Sapta 2
Lehi el us sucu lal nuh yen mwesis ut Meoa Sruhsrah—Elos som liki ma lalos—Lehi el oruh sie kihsac nuh sin Leum ac luti wen nahtuhl in liyacacng masap—Laman ac Lemuel tohrkahskahs lain pahpah tuhmwaclos—Nephi el ahkostwen ac pruhe ke luhlahlfongi; Leum El sramsram nuh sel, ac el suleyucklac in kol tamuhlwel wiyacl. Sahp ke yac 600 Met Liki Kraist.
1 Tuh liye, tukun ma inge na Leum El sramsram nuh sin pahpah tuhmuhk, ahok, finne ke sie mwemwe, ac fahk nuh sel: Insewowo nuh sum Lehi, ke srihpen ma suc kom oraclah; ac ke srihpen kom oaru ac fahkwack nuh sin mwet inge ma suc Nga sapkihn nuh sum kac, liye, elos suk in eislah moul lom.
2 Ac tukun ma inge na Leum El sapkihn nuh sin pahpah tuhmuhk, finne ke sie mwemwe, lah el enenuh in us sucu lal ac som nuh yen mwesis.
3 Ac tukun ma inge na el tuh ahkos kahs luhn Leum, ohinge el oruh oacna ke Leum El sapkihn nuh sel.
4 Ac tukun ma inge el som nuh yen mwesis. Ac el som liki lohm sel, ac acn in usru lal, ac kol lal, ac selfuh lal, ac ma sacohk lal, ac el tiac us kuhtwena ma weluhl, sahyacn na sucu lal, ac mwe kahsruh, ac lohm nuknuk, ac som nuh yen mwesis.
5 Ac el tuhkuh sun mahsrol sisken pe inkof ke Meoa Sruhsrah; ac el fuhfahsryucsr ke yen mwesis ke mahsrol ma fototo nuh sisken Meoa Sruhsrah; ac el tuh fuhfahsryucsr ke yen mwesis wi sucu lal, suc pa ninac kiyuck, Sariah, ac tamuhlwel mahtuh wiyuck, suc pa Laman, Lemuel, ac Sam.
6 Ac tukun ma inge na ke el tuh fuhfahsryucsr ke lusen lwen tolu ke yen mwesis, el tulohkohnwack lohm nuknuk sel ke sie infahlfahl sisken sie infacl in kof.
7 Ac tukun ma inge na el muhsahelah sie mwe loang ke yot, ac oraclah sie kihsac nuh sin Leum, ac sang kuloh nuh sin Leum God lasr.
8 Ac tukun ma inge na el pahngon inen infacl soko ah, Laman, na ac sohrohrlah nuh ke Meoa Sruhsrah; ac infahlfahl sac oasr ke mahsrol sisken inwacluh ah.
9 Ac ke pahpah tuhmuhk el liye lah kof ke infacl soko ah sohrohrlah nuh ke unohn luhn Meoa Sruhsrah, el sramsram nuh sel Laman, fahk: O tuh kom in kuh in oacna infacl soko inge, tahfwelah na in sohrohr nuh ke unohn luhn suwohswohs nuhkwewa!
10 Ac el oacyacpac sramsram nuh sel Lemuel: O tuh kom in kuh in oacna infahlfahl se inge, fokoko ac tu na kuh, ac insacnweacng in liyacacng masap luhn Leum!
11 Inge el sramsram ke ma inge ke srihpen lihkkeke lal Laman ac Lemuel; tuh liye elos tuh tohrkahskahs ke ma pucspucs lain pahpah tuhmwaclos, ke srihpen el sie mwet liyactwen, ac kohlohloslac liki acn Jerusalem, in som liki acn in usru lalos, ac kol lalos, ac selfuh lalos, ac ma sacohk lalos, in misac yen mwesis. Ac ma inge elos fahk muh el oruh ke srihpen nuhnak lahlfon luhn insiacl.
12 Ac ohinge Laman ac Lemuel, suc mahtuh emet, tuh tohrkahskahs lain pahpah tuhmwaclos. Ac elos tuh tohrkahskahs ke srihpen elos tiac etuh ke orekma luhn God sac suc tuh oracloslac.
13 Elos tiacpac na luhlahlfongi lah Jerusalem, siti luhlahp sac, kuh in kuhnausyucklac oacna kahs luhn mwet pahluh. Ac elos oacna mwet Jew suc oasr Jerusalem, suc suk in eislah moul luhn pahpah tuhmuhk.
14 Ac tukun ma inge na pahpah tuhmuhk el tuh sramsram nuh selos ke infahlfahl Lemuel, ke kuh, el sesseslah ke Nguhn, ne ke na mahnolos tuh rarrar ye muhtahl. Ac el tuh ahklutyelos, lah elos in tiac kahskahs lainuhl; ohinge, elos oruh oacna ke el sapkihn nuh selos.
15 Ac pahpah tuhmuhk el muhta ke sie lohm nuknuk.
16 Ac tukun ma inge na nga, Nephi, arulacna srack fuhsr, ne ohinge yohk pihsac, ac oacyacpac nga kena yohk in etuh ke ma lukmac luhn God, ohinge, nga tuh pruhe nuh sin Leum; ac liye El tuh tuhkuh nuh yuruk, ac tuh ahkfihsrwacsryelah insiyuck tuh nga tuh luhlahlfongi nohfohn kahs suc sruhmuhnyuck sin pahpah tuhmuhk; ohinge, nga tiacna lainuhl oacna tamuhlwel wiyuck.
17 Ac nga sramsram nuh sel Sam, oruh in kahlwem nuh sel ma suc Leum El ahkkahlwemye nuh sihk ke Nguhn Muhtahl Lal. Ac tukun ma inge el luhlahlfongi kahs luhk.
18 Tuhsruhk, liye, Laman ac Lemuel tiacna porongo kahs luhk; ac nga ahsor ke srihpen kwekweiyacn insiaclos oruh nga tuh wowoyak nuh sin Leum kaclos.
19 Ac tukun ma inge na Leum El sramsram nuh sihk, fahk: Insewowo nuh sum, Nephi, ke srihpen luhlahlfongi lom, tuh kom oaru in sukyuc, ke inse puhsisacl.
20 Ac kom fin liyacacng masap Luhk, kom fah kapkapwack, ac fah kolyucklac nuh ke sie acn wihlwihl; ahok, finne sie acn ma Nga ahkolah nuh sum; ahok, sie acn ma wo liki acn nuhkwewa sahyac.
21 Ac tamuhlwel lom fin lain kom, elos fah lihsyucklac liki ye muhtuhn Leum.
22 Ac kom fin liyacacng masap Luhk, kom fah oreklac sie mwet kol ac sie mwet luti luhn tamuhlwel wiyom.
23 Tuh liye, ke na lwen sac elos fah lainyuc, Nga fah selngaelosi finne ke sie selnga na upac, na ac fah wacngihn kuh lalos fin fihtac lom sahyacn na elos lainyuc pac.
24 Ac elos fin lainyuc, na elos fah sie mwe ahkkweok nuh sin fihtac lom, in wakrelosyak ke inkacnek in esamwack.