1 ’E i muri iho i tō te Mesia ti’ara’a mai mai te pohe mai, ’ei reira ’oia e fa’a’ite mai ai iāna iho ia ’outou, e tā’u mau tamari’i, ’e i tō’u mau taea’e herehia ; ’e te mau parau ’o tāna e parau atu ia ’outou na, e riro ïa ’ei ture ’o tei tītauhia ia ’outou ’ia ha’apa’o.

2 Inaha ho’i, tē parau atu nei au ia ’outou na, ’ua ’ite na vau ē ’ia hope te mau u’i e rave rahi, e tupu mai te mau tama’i rahi ’e te mau mārōra’a i rotopū i tō’u ra nūna’a.

3 ’E ’ia tae mai te Mesia, e fa’a’itehia mai ai te mau tāpa’o o tōna ra fānaura’a i tō’u ra nūna’a, ’e tōna ato’a pohera’a e ti’afa’ahoura’a ; e mea māere ’e te mata’u rahi taua mahana ra i te feiā parauti’a ’ore ; nō te mea e pohe rātou ; e pohe ho’i rātou i te mea i tīahi ’ē atu na rātou i te mau peropheta ’e te feiā mo’a, ’e i pēhi ia rātou i te ’ōfa’i ’e i taparahi ho’i ia rātou ; nō reira e tae roa atu ai te pi’i o te toto o te feiā mo’a i ni’a i te Atua ra mai raro mai i te repo ia rātou ra.

4 Nō reira, ’o te ta’ata te’ote’o ato’a, ’e ’o tē rave i te ’ohipa parauti’a ’ore, e ’ama roa ïa rātou i te mahana e tae mai ra, tē nā reira mai ra te Fatu Sabaota ra, ’e e riro ho’i rātou mai te ’aihere ra.

5 ’E ’o rātou ’o tē taparahi i te mau peropheta ’e te feiā mo’a, e horomi’i te mau hōhonura’a o te fenua ia rātou, tē nā reira mai ra te Fatu Sabaota ra ; ’e e tāpo’i mai te mau mou’a ia rātou, ’e e puehu ’ē rātou i te mau pūāhiohio, ’e e ma’iri mai te mau fare i ni’a iho ia rātou, ’e e fa’ahu’ahu’a ia rātou ’e e tāviri ia rātou mai te hu’a ra.

6 E ro’ohia ho’i rātou ’e te mau pātiri, ’e te mau uira, ’e te mau ’āueuera’a fenua, ’e te mau huru ha’amoura’a e rave rahi ; ’e te auahi o te riri o te Fatu e tupu ïa i ni’a ia rātou, ’e e riro rātou mai te ’aihere ra, ’e e pau roa ïa rātou ’ia tae i taua mahana ra, tē nā reira mai ra te Fatu Sabaota ra.

7 ’Auē ho’i te mamae, ’e te horuhoru rahi ho’i o tō’u nei vārua i te pau o tō’u ra mau ta’ata e taparahihia ra ! ’E ’ua ’ite mau vau, ’o Nephi, i te reira, ’e ’oi pau ho’i au i mua i te aro o te Fatu ; e mea ti’a rā iā’u ’ia ti’aoro atu i tō’u Atua ē : E mea tia tō mau haere’a.

8 Inaha rā, ’o te feiā parauti’a tei fa’aro’o i te mau parau a te mau peropheta, e ’aore i ha’apohe ia rātou, ’āre’a rā ’o tē ti’aturi noa ra i te Mesia ma te tīa’i māite i te mau tāpa’o ’o tē hōro’ahia mai, noa atu ā te mau hāmani-’ino-ra’a ato’a—inaha, ’o rātou te feiā e ore e pohe.

9 E fā mai rā te Tamaiti o te Parau-Tia ia rātou ; ’e e fa’aora ’oia ia rātou ; ’e e fāri’i rātou i te hau i pīha’i iho iāna, ē tae noa atu ’ua hope nā u’i e toru, ’e e hope ato’a e rave rahi nō nā u’i e maha i te pohe i roto i te parauti’a.

