Vaj Lug Kub
2 Nifais 2


Tshooj 2

Txoj kev txhiv dim los dhau ntawm tus Mexiyas Dawb Huv—Txoj kev ywj siab xaiv yog ib qho tseem ceeb rau txoj kev muaj sia ua neej nyob thiab txoj kev vam meej—Adas tau poob xwv kom thiaj yuav muaj taus tib neeg—Neeg muaj kev ywj siab xaiv txoj kev ywj siab thiab txoj sia nyob mus ib txhis. Kwv yees li 588–570 xyoo ua ntej yug Yexus.

1 Thiab nim no, Yakhauj, kuv hais rau koj: Koj yog kuv thawj tug tub uas yug nyob rau hauv lub caij uas kuv muaj kev txom nyem nyob rau hauv hav zoov. Thiab saib seb, thaum koj tseem yau koj tau ntsib kev kub ntxhov thiab ntau yam kev nyuaj siab, vim txoj kev ua nruj ua tsiv ntawm koj cov tij laug.

2 Tiam sis, Yakhauj, kuv thawj tug me tub uas yug nyob hauv hav zoov, koj twb paub Vajtswv tej kev tseem ceeb; thiab nws yuav muab koj tej kev kub ntxhov pub ua kev zoo siab rau koj.

3 Yog li ntawd, koj tus ntsuj plig yuav tau txais koob hmoov, thiab koj yuav ua neej nyob tso siab plhuav nrog koj tus tij laugNifais; thiab koj lub caij ua neej nyob yuav tsum cia siv ua hauj lwm pub rau koj tus Vajtswv. Yog li ntawd, kuv paub tias koj twb raug txhiv dim lawm, vim koj tus Txhiv Dim txoj kev ncaj ncees; vim koj tau pom lawm tias thaum txog lub caij uas muaj txhij txhua lawm nws yuav coj txoj kev cawm seeg los rau tib neeg.

4 Thiab koj tau pom nws lub yeeb koob thaum uas koj tseem hluas; yog li ntawd, koj yuav tau txais koob hmoov tib yam li cov uas nws yuav los qhuab qhia rau nyob hauv sab cev nqaij daim tawv thiab; vim tus Ntsuj Plig yeej zoo tib yam li qub, nag hmo, hnub no, thiab mus ib txhis li. Thiab yeej tau npaj txoj kev txij li puag thaum tib neeg tau ua txhaum los, thiab txoj kev cawm seej yog ib txog uas tau dawb.

5 Thiab neeg tau raug qhuab qhia txaus nkaus es kom lawv paub qhov zoo tawm ntawm qhov phem. Thiab tau muab txoj kev cai rau neeg. Thiab los ntawm txoj kev cai tsis muaj ib tug twg uas yuav tsis muaj txim; los sis los ntawm txoj kev cai neeg raug ntiab khiav mus. Muaj tseeb tiag, los ntawm txoj kev cai ntawm sab nqaij tawv lawv tau raug ntiab khiav mus; thiab los ntawm txoj kev cai sab ntsuj plig lawv kuj yuav piam sij los ntawm qhov uas zoo, thiab yuav los mus ua ib cov neeg txom nyem qias ntsuav mus ib txhis li.

6 Yog li ntawd, txoj kev txhiv dim tsuas muaj los hauv thiab dhau los ntawm Mexiyas tus uas Dawb Huv los xwb; vim nws yog tus uas muaj kev zoo thiab kev tseeb nplua mias.

7 Saib seb, nws cia nws tus kheej los ua ib qho kev theej txhoj rau txoj kev txhaum, los teb tej uas txoj kev cai yuav tsum muaj pub rau cov uas muaj lub siab mob thiab muaj lub siab xav ua zoo; thiab yuav tsis muaj leej twg hlo li uas yuav muaj cuab kav teb tau txoj kev cai tej lus.

