Ngaahi Folofolá
1 Nīfai 3


Vahe 3

ʻOku foki ʻa e ngaahi foha ʻo Līhaí ki Selūsalema ke ʻomai ʻa e ngaahi peleti ʻo e palasá—ʻOku fakafisi ʻa Lēpani ke tukuange ʻa e ngaahi peletí—ʻOku naʻinaʻi mo poupou ʻa Nīfai ki hono ngaahi tokouá—ʻOku kaihaʻasi ʻe Lēpani ʻenau koloá, peá ne feinga ke fakapoongi ʻa kinautolu—ʻOku taaʻi ʻe Leimana mo Lēmiuela ʻa Nīfai mo Samu, pea ʻoku valokiʻi kinaua ʻe ha ʻāngelo. Taʻu 600–592 K.M. nai.

1 Pea naʻe hoko ʻo pehē, ko au, Nīfai, naʻá ku foki mai mei he fefolofolai mo e ʻEikí ki he fale fehikitaki ʻo ʻeku tamaí.

2 Pea naʻe hoko ʻo pehē naʻá ne lea mai kiate au, ʻo pehē: Vakai, kuó u misi ʻi ha amisi, pea kuo fekauʻi ai au ʻe he ʻEikí ke ke foki mo ho ngaahi tokouá ki Selūsalema.

3 He vakai, ʻoku maʻu ʻe Lēpani ʻa e lekooti ʻo e kau Siú kae ʻumaʻā foki ha atohi hohoko ʻo ʻeku ngaahi kuí, pea kuo tongitongi ia ʻi ha ngaahi peleti ʻo e palasa.

4 Ko ia, kuo fekau kiate au ʻe he ʻEikí ke ke ʻalu mo ho ngaahi tokouá ki he fale ʻo Lēpaní, ʻo kumi ki he ngaahi lekōtí, ʻo ʻomi ia ki heni ki he feituʻu maomaonganoá.

5 Pea ko ʻeni, vakai ʻoku lāunga ʻa ho ongo tokouá, ʻo pehē ko e meʻa faingataʻa kuó u fekau kiate kinauá; kae vakai, kuo ʻikai te u fekau ia kiate kinaua, kā ko ha fekau ia ʻa e ʻEikí.

6 Ko ia ʻalu, ʻe hoku foha, pea ʻe ʻofeina koe ʻe he ʻEikí, koeʻuhi kuo aʻikai te ke lāunga.

7 Pea naʻe hoko ʻo pehē ko au, Nīfai, naʻá ku pehē ange ki heʻeku tamaí: aTe u ʻalu ʻo fai ʻa e ngaahi meʻa kuo fekau ʻe he ʻEikí, he ʻoku ou ʻilo ʻoku ʻikai tuku mai ʻe he ʻEikí ha bfekau ki he fānau ʻa e tangatá kae ʻikai te ne cteuteu ha hala maʻanautolu ke nau lava ai ʻo fai ʻa e meʻa kuó ne fekau kiate kinautolú.

8 Pea naʻe hoko ʻo pehē ʻi he fanongo ʻa ʻeku tamaí ki he ngaahi lea ní naʻá ne fuʻu fiefia ʻaupito, he naʻá ne ʻiloʻi kuo tāpuakiʻi au ʻe he ʻEikí.

9 Pea ko au, Nīfai, naʻe fai atu mo hoku ngaahi tokoua ʻa ʻemau fononga ʻi he feituʻu maomaonganoá, mo homau ngaahi fale fehikitakí, ke mau ō hake ki he fonua ko Selūsalemá.

10 Pea naʻe hoko ʻo pehē ʻi heʻemau aʻu hake ki he fonua ko Selūsalemá, naʻá ku fealeaʻaki mo hoku ngaahi tokouá.

11 Pea mau atalotalo—pe ko hai ʻiate kimautolu ʻe hū atu ki he fale ʻo Lēpaní. Pea naʻe hoko ʻo pehē naʻe tō ʻa e talotaló kia Leimana; pea naʻe hū atu ʻa Leimana ki he fale ʻo Lēpani, peá na fetalanoaʻaki mo ia lolotonga ʻene nofo ʻi hono falé.