10 ’E ’ia hope ana’e teie nei mau mea i te tupu, e tae vave mai ïa te ha’amoura’a o tō’u ra mau ta’ata ; e noa atu ā te mamae o tō’u nei vārua, ’ua ’ite mau vau i te reira ; nō reira, ’ua ’ite au ē, e tupu mau ïa ; e ho’o rātou ia rātou iho nō te aore ; ’e nō te utu’a ho’i o tō rātou ra te’ote’o e te ma’ama’a e fāri’i rātou i te ha’amoura’a ; ’e nō te mea ho’i ’ua auraro rātou i tā te diabolo ’e ’ua mā’iti i te mau ’ohipa nō te pōiri ra, ’eiaha rā i tā te māramarama, nō reira e mea ti’a ia rātou ’ia hurihia i raro i hade ra.

11 E ’ore roa te Vārua o te Fatu e mārō i te ta’ata nei ē a muri noa atu. ’E ’ia fa’aea te Vārua i te mārō i te ta’ata nei, e tae vave mai ïa te pohe, ’e e mea ’oto roa te reira i tō’u nei vārua.

12 ’E mai tā’u ho’i i parau nō ni’a i te fa’a’ite-pāpū-ra’a i te mau ’āti Iuda ē, ’o Iesu te Mesia mau, e mea ti’a roa ïa i te mau ’Ētene ’ia fa’a’ite-pāpū-hia ē, ’o Iesu te Mesia, te Atua mure ’ore.

13 ’E e fa’a’ite mai ’oia iāna iho nā roto i te mana o te Vārua Maita’i ia rātou pā’āto’a ’o tei ti’aturi iāna ; ’oia ïa, i tō te mau nūna’a ato’a, ’e tō te mau ’ōpū ato’a, ’e tō te mau reo ato’a, ’e i te mau ta’ata ato’a, i te ravera’a i te mau semeio rarahi, ’e te mau tāpa’o, ’e te mau piri, i rotopū i te mau tamari’i a te ta’ata nei, mai te au i tō rātou fa’aro’o.

14 Inaha rā, tē tohu nei au ia ’outou nō ni’a i te mau mahana hope’a ; nō ni’a i te mau mahana e fa’atupuhia mai ai teie nei mau mea e te Fatu te Atua, i te mau tamari’i a te ta’ata nei.

15 I muri iho i te paruparura’a te fa’aro’o o tō’u ra hua’ai ’e te hua’ai o tō’u ra mau taea’e, e tō rātou ho’i taparahira’ahia e te mau ’Ētene ra ; ’oia ïa, i muri iho i tō te Fatu te Atua ha’a’atira’a ia rātou i te mau pūhapa ma te ’āua ia rātou ra, ’e te patura’a ho’i i te mau ha’apūra’a nō te haru ia rātou ; ’e i muri iho i tō rātou tu’ura’ahia i raro roa i te repo e morohi roa atu ra rātou, e pāpa’ihia ā te mau parau a te feiā parauti’a, ’e e fa’aro’ohia ā ho’i te mau pure a te feiā fa’aro’o, ’e ’o rātou ato’a tei topa i roto i te ti’aturi ’ore ra, e ’ore roa ïa rātou e ha’amo’ehia.

16 ’E ’o rātou ho’i ’o tē ha’amouhia e parau mai ïa rātou mai raro mai i te repo ra, e parau marū mai tō rātou reo mai raro mai i te repo, ’e tō rātou reo, mai te reo ïa o te hō’ē ta’ata i pohe ; ’e e hōro’a mai ho’i te Fatu te Atua i te mana iāna ’ia ti’a iāna ’ia fa’a’ite i te parau nō rātou, ’e mai te mea ra ē, nō raro mai i te repo te reira ; ’e e parau marū mai ho’i tō rātou reo mai raro mai i te repo ra.