8 Yog li ntawd, yog ib qho uas tseem ceeb kawg nkaus uas muab tej xwm txheej no ua kom tej neeg uas nyob hauv ntiaj teb no paub, es kom lawv yuav paub tau tias tsis muaj ib tug twg uas yuav muaj cuab kav mus nyob tau hauv Vajtswv qhov chaw, tsuas yog los ntawm txoj hauj lwm zoo, txoj kev hlub, thiab txoj kev zoo ntawm tus Mexiyas Dawb Huv xwb thiaj li yuav tau, tus uas tau tso nws txoj sia raws li thaum nws nyob hauv ntiaj teb, thiab tau rov qab txais txoj sia dua los ntawm tus Ntsuj Plig lub hwj chim, xwv kom nws yuav coj tau cov neeg tuag sawv hauv txoj kev tuag rov qab los, nws yuav yog thawj thawj tug uas sawv hauv qhov tuag rov qab los.

9 Yog li ntawd, nws yog thawj cov txiv rau Vajtswv, npaum li uas nws yuav thov pab rau noob neej sawv daws. Thiab lawv cov uas ntseeg nws yuav dim lawv lub txim.

10 Thiab vim txoj kev thov pab rau sawv daws, neeg txhua tus kom los mus cuag tau Vajtswv; yog li ntawd, lawv yuav los sawv ntawm nws xub ntiag, yuav raug nws txiav txim mus raws li txoj kev tseeb thiab txoj kev dawb huv uas nws muaj. Yog li ntawd, tej uas txoj kev cai yuav tsum muaj ua raws li Tus Dawb Huv tau muab lawm, yuav tsum kom nws muab txoj kev rau txim coj los txuas rau txoj kev cai, txoj kev rau txim uas muab txuas rau txoj kev cai yog txoj kev fab ntxeev rau txoj kev zoo siab uas tau npaj lawm rau txoj kev cai, los teb tej uas yuav tsum muaj ntawm txoj kev theej txhoj—

11 Vim nws yuav tsum muaj, tias txhua txhia yam nyias yeej muaj nyias qhov fab ntxeev. Yog tsis muaj li ntawd, kuv thawj tug me tub uas yug nyob hauv hav zoov ces, yeej yuav muaj tsis tau txoj kev ncaj ncees, thiab txoj kev phem, thiab txoj kev dawb huv los sis txoj kev nyuaj siab, thiab qhov phem los sis qhov zoo. Yog li ntawd, txhua txhia yam yuav tsum sau los ua ib qho; yog li ntawd, yog hais tias nws yuav tsum yog ib yam xwb ces nws yeej nyob zoo li uas tuag lawm, uas nyob tsis muaj txoj sia thiab tsis txawj ploj tuag, los sis txawj lwj los tsis txawj lwj, zoo siab los sis nyuaj siab, thiab tsis muaj qhov hnov los sis qhov tsis hnov.

12 Yog li ntawd, nws ho yuav tsim nyog tsim rau ib yam uas tsis muaj nqis dab tsi li; yog li ntawd thaum kawg yuav tsis muaj lub hom phiaj rau txoj kev uas tsim nws. Yog li ntawd, qhov no yeej yuav rhuav Vajtswv lub tswv yim thiab nws tej hom phiaj uas nyob mus ib txhis, thiab kuj yuav rhuav lub hwj chim, thiab txoj kev hlub, thiab txoj kev txim lij ntawm Vajtswv.

13 Thiab yog nej yuav hais tias twb tsis muaj kev cai, nej kuj yuav hais tias twb tsis muaj kev txog kev txhaum. Yog nej yuav hais tias twb tsis muaj kev txog kev txhaum, nej kuj yuav hais tias tsis muaj txoj kev ncaj ncees. Thiab yog hais tias tsis muaj txoj kev ncaj ncees ces yeej tsis muaj txoj kev zoo siab. Thiab yog hais tias tsis muaj txoj kev ncaj ncees los sis txoj kev zoo siab ces yeej yuav tsis muaj txoj kev rau txim los sis txoj kev txom nyem. Thiab yog hais tias tsis muaj tej no ces yeej tsis muaj Vajtswv. Thiab yog hais tias tsis muaj Vajtswv ces yeej tsis muaj peb, thiab lub ntiaj teb; vim yog yuav tsis tau muaj txoj kev tsim tej yam no ces yuav tsis muaj dab tsi uas ua tau hauj lwm los sis raug tej hauj lwm uas lwm yam ua; yog li ntawd, txhua txhia yam yuav tsum ploj mus kom tas.

