Ma Suhmuhslah
1 Nephi 8


Sapta 8

Lehi el liye ke sie aruhruhma ke sahk in moul—El ipeis ke fahko kac ac kena tuh sucu lal in oruh oacpacna—El liye soko osra, soko inkacnek suwohs ac ohsrihksrihk, ac ohkohk in lohsr ma afuhnlah mwet uh—Sariah, Nephi, ac Sam ipeis ke fukun sahk uh, tuhsruhk Laman ac Lemuel sruhnga. Sahp ke yac 600–592 Met Liki Kraist.

1 Ac tukun ma inge kuht tuh oracni nuh sie kain in fihtac nuhkwewa, kwewana ke kain in grain nuhkwewa, ac oacyacpac ke kain in fihtac in fukun sahk nuhkwewa.

2 Ac tukun ma inge ke pahpah tuhmuhk el muhta yen mwesis el sramsram nuh sesr, fahk: Liye, nga mwemwei sie mwemwe; kuh, ke pac kuhtwena kahs sahyac, nga liye sie aruhruhma.

3 Ac liye, ke srihpen ma nga tuh liye ah, oasr srihpac luhk in kaksakihn Leum ke srihpacl Nephi ac oacyacpac Sam; tuh oasr srihpac luhk in motko tuh elos, ac oacyacpac fihtac pucspucs lalos, ac fah moliyucklac.

4 Tuhsruhk liye, Laman ac Lemuel, nga arulacna sahngweng ke srihpowos; tuh liye, nga nuhnkuh muh nga liye ke mwemwe luhk, sie yen mwesis lohsr ac suhpwacr.

5 Ac tukun ma inge nga liye sie mukul, ac el nukum sie nuknuk fasrfasr ma nokomuhllah; ac el tuhkuh ac tu ye muhtuhk.

6 Ac tukun ma inge el sramsram nuh sihk, ac fahk nga in ukwacl.

7 Ac tukun ma inge ke nga ukwacl nga liyeyuc sifacna lah nga oasr ke sie acn lohsr ac suhpwacr.

8 Ac tukun nga fuhfahsryucsr ke lusen ao na pucspucs in lohsr uh, nga muhtwacwacack in pruhe nuh sin Leum tuh Elan pahkotwen nuh sihk, in oacna nuh ke pahkotwen wo pucspucs Lal.

9 Ac tukun ma inge tukun nga pruhe nuh sin Leum nga liye sie acn luhlahp ac mwesahs.

10 Ac tukun ma inge nga liye soko sahk, ma fahko ah luhngkihnyuck in oruh sie mwet in engan.

11 Ac tukun ma inge nga tuh som ac ipeis ke fukun sahk kac ah; ac nga liye lah ma inge arulacna emwem na pwacye, liki ma nuhkwewa ma nga ema met. Ahok, ac nga liye lah fukun sahk kac ah fasrfasr, fasrfasr liki nuhkwewa ke ma suc nga liye.

12 Ac ke nga ipeis fukun sahk kac ah ma inge nwacklah nguhnihk ke engan na yohk; ohinge, nga muhtwacwacack in kena tuh sucu luhk in ipeis ke ma inge pac; tuh nga etuh lah ma inge luhngkihnyuck yohk liki fukun sahk nuhkwewa sahyac.

13 Ac ke nga ngwetngwet raunweack acn uh, tuh sahp nga in kuh in sokwack pac sucu luhk uh, nga liye soko infacl in kof; ac kahklah oan siskac, ac oan sisken sahk soko ma nga ipeis fukun sahk kac.

14 Ac nga ngwetlah in liye lah tuhkuh oyac me; ac nga liye muhtwacwacackiyac ah ten kuhtuh; ac ke muhta ah nga liye ninac kiowos Sariah, ac Sam, ac Nephi; ac elos tu oacna elos in nuhkanlah lah elos ac som nuh oyac.

15 Ac tukun ma inge nga pahnglolos; ac nga oacyacpac tuh fahk nuh selos ke sie puhsra yohk tuh elos enenuh in tuhkuh nuh yuruk, ac ipeis ke fukun sahk, ma luhngkihnyuck yohk liki fukun sahk nuhkwewa sahyac.

16 Ac tukun ma inge elos tuh tuhkuh nuh yuruk ac oacyacpac ipeis ke fukun sahk uh.

17 Ac tukun ma inge nga tuh kena tuh Laman ac Lemuel in tuhkuh ac oacyacpac ipeis ke fukun sahk uh; ohinge, nga ngwetlah nuh ke muhtuhn infacl uh, tuh sahp nga in kuh in liyacltahlwack.