17 ’E tē nā ’ō mai ra ho’i te Fatu te Atua : E pāpa’i rātou i te mau mea e ravehia i rotopū ia rātou ra, ’e e pāpa’ihia te reira ’e e tāpirihia i roto i te hō’ē buka, ’e ’o rātou ’o tei paruparu tō rātou fa’aro’o ra, e fa’a’erehia ïa rātou i taua mau parau ra, nō te mea ’ua tītau rātou ’ia ha’amou i te mau mea a te Atua ra.

18 Nō reira, ’o rātou tei ha’amouhia ra, ’ua ha’amou-’oi’oi-hia ïa ; ’e te rahi ato’a o taua feiā e mata’u-roa-hia ra, e riro rātou mai te ota e puehu ’ē ra—’oia ïa, tē nā ’ō mai ra te Fatu te Atua : E oti ’oi’oi te reira, mai te ’amora’a mata nei ā—

19 ’E a muri a’era, ’o rātou ’o tei paruparu tō fa’aro’o ra, e tā’irihia ïa rātou e te rima o te mau ’Ētene ra.

20 ’E ’ua fa’ateiteihia te mau ’Ētene e te te’ote’o o tō rātou iho ’ā’au, ’e ’ua turorirori rātou, ’e nō te rahi o tō rātou ’ōfa’i turorira’a, i fa’ati’a ai rātou i te mau ’ēkālesia e rave rahi ; ’ua fa’a’ino rā rātou i te mana ’e te mau semeio a te Atua, ’e ’ua ha’api’i ia rātou iho i tō rātou iho pa’ari ’e tō rātou iho ’ite, ’ia noa’a ia rātou te faufa’a ma te oro i te mata o te ta’ata ri’iri’i.

21 ’Ua fa’ati’ahia te mau ’ēkālesia e rave rahi tei fa’atupu i te mi’imi’i, ’e te mārō, ’e te fe’i’i.

22 ’E tei reira ato’a ho’i te mau pupu ’ohipa huna, mai tō te mau tau tahito ra, mai te au i te mau pupu ’ohipa huna a te diabolo, ’e ’o ’oia iho ho’i te tumu nō teie mau mea ; ’oia ïa, te tumu nō te taparahi ta’ata ’e te mau ’ohipa nō te pōiri ; ’oia ïa, ’e tē arata’i atu ra ’oia ia rātou nā te ’a’ī ma te taura vavai, ē tae noa atu ’ua ru’uru’u ’oia ia rātou i tāna mau taura pa’ari ē a muri noa atu.

23 Inaha ho’i, e tō’u mau taea’e here, tē parau atu nei au ia ’outou na, ’aore roa te Fatu te Atua e ’ohipa i roto i te pōiri.

24 ’Aore ho’i ’oia e rave i te hō’ē a’e ’ohipa, maori rā nō te maita’i o te ao nei ; ’e ’ua here ’oia i tō te ao nei, ’e ’ua hōro’a ’oia i tōna iho ora, ’ia ti’a iāna ’ia ’ume mai i te mau ta’ata ato’a iāna ra. Nō reira, ’aita ’oia i fa’aue mai i te ta’ata nei ’eiaha rātou e fāri’i i tāna ra fa’aorara’a.

25 Inaha, tē pi’i ra ānei ’oia i te hō’ē ta’ata, i te nā-’ō-ra’a atu ē : ’A haere ’ē atu iā’u nei ? Inaha, tē parau atu nei au ia ’outou na, ’Aita roa ; tē parau mai ra rā ’oia ē : ’A haere mai iā’u nei e tō te mau hope’a ato’a o te ao nei, ’a ho’o mai ai i te ū ’e te meli, ma te moni ’ore ’e ma te ho’o ’ore.

26 Inaha, ’ua fa’aue ānei ’oia i te mau ta’ata ’ia haere rātou i rāpae i te mau sunago, ’e ’aore rā i rāpae i te mau fare ha’amorira’a ? Inaha, tē parau atu nei au ia ’outou na, ’Aita roa.