14 Thiab nim no, kuv cov me tub es, kuv hais tej yam xwm no rau nej xwv kom tau kawm thiab tau zoo; vim yeej muaj ib tug Vajtswv, thiab nws tau tsim ib puas yam tsav, tsis hais tej ntuj ceeb tsheej los sis lub ntiaj teb no, thiab tsim txhua txhia yam uas nyob hauv huv tib si, tsis hais yam uas ua tau hauj lwm thiab yam uas ho raug tej hauj lwm uas lwm yam ua.

15 Thiab kom coj tau nws tej hom phiaj uas nyob mus ib txhis li los rau neeg thaum kawg, tom qab uas nws tau tsim peb thawj nkawg niam txiv, thiab tej tsiaj nruab nrag thiab tej noog uas ya saum nruab ntug, thiab qhov kawg, txhua txhia yam tsav uas tau raug tsim, nyias yeej yuav tsum muaj nyias qhov fab ntxeev; twb ib yam li tsob txiv ntoo uas raug txwv tsis pub noj yog tsob ntoo uas cawm neeg txoj sia tus yeeb ncuab; ib tsob qab zib hos ib tsob ho iab.

16 Yog li ntawd, tus Tswv uas yog Vajtswv thiaj tau pub rau tib neeg kom nws yuav muaj kev ywj siab xaiv ua ub ua no rau nws tus kheej. Yog li ntawd, tib neeg yuav ua tsis tau dab tsi rau nws tus kheej tsuas yog nws yuav tsum raug ib tug los sis lwm tus ntxias xwb thiaj li yuav tau.

17 Thiab kuv, Lihais, raws li tej uas kuv tau nyeem los lawm, yuav tsum muaj hais tias Vajtswv ib tug tim tswv, raws li tej uas tau sau cia lawm, tau poob puag saum ntuj ceeb tsheej los; yog li ntawd, nws tau rais los mus ua ib tug dab, uas tau nrhiav ua tej uas phem rau Vajtswv.

18 Thiab vim tias nws tau poob saum ntuj ceeb tsheej los, thiab tau rais los mus ua ib tug uas nyuaj siab mus ib txhis li, nws kuj tau nrhiav ua kom tib neeg sawv daws nyuaj siab tib yam li nws thiab. Yog li ntawd, nws thiaj tau hais rau Evas, muaj tseeb tiag twb yog tus nab txwj nab laug, uas yog tus dab, tus uas yog, leej txiv ntawm txhua txoj kev dag, yog li ntawd nws thiaj hais tias: Cia li noj cov txiv ntoo uas tau txwv lawm, thiab neb yeej yuav tsis tuag, tiam sis neb yuav zoo tib yam li Vajtswv, yuav paub qhov phem thiab qhov zoo.

19 Thiab tom qab uas Adas thiab Evas tau noj cov txiv uas tau txwv lawm nkawd thiaj tau raug ntiab khiav tawm ntawm lub Vaj Edees, mus ua liaj ua teb.

20 Thiab nkawd thiaj tau muaj tub muaj ki; muaj tseeb tiag, neeg txhua leej txhua tus uas nyob hauv ntiaj teb no twb yog nkawd tsev neeg.

21 Thiab tib neeg tej hnub nyoog uas ua neej nyob thiaj raug muab ua kom ntev, raws li Vajtswv pom zoo, es kom lawv yuav hloov siab lees txim thaum uas lawv tseem ua neej nyob no; yog li ntawd, lawv txoj kev ua neej thiaj tau rais los mus ua ib txog kev sim siab, thiab lawv lub caij lub nyoog thiaj raug muab ua kom ntev, raws nraim li tej lus txib uas tus Tswv uas yog Vajtswv tau muab rau noob neej. Vim nws tau muab txoj lus txib es kom neeg txhua leej txhua tus yuav tsum hloov siab lees txim; vim nws tau qhia rau neeg sawv daws tias lawv tau yuam kev lawm, vim yog lawv tej niam tej txiv txoj kev txhaum.

