihora ’oia i te hō’ē fata ’ōfa’i, ’e ’ua pūpū ihora ’oia i te hō’ē tusia i te Fatu, ’e ’ua ha’amāuruuru atu ra ho’i ’oia i te Fatu i tō tātou ra Atua.

8 ’E i muri a’era, ’ua ma’iri ihora ’oia i te i’oa o taua ’ānāvai ra, ’o Lamana, ’e tē tahe roa atu ra taua ’ānāvai ra i roto i te miti ’Ute’ute ; ’e tei pīha’i iho ho’i te peho i te mau hiti fenua o te muriāvai ra.

9 ’E ’ia ’ite a’era tō’u metua tāne ē, tē tahe noa ra te mau pape o taua ’ānāvai ra i roto i te vai piha’a o te miti ’Ute’ute, ’ua parau atu ra ’oia ia Lamana, nā ’ō atu ra : ’Auē, ’āhiri ’oe i riro mai teie nei ’ānāvai te huru, i te tahe-noa-ra’a atu i roto i te vai piha’a o te mau parauti’a ato’a ra !

10 ’E ’ua parau ato’a atu ra ho’i ’oia ia Lemuela : ’Auē, ’āhiri ’oe i riro mai teie nei peho te huru, i te mau māite ’e te itoito, ’e te ’āueue ’ore i te ha’apa’ora’a i te mau fa’auera’a a te Fatu !

11 I teienei, nō te ’ā’au ’eta’eta o Lamana rāua ’o Lemuela i parau ai ’oia i taua parau ra ; inaha ho’i, ’ua amuamu rāua i tō rāua metua tāne i te mau mea e rave rahi, nō te mea e ta’ata ’ite ’ōrama ’oia, ’e ’ua arata’i ’oia ia rātou i rāpae i te fenua nō Ierusalema, nō te fa’aru’e i tō rātou fenua ’āi’a, ’e tā rātou ’auro, ’e tā rātou ’ārio, ’e tā rātou mau tao’a faufa’a rahi, ’ia pohe i roto i te mēdēbara. ’E ’ua parau mai ra rāua ē, nō te mau mana’o ma’ama’a o tōna ra ’ā’au i nā reira ai ’oia.

12 ’E nō reira ’ua amuamu ’o Lamana rāua ’o Lemuela, nā tamaiti pa’ari a’e, i tō rāua metua tāne. ’E ’ua amuamu rāua nō te mea ’aore rāua i ’ite i te mau ’ohipa a taua Atua ra ’o tei hāmani ia rāua.

13 ’Aore ato’a rāua i ti’aturi ē, e ha’amouhia taua ’oire rahi ra, ’o Ierusalema, mai te au i te mau parau a te mau peropheta. ’E ’ua riro ho’i rāua mai te mau ’āti Iuda i pārahi i Ierusalema ra, ’o tei tītau ’ia taparahi i tō’u metua tāne.

14 ’E i muri a’era, ’ua a’o atu tō’u metua tāne ia rāua i roto i te peho nō Lemuela, ma te mana, ’ua ’ī ho’i ’oia i te Vārua, ē tae noa atu ’ua rurutaina tō rāua tino i mua iāna. ’E ’ua ha’amāmū ’oia ia rāua, ’e ’aore atu ra i ti’a ia rāua ’ia pāto’i mai iāna ; nō reira, ’ua ha’apa’o rāua mai tāna i fa’aue atu ia rāua.

15 ’E ’ua pārahi ihora tō’u metua tāne i roto i te hō’ē ti’ahapa.

16 ’E i muri a’era, e ta’ata ’āpī roa vau, ’o Nephi, ’āre’a rā e tino rahi tō’u, ’e te hina’aro rahi ho’i i te ’ite i te mau parau ’aro a te Atua, nō reira ’ua ti’aoro atu vau i te Fatu ; ’E inaha, ’ua fā mai ra ’oia iā’u, ’e ’ua ha’amarū ho’i i tō’u ’ā’au ’e ’ua ti’aturi ihora vau i te mau parau ato’a i parauhia e tō’u ra metua tāne ; nō reira, ’aore atu ra vau i mārō iāna mai tā tō’u ra nā tua’ana.

17 ’E ’ua parau atu ra vau ia Samu, ma te fa’a’ite atu iāna i te mau mea tā te Fatu i fa’a’ite mai iā’u i tōna ra Vārua Mo’a. ’E i muri a’era, ’ua ti’aturi ihora ’oia i tā’u mau parau.

18 ’Āre’a rā, inaha, ’aore Lamana rāua ’o Lemuela e fa’aro’o i tā’u ra mau parau ; ’e nō te ’eta’eta o tō rāua ’ā’au ’ua tupu tō’u ’oto ’e ’ua ti’aoro māite atu vau i te Fatu nō rāua.

19 ’E i muri a’era, ’ua parau mai ra te Fatu iā’u, nā ’ō mai ra : E ao tō ’oe, e Nephi, nō tō ’oe na fa’aro’o, ’e ’ua ’imi māite mai ho’i ’oe iā’u nei ma te ’ā’au ha’eha’a.

20 ’E mai te mea e ha’apa’o ’outou i tā’u nei mau fa’auera’a, e manuia ïa ’outou, ’e e arata’ihia ho’i ’outou i te hō’ē fenua i fafauhia ra ; ’oia ïa, i te hō’ē fenua tā’u i fa’aineine nō ’outou ; ’oia ïa, i te hō’ē fenua maita’i a’e i te mau fenua ’ē ato’a ra.

21 E mai te mea e mārō mai tō ’oe nā tua’ana ia ’oe na, e tāpū-’ē-hia ïa rāua i te aro o te Fatu.

22 E mai te mea e ha’apa’o ’oe i tā’u ra mau fa’auera’a, e fa’arirohia ïa ’oe ’ei tāvana ’e ’ei ’orometua i ni’a i tō ’oe mau tua’ana.

23 Inaha ho’i, i taua mahana ra ’a mārō mai ai rāua iā’u nei, e ’anatema ïa vau ia rāua i te ’anatema rahi, ’e e ’ore roa e roa’a ia rāua te mana i ni’a i tō ’oe ra hua’ai, maori rā ’ia mārō ato’a mai ho’i rāua iā’u nei.

24 ’E ’ia mārō mai ho’i rāua iā’u ra, e riro ïa rāua ’ei mea tā’iri nā tō ’oe hua’ai, nō te fa’aaraara i te ha’amana’o i roto ia rāua ra.