Ai Matai Ni iVola i Nifai

1 Nifai 

Na itukutuku kei Liai kei Seraia na watina, kei iratou na luvena tagane e lewe va; na yacadratou, (tekivu mai vua ka qase duadua) ko Leimani, Lemueli, Semi, kei Nifai. Sa vakaroti Liai na Turaga me lako tani mai na vanua ko Jerusalemi, ni sa parofisaitaka vei ira na nodra ivalavala ca na tamata ka ra segata kina me ra vakamatei koya. E siga tolu na nona lako tiko kei na nona vuvale ki na lekutu. Sa kauti iratou lesu tale na tuakana ko Nifai ki na vanua ko Jerusalemi, me ratou la’ki kauta mai na kedra ivolatukutuku na Jiu. Na itukutuku ni veika rarawa eratou sota kaya. Eratou sa tauri iratou na luvei Isimeli yalewa me watidratou. Era sa lako yani vakamatavuvale ki na lekutu. Na veika rarawa kei na leqa era sota kaya ena lekutu. Na sala era muria. Era sa yacova na wasawasa. Erau sa vorati Nifai na tuakana. Sa vakataqayataki rau, ka sa taya e dua na waqa. Era sa vakatoka na vanua ko ya ko Vanuasautu. Era sa kosova na wasawasa ka yaco ki na vanua yalataki, kei na veika tale e so. Oqo na itukutuku i Nifai; se, au sa vola na itukutuku oqo koi au ko Nifai.
Wase 1

Sa tekivutaka ko Nifai na kedra itukutuku na nona tamata—Sa raica ena raivotu ko Liai e dua na duru bukawaqa ka wilika e dua na ivola ni parofisai—Sa vakacaucautaka na Kalou, sa tukuna na nona lako mai na Mesaia, ka sa parofisaitaka ni na vakarusai ko Jerusalemi—Era sa vakararawataki koya ko ira na Jiu. Rauta na 600 B.K.

Wase 2

Sa kauta ko Liai na nona matavuvale ki na lekutu ena yasa ni Wasa Damudamu—Eratou sa biuta tu mai na veika eratou taukena—Sa vakacabora e dua na isoro ko Liai vua na Turaga ka vakavulici iratou na luvena tagane me ratou muria na ivakaro—Erau sa vosa kudrukudrutaki tamadrau ko Leimani kei Lemueli—Sa talairawarawa ko Nifai ka masu ena vakabauta; sa vosa vei koya na Turaga, ka sa digitaki ko koya me liutaki iratou na tuakana. Rauta na 600 B.K.

Wase 3

Eratou sa lesu tale ki Jerusalemi na luvei Liai tagane me ratou kauta mai na peleti parasa—Sa sega ni via solia na peleti ko Lepani—Sa vakauqeti iratou ka vakayaloqaqataki iratou na tuakana ko Nifai—Sa butakoca ko Lepani na nodratou iyau ka segata me vakamatei iratou—Erau sa mokuti Nifai kei Semi ko Leimani kei Lemueli ka sa vunauci rau e dua na agilosi. Rauta na 600–592 B.K.

Wase 4

Sa vakamatei Lepani ko Nifai ena nona ivakaro na Turaga ka taura rawa na peleti parasa ena ivadi qaseqase—Sa digitaka ko Soramu me la’ki duavata kei na vuvale i Liai ki na lekutu. Rauta na 600–592 B.K.

Wase 5

Sa vosakudrukudrutaki Liai ko Seraia—Erau sa marautaka na nodratou lesu mai na luvedrau tagane—Erau sa vakacabo isoro—E tu ena peleti parasa na volavola nei Mosese kei ira na parofita—E tukuni ena peleti ni kawa i Josefa ko Liai—Sa parofisaitaka ko Liai na veika me baleta na nona kawa kei na kena maroroi na peleti. Rauta na 600–592 B.K.

Wase 6

Sa vola ko Nifai na veika ni Kalou—Sa inaki i Nifai me vakamasuti ira na tamata me ra lako mai vua na Kalou i Eparaama me ra bula kina. Rauta na 600–592 B.K.