22 Thiab nim no, saib seb, yog hais tias Adas tsis tau ua txhaum nws yeej yuav tsis tau poob, tiam sis nws kuj tseem yuav nyob rau hauv lub Vaj Edees. Thiab txhua txhia yam uas tau raug tsim los yeej yuav tsum tseem nyob li qub li thaum uas tsim lawv; thiab lawv yuav tsum nyob li ntawd mus ib txhis li, thiab yuav tsis muaj qhov kawg li.

23 Thiab nkawd yeej yuav muaj tsis taus tub ki; ces nkawd yeej tseem yuav nyob hauv qhov chaw uas tsis muaj txog muaj txhaum, yuav tsis muaj kev xyiv fab, vim lawv tsis tau paub kev nyuaj siab; tsis paub ua yam uas zoo, vim lawv tsis tau paub kev txhaum.

24 Tiam sis saib seb, txhua txhia yam tsav tau ua tiav mus raws li nws tus uas paub ib puas yam tsav lub tswv yim.

25 Adas tau poob xwv kom thiaj yuav muaj taus tib neeg; thiab muaj tib neeg xwv kom lawv yuav muaj kev xyiv fab.

26 Thiab thaum txog lub caij uas tau teem tseg cia lawm tus Mexiyas yuav los, xwv kom nws thiaj yuav txhiv tau noob neej dim ntawm txoj kev poob. Thiab vim tias lawv tau raug txhiv dim ntawm txoj kev poob lawv rais tau los mus ua ib cov neeg uas nyob ywj siab mus ib txhis li, paub qhov zoo los ntawm qhov phem; muaj cuab kav ua raws li lawv lub siab nyiam thiab yuav tsis raug yuam kom ua ub ua no, tsuas yog los ntawm txoj kev cai rau txim nyob rau hauv hnub kawg uas yog ib hnub loj xwb thiaj li yuav yuam lawv ua, raws nraim li tej lus txib uas Vajtswv twb tau muab lawm.

27 Yog li ntawd, neeg yeej nyob ywj siab thaum uas lawv tseem ua neej nyob; thiab txhua txhia yam tsav uas neeg yuav tsum muaj yeej tau raug muab rau lawv. Thiab lawv muaj kev ywj siab xaiv txoj kev nyob ywj siab thiab txoj sia nyob mus ib txhis, los dhau ntawm tus Neeg Nruab Nrab uas tseem ceeb ntawm neeg sawv daws txhua leej txhua tus, los sis xaiv txoj kev poob cev qhev thiab txoj kev ploj kev tuag, mus raws nraim li txoj kev poob cev qhev thiab lub hwj chim ntawm tus dab; vim nws nrhiav ua kom neeg sawv daws txhua leej txhua tus ua neeg nyuaj siab zoo ib yam li nws tus kheej.

28 Thiab nim no, kuv cov me tub es, kuv xav kom nej yuav cia siab rau tus Neeg Nruab Nrab uas tseem ceeb, thiab cuab pob ntseg mloog nws tej lus txib uas tseem ceeb; thiab cia siab rau nws tej lus, thiab xaiv yuav txoj sia nyob mus ib txhis, uas mus raws li nws tus Ntsuj Plig Dawb Huv lub siab nyiam.

29 Thiab tsis txhob xaiv yuav txoj kev tuag ua nyob mus ib txhis, uas raws li cev nqaij daim tawv lub siab nyiam thiab qhov kev phem uas nyob hauv lub cev, qhov uas muab lub hwj chim rau tus dab phem kom tshum tau neeg mus ua nws qhev, kom coj tau nej mus rau hauv ntuj txiag teb tsaus, es nws thiaj yuav muaj hwj chim kav tau nej nyob hauv nws lub nceeg vaj.

30 Kuv tau hais tej lus no qho me ntsis rau nej sawv daws, nyob rau hauv kuv lub neej sim siab thaum kawg no, kuv cov me tub; thiab kuv tau xaiv yam uas zoo, raws li tus yaj saub tej lus. Thiab kuv tsis muaj lwm yam dab tsi tsuas yog xav kom nej sawv daws tsuas muaj kev tau zoo kav ib txhis li xwb. Amees.