27 ’Ua fa’aue mai ānei ’oia i te mau ta’ata ’eiaha rātou e fāri’i i tāna fa’aorara’a ? Inaha tē parau atu nei au ia ’outou na, ’Aita roa ; ’āre’a rā ’ua hōro’a noa mai ’oia i te reira i te mau ta’ata ato’a ; ’e ’ua poro’i mai ’oia i tōna ra mau ta’ata ’ia tītau rātou i te mau ta’ata ato’a ’ia tātarahapa.

28 Inaha, ’ua fa’aue mai ānei te Fatu i te mau ta’ata ’eiaha rātou e fāri’i i tōna ra maita’i ? Inaha tē parau atu nei au ia ’outou na, ’Aita roa ; ’āre’a rā ’ua fāna’o te mau ta’ata ato’a, te tahi ’ia au i te tahi, ’e ’aore roa te hō’ē i ’ōpanihia.

29 ’Ua fa’aue mai ’oia ē, ’eiaha roa e rave i te mau ’ohipa ha’avare a te mau tahu’a ; inaha ho’i, te mau ’ohipa ha’avare a te mau tahu’a ra, ’o tō te ta’ata ïa fa’ateiteira’a ia rātou iho ’ei māramarama i tō te ao nei, ’ia noa’a ia rātou te fa’ahanahanara’a a tō te ao nei, ’aore rā rātou i tītau ’ia maita’i Ziona ra.

30 Inaha, ’ua ’ōpani te Fatu i teie mau mea ; nō reira, ’ua hōro’a mai te Fatu te Atua i te hō’ē fa’auera’a i te nā-’ō-ra’a mai ē, e mea ti’a i te mau ta’ata ato’a ’ia fa’atupu i te here, e taua here ra ’o te aroha ïa. ’Ia ’ore te here i roto ia rātou, e mea faufa’a ’ore ïa rātou. Nō reira, mai te mea tei roto ia rātou te here, e’ita roa ïa rātou e vaiiho noa i te rave ’ohipa nō Ziona ’ia pohe.

31 ’Āre’a rā te rave ’ohipa nō Ziona, ’ia ’ohipa ’oia nō Ziona ; ’e ’ia rave rātou i te ’ohipa nō te moni, e pohe ïa rātou.

32 ’E teie fa’ahou, ’ua fa’aue mai te Fatu te Atua, ’eiaha roa te ta’ata e taparahi ; ’eiaha roa rātou e ha’avare ; ’eiaha roa rātou e ’eiā ; ’eiaha roa rātou e fa’ahiti faufa’a ’ore noa i te i’oa o te Fatu tō rātou Atua ; ’eiaha roa rātou e nounou ; ’eiaha roa rātou e tāiroiro ; ’eiaha roa rātou e mārō te tahi i te tahi ; ’eiaha roa rātou e tai’ata ; ’e ’eiaha roa rātou e rave noa atu i teie nei mau mea ; ’e ’o rātou ’o tē rave i teie mau mea, e pohe ïa.

33 E ’ere roa teie nei mau ’ohipa ’ī’ino nō ’ō mai i te Fatu ra, e rave rā ’oia i te ’ohipa maita’i i rotopū i te mau tamari’i a te ta’ata nei ; ’e ’aore roa ho’i te hō’ē mea tāna e rave nei tei ’ore i fa’a’ite-maita’i-hia i te mau tamari’i a te ta’ata nei ; ’e ’ua ani ’oia ia rātou ato’a ’ia haere mai iāna ra ’e ’ia fāri’i i tōna maita’i ; ’e ’aita roa ’oia e pāto’i i te hō’ē ’ia haere mai iāna ra, te ’ere’ere ’e te ’uo’uo, te tītī ’e te ti’amā, te tāne ’e te vahine ; ’e ’ua ha’amana’o ato’a ’oia i te feiā ’ētene ; e hō’ē ana’e rātou ato’a i mua i te Atua, te ’āti Iuda ’e te ’Ētene ato’a ho’i.