18 Ac tukun ma inge nga liyacltahlwack, tuhsruhk elos tiacna tuhkuh nuh yuruk ac ipeis ke fukun sahk uh.

19 Ac nga liye soko osra, ma ukwaclah sisken infacl uh, ac kohllah nuh ke sahk soko ma nga tuh tu we.

20 Ac nga oacyacpac liye soko inkacnek suwohs ac ohsrihksrihk, ma ukwacma na osra uh, finne nuh ke sahk soko ma nga tuh tu we; ac oacyacpac kohllah nuh ke muhtuhn unohn, nuh ke sie acn luhlahp ac mwesahs, oacna in sie facluh met.

21 Ac nga liye un mwet pucspucs, puhkantwen selos fahsr nuh met, tuh elos in kuh in sun inkacnek ma kol nuh ke sahk soko ma nga tuh tu we ah.

22 Ac tukun ma inge elos tuhkuh, ac muhtwacwacack ke inkacnek soko ma kol nuh ke sahk soko ah.

23 Ac tukun ma inge sie ohkohk in lohsr mayak; ahok, finne sie ohkohk in lohsr na upac, yohkna oruh elos suc muhtwacwacack ke inkacnek uh tuh tuhlac, tuh elos fahlac liki ac tuhlac.

24 Ac tukun ma inge nga liye kuhtuh pac mwet fahsr na nuh met, ac elos tuhkuh ac sruokyac sahflahiyacn osra soko ah; ac elos tuh fahsr na nuh met sahslah liki ohkohk in lohsr uh, sruokyacna osra soko ah, ne ke na elos tuh tuhkuh ac ipeis ke fukun sahk ke sahk soko ah.

25 Ac tukun elos ipeis ke fukun sahk ke sahk soko ah elos ngwetngwet oacna elos in mwekihnlac.

26 Ac nga oacyacpac ngwetngwet raunweack acn uh, ac liye, ke lacfahl se ke infacl in kof uh, sie lohm luhlahp ac mwesahs; ac tulac oacna in oasr yen engyeng uh, fuhlwactwack fin facluh.

27 Ac lohm sac nwacnwaclah ke mwet, kwewana mahtuh ac fuhsr, kwewana mukul ac muhtwacn; ac ohiyacn nuknuk lalos arulacna kahto; ac elos kihsen isruhn ac srihsrsrihsr ke kihfihn paholos nuh selos suc tuhkuh ac ipeis ke fukun sahk uh.

28 Ac tukun elos emweyac fukun sahk uh elos mwekihn, ke srihpaclos suc isruhnuhlos; ac elos puhtatyang nuh ke inkacnek sruhngwacyuck na tuhlac.

29 Ac inge nga, Nephi, tiac sruhmuhn kwewa kahs luhn pahpah tuhmuhk.

30 Tuhsruhk, in sihmihs ahkfototoye, liye, el liye un mwet pucspucs pac fahsr na nuh met; ac elos tuhkuh ac sruokyac sahflahiyacn osra uh; ac elos fahsr na nuh met, sihkalweacng na in lihksrweni sruokyac osra uh, ne ke na elos tuhkuh ac puhtati nuh ten ac ipeis ke fukun sahk ke sahk soko ah.

31 Ac el oacyacpac liye un mwet pucspucs pac srihke inkacnek lalos nuh ke lohm luhlahp ac mwesahs sac.

32 Ac tukun ma inge mwet pucspucs walomlah ke acn loal ke unohn uh; ac puhkantwen selos tuhlac ye muhtahl, forfor ke inkacnek sakihrihk.

33 Ac puhslac mwet suc tuh ilyak nuh lun lohm sakihrihk sac. Ac tukun elos ilyak nuh lun lohm sac elos srihsrngi kihfihn paho in isruhnyuc elos suc ipeis ke fukun sahk uh pac; tuhsruhk kuht tiac lohacng nuh selos.

34 Pa inge kahs luhn pahpah tuhmuhk: Tuh elos nuhkwewa suc lohacng nuh selos, tuh puhtatlac.

35 Ac Laman ac Lemuel tiacna ipeis ke fukun sahk uh, pahpah tuhmuhk el fahk.

36 Ac tukun ma inge tukun pahpah tuhmuhk el sruhmuhn kwewa kahs ke mwemwe kuh aruhruhma lal, ma puhkantwen, el fahk nuh sesr, ke srihpen ma inge suc el liye ke sie aruhruhma, el arulacna fosrngah kacl Laman ac Lemuel; ahok, el fosrngah tuh elos ac fah lihsyucklac liki ye muhtuhn Leum.

37 Ac el kwacfelos ke puhla nuhkwewa luhn sie pahpah na luhngse, lah elos in porongo kahs lal, lah sahp Leum El ac pahkomuhtahlos, ac tiac luhsuhltahlwack; ahok, pahpah tuhmuhk el luti nuh selos.

38 Ac tukun el luti nuh selos, ac oacyacpac palye nuh selos ke ma pucspucs, el fahk nuh selos in liyacacng masap luhn Leum; na el tui ke sramsram nuh selos.