1 Ia oqo, sa vosataka e vuqa tale na ka ko ^aJekope vei ira na noqu tamata ena gauna ko ya; ia na veika wale ga oqo au sa vakarota me ra ^bvolai wale ga, ni sa rauta vinaka na veika au sa vola.

2 Ia oqo koi au, ko Nifai, au sa vola e so tale na vosa i ^aAisea, ni sa rekitaka na yaloqu na nona vosa. Ni’u na vakatautauvatataka na nona vosa vei ira na noqu tamata, ka’u na vakauta yani vei ira kece na noqu kawa, ni sa raica vakaidina ko koya na noqu ^bDauveivueti, me vaka ga au a raici koya.

3 Ia sa ^araici koya talega, ko Jekope na taciqu, me vaka na noqu a raici koya; o koya au na vakauta kina na nodrau vosa vei ira na noqu kawa me vakadinadinataka vei ira ni sa dina na noqu vosa. Ia ena nodratou vosa e lewe ^btolu, sa kaya na Kalou, au na vakataudeitaka kina na noqu vosa. Ia, ena tala na Kalou e vuqa tale na ivakadinadina, ka na vakadinadinataka kina na nona vosa kecega.

4 Raica, sa dau taleitaka na yaloqu me’u ^avakadinadinataka vei ira na noqu tamata na dina ni nona ^blako mai na Karisito; ni sai koya oqo na inaki sa soli kina na ^clawa i Mosese; kei na veika kece sa solia na Kalou vei ira na tamata, mai na ivakatekivu kei vuravura, sa vakatakilakilataki Koya.

5 Ka sa daurekitaka talega na yaloqu na nona ^aveiyalayalati na Turaga ka a cakava vei ira na noda qase; io, sa rekitaka na yaloqu na nona loloma soli wale, kei na nona lewa dodonu, kei na kaukauwa, kei na loloma cecere ena inaki cecere ka tawamudu ni veisereki mai na mate.

6 Ka sa dau taleitaka na yaloqu me’u vakadinadinataka vei ira na noqu tamata ni kevaka ena sega ni lako mai na Karisito ^aera na rusa na tamata kecega.

7 Ni kevaka ^ae sega ni dua na Karisito sa sega ni dua na Kalou; ka kevaka e sega ni dua na Kalou sa na sega koi keda, ni na sega ni dua na ^bveibuli. Ia sa dua tiko na Kalou, ka sai koya na Karisito, ka na lako mai ena taucoko ni nona gauna.

8 Ia oqo au sa vola e so na vosa i Aisea, me ra laveta cake kina na yalodra ka marau ena vukudra na tamata kecega, ko ira kece na noqu tamata era na raica na vosa oqo. Ia sai koya oqo na vosa, ka rawa mo dou vakaibalebaletaka vei kemudou kei ira na tamata kecega.