12 Pea naʻá ne kole meia Lēpani ʻa e ngaahi lekooti kuo tongitongi ʻi he ngaahi peleti ʻo e palasá, ʻa ia naʻe ʻi ai ʻa e atohi hohoko ʻo ʻeku tamaí.

13 Pea vakai, naʻe hoko ʻo pehē naʻe ʻita ʻa Lēpani, ʻo ne kapusi ia ki tuʻa mei hono falé; ʻo ʻikai te ne loto ke foaki kiate ia ʻa e ngaahi lekōtí. Ko ia, naʻá ne pehē kiate ia: Vakai ko ha kaihaʻa koe, pea te u tāmateʻi koe.

14 Ka naʻe hola ʻa Leimana mei hono ʻaó, ʻo ne tala mai kiate kimautolu ʻa e ngaahi meʻa kuo fai ʻe Lēpaní. Pea naʻa mau fuʻu loto-mamahi ʻaupito, pea naʻe mei foki atu ʻa hoku ngaahi tokouá ki heʻeku tamaí ʻi he feituʻu maomaonganoá.

15 Kae vakai naʻá ku pehē ange kiate kinautolu: Hangē ʻoku moʻui ʻa e ʻEikí, pea hangē ʻoku tau moʻuí, ʻe ʻikai te tau ō hifo ki heʻetau tamaí ʻi he feituʻu maomaonganoá kae ʻoua kuo tau fai ʻa e meʻa kuo fekau ʻe he ʻEikí kiate kitautolú.

16 Ko ia, tau tui faivelenga muʻa ʻi hono tauhi ʻo e ngaahi fekau ʻa e ʻEikí, ko ia tau ō hifo ki he fonua ʻo e atofiʻa ʻo ʻetau tamaí, he vakai naʻá ne tuku ʻa e koulá mo e silivá mo e ngaahi koloa kehekehe kotoa pē. Pea kuó ne fai ʻeni kotoa pē koeʻuhi ko e ngaahi bfekau ʻa e ʻEikí.

17 He naʻá ne ʻiloʻi kuo pau ʻe afakaʻauha ʻa Selūsalema, koeʻuhi ko e fai angahala ʻa e kakaí.

18 He vakai, kuo nau aliʻaki ʻa e ngaahi lea ʻa e kau palōfitá. Ko ia, ka ne nofo ʻa ʻeku tamaí ʻi he fonuá ʻi he hili hono bfekauʻi ia ke hola mei he fonuá, vakai, te ne mate foki mo ia. Ko ia, ʻoku ʻaonga ke ne hola mei he fonuá.

19 Pea vakai, ko e finangalo poto ʻo e ʻOtuá ke tau maʻu ʻa e ngaahi alekōtí ni, koeʻuhi ke tau fakatolonga maʻa ʻetau fānaú ʻa e lea ʻa ʻetau ngaahi tamaí;

20 Kae ʻumaʻā foki ke tau lava ai ʻo afakatolonga maʻanautolu ʻa e ngaahi lea, ʻa ia kuo lea ʻaki ʻi he ngutu ʻo e kau palōfita māʻoniʻoni kotoa pē, ʻa ia kuo tuku kiate kinautolu ʻi he Laumālie mo e mālohi ʻo e ʻOtuá, talu mei he kamataʻanga ʻo e māmaní, ʻo aʻu mai ki he taimi lolotonga ní.

21 Pea naʻe hoko ʻo pehē naʻá ku fakalotoʻi ʻi he ngaahi lea pehē ʻa hoku ngaahi tokouá, ke nau tui faivelenga ʻi hono tauhi ʻo e ngaahi fekau ʻa e ʻOtuá.

