1 Maysa pay, kinunana kaniak ti balikas ti Apo: Mangalaka iti dakkel a papiro, ket isuratmo itoy babaen ti pluma ti tao, maipanggep ken ni ^aMaher-salal-has-baz.

2 Ket nangalaak kadagiti napudno a ^asaksi nga agsurat, ni Uria a saserdote, ken ni Zacarias nga anak a lalaki ni Jeberechiah.

3 Ket napanak iti ^ababai a propeta; ket naginaw ken nagpasngay iti anak a lalaki. Kalpasanna kinuna ti Apo kaniak: Panaganam iti Maher-salal-has-baz.

4 Ta kitaem, ti ^aubing ket ^bawanto ti pannakaammona nga isangit, ti amak ken ti inak, sakbay a maipanawto ti kinabaknang ti Damasco ken ti ^cnasamsam iti Samaria iti imatang ti ari ti Asiria.

5 Ket nakisao manen ti Apo kaniak, a kinunana:

6 Ta agingga a saan nga awaten daytoy a tattao dagiti dandanum ti ^aSiloe nga agayus a naannayas, ken agrag-o iti ^bRezin ken ti lalaki nga anak ni Remalias;

7 Ita ngarud, kitaem, pasalpaen ti Apo ^akadakuada dagiti dandanum ti karayan, a napigsa ken adu, a ti laeng ari ti Asiria ken isu amin a dayagna; ket agayusto kadagiti isu amin a pagayusanna, ken agayus kadagiti isu amin nga igigidna.

8 Ket ^aisu agayusto agingga iti Juda; manglayusto ken aglasatto, dumanonto pay agingga iti tengnged; ket ti panangyukradna kadagiti payakna saknapennanto ti kaakaba ti dagam, O ^bImmanuel.

9 ^aMakilangenkayo, O dakayo a tattao, ket maburburakkayo; ket dumngegkayo, dakayo nga adda kadagiti adayo a pagilian; agbarikeskayo, ket maburburakkayo; agbarikeskayo, ket maburburakkayo.

10 Agpipinnatigmaankayo a sangkamaysa, ket awanto ti kapapaayanna; baliksenyo ti sao, ket saanto a mataginayon; ^aagsipud ta ti Dios adda kadakami.

11 Agsipud ta kasta ti insaona kaniak a binuyogan ti napigsa nga imana, ken binilinnak a saannak a magmagna iti dalan daytoy a tattao, a kinunana:

12 Saanmo a kunaen, Maysa nga ^apanagkakappon, a maipapan iti amin a sawento daytoy a tao, Maysa a panagkakappon; saankayo met umamak iti panagamakda, wenno agbuteng.

13 Pasatuen a mismo ti Apo ti Pangen, ket isu ^akoma ti kaamakyo, ken isu koma ti kabutengyo.

14 Ket isunanto ti maipaay a ^asantuario; ngem ^bbato a pakaitibkolan, ken bato a pakarurodan dagiti balay ti Israel, para iti palab-og ken silo kadagiti agtaeng iti Jerusalem.

15 Ket adunto kadakuada ti ^amaitibkol ken matnag, ken mablo, ken masiloan, ken matiliw.

16 Reppetem ti pammaneknek, selloam ti ^alinteg dagiti disipulok.

17 Ket urayekto ti Apo, nga ^aaglinged ti rupana kadagiti balay ni Jacob, ket sapulekto.

18 Kitaen, siak ken dagiti ubbing nga inted kaniak ti Apo maipaayna a dagiti ^apagilasinan ken datdatag iti Israel a naggapu iti Apo dagiti Pangen, nga agtaeng iti Bantay Zion.

19 Ket intono kunaenda kadakayo: Sapulem kadakuada ti ^aespiritista, ken kadagiti ^bsalamangkero nga agsirsirip ken agtanabutob—^csaan aya a nasken koma nga umuman dagiti tattao iti Diosda tapno makiuman dagiti sibibiag ^dmanipud kadagiti natay?

20 Iti linteg ken iti pammaneknek; ket no ^aisuda ket saan nga agsao a kas mayannurot iti daytoy a balikas, gapu daytoy ta awan kadakuada ti lawag.

21 Ket ^aisuda ket aglasatto iti nakaro a sennaay ken panagbisin ken bisin; ket mapasamakto nga inton mabisinandan, agalimutengdanto, ket ilunoddanto ti ari ken ti Diosda, ket tumangadda.

22 Ket iturongdanto ti panagkitada iti daga ket kinariribuk, ken kinasipnget, kinakudrep ti ladingit ti makitada, ket mayabogdanto iti kasipngetan.