Wase 7

Eratou sa lesu tale ki Jerusalemi na luvei Liai tagane ka sureti Isimeli kei na nona vuvale me tomani iratou ena nodratou ilakolako—Eratou sa vakaduiduile ko Leimani kei na so tale—Sa vakayaloqaqataki rau na tuakana ko Nifai me rau vakabauta na Turaga—Erau sa vesuki koya ena dali ka nakita me vakarusai—Sa sereki o koya ena kaukauwa ni vakabauta—Erau sa kere veivosoti na tuakana—Sa vakacabo isoro, kei na isoro kama ko Liai kei na nona ilawalawa. Rauta na 600–592 B.K.

Wase 8

Sa raica ko Liai e dua na raivotu ni vunikau ni bula—Sa kania ko koya na vuana ka sa gadreva me ratou kania vakatalega kina na nona vuvale—Sa raica ko koya e dua na itautauri kaukamea, e dua na sala qiqo ka rabailailai, kei na kabu ni butobuto sa solegi ira tu na tamata—Eratou sa kania na vuanikau ko Seraia, Nifai kei Semi, ia, erau sa besetaka ko Leimani kei Lemueli. Rauta na 600–592 B.K.

Wase 9

A sa cakava e rua na iwasewase ni ivolatukutuku ko Nifai—Erau sa vakatokai me peleti i Nifai—Sa tu ena peleti lelevu na itukutuku ni veika vakavuravura; ka qarava vakatabakidua ga na veika tabu na peleti lalai. Rauta na 600–592 B.K.

Wase 10

Sa tukuna rawa ko Liai ni ra na kau vakavesu na Jiu mai vei ira na kai Papiloni—Sa tukuna ni na lako mai ena kedra maliwa na Jiu e dua na Mesaia, e dua na iVakabula, e dua na Dauveivueti—Sa tukuna talega ko Liai na nona lako mai o koya ena papitaisotaka na Lami ni Kalou—Sa tukuna ko Liai na mate kei na tucake tale ni Mesaia—Sa vakatautauvatataka ko koya na nodra veiseyaki kei na nodra vakasoqoni vata tale na Isireli ki na dua na vu ni olive—Sa tukuni koya na Luve ni Kalou ko Nifai, na isolisoli ni Yalo Tabu, kei na kena gadrevi na ivalavala dodonu. Rauta na 600–592 B.K.

Wase 11

Sa raica ko Nifai na Yalo ni Turaga ka vakaraitaki vua ena raivotu na vunikau ni bula—Sa raica ko koya na tinana na Luve ni Kalou, ka vulica na nona lako sobu mai na Kalou—Sa raica na nona papitaiso, na nona veiqaravi vakalotu, kei na nona vakamatei ena kauveilatai na Lami ni Kalou—Sa raica talega na nodratou kacivi kei na nodratou veiqaravi vakalotu na Lewe Tinikarua na iApositolo ni Lami. Rauta na 600–592 B.K.

Wase 12

Sa raica ena raivotu ko Nifai na vanua yalataki; na nodra ivalavala dodonu, na nodra caka cala, kei na nodra lutu sobu na lewena; na nona lako mai ena kedra maliwa na Lami ni Kalou; na ivakarau eratou na lewai Isireli kina na Lewe Tinikarua na Tisaipeli kei na Lewe Tinikarua na iapositolo; kei na ivakatagedegede lolovira ka dukadukali era sa tu kina o ira era sa malumalumu mai ena tawavakabauta. Rauta na 600–592 B.K.

Wase 13

Sa raica ko Nifai ena raivotu ni sa tauyavutaki na nona lotu na tevoro ena kedra maliwa na kai Matanitu Tani, na kunei kei na tawani kei Amerika, na yali ni levu na tikina macala vinaka ka talei ena iVolatabu, na nodra vuki tani mai na lotu na kai matanitu tani, na vakalesui mai ni kosipeli, na lako mai ni ivolanikalou edaidai, kei na kena tarai cake ko Saioni. Rauta na 600–592 B.K.