22 Pea naʻe hoko ʻo pehē naʻa mau ʻalu hifo ki he fonua ʻo homau tofiʻá, pea naʻa mau tānaki fakataha ʻa ʻemau akoulá, mo ʻemau silivá, mo ʻemau ngaahi meʻa mahuʻingá.

23 Pea ʻi he ʻosi ʻemau tānaki fakataha ʻa e ngaahi meʻa ní, naʻa mau toe ō hake ki he fale ʻo Lēpaní.

24 Pea naʻe hoko ʻo pehē naʻa mau hū atu kia Lēpani, ʻo mau kole kiate ia ke ne ʻomai maʻamautolu ʻa e ngaahi lekooti kuo tongitongi ʻi he ngaahi apeleti ʻo e palasá, ka mau ʻoange kiate ia ʻa ʻemau koulá, mo ʻemau silivá, mo ʻemau ngaahi meʻa mahuʻingá kotoa pē.

25 Pea naʻe hoko ʻo pehē ʻi he mamata ʻa Lēpani ki heʻemau koloá, pea naʻe lahi ʻaupito ia, naʻá ne amānumanu ki ai, ko ia ai naʻá ne kapusi ʻa kimautolu ki tuʻa, ʻo ne fekau ʻene kau tamaioʻeikí ke tāmateʻi ʻa kimautolu, koeʻuhi ka ne lava ʻo maʻu ʻa ʻemau koloá.

26 Pea naʻe hoko ʻo pehē naʻa mau hola mei he kau tamaioʻeiki ʻa Lēpaní, pea naʻe pau ke mau tuku ʻemau koloá, ʻo maʻu ia ʻe Lēpani.

27 Pea naʻe hoko ʻo pehē naʻa mau hola ki he feituʻu maomaonganoá, pea naʻe ʻikai maʻu ʻa kimautolu ʻe he kau tamaioʻeiki ʻa Lēpaní, pea naʻa mau toitoi ʻi ha avaʻi maka.

28 Pea naʻe hoko ʻo pehē naʻe ʻita ʻa Leimana kiate au, pea ki heʻeku tamaí foki; pea naʻe ʻita foki mo Lēmiuela, he naʻá ne fanongo ki he ngaahi lea ʻa Leimaná. Ko ia naʻe lea ʻaki ʻe Leimana mo Lēmiuela ha ngaahi lea afefeka lahi kiate kimaua, ko hona ongo tehiná, pea naʻá na taaʻi ʻa kimaua ʻaki ha vaʻakau.

29 Pea naʻe hoko ʻo pehē ʻi he lolotonga ʻena taaʻi ʻa kimaua ʻaki ha vaʻakaú, vakai, naʻe haʻu ha aʻāngelo ʻa e ʻEikí ʻo tuʻu ʻi hona ʻaó, ʻo ne lea kiate kinaua, ʻo pehē: Ko e hā ʻokú mo taaʻi ai ʻa homo tehiná ʻaki ʻa e vaʻakaú? ʻOku ʻikai te mo ʻilo kuo fili ia ʻe he ʻEikí ke hoko ko e bpule kiate kimoua, pea ʻoku tupu ia ʻi hoʻomo ngaahi angahalá? Vakai, te mou toe ō hake ki Selūsalema, pea ʻe tuku ʻe he ʻEikí ʻa Lēpani ki homou nimá.

30 Pea hili ʻa e lea ʻa e aʻāngeló kiate kimautolú, naʻá ne ʻalu leva.

31 Pea hili ʻa e ʻalu ʻa e ʻāngeló, naʻe toe kamata ke alāunga ʻa Leimana mo Lēmiuela, ʻo na pehē: ʻOku lava fēfē ʻe he ʻEikí ke tuku mai ʻa Lēpani ki hotau nimá? Vakai, ko e tangata mālohi ia, pea ʻokú ne mafai ke fekau ʻa e toko nimangofulu, ʻio, ʻokú ne lava foki ke tāmateʻi ʻa e toko nimangofulú; kapau ko ia, ko e hā ai ʻa kitautolu?