1 Ug nahitabo nga sa mga adlaw ni Ahaz nga anak nga lalaki ni Jotham, anak nga lalaki ni Uzzias, hari sa Juda nga si Resin nga hari sa Siria, ug si Peka nga anak nga lalaki ni Remalias nga hari sa Israel, mitungas padulong sa Jerusalem sa pagpakiggubat niini, apan dili makabuntog niini.

2 Ug nasabwag kini sa balay ni David, nga nag-ingon: Ang Siria nakigkunsabo sa ^aEphraim. Ug ang iyang kasingkasing natandog, ug ang kasingkasing sa iyang katawhan, sama sa mga kahoy sa kalasangan nga natandog sa hangin.

3 Dayon ang Ginoo miingon ngadto kang Isaias: Lakaw karon aron makigkita kang Ahaz, ikaw ug si ^aShearjashub nga imong anak nga lalaki, sa tumoy sa kanal ibabaw sa linaw dapit sa taas nga dalan sa mga tiglabada;

4 Ug sultihi siya: Patalinghog, ug hilom; ^aayaw kahadlok, ni motalaw niining duha ka nag-aso nga pabilo, niining mabangis nga kasuko ni Resin sa Siria, ug sa anak nga lalaki ni Remalias.

5 Tungod kay ang Siria, Ephraim, ug ang anak nga lalaki ni Remalias, naglaraw og daotan batok kanimo, nga nag-ingon:

6 Atong sulungon ang Juda ug atong samukon kini, ug atong ^alungkabon kini alang kanato, ug magbutang kita og hari sa taliwala niini, oo, ang anak nga lalaki ni Tabeel.

7 Sa ingon niini miingon ang Ginoong Dios: Dili kini makapadayon, ni kini mahitabo.

8 Kay ang pangulong dakbayan sa Siria mao ang Damasco, ug ang pangulong dakbayan sa Damasco, mao ang Resin; ug sulod sa kan-uman ug lima ka tuig ang Ephraim mabungkag aron dili na kini usa ka nasod.

9 Ug ang pangulong dakbayan sa Ephraim mao ang Samaria, ug ang pangulo sa Samaria mao ang anak nga lalaki ni Remalias. Kon kamo ^adili motuo segurado nga dili kamo malig-on.

10 Dugang pa, ang Ginoo namulong pag-usab ngadto kang Ahaz, nga nag-ingon:

11 Pangayo og ^atimailhan gikan sa Ginoo nga imong Dios; pangayoa kini gikan man sa kinahiladman, o gikan sa kinatas-an.

12 Apan si Ahaz miingon: Ako dili mangayo, ni ako ^amotintal sa Ginoo.

13 Ug miingon siya: Paminaw kamo karon, O balay ni David; gamay ra ba nga butang alang kaninyo ang paghasol sa mga tawo, apan hasolon ba usab diay ninyo ang akong Dios?

14 Busa, ang Ginoo mismo mohatag kaninyo og timailhan—Tan-awa, usa ka ^abirhen ang manamkon, ug manganak og usa ka anak nga lalaki, ug pagatawagon ang iyang ngalan og ^bImmanuel.

15 Mantikilya ug dugos ang iyang kaonon, aron mahibalo siya nga mobalibad sa daotan ug mopili sa maayo.

16 Kay sa dili pa ang ^abata makahibalo nga mobalibad sa daotan ug mopili sa maayo, ang yuta nga inyong gidumtan pagabiyaan sa ^bduha niya ka hari.

17 Ang Ginoo ^amopadangat diha kaninyo, ug sa inyong katawhan, ug sa balay sa inyong amahan, sa mga adlaw nga wala pa sukad moabot gikan sa mga adlaw nga ang ^bEphraim mibulag gikan sa Juda, nga hari sa Asiria.

18 Ug mahitabo nga niana nga adlaw ang Ginoo ^amotawag og kusog sa langaw nga tua sa kinalay-ang bahin sa Ehipto, ug sa putyukan nga tua sa yuta sa Asiria.

19 Ug manuol sila, ug mamahulay silang tanan sa mamingaw nga mga walog, ug sulod sa mga lungag sa dagkong mga bato, ug sa tanang katunokan, ug sa tanang kasagbotan.

20 Sa mao gihapon nga adlaw ang Ginoo ^amokiskis gamit ang binayaran nga labaha, pinaagi kanila nga naa sa pikas nga suba, pinaagi sa ^bhari sa Asiria, sa ulo, ug sa balhibo sa mga tiil; ug kini usab mohurot sa bungot.

21 Ug mahitabo nga niana nga adlaw, ang usa ka tawo ^amoatiman og usa ka nati nga baka ug duha ka karnero;

22 Ug kini mahitabo, tungod sa kadaghan sa gatas nga ikahatag niini siya magakaon og mantikilya; kay mantikilya ug dugos ang makaon sa tanan nga nahibilin sa yuta.

23 Ug mahitabo nga niana nga adlaw, ang matag dapit mamahimo nga dapit, diin kanhi adunay liboan ka punoan sa ubas nga nagkantidad og tinaglibo nga mga ^asalapi, matugkan og mga sampinit ug mga tunok.

24 Dala ang mga panâ ug mga gapasan ang mga tawo mangadto didto, tungod kay ang tibuok nga dapit mamahimong kasampinitan ug katunokan.

25 Ug ang tanang kabungtoran pagakubkubon gamit ang piko, walay moadto nga mahadlok sa mga sampinit ug mga tunok; apan mamahimo kini nga tugwayanan sa mga baka, ug kayatak-yatakan sa ^agagmay nga baka.