Wase 14

Sa tukuna e dua na agilosi vei Nifai na veivakalougatataki kei na cudru ena yaco vei ira na kai Matanitu Tani—E rua wale ga na lotu: Na lotu ni Lami ni Kalou kei na lotu ni tevoro—Era sa vakacacani na Yalododonu ni Kalou ena veivanua kecega mai na lotu vakaitamera ka vakasisila—Ena qai vola na iapositolo ko Joni me baleta na ivakataotioti kei vuravura. Rauta na 600–592 B.K.

Wase 15

Era na ciqoma na kosipeli na kawa i Liai ena veisiga mai muri mai vei ira na kai Matanitu Tani—Sa vakatautauvatataki na vakasoqoni vata i Isireli kei na dua na vu ni olive ka ra semati tale vua na veitabana dina—Sa vakadewataka ko Nifai na raivotu ni vunikau ni bula ka tukuna na lewa dodonu ni Kalou ena nodra wasei na caka ca mai vei ira na ivalavala dodonu. Rauta na 600–592 B.K.

Wase 16

Sa ka dredre na dina vei ira na tamata ca—Eratou sa vakamau na luvei Liai tagane kei iratou na luvei Isimeli yalewa—Sa vakaraitaka na Liaona na nodra sala ena loma ni lekutu—Sa volai ena Liaona na itukutuku mai vua na Turaga ena veigauna e so—Sa mate ko Isimeli; sa vosa kudrukudru na nona vuvale ena vuku ni veika rarawa. Rauta na 600–592 B.K.

Wase 17

Sa vakaroti ko Nifai me taya e dua na waqa—Eratou sa saqati koya na tuakana—Sa vunauci iratou ko koya ena nona tukuna na veika sa vakayacora oti na Kalou vei ira na Isireli—Sa vakasinaiti ko Nifai ena kaukauwa ni Kalou—Eratou sa vakatabui na tuakana me ratou tarai koya de ratou na raqosa me vaka na gasau madu. Rauta na 592–591 B.K.

Wase 18

Sa ta oti na waqa—Sa tukuni na nodrau sucu ko Jekope kei Josefa—Era sa biubiu na ilawalawa ki na vanua yalataki—Eratou sa tovata kei ira na vakasausa ka talaidredre na luvei Isimeli tagane kei iratou na watidratou—Sa vesu ko Nifai, ka sa biliga lesu na waqa e dua na cava rerevaki—Sa sereki ko Nifai, ka sa ruru na cava ena nona masu—Era sa yaco ki na vanua yalataki na tamata. Rauta na 591–589 B.K.

Wase 19

Sa buli peleti mai na oa ko Nifai ka vola na kedra itukutuku na nona tamata—Ena lako mai na Kalou ni Isireli ni oti e ono na drau na yabaki mai na gauna a biuti Jerusalemi mai kina ko Liai—Sa tukuna ko Nifai na Nona vakararawataki kei na Nona mate ena kauveilatai—Era na beci na Jiu ka veiseyaki me yacova na siga mai muri, ka ra na qai lesu tale vua na Turaga. Rauta na 588–570 B.K.

Wase 20

Sa vakatakila na Turaga na Nona inaki vei Isireli—Sa digitaki ko Isireli mai na lovo bukawaqa ni veivakararawataki ka me na lako yani mai Papiloni—Vakatautauvatataka na Aisea 48. Rauta na 588–570 B.K.

Wase 21

Sa na dua na rarama vei ira na kai Matanitu tani na Mesaia, ka na sereki ira na kaivesu—Ena vakasoqoni vata ko Isireli ena kaukauwa ena veisiga mai muri—Era na tamadra dauveisusu ko ira na tui—Vakatautauvatataka na Aisea 49. Rauta na 588–570 B.K.

Wase 22

Ena veiseyaki ko Isireli e delai vuravura taucoko—Era na susugi ka karoni Isireli ena kosipeli ko Ira Na Kai Matanitu tani ena veisiga mai muri—Ena vakasoqoni ka vakabulai ko Isireli, ka ra na vakamai me vaka na vu ni co ko ira na ivalavala ca—Ena vakarusai na nona matanitu na tevoro, ka na vesu ko Setani. Rauta na 588–570 B.K.